اسلام آباد ءَ بلوچ کھولانی زھرشانی نندانک ءَ 69 روچ سرجم بوتگ، ھمے درگت ءَ آھاں ایڈووکیٹ ایمان مزاری ءِ ھلاپ ءَ برجاھیں ریاستی کارروائیانی ایراد گرگ ءَ گوں یکجھتی ءِ درشانی کتگ۔
اسلام آباد ءِ بنجاھی آمیدگس ءَ سرکاری ادارگ ءُ پورسز ءِ ھلاپ ءَ ٹویٹ کنگ ءِ بھتام ءَ ایڈووکیٹ ایمان مزاری ءُ آئی ءِ لوگواجہ ایڈووکیٹ ھادی علی چٹھا ءِ بے زمانتداریں دزگیر کنگ ءِ پرمان کتگ ءُ پرمان داتگ کہ 24 ستمبر ءَ تاں دوئیں دزگیر کنگ ءُ آمید گس ءَ پیش کنگ بہ بنت۔
این سی سی آئی اے ءَ ایمان مزاری ءُ ھادی علی چٹھا ءِ ھلاپ ءَ کیس نبشتگ کتگ ۔ ایف آئی آر ءِ تہ ءَ گشگ بوتگ کہ آھاں خیبر پختونخوا ءُ بلوچستان ءَ بیگواھیں مردمانی کیسانی زمہ واری سیکورٹی پورسز ءِ سر ءَ ایر کتگ۔
ایمان مزاری ءِ ھلاپ ءَ برجاھیں ریاستی کارروائیانی بابت ءَ دزگیریں بلوچ یکجھتی کمیٹی ءِ سروک مھرنگ بلوچ ءِ گھار نادیہ بلوچ ءَ وتی سوشل میڈیا ءِ تہ ءَ وتی بیان ءَ گْوشتگ کہ ما اے گندگ ءَ دلپدرد ایں کہ یک دلیر ءُ رھبنداریں انسانی ھکانی وکیل ایمان مزاری ءِ ھلاپ ءَ ریاستی واکدار بے رھمی ءَ کارمرد کنگ بیگ ءَ اِنت۔
نادیہ بلوچ ءَ گْوشتگ کہ ایمان مزاری ءِ تھنا ”جرم“ ھمیش اِنت کہ آئی ءَ راستیں گپ جتگ، بلوچانی ھکانی واستا توار چست کتگ، اسلام آباد ءِ کیمپ ءَ مئے ھمراھی ءَ اوشتاتگ، پہ زور بیگواھیں مردمانی کھولانی واستا توار چست کتگ ءُ پاکستان ءِ تہ ءَ آئین ءُ کانود ءِ بالادستی ءِ سر ءَ گپ جتگ۔
بلوچ کھولاں گشتگ کہ اے ملک ءَ ھرکس کہ بلوچ ءِ ھک، ٹکی یا کانون ءُ آئین ءِ ھاکمی ءِ سر ءَ گپ جنت آئی ءَ گدار گش انت۔ اے نوکیں گپے نہ اِنت۔ پاکستان ءِ زورآوریں کوتانی یک مزنیں راجدپتر یے ھست کہ آ ایماندار ءُ دلیریں مردماں گدار گشگ ءَ انت۔ مرچی ھمے درچ ءِ رد ءَ چندے زوراکیں مردمانی چماں ملک ءِ نیم آبادی گدار گشگ بوھگ ءَ اِنت۔
آئی ءَ گیش گوشتگ کہ پاکستان یک بے کانودیں سرڈگارے جوڑ بوتگ کہ اود ءَ کانود ءِ لگتمال کنوکاں ازت، داد ءُ نامداری دیگ بیت، وھدیکہ کانود ءِ پھریزوک کنوکاں چپ کنگ، نشانگ جوڑ کنگ ءُ جرم لیکگ بیت۔
اسلام آباد ءِ زھرشانی نندانک ءَ بھر زوروکیں بلوچ کھولاں گْوشتگ کہ ما ایمان مزاری ءِ گون ءَ اوشتاتگ ایں، ھاموش نہ بئیں۔ ما چہ میان استمانی برادری ءُ میان استمانی انسانی ھکانی گلاں لوٹ کن ایں کہ آ پاکستان ءِ سر ءَ زور بہ دنت کہ ایمان مزاری ءُ اے دگہ پرامنیں انسانی ھکانی جھدکارانی آزار ءُ اذیت ءِ بند کنگ بہ بیت۔
بلوچ کھولاں گْوشتگ کہ مئے زھرشانی 69 روچ اِنت کہ برجاہ اِنت، ءُ ادا ھستیں بیگواھیں مردمانی مات، جنک، چُک ءُ پیریں مردماں تْرندیں موسم، تْرندیں ھئور، تُرندیں روچ ءُ واکدارانی بیھارانی ترس ءَ نشتگیں مردمانی بے پرواھی برداشت کتگ۔
آئی ءَ گیش گوشتگ کہ اے سرجمیں وھد ءِ تہ ءَ نہ سرکار ءُ نہ مین اسٹریم میڈیا ءَ انساپ ءِ ھاتر ءَ آھانی گریوگ ءِ گوشدارگ ءِ جرات پیش نہ کتگ، پد ءَ ھم ھاندان وتی لوٹانی سر ءَ سدک اَنت۔
