TBP Balochi

بلوچ یکجھتی کمیٹی ءِ بنجاھی جار ءِ پد ءَ مروچی تربت ءَ زھرشانی روانک ءِ کشگ بوتگ، کہ اودا مزنیں کچے ءَ بازار ءِ مردماں ھوار نودربر، زالبول ءُ سیاسی باسکاں بھر زرتگ –

روانک ءَ بی وائی سی ءِ رھشونانی دزگیری، ورنایانی زورانسری آوار جنی ءُ در کانودی کُشت ءُ کوش ءِ بگیری ءَ توار چست کنگ بوتگ –

روانک ءِ بندات ایڈوکیٹ دگ ءَ بندات بوتگ کہ سینیما چار راہ ءَ اوگام جنان ءَ شھید پدا چار راہ ءَ سر بوتگ ءُ ھمودا مچی ءِ تہ ءَ بدل بوتگ –

درنگاز کنوکاں پلے کارڈ ءُ بینر گون بوتگ انت کہ آیانی سرا بلوچ رھشونانی یل ءُ انسانی ھکانی لوٹ نبشتہ بوتگ انت – درنگاز کنوکاں سرجمیں راہ ءَ نارہ جتگ ءُ ریاستی کارشونیانی بگیری ءَ نارہ جتگ –

درنگاز کنوکاں بی وائی سی ءِ آرگنائزر ماھرنگ بوچ ءُ بنجاھی باسک بیبو بلوچ، گلزادی بلوچ، شاہ جی ءُ بیبگر بلوچ ءِ دزگیری درکانودی ءِ گوشتگ ءُ آمیدگس ءِ سرا نگد کتگ –

آیانی گوشگ ات کہ آمیدگس آزات نہ انت بلکہ گوشگ ءِ پدا کار کنگ ءَ انت ءُ دیاستی اداریانی ھکم ءِ سرا کار کن انت –

ترانکارانی گوشگ ات دزگیریں رھشون بید مقدمہ ءَ بندیگ انت ءُ آیانی بگیری ءَ تری ایم پی او جتگ ءُ آیانی کیس دراج کش دیان بوگ ءَ انت – آیاً اے کرتن کانود ءِ بگیری ءِ گوشتگ –

زھرشانی کنوکاں اقوام متھدہ، میان استمانی انسانی ھکانی گل ءُ سول سوسائٹی ءَ چہ لوٹ کتگ کہ آ بلوچ رھشونانی درکانودی دزگیری ءُ بلوچستان ءَ برجاھیں انسانی ھکانی لگتمالی ءِ بگیری ءَ گامگیج بہ زور انت –

ترانکاراں بلوچستان ءَ ورنایانی زورانسری آوار، درکانودی کوش، ءُ بیگواھیں مردماں دروگیں میڑ ءَ کوش ترندی ءَ گوں ایرجتگ ءُ گوشتگ کہ اگاں اے کارشونی برجاھ بوت انت گڈا اے دمگ ءَ جاور گیشتر ھرابتر بوت کناں –

تربت ءَ ھمے ماہ ءَ پاکستانی پوج ءِ گون ءَ میڑ ءَ جنگ بیتگیں ورنایانی لاش پاکستانی پوج ءَ شپ ءِ بے وھد ءَ تعلیمی چوک کبرستان ءَ بے تواری ءَ کل ءُ کسارت کتگ اَنت-

کھول ءِ گوشگ اِنت کہ آیاں ناں تھنا میتانی کل ءُ کسارت کنگ ءَ موکل نداتگ اَنت بلکیں واکدار ءَ لاشانی کبر ءِ کونڈگ ءُ گُڈی رمسانی موکل ھم دیگ نہ بیتگ-

اسرمندیں کھول ءِ گوشگ اِنت کہ سے روچ ءَ چہ پولیس ءُ دگہ ھمگرنچیں واکدار ءَ آ تھنا ودار پرمائینتگ اَنت، بلے ھچ وڑیں کمک کنگ نہ بیتگ-

آیاں بھتام جتگ کہ لاش بے کپن ءُ رسمی ھساب ءَ کل ءُ کسارت کتگ اَنت، چریشی ءَ کھول سک گمیگ بیتگ اَنت-

زانگ بہ بیت کہ لاش کھول ءَ دست ءَ نہ دیگ ءِ ھلاپ ءَ زالبول، چک ءُ شھریانی مزنیں کچے ءَ بُنجاھی شھدگ ءِ سر ءَ نندانک داتگ-

زھرشانی کنوکاں لوٹ کتگ کہ میتاں آیانی دست ءَ بدے اِت دانکہ آ رسم ءُ رواجی دروشم ءَ آیاں کل ءُ کسارت کت بہ کن ایں- بلے واکدار نیمگ ءَ چہ لاشاں کھول دست ءَ نہ دیگ ءَ پد کھول ءَ نندانک ھلاس کتگ ءُ گائبانہ نماز ونتگ-

بلوچستان لبریشن فرنٹ ءَ دو جتاجتائیں شنگ کتگیں درشانانی تہ ءَ نال ءَ لیویز چوکی ءِ دستیگ ءُ سلاھانی برگ ءُ تربت ءَ پوج ءِ ھیلکاری بُنجاہ سر ءَ بیتگیں اُرشانی زمہ واری منّ اِتگ اَنت-

بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ پانزدہ مئی دوھزار بیست پنچ ءِ بیگاہ شش نیم ءَ بی ایل ایف ءِ سرمچاراں گوادر نیشنل ھائی وے ( این ایچ 25 ) لنک ءِ پھازوکی ھاتر ءَ نال ءِ دمگ ھڑنبو کنڈگ سر ءَ برجاھیں لیویز چوکی انگیر ءَ کتگ ءُ اود ءَ ایریں سرجمیں سرکاری سلاہ ءُ دگہ سامان دستیگ کتگ اَنت-

جارکش ءَ گْوشتگ ڈیوٹی ء ساڑی کارندہ انسانیت ءُ بلوچ بیگ سبب ءَ بید تاوان دیگ ءَ یل کتگ اَنت-

جارکش ءَ گْوشتگ بی ایل ایف ھڑنبو کنڈگ نال، لیویز چوکی سر دستیگ ءُ سرکاری سلاھانی برگ زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پاکستان ءِ ریاستی مشینری ءِ سرجمیں بھرانی سر ءَ اُرشانی برجاہ دارگ ءِ کول کن ایں-

جارکش ءَ دگہ یک درشانے ءِ تہ ءَ گْوشتگ کہ بی ایل ایف ءِ سرمچاراں مروچی شانزدہ مئی بیگاہ شش ءَ تربت ءِ دمگ آپسر ءَ بلوچی بازار ءَ برجاہ ایف سی ءِ ھیلکاری بُنجاہ سر ءَ راکٹ لانچر ءَ گوں بازیں گولھے آس داتگ ،کہ نشانگ ءَ کپتگ اَنت چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گْوشتگ ھمے میان ءَ سرمچاراں دو چاروکی ( سرویلنس ) کیمرہ ھم نشانگ کتگ ءُ تباہ کتگ اَنت-

جارکش ءَ گوشتگ بلوچستان لبریشن فرنٹ اے اُرش زمہ واری ءَ منّ اِیت ءُ کول کنت کہ بلوچستان ءِ سرجمی ءَ وتواجھی ءَ تاں اے کاروائیاں برجاہ دار اِیت-

سلاہ بندیں مردماں لیویز کارندھاں یرگمال کنگ ءَ پد سرکاری سلاہ دستیگ کتگ اَنت-

سلاہ بندیں مردماں بلوچستان ءِ دمگ ھُزدار ءِ تھسیل نال ءَ ھڑنبو کوہ سر ءَ برجاھیں لیویز فورس چیک پوسٹ سر ءَ بیڑبرتگ لیویز کارندھانی یرگمال کنگ ءَ پد اود ءَ ھستیں سرکاری سلاہ ساز ءُ سامان دستیگ کتگ اَنت-

سلاہ بندیں مردماں یرگمالیں پولیس پد ءَ یل داتگ اَنت-

زانگ بہ بیت چیزے وھد اِنت کہ بلوچستان ءِ جتاجتائیں دمگاں پولیس، ایف سی، لیویز ءَ ھوار دگہ پوج کارندھانی سر ءَ اُرشاں ءُ آیانی سلاھانی دستیگ کنگ ءِ بازیں وئیل۔دیم ءَ اَتکگ اَنت اود ءَ اے جاورھالانی سر ءَ ڈائریکٹر جنرل بلوچستان لیویز فورس ءَ کارندہ سرپد کتگ اَنت آ چوکیانی سر ءَ اُرش کنوک ءُ سلاھانی دستیگ کنوکیں سلاہ بندیں گلاں گوں دیم پہ دیم بہ بنت، اگاں ناں کجام ھما کارندھاں وتی سلاہ سلاہ بندانی دست ءَ دات اَنت آ چہ کار ءَ کشگ بنت-

تنی وھدے بلوچستان ءِ جتاجتائیں دمگاں بازیں لیویز کارندہ اے وڑیں وئیلانی سبب ءَ وتی کار ءَ چہ زبھر بیتگ اَنت-

بلوچستان ءِ جتاجتائیں دمگاں لیویز چوکیانی سر ءَ بیڑ ءُ سرکاری سامانانی دستیگ کنگ وئیل گیش بیگ ءَ اَنت اشی ءَ ساری بلوچستان ءِ بازیں دمگاں لیویز تھانھانی سر دستیگ کنگ ءَ پد واکدار ءَ بازیں کارندھی چہ کار ءَ کش اِتگ اَنت-

اے وئیلانی زمہ واری گیشتر بلوچ آجوئی لوٹوکیں سلاہ بندیں گلاں زرتگ اَنت بلے اے گلانی گوشگ اِنت اے کارندہ بلوچ بیگ ءَ چہ ھچ وڑیں جانی تاوان دیگ ءَ نہ اِنت-

زھگاں ھوار بے وسیں بندیگ کُشتگ انت، باز براں وپتگیں مردمانی سر ءَ تیرگواری کُتگ –

برتانیہ ءِ اسپیشل فورس ءِ گوستگیں باسکاں بازیں وھدے ءَ پد بی بی سی پینوراما ءِ گون ءَ تران کنان ءَ عراق ءُ اوگانستان ءَ وتی سنگتانی چم ءِ وت دیستگیں “جنگی کتکاری” درشان کتگ انت –

اولی رند انت کہ گوستگیں پوجی مھلوک ءِ دیم ءَ اے گپ ءَ منّگ ءَ انت کہ کہ آیاں ایس اے ایس ءِ باسک چم ءِ وت دیستگ انت کہ آیاں وپتگیں ءُ زمزیلاں بستگیں مردم کُشتگ انت کہ آیانی تہ ءَ زھگ ھم ھوار بوتگ انت –

اوگانستان ءَ ایس اے ایس ءِ گون ءَ ھمکاریں گوستگیں پوجی ءَ وتی گوست یاد کتگ ءُ گوشتگ کہ ” آئی ءَ ورنایے ءِ دست بستگ انت ءُ آ تیرآماچ کُتگ “

گوستگیں پوجی ءَ گوشتگ کہ بندیگانی کوش ھمک روچی کارے بوتگ –

آئی ءَ گوشتگ کہ ” آیاں یکے پٹ ءُ پول کتگ، پد ءَ دست بستگ انت ءُ پد ءَ تیرآماچ کتگ آئی ءَ چہ پد دزبند بُراِتگ ءُ آئی ءِ جون ءِ کَش ءَ پسٹولے ایر کتگ –

اے درشانانی تہ ءَ ھنچیں جنگی کتکاری ءِ بھتام ھست انت کہ آیاں دھکے ءَ گیش انت، کہ اے وھد ءَ بزاں سَے سال ءَ گیش انت کہ آیانی بگیری ءَ ماں برتانیہ ءَ پبلک انکوائری برجاہ انت –

رائل نیوی ایلیٹ اسپیشل فورس رجمنٹ ایس بی ایس ءِ اولی رند انت کہ مزنیں بھتام ءِ جنگ بوتگ کہ آیانی تہ ءَ دست گوش ءُ زدگ بوتگیں مردمانی پاھو دیگ ھم ھوار انت –

ایس بی ایس ءِ ھمکاریں گوستگیں پوجی ءَ گوشتگ کہ لھتے پوجیاں ” موب مینٹیلیٹی” بوتگ ءُ ما آیانی اے رویشت “رستری” ءِ گوشتگ –

آئی ءَ گوشتگ کہ من بازیں وش روھیں مردم بدل بوگ ءَ دیستگ انت، آیانی تہ ءَ نپسیاتی نادراھی زاھر بوتگ انت، آیاں بے رھبندی کُتگ، آیاں ھمے مار اِتگ کہ آیاں کس گپت نہ کنت –

برتانیہ ءِ پوجیانی چہ تالبان جنگول ءُ بمب جوڈ کنوکانی دست ءَ رکینگے ھاتر ءَ اوگانستان ءَ گچینی پوج ءِ آرگ بوتگ – اے جنگ پہ برتانیہ ءِ سلاہ بندیں پوج ءِ ھاتر ءَ ٹوھیں جنگے بوتگ کہ 457 مردم مُرتگ ءُ ھزارانی کچ ءَ زدگ بوتگ انت –

بی بی سی ءِ نیمگ ءَ نوکیں گواھانی شاھدی دیگ ءِ درگت ءَ پھازگی وزیر ءَ گوشتگ کہ آ جنگی کتکاری ءِ برجاھیں پٹ ءُ پول ءِ پلامرزی ءَ کنت ءُ گوستگیں درسیں پوجیاں ھمے گوش ایت کہ ھرکس ءَ اے درگت ءَ سرپدی ھست دیم ءَ بہ ایت –

آئی ءَ گوشتگ کہ پھازگی وزیر ءَ اے وڈیں بھتامانی سرا چمشانک دیگی نہ انت کہ انکوائری ءِ تہ بہ بنت –

رجمنٹ ءِ تہ ءَ “نپسیاتی کُشندہ”

اے رندی یوکے سپیشل فورس ءِ گوستگیں باسکانی دست ءَ کُشگ بوتگینانی درگت ءَ اے درساں مستریں درشان انت کہ چم دیستیں شاھد ھست انت کہ آئی ءِ تہ ءَ ایس اے ایس، ایس بی ایس ءُ دگہ بازیں ھمکاریں رجمنٹس ھوار انت –

برتانیہ ءِ سپیشل فورس یا آئی ءِ سِی ءَ گیش ھمکارانی شاھدی ، ایس اے ایس ءِ نیمگ ءَ درکانودی کُشت کوش ءِ بھتامانی درگت ءَ بی بی سی پینوراما ءِ بازیں وھدے ءِ اھوالکاری ءِ سرا جوڈ کنگ بوتگ –

پینوراما ءَ اولی رند ءَ اے گپ ھما وھدے سر وزیر ڈیوڈ کمیرون وھد ءَ ھم زاھر کتگ ءُ آ مدام گشگ بوتگ کہ برتانیہ ءِ سپیشل فورس ماں اوگانستان ءَ لس مردماں کُشگ ءَ انت –

چم دیستیں شاھدے ءَ وتی ءَ نام زاھر نکوتگ ءُ گوشتگ کہ عراق ءُ اوگانستان ءَ ملک ءِ ایلیٹ رجمنٹ پہ زور جنگی رھبنداں پروشگ ءَ انت –

آ رھبندانی تہ ءَ ھمے گوشگ بوتگ کہ اے وڈیں کارانی تہ ءَ تو زانے اے مردم پہ برتانیہ ءِ پوج یا دومیگانی واستا ھترہ انت گڑا آیاں کُشت کن ئے –

چم دیستیں شاھد ءِ رِد ءَ ایس اے ایس ءُ ایس بی ایس ءِ باسک وتی رھبند جوڈ کنگ ءَ بوتگ انت –

ایس اے ایس ءِ ھمکاریں گوستگیں پوجی ءَ ھما مردمانی ھم درور داتگ ءَ گوشتگ کہ اگاں کسے ءِ نام پیش ءَ یک ءُ دو رند ءَ لڑ ءَ اتکگ بوتگ، گڈا ما آئی کُشگ ءِ نیت ءَ شُتگ ایں، آئی ءِ گرگ ءِ ھچ جھد کنگ نہ بوتگ –

آئی ءَ گوشتگ کہ کدی کدی ما پٹ ءُ پول کتگ، ٹارگٹ پجار پکا کُتگ ءُ پدا آ تیر آماچ کتگ – بلے گیشتر سکواڈرن ھمودا شتگ ھرچی دیستگے درسیں مردم کُشتگ انت –

ایس اے ایس ءِ گوم ءَ کار کنوکیں شاھد ءِ رِد ءَ کوش “نشہ ” جوڑ بوت کنت ءُ اوگانستان ءَ ایلیٹ رجمنٹ ءِ لھتے باسک ھمے نشہ ءِ آماچ بوتگ انت – آئی ءَ گوشتگ کہ بازیں نپسیاتی کُشندہ بوتگ انت –

آئی ءَ گوشتگ لھتے براں پوج مھمان جاھے وڑیں گِساں شتگ انت ءُ اود ءَ ساڑی ئیں درسیں مردم کُشتگ انت – آ تھا شُتگ انت اود ءَ وپتگیں درسیں مردم تیر آماچ کتگ انت – واب ءِ تہ ءَ مردمانی کُشگ جائز نہ انت-

ایس بی ایس گوم ءَ کار کنوکیں گوستگیں پوجی کارمندے ءَ گوں بی بی سی ءَ تران کنان ءَ گوشتگ کہ یک دمگے ءِ کنٹرول کنگ ءَ پد اُرش کار دمگ ءَ پُترتگ انت ءُ اود ءَ ھرکسے دیستگ ات تیر ءِ جتگ، جونانی چار ءُ ٹپاس کتگ ءُ رکّ اِتگیں مردم ھم کُشتگ انت –

آئی ءَ گوشتگ کہ ھمے امیت بوتگ، ھچ چیر نہ بوتگ، درساں زانتگ –

زدگ بوتگیں ھنچیں مردماں کہ ترا چہ آئی ءَ ھچ چیز ءِ تُرس بُکش یے گڑا اے میان استمانی رھبندانی تچکی ءَ بگیری دارگ انت – بلے ایس بی ایس ءِ گوستگیں کارمند ءَ گوشتگ کہ زدگ بوتگیں مردم کُشگ بوتگ انت –

آئی ءَ یک آپریشن ءِ درگت ءَ کسہ کتگ کہ ڈاکٹرے ھنچیں مردمے ءَ الاج کنگ ءَ بوتگ کہ آئی ءَ تیر لگ اِتگ بوتگ بلے آئی ءَ ساہ مان بوتگ – پد ءَ مئے یک مردمے ھمائی ءِ گور ءَ شتگ، تراکے بوتگ – آئی ءِ سر ءَ نزیک ءَ چہ تیر جنگ بوتگ –

آئی ءَ گوشتگ کہ اشانی کُشگ المی نہ بوتگ اے کوش یے –

شاھدانی گوشگ ءِ رِد ءَ ایس اے ایس ءِ سنئیر آپریٹر ءَ اُرش کنوکیں جونئیر باسک ھمے گوشتگ انت کہ بندیگاں بُکش ایت – دزگیر کنگ بوتگیں ھما مردم بوتگ انت کہ آیاں سلاہ دور داتگ انت، سپیشل فورس ءَ آیانی پٹ ءُ پول کتگ بوتگ ءُ دست بستگ انت –

برتانیہ ءُ میان استمانی کانود دست گوش ءُ جنگی بندیگانی کوش ءَ دار انت –

ایس اے ایس ءِ گوستگیں آپریٹر ءَ ماں عراق ءَ آپریشن ءِ درگت ءَ گوشتگ کہ ھمے وھد ءَ یکے کُشگ بوتگ –

آئی ءَ گوشتگ کہ من چمے وت دیستگ کہ چریشی ءَ مارا ھچ ترس نہ بوتگ، آ سلاہ بند ھم نہ بوتگ – اے لجی کار یے –

آئی ءَ گوشتگ کہ اے کوشانی ھچ وڈیں شریں پٹ ءُ پول کنگ نہ بوتگ –

ایس اے ایس ءِ گوستگیں پوجی ءِ رِد ءَ اے جیڑہ رجمنٹ ءِ اوگانستان ءِ آیگ ءَ باز پیسر بندات بوتگ ءُ سنیئر کمانڈر اشی ءَ شری ءَ سرپد بوتگ –

اے شاھدی ءُ سال دوھزار شش ءَ عراق ءَ ایس اے ایس ءِ آپریشن چہ بی بی سی ءَ رس اتگیں تامری شاھد ھم پینوراما ءِ گوستگیں رپورٹ ءِ ھمپنتی کن انت کہ ایس اے ایس ءِ سکواڈرن ءِ کارمندانی یکے ءُ دومی ءِ گوم ءَ کوشانی مقابلہ بوتگ –

بی بی سی ءِ اھوالکار ءِ رِد ءَ ایس اے ایس ءِ لھتے باسکاں وتی زاتی ھساب کتاب داشتگ ءُ یک آپریٹرے ءَ اوگانستان ءَ شش ماھے ترءُ تاب ءِ میان ءَ بازیں مردمے زاتی کُشتگ –

آئی ءِ سنگتے ءِ گوشگ انت ھنچوش لگ اِتگ کہ آ ھر آپریشن ءَ یکے ءِ کشگ ءِ کوشست ءَ بوتگ انت، ھر شپ یکے ناں یکے کُشگ بوتگ –

آئی ءَ گوشتگ کہ آپریٹر سکواڈرن ءِ تہ ءَ بدنام بوتگ، آ چو نپسیاتی نادراھے ءِ وڈا بوتگ –

اھوالکار ءِ گوشگ انت کہ ایس اے ایس ءِ تہ ءَ بدنامی ءِ وئیل ءَ آپریٹر ءَ یک اپسرے ءَ گوشتگ کہ دو بر تیر مہ جنت بلے پد ءَ رند ءَ اوگانی مردمے گردن بُر اِتگ – یل دگہ سنگتے ءَ گوشتگ اشی ءِ سوب ھمے بوتگ کہ آ زدگ بوتگیں مردم ءَ چاکو ءِ سر ءَ کُشگ لوٹ اِتگ آئی ءَ ایشی ءِ کوش وتی نام ءَ کنگی بوتگ –

شاھد ءِ رِد ءَ شکی کُتکاری کسانیں ٹولی یا یکتائیں سکوارڈن ءَ بس نہ کُتگ –

یک گوستگیں کارمندے ءَ گوشتگ کہ برتانیہ ءِ سپیشل فورس کمانڈ ءِ تہ ءَ ھر یکے سرپد بوتگ کہ چی چی بوگ ءَ انت –

آئی ءَ گوشتگ کہ من زاتی زمہ واری ءَ دزکش نہ اں بلے ھر یکے زانتگ ھرچی بوگ ءَ بوتگ آئی ءِ موکل دیگ بوتگ –

چم دیستیں گواھانی گوشگ انت کہ کُشگ بوتگینانی چار ءُ ٹپاس ءَ رکگ ءِ ھاتر ءَ ایس اے ایس ءُ ایس بی ایس ءِ باسک مُرتگیں مردمانی جونانی سر ءَ وتگڑیں ‘ڈراپ سلاہ’ ایر کنگ بوتگ تاکہ اسپیشل فورس ءِ ٹولی ءِ نیمگ ءَ کشگ بوتگیں اکساں ھمے زانگ بہ بیت کہ آ سلاہ بند بوتگ انت –

ایس اے ایس ءِ گوستگیں آپریٹر ءِ گوشگ ات کہ آئی ءَ وتی ھمراھی ءَ یک نکلی دزبمب ءِ بُرتگ گوں کہ نہ ترک ایت –

یک دگہ گوستگیں کارمندے ءَ گوشتگ کہ آپریٹر ءَ سِی تیری گوں وت بُرتگ کہ آیانی تہ ءَ فولڈنگ سٹاک بوتگ ، پرچاکہ آیانی بیگ ءِ تہ ءَ جاھے بیتگ ءُ ایشی ءِ جونانی گور ءَ ایر کنگ ارزان بوتگ –

رپورٹ ” کسہ ” تاں

شاھدانی رِد ءَ آئی ءَ چہ پد اپسراں پوسٹ آپریشنل رپورٹانی رد کنگ ءَ کمک کتگ تانکہ اُرش کنوکیں ٹولی چار ءُ ٹپاس ءَ بہ رک انت –

گوستگیں پوجیانی تہ ءَ یکے ءِ گوشگ ات کہ ما زانتگ کہ وئیلانی چمشانک چوں نبشتہ کنگ بہ بیت تاکہ آ ملٹری پولیس ءِ دست ءَ دیگ مہ بنت –

آئی ءَ گوشتگ کہ اگاں اے وڑ بہ بیت کہ تیرگواری وئیل جنگی کانودانی بگیری بوت کنت گڑا تئی سر ءَ کانودی مشیر یا چہ ھیڈکوارٹر ءَ اپسرے ءِ پون کئیت ءُ ترا گپ ءِ تچک کنگ ءَ کمک کنت – چوش کہ “ترا یات ایں کہ یکے اناگت ءَ سُر اِتگ، جی ھئو، من ھنو یات ءَ کپتگاں –

یو کے ایس ایف ءِ یک دگہ کتہ کاری ءَ گوشتگ کہ اے رپورٹ کسہ بوتگ انت –

ایس بی ایس کے ءِ گوم ءَ کار کنوکیں انٹلی جنس اپسرے ءَ اے رپورٹ ءِ درگت ءَ گوشتگ بوتگ کہ آ تیرگواری ءَ.زد ءَ اتکگ انت وھدیکہ اکسانی تہ ءَ زاھر انت لاشانی سر ءَ تیر لگ اِتگ انت –

ردیں کاگدی کاروائی ءَ رائل ملٹری پولیس ءِ نیمگ ءَ پٹ ءُ پول ءِ دارگ ءَ کمک رس اِتگ، بلے برتانیہ سپیشل فورس ءِ کاروائیاں اوگان کمان دار ءُ اوگان ءِ سرکار ءِ اگدہ دارانی تہ ءَ مزنیں ترس ءِ پیداک کتگ –

دیواناں ساڑی ئین بازیں مردمانی رِد ءَ ڈیوڈ کیمرون ءَ جون دوھزار ءُ دہ ءَ بگر تاں نومبر ءِ دوھزار ءُ سیزدہ ءِ میان ءَ کہ سر وزیر بوتگ آ ھپت رند ءَ اوگانستان ءَ تر ءُ تاب ءَ شُتگ، ھمے وھد ءَ ایس اے ایس ءِ پبلک انکوائری ءَ چار ءُ ٹپاس بوگ ءَ بوتگ – آ اوگان ءِ سروک حامد کرزئی ءِ نیمگ ءَ مدام سرپد کنگ بوتگ –

اوگانستان ءِ راجی سلامتی ءِ گوستگیں مشیر ڈاکٹر رنگین دادفر سپانتا ءَ گوں پینوراما ءَ تران کنان ءَ گوشتگ کہ سروک کرزئی ءَ مدام اے جیڑھے گپ جتگ –

آئی ءَ گوشتگ کہ کیمرون ءَ اے گپ ءِ ھچ شک نہ بوتگ کہ برتانیہ سپیشل فورس ءِ سر ءَ زھگاں ھوار لس مھلوک ءِ کوش ءِ بھتام ھست انت –

جنرل لوٹ ءَ گوشتگ کہ اگاں برتانیہ پوج ءِبگیری ءَ کسے ءَ چشیں ٹاہ داتگ گڑا آ بے کساس بے ارزشت بوتگ کہ آئی ءِ درگت ءَ برتانیہ ءِ چین آف کمانڈ سرپد نہ بوتگ –

لارڈ کمیرون ءِ جارکش ءَ گوں پینوراما ءَ گوشتگ کہ لارڈ کیمرون ءِ رِد ءَ صدر کرزئی ءَ گیشتر نیٹو پوج ءِ درگت ءَ جیڑہ چست کتگ ءُ برتانیہ ءِ سپیشل فورس ءِ درگت ءَ گچینی وئیلانی ھچ گپ نہ جتگ –

جارکش ءَ اے ھم گوشتگ کہ اے راستے کہ ما انکوائری ءِ سرکاری رزلٹ ءِ ودار ءَ کنگ ءَ ایں –

آئی ءَ گوشتگ کہ کسے اگاں چشیں گپ ءِ بہ جنت لارڈ کیمرون ءَ مزنیں ءُ ردیں کارانی چیر دیگ ءِ کوشست کتگ گڑا اے گپ سر ءَ سر وتسریں گپ انت –

امریکہ ءُ فرانس ءَ ھوار دگہ بازیں ملکے ءِ وڑ ءَ برتانیہ ءِ گور ءَ وتی ایلیٹ سپیشل فورس رجمنٹانی ھچ وڈیں پارلمانی چار ءُ گزار نہ بوتگ – آئی گامگیجانی سٹریٹجک زمہ داری گڈسر ءَ.سروزیر ءَ ھوار ھوار پھازگی وزیر ءُ سپیشل فورس ءِ سروک ءِ سرا لڑگ بوتگ –

پراسیکیوشن ءِ گوستگیں ڈائریکٹر آف سروس بروس ھولڈر ءَ گوشتگ کہ آئی ءَ امیت ایں کہ راجی پٹ ءُ پول ءَ اے چیز ءِ سر ءَ ھم چمشانک دیگ بیت برتانیہ ءِ سپیشل فورس ءِ دست ءَ کُشگ بوتگیں شکی ایں مردمانی درگت ءَ لارڈ کیمرون ءَ چینچو سرپدی بوتگ –

بروس ھولڈر ءِ گوشگ ات کہ اے زانگ المی ایں کہ اے نادراھی تاں چُنت ءَ تالان بوتگ –

• پنجگور ءَ بلوچ یکجھتی کمیٹی ” بی وائی سی ” نیمگ ءَ چہ درکتگیں زھرشانی روانک ءَ مزنیں کچے ءَ شھری،زالبول ءُ زھگاں بھر زرتگ-

بی وائی سی ءَ گوستگیں روچ ءَ بلوچستان ءِ جتاجتائیں دمگاں زھرشانی روانکانی جار جتگ چریشی ءِ رِد ءَ مروچی پنجگور ءَ یک مزنیں زھرشانی یے کنگ بیتگ-

اے روانک درکانودی کوش، زورانسری آوار جنی ءُ ڈاکٹر ماہ رنگ بلوچ ءَ ھوار گل ءِ سروکانی درکانودی دزگیری ءِ ھلاپ ءَ تسپ اسٹار چوک ءَ چہ درکنگ بیتگ-

گل ءِ رِد ءَ اے میان ءَ پنجگور ءِ راج ءَ ریاستی زوراکی ءُ بلوچ چُکچینی ءِ ھلاپ ءَ دگانی سر ءَ درتکگ ءُ زھرشانی ءِ کتگ جوانیں وڑے ءَ بھر ءِ زرتگ، زھرشانی کنوکاں سرجمیں بیگواھیں مردمانی یل کنائینگ ءُ بلوچ چُکچینی ءِ ھلاس کنگ لوٹ کتگ-

بی وائی سی رِد ءَ زھرشانی درچ برجاہ بیت باندا کیچ ءِ تھسیل تربت ءَ زھرشانی کنگ بیتگ چریشی ءَ پد مستونگ ءُ ھاران ءَ ھم زھرشانی کنگ بیت-

بلوچ یکجھتی کمیٹی ءِ گوشگ اِنت بلوچ راج ءِ ھلاپ ءَ ریاستی زوراکی تُرندی ءَ گوں روچ پہ روچ گیش بوان اِنت بلے بلوچ راج ھچ وڑیں زُلم دیم ءَ سر ءَ جھل کنگ ءَ ساڑی نہ اِنت، بی وائی سی ءِ گوشگ اِنت مئے گھگیری پُرایمن اِنت ءُ اشی ءِ مول مراد وتی مردمانی پھازگ ءُ شرپ اِنت-

بی وائی سی ءَ راج ءَ چہ دزبندی کتگ کہ آ وتی ھکانی ھاتر ءَ یکجاہ بہ ئے ءُ بے تواری ءِ پروشگ راستی ءِ گوم ءَ اوشتگ ایں-

گل ءَ تچک کتگ کہ بلوچ راج ءِ دیمونی روگ ءَ نیل ایں ءُ اے جُھد زورانسری آوار جنی، کوش لٹ ءُ کُٹ ءُ ایردستی ھلاپ ءَ برجاہ بیت-

سلاہ بندیں مردماں پولیس آفیسر کارگس ءِ سر ءَ بمب اُرش ءِ نشانگ کتگ-

چہ مستونگ ءَ ھالانی رِد ءَ ناشناسیں سلاہ بندیں مردماں مستونگ ءَ سپریڈنٹ پولیس ءِ کارگس دستی بمب اُرش ءِ نشانگ کتگ کہ کارگس تہ ءَ کپتگ ءُ تُرندی ءَ چہ ترکّ اِتگ-

تراک ءِ توار شھر ءَ دیر دیر اش کنگ بیتگ-

پوج ءُ پولیس ءِ مزنیں کچے ءَ وئیلجاہ ءَ سر بیتگ جاگہ بند کتگ وھدے کہ کارگس نزیک ءَ راہ ھم بند کتگ اَنت-

زانگ بہ بیت کہ مستونگ ءُ کش گوراں بلوچ آجوئی لوٹوک پُرکار اَنت آیاں گوستگیں روچ ءَ ایف سی ءِ ناکہ ھم بمب اُرش ءِ نشانگ کتگ اَت چریشی ءَ چار ایف سی کارندہ ٹپی بیتگ اَنت-

گوستگیں روچ ءَ بیتگیں اُرش زمہ واری بلوچ لبریشن آرمی ءَ زرتگ اَت بلے اے اُرش زمہ واری انگت ھچ گل ءَ نہ زرتگ-

بلوچستان ءِ دمگ چاگی ءَ پولیس ءُ سلاہ بندیں مردمانی نیام ءَ تیرگواری ءِ سبب ءَ پولیس ءِ کارندھے ءَ ھوار دو مردم بیران بوتگ انت۔

پولیس ءِ رد ءَ اے وئیل ھما وھد ءَ بوتگ کہ یک لوگے ءَ شکی ڈنگانی ھلاپ ءَ کارروائی کنگ بوتگ۔

آپریشن ءِ وھد ءَ پولیس پارٹی ءِ سر ءَ تیرگواری ءِ آسر ءَ پولیس ءِ کارندہ ھما جاہ ءَ بیران بوتگ ءُ بدلی ءِ رد ءَ یک اُرش کنوکے ھم بیران بوتگ۔

تیرگواری ءِ سبب ءَ پولیس ءِ ڈپٹی سپرنٹنڈنٹ عابد شیرزئہ ءُ دگہ پولیس افسر سفیر شیرزئی سک ٹپی بوتگ انت۔

ٹپیگ پہ اولی کمک ءَ زوت دلبندین ءِ پرنس فھد نادراھجاہ ءَ سر کنگ بوتگ اَنت کہ چہ اود ءَ آ نادراھجاہ ءَ آ ناگیگیں جاوراں شال ءَ دیم دیگ بوتگ اَنت۔

بلوچستان ءِ دمگ کیچ ءِ بنجاھی تربت ءِ دمگ جوسک ءَ سلاہ بندیں مردماں پولیس ءِ تھانہ ءِ سر ءَ اُرش کتگ ءُ دستیگ کتگ۔

دمگی اھولانی رد ءَ اُرش کنوکاں پولیس کارندھانی سلاھانی پچگرگ ءَ پد آیاں پولیس اسٹیشن مانداشتگ-

اے وئیل شپ ءِ 5 بج ءِ نزیک ءَ بوتگ۔ وھدے کہ سلاہ بندیں مردم یک مزنیں شوربندی اُرشے ءِ بھر ءِ رد ءَ پولیس اسٹیشن ءَ پترتگ اَنت۔

اھوالدار ءِ گشگ انت کہ ارش کنوکاں چہ پولیس ءِ کارندہاں سلاہ چست کنگ ءَ پد پولیس اسٹیشن سرجم ءَ سُتکگ۔

انگت اے گپ پدر نہ اِنت کہ اے اُرش کئے ءَ کتگ ءُ نہ کہ ھچ گل ءَ اے وئیل ءِ زمہ واری زرتگ۔

اے وئیل ءِ بابت ءَ انتظامیہ ءُ پولیس ءَ تاں انوگ ءَ سرکاری بیان شنگ نہ بوتگ۔

بلوچ لبریشن آرمی ءَ پاکستانی پوج ءِ سر ءَ اُرش ءِ تامر شنگ کتگے نوکتریں سلاہ، تھرمل اسکوپس ءِ گون ءَ ھترناکیں اُرش ءَ پاکستانی پوج ءَ جانی تاوانانی دیمپانی کنگ کپتگ-

بی ایل اے ءِ آفیشل میڈیا چینل ھکل ءَ شنگ بیتگیں تامر گوستگیں روچاں نُھ مئی ءَ پنجگور ءِ دمگ بونستان ءَ پاکستانی پوج ءِ کاروان ءِ سر ءَ اُرش ئیگ انت- اے اُرش بی ایل اے ءِ ھترناکیں اُرشانی بھر بیتگ کہ بی ایل اے ءَ آپریشن ھیروپ ءِ دومی درچ ءِ چن ءُ لانچاں سرجمیں بلوچستان ءَ 58 جاھاں 78 اُرش کتگ بیتگ انت-

اے اُرشاں شھرانی کنٹرول کنگ، شھدگانی سر ءَ ناکہ بندی، پورسز ءِ چوکیانی دستیگ ءُ سلاھانی برگ ءُ مڈی بروکیں گاڑیانی نشانگ کنگ ھوار انت-

شنگ بیتگیں تامر ءَ پاکستانی پوج ءِ گاڑی ءُ پرپٹ گندگ بنت اِنت – اے اُرش ءَ پاکستانی پوج ءِ سَے گاڑی ءُ پرپٹ اُرش ءِ نشانگ ءِ زد ءَ آیگ ءَ گندگ بنت اِنت ءُ اود ءَ پوجی نوکتریں سلاھاں گوں نشانگ کنگ ءَ گندگ بنت اِنت-

اُرش ءَ یک کواڈ کاپٹرے بلوچ جنگولانی ڈائریکٹ ھٹ کنگ ءَ تباھی ءَ گندگ بیت انت ءُ ترندیں اُرش ءَ ایوکیں یک گاڑی ءَ آس لگ ایت –

بلوچ لبریشن آرمی ءِ جارکش ءِ رد ءَ اے اُرش ءَ کساسی پاکستانی پوج ءِ چاردہ کارندہ مرتگ انت-