TBP Balochi

بلوچستان ءِ دمگ کلات ءَ دگہ یک اُرشے ءَ پاکستانی لشکر ءَ تاوانانی دیمپانی کنگ کپتگ ۔

مرچی سھب ءِ سر ءَ پاکستانی لشکر ءَ کلات ءِ دمگ کوھک ءُ کش ءُ گوری دمگانی نیمگ ءَ بازیں مارٹر گواری کتگ بلے ھچ وڑیں تاوان ءِ ھال نیست۔

پد ءَ پاکستانی لشکر ءَ پیادگ ءَ دمگ ءَ دیم ءَ روگ ءِ جھد کتگ بلے سنگر گپتگیں سلاہ بندیں مردماں اُرش ءِ نشانگ کتگ۔ اُرش ءَ سیکورٹی پورسز ءِ بازیں کارندہ بیران ءُ ٹپیگ بوتگ اَنت بلے واکداراں اے بابت ءَ ھچ وڑیں ھال دیم ءَ نیاؤرتگ انت۔

دمگی مردمانی ءِ رد ءَ اُرش ءَ پد چہ دمگ ءَ لشکر ءِ کاروان روگ ءَ ھم گندگ بوتگ۔

زانگ بہ بیت پاکستانی لشکر گوستگیں پنچ روچاں کلات ءُ مستونگ ءَ آپریشن ءَ گوں دزبند اِنت کہ لشکر ءَ سکیں اُرشانی دیمپانی کنگ کپگ انت-

واکداراں اے اُرشانی تہ ءَ میجر زیاد ءَ ھوار پاکستانی لشکر ءِ شش کارندھانی بیرانی ءِ پدرائی کتگ۔

بلوچ لبریشن آرمی ءَ سرجمیں بلوچستان ءَ 23 پاکستانی کارندہ ءِ کوش ءِ زمہ واری من اتگ انت کہ ایشی ءِ تہ ءَ کلات ءُ مستونگ ءِ اُرش ھم ھوار اَنت۔ اے اُرشانی تہ ءَ آئی ای ڈی ءُ سلاہ بندیں اُرش ھوار اَنت۔

کارست چو شاشان ءِ کوہ ءَ

نبشتہ کار: بچکند بلوچ

دی بلوچستان پوسٹ

بلوچ جھد ءِ آجوئی ءِ توک ءَ ھمک سرمچار ءَ یک بے مٹّین کردے بیتگ، ھمُک سرمچار ءِ کرد ءِ سر ءَ ھمینچک نبشتہ کنگ بہ بیت من گوشاں شھیدیں سرانی کرد سرجم ءَ بیان کنگ بہ بیت۔ ھمے سرمچنڈانی رد ءَ یک بے مٹّین سنگتے شھید سنگت سفیان بلوچ بیتگ۔کہ آئی ءَ وتی زند ءِ درستیں مراد پہ بلوچ ءِ وشیں باندات ءَ ندر کت بلے پد نہ کنز اِت۔ شھید سفیان جان گوں وتی پُر آشوبیں چھرگ ءَ مرچی بلوچ وانندگ ءُ بے وانوکیں نوجوانانی دیم ءَ یک چراگے ءِ پیم ءَ اِنت ءُ آیاں روژنائی بکشایگ ءَ اِنت۔ مرچی ھرچ سیاسی ءُ چاگردی جھد کار ھم چو سرمچاراں آئی ءِ داتگیں پگر ءِ سر ءَ زند گوازینگ پہ وت ءَ یک شانے زان اَنت ءُ گوں دل ءُ جان ءَ ھمے راھبند ءَ جنزگ لوٹ اَنت۔

من ءَ شاہ دربرجاہ ءَ دو سال سرجم بیتگ اَت ءُ منی چپ ءُ چاگرد گوں بلوچ نودربراں سک براہ دار اَت بلے گوں ھورتی ءَ چارگ بہ بیت آ چاگرد انچش بس یک راھبندے اَت گوں شھید سفیان ءَ نند ءُ نیاد ءُ آئی ءِ وش گوشیں دیوان ءَ چہ پائدگ چست کنگ ءِ موھے اَت شھید شاشان بلوچ ءَ گوں اولی رند ءَ من ءَ یک سیاسی دیوانے ءَ یک جاہ بوت ایں اے وھد ءَ شھید شاشان یو ایم ٹی لاھور ءَ بلوچ اسٹوڈنٹس کونسل یو ایم ٹی ءَ چئیرمین اَت۔ دیوان ءِ بندات ءَ من گوں وتی ھمراھی ءَ آ شھید دیست ءُ سلام کت گڑا بلوچی اھوال ءَ آسر چئیرمین شاشان ءَ مارا گوْشت سنگت شُما بہ نند اِت من وتی کاراں ٹھیناں گڑا گوں سنگت ءَ تھنائی ءَ دیوانے کناں۔ شھید ءِ پاگ واجھی آ دیوان یک شوکیں وڑے ءَ آسر بوت گڑا منی چم کپت چئیرمین شاشان مئے نیمگ ءَ پیداک اَت۔ من ھم چار کدم دیم ءَ چست کت پہ شھید سفیان ءِ نیمگ ءَ شھید سفیان ءَ گوشت سنگت بیا رو ایں ھاسٹل ءَ گڑا ما پرپٹ ءِ سر ءَ دیم پہ ھاسٹل ءَ روان بوت ایں۔

ھاسٹل ءَ کہ ما رس اِتیں گڑا آپ ءُ چاہ ءَ رند شھید سفیان جان ءَ من ءَ جست کت سنگت تو چے وانگ ءَ ئے من گوشت سنگت من ایجوکیشن اے بی ایس کنگ ءَ آں دومی جست ءَ من ءَ گوشت ئِے ایجوکیشن ءَ ابید چے وانگ ءَ ئے من گوشت زیادہ ناں ھچ بس بلوچ ءِ انوگیں جاورانی سر ءَ چیزے نبشتانک یکجاہ کتگ ءُ ھمایاں وانگ ءَ آں ۔ شھید ءِ جند پولیٹیکل سائنس ءَ بی ایس آسر کنگ ءَ اَت ءُ آئی ءَ ھشتمی سمسٹر ءِ ایگزامز بوتگ اِت اَنت گڑا من ءَ گوْشت ئِے تو چے گوش ئے بلوچ ءِ جھد چے وڑ ءَ اِنت۔ منی نزوریں ملی ءَ اینچک زیادہ بھر نہ بیتگ من گوشت۔ شھید ءَ گوشت سنگت ملی و درسانی نزور اِنت بلے مارا وتی راج ءِ ایردستی چماں دارگ ءُ چیزاں چارگ لوٹ اِیت۔ مارا سھب ءُ شپ وتی راجی جیڑہ گیشینگی اِنت۔ مارا آجوئی ءِ ھوری ءَ وتی راج دنیا ءِ ایدگہ راجانی وڑ ءَ زانت دیگی اِنت۔ مرچی مئے نازاکیں برات ءُ گُھار پہ وشیں بانداتے ءَ سر دیگ ءَ اَنت۔ مئے ءُ شُمئے سر ءَ پرز ھمیش بیت کہ ما دربرجاھاں وتی راج ءِ دیمروی ءِ واستا کار بہ کن این ءُ دومی نیمگ ءَ وتی شھیداں یات بہ کن ایں ۔ شپ گوستگ اَت گڑا شھید ءَ مارا گوشت سنگت شُمارا دمبرتگ ءُ من ءَ ھم واب ءَ گپتگ شمئے اجازت ءَ گوں انُو وپسیں سھب ءَ کمک کار ھست مارا۔

سھب ءِ سر ءَ ما وھدے روان بوتیں پہ وتی ھاسٹل ءِ نیمگ ءَ ءُ پد ءَ وتی کاراں گوں دست گٹّ بوتیں وتی وڑ ءَ۔ کسانیں مدتے ءَ پد یک روچے ھال رس اِت کہ سنگت شاشان بلوچ مسلھ جھد ءِ بھرے بیتگ۔ نوں منی دِل ءَ کرار یل کت کہ من پرچا شاشان بلوچ ءَ گوں گیشتر وھد نہ گوازینت کہ آ منی دیم ءَ گوستگیں یک جھد کارے بیتگ۔

سے ماہ ءَ پد من ءَ ھم ھمے وشیں کوش نسیب بوت من ھم ھمے راہ وتی کت۔ اولی روچ ءَ کہ من بلوچستان ءِ پُر مھریں کوھاں رس اِتاں من ءَ شھید یاسین بلوچ گوں دگہ یک سنگتے ءَ دست گپت ءُ دومی سنگت وتی وتاک ءَ روانگ بوت من ءُ شھید یاسین شھید میران بلوچ ءِ وتاک ءِ راھبند گپت گڑا راھبند ءَ مئے ملاکات گوں چار سنگت ءَ بوت کہ چہ سپر ءَ پیداک اِت اَنت شھید شاشان ھمے سنگتانی ھمراہ اَت سنگتاں بلوچی ربیدگاں گوں سلام کت۔ دمے نِشت ءُ دیوان کت۔ شھید شاشان ءِ رنگ مٹّ بیتگ اَت نوں آئی ءِ بالاد ءُ چھرگ ءَ چہ گندگ بیگ ءَ اَت کہ آئی ءَ اے جھد ءِ راہ ءَ بازیں پند ءُ واری سر ءَ گوازینتگ اَت۔ گوں پُر نوریں چھرگ ءَ سفیان جان یک کاملیں سرمچارے گندگ بوت۔ تنزیمی رولزانی پاسداری ءَ ماں وتی پرسنل دیوان نہ کت۔ بلے آئی ءِ وشیں بِچکند ءَ چہ زانگ بوت کہ آ گوں من گپ کنگ لوٹگ ءَ اِنت ءُ من ھم وسواسے ءَ کپتاں کہ گوں سفیان جان ءِ تھنائی ءَ کمک گپ بہ جناں ءُ آئی ءَ چہ سوج بگراں۔ ھیر یاسین جان ءَ من ءَ گوشت سنگت مئے راھبند ءَ دیر اِنت من چہ سنگتاں اجازت لوٹاں۔ من گوشت ھو کرباناں بیا رو ایں۔

وتاک ءَ منی چارمی روچ اَت کہ بیگاہ ءِ وھد ءَ شھید سفیان اتک مئے وتاک ءَ شھید میران ھم اے وھد ءَ وتاک ءَ اَت۔ سنگتاں وش اتک کت۔ شپ ءَ ورگ ءِ ورگ ءَ رند دیوان بوت سنگتاں یکے دومی ءَ گوں گپ جت۔ من ءُ شھید سفیان ءَ ھم کسانیں دیوانے کت۔ نوں سنگت ءَ من ءَ چہ دیوان ءَ ھچ وڑ ءَ یل نہ کت بلے پوجی ھسول ءِ وڑ ءَ مئے دیوان پہ واب ءَ پش کپت کہ مارا سھب ءَ وھدے پاد آیگی اَت گڑا ما شُتیں پہ وتی واب جاھاں۔

سھب ءَ منی چم کپت وھدے سفیان پاد اتک وت ءُ شھید یاسین پہ سنگتاں چاھے جوڑ کنگ ءَ اِت اَنت۔ چاہ ءَ رند مارا پد ءَ کسانیں وھدے رس اِت گڑا ما پد ءَ وتی پش کپتگیں دیوان برجاہ داشت۔ شھید گوں وتی زانت ءَ یک مزنیں ھستی یے اَت کہ منی دیم ءَ گوں وتی دریائیں ھیال ءَ تران کنگ ءَ اَت۔ من ءَ بازیں چیزانی بابت ءَ سرپدی نیست اَت گڑا سفیان جان ءَ من ءَ جوانیں وڑے ءَ سرپد کنان کت ءُ من ءَ سوھو کت کہ سنگتاں اے راہ ءِ گرانتریں ساھت ھما بنت کہ وھدے گوں ما یکیں سنگر ءَ نِشتگیں سنگت گوں دژمن ءَ جنگ دیان ءَ شھید بہ بنت گڑا مارا چوشیں وھد ءَ گوں ھوسلہ ءَ کار کنگ لوٹ اِیت مارا پروش ورگی نہ اِنت اگاں مارا باندات زندگ کنگی اِنت گڑا مارا گو وتی لوگ، مات، پت، برات ءُ گاراں ھور وتی جند ھم کربان کنگی اِنت۔ وتی جند ءِ ھرچ لوٹ کہ پہ ما وتی زات ءَ وش بنت مارا یل کنگی اَنت ءُ (وتی راھبند ءِ چیدگ) وتی پاکیں شھیدانی کرد دیم ءَ ایر کنگی اِنت ءُ دیم ءَ روگی اِنت۔ جھد ءِ آجوئی تھنا سر اناں بلکیں وتی جند ءِ زاتی واھگانی کربانی ءِ ھم نام اِنت۔ اے کوھاں مئے نازاکیں شھیدانی ھون رتکگ اَنت۔ اے وتاک ھمایاں آباد کتگ۔ اے کوہ یک مزنین کچے ءَ مئے دژمن ءِ کارندہ بیتگ اَنت مئے دژمن کوھاں ھچ وڑ ءَ سرپد نہ بیتگ ءُ ناں کہ دیم ءَ سرپد بیت بلے آئی ءَ ھما کارندہ مئے براتاں شھید کت بازیں سنگت چو کہ شھید شھداد ءُ شھید اھسان ھمے بدواھانی تیرانی آماچ بیت اَنت بلے مئے شھیداں گوں آ سِلّ ءُ بدواھاں گوں وتی زگریں ھوناں ساپ کتگ۔ مرچی بِلّ کہ ماں سکتیں جاورانی تہ ءَ جھد کنگ ءَ ایں بلے مارا اے کوھاں اینچک آسراتی ھمے شھیدانی کربانیانی برورد ءَ رس اِتگ۔ مارا بس ھمے جیڑگی اِنت کہ ما وتی شھیدانی ارمان کہ آیانی چمّاں پہ بلوچ راج ءَ یک آجوئی ئیں بانداتے و بیتگ چون سرجم کنگی اِنت۔ مارا ھر وھد ءَ جنگ ءِ بابت ءَ جیڑگی اِنت کہ کجام کجام چیز مارا نزور کن اَنت کہ ما آیاں چہ دور بہ ایں ءُ کجام چیز مارا کمک کنت ءُ مئے دژمن ءَ نزور کنت۔

ھمے ساھت ءَ من ءَ شھید میران ءَ توار کت گوشت سنگت تو گوں نوکیں سنگتان مرچی برو گازی وتاک ءَ کہ شُمئے لانگ کورس بندات بیت۔ من گوں سنگتاں روان بوتاں پہ وتی راہ ءَ چئیرمین شاشان شُت پہ وتی وتاک ءَ۔ ماھے ءَ رند مئے زمہ داری مارا گوشت ءُ راہ دات گڑا من چہ سنگتاں دور بیتاں۔ نوں من وتی کاراں دست گٹ بیتاں کہ اناگت ءَ مارا سنگتے ءَ ھال دات کہ چئیرمین شاشان ءُ آئی ءِ سنگتانی وتاک ءَ یک مزنیں کچے ءَ آپریشن کنگ بیتگ۔ گڑا ما جست کت سنگت چون اَنت۔ سنگت ءِ دیم ءَ یک گمے گندگ بیگ ءَ اَت۔ من پد ءَ جست کت سنگت جلدی بہ گوش سنگتانی چے ھال اِنت۔ سنگت ءَ دیم چست کت ءُ مارا پسو دات کہ سنگت شاشان گوں وتی سنگتان داں دیر ءَ پوج ءِ دیم ئِے داشتگ ءُ جنگ کتگ۔ تمردیں شاشان گوں سے سنگت ءَ نمیران بیتگ۔ اے گپ درس سنگتانی سر ءَ سک گران بوت سنگت کل ھاموش بیت اَنت۔ آیانی ھاموشی یک ٹوھیں دردے زاھر کنگ ءَ اَت۔ مئے دیم ءَ ھما سنگتانی کربانی ءُ جوزگاں ابید ھچ نیست اَت۔ من ءَ بس شھید سفیان جان ءِ ھما گپ یاد اتک کہ (وھدے مئے گوں ما یکیں سنگر ءَ نِشتگیں سنگت گوں دژمن ءَ جنگ دیان شھید بنت گڑا مارا چوشیں وھد ءَ گوں ھوسلہ ءَ کار کنگ لوٹ اِیت مارا پروش ورگی نہ اِنت) شاشان ءِ نمیرانی ءِ ھال بل کہ چہ چلتن ءَ گران اَت۔ بلے آئی ءَ ھما کرد کہ چو شاشان ءَ منی دیم ءَ مِکّ اَت من ءَ گوں دردانی ھمراھی ءَ کربانی ءِ سوج دیگ ءَ اَت۔ مرچی شھید سفیان پہ کُلّیں بلوچ راج ءَ زانت ءِ چیدگ اِنت آئی ءِ جند ندر پہ مادریں سرڈگار ءَ ھرچ نزوریں دِل ءَ تاگت دنت۔ مئے شھید مئے وشیں بانداتے ءِ امیت اَنت۔ ھمُک شھید ءِ کرد ءُ آیانی واری گوں شاشان ءَ ھور چو ڈیوگاں روک اِنت کہ مارا اے جھد ءِ راہ رژنائی بکشان کن اَنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں مستونگ، کلات، زامران، بلیدہ ءُ شال ءَ اُرشانی میان ءَ زورگریں پاکستانی پوج ءِ میجر زیاد ءَ ھوار 23 کارندہ کشتگ انت، نوشکی ءَ ڈیتھ اسکواڈ ءِ کوش ءُ پنجگور ءَ چاریگی کیمرہ تباہ کتگ اَنت – دالبندین ءُ نوشکی ءَ مڈی بروکیں گاڑی مانداشتگ ءُ سرجمی ءَ تباہ کتگ اَنت-

جارکش ءَ گْوشتگ بلوچ لبریشن آرمی ءِ سرمچاراں گوستگیں روچ ءَ مستونگ ءِ دمگ تلخ کاوی ءَ زورگریں پاکستانی پوج ءِ کارندہ یک آئی ای ڈی تراک ءِ نشانگ کتگ، اُرش ءَ پد دمگ ءَ پیشکدمی جُھد کنوکیں زورگریں پوج ءِ کاروان سنگر گپتگ ءُ اُرش ءِ نشانگ کتگ اُرشاں زورگریں پاکستانی پوج ءِ میجر زیاد ءَ ھوار شش کارندہ جاھی مرتگ ءُ سے ٹپی بیتگ اَنت-

جارکش ءَ گوشتگ کہ مستونگ ءِ دمگ آب گل ءِ ھند سر ءَ زورگریں پوج ءِ پیادگ کارندہ یک آئی ای ڈی اُرش ءَ نشانگ کتگ اَنت چریشی ءِ آسر ءَ زورگریں پوج ءِ دو کارندہ مرتگ ءُ چار ٹپی بیتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں کلات ءِ دمگ کوھک ءَ زورگریں پاکستانی پوج ھما وھد ءَ تُرندیں اُرش ءِ دیمپان کتگ وھدے بیست دو جولائی ءَ زورگریں پوج زوراکی ءِ نیئت پیشکدمی کنگ ءِ جُھد ءَ بیتگ- سرمچاراں زورگریں پوج ءِ کاروان ءِ سنگر گپتگ ءُ اُرش ءِ نشانگ کتگ- زورگریں پوج ءِ سے گاڑی تچکی ءَ اُرش ءِ نشانگ ءَ اَتکگ اَنت، پروش وارتگیں بے دلیں کارندہ ءَ تچگ ءِ جُھد کتگ کہ سرمچاراں انگیر ءَ زرتگ ءُ نشانگ کتگ اَنت- اُرش ءَ زورگریں پوج ءِ سیزدہ کارندہ جاہ پہ جاھی مرتگ اَنت وھدے کہ کارندھانی سلاہ ھم سرمچاراں دستیگ کتگ اَنت-

جارکش ءَ گْوشتگ کہ پوج ءِ کمک ءَ سر بیؤکیں کاروان ھم سرمچارانی یک ٹولی ءَ تُرندیں اُرشے ءَ نشانگ کتگ ءُ دُژمن گیشیں جانی ءُ مالی تاوان ءِ دیمپان کتگ چریشی ءِ سوب ءَ زورگریں پوج پُشتکنزی ءَ لاچار بیتگ-

جارکش ءَ گوشتگ بلوچ لبریشن آرمی ءِ سرمچاراں نوشکی ءَ زورگریں پاکستانی پوج ءِ چیریں ادارھانی جوڑ کتگیں وتگڑیں ڈیتھ اسکواڈ ءِ ھاسیں کارندہ معاویہ جمالدینی گوستگیں شپ ءَ ھما وھد ءَ اُرش ءِ نشانگ کتگ ءُ کُشتگ وھدے آ وتی گاڑی ءَ کلی جمالدینی ءَ وتی لوگ ءَ روگ ءَ بیتگ-

جارکش ءَ گوشتگ کہ پوج ءِ چریک معاویہ جمالدینی نوشکی ءَ سلاہ بندیں ٹولی ءِ سروکی ءَ کنگ ءَ بیتگ کہ نوشکی ءِ ورناہ ءُ کماشاں ٹارگٹ کلنگ زورگریں پوج ءِ ورنایاں زورانسری بیگواہ ءُ بلوچ شھیدانی کھولاں تُرسینگ ءَ ھمگرنچ بیتگ- اے چریک زالبولاں چمپروشی ءَ ھوار زورگریں پوج ءِ سروکی ءَ زمینانی سر ءَ دستیگ ءُ زرگرگ ءَ ھم ھوار بیتگ-

جارکش ءَ گوشتگ کہ انٹیلی جنس ونگ زراب ءَ چریک معاویہ جمالدینی ِءِ سُر ءُ پُراں نگاہ داشتگ اَنت- معاویہ جمالدینی ءِ میارباری ءِ سر ءَ بیگ ءَ بلوچ راج سر ءَ زوراکی ءَ ھمگرنچی ءَ کُشگ ءُ گُڈی آسر ءَ کتگ- اے ٹولی ءَ چہ ھم بیگ ءَ آ دگر ھم ‘زراب’ نگاہ داشتگ اَنت آیاں زوت معاویہ جمالدینی وڑ بیت-

جارکش ءَ گوشتگ بلوچ لبریشن آرمی ءِ سرمچاراں نوشکی ءِ دمگ زیارت دستگیر کراس ءُ دالبندین ءَ کرود پھاٹک ءِ ھند سر ءَ مڈی بروکیں دو گاڑی مانداشتگ ءُ تباہ کتگ اَنت – اے میان ءَ سرمچاراں دالبندین ءَ بُنجاھی شھدگ سر ءَ ناکہ بندی کتگ اسنیپ پٹ ءُ پول برجاہ داشتگ-

جارکش گوشتگ بلوچ لبریشن آرمی ءِ بیست دو جولائی ءَ زامران ءِ دمگ آرچنان ءَ زورگریں پاکستانی پوج ءِ کارندہ یک کنٹرول آئی ای ڈی اُرش ءَ نشانگ کتگ چریشی ءِ نشانگ ءَ اتکگ ءُ یک کارندھے جاہ پہ جاھی مرتگ-

جارکش ءَ گوشتگ بلوچ لبریشن آرمی ءِ سرمچاراں بلیدہ ءِ دمگ گِلی ءَ زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ ءَ کتگ چریشی ءِ آسر ءَ زورگریں پوج ءِ دو کارندہ مرتگ ءُ سے ٹپی بیتگ وھدے کہ آیانی گاڑی سرجمی ءَ تباہ بیتگ-

جارکش ءَ گوشتگ کہ گوستگیں شپ ءَ بی ایل اے ءِ سرمچارں شال، اختر آباد ءَ زورگریں پاکستانی پوج ءِ چوکی دستی بمب اُرش ءِ نشانگ کتگ اَنت چریشی ءِ آسر ءَ زورگریں پوج ءِ تاوان ءِ دیمپانی کنگ کپتگ-

جارکش ءَ گوشتگ کہ سرمچاراں پنجگور ءِ دمگ پُل آباد ءَ زورگریں پوج ءِ جتگیں چاریگی کیمرہ ، ٹاور ءُ آئی ءَ ھمگرنچیں سسٹم نشانگ کتگ ءُ تباہ کتگ-

جارکش ءَ گوشتگ بلوچ لبریشن آرمی اے سرجمیں اُرشانی زمہ واری ءَ منّ اِیت ءُ دُژمن ءِ سر ءَ اے وڑیں اُرشانی درچ ءِ برجاہ دارگ اِھد کنت-

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتت کہ بلوچستان ءِ دمگ سبی ءِ ھند لیمجی ءَ بلوچ ریپبلکن گارڈز ءِ سرمچاراں پاکستانی بولان میل ٹرین ریموٹ کنٹرول آئی ای ڈی بمب تراکے ءِ نشانگ جوڑ کتگ۔ اے اُرش ءِ آسر ءَ ٹرین ءَ را سک باز تاوان رس اتگ۔

آئی ءَ گْوشتگ مئے گل بی آر جی اے اُرش ءِ زمہ واری ءَ من ایت ءُ مئے اے وڑیں اُرش داں بلوچستان ءِ آجوئی ءَ برجاہ مان اَنت۔

بلوچستان ءِ دمگ کیچ ءِ ھند بلیدہ ءَ پاکستانی پورسز ءِ گاڑی ءِ ریموٹ کنٹرول بمبے ءِ نشانگ کنگ بوتگ۔

دمگی مردمانی رد ءَ اے تراک ءَ پاکستانی لشکر ءِ گاڑی سرجم ءَ تباہ بیتگ ءُ چریشی ءِ سبب ءَ بازیں کارندھانی بیران ءُ ٹپیگ بوگ ءِ ھال انت۔ بلے اے گپ انگت ءَ چہ واکدارانی نیمگ ءَ پدر نہ بوتگ۔

گوستگیں شپ ءَ شال ءِ شھر اختراباد ءَ ناشناسیں مردماں پاکستانی لشکر دزبمبے ءِ نشانگ جوڑ کتگ بیتگ ۔

بلوچستان ءَ لھتے وھد اِنت کہ آجوئی دوستیں گلانی نیمگ ءَ کاروائی برجاہ انت ءُ پاکستانی لشکر پیسر ءَ ھم اد ءَ چوشیں اُرشانی آماچ بوتگ۔ داں انوگ ءَ مرچیگیں اُرش ءِ زمہ واری کس ءَ نہ زرتگ۔

استال دروشمیں شاشان

نبشتہ کار: مھروان کمبر

دی بلوچستان پوسٹ

چیرمین شاشان : ھما اِنت کہ تئی نمیرانی ءِ ھال اِش کُتگ من تورشت چکاریں موسمے ءِ کُماران آں۔ چُوناھی ءَ من ءَ دیر اِنت کہ ھمے دابیں موسماں زندگی ءِ پشت کپتگیں روچاں تیلانک دیاں ءُ وتی باریگ ءِ ودار ءَ آں۔ نہ وانگ ءَ لزّتے ھست نہ نویسگ ءَ لبز دست کپ ایت، نہ من ءَ تھنائی کرار دنت، نہ مُچّیانی تہ ءَ شور ءُ شار۔۔۔ بس ابیتکی ءَ وتی ملگور شنگ ءُ تالان کُرتگ اَنت۔

چیرمین شاشان : تئی نمیرانی ءَ پد مردم چے بہ گُش ایت چے بہ جیڑ ایت، تو اَنچیں کردے ءِ واھند ئے من ستر بہ گُشاں، تئی ستاہ ءَ بہ کناں، بلے تئی ھما ٹوھیں ھستی اِنت یا کہ ٹوھیں کرد اِنت آئی ءِ دیم ءَ منی چاریں دانک ھچ نہ اَنت۔

چوناھی ءَ ھما کہ زمین زادگ اَنت آ پہ زمین ندر بہ اَنت زمین ءَ ابید دگہ ھچ چیز نہ جیڑ اَنت۔ شاشان جان تو ھم ھما زمین زادگیں مردمانی رم ءَ ھوارئے۔۔۔ ترا دُرستاں چہ گیش زمین دیم ءَ اَت. تو بس زمین جیڑگ ءَ اِت ئے ءُ زمین پند ءَ اِت ئے۔ تئی وڑیں زمین زادگ نہ مر اِنت بلکیں زمین ءِ سینگ ءَ چو دل ءَ دریک انت۔

چیرمین شاشان : تو ھما چراگ اِت ئے کہ تھاریاں گوں جنگ ءَ اِت ئے۔۔۔ تو ھما آواز ات ئے کہ تیرانی توار ءَ ھم اِشکنگ بوت ئے۔۔۔ تو ھما کول ءُ کرار اِت ئے کہ توکلی ءَ گوں سمّو ءَ کُتگ اَت ءُ سرمچاراں گوں زمین ءَ۔۔۔ وھدے دُژمن ءِ تیر تئی سینگ ءَ پیوست بوت ءُ تو زمین ءِ دلبند ءَ کپت ئے۔ گُڑا کوھاں لرزگے بندات کُت۔ گوات ءَ وتی کِشک مٹینت اَنت۔ رُولھی شینک زرد نہ اِت اَنت بلکیں تئی ھُونانی رَنگ اِت انت۔ نوشکی ءِ ھاک ھیسکارگ ءَ اَت۔ ما دیستگ اَت۔ تو زمین ءِ سر ءَ نہ کپتگ ات ئے بلکیں زمین ءَ سجدگانی ساھتاں بوسگ ءَ اِت ئے تئی زمین ءِ سر ءَ ھما جاہ ءَ کہ دُژمن ءَ وتی ھنکین کُتگ اَت مرچی تئی ھُونانی شل بوتکگ اِت انت ءُ دُژمن ءِ ھر چیز ءَ روپان ءُ بران اِت انت۔

چیرمین شاشان : تو اَنچو رَپت ئے کہ اَنچو شپ ھلاس بہ بیت بلے بام مہ بیت۔ اَنچو کہ کُونج کتاراں گسر بہ کپ انت اَنچو کہ مُرگ ویرانیں درچکاں میا اَنت۔ تو رَپت ئے بلے تئی مھلبیں گیرانی وشبو، تئی پادانی چِست بیتگیں دنز، تئی گُڈی کندگ اَنگت نوشکی ءُ شور ءِ ملپدیں زیداں پش کپتگ اَنت۔ تئی رَپتن ءَ چہ پد موسم مٹ بوگ ءَ تُرسگ ءَ اَنت۔ ھُورانی ترمپ زمین ءِ سر ءَ کپگ ءَ پیسر اُوشت ءِ آماچ اَنت، بگند ئے آ سرپد اَنت کہ تو اِد ءَ نہ ئے۔

چیرمین شاشان : تو مات ءِ شکم ءَ ودی بوتگیں وابے ات ئے تو ھما اِت ئے کہ کتاب ءَ چہ دراَتک ئے ءُ توپک ءِ نیمگ ءَ اَتک ئے، کہ گوستانگ ءِ تہ ءَ تئی نام تھنا وانگ مہ بیت بلکیں تئی نام ءِ سر ءَ زندگی بہ بیت۔ تو لاھور ءِ دمکاں گار نہ بوت ئے، نیکہ تو شھر ءِ دلکشیں رنگانی تہ ءَ بیگواہ بیت ئے بلکیں تو وت کوھانی امبازاں چو چراگے ءَ بلان بوت ئے۔

چیرمین شاشان : شپ ءِ ھما پاس ءَ کہ آزمان گوں جلشکیں استالاں ماھے ودار ءَ اُوشتاتگ اَت۔ وھدے گوات دُژمن ءِ بُنجل ءَ چہ پاداں داران ءُ گوزان اَت۔ تو گوں وتی ھمراھاں دُژمن ءِ نیست ءُ نابود کنگ ءَ بے توار جنگ ءَ اِت ئے۔ تئی تھانگ ءَ یک توپانے چول جنگ ءَ اَت۔ چیرمین! تیر ءُ تراکانی تواراں زمین جمبگ ءَ اَت۔ شُما کبزہ گیریں لشکری کارمندانی انگیر ءَ اَت ئے، بلے انگت دُژمن گریوگ ءَ اَت، ءُ دُژمن ءِ گریوگانی توار شُمے جوزگاں گیش کنان اِت انت۔ پد ءَ ھما ساھت اَتک کہ شوروھاں مُوتک الھان کُت۔ وھدے تیراں کسمت نبشتہ کُت ءُ تو کپت ئے۔ ناں ناں تو نہ کپت ئے بلکیں ھاک ءِ وشبوھاں ھوار بوت ئے۔ تو زمین ءِ بھر بوت ئے۔ تو آجوئی ءِ ھما توم جوڑ بوت ئے کہ ابدمانی ءِ ھُور ترا رودینیت۔

چیرمین جان : تئی داتگیں دیمھونی یک وشبوھے کہ کوھاں وتی دلبند ءَ مُشتگ۔ ھما سنگ ءِ سر ءَ تو وتی گُڈی ساہ زُرت آ سنگ ادیرھے جُوڑ بیتگ ءُ کوہ تئی ھُونانی بالینتگیں چراگے۔۔۔ تو نمیران بوت ئے بلے تئی بڑ ءِ توپک کس ءَ کپگ ءَ نیشت دگہ زمین زادگے ءَ وتی کوپگاں درتک۔۔۔ نی تئی ھمراہ ھر جنگ ءَ پیش تئی نام ءَ گر اَنت ءُ توپکاں چمبر کن انت۔

چیرمین شاشان : تئی ھُوناں دُژمن ءِ بُنجل ءِ سر ءَ مک بوتگیں بیرک ءِ زمین مٹ کُت، نی تئی وتن ءِ بیرک گوں تئی ھُونانی وشبوھاں دُژمن ءِ بیم آماچ کنگ ءَ ساہ زیر ایت۔ گوں تو کول ءُ کرار کن اِیں کہ بلوچستان ءِ تہ ءَ ھِچ چُشیں بُنجل نہ مان انت کہ آیانی دست بلوچ پُسگانی ھُوناں چہ ھِنّی بہ بنت۔ ما تئی نام ءَ آجوئیں بلوچستان ءِ ساچ ءَ نبشتہ کنیں۔تئی ادیرہ ءَ ھما کوھانی دامن ءَ کن اِیں کہ ھود ءَ سُھب ءِ جان کش اِتگیں بام تئی نام ءَ بہ درپش ایت۔

دلگوش: (اے موتکے نہ اِنت گوستانکے، اے زمین ءِ آمید گس ءَ یک گواھی ءِ کہ شاشان ءَ وتی سر بکشات، بلے وتن ءِ گُلامی نہ من اِت۔)

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

گوستگیں شپ ءَ بلوچستان ءِ بُنجاھی شھر چہ شال ءَ پاکستانی پوج ءَ ورنائیں وکیل حکیم بلوچ ءِ زورانسری آوار جنی ءِ نشانگ کتگ ءُ ناشناسیں ھندے ءَ برتگ-

نزیکیں اِھوالکار رِد ءَ حکیم بلوچ ءَ پنجاب ءِ شھر چہ بھاولپور ءَ ایل ایل بی ءِ ڈگری زرتگ ءُ انّیگاں بلوچستان ءَ وکیلے پڑ ءَ ھمگرنچ بیتگ-

آئی ءِ زورانسری آوار جنی ءِ ھلاپ ءَ چاگردی پارٹی، انسانی ھکانی ءِ گلاں ءُ وکیلانی نیمگ ءَ چہ تُرس پدر کتگ – آیانی گوشگ اِنت کہ بلوچستان ءَ زورانسری آوار جنی ءِ دْرچ یکشل ءَ برجاہ ءَ اِنت-

آیاں لوٹ کتگ کہ حکیم بلوچ ءِ زوت یل بہ کن اِت-

بلوچستان ءِ دمگ کلات ءُ مستونگ ءَ مروچی چارمی روچ ءَ ھم پاکستانی پوج لشکر کشی ءَ دلگوش – بلوچ آجوئی لوٹوکانی نیمگ ءَ چہ پوج ءَ گھگیری ءِ دیمپان کنگ کپگ ءَ اِنت، میڑاں ءُ تراکاں پاکستانی پوج ءِ میجر ءَ ھوار بازیں کارندھے بیران-

دمگی اِھوالکار رِد ءَ پاکستانی پوج ءِ ھزرانی کچ ءَ کارندہ پیادگ ءُ گاڑیاں چہ کلات ءِ دمے کوھک ءَ پیشکدمی کنگ ءَ اَنت وھدے کہ آیاں تیرگواریں ھیلی کاپٹرانی کمک ھم گون اِنت ھمے میان ءَ جتاجتائیں ھندانی سر ءَ ھیلی کاپٹراں چہ شیلنگ کنگ بیگ ءَ اِنت-

ھمے وڑ مستونگ ءِ دمگ اسپلنجی، مرو ءُ کابو ءَ پوج پیشکدمی جُھد کنگ ءَ اِنت-

لشکر کشی ءَ دلگوشیں پوج بلوچ آجوئی لوٹوکیں نیمگ ءَ چہ گھگیری دیمپانی کنگ کپگ ءَ اِنت- لشکر کشی ءِ بنداتی روچ ءَ پوج ءِ سے جتاجتائیں مزنیں اُرش ءِ نشانگ کتگ، اُرشکاراں بیران بیتگیں کارندھانی سلاہ ھم وتی ھمراھی ءَ برتگ اَنت-

گوستگیں روچ ءَ پوج ءَ ھیلی کاپٹراں مرتگیں کارندھانی لاش برتگ اَنت-

سلاہ بندیں اُرش ءُ بمب تراکاں پاکستانی پوج ءِ یک میجرے ءَ ھوار شش کارندھانی بیرانی پدر کنگ بیتگ اَنت بلے کچ دگہ گیشی گمان کنگ بیگ ءَ اِنت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ ته ءَ گوشتگ که زورگریں پوج ءِ گوم ءَ بوتگیں میڑاں مئے سرمچاراں دژمن ءِ کم چه کم هپت کارمند کشتگ انت وهدیکه بلوچ لبریشن آرمی ءِ چار سرمچار نمیران بوتگ انت . اشی ءَ ابید سوراب اُرش ءَ ٹپی بوتگیں بی ایل اے تمردیں سنگت لهتے روچ ءَ پد نمیران بوتگ انت-

جارکش ءَ گوشتگ که زورگریں پوج ءَ 19 جولائی ءَ نوشکی ءِ کوهی دمگاں مزنیں کچے ءَ لشکر کشی کتگ . اے زوراکی ءَ دژمن ءَ بالگرد ءُ ڈرون هم گون بوتگ . دژمن اے زوراکی ءِ دارگ ءِ هاتر ءَ مئے سرمچاراں جوانمردی ءَ گوں گهگیری کتگ ءُ باز جاهاں آئی ءِ سر ءَ اُرش کتگ –

سَے روچ ءَ برجاه بوتگیں اے زوراکی ءِ وهد ءَ شیشاری هند ءَ مئے سرمچار ءُ دژمن پوج دیم په دیم بوتگ انت ءُ جنگ بندات بوتگ که تاں دو روچ ءَ برجاه بوتگ . اے میڑ ءَ دژمن ءِ کمانڈواں برزی کمک گون بوتگ . جنگ ءِ وهد ءَ دژمن هپت کمانڈر مرتگ انت ءُ بازینے زدگ بوتگ انت . اے ترندیں میڑ ءَ مئے چار سرمچار کماندار چئیرمین صفیان کرد ، جندندر رشید بزدار ، سنگت نبیل بادینی ءُ سنگت خالد فاروقی محمد حسنی جوانمردی ءَ گوں جنگ دیان ءَ نمیران بوتگ انت-

جارکش ءَ گوشتگ که نمیرانیں صفیان کرد پنام ءِ چیئرمین شاشان ء میر سعید کرد بولان ءِ دمگ دشت، جلب گندان دروازوئی ءِ نندوک بوتگ۔ آ بابو عبدالرحمٰن کرد وڈیں سیاسی، لبزانکی ءُ اهوالکاریں مردمے ءِ نماسگ بوتگ ۔ یونیورسٹی آف منیجمنٹ اینڈ ٹیکنالوجی لاہور ءَ پولیٹیکل سائنس ءِ نودربر بوتگیں صفیان کرد بلوچ نودربر سیاست ِء ته ءَ بوتگ ءُ سالے ءَ ساری آ بی ایل اے ءَ هوار بوتگ۔ آئی ءِ زانشت ءُ جنگی بودناکیانی سوب ءَ آ کماندار گچین کنگ بوتگ-

نمیرانیں صفیان ءَ نوشکی، شور پارود ءُ هاران ءِ جنگاں دژمن سرین پروش کتگ ءُ وتی گڈی ساه ءَ تاں سرڈگار ءً گوں مهرے هک ادا کت ۔

جارکش ءَ گوشتگ که نمیرانیں رشید بزدار پنام ءِ میرل ء حافظ امام دین ڈی جی خان ءِ دمگ اللہ آباد ءَ نندوک بوتگ ۔ آئی ءَ چه ایلمنٹری کالج ڈی جی خان ونتگ ءُ 2022 بی ایل اے ءَ هوار بوتگ۔ آئی ءَ سالے ءَ پد مجید برگیڈ جوائن کتگ ءُ درہ بولان ءُ ھیروف ءِ وڑیں مزنیں آپریشناں بهر زرتگ۔ نمیرانیں رشید ءَ زدگ بوگ ءَ پد هم گوں دژمن ءَ جنگ داتگ ، تیرانی هلاس بوگ ءَ پد فدائی فلسفے سر ءَ وتی گڈی تیر وت ءَ جتگ ءُ دژمن ءَ اے موه نه داتگ که آئی ءَ دزگیر به کنت-

آئی ءَ گوشتگ که نمیرانیں سنگت نبیل بادینی پنام ءِ بارگ ء عنایت اللہ بادینی نوشکی ءِ دمگ کلی جمال آباد ءِ نندوک بوتگ۔ شش ماہ ءَ ساری گل ءَ هوار بوگ ءَ پد آئی ءَ لانگ کورس سرجم کتگ ءُ نوشکی ءَ آئی ءَ جوانی ءَ وتی کرد پیلو کتگ ۔ بالگردانی شیلنگ ءَ زدگ بوگ ءَ ابید هم نمیرانیں نبیل گڈی ساه ءَ تاں جنگ برجاه داشتگ ءُ بی ایل اے جنگی رهبندانی سر ءَ بوتگ ۔

جارکش ءَ گوشتگ که نمیرانیں سنگت خالد فاروقی پنام ءِ زبیر ءِ عبدالقیوم محمد حسنی اسٹیشن کلی، تفتان ءِ نندوک بوتگ ۔ آئی ءَ لانگ کورس ءِ سرجم کنگ ءَ پد نوشکی ءَ دژمن ءِ بگیری ءَ جوانمردی ءَ گوں وتی کرد پیلو کتگ۔ سرڈگار ءَ گوں مهر ءِ کول کنان ءَ نمیرانیں خالد جنگ کنان ءَ وتی جان کربان کتگ ءُ نمیران بوتگ-

جارکش جئیند بلوچ ءَ گوشتگ که ده جولائی ءَ سوراب ءِ دمگ گدر ءَ مئے سرمچاراں دژمن ءِ بنجاهی بنجل ءِ سر ءَ اُرش کتگ ءُ بنجل ءِ دو بهر گپتگ انت ۔ اے میڑ ءَ بی ایل اے ءِ تمردیں سرمچار جنید بلوچ زدگ بوتگ، که پد ءَ ٹپانی درد نه سگ اِتگ ءُ نمیران بوتگ ۔

نمیرانیں جنید پنام ءِ کنگ ء نور احمد نوشکی ءِ دمگ زور آباد ءِ نندوک بوتگ ۔ 2024 ءَ بی ایل اے هوار بوگ ءَ پد آئی ءَ قلات، نوشکی ءُ خاران جوانمردی ءَ گوں وتی کرد پیلو کتگ . کساں امری ءَ جھد دیمهونی ءِ زانت تالان کنوکیں جنید ءَ سوراب ءِ آپریشن ءَ دلیری ءُ تمردی ءَ دژمن ءَ مزنیں تاوان داتگ-

جارکش ءَ گوشتگ که بلوچ لبریشن آرمی وتی منگهیں نمیرانیں سراں دروت ندر کنت که آیاں وتی جانانی دیمهونی داتگ ءُ دژمن زوراکیانی دیم ءَ گهگیری ءِ درور ایر کتگ۔ اء دیمهونی اے گپ ءِ تچگیں گواه انت که زورگریں ریاست درسیں ٹیکنالوجی، برزی تاکت، پوجی تاکت ءَ ابید هم بلوچ راجی آجوئی جهد ءِ چیرترینگ ءَ بے سوب بوتگ .

جارکش ءَ گوشتگ ک بی ایل اے اے گپ ءَ تچک کنت کہ دژمن ءِ هر زوراکی ءِ پسو پیش ءَ چہ گیشتر ترندی ءَ گوں دیگ بیت . بی ایل اے ءِ سرمچار وتی نمیران بوتگیں سنگتانی مشن ءَ برجاه دار انت ءُ بلوچ راجی آجوئی اے جد ءُ جھد ءَ گڈی آسر ءَ سر کنگ مئے کوپگانی سر ءَ پرکاری انت-

بلوچ یکجھتی کمیٹی ءِ سروکانی یلو کنگ ءُ بلوچستان ءَ زورانسری بیگواھی ءِ ھلاسی ءِ لوٹ ءِ سر ءَ اسلام آباد ءَ بلوچ بیگواھیں مردمانی کھولانی زھرشانی ءَ مروچی ھشت روچ سرجم بیتگ۔

ترندیں ھور ءُ نہ وشیں موسم ءَ ابید زالبول، پیر کماش ءُ چُکاں ھوار زھرشانی کنوکاں وتی زھرشانی برجم داشتگ، دنیگا زھرشانی کنوکا شریک بلوچ کھولاں دنیگا کیمپ ءِ جوڑ کنگ ءِ موکل دیگ نہ بیتگ، آئی ءِ ھاتر ءَ اے سک باز مشکلانی دیمپان اَنت۔

اسلام آباد ءَ پریس کلب ءِ نیمگ ءِ رؤکیں راہ پیسر ءَ بند کنگ بیتگ، ءُ انی زھرشانی ءِ جاگہ ءِ نیمگ ءَ گیشتریں راہ اوں چہ اسلام آباد ءِ پولیس ءِ نیمگ ءَ بند کنگ بیتگ اَنت۔

بلوچ یکجھتی کمیٹی ءِ گوشگ اِنت کہ ریاستی واکداراں بس اوشتارینتگ اَنت زھرشانی کنوکاں مھلوک ءِ دیم ءَ چیر دیگ جھد ءَ کنگ ءَ اِنت تانکہ اسلام آباد ءِ نندوکیں اے پُر امین جد ءُ جھد ءِ گلہ ءَ مہ کن اَنت۔

بی وائی سی ءَ جار جتگ ءُ گوشتگ کہ ریاست ءَ نہ کنگ ترس اِنت انی ھم ترس ءِ آماچ اِنت ، ھاموشی ءُ بے وسانی تواراں گار کنگ ءِ پالیسی ءِ سر ءَ اوشتاتگ آ بس مزمت ءِ لائک اِنت بلکیں انسانی ھکانی ھلاپ ءَ لگتمالی اِنت۔

بلوچ یکجھتی کمیٹی ءَ سرجمیں سرپدیں نندوکیں مردم، اھوالکار، انسانی ھکانی زمہ واراں ءُ چہ گلاں دسبندی کتگ کہ آ بنجاھی سرکار اسلام آباد ءَ انساپ کنگ ءَ نشتگ اَنت اے بے وسیں کھولانی ھمراھی ءَ یکجھتی ءَ درشان بہ کن اَنت، کہ اے پُرامنیں زھرشانی کنگ ءَ اَنت۔