TBP Balochi

بلوچستان ءِ دمگ دُکی ءَ سی ٹی ڈی ءَ انٹیلیجنس بیسڈ آپریشن ءِ میان ءَ پنچ مردم ءَ ٹاہ داتگ- بلے جنگ بیتگیں دو مردمانی پجّار چہ پیسر ءَ بیگواہ بیتگیں مردماں چہ بیتگ اَنت-

جنگ بیتگیں مردمانی تہ ءَ یکے ءِ پجّار محمد دین مری اِنت کہ آ چار ماہ ءَ ساری چ دسمبر دوھزار بیست چار ءَ چہ ھرنائی ءَ پاکستانی پوج ءَ دزگیر کتگ ءُ زورانسری بیگواہ کتگ-

آئی ءِ بیگواھی ءِ ھال نوزدہ جنوری دوھزار بیست پنچ ءَ انسانی ھکانی کارکنان ءُ سوشل میڈیا پُرکاراں تلان کتگ، کہ آئی ءِ یل کنائینگ لوٹ ھم کتگ-

مروچی نوزدہ اپریل ءَ سی ٹی ڈی ٹاہ داتگ کہ دُکی ءَ کاروائی ءِ میان پنچ شکی ئیں مردم جتگ – بلے اشانی تہ ءَ میڑ ءَ یک ” دروگیں میڑ ” نام ءَ داتگ-

ھمے وڑ جنگ بیتگیں دومی ءِ پجّار اعجاز ء خدابخش جھمنند منگچر نام ءَ چہ بیتگ-

اعجاز پوج ءَ کلات ءِ دمگ چہ منگچر ءَ دوازدہ اپریل دوھزار بیست پنچ ءَ آوار جنگ ءَ پد زورانسری بیگواہ کتگ اَت-

اعجاز بلوچ ءِ بیگواھی بیگ گپ آئی ءِ کھول ءَ رسانکدر ءَ شانزدہ اپریل شنگ کتگ – کھول رِد ءَ اعجاز دوازدہ اپریل دوھزار بیست پنچ ءَ پاکستانی پوج ءَ یک دگہ یکے زید ء عابد جان جھمنند سریاب شال ھمراھی ءَ آوار جتگ اَت چریشی ءَ پد دوئیں بیگواہ بیتگ اَنت-

مروچی کھول ءَ اے راست کتگ کہ اکسانی تہ ءَ لاش اعجاز بلوچ ئیگ اِنت-

انسانی ھکانی گل، سیاسی کارکناں ءُ چاگردی مردماں اے وئیل سک ایر جتگ گْوشتگ کہ بلوچستان ءَ اے وڑیں وئیل یک نوکیں گپے نہ اِنت- گوستانک ءَ ھم زورانسری بیگواھیں مردم دروگیں میڑاں کوش ءِ بھتام ریاستی ادارھانی سر ءَ جتگ اَنت-

انسانی ھکانی گلاں اے وڑیں کار درکانودی کوش گْوشتگ اے بُنکی انسانی ھکانی سنگین ءِ ھلاپ ورزی اِنت-

اے میڑ ءَ دگہ سئیں مردمانی پجّار انگت نہ بیتگ اَنت بلے انسانی ھکانی ادارہ اے تُرسگ ءَ اَنت کہ آ دگہ سئیں ھم بیگواھیں مردم بیت کن اَنت-

گوادر ءِ کوسٹل ہائی وے پک اپ یونین ءِ نیمگ ءَ ھر وڑیں ٹریپک ءِ واستا بند کتگ-

زھرشانی کنوکانی گْوشگ اِنت کہ کوسٹ گارڈ بے سبب ءَ آیانی گاڑیاں بند کنگ ءُ دستیگ کنگ ءَ اِنت۔

پک اپ یونین ءِ نمائندگاں رسانکدر ءَ گوں تران کنان ءَ گشتگ کہ آ امن ءُ ایمنی ءِ راہ ءَ کار کنگ ءَ انت بلے کوسٹ گارڈز ءِ مدامیں دزمانجن انت آھاں کار ءُ روزگار ءَ نیلگ ءَ انت۔ ما چہ پیسر ءَ وام ءَ ششتل انت ، چہ گاڑیانی دستیگ کنگ ءَ ما گیشتر تباہ کنگ بوگ ءَ اِنت۔

پک اپ یونین ءِ گشگ انت کہ کوسٹ گارڈ ءَ شپ ءِ تھاری ءَ دمگی پک اپ ٹرک بے ھال ءُ دلیل ءَ دستیگ کتگ انت۔

یونین ءِ رد ءَ اے گاڑی بلوچستان سرکار ءِ رھبنداں چہ 600 بوتل قانونی ڈیزل ءِ لڈگ بوتگ انت کہ آ شیڈول ءُ کانونی راہ ءَ چہ وتی منزل ءِ نیمگ ءَ روگ ءَ انت۔

یونین ءِ نمائندگ ءِ گشگ انت کہ ما گوں کوسٹ گارڈ زین العابدین ءَ گند ءُ نند کتگ۔ کرنل ءَ انساپ ءِ دلجمی داتگ ءُ زبان کتگ کہ گاڑی ءُ ڈیزل پد ءَ دیگ بنت بلے ایوک ءَ ھالیگیں گاڑی پد ءَ دیگ بوتگ انت ءُ ارزشت داریں ڈیزل برگ بوتگ انت۔ یونین ءَ اے گامگیج ءَ را گریبیں مھلوک ءِ سر ءَ مزنیں ناانساپی یے لیک اتگ۔

ڈرائیورانی گشگ انت کہ آ وام ءِ سر ءَ تیل لوڈ کن انت، مزنیں ترسے ءِ تہ ءَ سلر کن انت ءُ شپ ءُ روچ کار کنگ ءَ پد ءَ ھم مشکل ءَ چند ھزار کلدار کمائی کن انت۔ چوشیں جاوراں اگاں سرکاری ادارہ آہانی روزی ءِ دَر ءَ لٹ ءُ پُل بہ کن انت گڑا اے گریب ءُ تنگدستانی دپ ءَ چہ ورگ ءِ لٹ ءُ پُل کنگ ءِ برابر انت۔

یونین ءَ داں باندات ءَ الٹی میٹم داتگ کہ اگاں مرچی شپ ءَ تاں ڈیزل پدا نہ دات گڑا باندا سھب ءِ 11بج ءَ بے مھتلیں دھرنا کنگ بیت۔ مھلوک ءُ ٹرانسپورٹ ءِ چاگرد ءَ چہ بے وسی ءِ سفر ءَ چہ بچگ ءِ دزبندی انت۔

زھرشانی ءِ سوب ءَ ٹریپک سرجم ءَ بند کنگ بوتگ ءُ گاڑیانی دراجیں لین لگ اتگ انت۔

دمگی مردمانی گشگ انت کہ اے لیکھاں گوادر ءِ دیمروئی ءِ دروگ ءِ سر ءَ جُست ءُ پُرس ءِ نشان چست کتگ۔ سی پیک ءِ ھاسیں مرکز بوھگ ءِ باوجود گوادر ءِ مردماں روزگار ءِ وڑیں بنیاتی آسراتی دست نہ کپ اَنت۔ اَمنیت ءِ نام ءَ دمگی مردمانی زرکاری چست ءُ ایرانی سر ءَ بندش جنگ بوھگ ءَ انت ۔

تربت ءِ دمگ ڈنک ءَ تیرگواری ءِ وئیل ءَ یک مردمے بیران بیتگ-

اِھوالکار رِد ءَ پجّار نہ بوتگیں سلاہ بندیں مردماں تیرگواری کتگ امان ء غلام، جھمنند دشت کشتگ – کُشگ بیتگیں اے وھد ءَ گوگدان ءَ جھمنند بیتگ-

پولیس ءَ وئیل راست کتگ گْوشتگ تیرگواری ءَ پد اُرشکار ھما دمان ءَ تتکگ اَنت، آیانی پٹ ءُ پول برجاہ ءَ اِنت-

وئیل سوب انگت زانگ نہ بیتگ-

دو سنگتانی لھتے یات میران جان اُرپ نزر جان ،یاسین جان اُرپ رؤپ

نبشتہ کار: سنگت ولید بلوچ

دی بلوچستان پوسٹ

من ءَ یات اِنت من گوں سنگتاں سپرے ءَ درکپتاں ما اراده کتگ اَت شور ءَ رو ایں سنگتانی گْور ءَ گند ءُ نندے کنیں من ءُ کامریڈ نزام گُڑا ما وت ءَ جاھے ءَ سر کُت مارا چیزے مڈّی گون اَت سنگتاں مارا سر کُت گُڑا دیم ءِ سنگتانی ودار ءَ نشتگ اِت ایں گڑا نیم ادار ءَ پد سنگتاں وت ءَ سر کُت من اے سنگت نوک دیست اَنت پیسر ءَ نہ دیستگ اِت اَنت گڑا سلام ءُ دروت ءَ پد مڈّی ماں سینکل ءَ لڈ اِت اَنت آ سنگتاں سے سینکل گون اَت گڑا درکپت ایں زمستان اَت بیگاه ءِ وهد اَت سک سرد اَت ما گڑا همے سنگت ءِ پُشت ءَ سوار اِت آں من جست کُت سنگت تئی کوڈ ءِ نام کے اِنت ؟ سنگت ءَ گُشت منی نام نزر اِنت من ءَ جست ئِے گپت تئی کوڈ نام سنگت؟ من گُشت ولید گڑا راه ءَ روان دیوان کنان نزر یک وش تبیں مردمے اَت ما روان اِت ایں گڑا سنگتے ءِ سینکل پنچر بوت نزر ءَ توار دات ھاں ساچان پنچر کت ئِے ساچان ءَ جواب دات هو یار پنچر ئِے کُت روچ برکت بوگ ءِ وهد اَت سردی هم باز بوان اَت گڑا نزر ءَ گْوشت جلدی پنچر ءَ گر درکپ ایں گڑا ما ایر کپت ایں ساچان ءَ سینکل جیک ءَ کُت پنچر جت تهاری آھستہ آھستہ وتی بانزلاں پچ کنان اَت سردی سک باز بوگ ءَ اَت نزر ءَ باز سردی بوگ ءَ اَت نزر لاگریں مردمے اَت من گُشت نزر جان تو پُشت ءَ بو سینکل ءَ من زوراں ترا سردی کنت تو لرزینگ ءَ ئے پہ کندگ ءَ گْوشت ئِے هو شما ورنا اِت ما نو کماش بوتگ ایں گڑا ما درکپت ایں هَونک سر ءَ اَت باز تیز روگ ءَ اَت نزر ءَ گْوشت گند ئے ورنایاں سردی هچ نہ کنت اوتاک دور اَت نزر ءَ گْوشت یار جلدی برو هونک ءَ ساچان ءَ رسین ایشاں گْوش ایں شپ ءَ همد ءَ دیم ءِ کوٹی ءَ دار ایں روگ نہ بیت سرد اِنت پد ءَ تهار اِنت گڑا ما جلدی شُت ایں هونک ءُ ساچان رسینت اَنت گڑا نزر ءَ گوں هونک ءَ گْوشت شپ ءَ اد ءَ دار ایں آئی ءِ کوٹی ءَ سهب ءَ زندگ بہ ایں درکپ ایں پہ اوتاک نیم ءَ گڑا ما داشت همد ءَ هونک ساچان شُت اَنت کُکُّڑ زُرت اِش آتک اَنت گڑا همد ءَ آسے روک کُت هونک ساچان اتک اَنت کُکُّڑ اِش آؤرت اَنت گڑا نزر جان ءَ پتک اَنت دیوان مجلس گپ ءُ تران گڑا نزر جان ءَ گْوشت پتک اَنت ما وارت وپتیں گڑا سهب بیت ساز ءُ سامان برابر کُت اَنت درکپت ایں نزر ءَ من راه ءَ جست گپت نزر جان اوتاک ءَ باز ٹیم لگ اِیت گوشت ئِے دو ادار لگ اِیت گڑا ما سپر کنان ءَ شُت ءُ سربوت ایں شور ءَ چاران ءَ شور من نوک دیستگ اَت بلے من ءَ انچو سما بوگ ءَ اَت منی کْوھنیں یات اد ءِ بندوک اَنت شور ءِ تچوکیں آپ کسان کسانیں کوه گْوش ئے من ءَ زانگ اِت اَنت من ءَ آئی ءِ اد ءِ سارت سارتیں گْوات شور ءِ شهیدانی یات ءَ دیگ ءَ اَت آ شهید امیر الملک بہ بیت میران بہ بیت یا کامریڈ سوالی یا نودان ءُ ریهان یا گنجل گْوش ئے اے کوهانی تہ ءَ آیانی بچکندگانی آواز ھست اَت شور ءِ گندگ ءَ گو من ءَ پدائی سلمان همل ءِ شَیر یات اتک:

“شور ءِ دلبند گواہ اِنت ما وتی سر داتگ”

گڑا من شور ءَ چاران ءُ جیڑان ءَ اوتاک ءَ سربوت ایں اوتاک ءَ سنگتاں مارا وش اتک کُت پد ءَ هال ءُ اهوال بیت سنگتاں چاھے جوڑ کت ما چاه وارت اے همے اوتاک اَت ایشی ءِ زمہ داری نزر ءَ گون اَت گڑا منی زند ءِ نوکیں بهارے شور ءَ نزر جان ءِ اوتاک ءَ بندات بوت وهد انچو گْوزان اَت من گْوشت بریں سنگتے ءَ اد ءَ گْوشت اود ءَ گْوشت گڑا یک روچے نزر جان ءَ گْوشت ولید تو ءُ رازک وت ءَ تیار کن اِت رو ایں سپرے ءَ گڑا ما وت ءَ تیار کُت لاگ یکجاہ کت اَنت مڈّی مارا سر کنگی اَت گڑا لاگانی لڈگّ ءَ پد من ءُ نزر ءُ رازک درکپت ایں رازک مزاک والا وش تبیں مردمے اَت مئے سپر دو روچ ءِ سپر اَت بلے اے سپر ءَ نزر ءُ رازک ءِ وڑیں سنگتاں گوں وهدے درکپ ئے گُش ئے زاناں دو ادار ءِ سپر اِنت ما درکپت ایں راه ءَ روان ءَ نزر جان ءَ من ءَ جاهانی نام ءَ گْوشگ اَت اے پلان جاه اِنت اے پلان جاه اِنت دگہ یک جاھے پیش ئِے داشت پوج آپریشن ءَ اتکگ دو روچ ءَ اد ءَ داشتگ ئِے گڑا ما اتک ءُ راکٹ ءُ ترمل کُت اَنت گڑا من جست گپت نزر جان چیزے مردار بیت گْوشت ئِے ھو مئے هساب ءَ چار پنچ مُردار بیتگ پاکو ءَ وت هم دو منّ اِتگ بلے جنگ نہ داتگ ئِے گیشتر تتک اَنت پد ءَ همد ءَ مزنیں آپے ھست اَت آپ ءِ تہ ءَ ماهیگ باز اَت گڑا نزر ءَ من ءَ پیسر ءَ اوتاک ءَ جست گپتگ اَت ولید اوژناگ زان ئے ماهیگاں چہ آپ ءِ تہ ءَ کش اِت کن ئے من هما وھد ءَ گْوشتگ اَت تئی دوا بہ بیت نزر ءَ کہ همے آپ دیست ماهیگ دیست اَنت هما گپ ءُ ترانگ ءَ کپت من ءَ چار اِت ئِے گْوشت ئِے ولید جان تو گپے کُتگ اَت ترا یات اِنت من گْوشت کجام گپ ھاں نی تو وت ءَ ساده کن ئے تو نہ گْوشت کہ تو اوژناگ زان ئے من دیست آپ دیست سردی من گْوشت یار من زانتگ بلے بے هیال کُتگ نزر ءَ رازک ءَ کندگے جت ناں ناں ما گولیاں کُومب ءَ مان کن ایں ماهیگ مر اَنت ترا کشگی اَنت من گْوشت شر گڑا گْوشت ئِے ناں من وت کشّان اِش مزاک کناں گڑا نزر جان ءَ گولی کومب ءِ تہ ءَ دور دات اَنت من ءُ رازک ءَ چاھے پر کُت پد ءَ مارا کمو برنج گون اَت اے پر کت اَنت نزر چیزے وھد ءَ پد نزر جان پیداکیں گوں ماهیگاں کسانیں مزنیں ماهیگ وڑ وڑیں گون اِت ئِے گڑا رازک ءَ کسانیں ماهیگ دیست اَنت هما سک کسان اِت اَنت گڑا کَندت ئِے گْوشت ئِے من نہ زاناں نزر ترا گوں ماهیگاں باز مهر ھست یا باز دژمنی یے گونڈیں ماهیگ کُشگ بنت نزر جان ءَ گْوشت ایشاں گولی وت وارتگ اَنت گڑا مر اَنت ناں کندگے جت ئِے گڑا ما سک کند اِت باز من ءُ رازک ءَ پد ءَ پہ مزاک ءَ گْوشت ئِے شما من ءَ زلیل کنگ ءَ اِت شمارا دگہ برے گشت ءَ نیار آں بس انچو مزاک ءُ گپ مئے سپر گْوست ما وتی جاه ءَ سر بوت ایں یک روچے نزر جان گپ جنگ ءَ اَت من ءَ یار پہ رؤپ ءَ باز زهیر بیگ ءَ اِنت من جست گپت نزر جان رؤپ کے اِنت رؤپ من نہ دیستگ اَت گڑا نزر ءَ من ءَ گْوشت رؤپ منی پل اِنت منی ساه اِنت من ءَ چہ گْونکو ءَ اکسے پیشداشت ئِے رؤپ ایش اِنت منی برات ءِ دابیں سنگتے گڑا من گْوشت انی کجا شُتگ زاناں گوشت ئِے شُتگ سپرے ءَ نی بلے زوت کیت گڑا وهد انچو گْوزان اَت یک روچے ما نزر جان ءِ اوتاک ءِ دگہ سنگت کل نشتگ ایں گپ اِنت دیوان اِنت سنگتاں پلاں چیز ھست پلاں چیز چُش اِنت گڑا من هم همد ءَ گپے جت کرنٹ والا ماهیگ ھست دریا ءَ اے گپ ءِ جنگ ءَ گوں من پشومان بوتاں آلانکہ هکیکت ءَ ھست بلے اے گپ ءِ وھد کپت لشکر ءِ دپ ءَ ایشاں من ءَ بزگ کت مدام من ءَ چِڈینت اِش نزر ءَ من ءَ مدام گْوشت ولید همے وڑیں ماهیگ کرنٹ والا چیزوکے لوٹائین اد ءَ سولر ءِ کمی ھست سنگتانی پاوربینک گْونکواں چارج نہ بنت اگاں ماھیگ بیا اَنت مئے اے جیڑه هلاس بیت من گْوشت من ءَ توبہ اِنت نزر جان من ءَ بل گْوش اِیت ناں پد ءَ آسم ئِےتوار جت آسم-

آسم ءَ گْوشت جی نزر ءَ گْوشت ولید ءَ سولرانی جیڑه هلاس کتگ گْوش اِیت کرنٹ والا ماھیگ کار ایں گڑا گْوانکو پاوربینک کُل چارج ءَ پُر بنت من پہ کندگ ءَ گْوشت یار آسم جان من نہ گْوشتگ چو آسم ءَ گوشت چو نزر ترا تنگ کنت نزر ءِ کسھے ترا بگوشاں من گو هو یار ایشی ءَ من ءَ بزگ کتگ گْوشت ئِے نزر ءَ گوشتگ کولواه ءَ یک جاھے ھست اود ءِ مُشک سک مزن اَنت پس ءِ کچیں مُشک اَنت من جت کندگے کُل سنگتاں کند اِت نزر ءَ گْوشت ناں من چو نہ گْوشتگ پد ءَ من گوشت من زاناں کجا چو گْوشتگ آ ماهیگ گْوانکو ءَ چارج کن اَنت پد ءَ درستیں اوتاک کندگ ءَ اَت پد ءَ من گْوشت آسم جان لاگ ءِ زرورت نہ اِنت نزر جان هما کولواه مُشکاں کار اِیت بار اِش لڈیں وهد انچو گوں کندگ ءُ مزاک ءَ گْوزان اَت منی زند ءِ دو ماه کہ من شور ءَ گْوازینت ایشاں من هجبر بے هیال نباں منی زند ءِ وشتریں روچ اِت اَنت گڑا یک روچے ما نشتگ اِت ایں چار پنچ سنگت کیت نزر جان ءِ دیم ءَ یک روژنائی ءِ کیت باز گل بیت چاراں داں سنگتانی تہ ءَ رؤپ جان گون اِنت گڑا ما سنگتاں وش آتک کنیں هال اهوال بیت پد ءَ نزر جان گْوش اِیت ایش اِنت رؤپ جان ولید من مدام نام گپتگ گوشتگ تو رؤپ ءَ وتی مید ریش درست کسان کتگ اِت اَنت رؤپ جان ءَ گوں من ءَ دیوان کت رؤپ جان ءَ براهوی زبان ءِ تہ ءَ گپ جت آ بلوچی کنگ ءَ زبر نہ اَت وهدے بلوچی کت ئِے من سک کند اِت یار اے چونیں بلوچی یے رؤپ جان گْوشت ئِے منی بلوچی ھمیش اَنت پد ءَ من کند اِت رؤپ ءَ هم کندگے جت رؤپ مهروانیں سنگتے اَت آ گیشتر ھاموش اَت مدام کارے کنگ ءَ اَت یک روچے سنگتاں شور کُت یک جاھے بُنجلے ھست ھمیشی ءَ کبزه کنیں نزر جان ءُ رؤپ اے دو زمہ دار اِت اَنت ایشاں همے جاگہ چار اِت گڑا سنگتاں تیاری بندات کُت من چہ شور ءَ درکپتاں منی دل ءَ هچ نہ اَت کہ شور ءَ شور ءِ سنگتاں یل کناں بلے جنگ مردم ءَ هور هم کنت دور هم کنت من دگہ نیمگے سپرے ءَ درکپتاں دو روچ ءَ پد من وتی جاه ءَ سربوتاں من مدام سنگتانی نمبر چار اِت اَنت بلے کس رینج ءَ نہ اَت من زانت لشکر گوں تیاری ءَ دست گٹ اِنت چار پنچ روچ گْوست گڑا من سهب ءَ پاد اتکاں من نیوز دیست سنگتاں ھاران ءَ لیویز تھانہ ءِ مڈّی برتگ اَنت ءُ پوج ءِ بنجل ءِ سر ءَ اُرش کتگ گڑا من زانت سنگت دوشی شُتگ اَنت من نیوز ءَ چاران ءَ نیوز ءَ اتکگ اَت لشکر ءِ کیمپ کبزه کتگ بازیں پوجی یے مُردار بیتگ گڑا نہ زاناں چے ءَ منی دل بے تاهیر اَت گش ئے چیزے بیتگ من چاراں سنگت هم لین ءَ کس نیست من چٹ جیڑگانی تہ ءَ گار بوت آں باریں مئے سنگت چون اَنت گڑا آسم جان لین ءَ اتک منی چمّاں روژنائی ءِ آؤرت من جلدی جلدی آسم ءَ تواربندے دیم دات آسم جان وش ءُ جوڈ اِت سنگتانی هالاں کن درست پہ سلامتی درکپتگ اَنت جلدی من ءَ هال دے آسم ءَ جواب دات من هم سپرے آں بلے من هال گپتگ سنگت وش اَنت پہ سلامتی درکپتگ اَنت-

بلے آسم ءِ آواز دگہ وڑ اَت گش ئے چیزے چہ من چیر دیگ ءَ اَت من پد ءَ جست گپت پد ءَ گْوشت کُل سلامتی درکپتگ اَنت گڑا منی گْور ءَ نزر جان ءِ نمبر نیست اَت من نوکیں گوانکوے نوکیں نمبرے گڑا نزر جان ءَ نمبر چہ من شتگ اَت من آسم گور ءَ میسج دات نزر نمبر ءَ دیم دے همود ءَ من هال ءِ گراں گڑا منی میسج ءِ چارگ ءَ پد آسم جان ھاموش بیت ناں میسج کنت ناں تواربند دیم دنت پد ءَ دمانے ءَ رند یک اکسے پہ من دیم دات ئِے من وهدے اے اکس دیست گش ئے زمین چہ منی پادانی چیر ءَ در آتک آسمان منی سر ءَ کپت من نہ زانت چی بیگ ءَ اِنت ءُ من کجایاں بگند ئے آ وهد ءَ من نبشتہ کت شریں وڑے ءَ مکناں بلے من ءُ منی دل سرپد ایں من چون بوتاں اکس نزر جان ءُ رؤپ جان ئیگ اِت اَنت آیانی هون زمین ءَ تالان اِت اَنت رؤپ جان ءِ سر نزر جان ءِ سینگ ءِ سر ءَ کپتگ اَت نزر جان ءِ سر ماتیں زمین ءِ کنٹ ءَ ایر اَت من گْوانکو ایر کُت سگریٹے روک کت نو جیڑگانی تہ ءَ کپتاں یار چو بوت پرچا من چہ رؤپ ءُ نزر جان ءَ پیسر نہ شُت آں من اے روچ نہ دیستگ اَت نی کے من ءَ چیڈین اِیت تئی کرنٹ والا ماهیگ کدی کیت نی من کے ءَ گُشاں تو چُشیں بلوچی هدا ءَ چار مکن نی من کے ءَ گُشاں تی کولواه والا مُشک کدی کاینت بار اِش لڈ ایں شما پرچا مارا یل کُت شما پرچا شور گرونڈ ابیتک کُت شمئے وڑیں سنگت کہ زند ءَ هوار شھیدی ءَ پد هم هوار واکی شما کَٹ اِت سنگتے بیت گڑا شمئے وڑیں شما وَ شُت اِت وتی پرز ادا کُت بلے مئے چی هال بیت شما نہ جیڑ اِت من زاناں هما وھد ءَ کہ شئمے هونانی ترمپ نوشکی ءِ دلبند ءِ سر ءَ کپت اَنت نوشکی ءَ شمارا گوں الو آلواں نازینت باگی چہ همود ءَ شمارا چارگ ءَ اَت بَڈّو ڈور انگت شمئے راهچار اِنت شور دلبند پد ءَ دردیگ بیت بس چی کن ایں اے راه پہ روگ ءَ اِنت اد ءَ هما کامیات بیت کہ شھید بیت زندگیں انسان هچ زانگ نہ بیت بگند ئے باندا شمئے جاگہ ءَ شمئے زمہ داریاں دگہ سنگتے پورو کنت بلے شمئے کنڈ پر بیگ وهد جنت ھر سنگت وتی جاه ءَ کسے بگند ئے کسے ءِ زمہ داریاں داشت کنت بلے آیانی جاه ءَ گپت نہ کنت پرچا ھر پُل ءِ بوه جتا اِنت بس چہ واجہ ھدا ءَ دگہ ارزے مارا چہ سنگتاں پیش کن نو مارا دگہ سنگتانی گمانی برداشت کنگ ءِ آٹیگ نیست۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

انسداد ناشرکاری ءِ مھمکہ ءَ ٹاہ داتگ کہ بلوچستان ءِ دمگ دکی ءَ بوتگیں گمانی رنگ ءَ انکاؤنٹر ءَ 5 مردم بیران بوتگ انت۔

سی ٹی ڈی ءِ گشگ انت کہ کُشگ بوتگیں مردم یک سلاہ بندیں گلے ءِ بوتگ انت ءُ آ ریاست ءِ ھلاپ ءَ کارانی تہ ءَ ھوار بوتگ انت۔ البت اے کارروائی ءِ بابت ءَ انسانی ھکانی گل ءُ دمگی اھوالدارانی نیمگ ءَ جُست ءُ پُرس کنگ بوگ ءَ اِنت۔

سی ٹی ڈی ءِ جارکش ءِ رد ءَ ” ھال ءِ سر بوگ ءَ کارروائی کنگ بوتگ ، بدلی ءِ کارروائی ءَ پنچ مردم بیران بوتگ اَنت ، ھمے وھد ءَ چہ آھانی دست ءَ سلاہ ءُ تراکناکیں چیز ھم دزکپتگ انت ۔

البت سی ٹی ڈی ءِ کار گوستگیں وھداں ھم دروگ بیتگ انت۔ سالانی سالاں سی ٹی ڈی ءِ نیمگ ءَ جتا جتائیں دمگاں کنگ بوتگیں بازیں دیم پہ دیمی جنگ ءِ نام ءَ کشگ بیتگ انت۔ باز براں انکاؤنٹر ءِ تہ ءَ بیران بوتگیں مردم پیسرا بیگواھیں مردم بوتگ انت کہ آ دزگیر کنگ ءَ پد دروگیں انکاؤنٹر ءَ کشگ بیتگ انت۔

بلوچستان ءَ پرکاریں انسانی ھکانی جھدکار ءُ بیگواھیں مردمانی سیاد ءُ وارس ھم اے نوکیں وئیل ءَ شکی گْوشگ ءَ اَنت۔

آھانی گشگ انت کہ اے اولی رند نہ انت کہ سی ٹی ڈی ءَ اے وڑیں ٹاہ داتگ۔ مارا ترس اِنت کہ اے ھم دروگیں میڑے بوت کنت۔

کشگ بوتگیں مردمانی پجار انگت ءَ پدر نہ بوتگ۔ بلے دمگی مردمانی گْوشگ اِنت کہ بیران بوتگیں مردم بیگواھیں مردم بوت کن اَنت۔

بلوچستان ءَ پہ زور بیگواھی ءُ دروگیں انکاؤنٹرانی گیش بوھگ ءَ لس مھلوک ءِ تہ ءَ بے ایمنی ءُ بے باوری پیداک کتگ۔

سیاسی پھنات گوش انت کہ ھمے پالیسیانی سوب ءَ بلوچستان ءَ بلوچ راج ءِ تہ ءَ ریاست ءِ ھلاپ ءَ کینگ ھمروچ روچ گیش بوان انت ءُ بلوچستان ءِ ریاست راجمانی ھمایت ءَ چہ زبھر بوگ ءَ انت۔

مروچی سُھب ءِ چار ءَ پاکستانی پوج ءَ درویش بلوچ کراچی ءِ دمگ چہ کراچی لیاری کلیری ءَ آوار جتگ ءُ بیگواہ کتگ-

ھمے وڑ کیچ ءِ دمگ چہ گیبن ءَ پاکستانی پوج ءَ شانزدہ اپریل ءَ زھیر بلوچ ء رمزان آوار جتگ ءُ بیگواہ کتگ-

دومی نیمگ ءَ چار بیگواھیں مردم بلال بلوچ، اصغر قمبرانی، ضیاءالرحمان قمبرانی ءُ فضل الرحمان قمبرانی یل بیتگ اَنت-

کھول ءَ آیانی یل بیگ راست کتگ ءُ واتری ءِ سر ءَ منت گپتگ، بلے اے کھول ءَ چہ سیادی دارکیں دگہ ورنا ناصر قمبرانی، جواد قمبرانی، شھداد قمبرانی ءُ جھانزیب قمبرانی انگت بیگواہ ءَ اَنت-

اسرمندیں کھول ءَ واکدار ءَ چہ دزبندی کتگ کہ آ دگہ بیگواھیں مردماں زوت یل کنگ ءِ گامگیج بزور اِیت-

آیانی یل بیگ ءَ کھول گوشگ اِنت کہ اے دوا ءُ یکشل ءَ توار چست کنگ آسر اَنت – نو دگہ بیگواھیں مردمانی یل کنائینگ ھاتر ءَ ھم زوت گامگیج زیرگ زرورت اِنت-

بلوچستان ءَ زورانسری آوار جنی یک سنگین انسانی ھکانی جیڑھے جوڑ بیتگ، اود ءَ ھزرانی کھول مروچی ھم وتی دوستناکانی واتری ءِ راھچار اَنت-

انسانی ھکانی ادارھانی گوشگ اِنت کہ اے گامگیج بلوچ ورنایانی توار بے توار کنگ جُھد اِنت-

بلوچستان لبریشن فرنٹ ءِ جارکش میجر گْوھرام بلوچ رسانکدر ءَ شنگ کتگیں درشان ءِ تہ ءَ گْوشتگ کہ سرمچاراں کیچ ءِ دمگ تمپ ءَ ڈیتھ اسکواڈ ءِ سروک نسیم کوھی ءُ شاپک ءَ زورگریں پاکستانی پوج ءِ چوکی نشانگ کتگ-

جارکش ءَ گْوشتگ کہ سرمچاراں کیچ ءِ دمگ گومازی ءَ تمپ ءَ چیریں ھالانی رِد ءَ راجی میاربار ءُ ڈیتھ اسکواڈ ءِ ھاسیں باسک نسیم کوھی ء گوھرام تیرگواری کتگ ءُ آئی ءِ سلاہ ءُ دگہ سامان دستیگ کتگ اَنت-

جارکش ءَ گْوشتگ کہ نسیم کوھی سیزدہ مارچ دوھزار ھژدہ ءَ بی ایل ایف ءِ شھیدیں سنگت سرمچار کیپٹن جھانگیر پنّام ءِ جبار ء حاجی اکبر آوار جنگ ءُ شھیدی ءَ تچکی ءَ ھوار بیتگ- آوار جنی ءِ میان ءَ شھید کیپٹن جھانگیر ءَ بے کساس لَٹ ءُ کُٹ ازیت داتگ ءُ آئی ءِ لاش دور داتگ-

جارکش ءَ گْوشتگ کہ پاکستانی پوج ءَ ناں تھنا نسیم کوھی سرمچارانی ھلاپ ءَ کارمرز کتگ بلکیں ملٹری انٹیلیجنس ءَ آ بلوچ ورنایانی زورانسری آوار جنی، درکانودی کوش ءُ لوگانی سر ءَ بیڑ وڑیں سنگین ءِ جرم ءِ زمہ واری داتگ-

جارکش ءَ گْوشتگ کہ آ زورگریں پاکستانی پوج ءِ ھمراھی ءَ بلوچ سرمچارانی ھلاپ ءَ بازیں لشکر کشی ءَ ھم ھوار بیتگ – ایم آئی ءَ آ گومازی ءِ ڈیتھ اسکواڈ ءِ سروک کتگ ءُ بازیں مردمے اشی ءِ سروکی ءَ بلوچ ھلاپیں پُرکاری ءَ ھوار اَنت-

جارکش ءَ دیمتر ءَ گْوشتگ کہ نسیم کوھی بلوچ سرمچاراں کیپٹن جھانگیر ءِ شھیدی ءَ ھوار بے میاریں ورنایانی شھیدی، بلوچ راج سر ءَ زُلم ءُ زوراکی، چاگردی سلّکاریاں ھوار بیگ ءُ دُژمنیں توانمندانی ھمراھی ءَ چاریگی وڑیں سنگین ءِ جرم سر ءَ گل ءِ انساپ ءِ تک ءَ راجی میارباری ءِ سر ءَ داتگ – ھمے رِد ءَ آ یک دراچکشیں وھدے ءَ بی ایل ایف ءِ نشانگ لسٹ تہ ءَ بیتگ انچش سرمچاراں ھپدہ اپریل دوھزار بیست پنچ ءَ چیریں ھالاں آپریشن ءَ کشتگ ءُ گُڈی آسر ءَ سر کتگ-

جارکش ءَ گْوشتگ دومی کاروائی ءَ بی ایل ایف ءِ سرمچاراں ھپدہ اپریل ءَ شپ یازدہ نیم ءَ کیچ ءِ دمگ شاپک ءَ بارگ کوہ ھند سر ءَ برجاھیں زورگریں پاکستانی پوج ءِ چوکی گرنیڈ لانچر ءَ چہ نشانگ کتگ ءُ تچکی ءَ نشانگ کپتگ چریشی ءِ آسر ءَ زورگریں پاکستانی پوج ءَ جانی ءُ مالی تاوان چست کنگ کپتگ-

جارکش ءَ گُڈی ءَ گْوشتگ کہ بی ایل ایف اے دوئیں اُرشانی زمہ واری ءَ منّ اِیت ءُ سرجمیں ریاستی چاریگاں کڈن کنت کہ آ ریاستی چیر دستی ءَ بلوچ راج ءِ ھلاپ ءَ جرم کنوکیں ھرچ مردم ءُ ٹولی ءَ ابرتناکیں سزا دنت کہ آ ھکدار اَنت- ءُ اے اِھد کنت کہ آجو بلوچستان ءِ وتواجھی ءَ تاں زورگریں پوج ءُ آئی ءِ چاریگاں نشانگ کنت-

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ دشت، نصیر آباد، تربت ءُ نوشکی ءَ چار جتا جتائیں کاروائیانی زمہ واری من اتگ انت ءُ گوشتگ زورگریں پاکستانی پوج بمب تراک، سلاہ بندیں جنگ ءُ ناکہ بندیانی نشانگ کتگ انت-

جارکش ءَ گوشتگ بی ایل اے ءِ سرمچاتاں گوستگیں روچ ءِ سھب ءِ ساھت دَہ ءَ کیچ ءِ دمگ دشت درچکو ءِ ھند ءَ زورگریں پاکستانی پوج ءِ بمب ڈسپوزل اسکواڈ ءِ پندی کارندہ ھما وھد ءَ نشانگ کتگ انت کہ آ دمگ ءَ کلیئرنس آپریشن ءَ دزبند بیتگ انت – اے اُرش ءَ دشمن ءِ یک کارندھے جاہ پہ جاہ ءَ مرتگ ءُ دو زدگ بیتگ انت-

جارکش ءَ گوشتگ یک دگہ کاروائی یے سرمچاراں پشمبے ءِ شپ ءَ نصیر آباد ءِ دمگ نوتال ءِ بنجاھی شھدگ ءِ سر ءَ دو اداراں ناکہ بندی کتگ ءُ اسنیپ چیکنگ کتگ – ھمے وھد ءَ پولیس ءِ پورس ءَ پیش کدمی کنگ ءِ جھد کتگ چریشی ءَ سرمچاراں اُرش کتگ ءُ آ پشتکنزی ءَ لاچار کتگ انت-

جارکش ءَ گوشتگ سیمی کاروائی بی ایل اے ءِ سرمچاراں گوستگیں شپ ءَ تربت ءَ زورگریں پاکستانی پوج ءِ کارندہ ھما وھد ءَ دزبمب ءِ نشانگ کتگ انت کہ آ اسٹار پلس مارکیٹ ءِ نزیک ءَ ناکہ بندی ءَ دزبند بیتگ انت-

جارکش ءَ گوشتگ چارُمی کاروائی سرمچاراں نوشکی ءِ ھند قادر آباد ءَ سلاہ بندیں اُرش کتگ ءُ نقیب اللہ ء میرا جان مینگل کشتگ- نقیب اللہ زورگریں پوج ءِ کارندہ بیتگ پوج ءَ تچک ءَ مھار گٹ ءَ داتگ انت ،بلے چیرکائی ملٹری انٹیلیجنس ( ایم آئی) ءِ واستا چاریگری ءُ سرشونکاری ءِ کرد ءَ پیلو کنگ ءَ بیتگ-

جارکش ءَ گوشتگ نقیب اللہ نوشکی ءُ کش ءُ گوری دمگاں دشمنیں پوج ءِ واستا چاریگری، ورنایانی بھرتی، ءُ زورانسری بیگواھی ءِ واستا سرشونکاری ءَ بیتگ – آ لوگانی سر ءَ بیڑ، چادر ءُ چار دیواریانی پامالی، ورنایاں لاچ ءِ کڈن کنگ ءُ دشمن ءِ واستا کار کنگ ءِ دروشماں تچک ءَ ھوار بیتگ-

بلوچ ءِ دشمنی ءِ کاراں نقیب اللہ بی ایل اے ءِ ھٹ لسٹ ءَ بیتگ- چریشی ءَ سرمچاراں نشانگ کتگ ءُ گڈی آسر ءَ روان داتگ – نوشکی ءَ زورگریں پوج ءِ سرشونکاری ءُ چاریگری ءِ کارندھانی سر ءَ بی ایل اے ءِ انٹیلیجنس ونگ زراب ءِ نگاہ ایر انت ءُ آیانی آسر ھم نقیب اللہ ءِ وڑ ءَ کنگ بنت انت-

جارکش جیئند بلوچ ءَ گوشتگ بی ایل اے درستیں اُرشانی زمہ واریاں من ایت –

بلوچ یکجھتی کمیٹی ءِ رھشون سمی دین بلوچ ءَ گْوشتگ کہ یک نیمگے آمیدگس انساپ دیگ بے سوب اِنت، گُڑا دومی نیمگ ءَ درکانودی دروشم ءَ آوار جنگ بیتگیں بیگواھیں مردمانی کھول وتی توار چست کنگ ءَ ھم موکل دیگ بیگ ءَ نہ اِنت-

آئی ءَ گْوشتگ کہ ڈاکٹر ماہ رنگ بلوچ، صبغت اللہ شاہ جی، بیبگر بلوچ، گلزادی بلوچ، بیبو بلوچ ءُ دگہ سیاسی بیگواھیں مردمانی درکانودی آوار جنی ءِ ھلاپ ءَ آئی ءِ کھول ءَ شال پریس کلب ءِ دیم ءَ زھرشانی بُنجلے برجم داشتگ، کہ اود ءَ پولیس ءَ زورانسری پاد کتگ اَنت- اشی ءَ اَبید کھول تُرندی گرمی ءِ سر ءَ نشتگ اَنت وتی زھرشانی برجاہ داشتگ-

آئی ءَ گْوشتگ کہ اے زھرشانی ءِ بُنجل ءِ مول ءُ مراد ریاستی زوراکی ءِ ھلاپ ءَ توار چست کنگ ءُ بے گناھیں گپتگیں مردماں زوت یل کنائینگ لوٹ کنگ – بلے پولیس ءِ نیمگ ءَ چہ بُنجل جنگ ءَ چہ دارگ، شھریاں وتی ھیال لیکہ درشان ءُ زھرشانی ءِ آئینی ھک ءِ سنگینیں ھلاپ ورزی اِنت-

آئی ءَ دیمتر ءَ گوشتگ کہ ما شال ءِ سرجمیں شھریاں، چاگردی ءُ سیاسی کارکنان، انسانی ھکانی ادارہ ءُ شرپمندیں مردماں چہ دزبندی کنان ءَ کہ آ اے زھرشانی بُنجل ءَ ھوار بیگ اسرمندیں کھول ءَ چہ یکجاھی بہ کن اَنت ءُ آیانی توار ءِ ھمراھداری بہ کن اِت-

روکپتی بلوچستان ءِ دمگ سراوان ءَ ایرانی لشکر ءِ دست ءَ یک ورنایے دزگیر کنگ ءُ ناشناسیں جاھے ءَ برگ بیتگ-

اھوالانی رد ءَ آوار جنگ بیتگیں ورنا ءِ پجار تاھا تگرانی ء کریم بخش جھمنند بمپشت ءِ نام ءَ زانگ بیتگ-

اھوالانی رد ءَ تاھا مروچی آدینگ ءِ نماز ءَ ہد واتر بمپشت ءَ روگ ءَ بیتگ کہ آوار جنگ بیتگ-

اھوالانی رد ءَ اے ورنا ءِ دزگیری ءِ بارو ءَ دگہ اھوال واکدارانی نیمگ ءَ درشان شنگ کنگ نہ بیتگ انت-

دمگی اھوالانی رد ءَ تاھا ائید ءِ روچ ءَ زھرشانی ءِ پژدر ءَ دزگیر کنگ بیتگ-

زانگ بہ بیت روداتکی بلوچستان ءَ بی وائی سی ءِ رھشون ماہ رنگ بلوچ ءِ دزگیری ءِ ھلاپ ءَ ماں روکپتی بلوچستان ءِ بازیں شھراں زھرشانی کنگ ءُ ماہ رنگ بلوچ ءِ یل دیگ ءِ لوٹ کنگ بیتگ انت-