بلوچستان ءِ جتاجتائیں اُرشاں پاکستانی پوج ءِ سر ءَ اُرش سلاہ برگ ءُ ریل ءِ سر ءَ بیتگیں اُرشانی زمہ واری بی ایل اے ءُ بی آر جی ءَ منّ اِتگ اَنت-
بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں چارشمبے ءِ روچ ءَ پنجگور ءِ ھند کاٹگری ءَ زورگریں پاکستانی پوج ءِ یک گاڑی یے گوں تراکناکیں شورھاں نشانگ کرتگ۔ تراک ءِ آسر ءَ زورگریں پوج ءِ چار کارندہ مرتگ ءُ دگہ دو کارندہ سک ٹپی بیتگ اَنت۔ گاڑی باز تاوان رس اِتگ۔
جارکش ءَ گوشتگ کہ بی ایل اے ءِ سرمچاراں شانزدہ دسمبر ءَ ھزدار ءِ ھند زھری ءَ بلبل ءَ زورگریں پاکستانی پوج ءِ گاڑیانی کاروانے ءِ سر ءَ ترندیں اُرشے کرتگ۔ سرمچاراں زورگریں پوج ءِ یک گاڑی یے گوں تراکناکیں شورھاں نشانگ کنگ ءَ پد کاروان ءِ سر ءَ سنگر گپتگ ءُ اُرش کرتگ۔
جارکش ءَ گوشتگ کہ سرمچاراں زورگریں پوج ھما وھد ءَ نشانگ کرتگ کہ آ بلبل ءُ کش ءُ گوراں لشکر کشی کنگ ءَ بیتگ۔ اے اُرش ءَ زورگریں پوج ءِ نھ کارندہ مرتگ ءُ پنچ ءَ گیش ٹپی بیتگ اَنت۔ سرمچاراں زورگریں پوج ءِ گولا ،تراکناکیں شورہ ءُ بازیں کچے ءَ سلاہ گوں گاڑیاں ھوار دستیگ کرتگ اَنت۔
جارکش ءَ گوشتگ زھری ءُ کش ءُ گوراں پروش وارتگیں پوج بے میاریں بلوچ مھلوک ءِ سر ءَ وتی زوراکی ءَ گیش کنگ ءَ اِنت۔ زورگریں پوج مھلوک ءَ پہ وت اسپر ءِ درشم ءَ کارمرز کنگ ءَ اِنت ءُ وتی پروش ءِ چیر دیگ ءِ بے سوبیں جھدے کنگ ءَ اِنت۔ لوگاں بیڑ برگ، مردمانی ترسینگ ءُ مچی سزا ءِ پالیسی ایشی پدریں منانک اِنت۔
جارکش ءَ گوشتگ کہ بی ایل اے ءِ سرمچار ھر وھد ءَ پہ زورگریں پوج ءِ نشانگ کنگ ءَ ساڑی اَنت ءُ بلوچ مھلوک ءِ سر ءَ بیوکیں ھمک زوراکی ءِ ھساب گرگ بیت۔ زورگریں پوج اے بزانت کہ اے زور ءُ ریاستی زوراکی بلوچ راجی گھگیری ءَ نزور کرت نہ کنت۔
بلوچ ریپبلکن گارڈز ءِ جارکش دوستین بلوچ ءَ وتی شنگ کرتگیں درشانے ءَ گوشتگ کہ بی آر جی ءِ سرمچاراں دوشی سبی ءُ ڈھاڈر ءِ میان ءَ ریل ٹریک گوں چیر کرتگیں شورھاں نشانگ کرتگ۔
جارکش ءَ گوشتگ دگہ یک کاروائی ءَ سرمچاراں نصیر آباد ءِ ھند پیرو پھل ءِ نزیک ءَ پاکستانی پوج ءِ چوکی ءِ سر ءَ تیرگواری کرتگ ءُ گرنیڈ لانچر ءِ باز گولہ آس داتگ کہ نشانگ ءَ کپتگ اَنت۔ چریشی ءِ آسر ءَ دژمن ءَ جانی ءُ مالی تاوان بوتگ ۔
درشانانی گُڈی ءَ دوئیناں اُرشانی زمہ واری منّ اِتگ ءُ گوشتگ کہ مئے اُرش داں بلوچستان ءِ وتواجھی ءَ تاں برجاہ بنت-
