TBP Balochi

بلوچستان ءَ سَے شمبے ءِ روچ ءَ یک زالبولے ءُ آئی ءِ لوگ واجہ تیرگواری کنگ ءُ کُشگ بیتگ انت- واکدارانی گوشگ انت اے مَرد ءُ جَن ءَ ھپت سال ساری اَچ لوگ ءَ تتکگ ءُ آروس کتگ ءُ کوش ءِ شَک زالبول ءِ براتانی سر ءَ لڈگ ءَ انت-

ویل مستونگ ءِ دمگ لکپاس ءِ نزیک ءَ یک ھوٹلے ءَ پیش اتکگ – دمگی لیویز ءِ رد ءَ تیرگواری کنوکیں مردم زالبول ءِ برات بیتگ کہ آئی ءَ زال ءُ جَن مھمانی ءَ شال ءَ لوٹائینتگ انت-

ایس ایچ او پیر جان علیزئی ءِ رد ءَ کُشتگینانی اُمر 27 ءَ تاں 28 سال ءِ میان ءَ انت – مَرد مھمد شعیب ءِ سیادی پنجگور ءِ دمگ چتکان ءَ بیتگ ءُ زال بے نظیر شال ءِ دمگ ھزار گنجی ءِ نندوک بیتگ- ھردوکاں ھپت سال ساری کورٹ میرج کتگ –

واکدارانی رد ءَ شعیب ءُ بے نظیر ءَ ھمے زوتاں وتی وَسی ءَ گوں سِلاہ کتگ بیتگ- زالبول ءِ براتاں ھردوک شال ءَ آیگ ءِ داوت داتگ انت- شعیب وتی زال ءُ برات ءِ ھواری ءَ پنجگور ءَ درکپتگ انت ءُ شپ ءَ مستونگ ءَ یک ھوٹلے ءُ داشتگ ات-

دومی سھب ءَ زالبول ءِ براتاں پون کتگ ءُ لوکیشن جست کتگ ءُ ھوٹل ءَ اتکگ ءُ تیرگواری کتگ کہ چریشی ءِ سبب ءُ مرد ءُ زال جاہ ءَ بیران بیتگ انت ءُ اُرش ءَ پد جرمکار تتکگ انت-

ایس ایچ او ءِ رد ءَ کشتگیں زالبول لاپر ھم بیتگ ءُ آئی ءِ دو زھگ ھم ھست کہ آیانی اُمر شش ءُ سَے سال انت – لیویز ءَ ارزی نبشتگ کتگ ءُ جرمکارانی پٹ ءُ پول بندات کتگ-

بلوچ وومن پورم ءَ وتی یک بیانے ءَ گْوشتگ کہ گوادر ءَ آھانی گل ءِ نیمگ ءَ برجم داشتگیں کانپرنس ریاستی زورانسر، دزگیر کنگ، ءُ زوراکی ءَ چہ لوگ ءَ در کنگ ءِ سوب ءَ ھلاس کنگ بوتگ۔

گل ءِ گشگ اِنت کہ اے وئیل تھنا بلوچ زالبولانی سیاسی آجوئی ءِ سر ءَ اُرش نہ اِنت بلکیں بلوچستان ءَ ریاستی ادارھانی نیمگ ءَ زورانسری کنگ ءِ دگہ سنگینیں درورے۔

بیان ءِ رد ءَ گوادر ءَ بلوچ وومن پورم ءِ نیمگ ءَ یک ھاسیں دیوانے ءِ برجم دارگ بوگی بیتگ کہ ایشی ءِ سرھال ’’ بلوچ سیاسی ادارگانی سر ءَ کریک ڈاؤن ءُ بلوچستان ءِ انوگیں سیاسی ندارگ‘‘ ات۔ اے دیوان ءِ تیاری بازیں ھپتگاں چہ بوتگ ات کہ ایشی ءِ تہ ءَ دمگی زالبول، نودربر، چاگردی کارندہ ءُ سیاسی ماھریناں بھر زورگ ءِ داوت دیگ بوتگ ات۔

بلے چہ کانپرنس ءَ بس لھتیں روچ پیسر سرکاری ادارھاں گل ءِ کارانی سر ءَ نزیکیں نگرانی بندات کت، بُنجاھی رھشون آزار ءُ اذیت کنگ بوت انت ءُ گڈسر ءَ گوادر ءَ بازیں زالبولیں جھدکار دزگیر کنگ ءُ تربت ءَ دیم دیگ بوت انت۔

بیان ءِ تہ ءَ گْوشگ بیتگ کہ اے درستیں کارروائی بیدے ھچ وڑیں کانونی ھال ءُ اھوال ءُ وارنٹ ءَ کنگ بوتگ اَنت۔

اے گل ءِ رد ءَ اے جنین آدمانی بندیگ کنگ ءِ وھد ءَ سکیں زھرناکیں جست ءُ پرس کنگ بوتگ ءُ آیانی سیاسی ھیال ءُ لیکہ ءُ تنظیمی سیادی ءِ بابت ءَ جُست ءُ پُرس کنگ بوتگ ءُ ھاموش بوگ ءِ دھمکی دیگ بوتگ۔ زالبولانی بندیگ کنگ ءِ وھد ءَ اے زالبولاں وتی ھاندان ءَ گوں کانونی شور ءُ سلاہ ءُ اھوال ءِ موکل نہ بوتگ ءُ گوں آھاں در انسانی سلوک کنگ بوتگ۔

بلوچ وومن پورم ءَ گْوشتگ کہ اے وئیل اے گپ ءَ سابت کنت کہ بلوچستان ءَ زالبولاں نہ ایوک ءَ لبز ءِ آجوئی نیست بلکیں آھاں چہ سیاسی ءُ چاگردی کارانی تہ ءَ بھر زورگ ءَ ھم پہ زور مکن کنگ بیگ ءَ اِنت۔

بیان ءِ تہ ءَ گیش گْوشگ بیتگ کہ یک اکیڈمک ءُ پرامن کانپرنسے ءِ زوراکی ءَ رد کنگ ءُ زالبولاناں چہ گوادر ءَ آزار دیگ ءُ درکنگ نہ ایوک ءَ انسانی ھکانی بے دروریں لگتمالی اِنت بلکیں ریاستی اقتدار ءِ در جمھوری کارمرد کنگ ءِ پدّریں درشان اِنت۔

اے گل ءَ چہ سرکار ءُ انسانی ھکانی ادارھاں لوٹ کتگ کہ آ اے وئیل ءِ نوٹس ءَ بہ زور اَنت ءُ زالبولانی دزگیر کنگ ءُ درکنگ ءِ بابت ءَ پلگاریں پٹ ءُ پولے بہ کن اَنت ءُ بلوچستان ءَ امن ءُ ایمنی ءِ سیاسی کارانی ھاتر ءَ گامگیج بہ زور اَنت۔

بلوچستان ءِ دمگ کیچ ءِ تھسیل تربت ءِ ھند ناصر آباد ءَ پاکستانی پوج ءَ لوگانی سر ءَ بیڑبرتگ ءُ پٹ ءُ پول کتگ-

دمگی مردمانی رِد ءَ مروچی تھسیل تربت ءِ دمگ ناصر آباد ءَ ھم پوج ءَ سرچ آپریشن ءِ میان ءَ لوگانی پٹ ءُ پول کتگ ءُ دمگی مردم لَٹ ءُ کُٹانی نشانگ کتگ اَنت چریشی ءِ سبب ءَ دمگ ءَ تُرس ودی بیتگ-

تمپ ءِ دمگ میرآباد ءَ پاکستانی پوج ءَ دمگی آبادی سر ءَ ماٹر آس داتگ، آس دیگ بیتگیں بازیں مارٹر گولھاں چہ دو لوگ سر ءَ کپتگ کہ آیانی تہ ءَ یک لوگے ءَ سک تاوان رس اِتگ، وھدے کہ دومی مارٹر گولہ دگہ یک لوگے ءِ سر ءَ کپتگ بلے آ نہ ترکّ اِتگ-

تنی وھدے دمگی انتزامیہ یا پوج نیمگ ءَ چہ وئیل ھچ وڑیں درشان دیم ءَ نیتکگ-

زانگ بہ بیت کہ بلوچستان ءِ دمگ کیچ ءَ اشی ءَ ساری ھم پوج نیمگ ءَ چہ دمگی آبادی سر ءَ مارٹر اُرشانی وئیل دیم ءَ اَتکگ اَنت-

ھمے ماہ دہ جولائی ءَ کیچ ءِ دمگ گورکوپ ءَ پوج ءَ آس داتگ مارٹر یک دمگی گراؤنڈے ءَ کپتگ چریشی ءِ آسر ءَ اود ءَ گوازی کنوکیں دو ورنا بیران بیتگ ءُ پنچ ٹپی بیتگ اَنت-

گورکوپ وئیل ءَ ٹپی ءُ بیران بیتگیں ورنایانی پجّار علی ء غلام، شھباز ء دوستیں، نصیر ء محراب، جمیل ء دلمراد، جمال ء حمید، برکت ء اقبال ءُ وزیر ء غلام علی ناماں چہ بیتگ اَنت-

اِھوالکار رِد ءَ پوج سر ءَ بلوچ آجوئی لوٹوکانی اُرشاں پد پسّھی کاروائی ءَ پوج ءَ دمگی آبادی سر ءَ مارٹر اُرش ءَ سر ءُ دیم تیرگواری کنت، ھمے سال ءِ مارچ ءَ تمپ ءَ بیتگیں دگہ یک انچیں وئیلے ءَ پوج ءَ مارٹر اُرش ءَ سے چُک سک ٹپی بیتگ اَنت-

ھمے وڑ دوھزار بیست دو ءَ تمپ ءَ یک وئیلے ءَ پوج ءِ مارٹر گولہ آبادی سر ءَ کپتگ چریشی ءِ آسر ءَ زالبول ءُ چُکاں ھوار چار مردم ٹپی بیتگ اَنت، پد ءَ ٹپی پوج ءَ وتی دستیگ کتگ ءُ بُنجل ءَ برتگ اَنت-

دوھزار بیست یک ءِ دہ اکتوبر ءَ بلوچستان ءِ دمگ ھوشاپ ءَ ایف سی ءِ نزیکیں پوسٹ ءَ چہ مارٹر گولہ آس داتگ اَت چریشی ءَ چہ ھپت سالی ئیں گونڈو اللہ بخش ء عبدالواحد ءُ پنچ سالی ئیں جنکو شرارتون ء عبدالواحد جاہ پہ جاھی بیران بیتگ اَنت وھدے کہ مارٹر ءِ نشانگ ءَ آیگ ءَ چہ جنکو مسکان ء وزیر سک ٹپی بیتگ اَت-

وئیل ءِ ھلاپ ءَ شال ءَ ھوار سرجمیں بلوچستان ءَ زھرشانی ءُ نندانک داتگ-

ھمے وڑ سال دوھزار ھژدہ ءِ جولائی ءُ اگست ءَ ھم دو جتاجتائیں وئیلاں بلوچ آجوئی لوٹاکانی اُرشاں پد پوج ءَ دمگی آبادی سر ءَ مارٹر آس داتگ-

ھما سال ءَ جولائی ءَ یک گولھے ابوبکر نامیں مردمے ءِ لوگ ءِ سر ءَ کپتگ چریشی ءِ آسر ءَ چُکاں ھوار پنچ مردم ٹپی بیتگ اَنت، وھدے کہ اگست ءَ دگہ یک مارٹر اُرش ءَ جھانزیب نامیں دمگی مردمے ٹپی بیتگ-

بلوچستان ءِ دمگ ھرنائی ءِ ھند تالب ءِ نیمگ ءِ ھستیں اشکرانی کھن ءَ یک تْرندیں تراکے بوتگ آئی ءِ سبب ءَ شش مزدور بُنگرگ ءَ پد ٹپّیک بوتگ اَنت۔

تراک ءِ سبب اشکرانی کھن ءِ تہ ءَ گیس ءِ گیشیں پُر بوگ اِنت۔

ریسکیو ٹیم ءِ رِد ءَ وئیل ھما وھد ءَ دیم ءَ اتکگ وھدیکہ مزدور زمین ءِ چیر ءَ کار ءَ بوتگ اَنت ءُ وئیل گیس ءِ بازیں گیشی ءِ سوب ءَ دیم ءَ اتکگ، تراک ءِ سبب ءَ شش مزدور، واجد، شیر اپزل، امیر اھمد، اشرپ الی، آگا مھمد ءُ دگہ شش مزدور ٹپیگ بوتگ انت۔

ٹپّیگیں مزدور زوت ءَ چہ ھرنائی ءَ شال نادْراھجاہ ءَ پہ ھلاج ءَ دیم دیگ بوتگ اَنت ءُ آیانی ھلاج انگت برجاہ اِنت۔

نادْراھجاہ ءِ وسیلہ ءِ رِد ءَ بازیں ٹپّیگیں مزدورانی ھالت ناساز اِنت۔

یات بہ دار ات کہ بلوچستان ءِ تہ ءَ اے پیمیں اشکرانی کھن ءَ تراک یک ھر روچیگیں جیڑھے بوگ ءَ اِنت کہ ریاست مزدورانی سلامتی ھاتر ءَ بازیں نگدانی دیمپان اِنت۔

بلے ھکومت ءِ گشگ اِنت اشکرانی کھن ءِ تہ ءِ کارکنوکیں مزدارانی سلامتی ءِ ھاتر ءَ سلامتی انتزاماتاں گیش ترند کنگ ءِ زلورت اِنت تاکہ آیوکیں وھد ءَ اے پیمیں وھئیل دیم ءَ مئیت۔

بلوچستان ءِ دمگ کلات ءَ پاکستانی لشکر ءِ پندی کارندھانی سر ءَ سلاہ بنداں اُرش کتگ-

ھالانی رد ءَ شکاجی ءُ شاہ مردان ءِ نیام ءَ پاکستانی پورسز ءِ کارندھانی سر سلاہ بنداں بستگ ءُ اُرش کتگ-

اے اُرش ءَ پورسز ءَ را تاوان رس اتگ بلے واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔

پاکستانی بنجاھی شھر اسلام آباد ءَ بی وائی سی ءِ بنجاھی رھشون ءُ بیگواھیں مردمانی کھولانی زھرشانی چاردھمی روچ ءَ برجاہ، نندانک ءِ کھولاں پُر ایمنیں روانکے کش اتگ ءُ بی وائی سی ءُ بیگواھیں مردمانی یل کنگ ءِ لوٹ کتگ-

زھرشانی کنوکاں گوشتگ مئے زھرشانی چاردہ روچ سرجم بیتگ بلے تنی وھدی سرکاری واکدار مئے گون ءَ گپ ءُ تران ءَ نیتکگ انت-

بلوچ زھرشانی کنوک چاردھمی روچ ءَ ھم پریس کلب ءِ دیم ءَ روگ ءَ دارگ بیتگ انت ءُ پولیس ءَ نیشنل پریس کلب ءِ راہ گوستگیں چاردہ روچاں بند کتگ انت ءُ بلوچ زھرشانی کنوکاں پریس کلب ءِ دیم ءَ روگ ءَ نیلگ انت-

زانگ بہ بیت ایشی ءَ پیش زھرشانی کنوک چہ فلیٹ ءَ کشگ ءُ ڈن ءِ سر ءَ کنگ بیتگ انت ءُ دومی نیمگ ءَ آیاں در نمبر پلیٹین گاڑیانی نیمگ ءَ ترس ءُ پاتراپانی دیمپانی انت-

بلوچ کھولانی گوشگ انت مئے لوٹ جھموری ڈیھے ءِ کانود ءِ درچ ءَ انت ءُ ایشی ءَ ھم مارا گوشدارگ ءَ کس تیار نہ انت-

بلوچ زھرشانی کنوکاں اود ءَ جتا جتائیں مردمانی نیمگ ءَ بلوچ آجوئی لوٹوکانی ھلاپ ءَ جست ءُ پسھیانی دیمپانی انت کہ اود ءَ جتا جتائیں مردم اھوالکاری ءِ نام ءَ زھرشانی کنوکاں آیاں چہ دَر جست کن انت-

آیانی گوشگ انت ما اے جست ءُ پرسانی واستا نیتکگ انت ما اد ءَ وتی بیگواھیں مردمانی بارو ءَ اتکگ انت ءُ مئے لوٹ ڈیھ ءِ کانون ءِ درچ ءَ انت ءُ کانون ءَ چہ در نہ انت-

بلوچستان ءِ دمگ کلات ءَ پاکستانی پوج ءَ دروگیں میڑ ءَ سے بیگواھیں مردم کشتگ ءُ دور داتگ اَنت-

کلات ءِ دمگ کوھک ءَ منگچر ڈیم ءَ نزیک ءَ سے بیگواھیِ مردم دروگیں میڑ ءَ کُشتگ اَنت- سئیں مردمانی دیمانی سر ءَ تیزاب پریتکگ گار کتگ اَنت چریشی ءِ سبب ءَ پجّار ءِ دلسیاھی ءِ دیمپان اِنت-

زانگ بہ بیت سرجمیں بلوچستان ءَ دروگیں میڑاں پیسر ءَ چہ بیگواھیں مردمانی کوش ءِ بازیں وئیلے نکش کنگ بیتگ-

اے وئیلاں پوج ءَ جتگیں مردم سلاہ بندیں گلاں چہ ھمگرنچ کنگ ءِ جُھد کتگ بلے پد ءَ شاھداں چہ اے مردمانی پجّار زورانسری بیگواھیں مردماں چہ بیتگ اَنت-

اے وئیلانی سر ءَ انسانی ھکانی گل ءُ سیاسی پارٹیاں تُرس درشان کتگ- بلوچ یکجھتی کمیٹی ءِ میان اُستمانی گلاں چہ اے وئیلانی سر ءَ گامگیج زیرگ ءِ دزبندی کتگ-

اسلام آباد ءِ سیکرٹریٹ تھانہ پولیس ءِ اھوالانی ءَ رد ءَ آیاں یک درزنے ءَ گیش بلوچ نودربر دزگیر کتگ انت-

اھوالانی رد ءَ اے نودربر نسلی بنیاد ءَ نشانگ جوڑ کنگ بوھگ ءَ انت ءُ ایشاں بلوچ لبریشن آرمی ( بی ایل اے) ءَ بندوکی ءِ پژدر ءَ ترندیں پٹ ءُ پول کنگ ءَ انت-

نامداریں انسانی ھکانی وکیل ءُ جھدکار ایمان زینب مزاری ھم انوگ ءَ تھانہ ءِ تہ ءَ اِنت۔ سوشل میڈیا ءِ سر ءَ شنگ ءُ تالانیں ھالانی رد ءَ تھانہ ءِ دپ ءَ کرفیو ءِ وڑیں جاورے ھست کہ اود ءَ شھری ءُ اھوالکاراں نہ ایوک ءَ دارگ بوھگ ءَ اَنت بلکیں پولیس ءِ نیمگ ءَ آیانی گون ءَ بدسلوکیانی دیمپانی انت-

یک اھوالے ءِ رد ءَ کہ آیاں ایمان مزاری ءِ رسائی دیگ نہ بوھگ ءَ اِنت ءُ اے گپ پدر نہ اِنت کہ آ دزگیر اِنت یا ایوک ءَ نودربراں کانونی کمک کنگ ءِ ھاتر ءَ اود ءَ اِنت۔

زھنی ایردستی چی یے ؟

نبشتہ کار: بیبگر بلوچ

دی بلوچستان پوسٹ

“گُلامی تھنا سانکلانی نام نہ اِنت، بلکیں ھیال ءِ بندیگ کنگ ءِ ھم نام اِنت۔” وھدے کہ یک راجے ءَ جسدی (جسمانی) ھساب ءَ گُلام جوڑ کنگ ارزان مہ بیت گڑا دژمن آئی ءِ ھیال،آئی ءِ زانت ءُ آئی ءِ تب (نفسیات) ءِ سر ءَ کبزہ کنگ ءِ جُھد ءَ کنت ءُ ھمے کبزہ زھنی گُلامی گوشگ بیت، زھنی گُلامی ھما نہ دیستگیں سانکل اِنت کہ انسان ءَ چہ آئی ءِ زانت ءَ چہ دیر کنت ءُ انچیں جاورے ءَ سر کنت کہ آ وتی دژمن ءَ دوزواہ، وتی ایردستی ءَ آجوئی ءُ وتی گُلامی ءَ باندات سرپد بیت۔

بلوچ راج چہ کرن ءَ آجوئی دوستے بوتگ، وھدے کہ زورگیر ءِ تاکتاں آئی ءِ زبان، دود ءُ ربیدگ، وانگ ءُ بُندپتر ولگوج کُت اَنت، گڑا یک ساز اتگیں پندلے ءِ جھت ءَ بلوچ ءِ مجگ ءِ سر ءَ کبزہ کنگ ءِ جُھد کنگ بوت۔ زھنی گُلامی یک انچیں جاورے ءِ نام اِنت کہ اود ءَ انسان جسدی (جسمانی) ھساب ءَ آجو بیت بلے پگری، زھنی ءُ زانت ءِ رد ءَ دومی ءِ مُرید بیت، زھنی گُلامی ءِ آماچ چہ سانکلاں بستگیں گُلامے نہ اِنت بگند ئے لیکہ، وانگی نزام، رسانکدر، مزھبی پندل یا استان ءِ پروپیگینڈہ ءِ وسیلہ ءَ مردم پگری رِد ءَ گلام دارگ بنت۔ زھنی گُلامی ءِ آماچیں انسان وتی گُلام بوگ ءَ نہ مار اَنت، راستی ءَ چہ دور بنت، ادارُکی چیزاں چہ گل بنت ءُ باز وھد ءَ آ ایردست ءِ نزام ءُ لیکہ ءِ نگھبان جوڑ بنت ءُ وتی پجار، زبان، دودمان ءُ زمین ءِ روتگانی سندگ ءَ گوں ایردست ءَ ھمکوپگ بنت ءُ ھچ سَما ھم نہ کن اَنت۔

“اگاں تئی ھیال دگر ئیگ اِنت گڑا تئی آجوئی ھم دگرے ئیگ اِنت” دنیا ءِ ھمُک ایردستیں راجے ءِ پروش ھما وھد ءَ بندات بیت وھدے آ وتی اندر ءَ چے ایردستی ءَ بہ منّ اَنت، ھما کہ آ وتی اگل ءُ ھوش ءَ چہ وتی پروش ءَ من اَنت ھما مھلوک زھنی گلام زانگ بنت۔ اے ھما جاور بیت کہ اود ءَ انسان گِندگ ءَ آجو اَنت بلے آیانی جیڑگ، مارگ، سرپد بوگ ءُ پیسلہ کنگ ءِ وس ءُ واک آیانی دست ءَ مہ بیت۔ آ مُدام ایردست ءِ لیکہ، بُندپتر، زبان ءُ دود ءُ ربیدگاں زور اِیت ءُ وتیگ ءَ بے ھیال کنت۔

بلوچ راج چہ کرناں دلیر، ایمن ءُ آجوئی دوستے بوتگ بلے دژمن ءَ آ جسدی ھساب ءَ گُلام جوڑ کنگ ءَ رند، آئی ءِ ارواہ، ھیال ءُ زانت ھم گُلام جوڑ کنگ ءِ جھد کُتگ۔ ھمے سوب اِنت کہ بلوچستان ءَ وانگی کورس ھما داب ءَ ٹھینگ بوتگ اَنت، بُندپتر گاجیل کنگ ءُ دروگ ءِ تہ ءَ مٹ کنگ بوت، رسانکدر سلاہ جوڑ کنگ بوت، نیکراھی، زبان ءُ زمینی رد ءَ بھر ءُ بانگ کنگ بوت۔

مروچی بلوچ زھگے وانگجاہ ءَ روت گڑا ناکہ آئی ءَ بلوچ بُندپتر ءِ بابت ءَ وانینگ بیت ءُ نا بلوچ بامردانی بابت ءَ وانینگ ءُ سرپدی دیگ بیت۔زھگ ءَ تھنا ھما وتساچیں زانت دیگ بیت دانکہ آ ایردست ءِ ھاتر ءَ مشینے جوڑ بہ بیت، آئی ءِ شر ءُ گندگ وتی ھساب ءَ سوج دیگ بنت دانکہ آ بلوچ بوگ ءَ ابید ھم بلوچے بوت مہ کنت۔

زھنی گُلامی ءِ لھتیں شون : وتی پجار ءَ چہ کُنّت، وتی زبان، بُندپتر، دود ءُ ربیدگ ءُ وتی راج ءَ چہ دومی ءَ کمتر لیکگ۔ ساچستی ھیال ءُ لیکہ ءَ چہ زبھر بوگ، ھما گپ کہ استان ءُ آئی ءِ اداراھاں گوشتگ اَنت آیاں بے جُست ءَ راست منّگ۔ وتسریں تُرسے ءِ آماچ بوگ، راست گُشگ، جُست کنگ یا وتی راجی پجار ءِ سر ءَ پھر بندگ ءَ چہ تُرس ءِ آماچ بوگ۔ ایردستی ءِ سوب ءَ اتکگیں واری ءُ ھزابی ءَ بھت ءُ نسیب لیکگ۔ وتواکی ءُ ساچستکاری ءِ ھیا ھم زھن ءَ نہ بوگ۔ ایردستی کہ ھرچ مزھب ءُ کانود ءِ رِد ءَ ردین ءُ انسانی ھکانی لگتمالی ءِ زانگ بیت کہ اے ھما راستی اِنت چو روچ ءَ پدر اِنت بلے آئی ءِ ھلاپ ءَ گپ کنگ ءَ لپرزگ بوگ۔ راجی پجار ءُ وتی دود ءُ ربیدگاں چہ پشل بوگ۔ اے لھتیں درور اَنت کہ مردم پہ زانت یا نا زان ئے ھمے بیماریانی آماچ اَنت، اے رنگیں بیماری زھنی گلامی ءِ نام ءَ زانگ بنت۔

زھنی گُلامی پرچا بیمناک اِنت ؟
زھنی گُلامی پمیشکا بیمناک اِنت کہ آ انسان ءَ وتی جند ءِ ھلاپ ءَ اُوشتارین اِیت بلے آ انگت زانگ ءَ نہ بیت۔ پہ درور اگاں تو بیمارے ءُ تو زانگ ءَ ئے کہ بیماراں گڑا الم تو ڈاکٹر ءَ روئے ءُ وتی ھلاج ءَ کن ئے۔ بلے اگاں تو بیمار ئے ءُ تو سما ھم کنگ ءَ نہ ئے کہ تو بیمار ئے گڑا اے بیماری ترا چو وروک ءِ وڑ ءَ وران کنت ءُ وھدے کہ تو سما کن ئے گڑا تئی ھستیں پشت کپ اَنت ءُ تئی الاج ممکن نہ بیت۔ زھنی گُلامی چو شومک ءِ بیماری ءِ دروشم ءَ اِنت، تو بیمار ئے بلے تو زانگ ءَ نہ ئے، تو ایردست ئے بلے تو زانگ ءَ نہ ئے، تئی ھستانک ولگوج بوگ ءَ اِنت بلے تو زانگ ءَ نہ ئے۔ پمیشکا مارا انوں وتی مریزی درگیجگی اِنت۔ پمیشکا مارا انوں وتی زھنی گلامی ءِ دروشم زانگی اَنت ءُ وتی پگری ھوالہ ءَ الاج کنگی اِنت۔ پد ءَ چو مہ بیت کہ مئے ھست بوگ ءِ لھتیں روچ پشت بہ کپ اَنت ءُ ما نوکی سما بکنیں کہ مارا وتی دیری الاج کنگی بوتگ ءُ نوں مئے الاج ھچ ممکن نہ اِنت۔

ما زھنی گُلامی ءَ چہ چون رکّ اِت کنیں وت ءَ زھنی گُلامی ءِ وڑیں نادراھیاں چہ رکینگ ءِ ھاتر ءَ مارا اے بیماری ءِ جند وانگ لوٹ اِیت۔ زھنی گلامی زانگ لوٹ اِیت کہ آئی ءِ جِند چے یے، کُجا چہ اتکگ، پرچا ءُ چون اتکگ۔ ما چینچو اے بیماری ءِ آماچ بوتگ ایں؟ اے سرجمیں جُستاں وتی مجگ ءَ بکنان ءُ ایشانی جواب ءِ پٹّگ ءِ تچ ءُ تاگ ءَ بکناں۔ مارا اے بیماری ءِ الاج چہ کتاباں رس اِیت، مارا گیش ءَ چہ گیش گوں کتاباں نزیک بوگی اِنت۔ مارا ھما کتاب زورگی اَنت کہ مارا اے بیماری ءَ چہ کش اِت بکن اَنت ما چشیں کتاب ءِ وانگ پھریز بکن ایں کہ آ مارا گیش زھنی ھوالہ گلام کن اَنت۔ مارا ایردست ءَ وتی کتاب ءُ وانگ ءِ وسیلہ ءَ ایردست کُتگ گڑا آئی ءِ نبشتگیں کتاب ءُ آئی ءِ وانگ مارا گیشتر زھنی گلام جوڑ کن اَت۔ پمیشکا مارا انچیں کتاب وانگی اِنت کہ آ دگہ راجاں وت ءَ ایردستی ءُ زھنی گُلامی ءَ چہ آجو کنگ ءِ ھاتر ءَ ونتگ اَنت۔ مرچی بلوچ ورنایاں کتاباں گوں نزیکی کنگی اِنت دانکہ آ زانتکار جوڑ بہ بنت گڑا آ وت ءَ چرے بیماری ءَ کش اِت کن اَنت۔ یات بکن اِت:

“ھما روچ ءَ کہ یک راجے وتی گُلامی ءَ پجاہ بیار اِیت، ھمے روچ ءَ آئی ءِ آجوئی ءِ روچ بندات بیت۔”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

‏بے سما

شائر : کوھی بلوچ

دی بلوچستان پوسٹ

من ءُ تو ھَردو بے سَما
بے سَما چہ راج ءَ بزگیں
بے سَما چہ تِپلاں چورھیں
بے سَما چہ مات ءَ ھم وتی
بے سَما چہ گْوھاراں ماھلیں
بے سَما چہ جنگ ءِ ساھتاں
بے سَما چہ دُژمن ءَ وتی
بے سَما کہ آس روک بیت ھر دَمان
بے سَما کہ برات کُجا اَنت مئے؟
بے سَما کہ سنگراں ھون مَل اِتگ
بے سَما کہ سنگرانی پاسپان کُجا شُتگ؟
بے سَما
من ءُ تو ھَردو بے سَما
بے سَما اے اکسانی رنگ لگْوشت اَنت نوں
بے سما اے کتاب گوات ءَ رُپتگ اَنت دُرس
بے سما شَمُشتَگ گُشتِش تو گُلام مھمد ءِ
ءُ شیرل ءُ مُنیر ءِ تو
اے بے سمائی ایر بارت ترا
ءُ گار کنت ترا
او بے سَما اے جنگ پہ لج ءُ ننگ تئی
او بے سَما کدی کن ئے سَما…؟
ھما ساھت ءَ کہ جِند اُوں اَکسے بیت
یا تیر سُپتیں جونے بیت؟
تو ونتگ اَنت کِتاب لیلا ھالد ءِ چی ءَ گُڑا؟
کہ بے سَما، گُنگ ءُ کَرّ لیک اِتگ وت ءَ
ھیال ءَ گْور بہ کن اُو بے سَما
زمینے ھست ترا
اے زمین ءِ سربُر ءَ راجے ھست ترا
راج بزگ اِنت ءُ بے در اِنت
بے سما
من ءُ تو ھَردو بے سما

چونیں جیڑھے رُستگ باتن ءَ منیگ ءُ تئی
کہ ھرکس وت، وتی توار بہ بیت
ءُ ھرکس وت، وتی جون ءَ کل بہ کنت
من ءَ گوں کَس ءَ کار نیست
اے ھبر مجگ ءَ چونڈیت منی مُدام
او بے سَما! کدی سَما کن ئے؟
کدی اے گاریں مردماں تو پد جن ئے؟
کدی اے مات ءُ گْوھاراں کوپگے دئے؟
کدی اے رسترانی رستری ءَ جھان ءَ ھال دئے؟
کدی چہ واب ءَ بُست کن ئے؟
کدی اے سنگراں تو پاد ءَ ایر کن ئے؟
کدی اے گْواڑگاں تو وتیگ کن ئے؟
کدی تو اے کوھاں سر جن ئے؟
کدی اے سِنگ ءُ ڈوکاں تو وتیگ کن ئے؟
بلے من بے سَما
من ءُ تو ھَردو بے سَما
گُڑا بْیا
اے بے سَمائی ءِ پَسّہ ءَ دئیں
ءُ بے سَمائی ءَ گار کنیں
اے بے سمائی ءَ سَما کنیں
کہ ما بے سَما نہ اِیں
ءُ ناکہ بے سما بہ اِیں