عیب چہ باسکان اِنت
مجید عاجز
دی بلوچستان پوسٹ
منی واجہ ! تو منا جست کتگ اَت، کہ تو ھئیر بیار ءُ واجہ نوابزادہ بُراھمدگ ءِ سر ءَ زھرئے تئی لوٹ چے اِنت ؟ آ چے بکن اَنت تو وش بئے ؟
تئی اولی جُست ءِ پسّو ءَ من بس ھمے گُشاں ۔
کہ من بُراھمدگ ءِ سر ءَ زھر نھاں ۔ کوتائی ءُ کمزوریانی سر ءَ اختلاف دارگ زھری یے نہ اِنت ۔ من ھمے سرپد باں ۔ کہ گوں گیس ءِ جنئگ ءَ بُراھمدگ ءِ سنگتاں چہ درستاں گیش دشمن ءَ را معاشی تاوان داتگ ءُ آئی ءِ فیکٹری ءُ کار جاہ بند بوتگ اَنت ۔ پنجاب کوراس بوتگ ۔۔ اے کریڈٹ الّم بُراھمدگ ءَ دیگ بیت ۔
دومی گپّ کہ من ھئیر بیار ءِ سر ءَ زھراں ۔۔ اے یک راستی یے ، اشی ءِ درانگاز مرچی ناں ، من دوھزار پانزدہ ءُ شانزدہ ءَ بگر ، تاں روچ ء مرچی کنان ءَ پیداک آں ۔۔ ھئیر بیار ءَ گوں منا اختلاف نیست ۔ سرجمی ءَ منی ستک چہ ھئیر بیار نامیں وتگلا پیماز بوئیں رہشونے ءَ پْرشتگ ۔ منی نزّ ءَ ھئیر بیار ھما جاہ ءَ سر اِنت کہ ناقابلِ اصلاح اِنت ۔ پمشکا اشی ءِ گَند ءُ گسڑیں سیاست گپّ ءُ باوستے نہ کرزیت ۔ آجوی جنزانی تھا کسے ردی یے کنت ۔۔ آئی ءِ گنجائش ھست ۔ کہ شر بہ بیت ءُ آئی ءِ معافی ءِ ھم گنجائش ھست ۔ بلئے واجہ ھئیر بیار ءَ جُرم کتگ ءُ بلوچ آجوئی ءِ جنز ءِ مجرم اِنت ۔ مجرم سزا ءِ ھَکّدار اِنت ۔ تاں ھما وھد ءَ کہ آ وتی جُرم ءَ مہ منّیت ءُ معافی مہ لوٹیت ۔۔
جُرم نمبر یک ۔ استاد اسلم ءِ پہ الاج ءِ ھاترا انڈیا ءِ روگ ءِ گپّ ءَ پبلک کنئگ ۔ کہ آ یک سِلابندیں گَلّے ءِ سنئیر ءُ زمّہ داریں کمانڈرے ءُ گوریلہ جھدکارے ۔ گوریلہ جنگ یک چیریں جنگے ءُ بائدیں ہچ وڑیں گوریلہ ءِ چیریں گپّ ءُ راز پبلک کنئگ مہ بنت ۔۔ اے گپّ ءِ دومی نکسان اش اِنت ۔ چرے گپّ ءَ پاکستان ءِ پروپیگنڈہ ءَ یک جواز ءُ نیمونے شما دست ءَ دات ۔ کہ بلوچ را ءِ ایجنٹ اَنت ءُ انڈیا ءِ پروکسی اَنت ۔ تُری بِلّے انڈیا ءَ بلوچ جنز ءَ مُچّے واد ءِ کُمک نہ کتگ ۔
سیمی اے کہ وھدے شھید ریحان ءَ چینیانی بس ءِ سرا فدائی ارش کت ۔ آس ماں ھائی کمان ءِ چِرّک ءَ لگّ اِت ۔ نہ گشئے کہ بلوچستان ءَ پُلمال کنوکیں چینیانی سرا اے ارش بوتگ اَت ۔ انچو گُمان بوت ۔ کہ اے ارش ھائی کمان ءِ کیمپ ءِ سرا بوتگ اَت ۔ چو پاکستان ءِ وڑا اے ارش ءِ کنڈم کنئگ ءَ شما جھانے سر ءَ زرت ۔ ہما موقف کہ پاکستان ئیگ اَت ۔ھائی کمان ءِ ھوں ھما اَت ۔
ھائی کمان ءِ نوکتر ءُ نوکازتریں وشکند کہ امریکہ ءَ بی ایل اے ءِ سرا پابندی جت ۔ واجہ ءَ نہ چِش اِت ءُ نہ کُلّ اِت جارئِے پِرّینت ۔ کہ واجہ امریکہ ! چینیانی بس ءِ سرا ، چین ءِ سفارتہ خانہ ءِ سرا ءُ گُوادر پی سی ہوٹل ءِ سرا ، فدائی ارش ما نہ کتگ ۔ تو بوج ءُ بُن ئےِ کن ۔ زاناں کے ءَ گُشتگ ۔ تو ارش کتگ ۔ وتسرا گوک ءِ روت ئےِ سُند ءَ نہ اوشت ئے ۔ ہرکس زانت کہ تئی بردستاں چشیں ھَور مان نیست ۔ اے کوردید ءَ اینچو ھوں ہوش مان نیست ۔ کہ امریکہ ءَ پابندی چہ پاکستان ءَ وتی مفادے ءِ کشّگ ءِ ھاترا جتگ ۔ باندا کہ آ تئی زور ءُ ھاٹی ءَ گندیت ءُ آئی ءِ مفاد گوں تو وابستہ بنت ۔ اے پابندی مابندیاں ہچ ارزش نہ بیت ۔۔
طالبان امریکہ ءِ مستریں دشمن اَنت ۔ ھمے طالبانانی ایرجیگ کنئگ ءَ نیٹو ءَ اوگانستان سر ءُ چیر کت ۔ ءُ طالبان تاں روچ ء مرچیگ ءَ عام پبلک ءِ سرا وتکُش کنئگ ءَ انت ءُ چا دیم ءَ امریکہ گوں آھاں مزاکرات کنئگ ءَ اِنت ۔ اے گپّ ءَ امریکہ ءُ بلوچ راج ھردو شرّی ءَ زان اَنت ۔ تو ادا شیر نہ بورینتگ ۔۔ چو عالی ڈگار ءِ شئیر ءَ کہ چہ غلام ءَ جست کنئگ بیت ۔
کہ بیار غلام جنگانی ھکایتاں
غلام گشیت۔
اچ منا جنگانی مہ پرس ھالاں
زھرکنیں ورناہ کہ دُچار بیتّاں
گڑا من وتی پادانی میار بیتّاں
میدان ءَ سیاسی شعور ءُ غلامی ءِ احساس کہ کسے ءَ داتگ ۔ گڑا آ بی ایس او ءُ پدا بی این ایم بوتگ اَنت ۔ اگاں تو چار بے سریں پیتّاری کنئے ۔ھم کریڈٹ بی ایس او ءُ بی این ایم ءَ روت ۔
تئی کرشماتی چہ اوگانستان ءُ روس ءَ واتری ءَ پد تچک ءَ پارلیمنٹ ءَ شتگ ءُ اولی تیر ءِ توار ءَ دست ئِے تُکّ جتگ اَنت دیم پہ لندن ءَ برو کہ نہ روئے ۔ ءُ مارا پھکاں پہ ھمے گپّ ءَ ریپینتگ ئِے کہ من سفارت کاری کناں ۔ لابینگ کناں ۔ بیست سال گْوستگ ۔ سفاتکاری ءُ لابینگ ھمے کتگ ئِے کہ یک بینرے گوں چار مردم ءَ دست ءَ کتگ ءُ فوٹویے سوشل میڈیا ءَ سر دست کتگ ۔ میدان ءَ بی ایس او ءَ جنگ کتگ ۔ بی این ایم ءَ جنگ کتگ ۔ مھلوک سیاسی شعور داتگ ۔ پہ جنگ ءَ تیار کتگ ۔ تئی کرشماتی اینچو مڈّی مڈّی کنئگ ءَ اِنت ۔ اے چاریں تپنگ ءُ تیر تھنا آئی ءِ میراث نہ اَنت ۔۔ اے یک ٹیم ورکے بوتگ ۔ سعادت مری ، واحد کمبر ، ڈاکٹر خالد استاد اسلم ءُ دگہ بازینے ءِ کِردار ھم بوتگ ءُ اے کرشماتی ءِ پگار گیر نہ بوتگ اَنت ۔ اے راج ءِ ھواریں مَڈّی اَنت فردے ءِ نہ اَنت ۔
زمین ءِ ھما بچّانی مَڈّی اَنت کہ تبد ءُ جَلاں تُنّ ءُ گُژن سگگّ ءَ اَنت ءُ سُھریں تیراں ماں وتی ڈوبراں سارت کنئگ ءَ اَنت ۔
شما گپتگ ءُ داشتگ ۔ کہ اے جنگ کرشماتی ءَ بنگیج کتگ ۔ کہ چار تپنگ ئِے داتگ ۔ منی واجہ ۔ شھید غلام محمد گشیت ۔ جنگ ءَ تپنگ نہ کنت مردم ئِے کنت ۔ وھدے مردم پہ جنگ ءَ ساڑی بوت ۔ تپنگ ءِ درگیجگ بلائیں کارے نہ اِنت ۔ ھئیر بیار ءَ چینچو مردم جنگ ءَ تیار کتگ ؟ ما وا بنداتی مردمیں ۔ ما یکروچے ھئیر بیار نامیں مھلوکے نہ دیستگ ۔ بئیت جلسّھے ءَ گشتانک بدنت ۔ میٹنگے ءَ سرکل بدنت ۔ ھئیر بیار ءَ وا تنیگہ بلوچستان نہ دیستہ ۔ مکران ءَ وا پہ رھگْوزی سرئِے نہ کپتگ ۔ آئی ءَ راج شعور ءُ آگھی کدی ءُ کجا داتگ ؟
گراؤنڈ ءِ کارئِے ھمے بوتگ ۔ کہ ماں گراؤنڈ ءَ ہرچ سنگتے کہ گیشتر ایکٹیو بوتگ ۔ فردً فردً آئی ءِ داشتگیں فیک آئی ڈیزاں آیانی نام ماں سوشل میڈیا ءَ آشکار کتگ اَنت ۔ گراؤنڈ چہ بی ایس او ءُ بی این ایم ءِ ورکراں ساپ کنائینتگ ۔ اشانی تھا زاھد کُرد ، رضا جھانگیر ، ڈاکٹر منّان ءُ گُڈّی ءَ کریمہ بلوچ ءِ پُچکان اَتنت ۔ کہ آ چہ ملک ءَ در اتک ءُ وتی ساہ ئِے رکّینت ۔ استاد اسلم ءِ نشاندہی ھم شمئے نیمگا بوت ۔ کہ ماں اوگانستان ءَ اِنت ءُ دیر نہ گْوست آ شھید کنئگ بوت ۔ دگہ مخبری کجام اِنت ۔۔ جدیدیں مخبری ہمشی ءَ گُش اَنت ۔ شما چہ راشد پٹھان ءُ مُلّا عمر ءَ گیش خطرناک اِت ۔ پرچا کہ آ پدّر ءُ پیداور اَنت ءُ ہرکس اش زانت ۔ بلئے شمارا گْوارچے دیم ءَ اِنت ءُ دل پھک ءُ دل سپائیں مردمانی دل ءَ شما آجوی ءِ جھدکار اِت ۔
اگاں ایران ءَ سنگتے رؤت پہ الاج ءَ یا وتی جن ءُ چکاں لوٹائنیت ءُ ماہ کپّے نندیت ۔ شما سنگتاں ایران ءِ پروکسی قرار دیگ ءَ ئے ۔ اے پروکسی ءِ گپّ تھنا فیک آئی ڈیزاں ناں بلکیں شر چیزّیں ھائی کمان ءِ آفیشل بیانانی تھا ھم سنگت گُشگ بوتگ اَنت ۔ یک نیمگے شما گش اِت کہ سر جمیں بلوچستان بلوچانی اِنت ءُ ایران ءُ پاکستان ھردو زورگیر اَنت ۔
گڑا یکّے زورگیرانی کشّ اتگیں لکیر ءَ لگت دنت ءُ چھبار ، پیشّن ، سرباز ، دشتیاری ، سروان ، یا دزّاپ ءَ رؤت ۔ منی نزّ ءَ آ ھم بلوچ ءِ زمین اِنت ۔ ءُ شما لانک بستگ کہ ما ئِے آجو کنیں ۔ ترا بیست سال اِنت جنگ ءَ ئے ۔ تئی سلابندیں گَلّانی مردم پہ دانگے پیناڈول ءَ مُھتاج اَنت ۔ پاکستان ءِ ہسپتالاں الاج ءَ شت نہ کن اَنت ۔ ایران ءَ مہ رو اَنت کہ پروکسی اَنت ۔ گڑا کرشماتی ءَ بگش ، متبادل زرائع پیدا بکن ۔ انکلابی پارٹیانی وتی اسکول بنت ، وتی ہسپتال بنت ۔ بیست سال ءَ گیش اِنت کہ تو سفارتکاری ءِ نیمون ءَ ڈنّ ءَ دیم دیگ بوتگ ئے ۔ تو یک ڈسپنسری یے ءِ بندوست نہ کتگ ۔ اوگانستان ءَ وا پہ اسکول ءُ ڈسپنسری یے ءَ ترا کسّ ءَ مکن نہ کتگ اَت ۔ تو گوں ریاستے ءَ جنگ ءَ ئے ۔ تئی سیاسی پارٹیاں نیم ریاست ءِ کردار ادا کنئگ لوٹیت ۔ ھشکیں بیانانی سرا گُزران نہ بیت ۔ عمل لوٹیت ۔۔ وتی راج دزگرگ لوٹیت ۔ گڑا تئی ہمبراہ بووگ ءُ وتی کوشارینگ ءَ چَکّ ءُ پد نہ بیت ۔ شھیدانی زھگاں گُد گْورا نیست ۔ چمپل پادا نیست ۔ چہ وانگ ءُ زانگ ءَ زبھر اَنت ۔ ھمے ھال سرمچارانی چُکّانی اِنت ۔ شما پنچ ءُ شش سال بیت ۔ کہ سوشل میڈیا سر ءَ زرتگ ۔ بلئے بے سریں جیڑہانی سرا کہ ہچ وڑا پہ راجی جنز ءَ سیتّ نہ اَنت ۔ انچو گُمان بیت شما اے کاراں یک منصوبہ بندی یے ءِ تھت ءَ کنئگائے ءُ چو وروک ءَ آجوی ءِ جنز ءَ چہ تھا وران ءُ کْواپگ کنان ئے ۔ پمشکا من شمارا کلاگ زیراں ۔ شمئے سرا ٹھک دیاں ۔ شمارا ریشکند ءُ مَلنڈ کناں ۔ منی نزّ ءَ بنیادی جیڑہ ہمش اَنت ۔ بلئے شما اشانی بابت ءَ تُکّ ءُ نُکّ اِت ۔۔
۔ ھمے یکّیں ٹُکر ءَ یک دمگے ءَ شمارا چشیں ھند ءُجاگھے نیست ۔ کہ اودا سرکار ءِ رٹّ ءَ چیلنج کت بہ کنئے ۔ چار مردم یکجاہ کت بہ کنئے ۔ سر گپتگ ئے کہ ما مغربی بلوچستان ءَ آجو کنیں ۔
شما وا بانور ءِ تِرّ کتگ ۔
انچو گُش اَنت ۔ کہ سرگْوپے بانورے ءَ سمبھینگ ءَ اَت ۔ بانور کزائی بوت ۔ سرگْوپ ءَ چار اِت بانور پشل مہ بیت ۔ گشت ئِے پرواہ نیست ۔ تئی اولی چُکّ بچکے بیت ۔۔ بانور ءَ گشت دگہ تِرّے دیاں ۔ بِلّے دومی چُکّ ھوں بچکے بیت ۔ سرگُوپ ءَ درّائینت ۔ یکبرے ھمے یکّین ءَ مُش ءُ بند ۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
