TBP Balochi

نامداریں بلوچ ھکانی باسک ڈاکٹر ماھرنگ بلوچ بیست ءُ دو مارچ 2025 ءَ چہ شال پرایمنیں زھرشانی ءِ میان ءَ گوں دگہ بی وائی سی ءِ ھمراھاں دزگیر کنگ بوتگ انت، آئی ءِ بگیری ءَ تھری ایم پی او ( 3MPO) ءِ رِد ءَ شَر نبشتہ کنگ بوتگ کہ پاکستان ءِ تہ ءَ گیشتر سیاسی باسک بید ٹرائل ءَ بندیگجاہ ءَ دارگ ءِ ھاتر ءَ کارمرز بیت –

امیدگس ءِ نیمگ ءَ اے پیسلہ گوستگیں ھپتگ ءَ آدینگ ءِ روچ ءَ بوگی بوتگ بلے پدا ھم پاکستانی انٹلی جنس ءِ ایجنسیانی زور دیگ ءَ پیسلہ دیگ بوگ ءَ نہ انت –

ھالانی رِد ءَ سوبائی سرکار پھازگی ادارھانی گوشگ ءِ پد ءَ ڈاکٹر ماھرنگ ءِ سرا زور دیگ ءَ انت کہ آ لھتے بے رھبندیں شرتانی سرا وتی دزنشان ءَ بہ جنت بلے آ ھچ وڈا منگ ءَ نہ ایں –

اے شرت کجام انت؟

اھوالکار ءُ ماھرنگ ءِ نزیکیں مردمانی رِد ءَ ریاستی ادارہ اے شرتاں منارینگ لوٹ آں:

ھر وڈیں ناشرکاریں سرپُراں سیادی نہ دارگ ءِ جار

• ھر وڈیں گلاں سیادی نہ دارگےکول کہ مھلوک تہ ءَ بے چینی پیداک کناں

1. ریاستی ادارھانی گوم ءَ مزھبی جیڑواں کمک کنگ

شکی ایں سُر پُر یا مردمانی باروا پولیس ءَ ھال دیگ

گس ءَ درآیگ یا کسے ءَ گوم ءَ گند ءُ نند ءِ ھاتر ءَ اولسر ءَ پولیس ءِ گور ءَ موکل گرگ

وانگجاہ، پارک، ھوٹل، تھیٹر، ریل ءِ اسٹیشن، ائیرپورٹ، ھر وڈیں مردمانی رش ءُ کش ایں جاھاں روگے موکل گرگ

سیاسی مچی، جلسہ، مراگش یا ھر وڈیں مردمانی مچی ءَ روگ ءَ پیسر موکل گرگ

سیاسی ءُ چاگردی تکانی رِد ءَ اے درسیں شرت کانودءَ در انت اگاں بچارے اے نزربندی ءِ برابر ایں – کانود زانت ءُ انسانی ھکانی گلانی رِد اے شرت پاکستان ءِ کانود ءُ انسانی آجوئی ءِ بگیری انت –

سرجمیں بلوچستان زھرشانی ءُ دزگیری

ڈاکٹر ماھرنگ بلوچ ءَ ھوار بی وائی سی ءِ ایندگہ رھشونانی دزگیری ءِ بگیری ءَ سرجمیں بلوچستان ءَ زھرشانی برجاہ انت – تربت، پنجگور، گوادر، ھزدار، سوراب، نوشکی، کلات ءُ آواران ءَ ھوار دگہ جاھاں زھرشانی کنگ بوگ ءَ انت –

زھرشانی ءُ روانکاں ورنا، نودربر، زالبول ءُ کماشانی مزنیں کچے گون انت کہ آ بی وائی سی ءِ سرا کریک ڈاؤن، ماھرنگ بلوچ ءَ ھوار بی وائی سی ءِ ایندگہ رھشونانی دزگیری، زورانسری آوار جنی، لٹ شاپ ءُ انسانی ھکانی لگتمالی ءِ بگیری ءَ زھرشانی کنگ ءَ انت –

ریاست ءِ ردعمل ءَ پولیس ءَ بازیں ھند ءُ دمگاں باسک دزگیر کتگ انت – لھتے جاھاں 144 کتگ ءُ مردمانی مچی ءِ سرا بندش جتگ وھدیکہ بازیں جاھاں درنگاز کنوک لٹ شاپ کتگ انت گیس جتگ انت ءُ درنگاز کنوکانی بگیری ءَ ارزی نبشتہ کتگ –

اے وئیلانی بگیری ءَ دری ڈیھاں زھرشانیاں ابید میان استمانی تکاں انسانی ھکانی گل توار چست کنگ ءَ انت کہ پاکستان درکانودی پالیسیاں ھلاس بہ کنت ءُ بی وائی سی ءِ سرا کریک ڈاؤن ءِ دارگ ءِ ھم لوٹ ءَ کنگ ءَ انت –

بلوچ یکجھتی کمیٹی کہ آئی ءِ سروکی ءَ ماھرنگ بلوچ ءُ دگہ زالبول کنگ ءَ انت اے گل ءِ زھرشانی ءُ ننداکانی درچ یکشل ءَ برجاہ انت وھدیکہ سرکار ءِ نیمگ ءَ بلوچستان ءَ اے درانگاز کنوکانی دارگے ھاتر ءَ نیٹ ءُ دگ بند کتگ انت –

ماھرنگ بلوچ ءِ دزگیری ءُ درنگاز کنوکانی سرا زوراکی ءِ بگیری ءَ گوستگیِ سَے ھپتگ انت کہ نیشنل پاٹی ءِ زھرشانی نندانک شال ءِ نزیک ءَ برجاہ انت وھدیکہ پند ءِ دارگ ءِ ھاتر ءَ شال بند کنگ بوتگ –

بلوچستان ءَ بلوچ راج ءُ انسانی ھکانی گلاں ڈاکٹر ماھرنگ ءُ ایندگہ باسکانی یل کنگ ءِ لوٹ کتگ ءُ جار جتگ کہ اگاں ریاستی زوراکی بند کنگ نہ بوتاں گڈا چدوگیشتر زھرشانی کنگ بیت انت –

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ یازدہ اپریل ءِ شپ دوازدہ ءَ سرمچاراں جیونی ءِ دمگ کپتگی ءَ چاریگی ھاتر ءَ مک کتگیں موباھل شرکت زونگ ءِ ٹاور سر ءَ اُرش کتگ ءُ اود ءَ ساڑی سرجمیں مشینری مانداشتگ اَنت ءُ تباہ کتگ اَنت-

جارکش ءَ گْوشتگ بی ایل ایف اے اُرش زمہ واری ءَ منّ اِیت ءُ موباھل شرکتاں کڈن کن ایں کہ آ وتی نیٹ ورکس ءَ بلوچ سرمچار ءُ راج بگیری ءَ زورگریں پاکستانی پوج ءُ چیریں ادارھانی کمکاری ءَ چہ پھریز بہ کن اَنت اگاں ناں اے ٹاورانی سر ءَ اُرش ءُ مشینری ءَ تاوان دیگ اُرش برجاہ بنت-

بلوچستان ءِ دمگ ھب ءِ ھند وندر ءُ شاہ نورانی ءِ نزیک ءَ دو جتاجتائیں ھنداں چہ دو مردم ءِ لاش دزکپتگ اَنت-

وندر ءِ تیاب دپی دمگ بریدہ بُنجل نزیک ءَ زر ءَ چہ یک ناشناسیں مردمے ءِ سے چار روچ کوھنیں لاشے دزکپتگ- ایدھی رِد ءَ بیران بیتگیں اُمر کساس سی پنچ سال گوشگ بیگ ءَ اِنت، بلے اشی ءِ پجّار انگت نہ بیتگ- لاش بندانی پٹ ءُ پول ءَ پد سول نادُراھجاہ ھب ءَ برگ بیتگ-

شاہ نورانی درگاہ نزیک ءَ یک مردمے ءِ لاش دزکپتگ، آئی ءِ پجّار عمران شاہ ء سید علی حسن شاہ نام ءَ چہ بیتگ- بیران بیتگیں اُمر کساس شست سال گوشگ بیگ ءَ اِنت- ریسکیو 1122 ءَ لاش نزیکیں تھانہ برتگ، اود ءَ کانونی کاروائی ءَ پد ایدھی ھوم سراب گوٹھ سرد جاہ ایر کتگ اَنت-

مھلب کمبر ءِ نمدی یے پہ کماش استاد واھد کمبر ءَ

نبشتہ کار : زھیر بلوچ

دی بلوچستان پوسٹ

سلام ءُ دروت منی ابا جان۔ دائم وش ءُ سلامت بات ئے زوت چہ زوراک ءِ زندان ءَ آجو بات ئے پہ سلامتی واتر بات ئے۔

ابا جان، نہ زاناں گپاں چہ کُجا بِندات بہ کن آں۔ تئی دوری ءُ زندانی ءِ درد ءَ درشان بہ کن آں یا ترا بلوچستان ءِ ھستیں جاورانی بابت ءَ ھالاں سر بہ کن آں۔ جیڑگ ءَ آں۔۔۔ ابا جان، وھدے مارا تئی دزگیری ءِ ھال سر بوت گُڑا پہ من گُش ئے زمین تنک اتک ءُ آزمان مئے سر ءَ کپت۔ ھچ باور نہ بوگ ءَ اَت کہ ترا زورگریں استان ءَ اینچو دور زور بیگواہ کُت۔ تو پہ وتی ھلاج ءِ ھاتر ءَ ایران ءِ دمگ کِرمان ءَ شُتگ اِت ئے ما ھمے ودار ءَ اِت ایں کہ زوت تئی ھلاج بیت ءُ تو وش بہ ئے۔ تئی آوارجنی ءِ بدیں ھال ءَ مارا سک پدرد کُت۔ بلے چون کن ئے پہ بلوچاں ھچ جاہ ایمن نہ اِنت ءُ زورگِر مُدام چو ھڈکھی کُچک ءَ بلوچانی رند پدان اِنت۔

منی ابا جان، وھدے تئی آوارجنی ءِ ھال مارا سر بوت گُڑا من پد ءَ ھما 2007 ءِ موسماں دُچار بوت آں۔ منی دل ءَ یکبرے پد ءَ پہ من چکاسیں وھد اتک اَنت۔

ابا جان، من مُدام تئی توک ءَ یک مُھکمیں راجی جھدکارے دیستگ ءُ تو پہ من یک پِتے ءَ گیش یک سیاسی رھشونے ءُ مھروانیں سنگتے بوتگ ئے۔ پمیشکا تئی آوارجنی ءِ ھال ءَ من ءَ تئی پنت ءُ سوجانی تئی رھشونی ءِ ترانگاں گیتک ءُ من ءَ نندگ ءُ ارسیگ بوگ ءِ بدل ءَ جھد ءِ سکین دات۔

ابا جان، ما بے توار نہ بہ ایں ما پہ تو ھر تک ءَ توار چست کن ایں۔ تئی راج مئے ھمگام اِنت تئی آوارجنی ایوک ءَ مئے واستا دردیگ نہ اِنت بلکیں سرجمیں بلوچ راج پہ تو گمیگ اِنت۔ابا جان، تو یک لس مردمے نہ ئے تو بلوچ راج ءِ مھکمیں توار ئے تو یک راجی جھدکارے ئے۔ تو وتی سرجمیں زند پہ بلوچ گُلزمین ءُ راج ءَ ندر کتگ۔

منی ابا جان، بلوچستان ءِ جاور روچ پہ روچ گنتر بوھان اَنت۔ زورآنسری آوارجنی ءُ دروگیں میڑ ءَ بلوچانی شھید کنگ برجاہ اِنت۔ دومی نیمگ ءَ بلوچ یکجہتی کمیٹی ءِ سر ءَ زورگِریں استان ءِ زوراکی برجا اَنت۔ ڈاکٹر مھرنگ بلوچ ءُ اے دگہ سروک دزگیر کنگ ءُ زندانیگ کنگ بوتگ اَنت۔ زورگِریں استان بلوچ چُکچینی ءِ تہ ءَ وتی سرجمیں زور ءَ کارمرز کنگ ءَ اِنت۔ بلے بلوچ راج مرچی باسما ءُ سرپد اِنت کہ زوراکیانی دیم مارا چون دارگی اِنت۔ بلوچ راج گوں تپاکی ءَ سرجمیں بلوچستان ءَ زھرشانی کنگ ءَ اِنت۔ بلوچ مات ءُ گْوھار، پیر ءُ کماش کُل کشک ءُ دگانی سر ءَ پہ وتی رھشوناں اوگام جنگ ءَ اَنت۔

منی ھمبلیں ابا جان۔۔۔شاری مرچی یک مستریں گْوھارے ءَ ھوار پہ ماں مستریں براتے ءِ کِرد ءَ ھم پیلو کنگ ءَ اِنت۔ شاری مارا دلبڈی دیگ ءَ ھوار آمیدگِس ءَ پہ تو توار چست کنگ ءَ اِنت. شاری اھد ءِ گُنگ ءُ کّریں آمیدگسانی در ءَ گوں مھکمیں توکلے ءَ ٹُکگ ءَ اِنت۔ شاری بلوچستان ءِ دمک ءُ دراں پہ تو اوگام جنگ ءَ اِنت۔ بلوچ مات ءُ گْوھاراں پہ تو جھد ءِ سکین دیگ ءَ اِنت۔ مرچی شاری ءِ تہ ءَ من ءَ تئی دروشُم گندگ پیداک اِنت۔

ما زان ایں اے ساھگریں نوبت ءَ مئے گُلزمین وتی چنگُلاں ٹٹاتگ بلے اے سیاہ ءُ تھاریں نوبت ءِ جمبر مئے گُلزمین ءِ سر ءَ الم بُر اَنت ءُ رو اَنت۔ تئی سارتیں ساھگ ءَ ھوار دُرسیں بیوسیں بلوچ چُکانی بندیگیں پِت ءُ برات الم واتر بنت ءُ مئے لُنٹانی سر ءَ بچکندانی پُل سرپنت۔

مھروانیں ابا جان۔۔۔ من پہ تو باز گمیگ آں ءُ نادُراھی ءِ سبب ءَ تئی جان سلامتی ءِ واستا جیڑگ ءَ آں۔ اے اُمر ءَ ھم ترا زورگِر ءَ زندانیگ کُت۔ باریں تو زندان ءَ کجام جاورانی دیمپان ئے۔۔۔ بلے من جزماں تو انگت مھکم ئے انچو کہ زیک بوتگ ئے۔زورگِر ءِ زوراکی ترا ھجبر پروش دات نہ کن اَنت۔ تو گھگیری ءِ چیدگ ئے ءُ ما تئی چُک ایں تو مارا مدام گھگیری ءِ سوج داتگ۔ ما نا امیت نہ بہ ایں داں گُڈی وس ءَ پہ تو گھگیری کن ایں۔

ابا جان۔۔۔ تو مُدام من ءَ گُشتگ کہ مھلب۔۔۔ تو منی دُرسیں مال ءُ مڈی ئے تو منی وشھالیں باندات ئے۔ ابا جان اے گپ پہ من زند ءِ وشتریں ءُ پھر ءُ شانی گپ اِنت کہ تو من ءَ اے کَد ءِ لائک زانتگ ءُ من ءَ وتی وشھالیں باندات ءُ زند ءِ مڈی لیک اِتگ۔

منی مھروانیں ابا جان، تئی سارتیں مھرانی ساھگ ءَ رُستگیں سارنگ، بیلی، گُلزمین ءُ زِرماہ ترا باز گیر کار اَنت۔ بلے بلوچ زادگی ءُ بلوچ ڈیھ ءِ واھُند چُشیں جیڑھانی دیمپان بنت چے ءَ کہ بلوچ زیردست اَنت۔ اے زیردستی ءِ داتگیں سوگات اَنت کہ اے اُمر ءَ ھم تو زندانیگ کنگ بوت ئے۔منی مھروانیں ابا۔۔۔ اے نمدی ءِ نبشتہ کنگ ءِ مول ءُ مُراد ھمیش اَت کہ ترا ھال بدیاں تئی چُک نزور نہ بوتگ اَنت ءُ بے توار نہ اَنت۔ تئی راج ءُ تئی چُک مدام پہ تو توار چست کن اَنت ءُ گھگیری کن اَنت۔ مارا تئی راجی جھد ءُ تئی لیکہ ءِ سر ءَ پھر اِنت۔ ما پہ پھر گُش ایں کہ ما استاد واھد کمبر ءِ چُک ایں۔ انچو کہ زورگِر ءِ زندان ءُ زمزیل تئی توکل ءَ پروش دات نہ کن اَنت ھمے وڑ ءَ تئی چُک ھم مھکم اَنت ءُ ھچ وڑیں پادتراپ ءَ پد نہ کِنز اَنت۔ تئی چہ زندان ءَ رکینگ منی زند ءِ مستریں مول ءُ مراد جوڑ بوتگ۔ ابا جان تئی باز وھد نہ زوراں۔ گوں ھاوند ءَ دُوا اِنت کہ زوت چہ زندان ءَ آجو بات ئے ءُ پہ وش ءُ سلامتی واتر بات ئے۔ تئی سارتیں ساھگ مئے سر ءَ مُدام ساھیل بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

چہ شال ءَ سیادی داروکیں دو ورنا پاکستانی پوج ءَ ھما وھد ءَ زورانسری آوار جتگ ءُ بیگواہ کتگ اَنت وھدے آ پکنک کنگ ءَ پد واتر لوگ ءَ روگ ءَ بیتگ اَنت-

شال ءِ جھمنندیں محمد یاسر ءَ گْوشتگ کہ منی برات محمد مدثر ء منظور جھمنند شال سبی ءَ شتگ ءُ یازدہ مارچ ءَ چہ سبی ءَ لوگ واستا درتکگ بلے تنی وھدے انگت لوگ ءَ سر نہ بیتگ-

آئی ءَ گْوشتگ کہ آیاں سک باز شوھاز کتگ بلے تنی وھدے آیانی درگت ءَ ھچ وڑیں ھال دز نہ کپتگ-

آئی ءَ ھمے ادارھاں چہ آیانی یل کنگ ءِ دزبندی کتگ-

راست ءُ دلپھکی

نبشتہ کار: شَکّل بلوچ

دی بلوچستان پوسٹ

منی ند گُش ئے یکے ءَ پہ زور داشتگ۔ منی جیڑہ ند ءِ چست کنگ نہ اَت بلکہ جیڑگ ءُ نبشتہ کنگ اِنت۔ ھر ھما جاور، چاگرد ءِ درد ءُ تورشتاں من ءَ وتی امبازاں زُرتگ گُش ئے جایگ ءُ ایربرگ مہ بیت گڑا زند پھک ءَ اینّار ءُ ھوادگ بیت۔یکے ایش اِنت نبشتہ کنان کنان ءَ منی زند ءِ گیشتریں وھد ءِ بھر انت۔

پہ نبشتہ کارے ءَ نبشتہ کنگ اِنچو ھم آسان نہ انت بازیں زند ءِ جنجالانی دیمپان بوگی بیت۔ اے دردانی مارگ ءَ ترا وتی زند اوں کُربان کنگ کپ ایت، شَنک بوگ سرپدیں مردے ءِ کار اِنت۔ ھر ھما انسانی درنگاز جتائیں دروشماں گندگ ءُ سما کنگ بنت، کہ آ راست دوست یکپارگی ءَ ءُ گوں اِشتاپی ءَ رنگ کنگ ءُ پہ زورگ ءَ ھم آسان نہ انت۔ ترا زند ءِ ھر ھما لوٹ کُربان کنگی اَنت پہ راست ءِ ھاتر ءَ، سما چنکیاس تُرسناک بیت کہ ھمے ساھت ءَ جیڑگ ءَ بہ بَہ ئے، ھمے میانجی ءَ تئی سر ءَ اُرش کنت۔ جاوید ایم۔بی بلوچ یک بلوچ بوگ ءِ ھمراھی ءَ راست دوست ءُ انساندوستے ھم ھست اِنت۔

مجگ ءِ ٹپ ءُ ٹور کنگ ءِ ھاتر ءَ رِپک سازینگ بنت، جاوید ایم۔بی بلوچ راج ءِ یک تاگتے۔ بلوچ راج وتی تاگتاں باید انت بہ پَھریز اَنت۔ بلوچ راج ءَ سما گور بہ بیت، آ نوں بزان انت، کہ جاوید بلوچ کَے اِنت؟ پرچا چہ رسترانی نیمگ ءَ بیھار دیگ بیت؟ ایشی ءَ گُش اَنت، بلوچ تاگت، تاگت راستی یے۔

راستی چی یے؟ بلوچ راج ءِ سر ءَ زُلم ءُ زوراکیانی ھلاپ ءَ تَھنا اُوشتاتگ، زالم ءِ زُلمانی پَدّر کنگ ءِ ھاتر ءَ یک جگرے ءِ درکار بیت ءُ آ جگر دلپھکی ءُ راستی ءِ سما بوگ ئیگ انت۔ بلوچ راج باسما بوان اَنت، وتی پگری مڈّیانی بابت ءَ سرپد بوان اَنت۔جاوید ایم۔بی بلوچ، تھنا نہ اِنت، بلوچ راج جاوید بلوچ ءَ گوں ھمگام انت، جاوید بلوچ، بلوچ راج ءِ ھکّیگیں توار اِنت، ءُ بلوچ راج وتی توار ءَ بہ رکّین انت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

نوشکی ءَ پاکستانی پوج ءِ بنجل ءِ سر ءَ اُرش ءَ پد ھیلی کاپٹر ءُ جاسوسیں بالیگانی بال برجاہ-

پاکستانی پوج ءِ بنجاھی بنجل ءِ سر ءَ نوشکی ءِ ھند گلنگور ءَ اُرش ءَ پد دمگ ءَ پوجی ھیلی کاپٹراں ھوار جاسوسیں بالیگانی بال برجاہ انت-

گوستگیں شپ ءَ بیتگیں اُرشکاراں پورسز ءِ بنجاھی بنجل ءِ ھواری ءَ لیویز پوسٹ ھم دستیگ کتگ ءُ پوج ءِ کمک ءَ آیوکیں کاروان ھم نشانگ کنگ بیتگ-

اُرشاں پوج ءِ کارندھاں بازیں کچے ءَ تاوانانی چِست کنگ ءِ ھال انت بلے داں انگت ءَ واکداراں اے درگت ءَ دگہ اھوال دیم ءَ نیاؤرتگ انت-

نوشکی ءَ پاکستانی لشکر ءِ بنجاھی بنجل نشانگ جوڑ کنگ بوتگ ءُ بنجل دستیگ کنگ بیتگ ءُ ھمے وھد ءَ پہ کمک ءَ سر بوھوکیں لشکر ءِ کاروان ھم نشانگ جوڑ کنگ بوتگ ءُ بازیں تاوانانی ھال بوتگ۔

گوستگیں شپ ءَ نوشکی ءِ دمگ گلنگور ءَ پاکستانی لشکر ءِ بنجاھی کارگس ءِ سر ءَ جتا جتائیں نیمگاں چہ سلاہ بندیں مردماں اُرش کتگ۔ چہ سئے کلاک ءَ گیش دمگ ءَ ترندیں تیرگواری ءُ تراک برجاہ بوتگ اَنت۔

اھوالدار ءِ رد ءَ اُرش کنوک لشکر ءِ کیمپ ءِ گرگ ءَ سوبمند بوتگ اَنت وھدے کہ لشکر ءِ سلاہ ءُ گولہ بارود ھم دست کپتگ اَنت۔

اُرش ءِ وھد ءَ سلاہ بندیں مردماں ھمے جاہ ءَ لیویز ءِ پوسٹ ھم گپتگ ءُ کارندہ دزگیر کتگ اَنت کہ رند ءَ آ یلہ کنگ بوتگ اَنت۔

اھوالدار ءِ رد ءَ اے دمگ ءَ سر بوھوکیں پورسز ءِ کاروان ھم سلاہ بندیں مردمانی نیمگ ءَ سنگر گپتگیناں اُرش کتگ ءُ کہ ایشی ءِ آسر ءَ پورسز ءِ واستا گیشتریں تاوان بوتگ۔

یک ماھے ءِ تہ ءَ نوشکی ءَ پاکستانی لشکر ءِ سر ءَ اے دومی مزنیں اُرش اِنت ۔ ایشی ءَ چہ پیسر 26 مارچ ءَ بلوچ لبریشن آرمی ءَ نوشکی ءِ شھر ءِ نزیک ءَ وت کُش ءُ سنگر گپتگیں اُرشانی تہ ءَ پورسز نشانگ جوڑ کُتگ اَنت۔

بی ایل اے مجید بریگیڈ ءَ پاکستانی لشکر ءِ کارندہ سواریں بس ءَ گوں تراکناکیں گاڑی ءَ نشانگ جوڑ کتگ ءُ بس سرجم ءَ تباہ کتگ ءُ بی ایل اے ءِ ھاسیں اُرد ‘فتح اسکواڈ’ ءَ دگہ بسے ءِ کارندہ نشانگ جوڑ کتگ اَنت۔

اے سال ءَ بلوچ سلاھبندیں آجوئی گلانی اُرش گیش گندگ بوتگ اَنت۔ مارچ ءَ آجوئی دوستیں گلانی ھمسنت بلوچ راجی آجوئی سنگر (BRAS) ءَ جتا جتائیں جاھاں 88 اُرش کتگ انت۔

ایشی ءَ چہ پیسر بلوچ لبریشن آرمی ءِ مجید برگیڈ ءَ جعفر ایکسپریس دستیگ کتگ ءُ دو سد ءَ چہ گیش پاکستانی لشکر ءِ کارندہ یرگمال کتگ۔ رند ءَ درستیں کارندہ کشتگ بوتگ اَنت۔

مرچی نوشکی ءَ اُرش ءِ زمہ واری انگت ءَ ھچ گل ءَ نہ زرتگ ءُ واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

بلوچ یکجھتی کمیٹی ءِ بنجاھی رھشون ڈاکٹر صبیحہ بلوچ ءَ گوشتگ منی پت ءِ بیگواھی ءَ ھشت روچ گوستگ انت بلے داں انگت ءَ آئی ءِ بارو ءَ ھچ سرپدی نہ رس اتگ انت-

آئی ءَ گوشتگ اے یک تھلیں راستی یے کہ پاکستان ءَ انسانی ھک کجام رنگ ءَ پامال بوگ ءَ انت- من ھما جد ءُ جھد ءِ بندات آ ھمے جھلانکیں درد ءَ پیداگ بیتگ کہ من وتی مردمانی اندر ءَ سما کن آں – اگاں من کجام چیز ءِ کسورواراں گڑا نا انساپی ءِ دیم ءَ بے توار بوگی انت- بلے نی آ بے تواری ایوک ءَ بس نہ انت ھما تاکت من ءَ پروشگ لوٹ انت ءُ اے وڑ کنگ ءَ – آیاں منی پت نشانگ کتگ ءُ من ءَ بلیک میل کنگ گچین کتگ-

آئی ءَ گوشتگ منی کسہ مان نہ گیش اتگ اے وڑیں دگہ ھم مھکمیں جھد ءِ بار ءَ وتی گمانی کوپگ ءَ کنگ ءَ انت- اے درد بس منی اَزم ءَ مھکم کنت اِنت دگہ نا انساپی ءَ اوپار کت نہ کنت اِنت-

زھیر احمد بلوچ ءِ بیگواھی ءَ دہ سال سرجم بوتگ ءُ پنجگور ءِ دمگ خدابادان ءِ ھند مواچ بازار ءَ سیمنارے برجم دارگ بوتگ، کہ اود ءَ سیاسی، چاگردی ءُ وکیل رھشوناں بھر زرتگ وھدیکہ بی وائی سی ءِ رھشونانی تواربندیں کلوہ گوشدارینگ بوتگ انت –

مراگش ءَ تران کنان ءَ زھیر احمد ءِ برات کفایت اللہ بلوچ ءَ گوشتگ کہ آئی ءِ برات سیزدہ اپریل دوھزار ءَ پانزدہ ءَ ھما وھد ءَ پوجی پانگسے ءِ نزیک ءَ آوار جنگ بوتگ کہ آ دیم پہ کراچی ءَ رؤگ ءَ بوتگ کہ روچ ء مروچی آئی ءِ ھچ ھال ءُ اھوال نیست – آئی ءَ گوشتگ کہ ما آئی ءِ یل کنائینگ ءَ ھر وڑیں جھد کتگ، وزیر ءُ گزیراں گوں گند ءُ نند کتگ بلے ھچ پہ ھچ –

آئی ءَ گوشتگ کہ زھیر احمد ءِ وڑ ءَ دگہ ھزاراں مردم بیگواہ انت کہ آیانی کھول ءِ مردماں ائید ءِ روچ ءَ ھم وتی دوستیگیں مردمانی اکس اش گون انت ءُ دگانی سر ءَ انت – آئی ءَ بھتام جتگ کہ سرکار وت کانود ءُ رھبندانی لگتمالی ءَ کنگ ءَ انت ءُ نوں زالبولاں ھم آوار جنگ ءَ انت –

کفایت اللہ ءَ گوشتگ کہ سردار اختر مینگل سرکار نہ ایں، بس بلوچ زالبولانی یل کنگ ءِ لوٹ ءَ کنگ ءَ انت – آئی ءَ گوشتگ کہ ما پیپلز پاٹی وڑیں راج دژمنیں پلیٹ فارمے ءَ سیاست کتگ چریشی ءَ من چہ وتی راج ءَ پھلی لوٹ آں –

آئی ءَ گوشتگ کہ سال 2022 ءَ منی برات ءِ ھال شال ءِ بندیگ جاہ ءَ بوتگ، گوستگیں آرمی ءِ چیف جنرل باجواہ ءَ پنجگور ءِ تر ءُ تاب ءِ وھد ءَ آئی ءِ یل کنگ ءِ کول ھم کتگ بلے روچ ءُ مروچی یل کنگ نہ بوتگ –

مراگش ءَ تران کنان ءَ زھیر احمد ءِ زھگ ادیبہ ءَ گوشتگ کہ اگاں آئی ءِ پت ءَ جرمے کتگ گڑا آمیدگس ءَ پیش کنگ بہ بیت ءُ آئی ءَ ملا فرہاد ءِ آوار جنی ھم ترندی ءَ ایرجتگ-

مراگش ءَ بی وائی سی ءِ بنجاھی رھشون ڈاکٹر صبیحہ بلوچ، سمی دین بلوچ ءُ ایمان مزاری ءِ توار بند ھم گوشدارینگ بوتگ انت –

مراگش ءَ ائیشہ، زویہ ءُ دگراں ھم تران کتگ ءُ ھمے لوٹ کتگ کہ اگاں آیانی پت ءَ جرمے کتگ آمیدگس ءَ آرگ بہ بنت –

ڈسٹرکٹ بار ایسوسی ایشن ءِ امان اللہ کریم، مسلم لیگ نون ءِ ڈویژنل صدر اشرف ساگر، بی این پی ءِ دمگی جنرل سیکٹری قدیر احمد ءُ نیشنل پاٹی ءِ گوستگیں سرکماش حاجی صالح محمد بلوچ ءَ تران کتگ ءُ گوشتگ کہ اگاں ھرکس ءَ جرم ءِ کتگ گڑا آئی ءِ پیسلہ ءَ آمیدگس بہ کنت –

امان اللہ کریم ءَ گوشتگ کہ بندیگی ایوکی ءُ بیگواھیں مردمانی جیڑہ کانود ءُ رھبندانی لگتمالی ئے – آئی ءَ گوشتگ کہ پولیس ءِ زمہ داری ایں کہ بیست ءُ چار ادارانی تہ ءَ ایاں آمیدگس ءَ بیار ایت – ما بار ءِ پلیٹ فارم ءَ چہ اے جھد ءَ ھر فورم ءَ برجاہ داریں –