TBP Balochi

بلوچستان ءِ بنجاھی شھر شال ءَ ناشناسانی بمب تراک ءَ پاکستانی پوج ءِ میجر انور کاکڑ جاہ پہ جاہ ءَ بیران بیتگ-

اھوالانی رد ءَ شال ءِ دمگ جبل نور ءَ میجر انور کاکڑ ءِ گاڑی بمبے ءِ نشانگ کنگ بیتگ کہ چریشی ءَ آ ھما جاہ ءَ بیران بیتگ-

اھوالانی رد ءَ میجر انور کاکڑ ءِ گاڑی ءَ لِچوکیں بمبے پِٹ کنگ بیتگ کہ چریشی ءَ بمب ترک اتگ ءُ آ ھما جاہ ءَ بیران بیتگ –

اھوالانی رد ءَ میجر انور کاکڑ پاکستانی پوج ءِ‘ آئی ایس پی آر’ ءَ گوں پیش ءَ بندوک بیتگ-

میجر انور کاکڑ ءِ سر ءَ بیتگیں اُرش ءِ زمہ واری داں انگت ءَ کس ءَ پہ وت نہ زرتگ – گوست ءَ بلوچ آجوئی لوٹوکیں سلاہ بندانی نیمگ ءَ پاکستانی پوج ءَ بندوکیں مردم ءُ کارندہ نشانگ کنگ بیتگ انت-

بلوچستان ءِ دمگ نصیر آباد ءُ سوراب ءَ دو جتا جتائیں جاھاں پاکستانی پوج نشانگ کنگ بیتگ، چریشی ءِ آسر ءُ بیرانی ءُ زدگ بوگ ءِ ھال انت-

نصیرآباد ءِ ھند منجو شوری ءَ پاکستانی پوج ءِ یک چوکی ءِ نشانگ کنگ بیتگ-

دمگی مردمانی رد ءَ اے یکیں کارندہ گوزوکیں کاروان ءَ پاکٹ سیکورٹی دیگ ءَ بیتگ کہ آ ریموٹ کنٹرول بمب ءِ نشانگ کنگ بیتگ-

ھمے وڑ ءَ گوستگیں شپ ءَ سوراب ءَ ایف سی ءِ بنجاھی بنجل ناشناسیں مردماں نشانگ کتگ – دمگی مردمانی رد ءَ اُرش ءِ وھد ءَ ترندیں تیرگواری ءُ تراکانی توار اشکنگ بیتگ انت ءُ جنگ ءُ چوپ ءِ درچ بازیں وھداں برجاہ بیتگ-

دمگی مردمانی رد ءَ اُرش ءَ بازیں کارندہ مرتگ انت بلے واکدارانی نیمگ ءَ انگت ءَ اے اُرشانی بارو ءَ دگہ گپ دیم ءَ نیتکگ انت-

زانگ بہ بیت بلوچستان ءَ اے ڈولیں اُرش ھمک روچ بوگ ءَ انت کہ اود ءَ سلاہ بندیں گل پاکستانی پوج ءَ نشانگ کنگ ءَ انت ءُ اے وئیلانی زمہ واری انگت ءَ کس ءَ نہ زرتگ انت-

بلوچستان ءَ زورانسری آوار جنی ءِ دْرچ یکشل ءَ برجاہ – نوکیں ھالانی رِد ءَ دو ورنا جتاجتائیں ھنداں چہ پاکستانی پوج ءَ آوار جنگ ءَ پد ناشناسیں جاھے ءَ برتگ-

یازدہ جولائی ءِ سُھب ءَ نوزدہ سالی ئیں نودربر اشفاق ء مشتاق اے ون سٹی فیز 2 ، چہ شال ءَ پاکستانی پوج ءَ آوار جتگ – اشفاق ءِ سیادی بلوچستان ءِ دمگ آواران ءِ ھند چہ مشکے ءَ اِنت ءُ یک نودربرے-

چمّدیستیں شاھد ءُ دمگی اِھوالکار ءِ رِد ءَ اشفاق ایف سی ءُ کاؤنٹر ٹیررازم ڈیپارنمنٹ (سی ٹی ڈی) ءِ کارندھاں وتی ھمراھی ءَ برتگ – آوار جنگ ءَ پد اشفاق ءِ ھچ وڑیں ھال نیست-

دومی نیمگ ءَ ھوشاپ ءِ دمگ عرض محمد بازار ءَ بیتگ کہ اود ءَ آواز حسن ء حسن سُھب نُھ ءَ آئی ءِ دمگ ءَ چہ بیگواہ کتگ-

زانگ بہ بیت ھوشاپ ءَ پاکستانی پوج ءَ آپریشن کنان ءَ عرض محمد بازار ءَ سرجمیں مردم لوگاں چہ در کتگ اَنت یک جاھے مُچ کتگ اَنت ھمے میان ءَ مردمانی موباھل پون ھم پچ گپتگ اَنت-

ھلاس نہ بیوکیں سیاسی گھگیری

ٹی بی پی شونگال

سالے ءُ شش ماہ پیش بلوچستان ءِ شھر چہ تربت ءَ زورانسری بیگواھی، دزگیری کوش ءُ ریاستی زُلمانی ھلاپ ءَ یک گھگیری زرمبشتے برانز گپتگ ات، چریشی ءَ اسلام آباد ءَ دو ماھاں زھرشانی نندانک داتگ ات کہ دانکہ بلوچستان ءَ برجاھیں ریاستی زوراکی ءُ زورادستیں پالیسیانی ھلاسی بہ بیت انت- بلے یک سالے ءُ شش ماہ ءَ پد، اسلام آباد ءَ زورانسری بیگواھیں مردم ءُ بندیگ کتگیں سیاسی رھشونانی کھول دوبر زھرشانی نندانک دیگ ءَ انت دانکہ آیانی سیاسی رھشونانی واستا توار برز کنگ بہ بیت انت، ھما کہ ریاستی زوراکیانی ھلاپ ءَ اسلام آباد ءَ پرکار بیتگ انت-

اسلام آباد ءَ سالے ءُ شش ماہ ءَ پیش بلوچستان ءَ ریاستی پالیسیانی ھلاپ ءَ زھرشانی سیاسی زرمبشت ءَ ھما ریاستی رویشابی دیمپانی بیتگ، مروچی کھولاں ھم ھما رویشانی دیمپانی انت- چہ چار روچاں ریاستی ادارہ بندیگ کتگیں سیاسی رھشونانی کھولاں اسلام آباد پریس کلب ءِ دیم ءَ زھرشانی کنگ ءَ دارگ ءِ جھد ءَ انت ءُ یکشلیں ھور ءَ آیاں تمبو جنگ ءَ ھم اجازت دیگ ءَ نہ انت-

بلوچستان ءِ مانگش اتگیں سروزیر سرفراز بگٹی ءُ پاکستان ءِ گوست ءِ سروزیر انوار الحق کاکڑ ریاستی زوراکیانی ھلاپ ءَ چِست بیتگیں زرمبشت ءَ بلوچستان ءَ ناگیگیں جاور ءُ بے امنی ءِ زمہ وار گوشگ ءَ انت، آیانی دزگیری ءَ بلوچستان ءِ شھدگانی سر ءَ امن ءِ بوگ ءِ ٹاہ ءَ دیگ ءَ انت – بلے بلوچ یکجھتی کمیٹی ءِ رھشون ماہ رنگ بلوچ، بیبگر بلوچ، صبغت اللہ شاہ جی، بیبو کمبرانی ءُ گل زادی بلوچ چہ چار ماھاں بندیگ انت، ھمے وڑ آیانی دزگیری ءَ پد بلوچستان ءِ سنگینیں جاور گھتری ءَ ابید گنتر بیتگ انت-

پاکستان ءِ آمیدگس انساپ ءِ رھبندانی سرجم کنگ ءَ ناچار انت ءُ بلوچ رھشونانی کیساں تلبداری ءِ درشان کنگ ءُ ریاست ءِ مزن واکداریں تاکتانی پالیسیانی بھر بوگ ءَ انت – پاکستان ءِ مزن تاکتداریں واکدار اے سرپد بنت کہ زوراکی ءُ شنگینگ ءَ سیاسی گھگیری ھلاس کنگ بیت ، بلے بلوچ رھشون چار ماھاں جیل ءَ ریاستی ادارھانی گیر آئینی گامگیجاں مِکیں پیشانیگانی دیمپانی کنگ ءِ اے گپ ءِ منانک ءَ دنت کہ سیاسی گھگیری ءِ راہ اداروکی دارگ بیت ، البت اگاں ریاستی زُلمانی پالیسی برجاہ بیت انت گڑا چہ بلوچستان ءَ سیاسی زُرمبشت برانز گِر اَنت-

بلوچستان ءِ دمگ مستونگ ءِ ھند آبِ گل ءِ نزیک ءَ ناشناسیں مردماں پاکستانی پوج ءِ کاروان ءِ سر ءَ اُرش کتگ-

بنداتی ھالانی رِد ءَ پاکستانی پوج ءِ بازیں کارندھے ءِ بیران ءُ ٹپی بیتگ اَنت وئیل جمعہ ءِ بیگاہ ءَ بیتگ وھدے پوجی کاروان چہ دمگ ءَ گوزگ ءَ بیتگ انت-

دمگی اِھوالکار ءِ رِد ءَ اُرش انچش تُرند بیتگ کہ ھمے میان ءَ نوکیں سلاہ کارمرز کنگ بیتگ انت-

تنی وھدے سرکاری ھساب ءَ بیرانیانی ءُ ٹپّیانی تچکیں کچ شنگ کنگ نہ بیتگ اَنت، بلے اِھوالکار ءِ گوشگ اِنت کہ پوج ءَ مزنیں کچے ءَ تاوانیانی دیمپانی کنگ کپتگ-

زانگ بہ بیت کہ بلوچستان ءَ اشی ءَ ساری ھم پاکستانی پوج ءَ بازیں براں اُرشانی دیمپانی کنگ کپتگ- آیانی زمہ واری بلوچ آجوئی لوٹوکیں سلاہ بندیں گلاں منّگ ءُ آیگ ءَ اَنت بلے اے اُرش ءِ زمہ واری انگت ءَ ھچ گل ءَ نہ زرتگ-

بلوچستان ءِ دمگ چاگی نوکنڈی ءَ پاکستانی پوج ایپ سی ءِ تیرگواری زمباد گاڑی ءِ ڈرائیور شاہ در ء امان اللہ بیران بوتگ ۔

وئیل ءَ پد دمگی مردماں زھرشانی کتگ ، درنگاز کنوکاں جون باب امر دگ ء سرا ایرکتگ زھرشانی کنگ ء انت ءُ لندن دگ ھر وڈیں رؤگ ءُ آیگ ءِ ھاتر ءَ بند کنگ بوتگ ۔

درنگاز کنوکاں لوٹ کنگ ءَ انت کہ کتکارانی بگیری ء گامگیج زورگ بہ بیت ءُ بیران بوتگیں ورنایے جون کھول ءِ دست ءَ دیگ بہ بیت ۔

ھالانی رد ء پاکستانی پوج ءَ ھالیگیں زمباد گاڑی ءِ سرا تیرگواری کتگ ءُ چریشی ء شاہ در تیر لگ اِتگ ءُ ھما دمان ءَ بیران بوتگ ۔ بیران بوتگیں ورنایے جون ایپ سی ءَ دستیگ کتگ ءُ کھول ءَ آئی ءِ نزیک ءِ رؤگ ءَ نیلگ ءَ انت ۔

چم دیستیں شاھد ءُ چاگردی ترامجاھاں شنگ بوتگیں تامراں ھمے گندگ بیت کہ زھرشانی ء وھد ءَ درنگاز کنوکانی سرا ایپ سی ءِ نیمگ ءَ تیرگواری ھم کنگ بیت کہ چریشی ءَ جاورھال گیشتر ھراب بنت ۔

زانگ بہ بیت گوستگیں یک ماھے ءَ ایرانی ٹیل ءِ نوکنڈی انٹری گیٹ ءَ بند بوگ ءِ سوب ءَ مردم پیسرا چہ دلسیاہ ءُ زھر انت ، پرچاکہ اے راہ دمگی مردمانی کار ءُ بار ءِ ھاتر ءَ سرین ءِ ھڈ ءِ ارزشت ءَ دار ایت ۔

دمگی مردم ءُ انسانی ھکانی باسکاں لوٹ کتگ کہ وئیل ءِ شریں وڈی ءَ پٹ ءُ پول بہ بیت ءُ درنگاز کنوکانی سرا تیرگواری انکوائری کنگ بہ بیت ۔

بلوچ ریپبلکن آرمی ءِ جارکش سرباز بلوچ ءَ شنگ کتگیں درشان ءِ تہ ءَ گوشتگ کہ بلوچستان ءِ دمگ ڈیرہ بگٹی ءِ تھسیل سوئی ءِ ھند گوپٹ ءَ پاکستانی پوج ءُ گل ءِ سرمچارانی میان ءَ نیمروچ ءِ وھد ءَ ھما وھد ءَ میڑ برجاہ بیتگ وھدے پوجی کارندھاں سرمچارانی راہ ءِ سر ءَ ناکہ بندی جتگ بیتگ-

جارکش ءِ رِد ءَ میڑ ءِ درچ دو کلاکاں تاں برجاہ بیتگ اے میان ءَ پاکستانی پوج ءِ سے کارندہ جاہ پہ جاھی مرتگ اَنت، اشی ءَ پد چہ سوئی چھاؤنی ءَ گوپٹ ءِ نیمگ ءَ آؤکیں ایف سی ءِ کاروان ءِ سر ءَ سرمچاراں سنگر گپتگ ءُ راکٹ ءُ مزنیں سلاھاں گوں اُرش کتگ، چریشی ءِ آسر ءَ دگہ سے کارندہ مرتگ انت ءُ دہ ءَ گیش ٹپی بیتگ اَنت-

جارکش سرباز بلوچ ءِ رِد ءَ اے میڑاں سنگت برکت پنّام ءِ گل بگٹی ء حیوت بگٹی شھید بیتگ، شھید گل بگٹی گوستگیں چہ ھشت سالاں گوں گل ءَ ھمگرنچ بیتگ، آئی ءِ سیادی بگٹی ءِ ٹک ءِ جھلی شاک ” ھوتکانی ” ءَ چہ بیتگ آ یک دلیر ءُ بودناکیں ورناھے بیتگ، آئی ءِ کھول ءَ بلوچ سرڈگار ءِ ھاتر ءَ مزنیں دیمونی یے داتگ-

جارکش ءَ دیمتر ءَ گْوشتگ کہ بلوچ ریپبلکن آرمی، شھید گل بگٹی ءَ آئی ءِ شھیدی سر ءَ سُھرچکیں دروت ندر کنت-

اسلام آباد پریس کلب ءِ دیم ءَ بلوچ بیگواھیں مردم ءُ بلوچ یکجھتی کمیٹی ءِ دزگیریں رھشونانی یل کنائینگ ءِ ھاتر ءَ آیانی کھول ءُ سیادانی نندانک سیمی روچ ءَ ھم برجاہ-

نندانک ءَ بلوچ یکجھتی کمیٹی ءِ سروک ءِ کھول ءُ چہ بلوچستان ءَ زورانسری بیگواھیں مردمانی کھول ھوار اَنت-

اسلام آباد نیشنل پریس کلب ءِ دیم ءَ نندانک ءَ نشتگیں مردماں زھرشانی بُنجل جنگ ءِ جار جتگ اَت، بلے انتزامیہ ءَ تمبو جنگ ءِ اجازت دیگ نہ بیتگ، اے پابندی ءَ اَبید، بیگواھیں مردمانی کھول ءُ دگہ زھرشانی کنوک تُرندیں ھور سر ءَ اَبید پچیں آسمان ءِ چیر ءَ زھرشانی برجاہ داشتگ-

بلوچ یکجھتی کمیٹی ءِ رھشون ماہ رنگ بلوچ ءِ گْھار نادیہ بلوچ ءَ گوشتگ کہ مئے نندانک سیمی روچ ھم برجاہ اِنت ءُ مئے دو بُنکی لوٹ اَنت، یکے بی وائی سی ءِ سروکانی یل کنائینگ ءُ دومی زورانسری آوار جنی ءِ ھلاس کنگ-

آیاں مروچی ماہ رنگ بلوچ ءُ دگہ بی آئی سی ءِ رھشونانی پیشی ءِ میان ءَ ًآمیدگس ءِ کاروائی سر ءَ ایر جنان ءَ گْوشتگ کہ مروچگیں گوشداری ءَ کانودی کار ءِ سنگین ءِ ھلاپ ورزی کنگ بیتگ، جج ءَ وکیلاں دلیل۔پیش کنگ ءِ اجازت دیگ نہ بیتگ ءُ ایف آئی آر کاروائی وت کتگ اشی ءَ اَبید ریمانڈ ءَ گیش کنگ بیتگ اَنت-

ایڈووکیٹ ایمان مزاری کہ نندانک ءَ ھوار اِنت کہ آئی ءَ گوشتگ اسلام آباد انتظامیہ کینگ ءُ لاپرواھی زھرشانی ءَ کنگ ءَ اِنت، کھول ءُ ھور ءُ گرمی ءَ تمبو جنگ اجازت دیگ نہ بیتگ چریشی ءِ سبب ءَ گرمی تُرندی ءَ چہ یک پیرزالیں زالبولے بے ھوش بیتگ-

پشتون رھشون افرسیاب خٹک ءَ مروچی یکرندے پد ءَ بُنجل ءَ شتگ، آئی ءَ گْوشتگ کہ بلوچ راج ھکیں لوٹانی ھک ءِ یکجاھی کنگ مئے اکلاکی پرز اِنت دو روچ ءَ یکشل ءَ ھور پد مروچی زھرشانی کنوک تُرندیں روچ ءِ دیمپانی کنگ کپگ اِنت پرچاکہ اسلام آباد ءِ ھکمراناں بیگواھیں مردم ءِ کھول تمبو جنگ اجازت دیگ ءَ نہ اِنت-

اے میان ءَ بازیں دگہ پشتون سیاسی رھشوناں، سول سوسائٹی ءِ کارکنان، نودربر ءُ اِھوالکار ءَ ھم بُنجل ءَ شتگ اَنت بلوچ کھول ءَ چہ یکجاھی درشان کتگ-

نندانک ءَ نشتگیں زھرشانی ھکومت ءِ دیم ءَ دو ھاسیں لوٹ ایر کتگ، بلوچ یکجھتی کمیٹی ءِ سروک زوت یل کنگ، بلوچستان ءَ زورانسری آوار جنی سیاسی کارکنان ءِ دزگیری ءُ ھلاس ءُ سرجمیں بیگواھیں مردمانی یل کنائینگ ھوار اَنت-

بلوچستان ءِ دمگ کیچ ءِ ھند کولواہ ءَ پاکستانی لشکر ءِ تیرگواری ءَ یک ورنائیں نودربرے بیران بوتگ۔

بیران بوتگیں ورنا ءِ پجار کولواہ ءِ دمگ ڈندار آشال ءِ نندوک ءُ ھشتمی کلاس ءِ نودربر کمبر ء اسلم ءِ نام ءَ زانگ بوتگ ۔

دمگی مردمانی رد ءَ کمبر وتی ڈگاراں پیماز ءِ کشت ءُ کشار ءَ روگ ءَ بوتگ کہ پاکستانی لشکر ءَ تیر گواری کتگ ءُ ھما جاہ ءَ بیران بوتگ۔

سانمندیں کھول ءِ گشگ ءِ رد ءَ کمبر نودربرے بوتگ۔ آ سُھب ءَ چو وتی ھمک روچی ءِ ڈول ءَ ڈگاراں پیماز ءِ کشت ءُ کشار ءِ کار ءَ شتگ بلے مارا دمانے ءَ پد آئی ءِ مرگ ءِ ھال رس اتگ-

اے ویل ءَ پد دمگ ءَ زھر ءِ درشانی اِنت۔ دمگی مردمانی گْوشگ اِنت کہ پیسر ءَ ھم بلوچستان ءَ ھمے رنگیں وئیل بوتگ اَنت کہ اود ءَ پورسز ءَ لس مھلوک نشانگ جوڑ کنگ ءَ بوتگ اَنت۔

دمگی مردمانی گشگ انت کہ یک نودربرے ءِ اے وڑ ءَ کُشگ اوپار کنگ نہ بیت انت-

اے ویل ءِ بابت ءَ انگت ءَ سرکاری تَکاں بیان شنگ نہ بوتگ انت۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ پانزدہ جولائی ءَ جھاؤ، گجرو کور ءَ زورگریں پاکستانی پوج سر ءَ بی ایل ایف ءِ یک مزنیں اُرشے ءِ آسر ءَ میجر سید رب نواز طارق ءَ ھوار شش کارندہ مرتگ اِت اَنت کہ آئی ءِ پسّہ ءَ دُژمنیں پوج ءَ دمگ ءَ جھلی ءُ بُرزی کاروائی بندات کتگ اَنت، جتاجتائیں ھندانی سر ءَ کمانڈوز ایر گپتگ ءُ جھلی پوج ءَ پیشگامی کنان ءَ جتاجتائیں کوھی راہ بند کتگ اَنت- آپریشن ءِ دومی روچ ءَ سرمچاراں ھیلی کاپٹراں چہ ایرگیجوکیں ایس ایس جی کمانڈوز نشانگ کتگ ءُ چار کارندہ کُشتگ اَنت، اشی ءِ ھمراھی ءَ سرمچاراں ایس ایس جی کمانڈوز سرکنوکیں ھیلی کاپٹر ھم مزنیں سلاھاں چہ نشانگ کتگ ءُ تاچینگ ءَ لاچار کتگ اَنت چریشی ءَ دُژمن پوج پُشتکنزی ءَ لاچار بیتگ-

جارکش ءَ گْوشتگ کہ شانزدہ جولائی ءِ بیگاہ پنچ ءِ نزیک ءَ سرمچاراں کولواہ ءِ دمگ بل الندور ءِ ھند سر ءَ زورگریں پاکستانی پوج ءِ چیک پوسٹ سر ءَ مزنیں سلاھاں چہ اُرش کتگ ءُ دُژمن کارندھاں جانی ءُ مالی تاوان داتگ اَنت-

جارکش ءَ گْوشتگ بی ایل ایف ءِ سرمچاراں دگہ یک کاروائی ءَ ھپدہ جولائی ءِ شپ ءِ دہ ءِ نزیک ءَ نوشکی ءِ دمگ تاڈیز ءَ پولیس چوکی انگیر ءَ کتگ، ڈیوٹی ءَ ساڑی پولیس کارندہ یرگمال کتگ اَنت، ءُ چوکی ءَ ھستیں سرکاری سلاہ دستیگ کتگ اَنت، گھگیری نہ کنگ ءَ پولیس ءِ کارندہ یل داتگ اَنت-

جارکش ءَ گوشتگ بلوچستان لبریشن فرنٹ جھاؤ، کولواہ ءُ نوشکی اُرشانی زمہ واری ءَ منّ اِیت-