TBP Balochi

بلوچستان ءِ دمگ چہ مستونگ ءَ پاکستانی پوج ءِ سر ءَ بیتگیں بمب اُرش ءَ میجر ءَ ھوار شش کارندہ بیران بیتگ اَنت-

گیشیں ھالانی رِد ءَ مستونگ ءِ تلخ کاوی ءِ ھند سر ءَ پاکستانی پوج بمب اُرش ءِ نشانگ کنگ بیتگ کہ چریشی ءِ آسر ءَ پاکستانی پوج ءِ میجر زید ءَ ھوار شش کارندھانی بیرانیانی ھال اِنت-

اِھوالکار رِد ءَ مروچی مستونگ ءَ برجاہ مزنیں کچے ءَ لشکر کشی ءِ میان ءَ پاکستانی پوج ءِ مزنیں کچے ءَ دمگ ءَ ساڑی بیتگ اَنت-

زانگ بہ بیت کہ گوستگیں یک ھپتگے ءِ میان ءَ بلوچستان ءِ جتاجتائیں دمگاں آجوئی لوٹوکیں سلاہ بندانی اُرشاں پاکستانی پوج ءِ سیمی میجر رینک ءِ آپیسر جنگ بیتگ اَنت-

اشی ءَ ساری شانزدہ جولائی ءِ دمگ آواران ءِ ھند جھاؤ ءَ بلوچستان لبریشن فرنٹ ءِ یک بمب اُرشے ءَ میجرے ءَ رب نواز بیران بیتگ، وھدے کہ نوزدہ جولائی ءَ شال ءَ جبل نور ءِ ھند سر ءَ بیتگیں بمب اُرش ءَ میجر انور کاکڑ جنگ بیتگ اَنت-

میجر انور کاکڑ ءِ کوش ءِ زمہ واری بلوچ لبریشن آرمی ءَ منّ اِتگ، بلے مروچی مستونگ ءَ بیتگیں اُرش ءَ زمہ واری انگت ھچ گل ءَ نہ زرتگ –

پاکستانی لشکر ءَ چہ تربت ءَ یک ورنایے دزگیر کنگ ءَ پد بیگواہ کتگ۔

بیگواھیں ورنا ءِ پجار بلیدہ ءِ دمگ زیردان ءِ نندوکیں کمبر ء نور بخش ءِ نام ءَ زانگ بوتگ ۔

دمگی مردمانی رد ءَ کمبر تربت ءِ دمگ چہ جوسک ءَ وتی دکان ءَ دزگیر کنگ بوتگ۔

دزگیر کنگ ءَ پد کمبر ناشناسیں جاھے ءَ برگ بوتگ ءُ آئی ءِ بابت ءَ انگت ءَ ھچ وڑیں ھال ءُ اھوال دیگ نہ بوتگ۔

بلوچستان ءِ دمگ نوشکی ءَ ناشناسیں سلاہ بنداں زیارت دستگیر کراس ءَ یک بوزر گاڑی یے مانداشتگ-

اے ویل ھما وھد ءَ بوتگ کہ مرچی پیسر ءَ چاگی ءِ بنجاھی شھر دالبندین ءَ ھمے وڑیں یک کاروائی ءَ یک دگہ بوزر گاڑی یے ماندارگ بیتگ ات-

انوگ ءَ تاں ھچ گل ءَ اے وئیلانی زمہ واری نہ زرتگ۔ زانگ بہ بیت بلوچستان ءَ لھتے ماھانی میان ءَ سرکاری ءُ نجی ملکیت ءِ تاوانانی بازیں ویل دیم ءَ اتکگ انت کہ آھانی تہ ءَ بند ءُ ساچیانی مشینری، کارسازجاہ، ءُ گاڑی نشانگ جوڑ کنگ بوتگ انت۔

بلوچستان ءِ دمگ کیچ ءَ گوستگیں دو روچ ءَ چہ ڈرون بالگرد ءِ بُرز بالی برجاہ – دمگی اِھوالکار رِد ءَ، ڈرونز ھاسکار کلبر ءُ زامران ءِ دمگاں گشت کنگ ءَ گندگ بیتگ اَنت-

ھمے میان ءَ بلیدہ ءِ کش ءُ گوراں پاکستانی پوج ءِ جھلی سُر ءُ پُر ھم گیشی گندگ اتکگ، چریشی ءَ گمان اِنت لشکر کشی ءِ گمان کنگ بیگ ءَ اِنت-

سرکاری نیمگ ءَ ھچ وڑیں کاروائی یا آپریشن ءِ پدری کنگ نہ بیتگ-

بلوچستان ءِ دمگ کلات ءَ سے شمبے ءِ روچ ءَ پاکستانی پوج ءِ یک کاروانے ءِ سر ءَ اُرش کنگ بیتگ، چریشی ءِ آسر ءَ دمگی اِھوالکار رِد ءَ کم چہ کم نُھ کارندہ بیران وھدے کہ بازین ئِے ٹپی بیتگ اَنت ءُ اُرشکاراں سلاھاں دستیگ کنگ ءِ سوبمند بیتگ اَنت-

وئیل کلات ءِ دمگ کوھک ءَ ھما وھد ءَ بیتگ وھدے پوج ءِ کاروان گوزگ ءَ بیتگ – دمگی جھمنند ءُ چمّگندیں شاھدانی گوشگ اِنت کہ اُرش سنگر گپتگ ءُ کنگ بیتگ ءُ اُرشکاراں کاروان جتاجتائیں نیمگاں چہ نشانگ کتگ اَنت کہ اود ءَ مزنیں سلاہ کارمرز کنگ بیتگ-

تنی وھدے واکدارانی نیمگ ءَ چہ وئیل ءِ پدری یا جانی تاوان ءِ سرپدی شنگ نہ کتگ-

اِھواالکار ءِ ٹاہ اِنت کہ اُرش ءِ میان ءَ بازیں کارندھے بیران یا سک ٹپی بیتگ اَنت، وھدے اُرشکاراں سلاہ دستیگ کنگ ءَ سوبمند ھم بیتگ اَنت-

اُرش ءَ پد وھدے کمک ءِ ھاتر ءَ پاکستانی پوج ءِ دومی کاروان وئیلجاہ شتگ ءُ اشی ءِ سر ءَ ھم اُرش بیتگ چریشی ءَ پد دگہ یک میڑے بندات بوتگ-

بلے اُرش ءِ زمہ واری انگت ھچ گل ءَ نہ زرتگ-

بلوچستان ءِ دمگ مستونگ ءَ اسپلنجی ءَ ھند ءَ پاکستانی لشکر مزنیں کچے ءَ آپریشن کنگ ءَ اِنت آئی ءَ بازیں کچے ءَ لشکر ءَ ھور بالگرد ءُ بکتربند گاڑی ھوار اَنت-

اسپلنجی ءِ دمگ مرو ،مل، تنک ،شیشار ءُ کش ءُ گوری دمگاں آپریشن برجاہ انت اود ءَ جاگہ جاگہ لشکر ءَ دگ بندی کتگ ءُ گوں ترندی ءَ پٹ ءُ پول کنگ ءَ اِنت ۔

مردمانی گوشگ اِنت دمگ ءَ لشکر ءِ بالگردانی روگ ءُ آیگ برجاہ اِنت ءُ لشکر ءِ کاروان ھم پیداگ ءَ گندگ بیتگ اِنت ۔ آپریشن ءَ سرویلنس ءُ ڈرون ھم کار مرز کنگ اِنت-

واکداراں انگت ءَ اے بابت ءَ ھچ سرپدی یے نداتگ ۔

زانگ بہ بیت کہ قلات ءُ مستونگ ءَ پاکستان ءِ لشکر سک گیش ءَ چہ گیش اُرشانی نشانگ بیتگ ایشانی آسر ءَ مزنیں کچے ءَ جانی تاوان بیتگ انت-

ھمے وڑ دالبندین ءَ بنجاھی شاھدگ ءَ سلاہ بندیں مردماں دگبندی کتگ ءُ مساپری گاڑیاں پٹ ءُ پول کار ءُ باری گاڑیاں نشانگ کتگ اَنت۔

بلوچستان ءِ دمگ چاغی ءِ ھند دالبندین ءَ سلاہ بندیں مردماں ناکہ بندی کتگ ءُ مسافر گاڑی پٹ ءُ پول کتگ ءُ مڈی بریں گاڑی مانداشتگ ۔

دالبندین ءِ کرود پھاٹک ءَ سلاہ بندیں مردماں ناکہ بندی کتگ ءُ بنجاھی شھدگ ءِ سر ءَ مسافر بس ءُ دگہ گاڑیانی پٹ ءُ پول کتگ۔ دومی نیمگ ءَ ایل پی جی ءِ روکیں گاڑی سلاہ بندیں مردماں نشانگ جوڑ کتگ ءُ مانداشتگ انت۔

دالبندین ءِ مزن شھدگ ءِ سر ءَ ناکہ بندی ءِ ویل پیش اتکگ کہ اود ءَ گاڑیانی سنیپ چیکنگ کنگ بوتگ ۔ پیسر ءَ ھم سرجمیں بلوچستان ءَ ھمے وڑیں وئیل بوتگ اَنت۔

بلوچ سلاھ بندیں آجوئی ءِ گل بلوچستان ءَ مڈی بریں گاڑیاں نشانگ جوڑ کنگ ءَ انت ءُ اے گپ ءَ دیم ءَ آرگ ءَ انت کہ اے گاڑی بلوچستان ءِ گواچنی مڈیانی لٹ ءُ پُل ءُ پاکستان ءِ مالیت ءَ را مھکم کنگ ءَ کارمرد بیگ ءَ انت۔

گوستگیں ماہ ءَ بلوچ لبریشن آرمی ءَ مستونگ ءَ سینڈک پروجیکٹ ، ریکو ڈک پروجیکٹ ءُ دگہ پروجیکٹانی گاڑی کہ مڈی بروک نشانگ جوڑ کنگ بیتگ انت-

اے اُرشانی تہ ءَ 16 ءَ چہ گیش گاڑی نشانگ جوڑ کنگ بوتگ اَنت کہ ایشی ءِ سبب ءَ ٹرانسپورٹراں سیکورٹی ءِ جیڑھانی سبب ءَ گاڑیانی جنزینگ بند کتگ انت-

بلوچستان ءِ دمگ کلات ءَ پاکستانی لشکر ءِ کاروانانی سر ءَ مزنیں اُرش ءَ پد دمگ ءِ جاور انگت ءَ ناگیگ انت-

مرچی ھیلی کاپٹر دمگ ءَ آیگ ءَ گندگ بیتگ انت ءُ بازیں کچے ءَ پورسز پند ءَ گشت کنگ ءَ ھم گندگ بوتگ-

گوستگیں شپ ءَ کلات ءِ دمگ کوھک ءَ سلاہ بندیں مردماں پاکستانی لشکر ءِ کاروان ءِ سر بستگ ءُ اُرش کتگ ءُ زبردستیں اُرش ءَ پد لشکر انگیر کتگ ءُ چُپتگ ءُ اود ءَ بازیں ساھتاں جنگ ءُ چوپ برجاہ بوتگ۔ پد ءَ اُرش ءِ تہ ءَ لشکر ءِ کمک ءَ سر بوھوکیں کاروان ءِ نشانگ جوڑ کنگ بوتگ۔

مرچی سھب ءَ مستونگ ءِ دمگ آب گل ءَ پاکستانی اُرد ءِ پیادگیں لشکر ءَ بمبتراکے ءِ نشانگ جوڑ کنگ بیتگ-

ھالانی رد ءَ پورسز ءِ کارندھاں وتی گاڑی دور ءَ ایر کتگ ءُ پد ءَ دمگ ءَ پیادگ ءَ دیم ءَ روگ ءَ بیتگ انت کہ تراک ءَ آ نشانگ جوڑ کنگ بوتگ انت۔ تراک ءِ آسر ءَ شش کارندہ بیران ءُ ٹپی بوھگ ءِ ھال ھست۔

زانگ بہ بیت کہ بلوچستان ءَ پاکستانی لشکر یکشل ءَ اُرشانی نشانگ جوڑ کنگ بوگ ءَ انت بلے پاکستانی لشکر ءِ شنگکار آئی ایس پی آر یا دگہ واکداراں اے درگت ءَ ھچ وڑیں لیکھاں درشان کنگ ءَ نہ انت۔

دو روچ پیسر تفتان ءَ پاکستانی پورسز ءِ یک کارندہ ، اختر ء محمد صدیق آراھی جھمنند ، پنجاب ءِ شجاع آباد ءِ نندوک ، چہ پورسز ءِ کیمپ ءَ بازار ءَ روگ ءِ وھد ءَ تیرگواری ءَ بیران بوتگ ۔ اُرش ءِ ذلزمہ واری بلوچ لبریشن آرمی ءَ زرتگ ات بلے واکداراں اے بابت ءَ ھچ گپ دیم ءَ نیاؤرتگ۔

کلات ءُ مستونگ ءَ بوتگیں اُرشانی زمہ واری انگت ءَ کس ءَ نہ زرتگ۔

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں ھژدہ جولائی ءِ سُھب دہ ءِ نزیک ءَ مستونگ ءِ دمگ چوتو ءَ بُنجاھی شھدگ سر ءَ زورگریں پاکستانی پولیس ءِ سے گاڑیانی سر ءَ ھمگرنچیں کاروان ءِ سر ءَ سنگر گپتگ ءُ یک سوبمندیں اُرشے کتگ – اُرش ءَ کاروان ءَ ھوار ھستیں دمگی ڈپٹی سپرنٹنڈنٹ آف پولیس عبدالرزاق سواتی ءِ گاڑی ءِ سر ءَ ھاسکار نشانگ کتگ، چریشی ءِ آسر ءَ عبدالرزاق سواتی ءَ ھوار دو پولیس کارندہ جاہ پہ جاھی مرتگ اَنت- سرمچاراں پولیس ءِ کاروان ءَ ھوار آ دگہ گاڑی ھم نشانگ کتگ کہ آیاں کمو تاوان رس اِتگ-

جارکش ءَ گْوشتگ کہ دگہ یک اُرشے بلوچستان لبریشن فرنٹ ءِ سرمچاراں شانزدہ جولائی ءَ یک کاروائی ءَ مستونگ ءِ دمگ کھڈ کوچہ ءَ حسن ھوٹل نزیک ءَ بلوچستان ءَ مڈی لُٹ ءُ پُل کنگ ءُ بروکیں دو گاڑی اُرش ءِ نشانگ کتگ ءُ تاوان داتگ اَنت-

جارکش ءَ گْوشتگ بلوچستان لبریشن فرنٹ مستونگ ءَ پولیس کاروان ءُ مڈی بروکیں گاڑیانی سر ءَ بیتگیں اُرشانی زمہ واری ءَ منّ اِیت ءُ رسانکدر ءِ وسیلگ ءَ چہ پولیس ءَ کڈن کنت کہ آ وتی رویشگ ءَ شر بکنت بلوچ بگیریں پُرکاریاں چہ دزکش بہ بیت اگاں ناں گُڑا آ تچکی ءَ نشانگ کنگ بیت-

کراچی ءِ دمگ چہ لیاری ءَ سیادی داروکیں ورنا زاھد بلوچ ھپدہ جولائی 2025 ءَ زورانسری بیگواہ کنگ بیتگ بازیں روچانی گوزگ ءَ اَبید دیم ءَ آرگ نہ بیتگ-

کھول رِد ءَ آ بیگاہ ءِ پنچ ءُ نیم ءِ میانی ءَ وتی رکشہ ءِ گوم ءَ وتی مدامی ڈول ءَ سواری ءِ ودار ءَ اوشتوک بیتگ وھدے سادھیں پوشاکانی تہ ءِ ناشناسیں مردماں آ زورانسری گاڑی مان کتگ ءُ برتگ وئیل ءَ پد آئی ءِ ھچ وڑیں ھال نیست-

سے شمبے ءِ روچ ءَ کراچی پریس کلب ءَ پریس کانفرنس کنان ءَ زاھد بلوچ ءِ پت ابدالھمید بلوچ ءَ گوشتگ کہ آئی ءِ چُک ھچ چُشیں درکانودی پُرکاریاں ھوار نہ بیتگ، زاھد یک پُرایمنیں ءُ کانود دوستیں شھری یے کہ آئی ءَ انّوگاں کراچی یونیورسٹی ءَ چہ میان استمانی سیادی ءَ گریجویشن سرجم کتگ-

آیاں گْوشتگ کہ زاھد یک زانتکار ءُ مھنتی ئیں ورنایے بیتگ کہ مالی جاورانی سوب ءَ رکشہ چلائینتگ ءُ وتی لوگ ءِ لاپ داتگ-

عبدالحمید بلوچ وھدے تھانہ ءَ ایف آئی آر نکش کنگ ءَ شتگ گُرا پولیس ءَ ایف آئی آر نہ زرتگ چریشی ءَ چہ کھول گیش گم ءُ رنجانی تہ ءَ اِنت-

آیانی گوشگ اِنت کہ زاھد ناں تھنا وانندھے بیتگ بلکیں آئی ءَ وتی مھنت ءَ چہ پدر کتگ آ یک شرپداریں شھری یے کہ کانود ءِ پاسداری کنان ءَ وتی زندگی ءَ گوازینگ ءَ بیتگ-

پریس کانفرنس کنان ءَ کھول ءَ ھکومت، آمیدگس، ءُ انسانی ھکانی گلاں چہ لوٹ کتگ کہ زاھد بلوچ ءَ زوت یل کنائینگ ءِ دلجمی بدے اَنت آئی ءِ سلامتی ءِ درگت ءَ کھول ءَ سرپد کن اِت ءُ آئی ءِ بیگواھی ءِ ساپ ءُ پلگاری ءَ چہ پٹ ءُ پول بہ کن اِت-