بلوچستان ءِ دمگ چہ ھُزدار ءَ سے مردم ءِ لاش دزکپتگ اَنت، واکدار رِد ءَ اے سئیں مردم تیرگواری کتگ ءُ کُشتگ اَنت-
لاش ھُزدار ءَ ایم 8 شھدگ ءِ نزیک ءَ سور گز ءِ ھند ءَ چہ دزکپتگ اَنت، کُشگ بیتگینانی پجّار ڈاکٹر عبدالمجید مینگل، عطاء الرحمن مینگل ءُ ممتاز مینگل ءِ نام ءَ چہ بیتگ اَنت کہ آیانی سیادی ذیدی ءُ وڈھ ءِ دمگاں چہ بیتگ اَنت-
لاش ھُزدار ءِ ٹیچنگ نادُراھجاہ ءَ برگ بیتگ اَنت – بنداتی پٹ ءُ پول برجاہ ءَ اِنت بلے وئیل ءِ سوب انگت زانگ نہ بیتگ اَنت-
مرچی سھب ءَ روکپتی بلوچستان ءِ مزن شھر زاهدان ءَ ہائی کورٹ ءِ ماڑی ءِ سر ءَ ترندیں سلاہ بندیں اُرشے بوتگ کہ ایشی ءِ زمہ واری جیش العدل ءَ من اتگ۔
چہ جنگ ءُ چوپانی آسر ءَ بازیں مردمانی بیرانی ءُ ٹپیگ بوھگ ءِ ناسرجمیں اھوال انت ءُ سرجمیں شھر ءَ جاور ھال انگت ءَ ھراب اَنت۔
دمگی مردمانی ءِ رد ءَ شمبے ءِ روچ ءَ نزیک ءَ 8:50 ءَ زاهدان ءِ آزادی ءِ کوچگ ءَ لھتے سلاہ بندیں مردماں آمیدگس ءِ ماڑی ءِ سر ءَ اُرش کتگ۔ اُرش کنوکاں دیم پہ کازیانی کارگساں رھادگ بوتگ ءُ تیرگواری اش کُرتگ۔
چمدیستگیں مردمانی رد ءَ آمیدگس ءِ بازیں کارندہ ءُ سیکورٹی کارندہ بیران ءُ ٹپیگ بوتگ اَنت۔
اے وئیل ءَ چہ کمو دیر ءَ پد جیش العدل ءَ یک کسانیں بیانے شنگ کتگ ءُ اے اُرش ءِ زمہ واری زرتگ ءُ آئی ءَ را ”آپریشن باسکی انصاف“ گْوشتگ۔ آئی ءَ ٹاہ داتگ کہ اے کارروائی ءِ مول ءُ مراد ”بلوچ شھریانی سر ءَ عدالت ءِ زلم ءُ زوراکی ءِ پسو دیگ اِنت۔“ بیان ءِ تہ ءَ گْوشگ بیتگ کہ اے اُرش ”فداین عادل الہی“ نامیں باسکے ءَ کتگ۔
بنداتی اُرش ءَ چہ کمو دیر ءَ پد آمیدگس ءِ سر ءَ دومی اُرش کنگ بوتگ کہ ایشی ءِ تہ ءَ مارٹر ءُ دستی بم کارمرز کنگ بوتگ اَنت۔ اے اُرش چہ اولی اُرش ءَ پد مزنیں کساسے ءَ لشکر ءِ جاہ ءَ جم بوھگ ءَ پد کنگ بوتگ۔ اے وھد ءَ مزنیں تراک ءُ تیرگواری ءِ توار بوتگ ءُ چہ شھر ءِ جتا جتائیں دمگاں دود ءِ چست بوھگ گندگ بوتگ۔
شھر ءِ تہ ءَ سیکورٹی ہائی الرٹ کنگ بوتگ۔ آمیدگس ءِ کش ءُ گور ءَ سیکورٹی ءِ سکیں بندوبست کنگ بوتگ ءُ رؤگ ءُ آیگ ءِ سر ءَ سرجمیں بندش جنگ بوتگ انت۔
دمگی مردمانی گشگ انت کہ پورسز ءَ آمیدگس ءِ کمپلیکس ءِ تہ ءَ شھریانی سر ءَ نزیکیں ماڑیانی تہ ءَ بے رھبندیں تیرگواری ھم کتگ کہ ایشی ءِ سبب ءَ گیشتر ٹپی بوھگ ءِ گمان اِنت۔
دومی نیمگ ءَ ایرانی رسانکدر ءِ گشگ اِنت کہ اے اُرش ءَ ھواریں سئے مردم بیران بوتگ اَنت ءُ اے اُرش ءِ نشانگ جوڑ بوتگیں پنچ مردم بیران ءُ کم چہ کم پانزدہ ٹپیگ بوتگ اَنت۔
زاھد بلوچ ء عبدالحمید کہ کراچی ءِ دمگ لیاری ءِ جھمنند انت 17 جولائی 2025 ءَ چہ لیاری ءَ زورانسری بیگواہ کنگ بوتگ ، زاھد بلوچ ءِ بیگواھی ءِ درگت ءَ ھچ ھال دیگ نہ بیتگ انت آ سکیں تکلیپ ءُ پریشانی ءِ دیمپان انت-
کھول ءِ گْوشگ ءِ رد ءَ یک سکیں پریشان کنوکیں وئیلے مرچی بوتگ کہ یک ناشناسیں مردمے یا ادارھے ءَ زاھد بلوچ ءِ پیسبک اکاؤنٹ پچ کتگ ءُ آئی ءِ سر ءَ اسٹیٹسے شنگ کتگ۔ اے امل نہ ایوک ءَ آیانی بیگواھی ءَ گیشتر مشکوک کنگ ءَ اِنت بلکیں آیانی کھول ءِ مردماں گیشتر زھر ءُ رنج ءِ آماچ کنگ ءَ اِنت۔
آئی ءَ گْوشتگ کہ ما چہ کُلیں سنگتاں، اھوالکاراں، انسانی ھکانی جھدکاراں ءُ سرپدیں شھری مردماں دزبندی کن ایں کہ گوں زاھد بلوچ ءِ پیسبک ءِ آئی ڈی ءَ گوں ھچ وڑیں رھوت مہ کن اِت۔
ناکو جان تئی کاروان راھی اِنت
نبشتہ کار: ساجد بلوچ
دی بلوچستان پوسٹ
وھد ءِ ھمراھی ءَ باز انسان ءِ تَب ءُ لیکہ مَٹ بوگ ءَ دیستگاں۔ ھما مَردُماں کہ مارا سِکین داتگ مئے سَرکلانی بھر بوتگ اَنت ھوار بوتگ اَنت ھمایانی تَب ءُ لیکہ مَٹ بوگ ءَ دیستگاں اسل ءَ ھما انسان ءِ تَب ءُ لیکہ مَٹ بَنت کہ آئی ءِ جِند وتی اَندر ءَ وتی نزرہ ءَ پو کتہ نہ بوتگ اَنت بلکیں وھد ءِ جِنترے ءِ چَرک ءَ تَر اتگ اَنت گوں اَنچو کہ جَنگ ءِ لوٹ مَٹ بوتگ اَنت ھالت مَٹ بوتگ اَنت کُربانی، دَر پہ دَری ءِ نوبت سر ءَ رَس اتگ اَنت ، گڑا ھمے انسان کہ بَس بَٹاک بازی ، شو بازی ءَ ھوار بوتگ اَنت آ دُرستاں چہ پیسر یک کِر بوان بوت اَنت پہ وت کار ءُ روزگار زَر ءُ آسودگیں زِند دَر چِنان نندان بوتگ اَنت ۔ بَلے اَنچو گُش اَنت جَنگ ءُ تھریک وتی بَچ ءَ وت پَٹ اِیت ۔ ھمے سَرکلانی ءُ بَٹاک بازینانے توک ءَ بازیں شوکیں انسان ءُ ھَمبلاں ھم مَردُم دُوچار کپت اَنت کہ آ مُدامی وتی نزرہ ءِ سر ءَ مدام جکوک بوتگ اَنت، بلکیں وتی نزرہ ءُ کارانی سر ءَ یک گامے اوں پُشت ءَ نہ کِنز اتگ اَنت ۔
اسل ءَ انسان ءِ مَزن ءُ کَسان بوگ آئی ءِ بالاد ءَ نہ اِنت ۔ ناں کہ رَنگ ءُ جَلواہ زَر ءُ مال آئی ءَ مَزن کَن اَنت۔ کتابی گپ ، باوست ءُ جیڑہ وتسریں منانک ءُ گپ زُورانسریں دانشوری ءُ رَٹ ءَ جَتگیں ، اِش کُتگیں گَپانی جَنَگ ءَ اِنسان ءِ کِردار بُرز ءُ مَزن شان بوت نہ کَنت دانکہ آ املی پڑ ءَ گون مہ بیت ۔ اے جنگ ءَ بازیں کردار دُوچار کپتگ اَنت ھمک کردار ءُ سنگت کہ نمیران بوتگ اَنت آ باز بے مَٹ بے بھا بوتگ اَنت۔
انسان ءِ کردار ءُ آئی ءِ گَنجیں کُربانی ءُ پریشانی ءُ تکلیپی کہ سگ اِتگ آیانی جھد ءُ کار گوں لبزاں ھچ ڈول ءَ بیان کنگ ءُ گُشگ نہ بَنت. ھمے نمیرانیں سنگت ءُ ھمبلاں کہ ھوار بوتگ اَنت پَند ءُ کشکاں مرچی نمیران بوتگ اَنت آیانی ھواری ءَ مردم ءَ باز چیز دَر بُرتگ کہ آ انسان ءَ دیم ءَ جُنزگ ءُ مھکمیں گامگیج بوگ ءِ مدام سکین ءَ دنت. ھمے شوکیں اَنسانانی توک ءَ یک سَنگتے مھروان، کامریڈ صوالی اَت کہ ما مُدامی ناکو ءِ نام ءِ سر ءَ توار کُتگ۔ ناکو ، ھما شوکیں اِنسان اَت کہ من مُدامی ناکو دیستگ آ ھر وھد ءَ بی ایس او ، ءِ سیاست ، ورنایاں مُچ کَنگ ، گلامی ءِ ھلاپ ءَ جد ءُ جھد کَنگ ءَ اَت ۔ سال 2013 اَت ھمے الیکش ءُ ووٹ ءِ چِک ءُ بِک اِت اَنت ، من میتگ ءَ آپ ءِ کھن ءِ سر ءَ نِشتگ اِتاں ، گڑا ناکو اَتک ما نشت ایں مَجلس ءُ دیوان کُت ناکو گڑا ھمد ءَ گَپ بندات کُت کہ ووٹ ءُ الیکش بلوچ ءُ بلوچ ءِ تھریک ءِ واستا چینچو نُکس ءُ نَپ دار اَنت ، گڑا ناکو ءَ کندگے جَت ءُ گُشت ئِے بلوچ ءِ ورنا شُما اِت باید اے ووٹ ءُ الیکشانی ناکام کَنگ ءَ وتی جھد ءَ بِکن اِت ۔ من اَجکہ بوتاں کہ ناکو ءَ نو چی پَسہ بدیاں ، ساھتے ءَ رَند ناکو ءَ ، پد ءَ گُشت گڑا تو بی ایس او آزات ءَ وت ھور بَکن کار بکن گڑق من پد ءَ اجکہ بوتاں کہ نو ناکو ءَ چے پَسہ بدیاں ، گڑا منی دَپ ءَ دَر اَتک واکی ناکو راست گُش ئے راجی ورنا ما ایں مارا کَنگ لوٹ اِیت ، گڑا ناکو ءَ کَندگے جَت ءُ گُشت ئِے گڑا پلال تو مئے سَرکلاں بیا گوں 7 روچ ءِ سر ءَ بَنت سَرکلاں کہ ھوار بہ ئے گڑا بازیں چیز وھد ءِ ھمراھی ءَ سرپد بہ ئے ، پد ءَ ناکو ءَ گوں شَندیں کاپی ءَ مُدامی بَرے بَند ءِ سر ءَ ، بَرے کور ءُ جُرے ءَ گوں وُرنایاں دیوان اَت۔
بازیں پُرشت ءُ پروش ءَ پَد ھم ناکو مُدام ھمے چست ءُ ایراں دَست گُلائیش اَت ، بَلے ناکو ءَ دَم نہ بُرت ۔ 2013 ءَ گڑا من دَر کپتاں شال ءِ نیمگ ءَ وانگ ءُ زانگ ءِ ھاتر ءَ گڑا ناکو شُت کیچ ءَ ورنا باز ھر کَس وتی وڑ ءَ نیمگے ءَ دَرکپان بوت اَنت ، من شال ءَ اِتاں گڑا ناکو ءَ من ءَ پد ءَ ھال کُت گوشت ئِے یار شال ءَ مُپت ءَ یل مہ بہ ئے اود ءَ شُما سَنگتانی کِر ءَ شُتگ اِت دیوانے چیزے کُتگ ؟ گڑا من گُشت یار من گوں شال ءِ سَنگتاں من ءَ ھال نیست چو وَ زانگ نہ بَنت۔
ناکو ءَ گُشت تئی ھال ءُ اھوال ءَ من بے ھیال کَناں تو بُرو دیوان بِکن گوں سَنگتاں سَرکل ، پروگرام ءُ کاراں ھوار بی گوں من گُشت شَر اِنت ۔ ھمے وڑ ءَ ھرکَس وتی کاراں دَست گَٹ بوت ، ھردے کہ ما میتگ ءَ دُوچار کَپتاں گڑا ناکو ءَ وتی شَندیں کاپی گون اَت ، برے شَپانی نیم ءَ بَرے گَرم ءِ جَل ءَ ناکو ءِ سَرکل ءُ دیوان اِت اَنت ۔ ھَمے چست ءُ ایراں گوں سال من ءَ یات نہ بیت یک روچے ھال اَتک کہ بیا ناکو صوالی گوں لھتیں ھمراھاں چِست کَنگ بوتگ چہ تُربت ءَ ، ما ھر کَس اَچ وت ءَ پَریشان بوتیں کہ ناکو چِست کَنگ بوتگ اگاں ناکو رازے چیزے بَدنت بزاں مارا اوں مَردک چِست کنت ، بَلے ناکو ءَ مئے نام ءُ چیز دُشمن ءِ دَست ءَ نہ دات اَنت، پد ءَ ناکو یل ءَ کَنگ بوت ، ناکو پد ءَ وھد ءِ ھمراھی ءَ دُشمن ءِ لَٹ ءُ کُٹانی اِچ پَرواہ نہ کُت پد ءَ وتی کارانی سر ءَ بوت۔
ھمے میان ءَ بازیں مَردمے ءَ وت ءَ کَش اِت ءُ یکر کُت کہ ریاست بوت کَنت مارا چِست بِکنت بہ بارت 2019 ءَ من کہ دَر کپتاں گڑا تکریبن پورائیں سالے ءَ منی گوں ناکو ءَ ھال ءُ اھوال نہ بوت ، سالے ءَ رَند کہ من ناکو ھالے کُت گڑامن اَجکہ اِتاں من گُشت بوت کَنت ناکو منی ھال ءُ اھوال ءَ وش مہ بِیت ، گڑا ناکو ءَ منی دَروت ءُ سلام رَند کَندگے جَت ءُ گُشت ئِے ” گاریں مَرد ھالاں بدے تو چَٹ گار ئے ھالے ءَ کَپتگ ئے” مَن گُشت ھو یار مَردم برے برے گار بیت ۔ منی ٹوٹل ھمیش اِت من گُشت بوت کَنت وھد ءِ ھمراھی ءَ ناکو ءِ سوچ ھم مَٹ بوتگ، چو لھتیں مَردُم ءِ وڑ ءَ ، بَلے مَن رَد اتاں ناکو ھما پیشی ناکو اَت کہ مُدامی بوتگ اَت۔ من کہ ناکو ءِ گَپ ءُ ھَبر دیست اَنت ، نسیت ءُ سوچ گڑا منی ھمت گیشتر ودت اِت ۔
وھد ءِ روانی ءَ ناکو ءَ پد ءَ یک روچے من ءَ ھال کُت کَندگ ءَ لَگ اِت، گڑا من جُست کُت ، ھاں ناکو ھالاں بدے چہ ھال ءُ ھَبر گڑا ناکو ءَ گُشت یار مَردُم نو اِد ءَ ھُشکیں نندگ ءَ دُم بُرتگ وانگ ءُ زانگ آسر اِنت ، مَردُم مُپت ءَ نِشتگ بی ایس او ءَ ھم پارک ایں گڑا من ءَ دَست گِر ئے من کایاں شمے نیمگ ءَ ، گڑا من گُشت ناکو بَلکیں تو جَزباتی ئے، گڑا ناکو ءَ گُشت ناں یار من جَزباتی نیاں بَلکیں من نو پیسلہ کُتگ کہ بیا آں۔
سیاسی پِڑ ءَ بِگر داں مسلہ جھد ءَ ناکو ءَ وتی راہ ءُ دَگ اوں یل نہ کُت۔
اَنچو گوش اَنت ، آشوب ، آشوبی جَنگ وتی بَچاں وت وَدی کَنت ءُ وت کُش اِیت ۔ آشوبی جَنگ ءَ شھادت ءُ مَرگ یک آشوبی جھد ءِ واستا یک مَزنیں اَرزشتے دار اِیت، ھون آشوب کار اَنت ۔
آ آشوب کہ آئی ءِ بُن ھشت گوں ھوناں ایر کَنگ بیت یا ایر کَنگ بوتگ اَنت آ آشوبی جَنگ گیشتر سوبمند بوتگ اَنت ۔ یک آشوبی جھد کارے کہ وتی جھد ءُ وتی راجی شُناس ءِ ھاتر ءَ مَرگ ءَ گَچین کَنت آ راجی راجدپتر ءُ دنیا ءِ راجدپتر ءِ تہ ءَ مُدام گوں بُرز ءُ مَزنیں لَبزاں یات کَنگ بیت۔ یک مَردُمے کہ آ زند ءِ کُلیں واھگاں ، واھشتاں پُشت ءَ ایر کَنت پہ راج ءَ زمین ءُ زُبان ءِ ھاتر ءَ دَر کَپ اِیت، وت ءَ کُربان کَنت آ یک مَزنیں اِنسانے بیت، آئی ءِ زانت ءُ امل باز بُرز ءُ بُلند بَنت۔
یک مَردُمے ءِ تہ ءَ کہ زانت بیت زانت مَردُم ءَ جیڑگ ءِ توکل ءِ بَکشا اِیت، ایرراد کنگ، جُست کَنگ ، پَسو ءِ پولگ ءُ شَریں راھے ءَ روان کَنگ ءِ ھاٹیگ ءَ دَنت ۔ زانت انسان ءَ جیڑگ پَرما اِیت، جیڑگ انسان ءَ کار پَرما اِیت ، کار ءُ زانت انسان ءِ کِرد ءَ جوڑ کَنت کہ آئی ءَ چِینچو دَر بُرتگ ءُ چے دَر بُرتگ آئی ءِ کار ءُ امل آئی ءَ اِنسانی تاریک ءَ ھما نام ءُ دَروشم ءَ یات کَنت۔
اسل زَانت ھما اِنت کہ آ یک مَردُمے ءَ اِنسان بوگ ءِ دَرس ءَ دَنت گلامی ءِ ھلاپ ءَ جَنگ کَنگ ءِ دَرس ءَ دَنت ، اَنسانیت ءِ دَرس ءَ دَنت ، مھر ءِ دَرس ءَ دَنت ، زُلم ءِ ھلاپ ءَ سرمچاری ءِ دَرس ءَ دَنت ، زُبان ، زمین ، دود ءُ رَبیدگ ءِ ھاتر ءَ کُربان بوگ ءِ دَرس ءَ دَنت۔
بلوچ راج اَنو ئیں دَمان ءَ یک مَزنیں ءُ گَرانیں جاورے ءَ گوزگ ءَ اِنت ۔ بلوچ ءَ بلوچ بوگ یک مزنیں نیادے گِرگ بوتگ ، بَلے بلوچ راج اے گَرانیں بار ءِ چیر ءَ چہ اَنگت دَر نہ کَپتگ ۔بلوچ ءِ زمین ءُ زُبان ، بلوچ ءِ پجار ، دود ءُ رَبیدگ دُرست لَگتمال اَنت۔ اے مَزن ءُ گَرانیں بارے ھلاس کَنگ ءُ بلوچ ءَ چہ گلامی ءِ بَدیں دور آسر کَنگ ءِ واستا بلوچ ءَ مَزنیں کَچے ءَ وتی ، ورنا ، کَماش ، زَھگ ءُ زالبولاں ھوار یک مَزنیں کَچے ءَ وتی مال ءُ مَڈی ءِ کُربانی داتگ ۔ 20 مارچ 2024 ءَ زِر پھازیں آپریشن ءَ ناکو گوں باکی سَنگتاں دُشمن ءَ گوں مِڈان ءَ وتی ھَک ءَ اَدا کنت ۔ ھمے کُربانی ءُ جھد ءِ بِزانت کہ سَنگتانی بوتگ ، ناکو ءَ کہ مُدامی سَرکلانی توک ءَ وَرنا جد ءُ جھد ءِ سِکین داتگ اَنت، کُربانی ءِ سِکین داتگ اَنت ، وت ھم ھمے راہ ءَ مُدامی راھی اَنت ، دانکہ گُڈی تیر ءَ گوں دُشمن ءَ مِڑ اَنت ۔
کامریڈ صوالی ( میرین ) میرین ءِ پلسپہ ءِ سر ءَ اوشتات بلوچ ءِ راجدپتر ءَ پہ وت تاکے نبشتہ کُتگ۔ ناکو جان تئی کاروان راھی اِنت-
رخصت اَف آوارُن
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ سرمچاراں کلات ءَ زورگریں پاکستانی پوج ءِ سر ءَ ٹوھیں اُرشے کتگ ءُ سک باز تاوان داتگ ءُ اے میڑ ءَ سنگت سھیب بلوچ پنام ءِ امیر بخش نمیران بوتگ۔
جارکش جیئند بلوچ ءَ سرجمیں ھال داتگ ءُ گوشتگ کہ مروچی بزاں 25 جولائی ءَ کلات ءِ دمگ کوھک ءَ زورگریں پوج ءَ سھب کساس ادار نھ ءِ نزیک ءَ پہ زوراکی کنگ ءِ ھاتر ءَ دیم ءَ آیگ ءِ جھد کتگ کہ سرمچاراں پیسر ءَ آئی ءِ سر بستگ ءُ اُرش کتگ ۔ اے اُرش چل دمان ءَ گیش برجاہ بوتگ ءُ اُرش ءَ زورگریں پوج ءِ نھ کارمَنْد ھما جاہ ءَ مرتگ ءُ بازینے زدگ بوتگ ءُ تتکگ انت ۔
جارکش ءَ گوشتگ کہ زورگریں پوج ءَ گْوَستگیں پنچ روچاں کہ کوھک ءُ کش ءُ گوری ھند ءُ دمگاں پہ زوراکی کنگ ءِ جھد ءَ انت بلے پد ءَ ھم بلوچ لبریشن آرمی ءِ سرمچاراں گوں جْوانیں رپک ءُ ھنراں یکشل ءَ تاوان بار کتگ ءُ میڑاں سنگت سھبیب بلوچ پنام ءِ امیر بخش نمیران بوتگ۔
جارکش ءَ گوشتگ کہ نمیرانیں سنگت سھیب بلوچ پنام ءِ امیر بخش ءِ محمد دین بنکی ءَ قلات ءِ دمگ منگچر نندوک بوتگ انو کلی اسماعیل، شال ءَ جھمنند بوتگ۔ آ سالے ءَ ساری بی ایل اے ءَ اتکگ ءُ راجی آجوئی ءں جھد ءَ کلات ءِ کوھاں وتی کرد ءَ پیلو کنگ ءَ بوتگ ۔
جارکش ءَ گوشتگ کہ نمیرانیں سھیب بلوچ دلیر ءُ تمرد ءُ رھبندی سنگتے بوتگ آئی ءَ اے کمیں بلے پرازم آشوبی زند ءَ بازیں جْوانیں کارے کتگ آ ایوک ءَ دلیریں سپاھی یے نہ بوتگ بلکیں یہ زانتکاریں آشوبی باسکے بوتگ کہ آئی ءِ ھمراہ داری زرمبش ءِ لیکہ ءَ برزشان بوتگ۔
آئی ءَ دیمتر ءَ گوشتگ کہ آ گڈی جنگ ءَ ھم دیم ءِ لین ءَ بوتگ ءُ زورگریں لشکر سرین پروشے کتگ ءُ سک باز تاوانے داتگ ۔ آئی ءِ دلیری ءُ دیمھونی ایوک ءَ کلات ءِ کوہ ءَ ناں بلکیں سرجمیں راجی زرمبش ءِ ھاتر ءَ رژناھیں درورے-
درشان ءِ گڈسر ءَ جارکش ءَ گشتگ کہ نمیرانیں سھیب ءِ دیمھونی بلوچ راجی دپتر ءِ یک تابناکیں درے کہ نسل در نسل آجوئی ءِ لوٹوکاں جھدے ھوسلگ ءِ راہ ءَ باور کنائین ایت۔
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست چار جولائی ءِ شپ ءِ دہ ءِ نزیک ءَ ھاران ءَ ناکہ ءَ ساڑی سے کارندھانی سر ءَ اُرش کتگ چریشی ءِ آسر ءَ دُژمن ءِ دو کارندہ جاہ پہ جاھی مرتگ ءُ سے کارندھاں وتی ھمراھانی لاش یل داتگ ءُ چوکی نیمگ ءَ تتکگ اَنت –
جارکش ءَ گوشتگ بلوچستان لبریشن فرنٹ ھاران ءَ گواش دگ سر ءِ اُرش ءَ زورگریں پاکستانی پوج ءِ دو کارندھانی کوش زمہ واری ءَ منّ اِیت-
بلوچ بیگواھیں مردمانی کھولانی نندانک اسلام آباد ءَ دھمی روچ ءَ برجاہ ، چہ بلوچستان ءَ دگہ بیگواھیں مردمانی کھول سر بیتگ ءُ ھوار بیتگ انت-
بلوچ یکجھتی کمیٹی ءِ رھشونانی یل کنگ ءُ بلوچستان ءَ زورانسری بیگواھیانی ھلاس کنگ ءِ لوٹ ءِ ھاترا نندانک برجاہ اِنت بلے اسلام آباد پریس کلب ءِ نیمگ ءَ روگ ءِ راہ پولیس ءَ بند کتگ انت ءُ بس اوشتارینتگ انت-
ھور ءُ ناوشیں موسم ءَ ابید زالبول، پیر ءُ کماش ءُ زھگاں گوں جزم ءَ زھرشانی برجاہ داشتگ۔ بلے زھرشانی ءَ بھر زوروکیں بلوچ سیاداں انگت ءَ کیمپ جوڑ کنگ ءِ موہ نہ داتگ کہ ایشی ءِ سوب ءَ سک باز مشکلانی آماچ اَنت۔
زھرشانی کنوکیں مردمانی گْوشگ اِنت کہ سکیں گرم ءَ ابید ھم پاکستانی واکدار آھاں نہ کیمپ جوڑ کنگ ءِ موہ دیگ ءَ اَنت ءُ نہ آھاں ساھگ دیگ ءَ اَنت۔ گوستگیں روچ ءَ بازیں جنین ءُ چُک گرم، تھنائی ءُ آپ ءِ کمی ءِ سوب ءَ بے ھوش بوتگ اَنت بلے تاں انوگ ءَ ھچ وڑیں انسانی ءُ جانسلامتی کمک نہ بوتگ انت۔
ھواریں مردمانی گشگ انت کہ اسلام آباد پریس کلب ءِ نیمگ ءَ روگ ءِ راہ انگت ءَ گوں بندشاں بند کنگ بوتگ انت دانکہ زھرشانی چہ مھلوک ءِ چماں دور بہ بیت۔ انگت گیشتریں ھاندان زھرشانی ھوار بوھگ ءَ اَنت، آزار ءُ اذیت، گرم ءُ گیر انسانی جاوراں ابید ھم مھکم اَنت۔
بلوچ یکجھتی کمیٹی ءَ پولیس ءُ اسلام آباد انتظامیہ ءِ کارروائی ایر جتگ ءُ گشتگ کہ اے تھنا زوراکی نہ اِنت بلکیں برجمیں زلم ءُ زوراکی اِنت، البت زھرشانی کنوک جزم اَنت ءُ آیانی جھد ءِ سرپوشگ بوت نہ کنت۔
یات بہ بیت کہ بلوچ زھرشانی کنوکاں سرکار ءِ دیم ءَ دو بنکی لوٹ ایر کتگ اَنت کہ آ ایش اَنت کہ بلوچ زھرشانی کنوکاں سرکار ءِ دیم ءَ دو بنیاتی لوٹ ایر کتگ اَنت۔
بلوچ یکجھتی کمیٹی ءِ رھشونانی ھلاپ ءَ دروگیں کیسانی ھلاس کنگ ءُ آھانی زوتیں یلہ کنگ بلوچستان ءَ زوراکیں بیگواھی ءِ آسر کنگ ءُ بیگواھیں مردمانی پچ گرگ بلوچ یکجھتی کمیٹی ءَ چہ میان اُستمانی انسانی ھکانی گل ءُ رسانکدراں دزبندی کتگ کہ اے سنگینیں انسانی جیڑہ ءِ نوٹس ءَ بہ زور اَنت ءُ زھرشانی کنوکیں مردمانی بنکی انسانی ھکانی پچ گرگ ءَ وتی کردے پیلو بہ کن اَنت۔
بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ سرمچاراں مانجھی پور ءِ دمگ گڑھی حسن ءَ سرکاری نوک جوڑ بؤکیں پوجی بند ءُ ساچی شرکت ءِ گاڑیانی تیرگواری کتگ ءُ نشانگ کتگ، اے اُرش ءِ آسر ءَ پوجی شرکت ءَ جانی ءُ مالی تاوان چست کنگ کپتگ-
جارکش ءَ گوشتگ کہ ما دمگی ٹھیکیداراں کڈن کن ایں کہ آ ریاستی شوربندیاں چہ دیر بہ بنت، اگاں ناں آ وتی جانی ءُ مالی تاوان ءِ زمہ وار وت بنت-
جارکش ءَ گْوشتگ کہ اے اُرش زمہ واری ءَ مئے گل بی آر جی منّ اِِیت ءُ اے وڑیں اُرش بلوچستان ءِ وتواجھی ءَ تاں برجاہ بنت-
بلوچ وومن فورم ءِ بُنجاھی آرگنائزر، ڈاکٹر شلی بلوچ گوں سنگتانی ھمراھی ءَ گوادر ءِ دمگ چہ سربندر ءَ دزگیر کتگ-
اِھوالکار ءِ رِد ءَ ھما وھد ءَ دزگیر کنگ بوتگ اَنت وھدے ڈاکٹر شلی بلوچ آئی ءِ ھمراھیں زالبول ءِ ھکانی ءُ زورانستی آوار جنی ءِ ھلاپ ءَ یک دمگی مراگشے ءِ بھر بیگ ءِ ھاتر ءَ سپر کنگ ءَ اِنت-
اِھوالکار گوشگ اِنت کہ ڈاکٹر شلی بلوچ ءُ آئی ءِ ھمراہ ھما وھد ءَ دزگیر کتگ اَنت وھدے آ سربندر ءَ راجی پُرکاری ءِ ھند سر ءَ بیتگ- تنی وھدے سرکاری درشان دیم ءَ نیتکگ ءُ نانکہ سرکاری واکدار ءَ دزگیری پدر کتگ-
ڈاکٹر شلی بلوچ یک نامی ئیں چاگردی ءُ سیاسی کارکنے، ھاسکار بلوچ زالبولانی ھکانی، زانت ءُ زورانسری آوار جنی ءِ وڑیں بُنگپانی سر ءَ سیاست ءِ دیم برگ ءِ کرد ءِ وکیلے ھم کنت-
آئی ءِ گل، بلوف وومن فورم ، زالبول ءِ سروکی ءَ کارکنوکیں انچیں گلے کہ بلوچستان ءِ دیر دراجیں دمگاں زالبولانی واستا سرپدی ، زانت ءُ انساپ دیگ ءِ ھاتر ءَ پُرکار اَنت-
بلوچستان ءِ دمگ کلات ءَ دگہ یک اُرشے ءَ پاکستانی لشکر ءَ تاوانانی دیمپانی کنگ کپتگ ۔
مرچی سھب ءِ سر ءَ پاکستانی لشکر ءَ کلات ءِ دمگ کوھک ءُ کش ءُ گوری دمگانی نیمگ ءَ بازیں مارٹر گواری کتگ بلے ھچ وڑیں تاوان ءِ ھال نیست۔
پد ءَ پاکستانی لشکر ءَ پیادگ ءَ دمگ ءَ دیم ءَ روگ ءِ جھد کتگ بلے سنگر گپتگیں سلاہ بندیں مردماں اُرش ءِ نشانگ کتگ۔ اُرش ءَ سیکورٹی پورسز ءِ بازیں کارندہ بیران ءُ ٹپیگ بوتگ اَنت بلے واکداراں اے بابت ءَ ھچ وڑیں ھال دیم ءَ نیاؤرتگ انت۔
دمگی مردمانی ءِ رد ءَ اُرش ءَ پد چہ دمگ ءَ لشکر ءِ کاروان روگ ءَ ھم گندگ بوتگ۔
زانگ بہ بیت پاکستانی لشکر گوستگیں پنچ روچاں کلات ءُ مستونگ ءَ آپریشن ءَ گوں دزبند اِنت کہ لشکر ءَ سکیں اُرشانی دیمپانی کنگ کپگ انت-
واکداراں اے اُرشانی تہ ءَ میجر زیاد ءَ ھوار پاکستانی لشکر ءِ شش کارندھانی بیرانی ءِ پدرائی کتگ۔
بلوچ لبریشن آرمی ءَ سرجمیں بلوچستان ءَ 23 پاکستانی کارندہ ءِ کوش ءِ زمہ واری من اتگ انت کہ ایشی ءِ تہ ءَ کلات ءُ مستونگ ءِ اُرش ھم ھوار اَنت۔ اے اُرشانی تہ ءَ آئی ای ڈی ءُ سلاہ بندیں اُرش ھوار اَنت۔
