TBP Balochi

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں شال ، ھوشاب ءُ مچ ءَ زورگریں پوج ءِ سے چاریگ ءُ کمکار کشتگ انت ۔

جارکش جیئند بلوچ ءَ گوشتگ کہ بی ایل اے ءِ سرمچاراں گوستگیں شپ ءَ مچ ءَ دربار ءِ ھوٹل ءِ نزیک ءَ زورگریں پاکستانی پوج ءِ کمکار نوید سمالانی جھمنند سمالانی کالونی مچ ءِ سرا ارش کتگ ءُ کشتگ ۔ اے مرد زورگریں پاکستانی پوج ءُ چیریں ادارھانی جوڈ کرتگیں کشندہ ٹولی ءِ باسک ءِ بوتگ ، کہ چاریگانی سروکی ءَ کنگ ءَ بوتگ ءُ کسان سالیں بچک کارمرز کنگ بنت ۔ اے ٹولی ءِ آیندگہ مردم وتی اے کار ءَ یل بہ کن انت اگاں ناں مئے نشانگ ءَ بنت ۔

جارکش ءَ گوشتگ کہ کمکار نوید سمالانی ءَ مچ ءَ گسانی سرا بیڑ برگ ، زالبول ءُ کماشانی کم شرپی ءُ ورنایانی زورانسری آوارجنی ءَ دست مان بوتگ وھدیکہ گوں زورگریں پوج ءِ ھمراھی ءَ مچ ءِ دگانی سرا مھلوک ملام ھم گپتگ ۔

جارکش ءَ گوشتگ کہ بلوچ لبریشن آرمی ءِ سرمچاراں گوستگیں شپ ءَ شال برما ھوٹل ءِ نزیک ءَ زورگریں پوجءُ ملٹری انٹلی جنس ءِ کارمند امیر داس ءِ پیار ءِ سرا ھم ارش کتگ ءُ آ کشتگ ۔ اے مرد ءَ وتی دروشم مٹ کتگ ءُ پہ زورگریں پوج ءُ چیریں ادارھانی ھاتر ءَ کار ءَ بوتگ ۔

جارکش ءَ گوشتگ کہ گوستگیں روچ ءَ بی ایل اے ءِ سرمچاراں گلام ء ابداللہ چہ ھوشاب ءَ دزگیر کتگ ۔ جست ءُ پرس ءِ وھد ءَ گلام ءَ دپ ءِ وت من اتگ کہ آ زورگریں پوج ءِ کارمند ئے ءُ اکتر سئید ءِ گوشگ ءِ پدا کارءَ بوتگ ۔

گلام ابداللہ ءَ دپ ءِ وت من اتگ کہ من بالگتر ، کولواہ ءُ ھوشاب ءَ زورگریں پوج ءِ لشکر کشیاں کمک کتگ ۔ آ سئید لاٹو اکتر ءُ آئی ءِ زھگانی ھمراھی ءَ بالگتر ءَ سرمچارانی سر ءِ ارش ءَ گون بوتگ کہ آودا میڑ ءَ یک سرمچار ءِ نمیران بوتگ وھدیکہ آیاں کولواہ ءِ دمگ جیرک ءَ دگ بستگ دو پرپت سوار نشانگ کتگ انت ۔

آئی ءَ گوشتگ کہ من اکتر سئید ءِ ھمراھی ءَ بالگتر ءَ ھم شتگاں کہ اودا گھرام ءِ سرا ارش کتگ کہ پدا رند ءَ اودا زورگریں پوج او ایم آئی ءِ کارمند ھم سر بوتگ انت ۔

جارکش ءَگوشتگ کہ آئی ءَ دپ وت من اتگ کہ ھوشاپ ءِ بازار ءُ کش ءُ گوری ھند ءُ دمگانی 35 مردمانی نام ایم آئی ءَ اکتر سئید ءَ داتگ انتئےکہ نشانگ کنگی بیتگ انت ءُ آئی ءَ پسٹل ءِ ھم دیگ بوتگ ۔

جارکش ءَ گوشتگ کہ گلام ابداللہ ءِ کتکاریانی سرا بلوچ راجی آمیدگس ءَ آ مرگ ءِ سزا داتگ کہ سرمچاراں آ کشتگ۔

بلوچستان ءِ دمگ کیچ ءِ ھند زامران ءَ سلاہ بندیں مردماں پاکستانی لشکر ءِ سر ءَ بازیں اُرش کتگ انت کہ ایشی ءِ تہ ءَ ریموٹ کنٹرول بمب تراک، سنگر گپتگین ءُ راشن پجارینوکیں گاڑیں سوچگ بیتگ انت-

ھالانی رد ءَ گوستگیں شپ ءَ زمران ءِ دمگ نیوانو ءَ ناشناسیں مردماں پاکستانی لشکر ءِ راشن پجارینوکیں گاڑی سوتکگ-

سلاہ بندیں مردماں مرچی ھمے جاہ سر بوتگیں پورسز ءِ کاروان ءِ سیکورٹی ءِ ھاتر ءَ کارندہ نشانگ جوڑ کتگ اَنت۔ ایشی ءَ پد پاکستانی اُرد ءِ کاروان ریموٹ کنٹرول بمب تراکے ءِ نشانگ جوڑ کنگ بوتگ۔

دمگی مردمانی رد ءَ تراک انچو مزن بوتگ کہ کاروان ءِ تہ ءَ ھواریں گاڑی سک باز تاوان بوتگ اَنت، وھدے کہ تراک ءِ توار دور ءُ دراج ءَ اشکنگ بوتگ۔

اے ھال ھم ھست کہ اے اُرشانی تہ ءَ پاکستانی لشکر ءَ بازیں کساسے ءَ تاوان رس اتگ انت۔

دومی نیمگ ءَ زامران ءِ دمگ دشتک ءَ موبائل فون ءِ ٹاور سوچگ بیتگ ایشی ءَ چہ رھوتی نزام ءَ تاوان بیتگ۔ دمگی اھوالانی رد ءَ اے ٹاور ءَ فورسز کارمرز کنگ ءَ بیتگ۔

انگت ءَ اے اُرشانی زمہ واری کس ءَ نہ زرتگ بلے گوستگیں وھداں ھم اے دمگاں پاکستانی پوج آجوئی لوٹوکیں گلاں نشانگ کتگ بیتگ-

بلوچ اسٹوڈنٹس آرگنائزیشن ءِ پیسریگیں چیئرمین ءُ نامداریں انسانی ھکانی جھدکار عمران بلوچ چار ماہ پیسر 3 ایم پی او (منٹینس آف پبلک آرڈر) ءِ چیر دستی ءَ بندیگ کنگ بوتگ ءُ چہ ھما وھد ءَ گڈانی جیل ءَ بند اِنت۔

کھول ءِ مردم ءُ انسانی ھکانی گلانی گوشگ انت کہ عمران بلوچ نہ ایوک ءَ زندان ءَ بنیاتی آسراتیاں چہ زبھر کنگ بوھگ ءَ انت بلکیں آ سکیں زھنی ءُ جسمانی ٹارچر ءِ آماچ انت۔

مردمانی رد ءَ گوستگیں چار ماھاں عمران بلوچ تنھا انت ءُ آئی ءِ کوٹی ءَ مار، زُم ءُ دگہ زھرناکیں جانور دست کپتگ اَنت۔

ھاندان ءِ گْوشگ اِنت کہ عمران ءَ 24 کلاک وتی کوٹی ءَ بند کن اَنت، کس ءَ آئی ءِ گند ءُ نند ءِ اجازت نہ دیگ ءَ انت ءُ آئی ءِ جان سلامتی ءِ بابت ءَ ھچ وڑیں ھال ءُ اھوال ھم دیگ بوگ ءَ نہ انت-

پد ءَ زندان ءِ رس اتگیں ھالانی رد ءَ عمران بلوچ ءَ شریِ وردن ءُ ساپیں آپ ءِ ورگ ھم دیگ بوھگ ءَ نہ اِنت۔ اے درستیں جاورانی دیم ءَ آرگ ءَ عمران ءَ دو روچ پیسر زھرشانی ءِ رد ءَ بھوک ھڑتال بندات کتگ۔

البت اے گپانی سر ءَ زندان ءِ کارمستر ءِ نیمگ ءَ چہ سرکاری رنگ ءَ ھچ وڑیں پسو دیگ نہ بیتگ-

مستونگ ءَ پاکستانی پوج لشکر کشی کنگ ءَ اِنت – دمگ ءَ گوستگیں روچاں لشکر کشی کنگ بیگ ءَ اِنت-

مستونگ ءِ دمگ آب گل ءُ کش گوراں پاکستانی پوج لشکر کشی کنگ ءَ اِنت- دمگی اِھوالکار رِد ءَ پوج ءِ پانزدہ گاڑیاں چہ گیش دمگ ءَ روگ ءَ گندگ بیتگ اَنت-

لشکر کشی ءَ کواڈ کاپٹر ءَ چہ بمب دور دیگ بیگ ءَ اِنت بلے تنی وھدے تاونانی درگت ءَ ھچ وڑیں ھال سر نہ بیتگ-

زانگ بہ بیت مستونگ ءُ کلات ءَ گوستگیں یک ھپتگے ءَ چہ پاکستان پوج لشکر کشی کنگ ءَ اِنت ءُ پیادگ کارندھاں بُرزی کمک ھم گون اِنت-

لشکر کشی میان ءَ جتاجتائیں ھندانی سر ءَ ھیلی کاپٹراں چہ شیلنگ ءُ کواڈ کاپٹر ءَ چہ بمب دور دیگ ءِ گپ سر بیتگ اَنت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ مروچی مئے سرمچاراں شکارپور ءِ ھند ھمائیوں شریف ءَ آئی ای ڈی بمب تراکے ءِ آسر ءَ جعفر ایکسپریس نشانگ کتگ-

جارکش ءَ گوشتگ ٹرین ھما وھد ءَ نشانگ کتگ کہ آئی ءَ پاکستانی پوج ءِ کارندہ سپر کنگ ءَ بیتگ انت – تراک ءِ آسر ءَ بازیں کارندہ مرتگ ءُ زدگ بیتگ انت ءُ ٹرین ءِ بازیں بوگی پٹری ءَ لگوشتگ انت-

جارکش ءَ گوشتگ اے اُرش ءِ زمہ واری ءَ بی آر جی من ایت ءُ اے دابیں اُرش بلوچستان ءِ آجوئی ءَ داں برجاہ بنت اِنت-

بلوچستان ءِ دمگ چہ کیچ ءَ پاکستانی لشکر ءَ یک مردمے آوار جتگ ءُ بیگواہ کتگ-

دشت ءِ دمگ درچکو ءَ یکشمبے ءِ شپ ءَ پاکستانی لشکر ءَ عدنان ء غفور دزگیر کتگ ءُ ناشناسیں جاھے ءَ برتگ ءُ چہ ایشی ءَ پد آئی ءِ بابت ءَ ھچ وڑیں ھال دیم ءَ نیتکگ انت-

زانگ بہ بیت کہ بلوچستان ءَ ھمک روچ زورانسری بیگواھی ءِ وئیل دیم ءَ آیگ ءَ اَنت۔

زورانسری بیگواھی ءُ بلوچ یکجھتی کمیٹی ءِ رھشونانی یل دیانگ ءِ ھاتر ءَ آیانی کھول دَہ روچاں گیش انت کہ اسلام آباد ءَ زھرشانی کنگ ءَ انت-

ھمے وھد ءَ کھولاں جتا جتائیں رنگاں ترسینگ ءَ انت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھپت جولائی ءِ روچ یازدہ ءِ نزیک ءَ گورکوپ ءُ سری کلگ ءِ میانی ءَ زورگریں پاکستانی پوج ءِ کاروان ءِ پھازوکی ءَ پیکٹ فورس ءِ سنگر ءِ سک نزیک ءَ چہ سنگر گپتگ ءُ نشانگ کتگ، دُژمن ءِ سُر ءُ پُرانی چارگ ءَ چہ سرمچاراں پیسر ءَ چہ شورو چیر کتگ-

جارکش ءَ گْوشتگ دُژمنیں پوج ءِ دو کارندہ نشانگ کتگیں جاہ ءَ سر بیتگ ءُ تُرندی ءَ گوں ترکّ اِتگ، چریشی ءِ آسر ءَ دوئیں کارندہ جاہ پہ جاھی مرتگ اَنت- کہ آئی ءِ نیمگ ءَ جُنزگ ءَ بیتگ اَنت، سنگرگپتگیں سرمچاراں نزیک ءَ چہ تیرگواری کتگ ءُ کُشتگ- میڑ ءِ میان ءَ پیادگ ٹولی آ دگہ کارندہ وتی سنگتانی رکینگ ءِ جاہ وتی جان رکینتگ ءُ تتکگ اَنت-

جارکش ءَ گْوشتگ مروچگیں روچ ءَ بی ایل ایف ءِ سرمچاراں نیمروچ ءِ وھد ءَ ناصر آباد ءِ ھند سر ناکہ بندی کتگ ءُ دُژمن ءِ سُر ءُ پُر چارتگ اَنت وھدے کہ بالیچہ ءِ ھند سر ءَ دُژمنیں پوج ءَ راشن سر کنوکیں گاڑی مانداشتگ – زانگ بہ بیت باز گاڑی واھنند یکو گل ءِ کڈنی ءَ چہ اَبید دُژمن ءِ کمکاری ءَ چہ دزکش نہ بیتگ اَنت-

جارکش ءَ گْوشتگ بلوچستان لبریشن فرنٹ ءَ گورکوپ ءَ زورگریں پاکستانی پوج ءِ چار کارندھانی کوش، ناصر آباد ءَ ناکہ بندی ءُ بالیچہ ءَ دُژمنیں پوج ءَ راشن سر کنوکیں گاڑی ءِ ماندارگ ءِ زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءَ نشانگ کنگ ءِ اِھد کنت-

بلوچ کھول ءِ سیاسی دزگیریں ءُ زورانسری آوار جنی ءِ ھلاپ ءَ زھرشانی دوازدھمی روچ ءَ ھم برجاہ-

گیشیں ھالانی رِد ءَ، اسلام آباد ءَ نیشنل پریس کلب ءَ رؤکیں سرجمیں راہ یکشل ءَ بند اَنت ءُ پولیس ءِ مزنیں کچے ءَ کارندھاں بلوچ زھرشانی کنوک انگیر ءَ کتگ اَنت- بلے بلوچ کھول سرجمیں اڑان ءُ دلسیاھیاں اَبید وتی زھرشانی ءَ برجاہ داشتگ-

اسلام آباد ءَ گوستگیں دوازدہ روچاں چہ بلوچستان ءَ زورانسری بیگواہ کنگ بیتگیں مردم ءُ سیاسی کیسانی تہ ءَ بندیگ اَنت بلوچ یکجھتی کمیٹی ءِ رھشونانی کھول زھرشانی ءَ اَنت ءَ انساپ ءِ واستا توار چست کنگ ءَ اَنت-

ھمے درگت ءَ نیشنل ڈیموکریٹک موومنٹ ءِ سروک محسن داوڈ ءَ ھوار دگہ سیاسی پارٹیاں، انسانی ھکانی گلاں ءُ سول سوسائٹی ءِ نمائندگان نندانکجاہ ءَ شتگ اَنت ءُ کھول ءَ چہ یکجاھی درشان کتگ-

نندانک ءَ نشتگیں زھرشانی کنوکانی گوشگ اِنت:

“ما گوستگیں دوازدہ روچاں چہ پاکستانی بُنجاھی شھر ءَ انساپ، پلگاری ءُ بُنکی انسانی ھکانی لوٹ ھست اَنت، بلے ما یکشل ءَ تُرسینگ، بھتام ءُ سسّائی زور ءِ آماچ ایں- چیریں ادارھانی کارندھاں اِھوالکار ءُ انتزامیہ ءِ دروشم ءَ اَتکگ ءُ مارا تُرسینگ ءَ اَنت-“

زھرشانی کنوکاں دیمتر ءَ گْوشتگ :

“ریاست ءَ مئے ورنایانی تیرسُپتگیں لاشانی چگل دیگ، مئے اُمیتاں بیگواہ کنگ، مئے تواراں ایرموش کنگ، ءُ مئے وجود سر ءَ دستیگ کنگ جُھد کتگ، بلے راجدپتر گواہ اِنت کہ بلوچ ناں بے سوب کتگ نانکہ بے توار کُت کتگ-“

“ما مرچی یکرندے پد ءَ یات دے ایں : تو پیسر ءَ ھم رد بیتگ ئے ءُ مرچی ھم رد ئے- ما زور ءَ چہ نہ تُرس ایں، ما چست بہ ایں، ما کریمہ، ماہ رنگ، سمی، سائرہ، شاہ جی، بیبرگ، ماما غفار، بیبو ءُ گلزادی جوڑ بہ ایں- ما زُلم ءَ را اوپار نہ کن ایں، ھو ما زوراکیانی باگی ایں-

زانگ بہ بیت کہ بلوچ زھرشانی کنوکاں ھکومت ءِ دیم ءَ دو بُنکی لوٹ ایر کتگ اَنت-

بلوچ یکجھتی کمیٹی ءِ سروکانی سر ءَ ھستیں دروگیں ایف آئی آرانی ھلاس کنگ ءُ آیاں زوت یل کنگ اِنت- بلوچستان ءَ زورانسری آوار جنی ءِ ھلاسی ءُ سرجمیں بیگواھیں مردمانی یل کنائینگ، گُڈی ءَ زھرشانی کنوکاں میان اُستمانی انسانی ھکانی گلاں ءُ رسانکدری مردماں چہ دزبندی کتگ کہ آ اے سنگین ءِ انسانی جیڑہ ءِ سر ءَ گامگیج بزور اِیت ءُ بلوچ زھرشانی ءِ بُنکی انسانی ھکاں دیگ ءِ کرد ءَ پیلو بہ کن اَنت-

بلوچ لبریشن آرمی ءَ وتی آفیشل چینل ھکل ءِ تہ ءَ بلوچستان ءِ جتا جتائیں ھند ءُ دمگاں پاکستانی پوج ءِ سر ءَ بوتگیں اُرشانی تامرشنگ کتگ انت ۔ نھ ملٹ ءُ بیست یک سیکینڈ ءِ تامر ءِ تہ ءَ پاکستانی پوج سر ءَ گوں سلاھاں اُرش ، آئی ای ڈی اَرش ءُ بازار ءَ وتی کنٹرول کنگ گندگ بیت۔

تامر ءِ بندات ءَ کلات ءِ اُرش پیشدارگ بیت کہ بلوچ لبریشن آرمی ءِ سرمچاراں پاکستانی پوج ءِ راہ بستگ ءُ آئی ءِ کاروان ءِ سر ءَ اُرش کنگ ءَ انت کہ اود ءَ پاکستانی پوج ءِ جون ھم کپتگ انت ءُ بلوچ سرمچار گپ جنگ ءُ ٹارگٹ ءَ نشانگ کنگ ءَ انت ۔ وھدیکہ یک سرمچارے پوج ءِ گاڑی ءِ سر ءَ راکٹ آس دیگ ءَ انت ۔ اُرش ءَ پد پوج ءِ بالگردے ھم گندگ بیت کہ جنگ جاہ ءَ کئیت۔

زانگ بہ بیت اے اُرش ءِ درگت ءَ بلوچ لبریشن آرمی ءَ وتی شنگ کرتگیں درشان ءِ تہ ءَ گوشتگ ات کہ سرمچاراں کلات ءَ پاکستانی پوج ءِ یک کاروانے ءِ سر ءَ اُرش کتگ ءُ سیزدہ کارمَنْد کشتگ انت ۔ وھدیکہ بلوچ سرمچا سنگت سھیب بلوچ پنام ءِ امیر بکش نمیران بوتگ ۔

تامر ءِ تہ ءَ زامران ، تگران ءُ بُلیدہ ءَ بوتگیں اُرش ھم زاھر کنگ بنت کہ اود ءَ پاکستانی پوج ءِ کاروان ءُ پیادگیں کارمَنْدانی سر ءَ اُرش کنگ بیت وھدیکہ مستونگ شھر ءِ کنٹرول ءُ سرکاری جاھانی تاوان ءُ پوج ءِ سر ءَ اُرش پیش دارگ بوتگ انت ۔

زانگ بہ بیت بی ایل اے ءِ نیمگ ءَ شھرانی کنٹرول ،دگ بندی ءُ پوج ءِ سر ءَ اُرش گیش بوان انت۔

بلوچ زانتکارانی گوشگ انت کہ ھمے زوتان بوتگیں اَرشاں چہ زھربیت کہ بلوچ آجوئی لوٹوکانی پوزیشن مھکم بوان انت وھدیکہ پاکستانی پوج نزور تران انت ۔

آیانی رد ءَ اے جاورھال ایوک ءَ پاکستانی ھاتر ءَ چیلنج جوڑ نہ بوتگ انت بلکیں آئی ءِ سان اے دمگاں برجاھیں اقتصادی شور ھاسکر چین ءُ پاکستان ءِ سی پیک ءِ سر ءَ ھم کپگ ءَ انت ۔

پاکستانی لشکر ءِ گون ءَ میڑ ءَ نمیران بوتگیں بلوچ جنگول سھیب بلوچ ءِ پت ءُ برات ھوار شش مردم زورانسری بیگواہ کنگ بیتگ انت-

پورسز ءَ گوستگیں شپ ءَ شال ءَ آئی ءِ لوگ ءِ سر ءَ اُرش کتگ ءُ سھیب ءِ پت محمد دین لانگو ، دو برات عبدالغفار لانگو ، عبدالکبیر لانگو ءُ پرس ءَ اتکگیں سَے نقیب اللہ لانگو ، عبدالوھاب لانگو ، ءُ شعیب لانگو دزگیر جتگ ءُ ناشناسیں جاھاں برتگ انت-

دمگی مردمانی گشگ ءِ رد ءَ ھمے وھد ءَ پورسز ءَ لوگ ءَ ھواریں جنین ءُ چُک جتگ ءُ بیم تراپ داتگ انت-