TBP Balochi

بلوچستان لبریشن فرنٹ ءِ سروک ڈاکٹر اللہ نذر بلوچ ءِ گْوشگ اِنت کہ داعش خراسان ءِ بیانیہ چوناھا آئی ایس پی آر ءِ جوڑ کُرتگیں اسکرپٹے، چمیشی ءِ وسیلہ ءَ مذھب ءِ نام ءِ سر ءَ راجی جُنزانی ھلاپ ءَ وتی بیانیہ جوڑ کنگ ءِ یک پندلے۔

آئی ءَ وتی ھیال چہ بی ایل ایف رسانکدر آشوب ءِ نیمگ ءَ چاپ بوتگیں ”اسپر“ ءَ درشان کُتگ ءُ گُشتگ۔

ڈاکٹر اللہ نذر بلوچ ءَ گیش گْوشتگ کہ بلوچ راجی آجوئی ءِ جُھد ءُ کوشست چہ وتی جند راج ءِ کمک ءَ جنگ ءَ انت، کہ آ چہ دری تاکتانی کمک ءِ مُھتاج انا بلکیں پاک ءُ پلگاریں راجی وتواجھی ءِ چیدگ اِنت۔ زورگیریں پاکستان بلوچ راج ءَ چہ ھر وڑ ءَ تباہ ءُ برباد کنگ ءِ کوشست ءَ اِنت، داں کہ راجی پجّار ءَ بُن گوج ءُ بلوچ ڈیھ ءَ را نوآبادیاتی گلامی ءَ یکشل ءَ بُنیاد جوڑ بکنت۔

آئی ءِ گُشگ اِنت کہ زورگیریں پاکستان آجوئی ءِ جُنزاناں بدنام کنگ ءِ ھاتر ءَ مدام پراکسی گُش اِیت کارمرز کنت تاکہ ازلی آجوئی ءِ جنگولانی سر ءَ مھلوکی بیسہ ءَ را بد دل کُت بکنت۔ داعش خراسان ءِ بیانیہ چوناھا آئی ایس پی آر ءِ جوڑ کُتگیں اسکرپٹے، چمیشی ءِ وسیلہ ءَ مزھب ءِ نام سر ءَ راجی جُنزانی ھلاپ ءَ وتی بیانیہ ءَ را مھکم ءُ کوشست کنگ بوگ ءَ اِنت۔

ڈاکٹر اللہ نذر ءِ گُشگ اِنت کہ بلوچستان ءَ سیکیورٹی پالیسی ءِ کنٹرول سویلین ھکومت ءَ اَبید تچک ءَ پوج ءِ دست ءَ اِنت، کہ گوں ناشرکار گروانی سیادی ءِ وسیلہ ءَ سیاسی در مھکم ءَ پیش دارگ بوگ ءَ اِنت۔

بلوچ لبریشن آرمی ءِ جارکش جیئند بلوچ ءَ رسانکدراں شنگ کتگیں درشان ءَ گوشتگ مئے سرمچاراں نوشکی ءَ بنجاھی شھدگ ءِ سر ءَ چار اداراں داں ناکہ بندی کتگ ءُ زورگریں پاکستانی پوج ءِ کاروان نشانگ کتگ ءُ چریشی ءِ آسر ءَ ھشت کارندہ مرتگ انت ءُ چار زدگ بیتگ انت-

جارکش ءَ گوشتگ سرمچاراں شال – تپتان ءِ بنجاھی شھدگ کیشنگی ءِ ھند شیر جان آغا ءَ چیک پوسٹس برجم کتگ ءُ چار اداراں داں ناکہ بندی کتگ – ھمے وھد ءَ سرمچاراں اسنیپ چیکنگ کتگ-

آئی ءَ گوشتگ ھمے جاہ ءِ نیمگ ءَ پیشگامی کنوکیں زورگریں پاکستانی پوج ءِ کاروان ءِ سر ءَ پیسر ءَ سنگر گپتگیں سرمچاراں نشانگ کتگ- سرمچاراں پوج ءِ سر ءَ راکٹ ءُ دگہ مزنیں سلاھانی گون ءَ اُرش کتگ- اُرش ءِ زد ءَ کاروان ءِ سَے گاڑی اتکگ انت- چریشی ءِ آسر ءَ زورگریں پوج ءِ ھشت کارندہ جاہ پہ جاہ ءَ مرتگ انت ءُ کم چہ کم چار زدگ بیتگ انت – اُرش ءَ دشمن ءِ سَے گاڑی ناکارہ بیتگ انت-

بلوچ ءِ جنگ برجاہ انت

نبشتہ کار: شَکّل بلوچ

دی بلوچستان پوسٹ

ایردستیں ملکانی وتی جتائیں مھلوک، زمین، زبان، دود ءُ دومان ءُ آ دگہ ایرستیں ملک ءُ مھلوکاں گوں چٹ یک ءُ دومی ءَ گستا چارگ بنت۔ ءُ آیانی زمین ءِ دستیگ کنوک زوراور ءُ دژمن جتا انت ءُ انگت ءَ اے کبزہ گیری ءِ اَمل برجاہ اَنت۔ اگاں تو کیوبا ءَ بوان ئے ترا اود ءِ راجدپتر ءُ لیکہ چٹ ءَ جتا گندگ بنت، اگاں تو ویت نام، اوگانستان ءُ دگہ باز انچیں ایردستیں ملک کہ بوتگ اَنت ءُ دگہ باز ملک انچُش کہ بلوچستان انگت ءَ زورانسری کبزہ ءِ تہ ءَ اَنت یا کہ تاں انوگ ءَ ایردستیں مھلوک ءُ آھانی دژمن ءِ میان ءَ جتائیں رنگے ءَ جنگی دروشم ءِ راجدپتر جتا گندگ ءَ کاینت۔ اگاں یک بلوچے اے مار اِیت کہ منی زمین، ءُ زبان ایردست اَنت گڑا آ وت ءُ وتی زمینی گواچن ءَ آ دگہ ایردستیں ملکاں گوں ھمدپ مہ کنت ءُ یک وڑ ءَ مہ چار اِیت، ھو اے گپ ءَ کس انکاری نہ انت کہ کبزہ گیر وَ زوراورے۔ سامراج ءَ مدام نزوریں ھلکانی تہ ءَ مھلوکانی زمین، مال ءُ مڈی ، زبان ءُ دود ءُ ربیدگ لگتمال کُتگ اَنت ءُ وتی کانودی شکل داتگ ءُ مھلوک گلام جوڑ کُتگ ءُ آھانی سر ءَ وتی ھکمرانی برجاہ داشتگ۔ ما بلوچ مرچی ھمے زوراوریں سامراج ءِ دستاں گلام جوڑ کنگ بوتگیں، آیاں بلوچستان ھُجّ کبزہ کُرتگ ءُ ھر روچ بلوچ ڈیھ ءِ گواجناں لُٹ ءُ پل کنگ ءُ برگ ءَ انت، بلوچ راجی پَجّار لگتمال کُتگ، ءُ وتی نوآبادیاتی نزام برجاہ داشتگ ءُ بلوچانی سر ءَ جبراً زُلم ءُ زوراکی یکشل ءَ داشتگ۔

اے گپ یک وش بھتی یے کہ بلوچ ڈیھ ءِ نرمزار وتی سرڈگار ءِ پھازگ ءَ چو کوہ ءَ دژمن ءِ دیم ءَ مِک ءُ اوشتاتگ اَنت، ءُ دژمن ءَ را چہ وتی ڈیھ ءِ یل کنگ ءِ ھاتر ءَ کڈّن کنگ ءَ انت۔

بلوچ مدامی وتی زمین، راجی مڈی ءُ مھلوکانی پھازگ ءَ ھچ چَک ءُ پد نہ بوتگ اَنت، دژمن ءَ ھما کد ءَ جَنگ کُشگ ءَ انت آ وتی ھپت پُشتی پدریچ ءَ ھم گیر کار اَنت۔ بلوچ وتی گُلزمین ءِ رکینگ ءِ ھاتر ءَ دژمن ءِ ھر وڑیں پندلاں پروش دیگ ءَ جاڑی اَنت، مدام دژمن ءِ مستریں پندل اسلام بوتگ آ پہ بلوچ سرمچارانی ھلاس کنگ ءِ ھاتر ءَ اسلام ءَ کارمرز کنت ءُ کدی بچار ئے بلوچ ءَ گوں بلوچ ءَ ناتپاک کنگ ءِ ھاتر ءَ نشنل پارٹی ءُ بلوچستان نشنل پارٹی ءِ وسیلہ ءَ بلوچاں وت ماں وت گستا کنگ ءَ وتی پندلاں سازین اِیت، دگہ باز اَنچیں پندل ھست اَنت کہ وتی کبزہ ءِ دارگ ءَ پہ بلوچ ڈیھ ءِ سرمچار ءُ بلوچ وانندگیں ورناھاں ناشرکاری ءِ ٹیگ ءَ جَنت داں کہ درمُلکی رسانکدر آیاں ناشرکار بہ لیک اَنت ءُ ھمے موھے پُشدر ءَ بلوچ پدریچ ءِ چُکچینی ءَ جوازے بہ رس اِیت۔ دژمن انوں بلوچ جُنز ءِ ھلاس کنگ ءِ ھاتر ءَ ماں رسانکدر ءَ بلوچ راج ءِ ھلاپ ءَ کارمرز کنگ ءَ اِنت ءُ بلوچ ءَ را ناشرکار گُشگ ءِ مستریں مول ایش اِنت کہ بلوچستان ءِ مال ءُ مڈیانی لُٹ ءُ پل ءَ برجاہ بدار اَنت، دژمن ءَ بچار اِت کدی آ پہ دیمروی ءُ امن ءِ نام ءَ ھم بلوچ ءِ جُنز ءِ ھلاپ ءَ کارمرز کنت ءُ کدی بچار ئے لھتے بلوچاں نوکری ءُ ھیرات ، یا کہ بینزیر انکم کمک ءَ بلوچاں وتی کبزہ ءَ را مھکم دارگ ءِ جُھد ءُ کوشستے۔ کجام داب بہ بیت پاکستان ءِ ناشرکاریں ریاست بلوچ ڈیھ ءِ مال ءُ مڈیانی لُٹ ءُ پل کنگ ءِ ھاتر ءَ بلوچ ءِ نسل کُشی ءَ کنگ ءَ اِنت۔

انوں دژمن ءِ مستریں نزوری بی وائی سی اِنت، ءُ بی وائی سی بلوچ راج ءِ یکجاہ کنگ ءِ ماس پارٹی یے ءُ اے پارٹی دژمن ءِ گُٹ ءَ ھڈ ءِ پسّگ اِنت اگاں بچار اِت پاکستان ءِ وتگڑیں پارٹی پی پی پی سرپراز بگٹی ءِ شکل ءَ دیم ءَ آرگ بوتگ، ءُ بی وائی سی ءَ را کریک ڈاؤن کنگ ءِ دژمن ءِ مستریں مول ءُ مراد دگہ کجام بوت کنت، دژمن پاکستان بلوچاں گیش گلام جوڑ کنگ ءِ ھاتر ءَ وتی گُڈی ناکامیں جھد ءُ کوشست ءَ کنگ ءَ اِنت بلے اے بری دژمن وتی بھا زُرتگیں لشکر ءَ سَدّک کُت نہ کنگ ءَ اَنت ءُ چُشیں روچے نیست کہ بلوچ راجی پوج پاکستانی لشکراں جنگ ءُ کُشگ ءَ انت کہ اے کلوہ دژمن ءِ در آیگ ءِ کلوہ ءَ دیگ ءَ اَنت۔ پاکستان ءِ وتگڑیں ریاست، چوناھا بچار اِت اے یک در ابرمی ریاستے ءُ چہ راجدپتر ءَ زِبھر اِنت۔ اے وتگڑیں اِستان انوگیں وھد ءَ بلوچ راجی لشکر ءَ را دزمھار کُت نہ کنگ ءَ اِنت، چمیشکا اے اِستان وتی ناکامیانی چیر دیگ ءِ ھاتر ءَ بلوچ چُکچینی برجاہ داشتگ۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان لبریشن فرنٹ ءَ شنگ کتگیں درشان ءِ تہ ءَ کیچ ءَ دوازدہ ھنداں ھوار چاردہ جتاجتائیں ھندانی سر ءَ پاکستانی پوج، ڈیتھ اسکواڈ، ھال اھوالی نزام ءُ گیس بروکیں گاڑیانی سر ءَ اُرشاں دُژمنیں پوج ءِ پانزدہ کارندہ کُشتگ ءُ ھپت ٹپی کتگ اَنت مالی تاوان ھم داتگ اَنت-

بی ایل ایف ءَ وتی درشان ءِ تہ ءَ گْوشتگ کہ ھپت جون ءِ شپ دوازدہ ءُ دہ ملٹ سر ءَ مئے سرمچاراں کیچ ءِ دمگ ناصر آباد ءَ زورگریں پاکستانی پوج ءِ یک پوسٹے سر ءَ راکٹ لانچر ءِ بازیں گولھے آس داتگ کہ پوج ءِ چوکی ءِ تہ ءَ کپتگ اَنت چریشی ءِ آسر ءَ جانی ءُ مالی تاوان رس اِتگ-

جارکش ءَ گْوشتگ کہ ھپت جون شپ دہ ءَ بی ایل ایف ءِ سرمچاراں کیچ ءِ دمگ مند، سورو ءَ زورگریں پاکستانی پوج ءِ بُنجل راکٹ لانچر ءُ دگہ مزنیں سلاھاں چہ نشانگ کتگ- اُرش ءَ پد زورگریں پوج ءَ سرویلنس کیمرھاں چہ سرمچارانی رندگیری کتگ بلے سرمچاراں پہ سلامتی وتی مُھریں اوتاکاں سر بیگ ءَ سوبمند بیتگ اَنت-

جارکش ءَ گْوشتگ ھپت جون ءِ شپ ءَ بی ایل ایف ءِ سرمچاراں جتاجتائیں ٹولیاں مند ءَ ریک بازار ءُ کوہ ڈگار ءِ میان ءَ بُنجاھی شھدگ سر ءَ ناکہ بندی کتگ گاڑی پٹ ءُ پول کتگ اَنت ءُ بلوچ آباد ءَ گشت ءِ میان ءَ دُژمن ءِ سُر ءُ پُر چارتگ اَنت بلے تُرس آماچیں پوج وتی بُنجل ءَ چہ در نیتکگ-

آئی ءَ گْوشتگ ھپت جون ءَ سھب ھپت ءُ سی ملٹ ءِ نزیک ءَ سرمچاراں ڈیتھ اسکواڈ ءِ باسک عبداللہ ء سعید میناز، چہ بلیدہ دزگیر کتگ- آ پیسر ءَ مئے نشانگ لسٹ تہ ءَ بیتگ- آ بلوچ جُھد آجوئی ءُ سرمچارانی ھلاپ ءَ جتاجتائیں کاروائیاں ءَ دُژمنیں پوج ءِ کمکاری. کتگ وھدے کہ انّیگاں یکجاھی گل ءِ شھیدیں سنگت جابر نصیر ءُ سنگت فقیر جان ءِ شھیدی جرم ءَ ھوار بیتگ اَنت- اشی ءِ اے سنگین ءِ میارباری ءِ سبب چارتگ سرمچاراں گل ءِ پیسلہ سر ءَ گامگیج زرتگ آ گُڈی آسر ءَ سر کتگ-

جارکش ءَ گْوشتگ ھشت جون سُھب یازدہ ءَ بیست ملٹ ءِ وھد ءَ بی ایل ایف ءِ سرمچاراں تمپ ءِ دمگ کلاھو ءَ زورگریں پاکستانی پوج ءِ چوکی سر ءَ راکٹ لانچر ءِ بازین گولھے آس داتگ کہ کہ نشانگ تہ ءَ کپتگ کہ چریشی ءِ آسر ءَ دُژمنیں پوج ءِ لھتے کارندہ ٹپی بیتگ اَنت آ مالی تاوان ھم داتگ اَنت-

جارکش ءَ گْوشتگ ھشت جون ءِ نیمروچ دوازدہ نیم ءَ بی ایل ایف ءِ سرمچاراں تمپ ءِ دمگ آسیاآباد ءَ زورگریں پوج ءِ چوکی گرنیڈ لانچر ءَ چہ بازیں گولھے آس داتگ کہ نشانگ ءَ کپتگ- آئی ءِ ھمراھی ءَ دگہ مزنیں سلاھاں چہ ھم پوسٹ نشانگ کتگ-

جارکش ءَ گْوشتگ ھشت جون دگہ یک کاروائی سرمچاراں تمپ ءِ دمگ ھیرآباد ءَ زورگریں پوج ءِ چوکی راکٹ لانچر ءُ دگہ مزنیں سلاھاں چہ اُرش کتگ- اے اُرش ءَ سرمچاراں پوسٹ سر ءَ پٹ کتگیں چاروگی کیمرہ ھم نشانگ کتگ ءُ تاوان داتگ –

آئی ءَ گْوشتگ ھشت جون ءَ روچ ایربُکگ ءَ پد سرمچاراں تمپ ءِ دمگ گومازی ءَ شھید کیپٹن جھانگیر لوگ سر ءَ برجاھیں زورگریں پوج ءِ چوکی سر ءَ راکٹ لانچر ءَ چہ گولہ آس داتگ وتی نشانگ ءَ کپتگ اَنت چریشی ءِ آسر ءَ لھتے کارندہ ٹپی بیتگ اَنت-

جارکش ءَ گْوشتگ ھشت جون بیگاہ ءَ شش چل ملٹ سر ءَ بی ایل ایف ءِ سرمچاراں تمپ ءِ دمگ پُل آباد، کسانو ءَ برجاھیں پاکستانی پوج ءِ چوکی سر ءَ بازیں راکٹ آس داتگ کہ سوبمندی ءَ گوں وتی نشانگ ءَ کپتگ اَنت دُژمن ءَ مالی تاوان چست کنگ کپتگ-

جارکش ءَ گوشتگ ھشت جون ءَ سرمچاراں سُھب ھپت نزیک ءَ زامران ءِ دمگ کوتان ءَ زورگریں پاکستانی پوج ءِ چیک پوسٹ سر ءَ اُرش کتگ دُژمن ءَ جانی ءُ مالی تاوان چست کنگ کپتگ-

آئی ءَ گْوشتگ ھشت جون ءَ سرمچاراں بیری ھند سر ءَ سی پیک دگ سر ءَ ناکہ بندی کتگ ءُ اود ءَ ساڑی لیویز چیک پوسٹ سر ءَ اُرش کتگ- بلے چیک پوسٹ سر ءَ ھچ وڑیں جنگی ساز ءُ سامان نہ بیتگ- سرمچاراں لیویز کارندھاں بلوچ بیگ بُنیاد ءَ ھچ وڑیں تاوان نداتگ-

جارکش ءَ گْوشتگ نُھ جون ءَ سرمچاراں سُھب دہ چل ملٹ سر ءَ زامران ءِ دمگ نرمک ءَ زورگریں پاکستانی پوج ءِ چیک پوسٹ سر ءَ اُرش کتگ دُژمن جانی ءُ مالی تاوان داتگ-

جارکش ءَ گْوشتگ نُھ جون سُھب یک نزیک ءَ بی ایل ایف ءِ سرمچاراں جیونی ءِ دمگ پانوان ءِ کوہ سر بازار ءَ چاریگی واستا مک کتگیں موباھل ٹاور سر ءَ مشینری مانداشتگ-

جارکش ءَ گْوشتگ کہ نُھ جون ءَ سرمچاراں نوشکی شھر ءَ سسٹیشن سر ءَ اوشتوکیں گیس بروکیں دو گاڑی تاوان داتگ اَنت-

جارکش ءَ گْوشتگ بلوچستان لبریشن فرنٹ اے کاروائیانی زمہ واری ءَ منّ اِیت- بلوچستان ءِ وتواجھی ءَ تاں دُژمن سر ءَ اُرش برجاہ بنت-

بلوچستان ءِ دمگ نوشکی ء دوشمبے ءِ بیگاہ ءَ سلاہ بندیں مردمانی نیمگ ءَ ناکہ بندی ءُ پاکستانی پوج سر ءَ اُرش ھال اِنت-

اسسٹنٹ کمشنر نوشکی ءَ وئیل راست کتگ گْوشتگ کہ سلاہ بندیں مردماں نوشکی ءِ نزیک ءَ شھدگ N-40 سر ءَ ناکہ بندی کتگ- ھمے میان ءَ پاکستانی پوج ءُ اُرشکارانی میان ءَ میڑ ھم بیتگ-

اِھوالکار رِد ءَ، اُرش ءِ سبب ءَ شھدگ N-40 چار کلاکاں تاں ھرچ وڑیں گاڑیانی روگ ءُ آیگ بند کنگ بیتگ- اے شھدگ ناں تھنا بلوچستان بلکیں ایران ءِ میان ءَ یک ھاسیں راھے-

چمّگدانی رِد ءَ وئیلجاہ ءَ سر بیؤکیں پوج ءِ یک کاروانے، کہ آئی ءِ تہ ءَ سے گاڑی ھوار بیتگ اَنت، سلاہ بندیں مردماں نشانگ کتگ- بنداتی ھالانی رِد ءَ اُرش ءَ یازدہ کارندہ بیران ءُ ٹپی بیتگ اَنت، بلے سرکاری بنشون نیمگ ءَ تنی وھدے ھچ وڑیں درشان شنگ کنگ نہ بیتگ-

بلوچستان ءَ انّگیں وھداں اے وڑیں وئیلانی تہ ءَ گیشی گندگ اَتکگ- بلوچ آجوئی لوٹوکانی بازیں رند ءَ اداروکی دمگانی دستیگ ءُ شھدگاں بند کنگ ریاستی رٹ چیلنج کتگ اِت-

زانتکارانی گوشگ اِنت کہ اے وئیلاں اے گندگ آیگ ءَ اِنت یک نیمگے اود ءَ سلاہ بندیں گلانی پُرکاریانی تہ ءَ گیشی گندگ آیگ ءَ اِنت ءُ دومی نیمگ ءَ پاکستانی پوج ءِ کنٹرول روچ پہ روچ نزور بوان اِنت-

بلوچستان ءِ دمگ کیچ ءِ ھند دشت بلنگور ءَ پاکستانی پوج ءَ مروچی سُھب ءَ لشکر کشی کنان ءَ لوگانی سر ءَ بیڑبرتگ پٹ ءُ پول میان ءَ زالبول ءُ چُک تُرسینتگ اَنت-

اِھوالکار رِد ءَ اے میان ءَ ھپت ورنا دزگیر کتگ ءُ بیگواہ کتگ اَنت، آیانی درگت ءَ انگت ھچ وڑیں ھال دز نہ کپتگ-

بیگواہ کنگ بیتگیں مردمانی تہ ءَ نوید ء لطیف، سلمان ء ڈاکٹر سید محمد، حنیف ء بخشی، نصیر ء وشدل، افراز ء نصیر، کمال ء صفاء ءُ پھلان ء صفاء ھوار اَنت-

دمگی اِھوالکار رِد ءَ پوج ءَ لشکر کشی ءِ میان ءَ ناں تھنا لوگ پٹ ءُ پول کتگ اَنت بلکیں زالبول تُرسینتگ اَنت چُک تُرس آماچ بیتگ اَنت-

زانگ بہ بیت کہ بلوچستان ءَ زورانسری آوار جنی ءِ درچ دراجیں مدتے ءَ برجاہ ءَ اِنت، ءُ انسانی ھکانی ادارہ جُست چست کنگ ءَ اَنت-

ھمے وڑ بلوچستان ءِ تیاب دپی شھر چہ پسنی ءَ پاکستانی پوج ءَ دو مردم آوار جنگ ءَ پد بیگواہ کتگ اَنت-

آوار جنگ بیتگیں مردمانی پجّار یار جان ء داد بخش ءُ شیر جان ء شیخ دوستین نام چہ بیتگ اَنت، کہ وارڈ نمبر یک، ببر شور ءِ جھمنند اَنت-

زانگ بہ بیت کہ بلوچستان ءَ زورانسری آوار جنی ءِ وئیل یکشل ءَ گیش گندگ آیگ ءَ اِنت، چریشی ءَ انسانی ھکانی ادارہ تُرس درشان کتگ-

گِھمرد

نبشتہ کار: زھیرمراد

دی بلوچستان پوسٹ

زند جنگجاھے ءُ اے جنگجاہ ءَ گُڈی جون ھرچ ھما کسّ ئیگ اِنت آ مہ لوٹ اِیت اوں آئر ءَ جنگ کنگی اِنت ءُ ستر جنگولے بہ بئے۔بلے اِے باور کنگی اِنت اد ءَ بید شکست ءَ دگہ ھِچّ نہ منتگ۔زند ءِ بے مانا بوگ ھما وھدی جیڑھے بوت کنت مردم ءَ پہ ھرچی آمیگی بہ بیت۔ آئر ءَ وت راہ ءُ در مہ بیت۔ھردے راہ ءُ در نہ بیت زند ءِ مانا کنگ ءِ ابدم اوں گِندگ ءَ نئیت ۔اے انچائیں گرشتے نہ اِنت کہ مردم وتی اندر ءَ امروز ءَ گِند اِیت ءُ آئی توجیل ءَ بوجگ ءِ جھد ءَ کنت۔ اے گرشت سک کم ءِ گور ءَ گِندگ بیت۔اے ھما مانا ءِ جوھر اِنت کہ مردم ءَ را ازل کنت۔

  ھمپگریں سنگتے ءِ شھیدی ءِ ھال ءِ سر بوگ وَ اَنچائیں ھبرے۔ من ءَ پہ اے ساھت “اعراف” اِنت ۔ من وھد بہ گْوشاں یاکہ زند نزاناں ،بلے من انوں میان ءَ آں۔بس ھمینچک ءَ کہ مار اِت ءُ سما کُت کنگ ءَ آں۔وتی اندر ءَ ھما “باور” ءَ پہ جیڑگ ءَ آں آ ” چتور” ودی  کنت۔ پرمن مرگ ناتوان ءُ نابرجمیں شے یے نہ اِنت۔ناکہ آزاتی یے ءُ ناکہ زند برجم ءُ ابدی یے۔ پرمن ھر دو وتی موسماں سرجم ءُ ناتوان اَنت۔ ھاں اے ھبر ءَ من الم گْوش آں مرگ مردم ءَ را سرجم کنت۔ بلے ابدمان کنوک زند اِنت۔ھما زند کہ آئی ءِ وتی کشک دیستگ ءُ سپر کنگ ءَ اِنت۔بلے یک انچیں موسم ءُ جاورے ءَ کہ مرگ بئیت ۔مردم ھورک وَ بیت۔شمس گوں من ھمپگر بوتگ ھبر اے نہ اِنت۔شمس ءِ گور ءَ گرشتے ھست اَت۔آئی ءِ مجگاں جست ھست اَت۔ آ ساچشتکارے اَت۔

ساچشتکار ءِ مرگ چہ لس ازمگر ءَ گیش تورناک اِنت۔آ ساچوک اِنت گیگان کنوک نہ اِنت۔آئی ءِ گور ءَ زندمان کِسّوے نہ اِنت۔ساچشتکار زند ءَ پہ کِسّو ءُ کارستگ ساچ اِیت۔زندگ مانگ ءِ جوھار ءَ آشناگ اِنت ساچشتکار آ نہ اِنت کہ ساچست ساچ اِیت۔ ساچشتکار ءِ گور ءَ سپر کنگ ءِ توان چون اِنت؟ آ چاگرد ءَ چون گِند اِیت ۔آئی ءِ گور ءَ زند چینچو شاھگان اِنت؟ پہ جیڑھانی توجیل ءَ آئی ءِ پگر چے اِنت؟ آ چونیں چاگرد ءُ چونیں پدریچے گِندگ لوٹ اِیت۔من پمیشکا گْوشاں ساچشتکار چہ لس ازمگر ءَ جتا اِنت ۔ بلے ھما ساچشتکار کہ آ بوگ ءُ مانگ ءَ چہ آژناگ بہ بیت۔آ بہ زانت پہ ساچشت ءَ چونیں اوپار سگّگی اِنت۔

ھو پرمن اے ساھت اعراف اِنت من وھد ءُ زند ءِ میان ءَ آں۔ ھمود ءَ کہ چہ من ءَ یک ھمپگر ءُ سرمچاریں سنگتے نہ سد اِتگ ۔  بلکیں یک ساچشتکارے گوں وتی کِسّوانی کارستگاں کیچ ءِ دمکاں آئر ءَ وتی کوار ءَ جنت۔ ھما آزمانک نویس کہ آ چہ وتی کارستگاں آشناگ اَت،آ سرپد اَت اے ویل ءُ واکیاتانی آسر چون بیت۔ھما شائِر کہ آئر ءَ پہ شائِری آشوب ءِ جھگیر نہ اَت۔ ھما سرمچار کہ آئر ءَ پہ سرمچاری تیر ءِ آس دیگ ءُ کوہ نندگ نہ اَت۔اے ھما راجی سرمچاریں سپاھیگ اَت۔کہ آئی ءِ گور ءَ جُست ھست اَت ءُ کار ھست اَت۔جیڑہ ءُ جیڑھانی توجیل ھست اِت اَنت۔

من اعراف ءَ آں۔نزاناں من کے ءَ را رکست بہ کن آں۔یک ساچشتکارے ءَ را،شائرے ءَ را،پھتگ ءُ سوھوئیں سنگتے ءَ را کہ آ چہ وھد ءِ لوٹاں آژناگ اَت۔اے وھد کہ پہ سرمچارے ءَ وھد کم ءُ کار گیش اَنت۔

ھما سنگت ءَ کہ آئی زانتگ اَت دژمن چون اِنت ءُ نوک آیوکیں ورناھانی تب چون اِنت؟پارٹی کار ءُ وھد ءِ تنگی پہ ما چون اِنت مشکل ودی کت کن اَنت یاکہ کنگ ءَ اَنت۔اے کلاں چہ آشناگیں سرمچارے ءِ رکست کنگ وَ گْران اِنت۔بلے آجوئی جنگ ءِ نہ سگی ھمیش اِنت۔ ایرماد ءُ گُلامیں راجے ءَ پہ ھما کانیں سر رو اَنت ۔کہ آیانی روگ ءَ گوں ھزار کسّو روت،کار نیمبندگ بہ اَنت۔

شمس کیچ ءِ ھما روچ اَت کہ آئی ءَ وتی روژنائی ھرچ سنگت ءِ اندر ءَ سر کتگ اَت۔ ما پہ وتی باندات ءَ دلجم ایں کہ مئے ساھگ اوں نہ مان اِیت۔کہ مئے بندات مئے باندات ءِ نشون اِنت۔ ما وتی مروچی ءَ پہ ھست اِیں ناکہ باندات ءَ ۔بلے ھما ھمبل کہ گوں آئی ءِ کار کنگ ءَ اے سما مہ بیت کار چے یے ۔چہ آئی ءِ گسر کپگ ءَ پد ھما کار ءُ وھد دیم ءَ میلانک بہ اَنت-

“کسی طرح تو جمے بزم مے کدے والو”
“نہیں جو بادہ و ساغر تو ہاؤ ہو ہی سہی”
فیض احمد فیض

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ لبریشن آرمی ءِ جارکش جیئند بلوچ ءَ رسانکدراں وتی شنگ کرتگیں درشان ءِ تہ ءَگوشتگ کہ مئے سرمچاراں زامران ءَ زورگریں پاکستانی پوج ءُ چیریں ادارھانی کارمند کشندہ ٹولی ءِ سروک مھمد امین گوں ھمراھے زھگ ءَ کُشتگ ۔

جارکش ءَ گوشتگ مھمد امین گوستگیں روچ ءَ زامران ءِ ھند گربن آئی ءِ سرا ریموٹ کنٹرول بمب ارش ءِ کتگ کہ چریشی ءَ مھمد امین گوں ھمراھے زھگ نوید امین ءَ مُرتگ ۔ وھدیک آیانی گاڑی سرجمی ءَ تباہ بوتگ ۔

جارکش ءَ گوشتگ مھمد امین زورگریں پاکستانی پوج ءِ چیردستی ءَ کشندہ ٹولی ءِ سروکی ءَ کنگ ءَ بوتگ کہ آئی ءَ زامران ءُ کش ءُگوری ھند ءُ دمگاں پوجی زوراکی ، زورانسری آوار جنی ، ورنایانی کوش ءَ تچکی ءَ ھوار بوتگ ۔ اے ٹولی ءَ کتکاری ءِ بدلا منشیات باپاری ءَ مھار گٹ دیگ یل دیگ بوتگ۔

آئی ءَ گوشتگ مھمد امین ءِ سروکی ءَ ھمے ٹولی براس ءِ سرمچارانی نمیرانی ءَ ھوار بوتگ ۔ جولائی 218 ءَ زامران جالگی ءَ سرمچار ھسین شھسوار پنام چیسل ھنیپ لال پنام استاد شوھاز ءِ نمیرانی ءَ ءُ جنوری 2020 ءَ ناگ ءَ ناجد بلوچ پنام سلیم ، میران بلوچ پنام داد جان ، شکیل بلوچ پنام جیئند ، دولت بلوچ پنام ھاران ، یوسپ بلوچ پنام دوداءِ نمیرانی ءَ ھمے ٹولی ھوار بوتگ ۔

ھمے کتکاریانی سوب ءَ مھمد امین بی ایل اے ءِ ہٹ لسٹ ءَ ھوار بوتگ کہ ھنو آ کشتگ ۔

دژمن چاریگ مھمد امین ءِ کشگ ءِ وھد ءَ دو رھگیر زدگ بوتگ انت کہ اناگتی ءَ بوتگ انت ما چہ مھلوک ءَ لوٹ کن ایں کہ مھمد امین وڈیں چاریگاں دور بہ بنت چیا کہ ھر وڈیں جانی ءُ مالی تاوان ءَ رک ایت بہ کناں ۔

آئی ءَ گوشتگ زامران ءِ دمگ کنٹگان ، گربن ، سیرکزہ درابلی ، سیاہ گسی ءُ کش ءُ گوری ھند ءُ دمگاں لھتے دمگی مردم زورگریں پاکستانی پوج ءِ گوشگ ءِپدا سرمچارانی راھاں چارگ ، آیانی اوتاگ ءِ نشاندھی ءِ جھد ءَ انت ۔ آیاں مکن کنگ بیت کہ آ وتی کاراں یل بکناں اگاں ناں آ تچکی ءَ بلوچ سرمچارانی نشانگ ءَ بنت ۔ ءُ وتی زمہ زمہ دار وت بہ انت ۔

بلوچستان ءِ دمگ کیچ ءِ ھند زامران کوتان ءِ ھند سر ءَ برجاھیں پاکستانی پوج ءِ یک چوکی یے سر ءَ ناشناسیں سلاہ بندیں مردماں اُرش کتگ-

اِھوالکار رِد ءَ اُرش بیگاہ ھپت ءَ کنگ بیتگ چریشی ءِ آسر ءَ پوج ءَ جانی تاوان چست کنگ کپتگ – بلے تنی وھدے سرکاری نیمگ ءَ راست کنگ بیتگ-

اِھوالکار گوشگ اِنت کہ سلاہ بندیں مردماں اُرش ءَ مزنیں سلاہ کارمرز بیتگ، اُرش وھد ءَ دمگ ءَ تیرگواری درچ بازیں کلاکاں تاں برجاہ بیتگ ءُ پد ءَ اُرشکار تچگ ءَ سوبمند بیتگ اَنت-

اے دمگ ءَ بلوچ آجوئی لوٹوکیں سلاہ بندیں گل پُرکار اَنت بلے اے اُرش زمہ واری انگت ھچ گل ءَ نہ زرتگ-

ایمنسٹی انٹرنیشنل ساؤتھ ایشیا ءَ بلوچستان ءُ پاکستان ءِ دگہ جاھاں بلوچ نودربرانی یکشلیں بیگواھیانی پژدر ءَ پدردی درشان کتگ، گل ءِ گوشگ انت بلوچ نودربر یک زانتے ءِ رنگ ءَ نشانگ کنگ بوگ ءَ انت کہ انسانی ھکانی سنگینیں لگتمالی یے-

ایمنسٹی ءِ درشان ءِ رد ءَ یونیورسٹی آف بلوچستان ءِ نودربر ماہ جبین بلوچ 29 مئی 2025 ءَ بیگواہ انت، ایشی ءَ پیش 24 مئی ءَ آئی ءِ برات یونس بلوچ سیکیورٹی پورسز ءَ زورانسری بیگواہ کتگ-

گل ءَ گوشتگ شال ءَ زھرشانی ءَ پد ریاستی ادارھانی نیمگ ءَ بلوچ نودربرانی ھلاپ ءَ کریک ڈاؤن ترندی اتکگ، گچینی ڈاکٹر ماہ رنگ بلوچ دزگیر کنگ بیتگ، کراچی یونیورسٹی ءِ کانون ءِ نودربر جاوید بلوچ 23 اپریل ءَ جند ءِ لوگ ءَ پولیس ءُ انسداد دھشت گردی ( سی ٹی ڈی) ءَ بیڑ برتگ ءُ پد ءَ بیگواہ انت یک دگہ نودربرے گوھرام اسھاک 24 اپریل ءَ سول ھسپتال شال ءِ ڈن ءَ آوار جنگ بیتگ اے دراھیں مردمانی بارو ءَ پد ءَ ھچ سرپدی نہ بیتگ-

ایمنسٹی انٹرنیشنل ءَ پاکستان ءِ واکداراں لوٹ کتگ اے بیگواھیں مردماں تچک ءَ پٹ ءُ پول بہ کنت شوھاز اش بہ کنت ءُ آیاں یل بہ کنت اِنت-

گل ءَ کڈن کتگ اے گیر کانونی امل کنوکاں کانون ءِ درچ ءَ بہ بیار ایت-

ایمنسٹی ءَ گوشتگ زورانسری بیگواھی میان اُستمانی ھکانی کولانی چپ انت کہ ایشی ءِ ھلاسی بہ بیت انت-