TBP Balochi

جارج آرویل ءِ کتاب “1984” ءِ سرجمیں چمشانک

نبشتہ کار: احمیداللہ

دی بلوچستان پوسٹ

“1984” یک ھیال ءُ لیکھے کشّوکین ءُ زھرناکیں آزمانکے کہ آئی ءِ تہ ءَ ڈسٹوپیائی آیوکیں وھد ءِ اکس کشی کنگ بیت کہ اود ءَ سرکار وتی شھریانی سر ءَ سرجمیں کنٹرول ءَ دار اِیت۔ اے کسہ اوشیانا ءِ تہ ءَ جوڑ کنگ بوتگ کہ یک مطلق العنانیں چاگردے کہ اود ءَ پارٹی ءِ سروکی ءَ یک مردمے ءِ نام ءَ زانگ بیت کہ آ مردمانی زند ءِ ھر تک ءُ پھنات ءِ سر ءَ سرجمیں کنٹرول ءَ کنت۔

اے آزمانک ونسٹن اسمتھ ءِ کسہ ءِ سر ءَ اِنت کہ آ پارٹی ءِ کم رُتبہ ءِ باسک اِنت ءُ آ وزارت راستی ءَ کار کنت ءُ پارٹی ءِ نظریہ ءِ رد ءَ راجدپتری ریکارڈاں رد کنت۔ ونسٹن پارٹی ءِ وانینگانی سر ءَ جُست ءُ پُرس کنگ ءَ بندات کنت ءُ گُڈسر ءَ سرکار ءِ ھلاپ ءَ بغاوت کنت ءُ گوں وتی ھمکار جولیا ءَ ناجاھزیں مھرے بندات کنت۔

ونسٹن ءُ جولیا ءِ بغاوت ءِ گیش بوگ ءَ گوں آ پارٹی ءِ ھاتر ءَ گیشتر ءُ گیشتر ھترناک بنت ءُ گُڈسر ءَ آ گپتگ ءُ مھر ءِ وزارت ءَ برگ بنت ءُ اود ءَ آیاں جسمانی ءُ نپسیاتی ٹارچر کنگ بیت۔ ناول ءِ سر ءَ پارٹی ءِ ھما زور ءِ سردیں ندارگ اِنت کہ آ چہ درستاں گیشتر پرازمیں مردم ءَ ھم ٹُکّر ٹُکّر کنت۔

“1984” ءِ یک زبردستیں تبکے ایش انت کہ آئی ءَ مطلق العنان ءِ خاطراتانی پٹ ءُ پول کتگ۔ آرویل ءَ اے گپ پدر کتگ کہ یک ھکومتے کہ وتی شھریانی سر ءَ سرجمیں کنٹرول ءِ واھند اِنت آ انفرادی آجوئی، آزاتیں بگر ءُ انگت ءَ مھر ءَ ھم ھلاس کنت۔ پارٹی ءِ نعرہ “جنگ امن اِنت، آجوئی گلامی اِنت، جھالت زور اِنت” یک زبردستیں مسالے کہ زبان ءَ را مردمانی ھیالانی کنٹرول کنگ ءِ ھاتر ءَ دستکاری کنگ ءِ راہ ءُ درانی یک زبردستیں مسالے ۔

اے آزمانک ءِ تہ ءَ پروپیگنڈا، سنسر شپ ءُ راجدپتر ءِ ھرابکاری ءِ ھترھانی سر ءَ ھم تبصرہ ھوار اِنت۔ پارٹی اے وسیلھاں پہ راج ءِ راہ ءِ جوڑ کنگ ءُ اختلاف ءِ سرکوب کنگ ءَ کارمرز کنت ءُ یک انچیں چاگردے جوڑ کنت کہ اود ءَ مردم پہ وت جیڑگ ءَ ترس اَنت۔

سرجمیں آزمانک ءِ تہ ءَ آرویل ءِ نبشتانک زندگ، زوراک ءُ ھُشک کنوک اِنت۔ آئی ءِ یک انچیں چاگردے ءِ پیشدارگ کہ آ چہ درستاں گیشتر ھمگرنچی ءَ ارزشت دنت، چہ درستاں گیشتر چہ ءُ ھیال ءِ کشّگ ءِ سبب اِنت۔ ناول ءِ سرکاری کنٹرول، انفرادیت ءِ گار ءُ بیگواھی ءُ بے رھبندیں اقتدار ءِ ھترھانی بنگپ مرچی ھم ھما وڑ ءَ ھست اَنت کہ آ وھد ءَ کہ کتاب اولی رند ءَ چاپ بوتگ اَت۔

سرجمی ءَ “1984” ڈسٹوپین افسانہ ءِ یک شاھکارے کہ آ یک گرانیں وانگ ءُ مطلق العنان ءِ خطراتانی بابت ءَ یک طاقتوریں ھُشدارے ءِ دوئیں دروشم اَنت۔ اے یک انچیں کتابے کہ ترا انفرادی آجوئی ءِ اهمیت، آزاتیں پکر ءُ سرکاری کنٹرول ءِ ھترھانی بابت ءَ جیڑگ ءَ لاچار کنت۔ اگاں شما فلسفہ، سیاست یا ڈسٹوپین فکشن ءِ تہ ءَ دلچسپی دار اِت گڑا “1984” یک المی وانگ ءِ کتابے کہ کتاب ءِ آسر کنگ ءَ چہ بازیں وھدے ءَ پد شمارا جیڑگ ءَ یلہ دنت۔

کتاب ءِ اثر سک باز انت ءُ ایشی ءِ بنگپ ءُ ھشدار مرچی ھم ھست اِنت۔ اے مئے آجویانی رکینگ ءِ ، تنقیدی سوچ ءِ دیمروئی ءِ ءُ سرکاری اقتدار ءِ بابت ءَ ھوشیار بوگ ءِ ھاتر ءَ یک یاد دیانی یے ۔ “1984” یک کلاسکیں آزمانکے کہ آیوکیں نسلانی وانگ ءُ زانگ ءَ دیم ءَ روان کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

مروچی بلوچستان ءِ بنجاھی شھر شال ءَ ھواریں دمگ مارگٹ ءَ ناشناسیں مردماں پاکستانی پوج ءِ کاروان ءِ سر ءَ یک بمب اُرشے بیتگ ات-

سیکورٹی بنشون ءِ رد ءَ بمب اُرش ھما وھد ءَ کنگ بیتگ کہ پوج ءِ بمب ڈسپوزل کاروائی کنگ بیتگ کہ ناشناسیں بمب تراکے کتگ-

دومی نیمگ ءَ بلوچستان ءِ آجوئی ءِ سلاہ بندیں گل بلوچ لبریشن آرمی ءِ جارکش جیئند بلوچ ءَ اُرش ءِ زمہ واری منان ءَ گوشتگ کہ اے اُرش ءَ پوج ءِ کاروان ءِ گاڑی آئی ای ڈی بمب اُرشے ءِ نشانگ کتگ ءُ چریشی ءَ گاڑی ءَ سواریں دَہ کارندہ جاہ پہ جاہ ءَ مرتگ انت-

بی ایل اے ءَ گوشتگ اے سوبمندیں اُرش ءِ زمہ واری ءَ بلوچ لبریشن آرمی من ایت ءُ تچک کنت کہ زورگریں پوج ءِ ھلاپ ءَ مئے گھگیری کاروائی ترندی ءَ گوں برجاہ بنت اِنت-

اے اُرش ءَ کشگ بیتگیں لھتے کارندھانی پجار دیم ءَ اتکگ کہ آیانی تہ ءَ سوبیدار شھزاد امین، نائب سوبیدار عباس، سپاھی خلیل، سپاھی زاھد، سپاھی خرم سلیم ءُ دگہ ھوار انت-

بی ایل اے ءِ اُرش بلوچستان ءَ لھتے وھدانی توک ءَ بازیں کساسے ءَ ترندی ءَ گندگ بیگ ءَ انت –

زانتکارانی گوشگ انت بی ایل اے ءَ وتی ترندی اُرشانی توک ءَ ھمے پدر بیت اِنت کہ بی ایل اے پاکستان ءِ ھلاپ ءَ جنگی تکانی توک ءَ مزنیں دگری ءَ زانگ بیت کہ آئی ءِ توک ءَ سلاھیت ھست کہ آ دمگ ءَ ھرچ وڑیں اُرش بہ لوٹ ایت آ کت کنت اِنت-

ڈاکٹر ماہ رنگ بلوچ، شاہ جی صبغت اللہ، بیبرگ بلوچ، بیبو بلوچ ءُ گلزادی بلوچ کہ بلوچ یکجھتی کمیٹی ءِ بنجاھی رھشون ءُ سرگرم سیاسی باسک انت، اے وھد ءَ 3 ایم پی او ءِ پُشدر ءَ شال ءِ ھدہ جیل ءَ زندان انت ءُ گوستگیں چہ دو روچ ءَ یکشل ءَ شُد ءِ زھرشانی ءَ سر ءَ انت۔

اے شُد ءِ زھرشانی چہ ریاستی ادارھانی نیمگ ءَ برجا بدتریں لٹ ءُ کُٹ، بے رھبندی ءَ بندیگ ءُ انسانی ھکانی ءِ ھلاپ ءَ سر زاھری ءِ گھگیری ءِ چیدگ ءَ درا کنت۔

اے رھشون ھما وھد ءَ زندان ءَ بندیگ کنگ بوت اَنت، وھدے آ زورانسری گار ءُ بیگواھیانی، آمیدگسی بے راہ ءُ رھبندانی کُش ءُ بلوچ راج ءِ سر ءَ یکشل ءَ بوتگیں زُلم ءُ زوراکی ءِ ھلاپ ءَ ماں شال ءَ پُرایمنی زھرشانی کنگ ءَ بوتگ اِت انت۔

بی وائی سی ءِ برجا بوتگیں بیان ءِ رِد ءَ زندان ءَ رھشوناں مجگی ترندی ءُ جسمانی لٹ ءُ کٹ ءِ نشانگ جوڑ کتگ آیاناں سی ٹی ڈی کارندھاں ءُ زالبول پولوس اپسر زرغونہ ترین ءِ دلگوشی ءَ بے بُرّیں زُلم ءِ دیمپان کنگ بوت انت ءُ آیاناں کُشگ ءِ بیھار دیگ ھم بوت۔

ماہ رنگ بلوچ، بیبو بلوچ اور گلزادی بلوچ ءِ وکیلءُ کھولانی درگت ءَ آیانی جسم ءِ سر ءَ ٹپ ءُ ٹوری ءِ نشان سھرا اَنت ءُمِلّگ ءِ ساھت ءَ دیستگ اَنت ، بیبرگ بلوچ ءُ شاہ جی صبغت اللہ ءِ سر ءَ ھم ریاستی ادارھانی نیمگ ءَ یکشل ءَ زور ءُ زوراکی ءُ در انسانی کار برجا انت۔

بی وائی سی ءَ جھانی انسانی ھکّانی ادارھاں، میان اُستمان، زالبولانی جھانی گل ءُ چہ سول سوسائٹی اپیل کُت کہ آ ھما سیاسی باسکانی زندگی ءِ پھریزگ ءِ ھاتر ءَ جوانی ءَ کرد ءَ پیلو بکن انت۔ گل ءِ گْوشگ اِنت کہ بس تَھنا گلوکوز یا ڈیکسٹروز ءِ آپ دیگ جاندراھی ءِ ھساب ءَ ھترناک انت۔ ءُ اے شُد ءِ زھرشانی ءِ ساناں ھلاس کنگ ءِ ھاتر ءَ دلجم نہ انت۔ اے شُد ءِ زھرشانی یک دلگوشیں ھوپے ءَ انسانی تباھی ءِ نیمگ ءَ برگ بوگ ءَ اِنت۔

گل ءَ تچک ءَ گُشتگ کہ آ رھشونانی جاندراھی یا جان ءِ انچیں ھم تاوان رست گڑا ایشی ءِ سرجم ءَ زمہ واری ریاست پاکستان، زندان ءِ اپسر ءُ بلوچستان ءِ انتظامیہ ءِ سر ءَ بیت۔

بلوچ یکجھتی کمیٹی ءَ اے ھم گُشت کہ اے تھنا بس یک گلے ءِ جیڑہ نہ انت بلکہ بلوچ راج ءِ بقا، شرپ ءُ ازت، ھکِ زندگی ءِ جنگ انت، ریاستی زورانسری ءُ چہ لٹ ءُ کٹ ءَ پرامن جدوجہد کو ختم نہیں کیا جا سکتا، ہم اپنے اس پرایمنیں زھرشانی ءَ را جھانی نمیگ ءَ برگ بیت انت تاکہ دنیا بگند اِیت کہ پاکستان ءَ بلوچ لس مھلوک ءِ گوم ءَ چے چے بیگ ءَ اِنت۔

نمدی یے پہ وتی مکّھیں مات ءَ

نبشتہ کار: کوھسار کندیل

دی بلوچستان پوسٹ

دْروت ءُ دراہ بات ئے امّا جان، اُمیت کناں تو وش ءُ جوڑ ئے ،بگند ئے گمیگ بہ بہ ئے۔۔ بلے گمانی سَگگ ماتانی مستریں ھُنر اِنت۔ من نہ زاناں تو اے درد ءُ دوراں اوپار کنگ ءَ ئے باریں چُنت سال اِنت تو من ءَ نہ دیستگ، ءُ من ھم ترا نہ دیستگ۔ مئے میان ءَ اے دُوری باریں داں کد مان اِیت، بلے تلوسگ چہ دوئیں دیماں، یکیں کساس ءَ اِنت۔ تو وَ ماتے ئے زاھر اِنت چو جیڑ ئے کہ منی بَچ باریں چون اِنت۔۔ ورگ ئِے دل ءَ کیت، وپس اِیت واب کپ اِیت؟ گَل اِنت؟ بچکند ءُ کندگ زانت؟ سرجاہ ھست اود ءَ یا وتی سستگیں چَوٹّاں سر ءِ چیر ءَ کنت؟ امّا من زاناں تو پہ منی آسودگیں سورت ءَ تلوس ئے۔۔۔بلے من پہ تئی سورت ءِ آسودگی ءَ دست ءُ پاد جنگ ءَ آں۔

مُدّتے بیت کہ من چہ تئی چماں چہ اندر آں، بہ گند ئے تو پاس جن ئے ءُ من ءَ گیر کار ئے کہ بازیں درد ءُ اندو تو پہ منی دُوری ءَ کمایگ ءَ ئے۔ زاناں کہ تئی دست ءِ تزبی ءِ مُھرگ نوں رنگ یل دیگ ءَ اَنت کہ مدام من ءَ جیڑ ئے ءُ گریو ئے، پد ءَ دل تئی کودکے کہ دوا اِنت سھتکیں ارس ریچ اِیت گُش ئے مات مرات(بلوچ ءِ مات چک ءِ گماں یا مرگ ءَ وتی کنت) بہ گند ئے پہ من ءَ اے چیزُوکے سال بوت کنت، بلے تو ماتے ئے پہ ترا اے دُوری کرنے ءَ چہ ھم گیش اَنت، تئی مھرانی یک پاسے ءِ ھک ھم من پیلو کُت نہ کُتگ۔

زندگی ءَ ھر انسان ءِ وتی مارشت بنت وتی واب بنت، یک گُھارے پہ برات ءَ ھزار واب گند اِیت انچو یک ماتے ھم وتی بدن ءِ ٹُکّر ءَ پہ وتی چُک ءَ ھزاراں واب گوں آگھیں چماں گند اِیت۔ من کہ چہ تئی دلبند ءَ ساہ زورگ بندات کُتگ داں گُلزمین ءَ وتی پاد دَور داتگ اَنت، بازیں جاھاں تئی دُوری، تئی مھر، تئی ودار دُرست مار اِتگ اَنت، زمین ءِ ھر رنگ ماتی تئی چھرگ ءَ جنت، من کہ چہ دوریں سپراں واتر اَتکگ آں گلزمین ءِ دلبند ءَ سَر ایر کتگ، منی دمبرتگیں ھر بند بند ءَ تئی مھر مارِ اِتگ اَنچو تئی مھرانی وڑ ءَ گلزمین ءَ وتی دلبند سر ءَ من ءَ اَمبازاں زُرتگ ءُ لیلو داتگ۔

ماتی تئی مھر ءِ رنگ ءَ گلزمین ءَ اَبید کس نہ جنت، مرچی ساہ دستانی دل ءَ کُتگ بس پہ ھمے مھرانی رکینگ ءَ کہ ھچ درآمدے ءِ پاد مئے ماتین گلزمین ءِ دلبند ءَ ایر مہ بیت ھما گلزمین کہ ھما من ءَ ترا گوں ھوار دُرستاں وتی اَمبازاں جاگہ دَنت۔ماتی! جنگ ایر بارت من ءَ، من ءَ گوں ھوار تئی دُرستیں واباں، بلے جنگ اِنت کہ ما ھست اِیں، جنگ اِنت کہ مرچی من تئی یک یک مھر ءَ مارگ آں۔

ماتی من کہ وھدے تئی بان ءِ پیژگاہ ءَ سر باں وتی سر ءِ چادر ءَ منی دیم ءَ ایر بکن، من پہ تئی مھر ءِ وشبو ءَ باز تلوستگاں، پد ءَ وتی دست ءَ منی پیشانی ءِ سر ءَ ایر کن، من ءَ لیلو بدے وتی زانسراں چہ من ءَ واب گیج ءُ گلزمین ءِ دلبند ءَ ایر کن، بس ماتی دُوا کن کہ تئی بچ داں گڈّی ساہ ءَ وتی پرز ءَ پیلو کُت بہ کنت ءُ مدام چو البرز ءِ کوہ ءَ مھکم بہ بات، دگہ منی نیمگ ءَ سلامتی اِنت، مرچی ماھکانی اِنت ءُ دُور چرتانی توار اِنت، ءُ گْوات نرم نرم ءَ کشگ ءَ اِنت، اے سھت ءَ من چہ ترا اجازت لوٹاں کہ من لھتے ھمراھانی پانپایاں ءُ آ پہ منی آگاھی ءَ واب اَنت۔

تئی ءُ گُلزمین ءِ بَچ
کوھسار قندیل

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

پاکستانی ریاست را رھشونانی زندگی ءِ یا سِھت ءَ رسوکیں کجام وڑیں تاوان زمہ وار سر ءَ دیگ بیت- بی وائی سی

شال بلوچ یکجھتی کمیٹی ءِ بُنجاھی رھشون ڈاکٹر ماہ رنگ بلوچ، شاہ جی بلوچ، بیبرگ بلوچ، گلزادی بلوچ ءُ بیبو بلوچ ءَ بندیگجاہ برجاھیں ریاستی زوراکی ءِ ھلاپ ءَ شُدکشیں ھڑتال بندات کتگ-

بی وائی سی ءِ شنگ کتگیں درشان ءِ تہ ءَ گْوشتگ کہ اے سرجمیں مردم پُرایمنیں سیاسی کارکن اَنت کہ آ تھنا ھمے سبب ءَ چہ بندیگ کتگ اَنت کہ آیاں زورانسری آوار جنی، درکانودی کوش ءُ بلوچ راج سر ءَ برجاھیں ریاستی زوراکی ءِ ھلاپ ءَ توار چست کتگ-

درشان ءِ تہ ءَ گْوشتگ کہ اے کارکنانی یکیں جرم اِنت کہ اے یک انچیں ماھولے ءَ کہ ریاستی ناشرکاری ءُ زُلم ءَ چہ سر ریچ اِنت پُرایمنیں جُھد کنگ ءَ اِنت، بلے اشی ءَ اَبید ریاست وتی سرجمیں تاکت ءِ گوم ءَ آیانی سر ءَ اُرشکار اِنت دروگیں ایف آئی آر، درکانودی دزگیری، پُرایمنیں زھرشانیانی سر ءَ لَٹ ءُ کُٹ ءُ تیرگواری، نو بندیگجاھانی تہ ءَ بدتریں زوراکی کنگ ءَ اِنت-

درشان ءِ رِد ءَ بندیگجاہ ءَ ساڑی رھشونانی شُدکُشیں ھڑتال ءَ چہ اے زُلم ءِ ھلاپ ءَ گُڈی ھد ءَ تاں گھگیری ءِ شور کتگ، آیانی سِھت ءُ زندگیانی ھترہ ءِ تہ ءَ اِنت ءُ آیانی سر ءَ کجام وڑیں جسمانی یا سسّائی تاوان ریاست پاکستان سرجمی ءَ زمہ وار اِنت-

بی وائی سی ءَ بلوچ راج، انسانی ھکانی مردم، ءُ میان اُستمانی ادارھاں چہ دزبندی کتگ کہ آ اے جُھد ءِ گوم ءَ یکجھتی ءِ درشان بہ کن اَنت، اے تھنا یک تھریرے نہ اِنت بلکیں رکینگ ءُ شرپ ءُ وجود ءِ جنگ اِنت-

زانگ بہ بیت کہ گوستگیں روچ ءَ ھدہ بندیگجاہ ءَ بندیگ بلوچ یکجھتی کمیٹی ءِ زالبولیں رھشون ماہ رنگ بلوچ ، بیبو بلوچ ءُ گلزادی بلوچ سر ءَ کاؤنٹر ٹیررازم ڈپارنمنٹ ءِ آپیسرانی نیمگ ءَ چہ بندیگجاہ ءَ تُرندیں لَٹ ءُ کُٹ ءُ آوار جنی ءِ ھال سر بیتگ، وھدے کہ پوج انتزامیہ اے میان ءَ بی وائی سی باسکانی جنگ بیھار ھم دیگ بیتگ-

ھدہ بندیگجاہ ءَ بندیگ بیبو بلوچ سی ٹی ڈی ءَ نیمگ ءَ چہ آوار جنگ ءُ پد ءَ لَٹ ءُ کُٹ ءَ پد دیم ءَ آرگ بیتگ چریشی ءَ پد پولیس ءِ بندیگی ءَ ساڑی سرجمیں رھشوناں شُدکُشیں ھڑتال جار جتگ-

ڈاکٹر ماہ رنگ بلوچ، بیبو بلوچ ءَ ھوار دگہ بی وائی سی رھشون تھری ایم پی او ( 3MPO) ءِ رِد ءَ یک ماھے ءَ چہ گیش مدتے ءَ چہ ھدہ بندیگجاہ بند کتگ، ءُ آیانی زمانت ءِ دزبندی بلوچستان ھائی کورٹ نیمگ ءَ چہ رد کنگ بیتگ-

بلوچستان ءِ مگ مچھ ءُ بولان ءَ ھمگرنچیں دمگاں پاکستانی پوج نیمگ ءَ چہ لشکر کشی ءِ ھال اِنت، اے دمگاں پوجی ھیلی کاپٹر بُرز ءَ گندگ بیتگ اَنت-

گیشیں ھالانی رِد ءَ بلوچستان ءِ دمگ مچھ گیشتری ءُ کش گوراں مزنیں کچے ءَ پاکستانی پوج ءِ تر ءُ گرد ءِ ھمراھی ءَ دمگ ءَ گشت ءُ لشکر کشی کنگ بیگ ءَ اِنت وھدے کہ بُرز ءَ ھیلی کاپٹرانی گشت گندگ اتکگ اَنت-

پوج نیمگ ءَ چہ گیش تھی دمگ ءُ کوھی نیمگاں پیشگامی ءِ ھال اِنت، وھدے کہ انٹرنیٹ ءُ موباھل سروسز ءِ کمی ءِ سبب ءَ ھالانی سر بیگ ءِ دلسیاھی ءِ دیمپانی اِنت-

دمگی اِھوالکار رِد ءَ اے میان ءَ پوج ءَ جتاجتائیں راھانی سر ءَ ناکہ جتگ راہ بند کتگ اَنت، راھانی بندی ءِ سبب ءَ دمگی مردم دلسیاھی ءِ دیمپانی کنگ کپگ ءَ اَنت وھدے کہ ھال اھوالی نزام ءِ بندی ءِ سبب آ وتی سیادانی سلامتی ءِ درگت ھچ وڑیں سرپدی رسگ ءَ نہ اِنت-

زانگ بہ بیت کہ بولان مچھ دمگاں پاکستانی پوج نیمگ ءَ چہ گیشتر وھداں لشکر کشی ھال سر بیتگ، بلے مروچی بندات بیتگیں لشکر کشی ءِ درگت ءَ صوبائی واکدار ءُ پوج نیمگ ءَ چہ ھچ وڑیں سرپدی دیگ نہ بیتگ-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ سرمچاراں زامران، کولواہ ءُ کلات ءَ سے جتاجتائیں اُرشاں چہ زورگریں پاکستانی پوج نشانگ کتگ – اے اُرشاں ریموٹ کنٹرول آئی ای ڈی ءُ تچکی ءَ سلاہ بندیں کاروائی ھوار بیتگ اَنت، وھدے کہ لھتے ھندانی سر ءَ پھازوکی چوکیانی سر ءَ دستیگ ھم کتگ-

جارکش ءَ گْوشتگ کہ بنداتی کاروائی ءَ، بی ایل اے ءِ سرمچاراں زامران ءِ دمگ تگران، وکائی ءَ زورگریں پاکستانی پوج ءِ کاروان ءَ ھوار یک ٹرکے ریموٹ کنٹرول آئی ای ڈی اُرش ءَ نشانگ کتگ- تراک ءِ آسر ءَ دُژمن ءِ چار کارندہ جاہ پہ جاھی مرتگ اَنت ءُ کم چہ کم چار دگہ ٹپی بیتگ اَنت، وھدے کہ ٹرک سرجمی ءَ تباہ کتگ-

جارکش ءَ گْوشتگ کہ دومی کاروائی گوستگیں شپ ءَ کولواہ ءِ دمگ رودکان ءَ رود ءِ ھند سر ءَ کنگ بیتگ، اود ءَ سرمچاراں زورگریں پاکستانی پوج ءِ بُنجل سر ءَ مزنیں سلاھاں چہ اُرش کتگ – اے اُرش ءَ دُژمن ءَ جانی تاوان چست کنگ کپتگ، وھدے کہ سرمچاراں بُنجل ءَ پٹ کتگیں چاریگی کیمرہ نشانگ کتگ ءُ تباہ کتگ –

جارکش ءَ گْوشتگ ک سیمی کاروائی دوشمبے ءِ شپ ءَ کلات ءِ دمگ شیخڑی، موڑگند ءِ ھند سر ءَ کتگ، اود ءَ سرمچاراں یکیں وھد ءَ پوجی پوسٹ ءُ پھازوکی چوکیانی سر ءَ نوکیں وتکاریں سلاہ ءُ راکٹاں چہ اُرش کتگ- اے اُرش ءَ دُژمن ءِ سے کارندہ مرتگ اَنت، وھدے کہ کم چہ کم ھشت کارندہ تتکگ اَنت، آیانی تہ ءَ ٹپی ھم ھوار اِنت-

جارکش ءَ گْوشتگ کہ اُرش ءِ میان ءَ دُژمنیں پوج ءِ کمک ءِ واستا دمگ ءَ پیشگامی جُھد کتگ، بلے سرمچارانی اُرش ءَ آ گیش جانی تاوان چست کنگ کپتگ-

درشان ءِ گُڈی ءَ گْوشتگ کہ بلوچ لبریشن آرمی اے سرجمیں کاروائیانی زمہ واری ءَ منّ اِیت-

مکران ءِ وکیلانی گلاں ھدہ بندیگجاہ ءَ شال ءَ بندیں بلوچ زالبولانی سر ءَ لَٹ ءُ کُٹ ءُ بیبو بلوچ ءِ سی ٹی ڈی دست ءَ بندیگجاہ ءَ چہ آوار جنی ءِ ھلاپ ءَ مروچی، بیست چار اپریل ءَ سرجمی ءَ آمیدگسی دزکشی برجاہ ءَ اِنت-

مکران ھائی کورٹ بار ایسوسی ایشن، کیچ بار ایسوسی ایشن، گوادر بار ایسوسی ایشن، ءُ پنجگور بار ایسوسی ایشن ءِ نیمگ ءَ چہ شنگ کتگیں یک یکجاھی جارے ءَ گوشگ بیتگ کہ ھدہ بندیگجاہ ءَ ڈاکٹر ماہ رنگ بلوچ، گلزادی بلوچ ءُ بیبو بلوچ سر ءَ ریاستی ادارھانی نیمگ ءَ چہ لَٹ ءُ کُٹ تُرندی ءَ ایر جتگ-

جار تہ ءَ بی وائی سی ءِ رھشون بیبو بلوچ ءِ سی ٹی ڈی ءِ دست ءَ بندیگجاہ ءِ تہ ءَ آوار جنی درکانودی ءُ ناکابل کنان ءَ گْوشتگ کہ اے گامگیج انسانی ھکانی تچکی ءَ ھلاپ ورزی اِنت-

جار ءَ مروچی بیست چار اپریل ءَ سرجمیں مکران آمیدگسی کاوائی سرجمی ءَ دزکشی کتگ ءُ زھرشانی جار جنان ءَ ھمگرنچیں واکدار کڈن کتگ اَنت کہ بلوچ زالبولانی ھلاپ ءُ درکانودی ءُ زوراکی گامگیج ءَ چہ بہ سُدر اِیت، اگاں ناں دگہ وکیلانی گلانی تُرند ءَ چہ تُرندتریں گامگیج زیرگ ءِ لاچار بہ ایں، چریشی ءِ زمہ وار ریاستی ادارھانی سر ءَ بیت-

‏‎کوہ، تھنائی ءُ دل ءِ توار

نبشتہ کار: سدو بلوچ

دی بلوچستان پوسٹ

‏‌‌‎شپ ءِ تھاری ءُ کوھانی ھاموشی ءَ یک سرمچارے ءَ جیڑگانی گرنچ بوتکگ اَت ءُ تھنا نشتگ اَت۔ آئی ءِ راستیں آستونک ءَ چہ ھون ترمپ ترمپ ءَ آئی ءِ چَوٹانی سر ءَ رِچگ ءَ اِت اَنت۔ آئی ءَ تیرے وارتگ ‏‎اَت ءُ ٹپیگ اَت۔

‏‎ دمانے ءَ پیسر آ یک جنگی مشنے ءَ چہ واتر بوتگ اَت ءُ وتی بُنجل ءَ اَتکگ اَت۔ جنگ ءِ ھون ءُ ارس انگت آئی ءِ چمانی تہ ءَ چول جنان اِت اَنت ءُ نا شُناسیں دردے کرار کرار ءَ آئی ءِ دل ءَ سر جنان اَت۔ آئی ءَ جنگ ءَ یک بے مٹ ءُ بے مُلیں سنگتے گار کتگ اَت، آئی ءِ بے ساھیں جون ءَ، آ چہ اندر ءَ ژانبلینتگ اَت ءُ بے چاڑ ئِے کتگ اَت۔

‏‌‌‎سرڈگار ءِ آجوئی ءِ جنگ ءِ سپر گران اِنت بلے برجاہ اِنت۔ اے سپر ءَ ‏‎ھزار وشّی ءُ سکّی ھست۔ ھمک سھت ءُ دمان جنگول ءُ سرمچارے ءَ وڑ وڑیں جاوراں گوں دیمپان بُوگی اِنت بلے زمین پھازگی اِنت ءُ رکّینگی اِنت۔ نگیگیں جاور وتی ھک ءَ آرگی اَنت ءُ دژمن ءَ پہ وتی زمین اَنچو تنگ کنگی اِنت کہ آ مجبور ءُ لاچار بہ بیت ءُ تئی زمین ءَ یل بہ دَنت ءُ بہ روت۔ ھمک سرمچار اے گپ ءَ شر زانت کہ آئی ءِ گچین کُتگیں راہ آئی ءَ میتگ ءَ ھچبر واتر کنگ ءِ موہ ءَ نہ دنت گوریلا جنگولے ءِ بستار ءَ نوں آئی ءِ پشکپتگیں زند ھمے جھد ءِ بھر جوڑ بوتگ ءُ واتر بوھگ ءِ واھگ آئی ءِ دل ءِ کُنجے ءَ کَل بوتگ اَنت ءُ آ شری ءَ سرپد اِنت کہ واتری ءِ راہ نیست؛ مَرگ بِیت یا شھیدی نسیب ءَ بِیت بلے واتری نہ بیت۔ اے جاوراں ھم آئی ءِ دل ایمن ءُ مھکم اِنت ءُ پگری رنگ ءَ اَنچو تیار اِنت کہ آجوئی ءُ سوبمندی مئے بِیت۔ آئی ءِ ھاٹیگ برجم اِنت ءُ ایمان سرجم اِنت پہ مکھیں ڈیھ ءِ آجوئی ءَ۔‏‎کوہ ءِ ٹُل ءَ سارتیں کوش آئی ءِ سینگ ءَ امباز اِیت ءُ اے دمان ءَ لھمیں کوش ءُ ماہ ءِ شیر چکیں رژن ءِ ساھگ آئی ءَ وتی میتگ ءِ گیراں دَنت۔ اے دمان ءَ آ وتی گْوست ءِ ترانگاں کپ اِیت ءُ دل ءَ کار اِیت ھما وھد ءُ نوبتاں کہ اود ءَ آئی ءِ کسانی ءُ زند گْوستگ۔ درستیں یات آئی ءِ مجگ ءِ سر ءَ پیوست اَنت ءُ دمان ءُ کترہ آئی ءَ یاتاں گیج اَنت۔ ھما نوبتانی کہ نوں واتر نیا اَنت۔ ءُ اے یات گْوست ءِ وشیں ساھت نہ اَنت بلکیں یک دردناکیں راستی یے؛ میتگ کہ کسانی ءِ کودکی ءُ مھر ءِ جاہ بوتگ ، نوں پہ آئی ءَ چہ وابے ءَ کمتر نہ اَت۔ بلے آ زانت کہ زمین ءِ جنگ ءَ باز چیز کُربان کنگی اِنت، لوگ، کول، میتگ، کسانی ءِ یات کُل کُربان کنگی اَنت ءُ دیمونی (کُربانی) ءِ مُز آجوئی اِنت۔ آجوئی بید ء دیمونی ءُ جنگ ءَ نہ رس اِیت۔ ءُ اے جاوراں کوہ آئی ءِ لوگ ءُ پناہ گاہ ءُ ھمراھیں سرمچار آئی ءِ برات اِت اَنت۔

‏‌‌‎آ وتی اندر ءَ بے دروریں جزبگانی جنگ ءَ مڑگ ءَ اِنت۔ آ ھیران بیت کہ انسان چوں پہ وتی ڈیھ ءَ وتی ساہ ءِ دیگ ءَ ھِچ چک ءُ پد نہ بیت۔ اے دیمونی پہ راستی آجوئی ءِ لیکہ ءِ اسر اِنت یا بس یک کُچل ءُ مارجنیں گواچنے کہ انسان وت ءَ اے جھان ءَ چہ اندیم کنگ ءَ راجدپتر ءِ بھرے جوڑ بیت؟ اے جُست کہ آئی ءِ دل ءَ ٹپّ ءُ ٹور کنت آ ایش اِنت کہ آجوئی یک لیکھے یا یک راستیں مول ءُ مرادے کہ آئی ءِ سرجم کنگ ءَ ھزاراں دیمونی دیگی اِنت۔ آئی ءِ دل ‏‎گوں ھر دِریکّگ ءَ نوکیں درد ءِ زیمر ءَ جنت۔

‏‎جنگ تھنا کوہ ءَ مِڑوکیں سنگتاں نہ بارت۔ جنگ یک لس مردمے ءِ زندگی ءَ گوں بستگیں ھمک واب، واھشت، ءُ وشّی ءَ ھم پچ گیپت۔

‏‌‌‎برے برے کہ آ کوھانی تہ ءَ تھنائی ءِ امباز ءَ نشتگ اَت ءُ وتی بے تاھیریں یاتانی تہ ءَ گار اَت، آئی ءَ سمّل یاد اتک۔ سمّل چہ کسانی ءَ آئی ءِ دشتار نامینگ بُوتگ اَت۔ آ دوئیناں یکّیں اسکول ءَ ونتگ اَت ءُ یکّیں کاپر ءِ چیر ءَ نشتگ ءُ لیب کُتگ اَت ۔ ‏‎آئی ءَ دل ءَ جیڑ اِت کہ “چہ مرگ ءَ پیسر باریں آئی ءَ پد ءَ گِنداں یا ھمے کوھانی تہ ءَ کَل باں؟ باریں وتی پیریں مات ءِ گندُک ءَ شُت کناں یا نہ کن آں؟ باریں ساہ در کپگ ءِ وھد ءَ منی چمّانی تہ ءَ گُڈّی اکس کئیگ بیت، منی مات ءِ؟ سمل ءِ؟ یا آجو ءُ آسودگیں سرڈگار ءِ کہ اود ءَ بلوچ ءِ ک٘وش، نود، جمبر، کوہ ءُ ک٘ور درچک ءُ دار ءُ مُرگ درست آزات بنت؟ یا گپّڑے تیر یکجاہ منی دل ءَ سُمبنت من ءَ پہ کسے ءِ گیر آرگ ءَ‌ ھچ موہ نہ دیَنت؟

‏‌‌‎جنگ، ھون ءُ دیمونی ءِ ندارگ آئی ءِ اندر ءَ شھزانتی ءُ مھکمیں پگرے ءِ سَوَب جوڑ بنت۔ آئی ءَ اے مارشت بیت کہ آجوئی ایوک ءَ یک لیکہ یے نہ اِنت بلکیں یک جزبگ ءُ دردے یک زمّہ داری یے کہ ھمک سرمچنڈ ءِ دل ءَ نندوک اِنت۔ آ وتی دل ءَ ھمے جُست ءَ کنت کہ جنگ ءِ پِڑ ءَ داتگیں درستیں دیمونی انسان ءِ مزنین ءُ آئی ءِ آجوئی ءِ شوھاز ءِ درشان اَنت؟ اے جُست آئی ءِ دل ءَ زندگ اِنت کہ اگاں مردے پہ وتی ڈیھ ءَ اِنچو دیمونی دنت گڑا آ وتی مھر ءُ وتی یاتاں چوں دیم ءَ برگ ءَ اِنت؟

‏‌‌‎اے ویرانیں کوھانی تہ ءَ آ نہ ایوک ءَ وتی جنگی تجربتاں مار اِیت بلکیں وتی جند ءِ تہ ءَ بوتگیں تھنائی ءِ اَکس ءَ ھم گند اِیت۔ آئی ءِ چمّ چہ تھنائی ءُ درد ءَ پُرّ اَنت ءُ آ ھر ساھت ءَ ھما گاریں وشّی ءُ مھر ءِ شوھاز ءَ گوازین اِیت کہ یک وھدے آئی ءِ دل ءَ جتگ اَت۔ آ ‏‎وتی اندر ءِ اے مارشتاں انچُش درشان کنت کہ گش ئے یکیں توار ءِ تہ ءَ ھَورے ءِ توار ودی بہ بیت ءُ مارا اے گپ ءَ گش اِیت کہ زند ءِ ارزشت ایوک ءَ دیمونی ءِ تہ ءَ اِنت۔

‏‎کوہ ءِ تہ ءَ نشتگیں اے گوریلا جنگول ءِ تہ ءَ جزبگانی کھریں دریا یے چول جنَگ ءَ اَت، ٹپ ءُ ٹوریں یات ژَندیں دِل ءَ گیشتر آزگ کنان اِت اَنت ءُ ھمے گشگ ءَ اِت اَنت کہ آجوئی ءِ نھاد سک گران اِنت۔ آ زانت کہ یک روچے آئی ءِ ڈیھ الم آجو بیت، ھما آجوئی کہ آئی ءِ ھاتر ءَ آئی ءَ گوں وتی بیل ءُ براتانی ھمراھی ءَ سر ندر کتگ اَنت۔ بلے نوں آ کوھانی تہ ءَ بے تواری ءَ نشتگ ءُ ارس مینتگیں یات ءُ ھیالانی تہ ءَ گار اَت ءُ ھما دنیا ءِ شوھاز ءَ اَت کہ آئی ءِ ھاتر ءَ بگندے وت ھچبر سرجم مہ بیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت –