TBP Balochi

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ مئے سرمچاراں جیونی ءُ تربت ءَ دو جتاجتائیں کاروائیاں زورگریں پاکستانی پوج ءِ پُجارینوک ءُ ھال اھوالی نزام تراک ءَ چہ نشانگ کتگ ءُ سک تاوان داتگ-

جارکش ءَ گْوشتگ کہ گوستگیں روچ ءَ بلوچ لبریشن آرمی ءِ سرمچاراں گوادر ءِ دمگ جیونی ءَ دو بیست پنجا ءِ ھند سر ءَ زورگریں پوج ءِ واستا راش بروکیں یک گاڑی یے ریموٹ کنٹرول آئی ای ڈی اُرش ءَ نشانگ کتگ اَنت، چریشی ءَ چہ گاڑی ءَ سک تاوان رس اِتگ-

جارکش ءَ گوشتگ کہ بلوچ لبریشن آرمی ءِ سرمچاراں تربت ءِ دمگ کلاتک ءَ یک ھال اھوالی ٹاورے تراک ءَ چہ تباہ کتگ- اے ٹاور ءِ سر ءَ زورگریں پاکستانی پوج ءِ نیمگ ءَ چہ چاریگی کیمرہ پٹ کتگ کہ دمگ چاریگری کنگ واستا کارمرز کنگ ءَ بیتگ-

جارکش ءَ گوشتگ بلوچ لبریشن آرمی اے کاروائیانی زمہ واری ءَ منّ اِیت-

بلوچستان ءِ بنجاھی شھر شال ءَ انسانی ھکانی میان اُستمانی روچ ءِ درگت ءَ بلوچ یکجھتی کمیٹی ءِ نیمگ ءَ سیمینارے برجم دارگ بیتگ۔

سیمینار ءَ زورانسری بیگواھیں مردمانی کھول، انسانی ھکانی جھدکار، نودربر ءُ شھریاں بھر زرتگ۔

دیوان ءَ بھر زوروکاں انسانی ھکانی بابت ءَ سرجمیں رپورٹ، دردناکیں کِسہ، آماچیں کھولانی دردناکیں گواھی ءُ بی وائی سی ءِ سروکی ءِ گشتانک گوش داشتگ انت۔ سیمینار ءِ ہر بھر ءَ بلوچستان ءِ انسانی ھکانی نا شریں جاورھال ءِ سر ءَ چمشانک دیگ بوتگ ءُ پسھی ءُ راستی ءُ مُچانکی جد ءُ جھد ءِ درکاری ءَ کڈنی کتگ-

بی وائی سی ءِ رھشوناں گوشتگ کہ مرچیگیں دیوان ایوک ءَ مراگش نہ اِنت بلکیں تابکاری ءِ نوک کنگ اِنت۔ آماچیں ھاندانانی جرات، ورنایانی جزم ءُ چاگرد ءِ یک رندے پد ءَ مارا یکجاھی ءُ یات داری ءَ کنت کہ راستی ءُ انساپ ءِ جد ءُ جھد تاکت ءِ ھواری ءَ برجاہ انت-

رھشوناں گْوشتگ مرچی بلوچستان ءِ تہ ءَ درائیں بنی آدمانی ھک مھتل اَنت ءُ بلوچ چہ درستاں بدتریں ریاستی زلم ءُ زوراکیانی آماچ اِنت۔ ھزاراں ھاندان بدھالیں زند گوازینگ ءَ اَنت ءُ زورانسری ءَ بیگواہ کنگ ءِ سلسلگ گوں ترندے ءَ برجاہ اَنت۔

بلوچستان ءِ دمگ کیچ ءِ ھند بالگتر ءَ پاکستانی لشکر ءِ نیمگ ءَ کورکائی تیرگواری ءَ چہ دمگی جنینے سک ٹپیگ بوتگ۔

ٹپیگیں جنین ءِ پجار 22 سالی ئیں دردانگ ءِ نام ءَ بوتگ کہ نذیر احمد ءِ جنین اِنت۔

دمگی بنشون ءِ رد ءَ 8 دسمبر 2025 ءِ بیگاہ ءَ فرنٹیئر کانسٹیبلری ءِ نیمگ ءَ چہ تچک ءَ تیرگواری ءِ وھد ءَ دردانگ تیر ءِ لگگ ءَ ٹپی بیتگ۔

بنشون ءَ گْوشتگ کہ دردانگ وتی لوگ ءِ چُل ءَ شپ ءِ ورگ ءِ تیاری ءَ بوتگ کہ اناگت ءَ نزیک ءَ تیرگواری ءِ توار اشکنگ بیتگ، ایشی ءَ پد آئی ءَ مار اِتگ کہ آئی ءِ بدن ءَ چیزے لگ اِتگ۔ پد ءَ آئی ءِ ناکو ءَ اے گپ ءِ پدرائی کت کہ آئی ءَ را تیر لگ اتگ ، ایشی ءِ سبب ءَ آئی ءَ چہ بازیں ھون ءِ رچگ بندات بوتگ ۔

کھول گوشتگ کساس دوزادہ بج ءِ نزیک ءَ دردانگ گیشیں درمان کنگ ءِ ھاترا ڈسٹرکٹ ہیڈ کوارٹر ہسپتال کیچ ءَ برگ بیتگ، اود ءَ ڈاکٹراں آئی ءَ را ایمرجنسی ایکسرا کنگ ءِ شور داتگ۔ بلے ڈی ایچ کیو کیچ ءَ جوانیں درمان ءِ آسراتی نہ بوھگ ءِ سبب ءَ ڈاکٹراں آئی ءَ را گیشیں درمان کمک ءِ ھاتر ءَ کراچی ءَ برگ ءِ سوج داتگ۔

دمگی مردمانی گشگ ءِ رد ءَ پاکستانی لشکر ءِ نیمگ ءَ لوگانی سر ءَ اے وڑیں بے رھبندیں تیرگواری ھمک روچی ئیں کارے جوڑ بوتگ۔ دمگ ءَ چیک پوسٹ جوڑ کنگ بنت ءُ ڈرون کیمرہ ءِ سر ءَ نگرانی کنگ بیت ءُ برے برے وتسر ءَ تچک ءَ تیرگواری ھم کنگ بیت۔

بلوچ یکجھتی کمیٹی ءَ گشتگ کہ اے امل شھریانی بنیادی انسانی ھکانی سکیں لگتمالی یے ءُ بلوچستان ءِ دوریں دمگاں دمگی آبادی ءِ سر ءَ زوریں کارمرد کنگ ءِ پدرائی انت-

زانگ بہ بیت کہ بلوچستان ءِ بازیں دمگاں پاکستانی لشکر ءِ تیرگواری ءُ شلنگ ءِ آسر ءَ جنین ءُ چک بیران ءُ ٹپیگ بوتگ اَنت۔ اے ماہ ءَ ھوشاب ءِ یک لوگے ءِ سر ءَ گولہ باری ءِ سبب ءَ یک جنوکے بیران ءُ پنچ ٹپی بوتگ انت۔

پاکستانی لشکر ءَ یک مردمے دزگیر کتگ ءُ ناشناسیں جاھے ءَ برتگ۔

ھالانی رد ءَ گوستگیں شپ ءَ پاکستانی لشکر ءَ پسنی ءِ دمگ جیونی ءِ نزیک ءَ پانوان میتگ ءَ یک لوگے ءِ سر ءَ اُرش کتگ ءُ اود ءَ جاڑیگیں مردم لٹ ءُ کٹ کنگ بیتگ ءُ لوگ ءِ ساز ءُ سامان پرشت ءُ پروش کتگ انت۔

بنشون ءِ رد ءَ پاکستانی لشکر ءَ ھمے وھد ءَ چہ لوگ ءَ سید محمد ء شاھو نامیں مردمے دزگیر کتگ ءُ گوں وت برتگ ءُ پد ءَ آ ناشناسیں جاھے ءَ برتگ۔

آوار جنگ بیتگیں سید محمد پیسر ءَ ھم زورانسری بیگواھی ءِ آماچ بوتگ بلے پد ءَ آ یل کنگ بوتگ۔

مردمانی گوشگ اِنت کہ پیسر ءَ ھم پاکستانی لشکر ءَ ھمے کھول ءِ دگہ پنچ مردم جتا جتائیں وھداں دزگیر ءُ بیگواہ کرتگ اَنت کہ آیانی تہ ءَ سید محمد کلمتی، نوربخش کلمتی، جلیل کلمتی، علی نواز کلمتی، فریق کلمتی ھوار اَنت۔

زانگ بہ بیت کہ بلوچستان ءَ زورانسری بیگواہ کنگ ءِ درچ چہ بازیں سالاں برجاہ انت کہ انسانی ھکانی یکشل ءَ زھر ءِ درشان ءَ کنگ ءَ انت، کہ اود ءَ انسانی ھکانی گلاں پاکستانی لشکر زوراکی ءَ بیگواہ کنگ ءِ تہ ءَ ھوار بوگ ءِ بھتام ءَ جنگ ءَ انت۔

انسانی ھکانی گلاں پاکستان ءِ سرکار ءَ کڈنی کتگ کہ آ زورانسری بیگواھیانی ھلاسی ءَ بہ کنت ءُ بیگواھیں مردماں یل بہ دنت-

بلوچستان لبریشن فرنٹ ءِ جارکش میجر گوھرام بلوچ ءَ رسانکدر ءَ وتی شنگ کتگیں درشان ءِ تہ ءَ گوشتگ کہ ھپت دسمبر 2025 ءِ شپ ءِ ساھت کساس نُھ ءُ دہ دمان ءَ گل ءِ چیریں ٹولی ءِ سر کتگیں ھالانی پد ءَ ڈیتھ اسکواڈ ءِ کارندھانی یک گاڑی یے شال سریاب دگ ءِ دمگ کلی کمالو ءَ نشانگ کتگ۔ اے اُرش ءِ آسر ءَ ڈیتھ اسکواڈ ءِ ھاسیں کارندہ مزمل زھری ء میر سلیم زھری مرتگ ءُ دو دگہ کارندہ ٹپی بیتگ اَنت۔

جارکش ءَ گْوشتگ کہ مزمل زھری شال ءُ آئی ءِ کش ءُ گوراں ورناھانی زورانسری آوار جنی ءُ دگہ جتاجتائیں چاگردی سلّکاریانی تہ ءَ ھوار بیتگ ۔ مِرگ ءَ چہ ساری آ پسند خان محمددزئی ءِ لوگ ءَ چہ در اتکگ ، کہ سرمچاراں نشانگ کتگ۔ پسند خان محمدزئی ء مراد ھان ءُ مزمل زھری ، بلوچستان ءَ ڈیتھ اسکواڈ ءِ بنجاھی سروک شفیق مینگل ءِ چیردستی ءَ کار ءِ کتگ۔

جارکش ءَ گوشتگ کہ بی ایل ایف ءِ سرمچاراں نُھ دستمبر 2025 ءِ شپ ءِ ساھت دہ ءَ واشک ءِ ھند ناگ ءَ برجاھیں یک پولیس تھانہ انگیر ءَ کُتگ ءُ اود ءَ ساڑی ئیں پولیس کارندہ دزگیر کُتگ ءُ جُست ءُ پرس کنگ ءِ میان ءَ چہ آیاں ھچ سلاہ در نیتکگ۔ بلے چہ گل ءِ چیریں ھالانی پد ءَ سرمچاراں تھانہ ءِ کارمستر ءِ لوگ انگیر ءَ کُتگ ءُ چہ اود ءَ چیر داتگیں سرکاری سلاہ کشتگ اَنت ۔ سرمچاراں کشتگیں درستیں سرکاری سلاہ دستیگ کُتگ اَنت پد ءَ کاروائی سرجم بوگ ءَ پد پولیس کارندہ یلہ داتگ اَنت ۔

جارکش ءَ دیمتر ءَ گوشتگ کہ یک دگہ کاروائی ءِ تہ ءَ بی ایل ایف ءِ سرمچاراں نُھ دسمبر 2025 ءِ شپ ءِ ساھت ھشت نیم ءِ نزیک ءَ بالگتر ءِ دمگ سھاکی ءَ برجاھیں زورگریں پاکستانی پوج ءِ بنجل ءِ سر ءَ اُرش کُتگ ۔ سرمچاراں چہ دو جتاجتائیں نیمگاں گوں ٹوھیں سلاھاں بنجل نشانگ کتگ۔ زورگریں پاکستانی پوج ءَ لس آبادی ءِ سر ءَ مارٹر آس داتگ۔

جارکش ءَ گُڈی ءَ گوشتگ کہ بی ایل ایف شال ، واشک ، بالگتر ءَ زورگریں پاکستانی پوج ڈیتھ اسکواڈ ءُ پولیس ءَ نشانگ کنگ ءِ زمہ واری منّ اِیت ۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ سرمچاراں مستونگ، مند ءُ شال ءَ سَے جتا جتائیں اُرشانی وھد ءَ زورگریں پاکستانی پوج ءِ ٹوھیں رنگے ءَ اُرش کتگ – سَے کاروائیاں زورگریں پوج ءِ یازدہ کارندہ کشتگ انت ءُ یکے زندگی ءَ دزگیر کتگ ءُ جتا جتائیں کاروائیانی وھد ءَ بلوچ لبریشن آرمی ءِ سَے سرمچار قاسم ارمان بلوچ پنام ءِ الماس، داد خدا مری پنام ءِ ریھان ءُ اُزیفہ بلوچ پنام ءِ گنجل شھید بیتگ انت-

آئی ءَ گوشتگ ھپت دسمبر ءَ مستونگ ءِ دمگ دشت ءَ زھری گٹ ءَ سرمچاراں دشمن ءِ کارندھانی سر ءَ ھما وھد ءَ اُرش کتگ آ دمگ ءَ پیشگامی ءَ بیتگ انت – اے کاروائی ءَ دشمن ءِ ھشت کارندہ جاہ پہ جاہ ءَ مرتگ انت ءُ بازینے زدگ بیتگ انت – ءُ سرمچاراں دشمن ءِ یک کارندہ سپاھی ظفر اللہ ء جھنڈا خان دزگیر کتگ – اُرش ءِ وھد ءَ دشمن ءَ ھیلی کاپٹر، کواڈ کاپٹر ءُ سرویلنس سسٹم کارمرد کتگ انت – بلے سرمچاراں جوانیں رپکاں دشمن ءِ دو کواڈ کاپٹر ءُ یک سرویلنس کیمرھے جتگ ءُ دور داتگ انت – اے جنگ ءُ چوپ داں دو اداں برجاہ بیتگ – چریشی ءَ سرمچار داد خدا مری پنام ءِ ریھان سک ٹپی بیتگ – ھمراھاں مھکمیں جاھے ءَ سرکنگ ءِ جھد کتگ بلے آئی ءَ ٹپانی درد نہ سگ اتگ ءُ شھید بیتگ-

جارکش ءَ گوشتگ ھمے روچ ءَ بلوچ لبریشن آرمی ءِ سرمچاراں کیچ ءِ ھند مند ءَ زورگریں پوج ءِ بنجاھی بنجل ءُ کرنل رینک آفسر ءِ بنجاہ نشانگ کتگ – سرمچاراں بنجاھی گیٹ ءِ پھریزی ءُ تَھ ئے پوزیشنزانی سر ءَ راکٹ لانچر ءُ وتکاریں سلاھاں گوں اُرش کتگ- ھمے کاروائی ءَ سَے کارندی مرتگ ءُ دو زدگ بیتگ انت – ءُ دشمن ءَ گیشیں تاوانانی دیمپانی کنگ کپتگ – دشمن ءِ نیمگ ءَ کارمرد کتگیں کواڈ کاپٹر ءُ کیمرہ ھم سرمچاراں ناکارہ کتگ انت – گوستگیں شپ ءَ سرمچاراں شال ءِ شھر زرائت کالونی ءِ نزیک ءَ دشمن ءِ یک چیک پوسٹے ءِ سر ءَ دزبمبے چگل داتگ چریشی ءَ دشمن ءَ تاوانانی دیمپانی کنگ کپتگ-

آئی ءَ گوشتگ اے کاروائیانی وھد ءَ شھید بیتگیں سرمچار وتی زندگی ءِ جد ءُ جھد، رھبند ءُ زانشت ءَ گوں بندوکی ءِ زمہ وار بیتگ انت- داد خدا مری پنام ءِ ریھان ء یار محمد مری ھرنائی ءِ دمگ پوڑ ءَ سیادی دار ایت – 2022 ءَ بی ایل اے ءَ ھوار بیتگ پد ءَ بولان، شال ءُ مستونگ ءِ میداناں وتی زمہ واریاں پیلو کنگ ءَ بیتگ – آ شھید سنگت چاکر مری پنام ءِ پردیسی ءُ زورانسری بیگواھی ءَ پد شھید بیتگیں عظیم خان مری ءِ برات بیتگ- ریھان مری یک نہ ترس، زوت پھم ءُ جنگی رھبندانی تَک ءَ سرچکاریں ھمراھے بیتگ- آئی ءِ کھول ءِ شش مردم 2018 ءَ دشمن ءِ زوراکیانی وھد ءَ شھید بیتگ انت کہ چریشانی توک ءَ دو زالبول ءُ سَے تپلیں زھگ ھوار بیتگ انت- اے سنگینیں درداں ابید ھم یک دمانے ءَ ھم آ آجوئی ءِ راہ ءَ پدکنز نہ بیتگ – ریھان مری ءَ بازیں جنگاں دشمن سرین پروش کتگ ءُ وتی سنگتانی ھمت ءُ زانشتکاری ءِ چیدگ جوڑ بیتگ-

جارکش ءَ گوشتگ سرمچار اُزیفہ بلوچ پنام ءِ گنجل ء عبدالحمید ءِ سیادی جیونی کوثرا ءَ بیتگ – آ یک سالے ءَ پیش بلوچ لبریشن آرمی ءِ بھر بیتگ – وتی کم اُمری ءَ ابید رھبندانی پاسدار بیتگ- 16 نومبر 2025 ءَ کیلکور ءَ وتی پرز ءِ پیلو کنگ ءِ وھد ءَ مار ءِ ورگ ءِ وھد ءَ ٹپی بیتگ – بنداتی درمان ءَ ابید ھم لھتے ادارھانی وھد ءَ شھید بیتگ- آ یک نرم گپتار، شرپدار ءُ بے تواریں مردمے بیتگ بلے مزنیں سِنچے ءِ واھند بیتگ – آئی ءِ شھیدی اے پدراھی ءَ کنت کہ بلوچ سرمچار دشمن ءِ تیر ءَ اناں بلکیں ھمک ناگیگیں جاوراں وتی ساہ ءُ سراں ڈیھ ءِ واستا ندر کن انت-

آئی ءَ دیمتر ءَ گوشتگ سرمچار قاسم ارمان بلوچ پنام ءِ الماس ء ماسٹر سدیر تربت ءِ دمگ آپسر ءِ نندوک بیتگ آئی ءِ بنکی ھنکین شاپک ءَ بیتگ- آ یک زھن ، وانندہ ءُ بے کساسیں سِنچانی واھند بیتگ- تو لٹریچر ءَ بی ایس ءِ نودربر بیتگے- تو آشوبی ادب ءِ نبشتہ کار، زانشتی گپ ءُ تران ءُ گھگیری ءِ تالانگ ءَ ھروھد ءَ پرکار بیتگ ئے- سیاسی تَک ءَ وانگ ءِ وھد ءَ آ بلوچ اسٹوڈنٹس آرگنائزیشن ءَ ھوار بیتگ ئے ءُ پد ءَ 2023 ءَ بلوچ لبریشن آرمی ءَ ھوار بوتگ ئے اود ءَ شھری ءُ کوھی میداناں وتی زمہ واری پیلو کتگ انت – شھیدی ءِ وھد ءَ الماس بلوچ بی ایل اے ءِ انٹیلی جنس ونگ زراب ءَ گوں بندوک بیتگ اود ءَ کسانوکیں وھدے ءَ بے کساسیں زمہ واری ءُ جھلانکین سِنچ ءُ تکنیکی رنگانی دروشم درشان کتگ انت- تو یک کزائے ءِ وھد ءَ 2 دسمبر 2025 ءَ شھید بیتگ ئے – آئی ءِ شھیدی بی ایل اے ءِ پکری پِڑ ءُ انٹیلی جنس ءِ ھردوکانی جاھاں ھورکی ءِ کمی ءِ سماہ ءَ کنت – پرچاکہ تو یک ھنچیں ورنایے بیتگ ئے جنگی وھد ءَ جد ءُ جھد ءِ زانشت ءَ جھلانکیں پِکر ءِ ھواری ءَ یک ھنچیں زانشتے ءَ دیم ءَ برگ لوٹگ ءَ بیتگ ئے-

جارکش ءَ گوشتگ بلوچ لبریشن آرمی وتی دراھیں شھیداں سھریں دروت ندر کنت- اے ھمراہ نا ایوک ءَ زورگر ءِ تاکتانی ھلاپ ءَ املی گھگیری ءِ ھمک بنداتی دست بیتگ انت بلکیں زانشتی پِڑ ءَ ھم اے جد ءُ جھد ءِ مھکمیں بنپد بیتگ انت- اے دیمھونایاں پدر بیت کہ بلوچ راجی آجوئی ءِ زرمبشت وتی پُسگانی نہ پروشگیں کرد، زانشت ءُ ھون ءِ ترمپ ءِ بنھشت ءَ دیم ءَ جنزگ ءَ انت-

آئی ءَ گڈسر ءَ گوشتگ اے گپ ءَ تچک کن ایں کہ بلوچ لبریشن آرمی زورگریں ریاست ءِ ھلاپ ءَ وتی کاروائیاں برجاہ کنت- دانکہ دشمن مئے سرڈگار ءِ سر ءَ جاڑیگ انت ءُ مئے گھگیری برجاہ بیت انت ءُ مئے پتر ءَ ھواریں ھمک سرمچار وت ءَ پیش کپوکیں ھمراہ ءِ مشن ءَ دیم ءَ جنزین ایت – بلوچ راج ءِ آجوئی المی ءِ راستی یے ءُ بی ایل اے وتی دراھیں زورانی ھمراھی ءَ داں منزل ءَ وتی جد ءُ جھد ءَ برجاہ کنت-

آزمانک: مات ءِ پوسٹر

(‘گُلی ءَ بہ رکین اِت’)

آزمانک کار: لیاقت کے بی

دی بلوچستان پوسٹ

یکشمبے ءِ روچ اَت، گُلی گوں سرپراز واھد ءِ گانا ‘بیگواہ’ ءَ گوں مشکول اَت ءُ گُد دوچی کنگ ءَ اَت، کش ءَ انور سن رائے ءِ ناول ‘چیخ’ ایر اَت ءُ آئی ءِ سر ءَ یک سُھریں ندے ھم ایر اَت۔ گُلی وتی پت ءُ مات ءِ مستریں چُک اَت، دگہ یک براتے ھست اَت۔ بلے آ سر ءَ شر نہ اَت۔ گُلی را گُلی پت ءَ نزدیک ءِ وانگجاہ ءَ دَاکل کُرتگ اَت۔ دھمی تبک ءَ پد آ نزدیک ءِ شھر ءَ کالج ءَ شت۔ وانگ ءَ پد دو بج ءَ لوگ ءَ اَت۔ گُلی وتی وانگجاہ ءِ تہ ءَ سک چالاک ءُ وانگ ءَ دیم ءَ اَت۔ گُلی بلکیں ایوک ءَ وانگ ءَ نہ اَت بلکیں آ وانگجاہ ءَ چہ پارگ بوت ءُ پد آ چار بج ءَ مُلک ءَ شت گوں وتی پت ءَ کار ئِے کُرت۔ شپ ءَ یک ءُ دو بج ءَ تک وانگ ءَ اَت۔ ھمے وڑ ءَ گُلی گوں وتی کھول ءَ گَل اَت۔ یک روچے گلُی ءَ یک نبشتانکے نبشتہ کُرتگ اَت سرھال “سُتکگیں لاش” اَت۔ اے نبشتانک ءِ شنگ بوگ ءَ پد گُلی کدر کم کم ءَ روان اَت وانگجاہ ءِ تہ ءَ ٹیچراں آئی ءِ ساری ءِ وڑ ءَ اھترام نہ کُرت۔ ھمے وڑ ءَ آئی ءَ دگہ نبشتانکے نبشتہ کُرت سرھال ءِ “ویرانیں میتگ”۔ نبشتہ کاری ءِ گِندگ ءَ پد آ چہ وانگجاہ ءَ کَشگ بوت۔ آئی ءِ وانگجاہ ءَ کشگ ءَ پد آ پوہ بوتگ اَت، کہ اے وانگجاہ مئے شھور ءُ زانت ءِ رند ءَ نہ اَنت۔ آئی ءِ پت ءَ جُھد کُرت گُلی ءَ دیم ترا بہ وانین اِیت۔ بلے گُلی نہ شت گُلی ھمد ءَ لوگ ءَ وت ونت ءُ وانگ ءَ شر اَت۔ گڑا گُلی ءَ وتی میتگ ءِ گونڈو ھم وانینت اَنت۔ یک روچے گُلی میتگ ءَ گُلی ءِ ھمساھگے چست کنگ بوت۔ گُلی ءُ آئی ءِ میتگ ءِ مردماں زھرشانی کُرت، سے روچ بوتگ اَت زھرشانی برجاہ اَت، گُلی ءِ برات کہ ،سر ءَ شر نہ اَت، چست کنگ بوت۔ بلے زھرشانی برجاہ اَت مردم گیش ءَ چہ گیش بھر زورگ ءَ اَت اَنت۔ گڑا شپ ءِ سے بج اَت زھرشانی ءِ سر ءَ کریک ڈؤن بوت ءُ لھتے مردم چست کنگ بوت آوانی تہ ءَ گُلی ءِ پت ھم گون اَت۔

گُلی ءَ لٹ شاپی ءُ مردمانی برگ ءُ زھرشانی ءَ آ دگہ نشتگیں مردمانی ھوسلہ دیست گڑا آ زیادہ مھکم بوت۔ آ ھر وھد زھرشانی ءَ ھوار اَت ءُ گُشتانک دیگ ءَ اَت۔ یک شپے گُلی ءِ لوگ ءَ لھتے مردم اَتک آوانی دیم ءَ چادر دیوک اَت ءُ درست نہ بوت اَنت، آواناں دو گاڑی گون اَت کانچ اِش سیاہ اِت اَنت۔ وھدے آیاں لوگ ءِ گیٹ ءَ جُپ کُرت لوگ ءَ پُترت اَنت۔ آ وانی تہ ءَ یک زالبولے گون اَت ءُ گشت ئِے’گُلی کا کمرہ اُس طرف ہے.’ آواں گُلی چہ واب ءَ زُرت گوں وت ءَ بُرت، گُلی ءِ سامان ھرچی ھست اَت آواں بُرت اَنت۔ گُلی ءِ مات سک پریاد کنگ ءَ اَت بلے کس ءَ آئی ءِ گپ ھچ گوش نہ داشت۔ میتگ ءِ مردم ھم ھاموش اَت اَنت اے روچ ءَ۔ ایشی ءَ پد ھما پوسٹر کہ گُلی ءَ گون اَت زھرشانیانی وھد ءَ نوں گُلی مات ءَ گون اِنت ءُ سر ءِ نبشتگیں بدل اِنت ءُ “گُلی ءَ بہ رکین اِت” نبشتہ اِنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

دالبندین ھند زھور کالونی ءَ گوستگیں روچ ءَ پاکستانی لشکر ءَ یک گوھار ءُ براتے دزگیر کتگ ءُ زورانسری بیگواہ کتگ انت۔ دمگی مردمانی رد ءَ لشکر ءَ اے دوئیں مردم دزگیر کنگ ءَ پد ناشناسیں جاھے ءَ برتگ انت کہ داں انگت ءَ بیگواہ انت-

دمگی مردماں بیگواھیں مردمانی پجار زبیر ء محمد رحیم ءُ رحیمہ ء محمد رحیم ءِ ناماں زانگ بوتگ انت۔ دمگی مردماں گشتگ کہ بیڑ ءِ وھد ءَ بازیں لوگ پٹ ءُ پول کنگ بوتگ انت ءُ مھلوک لٹ ءُ کُٹ کنگ بیتگ انت-

زانگ بہ بیت ایشی ءَ پیسر ءَ ماہ جبین بلوچ ءُ آئی ءِ برات یونس ھم پاکستانی لشکر ءَ زورانسری بیگواہ کتگ بیتگ انت۔ رند ءَ یونس یل کنگ بوتگ، بلے ماہ جبین بلوچ بازیں ماہانی گوزگ ءَ پد ھم انگت گار ءُ بیگواہ اِنت۔

ھمے وڑ ءَ نسرینہ بلوچ حب چوکی ءَ پاکستانی لشکر ءِ دست ءَ دزگیر کنگ ءَ پد بیگواہ کنگ بیتگ ءُ تاں انوگ ءَ آئی ءِ بارو ءَ ھچ ھال نیست-

بلوچستان ءَ پاکستانی پوج دو جتا جتائیں جاھاں بمبانی نشانگ کنگ بیتگ – اے بمب تراک گوستگیں شپ ءَ کنگ بیتگ انت کہ اود ءَ ناشناسیں مردماں پاکستانی پوج ءِ بَنجاہ بمبانی نشانگ کتگ انت-

گیشیں اھوالانی رد ءَ بلوچستان ءِ بنجاھی شھر شال ءُ ڈھاڈر ءَ دو جتا جتائیں بمب تراک ناشناسیں مردمانی نیمگ ءَ کنگ بیتگ انت ۔

شال ءِ پولیس ءِ رد ءَ سریاب روڈ ءِ سر ءَ زیارت کالونی ءِ مزنیں دروازگ ءِ دپ ءَ ناشناسیں موٹر سائیکل سواراں دزبمبے چگل داتگ کہ چریشی ءَ ٹوھیں تراکے بیتگ-

ھالانی رد ءَ تراک پاکستانی لشکر ءِ یک پوسٹے نشانگ کنگ بیتگ-

ھمے وڑ ءَ بلوچستان ءِ دمگ بولان ءِ ھند ڈھاڈر ءَ سرکٹ ہاؤس ءِ نزیک ءَ ٹوھیں تراکے ءِ توار اشکنگ بیتگ کہ ایشی ءَ پد دمگ ءَ تیرگواری ءِ توار ھم بوتگ ۔

دمگی مردمانی رد ءَ تراک ءِ توار باز دور ءَ اشکنگ کنگ بوتگ۔ انگت ءَ ھچ وڑیں تاوان ءِ پدر کنگ نہ بوتگ۔

زانگ بہ بیت بلوچ آجوئی لوٹوکیں گلانی نیمگ ءَ اے دابیں اُرش یکشل ءَ بوگ ءَ انت کہ اود ءَ پاکستانی پوج ءُ اود ءَ بند ساچی شرکت نشانگ کنگ بوگ ءَ انت-

تربت شھدربرجاہ ءِ نودربراں سے نودربر نور خان نزر، رحمر ھلکو ءُ عمران تاج ءِ زورانسری آوار جنی ءِ ھلاپ ءَ مروچی تربت یونیورسٹی ءَ زھرشانی روانک کشگ بیتگ-

نودربرانی مزنیں کچے ءَ یونیورسٹی ءَ پند بُران وتی سنگتانی یل کنائینگ ءِ لوٹ کتگ- زھرشانی کنوکاں پلے کارڈز ءُ بینرز چست کتگ بیتگ کہ آیانی سر ءَ بیگواھیں نودبرانی یل کنائینگ لوٹ بیتگ اَنت-

نودربریں رھشوناں گوشتگ کہ نور خان نزر شش دسمبر ءَ وھدے کہ رحمت ھلکو پنچ اکتوبر ءُ عمران تاج بیست یک جون 2025 ءَ بیگواہ کنگ بیتگ اَنت بلے تنی وھدے ھچ وڑیں سرپدی دیگ بیگ ءَ نہ اِنت، چریشی ءِ سوب ءَ نودربرانی تہ ءَ یک تُرسے ودی بیت آیانی کھول ءُ سنگت سک سسّائی درد ءُ گماں دوچار اَنت-

ترانکاراں تران کنان ءَ گوشتگ کہ زانشتی ادارھاں چہ ھمگرنچیں ورنا اے وڑ بیگواہ کنگ آئین ءُ کانود ءِ ھلاپ ورزی اِنت- آیاں دمگی انتزامیہ ، صوبائی ھکومت ءُ انسانی ھکانی ادارھاں چہ دزبندی کتگ کہ سئیں نودربراں یل کنائینگ ھاتر ءَ زوت گامگیج بزور اَنت-

زھرشانی ءَ ھواریں مردماں کڈن کتگ کہ اگاں بیگواھیں نودربر یل کنگ نہ بیت اَنت گُڑا زھرشانی دراجکش کنگ بیت- نودربراں لوٹ کتگ کہ آ ورنایانی زند ءِ پھاز ءِ دلجمی بدے اَنت-

روانک پُرایمنی ءَ گوں آسر کنگ بیتگ، بلے نودربراں تچک کتگ کہ وتی سنگتانی یل کنائینگ ءَ تاں زھرشانی برجاہ بیت-