پوسٹرانی دُنیا
نبشتہ کار: مھروان کمبر
دی بلوچستان پوسٹ
شھر ءِ دمکاں، در ءُ دیوالان ءُ زھرشانی ءِ بُنجلاں ھما مردمانی پوسٹر لگ اتگ اَنت آ تھنا اَکس نہ اَنت بلکیں وھد ءِ گواھی اَنت۔ ھما چیھال اَنت کہ کاگدانی سر ءَ سمبھینگ بیتگ اَنت، ھما چم اَنت کہ کرنے ءَ گیش وداریگ اَنت، ھما جُست اَنت کہ دنز ءُ گبارانی تہ ءَ ھم گندگ بنت۔ اے پوسٹر زور گار ءُ بیگواہ کنگ بیتگیں بلوچانی درداں ھوار یک اَنچیں بے تواریں دُنیایے ءِ سروکی ءَ کن انت کہ بے تواری ءِ ساھت ءَ ھم ھبر کنت۔
اے پوسٹرانی تہ ءَ زندگیں مردم نہ بے نام اَنت نہ کہ درامد۔ ھر پوسٹرانی پُشت ءَ یک ماتے ءِ مھر، گھارے ءِ ودار، پتے ءِ بے تواری، ءُ زھگانی کودکیں دُواھانی سرجمیں کسھے چیر اِنت۔ پوسٹر جوڑ بوتگیں مردم ھما اَنت کہ آ نودربر اِت انت، دھکان کار اِت انت، دریا ورد اِت انت، اُستاد اِت انت ءُ واب گندوکیں ورنا اِت انت۔ بلے آیانی ھستی پوسٹرانی دُنیا ءَ بند کنگ بوتگ اَنت۔
دیوالانی سر ءَ لِچینتگیں پوسٹر تھنا پرنٹ کُتگیں اَکس نہ اَنت بلکیں یک کھولے ءِ زندگی ءِ بُنجاہ اَنت۔ یک ماتے ھر روچ وتی زھگے اَکس ءَ دست ءَ کنت زھرشانی گدان ءَ نند ایت، اسل ءَ آ دُنیا ءَ ھمے یاتاں گیجیت کہ آئی ءِ بچ وت گار نہ بیتگ بلکیں زور بیگواہ کنگ بیتگ۔ کبزہ گیریں ریاست ءِ بے تواری، آئی ءِ چیریں ادارھانی نہ منّگ، ءُ آمید گسانی نہ انساپی، درست ھمے پوسٹرانی کش ءُ گوراں مُچ بنت۔
وھد ءِ ھمراھی ءَ پوسٹرانی کچ گیش بوان اَنت۔ انگت پیسری مردم آجو نہ بوتگ اَنت کہ نوکیں مردمانی پوسٹر شھر ءِ دیوالانی سر ءَ لِچّینگ بیتگ اَنت۔ اے پوسٹر یک راجے ءِ مُچانکی یاداشت ءِ بھر جوڑ بوتگ اَنت۔ اے ھما آدینک اِنت کہ بلوچ چاگرد اِیشی ءِ تہ ءَ وتی گواچنیں دروشم ءَ گند ایت۔
بِگند ئے یک روچے پوسٹر جوڑ بیتگیں مردماں انساپ بہ رس ایت۔ بِگند ئے یکروچے پوسٹر جوڑ بوتگیں مردم زندان ءِ تھاریں کُوٹیاں چہ آجو بہ بنت ءُ بیاینت۔ ھما وھد ءَ کہ اے وڑ نہ بیت گُڑا اے پوسٹرانی دُنیا زندگ بیت، کوکار کن انت، چیھال جن انت ءُ مارا ھمے یاتاں پرین انت کہ کسے ءِ چُک، برات، پت واتر نہ بیتگ اَنت۔
دیوالانی سر ءَ جتگیں پوسٹرانی وتی دُنیایے، اَنچیں دُنیایے کہ زندگی یک اَکسے، یک گوستانکے، ءُ یک گالے ءَ کیت ءُ ھلاس بیت بزاں ” گار ءُ بیگواہ”۔ اے پوسٹر کاگدانی ٹُکر نہ اَنت، اے چیھال اَنت، آ ءُ اُپّار اَنت ءُ ھما گار ءُ بیگواھیں ساھتانی گواھی اَنت کہ بلوچ راج ءِ سینگ ءَ چو جُھلیں ٹپّے ءَ پشت کپتگ اَنت۔
دو دھک ءَ گیش اِنت کہ بلوچستان ءِ سر ءَ گار ءُ بیگواھی ءِ دِرچ برجاہ اِنت۔ ھزاراں ورنا، پیر ءُ کماش زالبول، وانندہ، اُستاد وتی لوگانی تہ ءَ وپتگیں واب ءَ، شھراں، وانگجاھاں، نادرھجاھاں چہ برگ ءُ زور گار ءُ بیگواہ کنگ بیتگ اَنت۔ آیانی جُرم بس ھمیش اِنت کہ آ بلوچ اَنت۔ گار ءُ بیگواہ کنگ بیتگیں مردم گیشتر جونانی دروشم ءَ مارا دست کپتگ اَنت۔ اگاں کسے آجو بوتگ گُڑا آیانی داگ داتگیں بالاد ءِ ٹپ ءُ ٹوراں وت زوراکی ءِ کسہ آورتگ اَنت۔
اے زورانسری گار ءُ بیگواھیانی بِگیر ءَ چِست بیتگیں توار ءِ یکیں وسیلہ ھمے پوسٹر اَنت کہ زھرشانی گدان ءَ جتگ اَنت، یا کہ ماس ءُ گھارانی دست ءَ اَنت ءُ دگ ءُ چار راھانی سر ءَ زھرشانی کنگ ءَ اَنت۔
اے پوسٹر پیسر ءَ مایوسی، گم ءُ ودار ءِ چیدگ بیتگ اَنت بلے وھد ءِ ھمراھی ءَ اے پوسٹر گھگیری ءِ چھر ءُ شُبین جوڑ بوتگ اَنت۔ بلوچ چاگرد ءِ تہ ءَ اے اکس تھنا یادگارے جوڑ نہ بوتگ اَنت بلکیں اے پوسٹر بلوچ ورنایاں جیڑگ ءَ لاچار کن انت، زالبولاں زھرشانی کنگ ءَ جاڑیگ کن انت ءُ دُنیا ءِ کرّیں گوشاں ھمے توار ءَ رسین انت کہ بے تواری زُلم ءُ زوراکی ءِ پلہ مرزی ءِ نام اِنت۔
پوسٹرانی دُنیا مئے تھانگ ءَ لرزین اِیت۔ اے بے تواری یے نہ اِنت بلکیں اَنچیں چیھالے کہ اَھد ءِ زوراک ءِ بستگیں ماڑی ءَ ڈورین ایت۔ بلوچ گار ءُ بیگواھیں مردمانی پوسٹر سرجمیں انسانیت ءِ زمیر ءَ ژانبلین ایت۔
داں ھما وھد ءَ اے پوسٹرانی تہ ءِ چیریں کسہ گوشدارگ مہ بنت، داں ھما وھد ءَ اے گار ءُ بیگواھیں مردماں انساپ مہ رس ایت گُڑا دگ ءُ کِشکاں، زھرشانی گداناں ءُ مئے سنچ ءُ سما ءِ تہ ءَ اے پوسٹر زندگ مان انت۔
پوسٹرانی دُنیا مارا ھمے یاتاں پرین ایت کہ تھنا ھما مردم گار ءُ بیگواہ نہ اِنت بلکیں یک ماتے ءِ واب، گھارے تاھیر، پتے ءِ کرار، دوستانی بچکند ءُ زمین ءِ وشبو بیگواہ اِنت۔ اے ھما ساھت اَنت کہ کاگدے سر ءَ نہ بلکیں یک راجے ءِ گوستانک ءِ سر ءَ لِچینگ بیتگ اَنت۔ لَھتیں پوسٹر کوھن بنت، کاگد در اَنت، بلے ماتانی ودار کوھن نہ بنت۔ لَھتیں پوسٹراں گوات بارت، ھُور شود ایت ءُ ساپ کنت بلے گھارے چمّانی ارس ساپ نہ بنت۔
زورگیریں ریاست ستر چمّاں نز بہ کنت بلے اے دیوال انگت گواھی دے انت۔ اے پوسٹر مارا بے تواری ءِ ساھتاں ھبر کنگ پرماینت ءُ ھمے گُش انت کہ یات بہ کن ات کہ کسے ءِ بیگواھی کسھانی آسر نہ اِنت بلکیں مئے درستانی بے وسی ءِ بندات اِنت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
