تالبانانی جنگی شوربندی
نبشتہ کار: ماپلی بلوچ
دی بلوچستان پوسٹ
1979 ءِ زمانگ ءَ سویت یونین اوگانستان ءَ کیت کساس دہ سال اوگانستان جنگ کنت ءُ ھمے میان ءَ بازیں زانوگیرے وتی ھیال ءَ درشان کنت گُڑا لھتیں ھمے گپ ءِ سر ءَ ستک دار ایت کہ “تالبانانی گور ءَ جنگی تجربگ نیست سویت یک ماڈرن ٹیکنالوجی ءَ گُوں ھواری ءَ مزن ءَ کساس ءَ جنگی ساز ءُ سامان ءُ جنگی تجربگ دار ایت گُڑا ھچ گُنجائیش نیست انت کہ تالبان جنگ ءَ باج بہ بارت” ایش ءَ چہ ابید سویت دہ سال رند وتی بُنڈوکاں زور یت ءُ در کپ ایت۔ ھمے میان ءَ تالبان وتی جنگ ءَ بندات کنت اوگنستان ءِ زمین ءَ کساس ھشت جُتا جتائیں (گروہ) بنت کہ آ قبائلی بُنیات ءَ وتی جنگی رکروٹمنٹ ءَ کنان ءُ دیم ءَ روان بنت۔ بلے ھمے ھشتیں گروھانی میان ءَ کورڈینشن اُرش ھم گندگ بیت بزانکہ باز جاہ اُرش کنگی ءِ ھاتر ءَ مردم سرجمیں گروہ چہ زُرگ بیت یاکہ باز جاہ آپریشن بیت گُڑا ھمے گروہ یک ءُ دومی ءَ بیس کیمپ ءَ وت ءَ را رکینگ ءِ ھاتر ءَ کارمرز کن اَنت۔
یک انچیں وھدے کیت کہ سویت ءَ را باور بیت کہ اے جنگ ءَ انوں باج برگ نہ بیت “ اے بس تھنا بےکساس جانی نکسان چہ ابید” دگہ ھچے نہ اِنت ۔ ھمے جنگ ءِ تہ ءَ تلبان ءَ را ھم چُشیں باج برگ ءِ ھاسیں ستک ءُ بروسہ وتی سر ءَ نہ بیت بلے تلبان ھمے ھاتر ءَ گُوں جزبگ ءَ جنگ ءَ برجم دار ایت کہ آئی ءَ را ستک بیت کہ من وتی ھکیں ھاتر ءَ جنگ کنگ ءَ اوں ۔ بلے گُڈی ءَ سویت یونین بے کساس لاچار بیت گُڑا اوگانستان چہ درکیت۔
ھمے جنگ ءِ میان ءَ تلبان ءَ را ویسٹ ءُ اَرب اِستان کمک کن انت آیانی کدے اوں مکسد اے نہ بیت کہ تلبان جنگ ءَ چہ باج بہ بارت بلکیں آیانی مکسد ھمے بیت کہ بس سویت یک انچیں جنگے ءِ بھر بہ بیت کہ آئی ءِ تہ ءَ سویت ءِ پوجی ھونانی تہ ءَ گپچلوک بہ جن اَنت۔
تلبانیں جنگ ءِ کٹگیں بازیں سبب بوت کن انت بلے درستیں چہ ارزشت داریں شئے آیانی جنگی شُوربندی زنگ بیت ءُ ” the other side of mountains” کتاب تلبان ءَ جنگی شُوربندیانی سر ءَ انت ،جھد بیت کہ لھتیں ڈلگیں جنگی شُوربندیانی سر ءَ وتی باوست ءَ دیم ءَ بران بہ کن آں۔ چوناھیگا سک باز کسانیں جنگی شُوربندی کارمرز کنگ بُوتگ چُشکہ سویت یونین ءِ کیمپانی اندر ءَ ورگ ءُ وردنانی تہ ءَ زھر مان کنگ یاکہ سویت یونین ءِ جنگی ھوسلہ ءَ کم کنگ ءِ ھاتر ءَ مُرتگیں پوجیاں سرگ سند کنگ ۔
تلبان ءُ سویت یونین ءِ جنگ ءِ میان مزنیں چار جنگی شوربندی بے کساس کارمرز کنگ بوتگ چہ تلبانے نیمگ ءَ ءُ ھمے شوربندانی بازیں جاھے کارمرز بُوگ ءَ رند تالبانانی یک کمانڈرے وتی گلگدارے ءِ اندر ءَ درائینت ” اوگانستان ءُ سویت یونین ءَ جنگ گوریلا جنگے نہ بوتگ پرچا گوریلا جنگ ءِ اندر اُرش ءِ ڈارکشن ءُ وھد دژمن ءَ زانت ءَ چہ چپ بیت بلے اوگانستان ءَ جنگ ءَ سویت یونین ءِ پوج ءَ را سرجمیں اِلم بیت کہ کجام روڈ ءُ دکان منی سر ءَ اُرش بیت بس تھنا آئی ءِ گور ءَ وس ءُ واک نہ بیت اُرشانی دارگ ءِ ھاتر ءَ –
جنگ ءِ بنداتی روچاں گیش تالبان ءِ سنٹر اف گرویٹی ھمے بیت ک سویت ءِ پوجی کانوائی ءُ ورگ وردن ءُ پوجیانی شَے یک جاہ بہ دومی جاہ روگ ءِ سر ءَ اُرش کنگ ،بلے کسانیں مُداتے ءَ گوزگ ءَ رند تالبان سنٹر اف گرویٹی بزانکہ جنگی پوکس سرجمیں مٹ بیت ءُ چار مھکمیں شوربندی ءَ گُو ھمگرنچ بیت۔
1: کیمپانی سر ءَ اُرش کنگ ءُسرجمیں مال ءُ مڈیاں دستیگ کنگ۔
2: روڈانی بند کنگ ءِ ھاتر ءَ پُھلانی پُروش دیگ ءُ ھمے نزکیں جاہ ءَ مانز کنڈ کنگ ءِ گُوں ھوری ءَ وھدے دژمن پہ روڈ ءِ پچ کنگ ءَ کیت آئی ءِ سر ءَ ایمبوش اُرش کنگ۔
3: انچیں جاورھالے کہ دژمن روڈ ءَ پچ کنگ ءَ سوبین بوت گڑا دوبر کیمپ ءَ روگ ءِ وھد ءَ آئی ءِ سر ءَ مزنیں اُرش بہ کن تاکہ مزنیں نکسانانی دیمپان بہ بیت۔
4: دژمن ءِ سر ءَ اُرش کنگ ءَ رند وت ءَ را سلامتی ءَ کشگ ۔ تالبان ءِ جنگ ءِ میان ءَ اے چار سوبمندیں شُوربندی بُوتگ انت ،اے چاریں شُوربندیانی سوبمندی ءَ چہ ابید تالبان ءِ گور ءَ درست ءَ چہ ارزشتداریں چیز آیانی جنگی ھوسلہ بوتگ کہ چریشی ءِ سبب ءَ تالبان ءَ وتی جنگ یک تَنگ ءَ برجم داشتگ ۔
تالبان ءِ شھری گوریلا
چوناھیگا یک شھری گوریلاھے ءَ سرکار ءِ جتاجُتائیں انٹلیجنس ءِ میان ءَ بیت ءُ وتی کاراً گُوں دلجمی ءَ سرجم دنت اِنت۔ ھمے ھاتر ءَ شھری گوریلاھے ءَ وتی روٹین ءِ کار انچیں داب ءَ کنگ لوٹ اَنت کہ دو روچ پد ماں پد ءَ یک شھری گوریلاھے یک جاھے گندگ مہ بیت۔ ھمے درگت ءَ شھری گوریلاھے ءَ مُدام “موبائل وارفیئر” ءَ ترزکارے سر ءَ کار کنگ لوٹ ایت بزانکہ آ ھمُک وھد ءَ مومنٹ کنگ ءَ بہ بیت چُشیں ھاسیں جاھے ءَ مہ بیت کہ دژمن زوت آئی ءَ دستگیر کُت بہ کنت ۔ ایشی ءِ ھوری ءَ شھری گوریلا ءَ باز وھد ءَ چہ شھر ءَ ڈن کوچگ ءُ میتگاں بہ بیت بس تھنا وتی تنزیمی کارانی ھاتر ءَ شھر ءَ بہ روت ءُ وتی کاراں سرجم کنگ ءَ رند دوبر کُوچگ ءُ میتگ ءِ نیمگ بہ روت اِنت یاکہ شھری گوریلا ءَ وتی جند ھما شھرے نندوکیں مردمانی داب جوڑ کنگ لوٹ ایت بزانکہ پچ ءُ پوشاک مزاج زبان دراھیانی مٹ کنگ ءُ یک ڈسپوزبل شپ ءِ تہ ءَ بُوگ لوٹ ایت ،شھری گوریلا ءِ یونیٹ ءَ کم از کم سئے چار مردم ءِ گُوم ءَ وتی کاراں جُنزینان بہ کن انت اگاں اے مردم گیش بنت آیانی پٹ ءُ پول کنگ گیش دژمن ءِ ھاتر ءَ ارزان بیت۔
ھمے درگت ءَ جُستے پاد کیت یک شھری گوریلاھے بستار ءِ جھد کار کجام کجام کارااً کُت کنت؟ ۔ اے درگت ءَ بازیں کار ھست انت کہ آیان شھری گوریلا ءں سرجم کت کنت ، بلے ھمُک زمین وتی راستی ءَ ھست اِنت زلوری نہ اِنت کہ اوگانستان ءَ شھری گوریلا موڈل یاکہ شھری گوریلا ءِ ترزکار سرجم ءَ بلوچستان ءِ زمین ءِ سر ءَ کاربندگ بہ بیت۔
بلے ھاں اگاں تالبان ءِ جُنزاں بچارے گُڑا آیانی کِرا لھتے شئے بُوتگ اَنت کہ تالبان ءِ جھدکاراں کار مرز کُتگ انت چُشکہ سویت یونین ءِ اپسرانی اگواں، ریموٹ کنٹرول بمب، مائینز ءِ کل کنگ ، مزنیں مردمانی سر ءَ اُرش کنگ بینک ءُ سرکاری بلڈینگانی سر یَ اُرش کنگ ھوار بیتگ انت بلے لھتیں گچینی ءِ کار بُوتگ اَنت کہ تالبان جُنز ءِ اندر ءَ شھری گوریلا ءَ سرجم کُتگ انت۔
تالبانے شھری گوریلا ءِ سوبمند بُوگ ءِ مستریں سبب آئی ءں ھمے زانگ بیت کہ آیاں مُدام وتی شھری گوریلا ءِ کاراناں سرجم کنگ ءِ ھاتر ءَ ھما مردم گچین کُتگ انت کہ آیانی سر ءَ سویت پوج ءِ ستک ءُ بروسہ بُوتگ۔ پہ درورے سویت ایڈویزرا چست کنگ ءِ ھاتر ءَ آئی ءَ ڈروار گُوں وت ھوار گیجگ کہ آئی ءَ را کساس دو سال یو اس اس ار ءَ ٹرینگ داتگ، ریموٹ کنٹرول بمب ءِ کل کنگ یاکہ مائنزے کنڈ کنگ ءِ ھاتر ءَ ھما مردماں ھوار گیجگ کہ آیانی جند دپترا یاکہ مارکٹ ءَ وت کار کنگ اَنت اِشاں چہ ابید شھری گوریلا ءِ ھاتر ءَ گیش زالبول جھد کار رکروٹ کنگ ءُ ٹاسک دیگ یک سوبمندیں شُوربندی زانگ بیت۔
دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-
