بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءَ گوشتگ مروچی مئے سرمچاراں شکارپور ءِ ھند ھمائیوں شریف ءَ آئی ای ڈی بمب تراکے ءِ آسر ءَ جعفر ایکسپریس نشانگ کتگ-
جارکش ءَ گوشتگ ٹرین ھما وھد ءَ نشانگ کتگ کہ آئی ءَ پاکستانی پوج ءِ کارندہ سپر کنگ ءَ بیتگ انت – تراک ءِ آسر ءَ بازیں کارندہ مرتگ ءُ زدگ بیتگ انت ءُ ٹرین ءِ بازیں بوگی پٹری ءَ لگوشتگ انت-
جارکش ءَ گوشتگ اے اُرش ءِ زمہ واری ءَ بی آر جی من ایت ءُ اے دابیں اُرش بلوچستان ءِ آجوئی ءَ داں برجاہ بنت اِنت-
بلوچستان ءِ دمگ چہ کیچ ءَ پاکستانی لشکر ءَ یک مردمے آوار جتگ ءُ بیگواہ کتگ-
دشت ءِ دمگ درچکو ءَ یکشمبے ءِ شپ ءَ پاکستانی لشکر ءَ عدنان ء غفور دزگیر کتگ ءُ ناشناسیں جاھے ءَ برتگ ءُ چہ ایشی ءَ پد آئی ءِ بابت ءَ ھچ وڑیں ھال دیم ءَ نیتکگ انت-
زانگ بہ بیت کہ بلوچستان ءَ ھمک روچ زورانسری بیگواھی ءِ وئیل دیم ءَ آیگ ءَ اَنت۔
زورانسری بیگواھی ءُ بلوچ یکجھتی کمیٹی ءِ رھشونانی یل دیانگ ءِ ھاتر ءَ آیانی کھول دَہ روچاں گیش انت کہ اسلام آباد ءَ زھرشانی کنگ ءَ انت-
ھمے وھد ءَ کھولاں جتا جتائیں رنگاں ترسینگ ءَ انت-
بلوچستان لبریشن فرنٹ ءِ جارکش میجر گْوھرام بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست ھپت جولائی ءِ روچ یازدہ ءِ نزیک ءَ گورکوپ ءُ سری کلگ ءِ میانی ءَ زورگریں پاکستانی پوج ءِ کاروان ءِ پھازوکی ءَ پیکٹ فورس ءِ سنگر ءِ سک نزیک ءَ چہ سنگر گپتگ ءُ نشانگ کتگ، دُژمن ءِ سُر ءُ پُرانی چارگ ءَ چہ سرمچاراں پیسر ءَ چہ شورو چیر کتگ-
جارکش ءَ گْوشتگ دُژمنیں پوج ءِ دو کارندہ نشانگ کتگیں جاہ ءَ سر بیتگ ءُ تُرندی ءَ گوں ترکّ اِتگ، چریشی ءِ آسر ءَ دوئیں کارندہ جاہ پہ جاھی مرتگ اَنت- کہ آئی ءِ نیمگ ءَ جُنزگ ءَ بیتگ اَنت، سنگرگپتگیں سرمچاراں نزیک ءَ چہ تیرگواری کتگ ءُ کُشتگ- میڑ ءِ میان ءَ پیادگ ٹولی آ دگہ کارندہ وتی سنگتانی رکینگ ءِ جاہ وتی جان رکینتگ ءُ تتکگ اَنت-
جارکش ءَ گْوشتگ مروچگیں روچ ءَ بی ایل ایف ءِ سرمچاراں نیمروچ ءِ وھد ءَ ناصر آباد ءِ ھند سر ناکہ بندی کتگ ءُ دُژمن ءِ سُر ءُ پُر چارتگ اَنت وھدے کہ بالیچہ ءِ ھند سر ءَ دُژمنیں پوج ءَ راشن سر کنوکیں گاڑی مانداشتگ – زانگ بہ بیت باز گاڑی واھنند یکو گل ءِ کڈنی ءَ چہ اَبید دُژمن ءِ کمکاری ءَ چہ دزکش نہ بیتگ اَنت-
جارکش ءَ گْوشتگ بلوچستان لبریشن فرنٹ ءَ گورکوپ ءَ زورگریں پاکستانی پوج ءِ چار کارندھانی کوش، ناصر آباد ءَ ناکہ بندی ءُ بالیچہ ءَ دُژمنیں پوج ءَ راشن سر کنوکیں گاڑی ءِ ماندارگ ءِ زمہ واری ءَ منّ اِیت ءُ بلوچستان ءِ وتواجھی ءَ تاں زورگریں پوج ءَ نشانگ کنگ ءِ اِھد کنت-
بلوچ کھول ءِ سیاسی دزگیریں ءُ زورانسری آوار جنی ءِ ھلاپ ءَ زھرشانی دوازدھمی روچ ءَ ھم برجاہ-
گیشیں ھالانی رِد ءَ، اسلام آباد ءَ نیشنل پریس کلب ءَ رؤکیں سرجمیں راہ یکشل ءَ بند اَنت ءُ پولیس ءِ مزنیں کچے ءَ کارندھاں بلوچ زھرشانی کنوک انگیر ءَ کتگ اَنت- بلے بلوچ کھول سرجمیں اڑان ءُ دلسیاھیاں اَبید وتی زھرشانی ءَ برجاہ داشتگ-
اسلام آباد ءَ گوستگیں دوازدہ روچاں چہ بلوچستان ءَ زورانسری بیگواہ کنگ بیتگیں مردم ءُ سیاسی کیسانی تہ ءَ بندیگ اَنت بلوچ یکجھتی کمیٹی ءِ رھشونانی کھول زھرشانی ءَ اَنت ءَ انساپ ءِ واستا توار چست کنگ ءَ اَنت-
ھمے درگت ءَ نیشنل ڈیموکریٹک موومنٹ ءِ سروک محسن داوڈ ءَ ھوار دگہ سیاسی پارٹیاں، انسانی ھکانی گلاں ءُ سول سوسائٹی ءِ نمائندگان نندانکجاہ ءَ شتگ اَنت ءُ کھول ءَ چہ یکجاھی درشان کتگ-
نندانک ءَ نشتگیں زھرشانی کنوکانی گوشگ اِنت:
“ما گوستگیں دوازدہ روچاں چہ پاکستانی بُنجاھی شھر ءَ انساپ، پلگاری ءُ بُنکی انسانی ھکانی لوٹ ھست اَنت، بلے ما یکشل ءَ تُرسینگ، بھتام ءُ سسّائی زور ءِ آماچ ایں- چیریں ادارھانی کارندھاں اِھوالکار ءُ انتزامیہ ءِ دروشم ءَ اَتکگ ءُ مارا تُرسینگ ءَ اَنت-“
زھرشانی کنوکاں دیمتر ءَ گْوشتگ :
“ریاست ءَ مئے ورنایانی تیرسُپتگیں لاشانی چگل دیگ، مئے اُمیتاں بیگواہ کنگ، مئے تواراں ایرموش کنگ، ءُ مئے وجود سر ءَ دستیگ کنگ جُھد کتگ، بلے راجدپتر گواہ اِنت کہ بلوچ ناں بے سوب کتگ نانکہ بے توار کُت کتگ-“
“ما مرچی یکرندے پد ءَ یات دے ایں : تو پیسر ءَ ھم رد بیتگ ئے ءُ مرچی ھم رد ئے- ما زور ءَ چہ نہ تُرس ایں، ما چست بہ ایں، ما کریمہ، ماہ رنگ، سمی، سائرہ، شاہ جی، بیبرگ، ماما غفار، بیبو ءُ گلزادی جوڑ بہ ایں- ما زُلم ءَ را اوپار نہ کن ایں، ھو ما زوراکیانی باگی ایں-
زانگ بہ بیت کہ بلوچ زھرشانی کنوکاں ھکومت ءِ دیم ءَ دو بُنکی لوٹ ایر کتگ اَنت-
بلوچ یکجھتی کمیٹی ءِ سروکانی سر ءَ ھستیں دروگیں ایف آئی آرانی ھلاس کنگ ءُ آیاں زوت یل کنگ اِنت- بلوچستان ءَ زورانسری آوار جنی ءِ ھلاسی ءُ سرجمیں بیگواھیں مردمانی یل کنائینگ، گُڈی ءَ زھرشانی کنوکاں میان اُستمانی انسانی ھکانی گلاں ءُ رسانکدری مردماں چہ دزبندی کتگ کہ آ اے سنگین ءِ انسانی جیڑہ ءِ سر ءَ گامگیج بزور اِیت ءُ بلوچ زھرشانی ءِ بُنکی انسانی ھکاں دیگ ءِ کرد ءَ پیلو بہ کن اَنت-
بلوچ لبریشن آرمی ءَ وتی آفیشل چینل ھکل ءِ تہ ءَ بلوچستان ءِ جتا جتائیں ھند ءُ دمگاں پاکستانی پوج ءِ سر ءَ بوتگیں اُرشانی تامرشنگ کتگ انت ۔ نھ ملٹ ءُ بیست یک سیکینڈ ءِ تامر ءِ تہ ءَ پاکستانی پوج سر ءَ گوں سلاھاں اُرش ، آئی ای ڈی اَرش ءُ بازار ءَ وتی کنٹرول کنگ گندگ بیت۔
تامر ءِ بندات ءَ کلات ءِ اُرش پیشدارگ بیت کہ بلوچ لبریشن آرمی ءِ سرمچاراں پاکستانی پوج ءِ راہ بستگ ءُ آئی ءِ کاروان ءِ سر ءَ اُرش کنگ ءَ انت کہ اود ءَ پاکستانی پوج ءِ جون ھم کپتگ انت ءُ بلوچ سرمچار گپ جنگ ءُ ٹارگٹ ءَ نشانگ کنگ ءَ انت ۔ وھدیکہ یک سرمچارے پوج ءِ گاڑی ءِ سر ءَ راکٹ آس دیگ ءَ انت ۔ اُرش ءَ پد پوج ءِ بالگردے ھم گندگ بیت کہ جنگ جاہ ءَ کئیت۔
زانگ بہ بیت اے اُرش ءِ درگت ءَ بلوچ لبریشن آرمی ءَ وتی شنگ کرتگیں درشان ءِ تہ ءَ گوشتگ ات کہ سرمچاراں کلات ءَ پاکستانی پوج ءِ یک کاروانے ءِ سر ءَ اُرش کتگ ءُ سیزدہ کارمَنْد کشتگ انت ۔ وھدیکہ بلوچ سرمچا سنگت سھیب بلوچ پنام ءِ امیر بکش نمیران بوتگ ۔
تامر ءِ تہ ءَ زامران ، تگران ءُ بُلیدہ ءَ بوتگیں اُرش ھم زاھر کنگ بنت کہ اود ءَ پاکستانی پوج ءِ کاروان ءُ پیادگیں کارمَنْدانی سر ءَ اُرش کنگ بیت وھدیکہ مستونگ شھر ءِ کنٹرول ءُ سرکاری جاھانی تاوان ءُ پوج ءِ سر ءَ اُرش پیش دارگ بوتگ انت ۔
زانگ بہ بیت بی ایل اے ءِ نیمگ ءَ شھرانی کنٹرول ،دگ بندی ءُ پوج ءِ سر ءَ اُرش گیش بوان انت۔
بلوچ زانتکارانی گوشگ انت کہ ھمے زوتان بوتگیں اَرشاں چہ زھربیت کہ بلوچ آجوئی لوٹوکانی پوزیشن مھکم بوان انت وھدیکہ پاکستانی پوج نزور تران انت ۔
آیانی رد ءَ اے جاورھال ایوک ءَ پاکستانی ھاتر ءَ چیلنج جوڑ نہ بوتگ انت بلکیں آئی ءِ سان اے دمگاں برجاھیں اقتصادی شور ھاسکر چین ءُ پاکستان ءِ سی پیک ءِ سر ءَ ھم کپگ ءَ انت ۔
پاکستانی لشکر ءِ گون ءَ میڑ ءَ نمیران بوتگیں بلوچ جنگول سھیب بلوچ ءِ پت ءُ برات ھوار شش مردم زورانسری بیگواہ کنگ بیتگ انت-
پورسز ءَ گوستگیں شپ ءَ شال ءَ آئی ءِ لوگ ءِ سر ءَ اُرش کتگ ءُ سھیب ءِ پت محمد دین لانگو ، دو برات عبدالغفار لانگو ، عبدالکبیر لانگو ءُ پرس ءَ اتکگیں سَے نقیب اللہ لانگو ، عبدالوھاب لانگو ، ءُ شعیب لانگو دزگیر جتگ ءُ ناشناسیں جاھاں برتگ انت-
دمگی مردمانی گشگ ءِ رد ءَ ھمے وھد ءَ پورسز ءَ لوگ ءَ ھواریں جنین ءُ چُک جتگ ءُ بیم تراپ داتگ انت-
بلوچستان ءِ دمگ مستونگ ءَ پاکستان ءِ لشکر لشکر کشی کنگ ءَ انت دمگ ءَ بازیں تراکانی ھال انت-
مستونگ ءِ دمگ آب گل، ژلی، ءُ کش ءُ گوری دمگاں چہ گوستگیں شپ ءَ پاکستانی لشکر لشکر کشی ءَ گوں دزبند انت۔ پاکستانی فوج ءِ پیادگیں لشکر آپریشن ءَ بھر زوری کنگ ءَ انت ۔
دمگی مردمانی رد ءَ لشکر کواڈ کاپٹر ءِ کمک ءَ بمب جنگ ءَ اِنت بلے دمگ ءَ آپریشن ءِ سبب ءَ بوتگیں تاوان ءِ بابت ءَ ھچ وڑیں ھال ءُ اھوال دست نہ کپتگ۔ واکداراں اے درگت ءَ انگت ءَ ھچ وڑیں ھال ءُ اھوال نہ داتگ۔
زانگ بہ بیت کلات ءُ مستونگ ءِ دمگاں چہ گوستگیں یک ھپتگے ءَ آپریشن بوھگ ءَ اِنت ھمے وڑ کیچ ءَ پاکستانی لشکر ءِ سُر ءُ پر ءُ چیرین بالیگ بال ءَ ھم گندگ بوتگ انت-
چہ بلوچ اسٹوڈنٹس ایکشن کمیٹی ءِ نیمگ ءَ کیچ ءِ دمگ بلیدہ ءَ دو روچی فیسٹیولے بلیدہ ءَ زانشتی مراگش برجم دارگ بیتگ۔
شنگ بیتگیں جار ءَ گوشگ بیتگ دو روچی زانشتی مراگش ءِ جتائیں زانشتی ءُ وانگی بھر چوشکہ گُشتانک، پینل تران،گیدی کسہ ءُ نازینک، چاچ، بتل ءُ راجدپتری چکاس، ھامین ءِ پجار، ھالو، لیب لچہ، بلوچی لیب ءُ گوازی، کسمانک ءُ ڈائلوگ، کیرئیر کونسلنگ، شئیر ءُ شائری ءُ ساز ءُ زیملی بھر ءَ ھوار سائنس، دود ءُ ربیدگی، آرٹ ءُ کتاب اسٹال ھم اڈ دیگ بیتگ اَنت۔
شنگ بیتگیں جارانک ءِ رد ءَ مراگش ءِ بندات چہ بلوچ راجی سوت ءَ کنگ بوت، چہ آئی ءَ پد مراگش ءِ ایدگہ بھر جنزینگ بیتگ اَنت کہ آیانی تہ ءَ بلوچ ءِ وانگی نزام ءِ سر ءَ پینل تران ءُ بلوچ ءِ مئاشی نزام ءِ سر ءَ ڈبیٹ تران، ھامین ءِ پجار، سائنس ءُ کیرئیر کونسلنگ ءِ سر ءَ گُشتانک، گیدی کسہ ءُ نازینک، چاچ ءُ بلوچ راجدپتر ءِ سر ءَ چکاس(قوئز)، زھگانی لیب لچہ، کسمانک ءُ گُشتانک، سائنس پروجکٹانی درنگازی، ادارہ ءِ کتاب گام ءُ کمپیوٹر ءِ پجار ءِ درنگازی، زھگانی دوچاپی، وانگجاھانی پچیں مائک سیشن کہ آئی ءِ تہ ءَ جتائیں وانگجاھانی نودربراں بھر زرتگ، ایشاں ھوار دگہ بلوچی لیب ءُ گوازی کہ آیانی تہ ءَ ورّی، نوہ گَڈگی، ھشت چوکی، ٹِلاں گوازی ءُ پنچُکی ھوار بیتگ اَنت کہ زھگ ءُ ورنایاں بھر زُرتگ ءُ بلوچ ءِ دود ءُ ربیدگی لیب کُتگ اَنت۔ مراگش ءَ جتائیں اسٹال اڈ دیگ بیتگ اَنت کہ ایشانی تہ ءَ آرٹ اسٹال، سائنس پروجکٹانی اسٹال، بلوچ دود ءُ ربیدگی اسٹال ءُ بلوچستان کتاب کاروان ءِ کتاب اسٹال ھوار بیتگ اَنت۔
شنگ بیتگیں جار ءَ گوشگ بیتگ مراگش ءَ بساک ءِ بنجاھی سنگت اُزیر بلوچ ءُ بالاچ بلوچ ءَ ھوار بلیدہ ءِ اُستاد، سیاسی ءُ لبزانکی مردم ھوار بیتگ اَنت۔
بساک ءَ گوشتگ مراگش ءَ بساک ءِ بنجاھی سنگتاں تران کنان ءَ گوشتگ کہ ادارہ ءِ مدام جھد اِنت کہ آ بلوچستان ءِ ھمک ھَند ءُ میتگاں ھمے ڈولیں پُرمڑاھیں زانشتی مراگش اڈ بہ دنت ءُ یک انچیں زانشتی ماھولے ودی بہ کنت کہ چہ آئی ءَ بلوچ ءِ ھستیں ءُ آیوکیں پدریچ سان بہ زیر اَنت ءُ وانگ ءُ زانگ ءَ گوں ھمگرنچ بیان ءَ وتی بودشتاں بہ تراش اَنت ءُ راجی زمہ واریاں پیلو کنان ءَ بلوچ چاگرد ءَ شئور ءُ زانشتی تک ءَ ناں تھنا با سما بہ کن اَنت بلکیں دیمروی دیان ءَ یک مھکمیں منزلے ءَ سر بہ کن اَنت۔ بساک بلوچ ورنا ءُ نودربرانی ھما راجی درسگاہ اِنت کہ آئی ءَ چہ زانتکار ءُ بودناکیں ورنا ودی بنت ءُ بلوچ چاگرد ءَ وتی راجی بھرشتاں دیان ءَ راج ءَ سوبین کن اَنت۔
آئی ءَ گوشتگ مراگش ءَ اتکگیں گُشتانکاراں جتائیں زانشتی، سیاسی، المی ءُ لبزانکی سرھالانی سر ءَ تران کنان ءَ درائینت بلوچستان ءِ ایدگہ دمگاں ھوار بلیدہ ءَ ھم چہ بلوچ نودربر، استاد ءُ زانتکارانی جھد ءِ برورد ءَ پہ بلوچ چاگرد ءَ رُژنا پگریں راجی جھدے گندگ بیت کہ ایشی ءِ آسر ءَ چاگرد ءِ تہ ءَ زانشتی سرپدی ءُ راجی سِنچ ءُ سما ودی بیتگ۔ ھمے پیم بساک ءِ اے زانشتی مراگش آئی ءِ اوگام “جھد پہ زانشت ءُ یکمُشتی ءَ” ءِ املی اکس اِنت کہ کُل استاد ءُ نودربر اتکگ ءُ یکمُشت اَنت ءُ پہ زانت ءُ زانشت ءَ جھد کنگ ءَ اَنت۔ ھمے مئے راج ءِ ورنایانی جھد ءِ برورد اِنت کہ آئی ءَ چہ مئے چاگرد ءِ پرْشتگیں بازیں بھرے نزارگ بیتگ ءُ یکجاہ کنگ بیتگ پہ راجی جوڈشت ءَ کاروان جُنزان اِنت۔
شنگ بیتگیں جار ءَ گوشگ بیتگ مراگش ءِ سرجمیں بھراں پد سوگاتی بھر ءِ تہ ءَ مراگش ءِ جتاجتائیں بھراں بھر زُرتگیں زھگ ءُ ورنایاں ھوار وانگجاھانی اُستاداں سوگات دیگ بوت۔ آئی ءَ پد ساز ءُ زیملی بھر ءَ بلوچی کلاسیکی زیمر ءَ ھوار امتیاز بلوچ، حمید بلوچ ءُ وھاب بلوچ ءَ گوں وتی وشیں توار ءَ سوت الھان کُت۔ مراگش ءَ جتائیں پِڑانی مردم اتکگ ءُ مزنیں کچے ءَ بھر اِش زُرتگ۔
ما بلیدہ ءِ سرجمیں وانگی ادارھانی منتوار ایں کہ آیاں اے مراگش ءِ سوبین کنگ ءَ گچینیں کردارے پیلو کُت ھاس ھائی اسکول میناز بلیدہ، سنج اسکول میناز، گام اسکول الندور، مھلب اسکول الندور، کلکشان اسکول الندور، گُلبانک اسکول بٹ، رُژن اسکول میناز، تاھیر کمپیوٹر سنٹر بٹ کور ءِ پشت، ساچ اسکول ءُ راھشون اسکول ءِ کُلیں سروک، استاد ءُ نودربرانی کہ آیانی بھر زیرگ مئے واستہ مزنیں سکینے اَت ءُ چہ اے تپاکی ءَ بلوچ چاگرد ءَ شئعوری ءُ زانشتی پگر ءِ تالان کنگ ءَ گیش آسانی کیت ءُ پہ ھستیں پدریچ ءَ رُژنائیں اُمیتے سرا بیت-
گڈسر ءَ گوشگ بیتگ مراگش ءِ سرجمیں بھرانی یک یک ءَ سوبمندی ءَ گوں برجم دارگ ءَ پد دیوان دومی روچ ءَ آسر کنگ بیتگ۔
بلوچ وومن فورم ءِ بنجاھی سروکاں مروچی تربت پریس کلب ءَ پریس کلانفرنس کنان ءَ گوشتگ ریاستی ادارھانی نیمگ ءَ گوادر ءَ برجم بیوکیں یک پرایمنیں کانفرنسے ءِ لپاشگ ءِ جھد بیتگ، زالبولانی درکانودی دزگیر کنگ ، ءُ سیاسی پرکاریانی سر ءَ زوراکی ءِ ھلاپ ءَ ترندیں لیکھانی درشانی کتگ-
فورم ءِ رھشوناں گوشتگ بیست ءُ ھپت جولائی ءَ گوادر پریس کلب ءَ بلوچانی سیاسی بھر زیرگ، زورانسری بیگواھی،دزگیری ءُ ریاستی زُلمانی ھلاپ یک روچی کانفرنسے برجم دارگی بیتگ ایں- ھمے درگت ءَ گوادر ءُ کش ءُ گوری دمگاں سرپدی مھم، وال چاکنگ، ءُ مھلوک ءِ رھوت برجاہ بیتگ بلے آئینی پرکاریانی دارگ ءِ واستا ادارھانی نیمگ ءَ اڑانک برانزینگ بیتگ-
آئی ءَ گوشتگ فورم ءِ زالبولیں باسک پولیس ءَ ابید کجام کانون ءِ تک ءَ دزگیر کتگ انت،وومن پولیس اسٹیشن گوادر ءَ برگ بیتگ انت اود ءَ گیر انسانی، گیر رویش ءُ بے شرپداریں ڈول کارمرد کنگ بیتگ انت-
پریس کانفرنس ءَ گوشگ بیتگ دزگیری ءِ وھد ءَ زالبولانی سر ءَ کانفرنس ءِ ھلاس کنگ ءِ کڈنی نکش داری کنگ بیتگ گڑا پد ءَ انکاری ءِ پژدر ءَ زبردستی چہ گوادر ءَ دیم پہ تربت ءَ آرگ بیتگ انت کہ اے شھریانی آجوئی ءِ سر ءَ سنگینیں ھلاپ ورزی یے-
پریس کانفرنس ءَ گوشگ بیتگ کہ بلوچ یکجھتی کمیٹی، نیشنل ڈیموکریٹک پاٹی ءُ دگہ سول گل اے وھد ءَ ترندیں ریاستی کریک ڈاؤن ءِ آماچ انت چریشی ءَ باسکاں ابید ءِ وارنٹ ءَ دزگیر کن انت ءُ سیاسی پرکاریاں راجی سلامتی ءِ سر ءَ جرم نامینگ ءَ انت-
بلوچ وومن فورم ءَ گوشتگ مئے جد ءُ جھد آئینی، جھموری ءُ بلوچ ءِ گوستانکی گھگیری ءِ بھر انت – ما زوراکیانی دیم ءَ سر ءَ جھل نہ کن ایں بلکیں اے جد ءُ جھد ءَ گیش مھکم ءُ ترندین رنگے ءَ برجاہ داریں-
آئی ءَ گوشتگ بلوچ وومن فورم تچک کنت کہ وتی آئینی جد ءُ جھد ءُ بلوچ لوٹاں ھچبر دزکش نہ بیت انت ءُ جد ءُ جھد گیش ترند کنگ بیت انت-
بلوچ یکجھتی کمیٹی ءِ رھشون سمی دین بلوچ ءِ ھلاپ ءَ چیریں ایف آئی آر نبشتہ کنگ بیتگ۔
چاگردی ترامجاھاں سمی دین بلوچ ءَ گْوشتگ کہ منی نام ءَ اے وھد ءَ بلوچستان ھائی کورٹ ءَ ھپت ایف آئی آرانی زمانت ءِ سر ءَ آں ۔ منی ھلاپ ءَ درج بوتگیں ھرچ ایف آئی آر ءَ تچک ءَ آمید گس ءَ چیلنج کتگ ءُ آمید گس ءَ ھم لوٹ کتگ کہ اگاں منی ھلاپ ءَ نوکیں کیسے درج کنگ بہ بیت گڑا من ءَ تچک ءَ آمید گس ءِ تَک ءَ سرپدی دیگ بہ بیت ءُ گوشدارگ ءِ وھد ءَ سرکار ءَ آمید گس ءِ رپورٹ پیش کتگ کہ منی ھلاپ ءَ ھچ وڑیں ایف آئی آر درج نہ بوتگ آواران یا آئی ءِ ھواریں دمگاں منی ھلاپ ءَ ایف آئی آر درج نہ انت۔
آئی ءَ گْوشتگ ایشی ءَ ابید ھم آواران ءَ منی سر ءَ چیریں ایف آئی آر درج کنگ بیتگ ءُ من ءَ اے چیریں ایف آئی آر ءِ بابت ءَ ھچ وڑیں سرپدی دیگ نہ بیتگ ءُ ھمے چیریں ایف آئی آر ءِ بنیاد ءَ نہ ایوک ءَ من ءَ جرمکار لیکگ بیتگ، بلکیں بلوچستان ءَ منی سر ءَ دزگیر کنگ ءِ پرمان ھم شنگ کنگ بیتگ اَنت۔ اے پرمان منی ھلاپ ءَ کجام ھم وھد ءُ کجام جاگہ ءَ کارمرد کنگ بیت ءُ من ءَ دزگیر کنگ بیت ھاسیں رنگ ءَ اگاں من بلوچستان ءِ تہ ءَ اتکگ آں ۔
سمی دین ءَ گوشت کہ نوں کانون مئے توار ءِ چیر ترینگ ءِ واستا سلاہ ءِ رنگ ءَ کارمرد کنگ بوھگ ءَ انت۔ اے وڑیں پندل اے گپ ءِ پدریں سبوت انت کہ ریاست وتی زلم ءُ زوراکی ءَ برجاہ دارگ ءَ انت۔
