TBP Balochi

بلوچ لبریشن آرمی ءَ بلوچستان ءِ دمگ سوراب ءُ مستونگ ءِ دگ بندی، بازار ءِ انگر ءُ سرکاری جاہ ءُ ماڑیانی ماندارگ ءِ تامر وتی جند ءِ چینل ”ھکل” ءَ شنگ کتگ انت ۔

تامر ءِ تہ ءَ گندگ بیت کہ کوہ ءِ تہ ءَ بی ایل اے ءِ سرمچار سلاہ بند انت ءُ آزاد بلوچستان ءِ بیرک ءِ مانپوش اتگ رؤگ ءَ انتءُ پد ءَ رندا پرپٹانی سر ءَ بازار ءَ پتر انت۔

سوراب چہ شال ءَ212 کلومیتر دیر انت ۔ ھنچوش کہ سرمچار بازار ءَ مانریچ انت لیویز پانگس ءَ انگر کن انت وھدیکہ ھمے میان ءَ دگ بندی ھم برجاہ انت ۔ تامر ءِ تہ ءَ زاھر انت کہ سرمچار پانگس ءِ تہ ءَ سلاھاں دستیگ کن انت ، ھندی کارمنداں دزگیر ءُ ایندگہ چیزاں پرشت ءُ پروش کن انت چہ اود یَ درکایاں دیم ءَ رواں ۔

تامر ءِ تہ ءَ گندگ بیت کہ ھنچوش کہ سرمچار بنجاھی بازار ءَ کایاں گڑا مھلوک گل ءُ شاتمانی کنت ۔ ھمے وھد ءَ آ سَے ادار ءَ تاں سوراب ءَ وتی کنٹرول ءَ کن انت ءُ بینک ءُ پولیس کارگس ءَ بیڑ بر انت۔ پولیس تانہ ءَ ساڑی ئیں درسیں گاڑیاں ماندار انت ءُ بلڈنگاں ھم مانداراں ، ھمدا بازیں سرکاری سلاہ ءِ ھم گر انت ۔

دومی تامر ءَ ھمے زاھر انت کہ سرمچار شال ءِ نزیکیں ھند مستونگ ءَ ولی ھان پولیس تانہ ءَ وتی انگر ءَ کن انت وھدیکہ سرمچارانی دومی ٹولی کراچی -شال ءِ بنجاھی شھدگ ءِ سر ءَ برجاھیں لیویز پانگس ءَ دستیگ کن انت ءُ ھمدا یک ادارے ءَ تاں دگ بندی کناں ۔

ھمے میان ءَ تانہ ءُ پوج ءِ گاڑی ماندارگ بنت چہ کارمنداں سرکاری سلاہ پچ گرگ بنت وھدیکہ ھندی کارمنداں ھچ وڑیں تاوان ندی انت ءُ یل کن انت ۔

زانگ بہ بیت بی ایل اے ءِ نیمگ ءَ بازارانی انگر کنگ ءُ دگ بندی تہ ءَ گیشی گندگ آیگ ءَ انت ۔

بلوچ زانتکارانی گوشگ انت بلوچستان ءِ تہ ءَ ھمے زوتاں یکشل ءَ بوتگیں کاراں چہ ھمے سما کپ ایت کہ بلوچ آجوئی لوٹوک وت ءَ مھکم کنگ ءَ انت ءُ پاکستان ءِ زور نزور تران انت ۔

زانتکارانی رِد ءَ اے جاورھال ایوک ءَ پہ پاکستان ءِ ھاتر ءَ چیلنج نہ انت بلکیں اے دمگاں برجاھیں زرکاری شوربندی ھاسکر سی پیک سانمند بوت کنت ۔

بلوچستان ءِ بنجاھی شھر شال ءُ دالبندین ءُ چاگی ءَ بیگواھیں مردمانی کھول ءُ وائس فار مسنگ پرسنز ءُ بلوچ یکجھتی کمیٹی ءِ نیمگ ءَ زھرشانی روانک کشگ بیتگ انت-

شال ءِ پریس کلب ءِ دیم ءَ بلوچستان ءَ انسانی ھکانی لگتمالی ءُ بیگواھیانی ھلاپ ءَ وائس فار بلوچ مسنگ پرسنز ءِ نیمگ ءَ زھرشانی کنگ بیتگ-

زھرشانی ءِ وھد ءَ چہ بلوچستان ءَ زورانسری بیگواھی ءِ آماچیں مردمانی کھولاں ھوار زالبول ءُ زھگ ءُ کماشاں بازیں کچے ءَ مردماں بھر زرتگ-

زھرشانی ءَ مھلوک ءَ تران کنان ءَ گوشتگ مروچی سرجمیں دنیا ءَ مسلمانانی شرپ ءُ شان ءَ عید کنگ بوگ ءَ انت بلے بلوچستان ءِ مھلوک وتی بندیگیں مردمانی ھاتر ءَ دگانی سر ءَ انت-

ھمے وڑ ءَ بلوچ یکجھتی کمیٹی رکشان ریجن چاگی زون ءُ بیگواھیں مردمانی کھولاں مزنیں ائید ءِ بنداتی روچ ءَ دالبندین، نوکنڈی، یکمچ، امین آباد ءُ چاگی ءِ دگہ جاھاں زھرشانی کنگ بیتگ انت-

دالبندین ءَ بیگواھیں گلام حضرت بلوچ ءُ عبداللہ بلوچ ءِ یل دیگ ءِ ھاتر ءَ زھرشانی کنگ بیتگ – مروچی بیگاہ ءِ ساھت پنچ ءَ عرب مسیت ءَ بندات بیتگ ءُ دالبندین پریس کلب ءَ آسر بیتگ-

اے دوئیں مردم 2018 ءَ ڈنو ءِ ھند ءَ پاکستانی پوج ءِ دست ءَ بیگواہ کنگ بیتگ، کھولانی گوشگ انت آیاں ھمک دروازگ ٹک اتگ انت بلے ھچ کس آیاں کس ءَ گوشدارگی نہ بیتگ-

ھمے وھد ءَ کھولاں انسانی ھکانی ادارھاں گوں لوٹ کتگ کہ آ گلام حضرت بلوچ ءُ عبداللہ بلوچ ءِ یل دیگ ءِ ھاتر ءَ گامگیج چِست بہ کن انت-

ھمے وڑ ءَ بلوچ یکجھتی کمیٹی ءِ نیمگ ءَ چاگی ءِ جتا جتائیں جاھاں یک سرپدی مھمے ءِ درچ ءَ پمفلٹ بھر ءُ بانگ کتگ انت – اے پمفلٹساں مھلوک ءِ زورانسری بیگواھی، درکانودی کوش ءُ ریاسری زُلمانی بارو ءَ سرپدی ھوار بیتگ انت ءُ چہ مھلوک ءَ را دزبندی کنگ بیتگ آ زُلمانی ھلاپ ءَ توار ءَ برز بہ کن انت ءُ بے تواری ءَ مرگ سرپد بوگ ءُ گھگیری ءِ زندگی ءِ راہ سرپد بہ بنت انت-

پمفلٹساں اے ایراد گرگ بیتگ کہ اگاں ڈاکٹر ماہ رنگ بلوچ، بیبرگ بلوچ ءُ دگہ سیاسی مردمانی سر ءَ بھتامے ھست گڑا لس آمیدگس پیش کنگ نہ بنت پرچا؟ بلوچ مات، گوھار ءُ زھگانی پریات ءَ ڈالچار کنگ ءُ ریاستی ادارھانی گوشگ بیتگ کہ زالم ءُ زیردست ءَ پرک بہ کن انت-

بلوچ یکجھتی کمیٹی رخشان ریجن چاگی زون ءَ مھلوک ءَ دزبندی کتگ کہ یکجاہ بیگ ءُ زورانسری بیگواھی ءُ درکانودی کوشانی وڑیں اوپار ءِ زُلم ءِ ھلاپ ءَ میدان ءَ بہ بیا انت-

بلوچستان ءُ عید

نبشتہ کار: ریاض بلوچ

دی بلوچستان پوسٹ

اے ساھت ءَ کہ من اے چاریں لبزاں نبشتہ کنگ ءَ آں شپ ءِ نیم ءَ گْوستگ، روچ ءُ رمس بدل بوتگ اَنت – گوستگیں روچ ءَ اد ءَ ائید بوتگ ءُ آیوکیں روچ ءَ ملک ءَ ائید بیت، بلے ائید بس نام ءِ ائید اِنت کہ کاینت ءُ رو اَنت، پہ بلوچ ءَ وشی ءُ شاتکامی اِش مان نیست –

مئے ائید ءِ سھب گوں چار ٹپ ءُ ٹوریں لاشانی دیم ءَ کپگ ءَ بنا بوت ، چار بلوچ بیگواھیں پسگ پاکستانی لشکر ءَ چہ زندان ءَ کشت ءُ برت ھرنائی ءَ دروگیں میڑے ءَ جت ءُ دور دات اَنت ءُ پد ءَ ٹاپار جت کہ چار بلوچ جنگول گوں ریاستی امن پورس (ڈیتھ اسکواڈ) ءِ میڑ ءَ شھید بوتگ –

ائید ءِ روچ اِنت گونڈو نوکیں گُد ءُ جَر پوش اَنت ،وتارا شوک کن اَنت ءُ سمبھین اَنت، مردم کُربانی ءِ پس ءُ گوک کُش اَنت ، ائید مبارکی ءُ ھک پھلی کن اَنت یا مسیج راہ دیوکائی بیت، بلے بلوچستان یک شل ءَ ریاستی زوراکیانی آماچ اِنت ، اسلام ءِ داوا داریں ملک کہ کُرانی آیاتاں چہ وتی جنگی آپریشناں نام دنت بلے نا اسلامی کدرے ھستے نا انسانی اگبال ءَ سرپد بیت –

یک بلوچ جنین زھگے ماہ جبین بیسیمگ ءِ جاھمنند اِنت کہ ھپتگے ءَ پیسر چہ شال ءَ زورانسری اَوار جنگ ءُ برگ بوتگ انگت ءَ بیگواہ اِنت ، آئی ءِ گناہ ءُ میار چی اَنت کہ تو برتگ ؟ اگاں گناہ گار اِنت تو بیار ئِے وتی کورٹ ءُ کچھریاں پیشی بکن ئِے ، ھما الزامے ءَ تو آئی ءِ سر ءَ جن ئے بیا سابت ئِے بکن پد ءَ وتی کونون ءِ رد ءَ سزا ءُ جزا ئِے بدے ، بلے ناں چش نہ کنت بلکیں ھمے وتی گیر کانونی ءُ آئینی کرداں کہ بلوچانی سر ءَ کنگ ءَ اِنت ھمیشاں چہ وتی پارلیمان ءُ اسمبلیاں کانونی ھیسیت دیگ ءَ اِنت ، بزاں کہ پاکستانی لشکر ءَ کدی کجام وھد ءَ کجام بلوچ ءِ بگیر جرم ءَ برگ ءُ گار کنگ ءُ بند کنگ ءِ اجازت ءَ کانون دنت، ھمے کانون کہ زوتاں چہ بلوچستان ءِ اسمبلی ءَ پاس کنگ بوتگ –

بلوچ یکجہتی کمیٹی ءِ رھشون ڈاکٹر ماہ رنگ بلوچ گوں اے دگہ سنگتاں سے ماہ اِنت کہ گیر کانونی بندیگ کنگ بوتگ اَنت ، اے دومی ائید اِنت کہ آ زندانی اَنت –

جرم ءُ گناہ اِش چی اِنت ؟ اے گپ ءَ ھمے بکشو ساھب ءِ واکدار کورٹاں سابت کت نہ کن اَنت، بس دفعہ ھمیش اِنت کہ ایشانی ڈن ءَ بوگ پہ لس مردماں یک بیھارے پمشیا ما ایشاں بندیگ کنیں –

ڈاکٹر ماہ رنگ بلوچ ھما رھشون اِنت کہ پہ آئی ءَ گوانکے ءِ پد ءَ لکھانی مھلوک ڈن ءَ در ریچ اِیت ءُ مُچ بیت ، ھزارانی مھلوک راجی مُچیّ بیت ، چہ ڈاکٹر ماہ رنگ بلوچ یا آئی ءِ گل ءِ نیمگ ءَ کسے ءَ نکس نہ وارتگ نا کہ یک شیشگ ءِ پروشتگ ءَ بلے ھمے در کپتگیں مھلوک کہ تئی ریاست ءِ زوراکیانی ھلاپ ءَ پر امن در کپتگ اَنت ایشانی سر ءَ ریاست ءَ وتی زلم ھم پیش داشتگ تیر گواری کتگ ، مردم شھید ءُٹپی کتگ اَنت ، گڑا جست اِیش اِنت کہ Maintenance of Public Order کئی سر ءَ لاگو بہ بیت ؟ ڈاکٹر ماہ رنگ ءُ آئی ءِ بندیگیں سنگتانی یا سرکار ءِ سپاھیانی ؟

بیگواھیں بلوچانی کھول ھمک سال وتی ائید ءَ پریس کلب ءُ دگانی سر ءَ گوازین اَنت ءُ دنیا ءَ پیش دار اَنت کہ پاکستان چونیں زالم ءُ جابریں ملکے، پہ دپ وتارا مسلمانیں ملکے گش اِیت بلے کرد ءَ چہ اسرائیل ءَ ھم گنتر اِنت ، إسرائيل اگاں پلسطين ءِ جنگولب ءِ ھم جنگ ءَ جنت بلے آئی ءِ لاش ءَ کھول ءَ دنت پہ کل ءُ کسارت کنگ ءَ، اے ریاست بلوچ جنگول ءِ لاش ءَ ھم پہ کل ءٗ کسارت کنگ ءَ نہ دنت، حالانکہ دنیا ءَ اے کانون گیشینتگ کہ کجام ھم جنگول ءِ جنگ ءَ جنگ بوت آئی ءِ لاش دیگ بہ بیت –

ریاست ءِ زوراکیانی سر ءَ ھمینچو نبشتہ بہ کن ئے یا گپ بہ کن ئے نہ کُٹ اَنت اے نوں بلوچ ءِ زند ءِ بھر اَنت، پمیشکا پہ بلوچ ءَ اے وشیں روچ ھم پہ نہ وشی گوزگ ءُ روگ ءَ اِنت ، بلوچستان ءَ چشیں لوگے پشت نہ کپتگ کہ ریاستی جبر ءِ دیمپان نہ بوتگ –

بلوچ ءُ بلوچستان ءِ ائید ھمیش اِنت کہ مئے شئمے دیم ءَ اِنت اگاں چمے بہ بیت پہ گندگ ءَ گوشے بہ بیت پہ اشکنگ –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ بارکھان ءَ ریاستی پلامرزی سلاہ بندیں ٹولی، کہ دمگی ھساب ءَ ڈیتھ اسکواڈ ءِ نام ءَ چہ زانگ بنت، ءُ بلوچ سرمچارانی میان ءَ تُرندیں میڑ ءَ چار سرمچاراں بیران بیتگ اَنت – اے میڑ شش جون ءَ رکنی ءِ کوھی دمگ کوہ جاندر ءَ بیتگ-

دمگی اِھوالکار رِد ءَ اے میڑ بازیں کلاکاں تاں برجاہ بیتگ ءُ ھمے میان ءَ دوئیں نیمگ ءَ چہ مزنیں سلاہ کارمرز بیتگ-

جنگ بیتگیں مردمانی پجّار مصطفی نور ء نور جان، جھمنند تسپ پنجگور، سمیع اللہ ء نور محمد، جھمنند ملائی بازار تربت، رسان قادر ء قادر بخش. جھمنند لباچ ڈنسر، آواران ءُ شاہ زیب ء امیر بخش، جھمنند گونی، گریشگ نام ءَ چہ بیتگ اَنت – اشانی لاش رکنی نادُراھجاہ ءَ برگ بیتگ اَنت-

بلوچستان ءِ دو جتاجتائیں دمگاں کیچ ءُ پنجگور ءَ بمب تراکانی آسر ءَ سے مردم بیران ءُ سے ٹپی بیتگ اَنت-

گیشیں ھالانی رِد ءَ کیچ ءِ تھسیل بلیدہ ءِ دمگ زامران ءَ بمب تراک ءِ آسر ءَ پت ءُ چُک بیران بیتگ اَنت، وھدے کہ سے مردم ٹپی بیتگ اَنت-

دمگی اِھوالکار رِد ءَ وئیل زامران ءِ میتگ سیرکزہ ءَ ھما وھد ءَ بیتگ وھدے محمد امین عبدالکریم وتی چُک ءِ ھمراھی ءَ نزیکیں میتگ ءَ ائید نماز ءِ وانگ ءِ واستا روگ ءَ بیتگ- راہ آ بمب تراک ءِ نشانگ کتگ- چریشی ءِ آسر ءَ دوئیں پت ءُ چُک جاہ پہ جاھی بیران بیتگ اَنت – وئیل ءَ دگہ سے مردم ٹپی بیتگ اَنت-

دمگی اِھوالکار گوشگ اِنت کہ کُشگ بیتگیں محمد امین ءِ برات، سلام شکاری ھم لھتے وھد ءَ ساری اُرش ءِ نشانگ کتگ اے مردمانی سیادی سرکاری پلامرزی کنوکیں ٹولی ءَ گوشگ بیگ ءَ اِنت-

ھمے وڑ پنجگور ءِ دمگ بونستان ءَ گوستگیں شپ ءَ یک تُرندیں تراکے ءِ توار اش کنگ بیتگ، پولیس رِد ءَ تراک شپ ءِ کساس سے ءَ دگ کش ءَ بیتگ-

بنداتی ھالانی رِد ءَ وئیلجاہ ءَ یک مردمے ءِ لاش دزکپتگ – آئی ءِ پجّار وسیم کشانی نام ءَ چہ بیتگ-

لاش چار ءُ ٹپاس کنگ ھاتر ءَ نادُراھجاہ ءَ برتگ-

تنی وھدے دوئیں وئیلانی سوب زانگ نہ بیتگ اَنت-

سرجمیں بلوچستان ءَ مرچی ائید ءِ روچ دارگ بوگ ءَ انت ۔ ائید ءِ نماز ءَ پد مردماں سنتِ ابراھیمی ءِ تک ءَ مال ءُ مڈی کربانی کتگ ءُ زانتکاراں زورانسری بیگواہ بوتگیں مردمانی سلامتی ءِ دوا کتگ۔

گیشیں اھوالانی رد ءَ ائید ءِ نماز ءِ مچی ، تربت شھر ءِ مسیت ءُ ائید ءِ گاھانی تہ ءَ مزنیں کساسے ءَ مردمانی بہر زورگ ، امن ءُ ایمنی ، ءُ بیگواھیں مردمانی سلامتی ءِ ھاتر ءَ نماز ءُ دوا وانگ بوتگ ۔

تربت شھر ءِ مزنین مسیت جامعہ مسجد دشتی بازار، جامعہ اسلامیہ سلافیہ چاہ سر تربت، عیدگاہ مسیت شاھی تمپ، جامعہ مسیت تمیر ملت اپسر تربت ءُ جامعہ مسیت مسجد آبسر تربت ءُ جامعہ البانی ڈاکٹر کالونی تربت ءُ دگہ مسیتاں نماز عید وانگ بیتگ-

ھمے تَک ءَ علماھاں ابراہیمی قربانی ءِ سنت ءِ اهمیت ءُ فضیلت ءِ سر ءَ گپ ءُ تران کتگ ۔ علماھاں اے گپ ءِ سر ءَ زور دات کہ ما پہ اللہ تعالیٰ ءَ پاک قربانی بہ دئیں پرچا کہ قربانی ءِ مکسد اللہ تعالیٰ ءِ رزا کنگ ءُ ابراہیم ءِ سنت ءِ زندگ دارگ انت۔

ائید ءِ وشیاں وتی دگہ نزیکیں سیاد ءُ وارساں ھوار کن اِت، سیادی ءَ مھکم کن اِت، ءُ ناوشیں مردماں گوں وش ءُ وشان کن اِت۔ قربانی ءِ گوشت ءَ ایوک ءَ مہ رکّین اِت بلکیں گریباں ھم بہ دئے اِت ءُ گریباں کہ پشت ءِ ٹُکّگ ءِ گرانھادی ءِ آماچ اَنت، وشّی ءِ تہ ءَ ھوار بہ کن اِت۔

علماء کراماں اے گپ ءِ سر ءَ کڈن کنان ءَ گوشت قربانی ءَ پد ما سپائی ءِ ھیال ءَ بہ داریں ءُ قربانی ءِ جامگں ءَ دگ ءُ کوچگاں دور دیگ ءَ دگراں تاوان مہ دئیں۔

ھمے تَک ءَ گوشت امن ءُ ایمنی ءِ برجائی ءُ زیردستیں فلسطینیانی ھاتر ءَ ءُ ھمے رنگ ءَ بلوچستان ءَ پہ زور بیگواھیں مردمانی پجارینگ ءِ ھاتر ءَ ھم ھاسیں دُوا ونتگ۔

ھمے رنگ ءَ ماں خاران، چاگی، شال ءُ گوادر ءَ پاکستانی لشکر ءِ دست ءَ پہ زورانسری بیگواھیں مردمانی واستا ھم دوا وانگ بوتگ۔ لھتے شھریاں چہ سرکار ءَ دزبندی کتگ کہ زورانسری ءَ بیگواھیں مردم آناں پہ سلامتی یل کنگ ءُ آھانی کھول ءَ را چہ مچانکیں رنج ءُ گماں بہ رکّینیت۔

ایشی ءَ ابید بلوچستان ءِ بازیں شھراں ائید ءِ نماز ءَ پد کھول ءُ دمگی مردماں بلوچستان ءِ شھیدانی کبرانی سر ءَ زیارت کتگ ءُ پاتہ ونتگ۔

زانگ بہ بیت کہ مرچی ائید ءِ روچ ءَ سرجمیں بلوچستان ءَ پہ زورانسری بیگواھیں مردمانی کھولانی نیمگ ءَ وتی دوستیگیں مردمانی ھاتر ءَ زھرشانی کنگ بیگ ءَ اِنت۔ اے زھرشانی یکجھتی کمیٹی ءُ وائس فار بلوچ مسنگ پرسنز ءِ نیمگ ءَ کنگ ءَ اَنت، انچوش کہ ھمک سال کن اَنت۔

آس کہ کپ اِیت تَر ءُ ھُشک نہ زانت

نبشتہ کار: شَکّل بلوچ

دی بلوچستان پوسٹ

آس کَس ءَ دوست نہ بیت، چہ آس ءَ ھر کس تُرس اِیت بلے چہ ھمے آس ءَ ھر کس پائدگ زور اِیت۔ گڑا آس چوں ھراب اِنت؟ ھر ھما چیز بنی آدم ءِ مازو ءَ نشتگ کہ پہ ما ھراب اِنت گڑا چہ آیاں پرچا پائدگ چِست کنت، آچ بھا زور اِیت، چہ آئی ءَ نارشت گرادگ بیت، نان پچگ بیت ءُ مزن مزنیں کمپنی چہ آس ءَ مادن جوڑ کن انچُش کہ شیشگ ءِ تاس، آسن جوڑ کن انت۔

آس گرم اِنت اے گپ ھم راستے کہ چہ آس ءَ انسان تُرس اِیت بلے اَبید آس ءَ انسان اوں نہ بیت، زندگی کُت نہ کنت۔ انچُش آپ اِنت انسان اَبید آپ زندگی کُت نہ کنت ءُ چہ آپ ءَ انسان ھم تُرس اِیت، انُچُش گُش اَنت آپ زندگی یے، انسان نوشگ اِش کنت، زندگی کنت ءُ چہ آپ ءَ پائدگ چِست کنت۔ زمین ءِ سر ءِ ھر ھما مادن یا کہ چیز ھست اَنت چہ آیاں انسان تھنا زندگی کُت نہ کنت، انسان ھم ابرمے، ءُ ھر ھما ابرم گوں انسان ءَ بندوک اَنت۔

انسان وت ماں وت جنگ کن اَنت، جنگ زانتکاریں مردم کن اَنت، ھر ھما انسان جنگ کنت کہ آ گوں ابرم ءَ جْوانی ءَ سرپد ءُ پوہ انت۔ ھر کس کہ چہ جنگ ءَ تُرس اِیت آ اوں ابید جنگ ءَ مُرت کُت کنت، جنگ گنوگ ءُ ابدال نہ کن اَنت جنگ ھوش ءُ ساریں مردم کن اَنت۔ ھو! انچُش کہ چہ آس ءَ انسان پائدگ چِست کُت کنت گڑا جَنگ ءَ پرچا مہ کنت۔ جنگ ءِ پائدگ ھست، پہ ھماھاں کہ کسے ءَ چہ آئی ءِ زندگ بوگ ءِ دراھیں ھاسیت بُرتگ اَنت، وتیگ اِش کُتگ اَنت چی ءَ کہ آیاں پہ زانت ءُ زور ءَ دستیگ اِش کُتگ اَنت گڑا جنگ پہ ھمے مردماں الم بیت کہ آئی ءِ جند ءِ پائدگ اِش برتگ اَنت۔

دراھیں گپاں چہ پد منی اشارہ بلوچ راج ءُ آئی ءِ زمین ءِ سر ءَ اِنت کہ بلوچ ءَ وتی جند ءِ زمین ءِ سر ءَ پنڈوکے جوڑ کُتگ، کَے ءَ کُتگ؟ ایشانی تہ ءَ بلوچ ءِ لھتے وتگڑیں سردار ءُ میر اوں ھوار اَنت، دری ءُ درمُلکی رستریں مھلوکانی بلوچ ڈیھ ءِ تہ ءَ آیگ ءَ کَے ءَ وش آتک کُتگ اَنت۔ بلوچ چہ وتی ازلی زند ءَ زبھر انت ایشی ءِ زمہ وار وتگڑیں سردار، میر دژمن ءَ ما پارلیمنٹ ءِ نام ءَ بلوچ ءِ گواجنانی لُٹ ءُ پل کنگ دست اِش مان کُتگ۔

مرچی اگاں بلوچ تپاک نہ انت درستاں چہ مستریں سبب ھمے وتگڑیں سردار ءُ میر کہ بلوچ ءِ دری رستریں مھلوک ءَ پہ وتی پائدگانی ھاتر ءَ جوڑ ءُ کارمرز کنگ ءَ انت۔ نوں بلوچ وت بچار اِیت کہ بلوچ ءَ چہ زمین ءَ چِہ چے رستگ؟ اگاں کَسے ءَ را چو کُچکے ءِ پَیم ءَ نوکری یے یا کہ کسانُکیں کلرکے ءِ نوکری ءَ بلوچے ءَ دنت زوت گل بیت کہ من ءَ وَ رسگ ءَ اِنت، اے آئی ءِ بے بود ءُ بے سنچی ءَ پیشدار اِیت کہ نہ زانگ ءَ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ جارکش جئیند بلوچ ءَ رسانکدر وتی شنگ کتگیں درشان ءِ تہ ءَگوشتگ کہ مئے سرمچاراں نوشکی، کلات ، مستونگءُ شال ءَ زورگریں پوج ءِ سرا چار اُرش کُتگ ءُ دژمن ءِ دوازدھ کارمنداں ھوار یک کمکارے کُشتگ ۔

جارکش ءَ گوشتگ کہ بی ایل اے سرمچاراں گوستگیں روچ ءَ دو سئے ءِ ھند ءَ بنجاھی شھدگ ءِ نزیک ءَ زورگریں پاکستانی پوج ءِ گاڑی ءِ ھما وھد ءَ تراکناکیں شوروانی نشانگ کتگ وھدیکہ دژمن کارمند دمگ ءَ تر ءُ گردءَ بوتگ انت ۔
تراک ءَ دژمن پوج ءِ یک گاڑی ءِ سرجم ءَ تباہ بوتگ ءُ آئی ءَ سواریں نھ کارمند ھما دمان ءَ مُرتگ انت ۔

آئی ءَ گوشتگ کہ مروچی بی ایل اے ءِ سرمچاراں کلات ءِ دمگ منگچر ءَ کالج ءَ برجاھیں زورگریں پوجءِ پانگس ءِ سرا ھما وھد ءَ اُرش کتگ وھدیکہ آ ھمودا نزیک ءَ یکجاہ بوتگ انت ۔ سرمچاراں وتکاریں سلاھاں ھوار گرنیڈ لانچرے بازیں گولھے آس داتگ چریشی ءَ دژمن ءِ سے کارمند مُرتگ ءُ کم چہ کم چار زدگ بوتگ انت ۔

آئی ءَ گوشتگ کہ سرمچاراں گوستگیں شپ ءَ مستونگ ءَ سی سی ایم چار راہ ءَ زورگریں پوج ءِ اشتاتگیں کارمندانی سرا دزبمب اُرش ءِ کتگ چریشی ءَ سَے کارمند زدگ بوتگ ۔ اے جاہ ءَ پوج ءَ پٹ ءُ پول ءِ نام ءَ مھلوک دلسیاہ کتگ بوتگ ۔ کہ اودا ادارانی ادار کماش ءَ زالبول اشتارینتگ انت ءُ بزگ کتگ انت ۔

جارکش ءَ گوشتگ کہ سرمچاراں سَے جون ءَ سریاب دگ ءَ دژمن پوج ءِ کارمند گلزار ءِ نسیر دھوار تیر باران کتگ ءُ کشتگ ۔

گلزار نسیر ءَ وت پہ دژمن ءَ چاریگی کتگ ءُ دگر ھم برتگ ءُ ھمے کار ءَ داشتگ انت ۔ اے مرد بلوچ ورنایانی زورانسری آوار جنی ءَ ھم گون بوتگ ۔

جارکش ءَ گوشتگ سرمچاراں نومبر 2023 ءَ چہ شال ءَ دژمن ءِ کارمند مکبول سمالانی دزگیر کتگ ، کہ وت بی ایل اے ءِ باسک ءِ بوتگ کہ پدا رند ءَ چیریں وڈے ءَ دژمن دیم ءَ سلاہ دور داتگ انت راجی دلارے جوڈ بوتگ ۔ مکبول ءَ سرمچارانی سرا ڈرون اُرشے ءَ پوج ءِ کمک کتگ ۔ بلے سرمچار رک بچ اِتگ انت کہ پدا رندا سرمچاراں اے مرد ٹریپ کتگ ءُ دزگیر کتگ ۔

مکبول ءَدپ ءِ وت منّ اِتگ کہ کہ آئی ءَ چہ شال ءَ گوں گلزار نسیر ءَ ھال اھوال بوتگ کہ ھمائی ءَ آ ءَ پوج ءِ گوم ءَھال پرماتگ ءُ سرمچارانی سراڈرون اُرش ءِکمک کتگ ۔

جارکش ءَ گوشتگ کہ ھمے کتکاریانی سوب ءَ نسیر دھوار بی ایل اے ہٹ لسٹ ءَ بوتگ کہ سرمچاراں گوستگیں روچاں آکشتگ ۔

جارکش ءَ گوشتگ کہ اے درسیں اُرشانی زمہ واری بی ایل اے من اِیت ۔

بلوچستان ءِ دمگ کلات ءِ ھند منگچر ءَ سلاہ بندیں مردماں پاکستانی پوج ءِ کارندھانی سر ءَ اُرش کتگ-

دمگی اِھوالکار ءِ رِد ءَ اے اُرش جوھان کراس ءِ نزیک ءَ کنگ بیتگ ءُ دمگ ءَ کم چہ کم دہ تراکانی توار اش کنگ بیتگ انت- چریشی ءَ پد تُرندیں تیرگواری رِد برجاہ بیتگ-

اِھوالکار ءِ گوشگ اِنت کہ ھمے ھند ءَ نشانگ کنگ بیتگ، آ منگچر کالج ءِ ماڑی اِنت اود ءَ پاکستانی پوج ءَ یک چوکی یے برجم داشتگ-

بلوچستان ءَ بلوچ آجوئی لوٹوکیں سلاہ بندیں گلاں پاکستانی پوج نشانگ کتگ – بلے اے اُرش زمہ واری تنی وھدے ھچ وڑیں گل ءَ نہ زرتگ-

وائس فار بلوچ مسنگ پرسنز ءِ چیردستی ءَ چہ بلوچستان ءَ زورانسری بیگواہ کنگ ءِ ھلاپ ءَ شال پریس کلب ءِ دیم ءَ جوڑ بوتگیں دراجکشیں ھرتال ءَ مرچی 5851 روچ سرجم بوتگ۔

ھمے تک ءَ وائس فار بلوچ مسنگ پرسنز ءِ چیئرمین نصر اللہ بلوچ ءَ وتی بیان ءِ تہ ءَ گْوشتگ کہ تنظیم ءِ نیمگ ءَ برجم داشتگیں ایمنیں زھرشانی ءں پہ زور بیگواھی ءِ ھلاپ ءَ ائید ءِ روچ ءَ نیم روچ ءِ سئے بج ءَ شال پریس کلب ءِ دیم ءَ کنگ بیت۔

نصر اللہ بلوچ ءَ چہ درستیں سیاسی گل ءُ نودربر گلاں ھوار درستیں تکاں بندوکیں مردماں گوں دزبندی کتگ کہ آ زھرشانی ءِ تہ ءَ وتی سرجمیں بھر زوری ءَ دلستکی بہ کن انت ءُ بیگواھیں مردمانی کھول ءِ توار بہ بنت ءُ زورانسری بیگواہ کنگ، آئین ءَ دریں کوش ءُ انسانی ھکانی لگتمالی ءِ ھلاپ ءَ وتی توار ءَ چست بہ کن اَنت۔