TBP Balochi

بلوچستان ءِ جتاجتائیں دمگاں پاکستانی پوج، ڈیتھ اسکواڈ ءُ بند ساچی شرکتانی سر ءَ بلوچ آجوئی لوٹوکیں سلاہ بندانی نیمگ ءَ اُرش یکشل ءَ برجاہ ءَ اِنت-

دومی نیمگ ءَ اے بیتگیں جتاجتائیں اُرشانی زمہ واری بلوچ لبریشن آرمی ءُ بلوچستان لبریشن فرنٹ ءَ منّ اِتگ اَنت-

دومی نیمگ ءَ بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ مئے سرمچاراں مستونگ ءُ کیچ ءَ زورگریں پاکستانی پوج آئی ای ڈی اُرش ءِ نشانگ کتگ وھدے کہ چہ سوراب ءَ دزگیریں پوج ءِ چریک مرگ ءِ سزا داتگ-

جارکش ءَ گوشتگ کہ گوستگیں روچ ءَ مستونگ ءِ دمگ دشت ءَ سرمچاراں زورگریں پاکستانی پوج ءِ پیادگ کارمند ھما وھد ءَ ریموٹ کنٹرول آئی ای ڈی تراک ءِ نشانگ کتگ اَنت وھدے آ ریل ٹریک ءِ کلئرینس ءَ دلگوش بیتگ اَنت- تراک ءِ آسر ءَ یک کارندھے جاہ پہ جاھی مرتگ ءُ دو ٹپی بیتگ اَنت-

جارکش ءَ گوشتگ کہ مروچی کیچ ءِ دمگ گورکوپ ءَ سرمچاراں زورگریں پوج ءِ گاڑی ریموٹ کنٹرول آئی ای ڈی ءَ چہ نشانگ کتگ ءُ چریشی ءِ آسر ءَ سے کارندہ مرتگ ءُ وھدے کہ گاڑی سرجمی ءَ تباہ بیتگ-

جارکش ءَ گوشتگ کہ بلوچ لبریشن آرمی ءِ سرمچاراں 17 ستمبر ءَ سوراب ءِ دمگ چہ گدر ءَ پوج ءِ چریک ءُ چاریگ اسحاق مینگل ء خیر جان جھمنند چھڈ، گدر آئی ءِ اوتاک ءَ چہ دزگیر کتگ ءُ سلاہ ھم برتگ اَنت-

جارکش ءَ گوشتگ جُست ءُ پُرس ءِ میان ءَ اسحاق مینگل ءَ منّ اِتگ کہ آ زورگریں پوج ءِ جوڑ کتگیں وتگڑیں ڈیتھ اسکواڈ سروک شفیق مینگل ءِ چیردستی ءَ پُرکار بیتگ ءُ سوراب ءَ اختر ء ٹکری یار محمد مینگل ءِ سروکی ءَ چریکے ءِ بستار ءَ کار ءَ بیتگ- آئی ءَ دیمتر ءَ منّ اِتگ کہ آیانی ٹولی سوراب شھر ، گدر ءُ بسیمہ ءَ زورگریں پوج ءِ کمکاری ءَ ھوار بیتگ-

جارکش ءَ گوشتگ آئی ءَ منّ اِتگ کہ سوراب ءَ چہ صابر نامیں ورنایے زورانسری بیگواہ کنگ ءَ آ وت تچکی ءَ ھوار بیتگ، ءُ بسیمہ ءَ لوگانی سر ءَ بیڑاں ھم آیانی ٹولی ھوار بیتگ- آ زورگریں پوج ءِ واستا راھانی چارگ، ناکہ جنگ ءُ گاڑیاں زر گرگ ءَ ھم ھوار بیتگ، کہ تچکی ءَ لشکر ءِ بُنجل ءَ تاں سر کتگ اَنت-

جارکش ءَ گوشتگ اسحاق ءَ اے ھم گوشتگ کہ آیانی ٹولی زورگریں پوج ءَ راش پُجّارینگ ءَ ھوار بیتگ، ءُ اشی ءِ بدل پوج ءَ آ دُزی ءُ ڈنگی ءَ یل داتگ اَنت-

جارکش ءَ گوشتگ کہ آئی ءِ منّگ ءَ پد بلوچ راجی آمیدگس ءَ اسحاق مینگل راجدروھی سر ءَ آیگ ءَ مرگ ءِ پرمان داتگ ءُ آئی ءِ سر ءَ گوستگیں روچ ءَ کار کتگ-

جارکش ءَ گوشتگ بلوچ لبریشن آرمی اے اُرشانی زمہ واری ءَ منّ اِیت ءُ جار جنت کہ زورگریں لشکر ءُ آئی ءِ ھمکارانی ھلاپ ءَ کاروائیاں برجاہ دار اِیت-

ھمے وڑ بلوچستان لبریشن پرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گوشتگ کہ بیست چار ستمبر 2025 ءِ سُھب ھشت ءَ آواران ءِ دمگ بزداد ، کرکی ءِ ھند سر ءَ زورگریں پاکستانی پوج ءِ پیادگ گشتی ٹولی ریموٹ کنٹرول بمب تراک ءَ نشانگ کتگ اَنت چریشی ءِ آسر ءَ دو لشکر ءِ کارندہ جاہ پہ جاھی مرتگ اَنت ءُ سے ٹپی بیتگ اَنت- اُرش ءِ نیم ادار ءَ پد ھیلی کاپٹر اتکگ ءُ پوجیانی لاش ءُ ٹپی برتگ اَنت- سرمچار کاروائی ءَ پد پہ سلامتی وتی مُھریں اوتاکاں سر بیتگ اَنت-

جارکش ءَ گوشتگ کہ دگہ یک کاروائی یے بیست ستمبر 2025 ءَ بی ایل ایف ءِ سرمچاراں بارکھان ءِ دمگ وادی بغاؤ، پرغاڑہ دگ سر ءَ کنسٹرکشن ءَ کارکنوکیں شرکت ءِ مشینری ءِ سر ءَ تیرگواری کتگ ءُ پد کریش پلانٹ ءَ ھوار مشینری مانداشتگ اَنت چریشی ءِ آسر ءَ مشینری ءَ سک تاوان رس اِتگ، مشینری ءَ جنریٹر ءُ گریڈر ھم ھوار اِنت-

جارکش ءَ گوشتگ بی ایل ایف ءَ اے بیتگیں سرجمیں اُرشانی زمہ واری ءَ منّ اِیت-

بلوچستان ءِ سیاسی ءُ وکیلانی گلاں پاکستانی پوج ءِ دست ءَ زبیر بلوچ ءِ کوش ترندی ءَ گوں ایرجتگ ، آئی ءِ گل بی ایس او پجار ءَ زبیر بلوچ شھید ء ڈگار ءِ پنام داتگ ۔

پاکستانی پوج ءَ مروچی بلوچ اسٹوڈنٹس آرگنائزیشن پجار ءِ گوستگیں سروک ءَ ھوار دو مردم تیرباران کتگ ءُ کشتگ انت ۔

وئیل ءِ سرا بلوچستان بار کونسل ءَ وتی شنگ کرتگیں درشان ءِ تہ ءَ گوشتگ کہ زبیر بلوچ ءَ مدامی ملک ءِ تہ ءَ کانود ءُ رھبندانی ھاتر ءَ وتی کرد پیلو کتگ ۔ آ پرایمنیں ءُ ءُ وکیل ءِ بوتگ وج ءِ دست ءَ آئی ءِ کوش وکیلانی ھاترا پدردی گپ ئے ۔

آیاں اے وئیل ترندی ءَ گوں ایرجتگ ءُ چہ سرکار ءَ لوٹ کتگ کہ زبیر بلوچ ایدڈوکیٹ ءِ کشندہ دزگیر کنگ ءُ سزا دیگ بہ بنت ۔

بلوچستان بار کونسل ءَ وئیل ءِ بگیری ءَ باندا 25 ستمبر ءَ سرجمیں بلوچستان ءَ آمیدگسی کارانی بائیکاٹ ءِ جار جتگ ۔

بی ایس او پجار ءَ پاکستانی پوج ءِ دست ءَ کشگ بوتگیں گل ءِ گوستگیں سروک زبیر بلوچ شھید ءِ ڈگار ءِ پنام داتگ ۔

گل ءِ بنجاھی جارکش ءَ وتی درشان ءِ تہ ءَ گوشتگ کہ گل ءِ گوستگیں سروک زبیر بلوچ ایمنیں جھد ءُ راجی ھزمتکار ءِ بوتگ ۔ آئی ءِ سروکی ءَ گل ءَ مدامی الم ءُ زانت ، ھک ءُ انسانی ھکانی ھاتر ءَ کار کتگ ، آئی ءِ کرد ھر یک باسکے ءِ ھاتر ءَ روکیں چراگے انت ۔

گل ءَ وتی درشان ءِ تہ ءَ گوشتگ دالبندین ءَ زبیر بلوچ ءِ گس ءِ سرا بیڑ برگ ءُ ارش کنگ بوتگ کہ ھمودا آ نمیران کنگ بوتگ ۔ اے دلپدردی وئیل ءَ تھنا آئی ءِ کھول ناں بلکنہ گلءُ سرجمیں بلوچستان ءَ آئی ءِ منوگر گمزدگ کتگ انت ۔

گل ءَ وتی گوستگیں سروک ءِ یات ءَ پنچ روچ ءَ پرس دارگ ءِ جار جتگ ءُ گوشتگ کہ اے میان ءَ گل ءِ درسیں کار دارگ بنت ءُآئی ءِ یات ءَ مراگش کنگ بنت۔

آئی ءَ گوشتگ کہ زبیر بلوچ ءِ دیمھونی ھچبر شموشگ نہ بنت آئی ءِ ایمنی ھک ءِ کاراں دیم ءَ برگ ءِ جھد ءَ کن ایں ءُ ھر باسکے ءِ سرا پرز انت کہ آئی ءِ رندپداں بہ روت ءُ اے دیمھونی مارا یکجاھی بوگ ءِ زرمبشت ءَ دنت ۔

ھمے وڈ نیشنل پاٹی ءَ بی ایس او پجار ءِ گوستگیں سروک ءِ گس ءِ سرا بیڑ ءُ آئی ءِ کوش ترندی ءَ گوں ایرجتگ ءُ گوشتگ کہ پھازگی کارمنداں ایوک ءَ سیاسی باسک ءِ ناں بلکنہ ءَ کانود ءِ زانتکار ءِ وتی تیرانی آماچ کتگ کہ سک باز پدردی گپ ئے ۔

ھمے وڈ بلوچ نیشنل مومنٹ ءَ ھم اے وئیل ترندی ءَ گوں ایرجتگ ءُ گوشتگ کہ ایڈوکیٹ زبیر بلوچ یک ایمنیں سیاسی باسک ءُ انسانی ھکانی مھکمیں پھازدار ءِ بوتگ کہ پاکستانی پوج ءَ آئی ءِ گس ءَ بیڑ برتگ ءُ گوں ھمراہ ناسر بلوچ ءَ تیرباران کتگ ءُ کشتگ ءُ بے شرمی ءَ پاکستانی پوج ءَ اے ارش ءُ آیانی کوش ءِ زمہ واری ھم زرتگ ۔

بی این ایمءِ جارکش ءَ گوشتگ کہ چریشی ءَ ریاست ءَ وتی ناشرکاری وت پدر کتگ انت ۔ ایڈوکیٹ زبیر بلوچ بلوچستان ءِ مھکمیں توارے بوتگ کہ آئی ءَ زورانسری آوار جنی ، مال مڈیانی لٹ ءُ پل ءُ برجاھیں انسانی ھکانی لگتمالی ءِ بگیری ءَ توار چست کتگ ھمے ھاتر ءَ آ پہ زانت نشانگ کنگ ءُ نمیران کنگ بوتگ ۔

جارکش ءَ گوشتگ کہ پاکستانی پوج بلوچ راجی جھدے بگیر دارے ءُ آئی ءَ درملکی دزمانجنی ءِ گوش ایت ۔ ھتاکہ فتنہ الہندوستان ءِ وڈیں گال کارمرز کنت ءُ جھان ءَ گمراہ کنگ ءِ جھد ءَ انت ۔

آئی ءَ گوشتگ کہ اے کس ءَ نہ بکش انت زھگ ءُ زالبول ، ایمنیں باسک درستاں نشانگ کن انت ءُچیرمین زبیر بلوچ ءِ کوش وت یک گواھی ئے کہ پاکستان ھر ھما توار ءَ ایرموش کنگ لوٹ ایت کہ پہ بلوچ ءِ ھکانی ھاتر ءَ چست بیت ۔

گل ءَ گوشتگ کہ چیئرمین زبیر بلوچ کہ بی ایس او پجار ءِ گوستگیں سروک ءُ یک پارلیمانی پاٹی ءِ نودربر ونگے ءِ رھشون بوتگ ، کانود ءِ تہ ءَ گریجویٹ کتگ بوتگ ءُ پرایمنیں سیاست ءِ مھکم بوتگ آئی کوش اے گپ ءَ پدر کنت کہ ریاست کجام بی وڈا پرایمنیں بگیری داروک ءُ سرجمی راج ءَ ھلاس کنگ ءِ جھد ءَ کنگ ءَ انت ۔

بی این ایم ءِ جارکش ءَ گوشتگ کہ اے وئیل برجاھیں بلوچ چکچینی ءِ بھر انت ۔ مروچی پاکستان اکوام متھدہ ءِ تہ ءَ اوشتیت انسانی ھکانی المبرداری ءِ ٹاہ ءَ دنت بلے راستی پدر انت آئی پوج درسیں رھبنداں لتگتمال کنان ءُ گسانی سرا بیڑ بارت ءُ دستگوشیں مردم ھتاکہ ننکیں زھگاں ھم کش ایت ۔

گل ءَ لوٹ کتگ کہ اکوام متھدہ ءِ برجاھیں اجلاس ءَ اے جیڑہ شریں وڈی ءَ چست کنگی انت ءُ پاکستا ن وتی کتکاریانی جوابدھی آرگی انت ۔

بلوچستان ءِ دمگ چاگی ءِ ھند دالبندین ءَ چار شمبے ءِ سھب ءَ پاکستانی پوج ءَ یک لوگے ءِ سر ءَ اُرش کتگ ءُ ھمے وھد ءَ تیرگواری ءُ گولہ باری ءَ بلوچ اسٹوڈنٹس آرگنائزیشن (پجار) ءِ گوستگیں سروک زبیر بلوچ ءَ ھوار دو مردم بیران بیتگ انت-

واکداراں اے وئیل راست کتگ ءُ گشتگ کہ اے آپریشن ”انٹیلی جنس ءِ بیسڈ“ ءِ بنیاد ءَ کنگ بوتگ۔ واکدارانی رد ءَ زبیر بلوچ ءُ آئی ءِ ھمراہ ناصر ھما وھد ءَ بیران بوتگ اَنت کہ آیاں پاکستانی لشکر ءِ سر ءَ تیر گواری کتگ ۔

واکدارانی گشگ انت کہ اے درگت ءَ زبیر بلوچ ءَ ھم وت ءَ تیر جتگ ءُ آئی ءِ دگہ ھمراھے جھانزیب دزگیر کنگ بوتگ۔

زبیر بلوچ پیش ءَ بی ایس او (پجار) ءِ چئیرمئن بوتگ ءُ رند ءَ کانونی پیشہ ءَ گوں ھمگرنچ بوتگ۔ بلوچ سیاسی ھلکاں یک پرکاریں جُھدکارے زانگ بوتگ۔

شہ ھارون دوستین داں مَڑا

نبشتہ کار: باول چراگ

دی بلوچستان پوسٹ

بلوچ ءِ سرزمین شہ کرناں جنگانی دیمپان اِنت انگت جنگانی تہ ءَ بُڈ اِتگ بلے بلوچ ءَ پہ وتی زمین ءِ رکینگ ءَ اوں شہ کرناں سراں کپن بستگ ءُ سرانی دیمونی دیگ ءَ اَنت اے دیمونیانی تہ ءَ بازیں سرے تاں ابد نمیران بوتگ ءُ بُوان اِنت انگت بنت۔ شہ مھراب خان ءَ بگر تاں کالا خان مری ءَ شہ عبدالکریم شورش ءَ بگر تاں ھپتاد سالی کماش نواب نوروز خان ءَ شہ بالاچ مری ءَ بگر داں استاد اسلم ءَ ھزارانی کچ ءُ کساس ءَ نمیرانیں کارست پہ اے زمین ءِ رکینگ ءَ زمین ءَ پہ وت گچین کرتگ اَنت زمین چوناھا وتی کارستاں وت گچین کنت ءُ رودین اِیت پد ءَ ھمے کارستاں تا ابد وتی سینگ ءَ جاگہ دنت ءُ واپین اِیت شہ ھمے کارستاں یکے شھید ھارون (پنام دوستین ءُ شہ دوستی سنگتاں آئی ءِ نام مَڑا ایر کرتگ اَت)
مڑا من اولی بر ءَ دیستگ اَت من سرپد بوتان ءُ اے زانت کہ آ یک سرجمیں سرمچارے آئی تہ ءَ سرمچاری ءِ ھمک چھر ءُ شُبین ھمک کرد ھست اَت۔ سنگتے ءَ ھال اھوال کرت من ءَ گُشت ئِے کہ امّا شمئے نزیک ءَ آھتگاں تو بیا مئے نیمگ ءَ چکرّے بہ جن ءُ پہ ما چیزکے سامان ءُ راشن گوں وت بیار ایدگہ روچ ءَ من سنگتے زُرت ءُ راشن گپت اَنت ءُ سنگت ھال ءُ اھوال کرت کجام ٹِک ءَ بیا آں سنگت ءَ من ءَ سوج دات اے جاگہ پہ من نوک نہ اَت بلے اے راہ پہ ما نوک اَت پرچا کہ اے دمگ ءَ چد ءُ ساری من ھچ نہ شُتگ اِتاں ھیر ما سنگت ءَ ھال گران ءُ در کپت ایں وھدے ما سنگتانی کر ءَ رس اتیں سنگت مھلہ مئے ودار ءَ کوہ ءِ ٹُلّے ءَ اوشتوک اَت سنگت ءَ مارا اشارہ کرت ما راہ تاب دات دیم پہ سنگت ءَ ھمے شیپ زرت ما کمو دیم ءَ شُت ءُ داشت سنگت آھت ءُ مڑا ھمراہ اَت ما نشت ءُ دیوان ءُ وشگپی بوت گڑا آ دگہ سنگت کمو دور ءَ دیم ءَ اِت اَنت اے روچ ءَ گڑا ما زوت بِرتر اِتیں کہ امّارا کمو کار ھست اَت۔
ایدگہ روچ ءَ گڑا پد ءَ امّا دگہ لھتیں راشن زرت ءُ پہ سنگتاں شُتیں گڑا امّا جْوانیں دیوانے کرت مڑا من گوں ھورتی ءَ چار اِت مڑا ءِ تہ ءَ یک سرجمیں سرمچارے ءَ دراھیں کرد پدّر اِت اَنت مڑا دیوان ءُ وشگپی ، سادگ تبین ءُ مھروانیں سرمچارے اَت ھمک کار ءِ شہ سنگتاں ساری اَت سک باز مھنتی ءُ جپا کشیں سنگتے اَت نیمروچ ءِ وھد اَت من ءُ سنگت کمو برز ءَ شُتگ اتیں کہ راہ ءُ در چارتگ اِت اَنت کسمت ءَ آ روچی مُج اَت کہ مردم ءَ کساس سد دو سد گام ءَ دیم میم نہ کرت ماتکوھیں ھسار دُراہ مج ءَ وتی چادر پِر داتگ اَت کمو دیر ءَ کہ ما ایر کپتیں دیم پہ اوتاگ ءَ آھتیں گڑا مڑا ءَ دیگ تیار کرتگ اَت نان آؤرت اَنت نان وارت ءُ پد ءَ دیوان ءُ ھندگ ءُ مزاک۔

من انچو مار اِت گش ئے زاناں مڑا ما شہ کسانی ءَ گوں یکجاہ بوتگیں پہ مئے نز ءَ نہ گش ئے کہ پہ ما نوک اَت مڑا چیر جنگی(گوریلا وار) ءِ رپکاں گوں جوانی ءَ سرپد ءُ سوھوئیں سرمچارے اَت چو سنگت ءَ گپ ئیگ ءَ ھمک سرمچار وتی مٹ وت اَنت ھمے رنگ ءَ مڑا ھم وتی مٹ وت اَت مڑا بے درور اَت بلے گُشاں کہ زمین وتی کارستاں وت گچین کنت ھمے رنگ ءَ زمین ءَ مڑا پہ وت گچین کرتگ اَت سھب ءِ سر اَت کساس نو، دہ ءِ ٹیمب اَت من نیٹ پچ کرت چاراں ھر نیمگ ءَ بام ءِ روژنائی درپشگ ءَ اَت کہ دومی گل ءِ نیمگ ءَ بام آپریشن ءِ بندات بوتگ اَت راج گل ءُ شات اَت ھمک نیمگ ءِ دژمن ءِ سر ءَ سنگتانی باج بری ھال شنگ اِت اَت۔ ایدگہ روچ ءَ من پد ءَ کمو نیٹ گپت کہ ھال ءُ اھوالے چاراں داں منی چماں یک کلوے گوست کہ سوارب ءَ سنگتاں دژمن ءِ ٹوھیں بنجل ءِ سر ءَ ارش کرتگ ءُ دژمن گیش ءَ شہ گیش تاوان بار کرتگ پہ من بژنی گپ ایش اَت کہ ھمے جنگ ءَ سنگتے ھم شھید بوتگ اَت ءُ پہ زمین نمیران۔ گڑا شپ ءِ وھد ءَ ھما روچیگیں سنگت آھت ءُ منی کر ءَ موبائل شہ کیتو ءَ کش اِت ءُ مڑا ءِ اکس من ءَ ئِے پیش داشت ءُ آسردے جت ئِے گشت ئِے باول زیکیں جنگ ءَ مڑا پہ زمین نمیران بوتگ مڑا ءِ اکس ءِ چارگ ءَ گوں من یکبرے ھشک ءُ بے توار بوتاں گش ئے زمین نزّ آھت ءُ آزمان جھل کپت مڑا آ روچیگیں دیوان ءُ مجلس گپ ءُ رپ کندگ ءُ ٹھک چو اکسے ءِ منی چمانی پردگ ءَ سُران بوت اَنت منی بالاد ءِ توانداری ایر پُرشت مڑا منی چمانی دیم ءَ زاھر اَت برے کندگ ءَ اَت ءُ برے چاہ دان دست ءَ اِت ئِے پیالھاں چاہ مانریچگ ءَ اَت مڑا ءِ ھمک سُر ءُ پُر منی چمانی پردگانی دیم ءَ زاھر بوان اَت اَنت

آہ ” مڑا

داں کوچگاں آسے بل اِیت تو زندگ ئے
داں بُرز ءَ استالے چم اِیت تو زندگ ئے

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ پاکستانی پوج ءَ بلوچ چُکچینی ءِ تہ ءَ گیشی آورتگ ھمکروچ بیگواھیں مردمانی تیرسُپتگیں لاش دزکپگ ءَ اَنت ءُ دومی نیمگ ءَ پاکستانی پوج ءِ چیردستی ءَ کارکنوکیں ڈیتھ اسکواڈ ءِ دست ءَ ورنایاں نشانگ کنگ ءُ کُشگ ءَ اِنت-

ھمے وڑ بلوچستان ءِ جتاجتائیں دمگاں پنچ بیگواھیں مردم یل کنگ بیتگ اَنت ، بلیدہ ءَ دو بیگواھیں مردمانی لاش دزکپتگ اَنت، اسلام آباد ءَ زھرشانی نندانک ءَ ھپتاد روچ سرجم بیتگ-

اسلام آباد ءَ بی وائی سی ءِ دزگیریں رھشون ءُ بیگواھیں مردمانی کھولاں زھرشانی نندانک ءَ ھپتاد روچ سرجم بیتگ-

ھپتادیں روچ ءَ پچّیں آزمان، تُرندیں مولم، گرم ءُ تھاریں شپ ءُ ریاستی بے تواری ءَ چہ مئے توار بے توار نہ کتگ اَنت-

آیاں گوشتگ اے تھنا زھرشانی نہ اِنت- اے درد ءُ نرمی ءَ چہ ودی بیتگیں یک زرمشبتے – اد ءَ ھرچ چھرگ ءِ پُشت تاوانانی کسہ اَنت، یک ماتے وتی چُک، گھار ءُ براتانی دلجمی ناکابل اوپار وزن ءِ چست کنگ ءِ ودار ءَ اَنت-

آیاں گوشتگ ھپتاد روچاں چہ ریاست ءَ یک چمے بند کتگ – انساپ ءِ جاہ ءَ بے پرواھی ءَ چہ گوں مارا دیوان بیت- پسّھانی جاہ بے تواری ءَ گوں مارا دیوان بیت – بلے کھول اوشتاتگ ءُ مھکم اَنت پرچاکہ ھک کل نہ بیت، ءُ انساپ ءِ گریوگ ھم ایرموش کنگ نہ بیت-

آیاں گوشتگ کہ ھرچ گوستگیں روچ مئے ھمت ءِ گواھی ءَ گیش کنت – اے یک نزوری یے نہ اِنت – اے تاکتے، ھپتادیں روچ و گوستگ اَنت بلے مئے جُھد برجاہ ءَ اِنت – مارا بے توار کُت نہ کن اَنت – مئے سلاھاں دور ندے ایں-دانکہ ھرچ بیگواھیں مردمے واتر نہ بیت دانکہ ھرچ کھول وتی دوستناکانی شوھاز ءَ نہ کنت دانکہ انساپ مہ بیت ءُ مئے گھگیری برجاہ بیت-

ھمے وڑ کیچ ءِ تھسیل چہ بلیدہ ءَ دو ورنایانی لاش دزکپتگ اَنت، کہ لاشانی جاور سک ھراب اَنت ءُ آ پجّارگ ءِ کابل نہ اَنت، بلے چہ آیانی کسیگ ءَ دزکپتگیں پجّار کارڈ ءَ آیانی پجّار کنگ بیتگ-

دزکپتگیں لاشانی پجّار معراج ء شیر محمد جھمنند گلی بلیدہ ءُ طلال احمد ء عبدالرشید ناماں چہ بیتگ اَنت-

کھول ءِ گوشگ اِنت کہ طلال ء عبدالرشید پوج ءَ پانزدہ اگست ءَ دزگیر کتگ ءُ زورانسری بیگواہ کتگ وھدے کہ معراج پاکستانی پوج ءَ پنچ ستمبر 2025 ءَ بلیدہ ءَ چہ تربت ءَ روگ ءَ بیتگ ءُ آوار جنگ بیتگ-

چمّگدانی رِد ءَ پوج ءَ آ لَٹ ءُ کُٹانی نشانگ کنگ ءَ پد زورانسری بیگواہ کتگ کہ چریشی ءَ پد آئی ءِ لاش دزکپتگ-

زانگ بہ بیت گوستگیں روچاں پاکستانی پوج ءَ چار بیگواھیں مردمانی لاش نادُراھجاہ ءَ سر کتگ اِت اَنت کہ آیانی پجار ستار، تارک جھمنند دشت ءُ زھیر جھمنند گیبن ءِ نام ءَ چہ بیتگ اَنت یکے ءِ پجّار انگت نہ بیتگ-

پاکستانی پوج ءَ چاریں مردم یک دروگیں میڑے ءَ جنگ ءِ ٹاہ داتگ اَت بلے اے یکرندے نہ اِنت اشی ءَ ساری ھم پاکستانی پوج ءُ سی ٹی ڈی ءَ بیگواھیں مردم دروگیں میڑاں جتگ ءُ دور داتگ اَنت-

دومی نیمگ ءَ بی ایس او ءِ گوستگیں چیئرمین کامریڈ عمران بلوچ چار ماہ ءَ پد مروچی بزانکہ سے شمبے ءَ یل کنگ بیتگ- آئی ءِ یل بیگ سے ایم پی او ءِ وھد ءِ ھلاس بیگ ءَ پد آمیدگس ءَ پرمان ءِ کار کنگ بیتگ-

کامریڈ عمران بلوچ ھمے سال مئی ءِ گُڈی ءَ بلوچ یکجھتی کمیٹی ءِ زھرشانی روانکانی سروکی ءُ بھر ءِ سوب ءَ صوبائی وزارت داخلہ پرنام رِد ءَ 3 ایم پی او ءِ بُنیاد ءَ دزگیر کتگ چریشی ءَ پد آ گڈانی سینٹرل جیل ءَ برگ بیتگ-

ھمے وڑ شانزدہ ستمبر ءَ چہ شال ءَ زورانسری آوار جنگ بیتگیں بسم قمبرانی وھدے کہ 22 جون چہ مستونگ ءَ بیگواہ کنگ بیتگیں جواد بلوچ، عنایت اللہ ء دُر محمد، بلوچ اسٹوڈنٹس آرگنائزیشن مستونگ زون ءِ رھشون غلام علی یل کنگ بیتگ اَنت-

ھالانی رد ءَ اوگانستان ءَ سینزدہ سالی گونڈو ءِ بالی گراب ءِ ٹیرانی تہ ءَ ٹپ اتگ ءُ وش ءُ سلامتی انڈیا ءَ سر بوتگ ۔

گیشیں ھالانی رد ءَ اوگانستان ءِ شھر کندوز ءَ سیادی داروکیں سینزدہ سالی زھگ یکشمبے ءِ روچ ءَ اوگانستان ءِ بالی گراب RQ -4401 ٹیرانی تہ ءَ ٹپ اتگ ءُ نئی دھلی ءِ بالی پٹ اندراگاندھی ءَ سربوتگ ۔

سینزدہ سالی گونڈو بالی گراب ءِ ایرآیگ ءَ پد نئی دھلی بالی پٹ ءِ رن وے ءَ تراتگ کہ چریشی ءَ پد بھارتی پھازگی کارمنداں آ گپتگ ءُ بازیں اداراں جست ءُ پرس ءَ پد واتر کابل ءَ دیم داتگ ۔

بنداتی جست پرساں گونڈو ءَ واکدارانی گور ءَ ھمے گوشتگ کہ آ بس چارگ ءُ ٹپاسگ ءِ ھاتر ءَ سوار بوتگ ۔

انڈیا ءِ پھازگی واکدارانی رد ءَ کابل بالی پٹ ءَ گونڈو ھچ وڈیں اڈاند نہ بوتگ کہ آ مساپرانی پشت ءَ چیرکاؤ بالی گراب ءَ سر بوتگ ءُ بالی گراب ءِ پشتی لینڈنگ گیئر ءِ کمپارٹمنٹ ءَ ٹپ اتگ ۔

پھازگی پٹ ءُ پول ءِ وھد ءَ گونڈو ءِ گور ءَ سھریں رنگ ءِ آڈیو لوڈکے ھم دست کپتگ ۔

انڈیا ءِ رسانک انڈین ایکسپریس ءِ رد ءَ سینزدہ سالی گونڈو اسل ءَ ایران ءَ روگی بوتگ بلے آئی ءَ نہ زانتگ کہ اے بالی گراب انڈیا ءَ رؤت ۔

اوگانستان ءِ سیمسری پولیس جارکش ءِ رد ءَ اشی ءِ پٹ ءُ پول بوگ ءَ انت ۔

زانتکارانی گوشگ انت اے وڑ ءَ بالی گرابانی ٹیرانی تہ ءَ ٹپگ ءِ وئیل گیشتر یورپ ءُ امریکہ ءَ رؤکیں بالی گرابانی تہ ءَ بوتگ انت بلے کزا یکے وش ءُ سلامتی شتگ ءُ سر بوتگ ۔ گیشتر بے ھوشی ءِ وھد ءَ وھدیکہ بالی گراب ءِ ٹیر پچ بوتگ انت گڈا آ کپتگ ءُ بیران بوتگ انت ۔

زانگ بہ بیت جنوری 2004 ءُ 2015 ءِ میان ءَ برتانیہ ءِ بالی پٹ ءَ شش ھنچیں مردم گرگ بوتگ انت کہ بالی گراب ءَ ٹپ اتگ بوتگ انت ۔ بالی گراب ءِ ٹیرانی تہ ءَ ٹپ اتگیں مردم گیشتر ورنا انت ۔

جون 2010 ءَ بیست سالی رومینیئن کہ ویانا بالی گراب ٹیراں ٹپ اتگ لندن ءَ شتگ بلے ھرابیں موسمے سوب ءَ آ بیران بوتگ ۔

اشی ءَ ابید بیست ءُ دو سالی آرمانڈو سوکراس رامیریز 1969 ءَ کیوبا چہ مڈرڈ ءَ شتگ ءُ 1996 بیست ءُ سَے سالی پردیپ سائینی دلی ءَ چہ لندن ءَ شتگ کہ رک اتگ انت بلے پردیپ ءِ برات ہیتھرو ٹیرانی پچ بوگ ءَ کپتگ ءُ بیران بوتگ ۔

ھمے وڈ 2000 ءَ ،فیڈل ماروہی تاہیتی ءَ بالی گراب ءِ ٹیرانی تہ ءَ سوار بوتگ لاس اینجلس وش ءُ سلامتی سر بوتگ ۔

مستونگ ءَ پاکستانی پوج ءِ کارندہ ھما وھد ءَ بمب تراک ءِ نشانگ جوڑ کنگ بوتگ اَنت کہ آ ریل ءِ ٹریک ءَ کلئرینس کنگ ءَ بوتگ انت-

فورسز ءِ سر ءَ تراک مستونگ ءِ دمگ دشت ءَ بوتگ وھدے کہ تراک ءِ آسر ءَ فورسز ءِ تہ ءَ تاوانانی دیمپان بوگ ءِ گمان انت۔

وکداراں انگت ءَ اے تاوان ءِ بابت ءَ ھچ وڑیں ھال ءُ اھوال نہ داتگ۔

زانگ بہ بیت کہ بلوچستان ءَ ریل ءِ سروس سیکورٹی ءِ جیڑھانی دیمپان انت۔ اے جیڑہانی سبب ءَ اے ماہ ءَ دو رند ءَ ریل ءِ سروس مھتل کنگ بوتگ۔

ھمے سال ءَ بلوچ لبریشن آرمی ءَ جعفر ایکسپریس ءِ سر ءَ اُرش ءَ ریل دستیگ کتگ ءُ ریل ءِ تہ ءَ سوار دو سد ءَ چہ گیش پاکستانی لشکر بیران بوتگ انت ۔

پد ءَ گوستگیں ماہ ءَ جعفر ایکسپریس ءِ سر ءَ دو اُرش بوتگ کہ ایشی ءَ پد بازیں رند ءَ سیکورٹی ءِ جیڑھانی سبب ءَ ٹرین بند کنگ بوتگ۔

بلوچستان ءَ پاکستانی پورسز ءُ آئی ءَ بندوکیں چیزانی سر ءَ یکشل ءَ اُرز برجاہ انت کہ اود ءَ پاکستان یک نیمگے ءَ دری ملکاں گوں بلوچستان ءِ مڈیانی سودا ءَ جنگ ءَ انت دومی نیمگ ءَ آئی ءَ بلوچستان ءَ ترندیں سیکورٹیانی جیڑھانی دیمپانی انت-

زانتکارانی گوشگ انت بلوچستان ءَ داں جیڑھانی گیش ءُ گیوار مہ بیت گڑا بزانکہ پاکستان دری ملکاں پہ بلوچستان ءِ مڈیانی سودا جنگ ءَ رَد دیگ ءَ انت-

چوشکہ چائنہ ءَ گوں پاکستان ءَ گوادر پورٹ ءُ دگہ پروجیکٹاں جتگیں سودایاں بازیں سیکورٹیانی دیمپانی انت ءُ پروجیکٹ اوشت ءِ آماچی ءَ گندگ ءَ آیگ ءَ انت-

مروچیگیں دور ءَ بلوچی زبان ءِ ارزشت

نبشتہ کار: جھانزیب بلوچ

دی بلوچستان پوسٹ

زبان چہ گپ جنگ ءِ وسیلہ ءَ گیش اِنت- آ یک راجے ءِ جان اِنت۔ اے راجدپتر، پجار، دودمان، دود ءُ ربیدگ ءُ جزبگ ءِ آدینگ اِنت۔ یک انچیں زبانے کہ آئی ءِ رِد جھلان ءُ زوراکیں مانا ءِ واھند اِنت آ بلوچی اِنت۔ مرچیگیں نوکیں دگنیا ءَ کہ اود ءَ بازیں دمگی زبان مِرگ ءَ اماچ اَنت، بلوچی زبان انگت ءَ بلوچ ءِ زرباری مڈّی ءِ نشانی ءِ بستار ءَ اوشتاتگ۔ اے نبشتانک ءِ تہ ءَ ما اے گپ ءِ پٹ ءُ پول ءَ کنیں کہ بلوچی زبان مرچی ھم پرچا ھژدری اِنت، چون گوان نسلاں ھمگرنچ کنت ءُ ما پہ آئی ءِ رکینگ ءُ دیم ءَ برگ ءَ چے کُت کنیں۔

بلوچی ایوک ءَ یک زبانے نہ اِنت-اے بازیں بلوچ راج ءِ پجار اِنت کہ سرجمیں پاکستان، ایران، اوفگانستان، عمان ءُ دگنیا ءِ دگہ دمگاں نشتگ اَنت۔ بلوچی ءَ گپ جنیں گڑا ما ایوک ءَ گپ نہ جنیں- ما وتی پیرینانی، وتی بامرد ءُ وتی شائرانی توار ءَ شریک ایں. ھر رد ءِ تہ ءَ ، تکبر ءِ گپ اِنت۔ ھر شھر ءِ تہ ءَ گھگیری گندگ بیت۔ ءُ ھر لولی ءِ تہ ءَ زمین ءِ سر ءَ مھر ءُ دوستی ھست۔ بے وتی زبان ءَ بوت کنت ما وتی دود ءُ ربیدگ ءِ جند ءَ چہ زبھر بہ بئیں۔ اے چو بے رِدیں درچکے ءَ اِنت۔ بلوچی زبان ءِ ھزاراں سالانی دپتر ءِ سر ءَ اِنت۔ آئی ءَ بلوچ راج ءِ دود ءُ ربیدگ، کسہ، کدر ءُ زانت زندگ داشتگ اَنت۔ بلوچی زبانی لبزانک – راج دپتر، زیمر ءُ بھادریں بالاد – مارا اپسانوی جنگول، بھادریں جنین ءُ زانتکاریں پیرینانی بابت ءَ گپ جنت۔ گُل خان نصیر، عطا شاد، مبارک کازی ءُ دگہ بازیں نامداریں شائراں بلوچی ءَ جوانیں شیر نبشتہ کتگ۔ اے شائراں ایوک ءَ زبان ناں، بلکیں بلوچ نیشنلزم ءِ جند ءَ ھم جوڑ کتگ۔ بید ء چہ بلوچی ءِ سرپد بوگ ءَ ما بلوچ ءِ جھد، مھر، ءُ درد ءَ سرجمی ءَ سرپد بوت نہ کنیں۔

مرچی دنیا گوں تیزی ءَ بدل بوگ ءَ اِنت۔ انگریزی، اردو ءُ دگہ مزنیں زبان چہ وانگجاہ، رسانکدر ءُ انٹرنیٹ ءِ سوب ءَ دیمروی کنگ ءَ اَنت۔ بژنی گپ ایش انت کہ بازیں بلوچ زھگ بلوچی ءَ وانگ ءُ نبشتہ کنگ ھم نہ زان اَنت۔ لھتیں دمگاں تاں وانگ جاھاں بلوچی وانینگ نہ بیت۔ اے یک مزنیں ھترہ یے۔ اگاں زبان ءِ کارمرز کنگ مہ بیت، وانینگ مہ بیت یا نبشتہ کنگ مہ بیت- آ کم کم ءَ مرگ ءَ بندات کنت۔ باز جاہ ءَ گوں بلوچی ءَ چوش بوگ ءَ اِنت۔ نوکیں پدریچ وتی ماتی زبان ءَ شموشگ ءِ وھد ءَ دگہ زباناں گپ جنگ ءَ مزن بوگ ءَ اِنت۔ اگاں ما وتی زبان ءَ گار کنیں گُڑا ما وتی یک بھرے گار کنیں۔

مرچیگیں نوکین ءُ ڈیجیٹل دگنیا ءِ تہ ءَ ھم بلوچی زبان مزنیں بستار ءُ بستارے دار اِیت۔ اے زند ءِ بازیں پڑاں یک مھکمین ءُ بامردیں وسیلہ یے جوڑ بوت کنت۔ لوکل رسانکدر ءِ تہ ءَ بلوچی زبان ءِ گیشتر ٹی وی چینل، ریڈیو شو، ءُ یوٹیوب ءِ مواد جوڑ کنگ ءِ مزنیں موہ ھست کہ بلوچ راج ءِ توار ءُ دود ءُ ربیدگ ءِ اکس ءَ پیش بہ دار اَنت۔ سوشل میڈیا ءِ سر ءَ نوکیں نسل چہ بلوچی ءَ وتی ماتیں زبان ءَ پوسٹ نبشتہ کنگ، شیر شنگ کنگ، وتی ھیالانی درشان کنگ ءُ انگت ءَ میم جوڑ کنگ ءَ کارمرز کنت کہ آ وتی ماتیں زبان ءَ گوں دگراں ھمگرنچ بہ بیت۔ وانگ ءُ زانگ ءِ پڑ ءَ بلوچی ءَ وانگجاھانی تہ ءَ ھاسیں رنگ ءَ بلوچانی گیشتریں ھند ءُ دمگاں یک سبجیکٹے ءِ بستار ءَ بیارگ بیت کنت داں کہ نودربر وتی ماتی زبان ءِ دربرگ ءَ مزن بہ بنت۔ پد ءَ ٹیکنالوجی ءِ کمک ءَ بلوچی ءِ دیمروی ءُ کمک ءِ ھاتر ءَ مبائل ایپلی کیشنز، آن لائن ڈکشنری ءُ ڈیجیٹل ٹولز جوڑ کنگ بوت کنت کہ چہ ایشی ءَ بلوچی ءَ جھانی تک ءَ گیشتر کارمرز کنوکاں سر بہ بیت۔ اے ڈیجیٹل دور مارا یک موھے دنت کہ ما وتی زبان ءَ مھکم بہ کنیںن ءُ آئی ءَ سرجمیں دنیا ءَ گیشتر گندگ ءُ اھترام بہ کنیں۔

وھدے کہ زبان آن لائن ءَ گندگ بیت گڑا آ زبان گیشتر مھکم ءُ اھترام ءِ آماچ بیت۔ بلوچی زبان پہ ھاندانانی تہ ءَ جزباتی ھمگرنچی ءَ ھم المی اِنت۔ پیرک ءُ پیرک باز وھد ءَ ایوک ءَ بلوچی ءَ گپ جن اَنت۔ اگاں ورنائیں پدریچ ایشاں سرپد بوت نہ کنت گڑا کوھن ءُ نوکین ءِ نیام ءَ مزنیں دگے ودی بیت۔ بلوچی ءِ وانگ ءُ گپ کنگ ءَ چہ زھگ وتی پیرک ءِ داستاناں، وتی ماتانی زیمراں ءُ وتی مزنیں مردمانی پنتاں سرپد بوت کن اَنت۔ اے ھاندانانی یکجاہ دارگ ءَ کمک کنت۔ راجدپتر ءِ تہ ءَ بلوچی زبان گھگیری ءِ وسیلہ ءِ بستار ءَ کارمرز بوتگ۔ بلوچی ءِ تہ ءَ لچہ، گشتانک، ءُ نئرہ، زلم ءُ زوراکی ءِ ھلاپ ءَ توار چست کتگ۔ مرچی ھم بلوچی پہ گار ءُ بیگواھیں مردماں، آوار جتگیں مردمان، ءُ کش ءُ گوراں نشتگیں مردمانی توار ءِ بستار ءَ مان اِنت۔ بازیں ندکار، اھوالکار، ءُ ازمکار وتی درد ءُ راستی ءِ درانگازی ءَ بلوچی ءَ کارمرز کنگ ءَ اَنت۔ ھما زُبان کہ راستی ءَ بہ گْوش اِیت ھچبر نزور بیت نہ کنت۔ بلوچی زبان ءِ رکّینگ ایوک ءَ نبشتہ کارانی یا استادانی کار نہ اِنت-اے ھر بلوچ ءِ زمہ واری اِنت۔ زبان ءِ روچ ءَ دارگ: بلوچی زبان ءُ لبزانک ءِ دیم ءَ برگ ءِ مراگشانی برجم دارگ یا آیانی تہ ءَ ھوار بوگ۔ کسانیں کار ھم مزنیں بدلی یے آرگ ءَ اَنت۔ بلوچی زبان تھنا چہ لبزاں گیش اِنت۔ بلوچ دود ءُ ربیدگ ءِ دلبند اِنت۔ اے دنیا ءَ کہ دمگی زبان گار ءُ بیگواہ بوگ ءَ اَنت، بلوچی انگت زندگ اِنت- ءُ اے مئے پرز اِنت کہ ما ھمے رنگ ءَ بہ داریں. دگرانی ودار ءَ مہ کنیں۔ وتی زبان ءِ توار ءُ کلم ءُ ھمسپر بہ بئیں۔ بیا اِت گوں شان ءَ گْوش اِیں: (من بلوچے آن ءُ منی زبان بلوچی اِنت)

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ زورانسری آوار جنیانی ھلاپ ءَ زھرشانی روانک ءُ چار بیگواھیں مردم یک کنگ بیتگ ءُ دگہ یک بیگواہ کنگ بیتگ-

دوشمبے ءِ روچ ءَ لاء کالج تربت ءِ نودربراں جیئند لیاکت ءِ یل کنائینگ ھاتر ءَ روانکے کش اِتگ ءُ زھرشانی نکش کنائینتگ-

اے میان ءَ روانک ءَ نودربرانی مزنیں کچے ءَ ھوار بیتگ اَنت، زھرشانی کنوکانی دست ءَ پلے کارڈز بیتگ آیانی سر ءَ جیئند بلوچ ءُ دگہ زورانسری بیگواھیں نودربرانی یل کنائینگ لوٹ نبشتہ بیتگ اَنت-

زھرشانی کنوکاں جیئند لیاقت ءِ زوت یل کنائینگ ءِ لوٹ کتگ-

رسانکدر ءَ چہ تران کنان ءَ زھرشانی ءَ ھوار نودربراں گوشتگ کہ جیئند لیاقت بیست پنچ اگست 2025 ءِ شپ ءَ کیچ ءَ برجاہ یک لوگے ءَ چہ پاکستانی پوج ءَ آوار جنگ ءَ پد زورانسری بیگواہ کتگ چریشی ءَ پد آئی ءِ درگت ءَ ھچ وڑیں ھال دیم ءَ نیتکگ-

آئی ءَ گوشتگ کہ جیئند یک مھنتی نودربرے ءُ آئی ءَ زورانسری بیگواہ کنگ ناں تھنا کھول ءَ بلکیں زانتی ماھول سر ءَ اسر دور دنت-

ترانکاراں گوشتگ کہ وانگ ورنایانی بُنکی ھک اِنت، بلے نودربراں اے وڑ بیگواہ کنگ زانشتی ادارھاں تُرس ودی کنت-

تربت لاء کالج ءِ نودربراں جار جتگ کہ اگاں جیئند لیاقت ءَ زوت دیم ءَ آرگ نہ بیت گُڑا زھرشانی گیش دراجکش کنگ بیت-

ھمے وڑ بلوچستان ءَ زورانسری آوار جنی ءِ درچ یکشل ءَ برجاہ ءَ اِنت یک ورنایے آوار جتگ ءُ وھدے کہ چار مردم یل کتگ اَنت-

گیشیں ھالانی رِد ءَ سی یک جولائی 2025 ءَ چہ ناگ واشک ءِ دمگ ءَ پاکستانی پوج ءِ دست ءَ زورانسری بیگواہ کنگ ءَ پد زورانسری آوار جنی ءِ نشانگ بیتگیں پنجگور ءِ جھمنند عبدالکریم ء ھاجی ھاصل خان یل بیتگ-

ھالانی رِد ءَ آ بیست یک ستمبر 2025 ءَ وتی لوگ ءَ سر بیتگ-

ھمے وڑ بیست ستمبر 2025 ءَ پنجگور ءِ دمگ چہ پروم ءَ پاکستانی پوج ءِ دست ءَ آوار جنگ ءَ پد زورانسری آوار جنی ءِ نشانگ بیتگیں کریم رشید ء عبدالرشید ھم یل بیتگ-

ھمے وڑ کیچ ءِ دمگ تمپ آسیاد آباد ءَ یک مئی 2025 ءَ پاکستانی پوج ءِ دست ءَ زورانسری بیگواہ کنگ بیتگیں عاصم بلوچ ء حکمت اللہ کساس پنچ ماہ ءَ رند یل بیتگ ءُ وتی لوگ ءَ سر بیتگ-

ھمے ماہ ءِ ھشت ستمبر ءِ شپ ءَ چہ شال ءَ زورانسری بیگواہ کنگ بیتگیں مولانا خلیل اللہ شھاب ھم آجو بیتگ-

دومی نیمگ بیست ستمبر 2025 ءَ گوادر ءِ دمگ چہ بلوچ وارڈ ءَ ھلال ء مراد پاکستانی پوج ءَ آوار جتگ ءُ بیگواہ کتگ، کھول ءِ گوشگ اِنت کہ آئی ءِ درگت ءَ ھچ وڑیں ھال نیست-

زانگ بہ بیت بلوچستان ءَ یکے اگاں یل کنگ بیت ءُ وھدے کہ دگہ چار زورانسری بیگواہ کنگ بیت-

بلوچستان ءَ سیاسی گل ءُ انسانی ھکانی ادارہ میان استمانی مردم ءُ میان استمانی انسانی ھکانی ادارھاں چہ دزبندی کتگ کہ آ بلوچستان ءَ برجاہ ریاستی انسانی ھکانی لگتمالی ءِ سر ءَ گامگیج بہ زور اِیت ءُ زورانسری آوار جنی ءِ ھلاس کنگ ءُ بیگواھیں مردمانی یل کنائینگ ءَ کرد پیلو بہ کن اَنت-

بلوچستان ءَ جتاجتائیں دمگاں پاکستانی پوج، پوجی شرکت، گیس پائپ لائن ءُ ڈیتھ اسکواڈ کارندھانی سر ءَ اُرش کتگ-

ھمے وڑ بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ سرمچاراں زامران، کلات، ھاران، شال ءُ ڈھاڈر ءَ ھپت کاروائی کتگ – اشانی تہ ءَ زورگریں پاکستانی پوج، وتگڑیں ڈیتھ اسکواڈ ءُ گیس پائپ لائن نشانگ کتگ اَنت- اے میان ءَ پوج ءِ کارندھاں ھوار بازیں چریکی دزگیر کتگ ءُ آیانی سلاہ دستیگ کتگ اَنت-

جارکش ءَ گوشتگ کہ گوستگیں روچ ءَ زامران ءِ دمگ تنک ءَ سرمچاراں پاکستانی پوج ءِ بُنجل سر ءَ ساڑی یک کارندھے اسنائپر اُرش ءَ نشانگ کتگ ءُ کُشتگ ءُ اُرش ءَ کارمرز بوؤکیں پوج ءِ کواڈ کاپٹر ھم جتگ ءُ دور داتگ-

جارکش ءَ گوشتگ کہ بیست یک ستمبر ءِ شپ ءَ شال شیخ نادُراھجاہ ءِ نزیک ءَ بُنجاھی شھدگ ءِ سر ءَ ناکہ بندی ءِ میان ءَ پولیس ءِ کارندہ دزگیر کتگ ءُ سلاہ دستیگ کتگ ءُ پد ءَ آ یل داتگ- ھمے شپ ءَ ڈھاڈر ءَ کمبڑی پُھل ءِ ھند سر ءَ گیس پائپ لائن تراکناکیں شورواں گوں تباہ کتگ-

جارکش ءَ گوشتگ کہ نوزدہ ستمبر ءَ ھاران ءِ دمگ برشونکی ءَ بی ایل اے ءِ سرمچاراں ڈیتھ اسکواڈ ءِ سروک حافظ ممتاز ءِ اوتاک ءِ سر ءَ اُرش کتگ، اود ءَ چہ دو چریک دزگیر کتگ اَنت – اوتاک ءَ ساڑی سلاہ ءُ سامان دستیگ کتگ ءُ ماڑی مانداشتگ- ھمے دمگ ءَ سرمچاراں لیویز چوکی سر ءَ دستیگ کتگ چار کارندہ دزگیر کتگ ءُ پد ءَ یل داتگ اَنت-

جارکش ءَ دیمتر ءَ گوشتگ کہ ھژدہ ستمبر ءَ کلات ءِ دمگ منگچر ءَ پوج ءِ ناکہ بندی ءِ میان ءَ سرمچاراں دستی بمب ءَ چہ اُرش کتگ- چریشی ءَ یک کارندھے مرتگ ءُ سے ٹپی بیتگ اَنت – اُرش ءَ پد پوج ءَ سر ءُ دیم تیرگواری کتگ چریشی ءَ لَس شھری ھم ٹپی بیتگ اَنت-

جارکش ءَ گوشتگ کہ بلوچ لبریشن آرمی ءِ سرمچاراں کلات ءِ دمگ چہ زاوہ ءَ زورگریں پاکستانی پوج ءِ ایم آئی ( ملٹری انٹیلی جنس) ءِ یک کارندھے قیصر عباس جھمنند فتنڈ، گجرانوالہ دزگیر کتگ – کارندہ ءَ جرمانی منّگ ءَ پد بلوچ راجی آمیدگس ءَ آ مرگ ءِ پرمان داتگ چریشی ءَ سرمچاراں آئی ءِ سر ءَ کار کتگ ءُ کُشتگ-

ھمے وڑ بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں شھر ءِ نزیک ءَ سونا ھان ءِ ھند سر ءَ سرکاری جوڑ بیؤکیں شوربندی ءِ سر ءَ کارکنوکیں پوجی شرکت ءِ گاڑی ریموٹ کنٹرول آئی ای ڈی اُرش ءَ نشانگ کتگ- اے اُرش ءِ آسر ءَ پوجی شرکت ءِ یک رولر مشینری یے سرجمی ءَ تباہ بیتگ-

جارکش ءَ گوشتگ کہ دمگی ٹھیکیداراں کڈن کن ایں کہ آ ریاستی شوربندیاں چہ دیر بہ بنت، اگاں ناں آ وتی جانی ءُ مالی تاوان ءِ زمہ وار وت بنت-

گُڈی ءَ دوئیناں وتی درشانانی تہ ءَ اُرشانی زمہ واری منّ اِتگ ءُ داں بلوچستان ءِ وتواجھی ءَ تاں اُرشانی برجاہ دارگ ءِ کول کتگ-