TBP Balochi

مروچی تربت ءَ پوج ءِ نیمگ ءَ نشہ باپاری کنوکانی سرکماشی ءَ منشیات بگیری ءِ ریلی ءِ مول مراداں راج شری ءَ سرپد انت- بیبگر بلوچ

دی بلوچستان پوسٹ

بلوچ ریپبلکن آرمی ءِ جارکش بیبگر بلوچ ءَ رسانکدراں شنگ کرتگیں درشان ءِ تہ ء گوشتگ کہ گوستگیں روچ ءَ آدینگ ءَ مئے سرمچاراں پنجگور ءِ دمگ گرمکان ءَ نشہ باپاری کنوک باسد پنام باسو ءِ نشہ باپاری ءِ بنجل نشانگ کرتگ –

جارکش ءَ دیمتر ءَ گوشتگ کہ ریاستی زورگریں پوج یک نیمگے نشہ باپاری کنوکانی سرکماشی ءَ ڈیتھ اسکوڈ کاربندگ انت ءُ دومی نیمگ ءَ نشہ باپاری ءِ بگیری ءَ پوج ءِ نیمگ ءَ تربت ءِ تہ ءَ روانک کشگ وتی کتکاریانی چیر دیگے بے سوبیں جھدے پمے ھاتر ءَ راج ریاست ءِ پہ نام روانکاں چہ دور بہ بیت پرچا کہ زروگریں پوج مدامی مئے نشانگ ءِ تہ ءَ انت –

بیبگر بلوچ ءَ گوشتگ کہ اگاں نشہ باپاری کنوک وتی بے نپیں کاراں چہ گستا نہ بیت اَنت گڑا آھانی بگیری ءَ مئے گامگیج ترندتر بنت –

گڈسر ءَ جارکش بیبگر بلوچ ءَ گوشتگ کہ اے وڑیں کاروائی یک آزادیں ڈیھ ءُ پُرآشوبیں چاگردے آرگ ءَ داں برجاہ مان انت –

بلوچستان ءِ تیابدپی شھر گوادر ءَ پاکستان میری ٹائم سیکورٹی ایجنسی کارپدانی ھلاپ ءَ بوجیگانی واھنداں ھوار دریا ورداں فش ھاربر ءِ گیٹ بند کرتگ ءُ نندانک جتگ –

دی بلوچستان پوسٹ

دریا ورد ءُ بوجیگانی واھندانی رد ءَ گوستگیں روچ ءَ پی ایم ایس اے ءَ مئے بوجیگ گپتگ ءُ کراچی ءَ راہ داتگ اَنت –

آیاں گوشت کہ بوجیگاں سِی ڈرم ڈیزل ءُ جانشو سوار بیتگ اَنت ماھیگ ءِ شکار ءَ شتگ اَنت –
ماھیگ ءِ شکار کنگ ءَ رؤکیں ھستیں ڈیزلانی جاڑیگ بیگ ءَ بوجیگاں ڈیزلی بوجیگ کنگ اِنت – پی ایم ایس اے ءِ مردم نزان اَنت جھلانکیں تیاب ءَ بوجیگ ڈیزل ءِ ابید شت کن اَنت؟

زھرشانی کنوکانی گوشگ اِنت پی ایم ایس اے ءِ گور ءَ چوشیں منانک نیست کہ آئی ءَ گپتگ ءُ برتگ اَنت –

آیاں گْوشت کہ دمگی دریا وردانی گون ءَ سیکورٹی ادارھانی زوراکی رویش ءَ پدراھی بیگ ءَ اِنت –

زھرشانی کنوکاں مزن واکداراں گوں جست کنان ءَ گوشتگ کہ پی ایم ایس اے ءَ بوجیگ گپتگ ءُ سندھ ءَ روان داتگ اَنت نِی گوادر ءِ دریاوردانی سھل ءُ گپ سندھ ءَ کنگ بیت؟

زانگ بہ بیت گوادر بلوچستان ءِ تیابدپی شھر ءِ ھواری ءَ “ سی پیک منسوبہ ” ءِ بنجاھی بنجل اِنت گوادر ءِ سیاسی ءُ چاگردی گلاں ھروھد ءَ آپ، بجلی، جانسلامتی ءُ زورگار ءِ نہ بوگ ءِ سر ءَ ھروھد ءَ زھرشانی کنگ ءَ اَنت –

ھمے وڑ ءَ گوستگیں ھپتگ ءَ سیکورٹی لشکر ءِ رویش ءِ سر ءَ آل پارٹیز ءَ گوادر “عزت دو ” ءِ نام یَ زھرشانی کرتگ –

دی بلوچستان پوسٹ

ٹی بی پی پتر ءَ سربوتگیں ھالانی ھالانی رد ءَ بلوچستان ءِ دمگ نوشکی ءَ جتا جتائیں دگ ءِ وئیلاں ھشت مردم ٹپی بوتگ اَنت-

اھوالکار ءِ رِد ءَ کیشنگی ءِ دمگ پٹی ءَ پرپٹ ءَ گوں ٹرالر ءَ ڈیک وارتگ، ڈیک ورگ ءِ آسر ءَ دومردم ٹپی بوتگ اَنت –

ھمے وڑ نوشکی ءَ کنڈگ ءِ سر ءَ فیلڈر گاڑی ءُ پرپٹے ءَ ڈیک وارتگ ءُ اے وئیل ءَ ھم دو مردم زدگ بوتگ اَنت –

دگہ وئیلے کلی کادر دمگ ءَ دیم ءَ اتکگ کہ پرپٹے کپتگ ءُ دو مردم زدگ بوتگ اَنت – دگہ پرپٹے وئیلے احمد وال ءَ دیم ءَ اتکگ کہ اود ءَ یک مردمے زدگ بوتگ –
ھمے وڑ نوشکی دمگ مل کلی الھی بکش دمگ ءَ بوزر گاڑی ءَ کماشیں مردمے ءِ پاد لگت داتگ انت چریشی کماش سک باز ٹپی بوتگ –

دگ ءِ جتا جتائیں وئیلاں زدگ بوتگیں مردم نوشکی سیول ھسپتال ءَ برگ بوتگ انت ھمود ءَ آھانی ٹپ درمان کنگ بوتگ اَنت- وئیلاں سَے مردمانی جاور نگیگ بوھگ ءِ سوب پہ گیشیں درمانی ءِ ھاتر ءَ شال ءَ دیم دیگ بوتگ انت-

نبشتانک: ﮐﭽﮑﻮل زﻧﺪگ اﻧﺖ

نبشتہ ﮐﺎر: رﯾﺎﺳﺖ ﺧﺎن ﺑﻠﻮچ

دی بلوچستان پوسٹ

ھﻤﺒﻞ، ﻣﻦ ﻧﺰاﻧﺎں کہ اے دگہ ﻣﺮدم زﻧﺪ ءُ ﻣﺮگ ءِ ﻧﻴﺎم ءِ تپاوت ءَ چہ ﭘﻴﻢ گیشّین اَنت بلے ﻣﻦ ھمے پھم آں کہ زﻧﺪﮔﯽ ﯾﺎت ۔ ﺳﺎھﺖ و ھﻴﺎﻻﻧﯽ ﯾﮏ ﮔﺒﺎرے، ءُ ھمے ﮔﺒﺎر ءِ تہ ءَ وت ءَ ﺷﻮھازگ، وﺗﯽ ﺑﺴﺘﺎر، ﺑﭽﺎر ءُ زمہ وارﯾﺎﻧﯽ ﺟﺎﮦ آرگ زﻧﺪﮔﯽ ﮐﻨﮓ ءِ ﻧﺎم اِﻧﺖ، ﮐﺴﮯ کہ وﺗﯽ ﺟﻨﺪ ءَ ﺷﻮھﺎز اِت مہ کنت ، ﺗﺎں آﺋﯽ ءَ زﻧﺪگ ﮔﻮْﺷﮓ ھﭻ ﭘﻴﻢ راﺳﺖ ﺑﻮت نہ ﮐﻨﺖ.

ﻣﻦ ﮔﻮْﺷﺎں اﯾﻮک ءَ ﺳﺎﮦ ایر ﺑﺮگ ءُ ﮐﺸّﮓ ﺑﺎیدﯾﮟ زﻧﺪﮔﯽ ﮔﻮْﺷﮓ مہ بیت ۔
اﮔﺎں ﻣﻨﯽ اے ھبر راﺳﺖ اﻧﺖ گڑا ﺗﻮ ﻣﺪام زﻧﺪگ ﻣﺎن ئے ۔ چے ءَ کہ ﺗﻮ تھنا ﺳﺎﮦ دارے نہ ﺑﻮﺗﮓ ﺋﮯ ﺑﻠﮑﻴﮟ آﺋﯽ ءَ ھﻮار ﯾﮏ اﻧﺴﺎﻧﮯ اوں ۔

دوﺳﺖ ! ﻣﺮدم ھمے ﮔﻮْش اَنت کہ ﺗﻮ اَچ ﻣﺎ ﺳﺴﺘﮓ ءُ دگہ دگنیا یے ءَ راھﯽ ﺑﻮﺗﮓ ئے بلے من ءَ ﺗﺌﯽ دورءَ رَوگ اﻧﮕﺖ ﺷﺮی ءَ ﺑﺎور نہ بیت۔

ﺑﻠﮑﻴﮟ اگاں درْوگ مہ بنداں داں ﻣﻦ ءَ اے ھبر ھچبر باور نہ کنت کہ ﺗﻮ ﻣﺎرا ﯾﻞ ﮐﺘﮓ چے ءَ کہ ﻣﻦ ھمے ﺳﺮﭘﺪ ﺑﺎں کہ ﺗﻮ ﻣﻨﯽ ارواہ ءَ ﮔﻮں اَنچُش ﺑﻨﺪوک ئے کہ ﺗﺮا اَچ ﻣﺎ ﻣﻠﮑﻤوت ناں ﺑﻠﮑﻴﮟ ﭼﺮائی ﺷﺮﺗﺮﯾﮟ زاﺗﮯ اوں ﺳﺴﺖ ﮐﺮت نہ کنت ﺗﺎں ﻣﺮگ ءِ ﺑﺴﺘﺎر ﭼﯽ اﻧﺖ۔

ﮐﭽﮑﻮل ﺟﺎن اﮔﺎں ﺗﻮ ﺑﺎور بہ کن ئے داں ﻣﻦ ءَ ﻣﺪام ﯾﮏ ﺑﺎورے ھﻤﺮاﮦ اﻧﺖ ءُ آ ھﻤﻴﺶ اِنت کہ ،اے دم ءَ دم ، ﺗﻮ ﮔﻮں وﺗﯽ زﯾﺒﺎﺋﻴﮟ ﺑﭽﮑﻨﺪاں ﺑﻴﺎئے ءُ ﺗﺌﯽ آدم دوﺳﺘﻴﮟ ارواہ ءِ دﯾﺪار بہ بیت ءُ ﻣﻦ ﺗﻮ ھﺮدو ﻣﺎدرﯾﮟ دﯾﺎر ءِ ﺑﺎﺗﻦ ءَ ﻣِﮑّﻴﮟ ﺗﻼراﻧﯽ داﻣﻦ ءَ دﯾﻢ پہ دﯾﻢ بہ ننداں ءُ دﮔﻨﻴﺎ ءُ جھان ءِ ﮐﺴّﻮاں ﺑﻴﺎر ایں ۔ ﺑﻠﻮچ ، ﺑﻠﻮچ ءِ ﺳﻴﺎﺳﺖ، ﻣﺌﮯ ﭼﺎﮔﺮدی جیڑہ ءُ دﮔﻨﻴﺎ ءِ اے دگہ اﯾﺮدﺳﺖ ءُ ﻟﮕﺘﻤﺎﻟﻴﮟ راج ءُ ﻣﮫﻠﻮک ءِ ﺑﺎرو ءَ ﯾﮑﮯ دوﻣﯽ ءِ ھﻴﺎل ءُ ﻣﺎرشتاں ﮔﻮْشت بہ کن ایں ۔

ﮐﭽﮑﻮل ﺟﺎن ﺑﺎرﯾﮟ ﺗﺮا ﯾﺎت ﺑﻴﺖ اﮔﺎں ناں ؟ ﮐﻤﻮ ﮔﻴﺶ دﮦ ﺳﺎل ﭘﻴﺴﺮ کہ ﺗﻮ ﺑﯽ اﯾﺲ او ءِ ﭘﺮوﮔﺮام ءَ ﮔﻮں ﺗﭙﺎک ﮐﻨﮓ ءُ ﺑﯽ اﯾﺲ او ءِ ﺑﺎﺳﮏ ﺑﻮگ ءِ واھﺸﺖ زاھﺮ ﮐﺖ ۔ ﺗﺎں ﻣﻦ ﺗﺮا ﺟﺴﺖ کتگ ات کہ گواچنی ﺗﻮ پہ ﺑﯽ اﯾﺲ او ءِ ﭘﺮوﮔﺮام ءِ دﯾﻤﺮوی ءَ ﮐﺎر ﮐﻨﮓ ﻟﻮٹے ﯾﺎ کہ ﭼﻮ اے دگہ ﺑﺎزینے ءَ ﺑﺲ وھﺪ ءِ ﮔﻮازینگ ءَ آیگ ﻟﻮٹے ؟ گڑا ﺗﻮ ﭘﺴّﻮ داﺗﮓ ات کہ اے ھﺒﺮءَ وھﺪ وت ﭘﺪّر ﮐﻨﺖ کہ ﻣﻦ ﮐﺠﺎم ﻧﻴّﺖ ءُ ارادﮦ ءَ وت ءَ ﮔﻮں اے ھﮑّﻴﮟ راﮦ ءِ ﺳﺎﻧﮑﻼں ﺑﻨﺪﯾﮓ کنگ ءَ اوں ۔

آ وھﺪ اﺳﮑﺎں ﻣﻦ پہ ﺑﻠﻮچ راج ءُ دﯾﺎر ءَ ﺗﺌﯽ ﺑﺎﺗﻦ ءَ چیریں ﮐﻮھاں چہ ﺑُﺮز ﺗﺮ ءُ ﺗﻼراں چہ ﻣُھﺮ ﺗﺮﯾﮟ ﺟﻮزﮔﺎﻧﺎں پھم اِت ﮐﺮت نہ ﮐﺖ بلے ﻣﺮوﭼﯽ بَہ ھبر ﺗﻮ ﺗﺌﯽ ﺑﻠﻮچ ﺳﻴﺎﺳﺖ ءِ تہ ءل بھر زورگ ءِ اﺳﻞ مول ءُ مراد ءَ تئی ﮐﺎر ءُ ﮐﺮﺑﺎﻧﯽ وت ﭘﺪر ﮐﻨﮓ ءَ اﻧﺖ۔

ﮐﻤﺎﻧﮉو ﺟﺎن ! ﮐﺪی ﮐﺪی ﺗﺮا جیڑاں وﺗﯽ ھﻴﺎﻻﻧﯽ درﯾﺎ ء َدور کن آں داں اﺟﺐ ھﻴﺮان ﺑﺎں کہ آ ﮐﺠﺎم ﺟﺒﻴﻦ چِستیں ﭘﺎھﺎر اَنت کہ اﻧﺴﺎن ءَ را ﮔﻮں ﺳﺎﮐﻨﻴﮟ ﺑﭽﮑﻨﺪاں ﻣﺮگ ءِ شھرءُ میتگاں دور کپگ ءَ ﻣﺠﺒﻮر ﮐﻨﺖ ..؟ ءُ آ ﮐﺠﺎم درد ءُ اﻧﺪوہ اَنت کہ ﮐﺴّﮯ ءِ دﯾﺪوﮐﺎں ارﺳﺎﻧﯽ ﺑﺪل ءَ چہ ھوﻧﺎں ﭘُﺮ کن اَنت…؟ ﺑﺎز ﺟﻴﮍگ ءَ ﭘﺪ ھمے ﺑﺎور دل ءَ نند ایت کہ اﺑﻴﺪ چہ اﻧﺴﺎن دوﺳﺘﯽ ﯾﺎ ﮔﻨﻮﮐﯽ ءِ ﻟﻴﮑﻮاں دگہ ﭼﮯ ﺑﻮت ﮐﻨﺖ کہ ﮐﺴﮯ ء َرا دﺳﺖِ وت ﻣﺮگ ءِ اﻣﺒﺎزاں زورگ ءَ وش بہ کنت ، بلے من ءَ اﯾﻤﺎن اﻧﺖ کہ ﺗﻮ ﮔﻨﻮﮐﮯ نہ ﺑﻮتگ ئے ﺟَﭧّ ءُ پھواﻟﮯ۔۔۔ ﺑﻠﮑﻴﮟ ﺗﺌﯽ ھیال ءُ لیکھاﻧﯽ ﺑُﻨﺰﮦ ﺑﻨﯽ آدﻣﺎﻧﯽ وشھاﻟﯽ ءُ ﺷﺎدﻣﺎﻧﯽ ءِ ﺑﻮﺗﮓ ءُ پہ ھمے ھیاﻻﻧﯽ دﯾﻤﺮویبءَ ﺗﻮ اے ﮐﻮڈوئیں اﻣﺒﺮوز ءِ ﯾﻞ کنگ اینکسینں ھبرے نہ لیک اِت۔۔

ﮐﭽﮑﻮل، من ءَ را ﯾﺎت کیت کہ ﺑﺎزﯾﮟ ﺑَﺮاں ﻣﻦ کہ ﺑﻠﻮچ ﭘُﺴﮕﺎﻧﯽ چہ وﺗﯽ راﺟﯽ زمہ وارﯾﺎں وت ءَ را دُور دارگ ءُ ﺑﻠﻮچ ڈﮔﺎر ءِ ﺳﺮا ﺑﻮؤﮐﻴﮟ زﻟﻢ ءِ ﺳﺮا ﻟﺲ مھلوک ءِ ھاﻣﻮﺷﯽ ءُ ﺳﺮ ﺟھﻞ ﮐﻨﮓ ءَ را دﯾﺴﺘﮓ داں ﭘﺮﯾﺸﺎﻧﯽ ءُ ﭘﺸﻮﻣﺎﻧﻴﺎﻧﯽ ﻧﻮداں ﻣﻨﯽ زاﻧﺖ ءُ زاﻧﺸﺖ ءَ را ﺳﺎھﻴﻞ ﮐﺘﮓ ، ھداوﻧﺪ زاﻧﺖ کہ اے پیمیں بے وارﯾﮟ ﺳﺎھتاں ﺗﻮ پہ من ﭼﻮ اﺳﺘﺎد ءَ ﺑﻮتگ ئے ۔ ءُ من ءَ را اے پیمیں لیکھی (ﻧﻈﺮﯾﺎﺗﯽ) اوﺷﺘﺎں چہ در ﮐﺘﮓ ، ﺗﺌﯽ دﯾﻮاناں وھﺪے کہ ﻣﻦ ﻧﺸﺘﮓ ءُ ﭘﺎد آتکگ آں گڑا ﺑﻠﻮچ ءِ آزات ءُ وشھاﻟﻴﮟ ﺑﺎﻧﺪات ءِ ﺳﺮ ءَ ﻣﻨﯽ ﺑﺎور مُھرءَ چہ مُھر ﺗﺮ ﺑﻮﺗﮓ، ﺗﻮ ﻣﺪام ﮔﺸﺘﮓ
کہ ﻣﺎرا راﮦ ﺷﻮن دﯾﮕﯽ اﻧﺖ، راہ ءِ ﺳﺮ ءَ ﮐﻨﭩﮓ ءُ ﺑﻮچ ﺳﺎپ ﮐﻨﮕﯽ اﻧﺖ ۔ﺑﺎﻗﯽ اَچ ﮐﺠﺎ ءُ ﭼﻴﻨﮑﺲ ﻣﺮدم ھوارﮐﭙﻴﺖ آمئے جھد ءُ زھمتاں گوں ﺑﻨﺪوک اﻧﺖ،

کچکول ! ﺗﺌﯽ ھﺮدوﺋﻴﮟ دﯾﺪوﮐﺎں ﯾﮏ زﻣﺎنگے ءِ اکس ﻣﺎن ات، ءُ آ زﻣﺎﻧﮓ ﺑﻠﻮچ ءِ ھاکمی ءِ زﻣﺎﻧﮓ ات کہ آ ھاکمی ءِ تہ ءَ ﺑﻠﻮچ ﺗﺮﺗﮓ ﭘﭻ نہ ات، وﺗﯽ زﺑﺎن، دود ءُ دودﻣﺎن ءَ ﮔﺴﺮ نہ ﮐﭙﺘﮓ ات، ھما زﻣﺎﻧﮓ کہ اُود ءَ ﺑﻠﻮچ ءِ ﭼﻢ جَھل نہ ات اَنت ، ﺑﻠﻮچ وﺗﯽ زﻣﻴﻦ ءَ را وﺗﯽ ﮔﻮْﺷﮓ ءَ تُرس ءُ بیم ءِ آﻣﺎچ نہ اَت۔

ﮐﭽﮑﻮل ﺟﺎن ! ﻣﻦ ﻧﺰاﻧﺎں کہ ﺑﻠﻮچ دﯾﺎرءِ اﻧﺪرءَ ﺳﺮ ﭼﺴﺖ ﮐﻨﻮﮐﻴﮟ ﻣﺌﮯ آؤکیں ﭘﺪرﯾﭻ ﺗﺮا ءُ تئی اے دگہ ھﻤﺮایاں کہ ﺗﺌﯽ ﭘﻴﻤﻴﮟ لیکہ اِش ﮔﻮن ﺑﻮﺗﮓ آواﻧﺎں ﮐﺠﺎم ﭼﻤﺎں ﮔﻮں ﭼﺎرﯾﺖ بلے پہ ﻣﻦ ءَ ﺗﻮ ﭼﻮ ﺑَﻠﻮﮐﻴﮟ ﭼﺮاﮔﮯ ءَ ﻣﺎں تھاری آں راﮦ ﻧﺸﺎن دیگ ءَ ئے ءُ ﺗﺌﯽ ﭘﺸﺖ ﮔﻴﺠﮓ وت ءَ را ﺗﺎﻣﻮرﯾﮟ شپ ءِ ﺑﺎھﻮٹ ﮐﻨﮓ اﻧﺖ ۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

انڈین پریمیر لیگ دبی انٹرنیشنل اسٹیڈیمے ءَ برجاہ اَنت، مروچی چنئی سپر کنگز ءُ سنرائز ھیدر آباد آئی پی ایل ءِ چار دھمی گوازی ءَ دیم پہ دیم بیتگ اَنت۔

سنرائز ھیدر آباد ءَ پیسر ءَ بیٹنگ کُتگ ءُ بیست اورانی تہ ءَ پنچ وکٹانی تاوان ءَ ابید 164 رنز اڈ کُتگ۔ چہ سنرائز نیمگ ءَ پی. گارگ ءَ 26 بال لیب کُتگ ءُ 51 رنز اڈ کُتگ۔ پی. گارگ ءَ یک شش ءِ ءُ شش چار ھم جتگ۔ وھدیکہ چنئی سپر کنگز ءِ نیمگ ءَ چہ چار اور کنگ ءِ آسر ءَ ڈی . چاھر ءَ 2 وکٹ گپتگ ءُ 31 رنز داتگ۔

دومی نیمگ ءَ چنئی سپر کنگز ءَ بیست اور ءِ آسر ءَ پنچ وکٹانی تاوان ءَ 157 رنز اڈ کُتگ ءُ سنرائز ھیدر آباد ءَ آئی پی ایل ءِ چار دھمی گوازی ھپت رنز ءَ بُرتگ۔ چہ چنئی سپر کنگز ءِ نیمگ ءَ آر . جڈیجہ ءَ 50 ءُ ایم ایس دھونی ءَ 47 رنز اڈ کُتگ، وھدیکہ سنرائز ھیدر آباد ءِ بالر ٹی . ناٹاجارن ءَ چار اور ءِ آسر ءَ 43 رنز داتگ ءُ دو وکٹ گپتگ۔

یات بہ بیت آئی پی ایل کرکٹ گوازی ءِ بیست اورانی یکے انڈین لیگ اِنت کہ ایشی ءِ تہ ءَ جھان ءِ جتائیں ملکانی لیبی لیب کن اَنت ءُ پنجاہ ءُ شش گوازیانی سر ءَ بندوکیں لیگ اِنت۔

کرکٹ زانتکارانی گُشگ ءِ رد ءَ آئی پی ایل نہ تھنا پہ چاروکاں یک وشیں سوگاتے بلکیں آئی پی ایل یک مزنیں باپار ے ھم۔

شاھرگ ءَ پاکستانی پوج ءِ سر ءَ بیتگیں بمب تراک ءِ زمّہ واری ءَ منّیں – بی ایل اے

دی بلوچستان پوسٹ

ٹی بی پی پتر ءَ سربوتگیں ھالانی رِد ءَ بلوچستان ءِ دمگ ھرنائی شاھرگ ءَ ناشُناسیں مردماں پاکستانی پوج تراک ناکیں شوروانی نشانگ جوڑ کتگ ـ تراک ءِ آسر ءَ پاکستانی پوج ءَ جانی تاوان رس اِتگ –

دومی نیمگ ءَ بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمہ واری منّ اِتگ ءُ گوشتگ کہ مئے سرمچاراں ھرنائی ءِ دمگ شاھرگ ءَ جھالاوان دگ ءِ سر ءَ آئی ای ڈی کل کُرتگ کہ پاکستانی زورگریں پوج ءَ بے سوب کنگ ءِ جھد کرتگ ھمے میان ءَ سرمچاراں آئی ای ڈی تراکینتگ –

اُرش ءَ بم ڈسپوزل اسکواڈ ءِ کارمند مُرتگ وھدیکہ یک کارمندے زدگ بوتگ –

دی بلوچستان پوسٹ

سر بیتگیں ھالانی رد ءَ پنجگور ءِ دمگ گرمکان ءَ ناشناسیں سلاہ بندیں مردماں نشہ باپاری ءِ بنجل ءِ سر ءَ اُرش کرتگ –

دمگی مردمانی رد ءَ پنجگور گرمکان ءَ باسد نامیں نشہ باپاری کنوکیں مردمے ءِ بنجل ءِ سر ءَ ناشناسیں سلاہ بندیں مردماں تیرگواری کرتگ، تیرگواری ءَ پد بنجل ءَ واھوزاری مَچ اِتگ اَنت –

زانگ بہ بیت چریشی ءَ پیسر پنجگور ھدابادان ءَ ھم نشہ باپاری بنجلے ءِ سر ءَ دزبمبے چگل دیگ بیتگ اَت ءُ چریشی ءَ پد بلوچ ریپبلکن آرمی ءِ جارکش بیبگر بلوچ ءَ اُرش ءِ زمہ واری من اِتگ اَت –

زانگ بہ بیت نشہ باپاری ءِ ھلاپ ءَ بلیدہ، تربت، گوادر، دشت، مند ءُ مکران ءِ جتائیں ھند ءُ دمگاں مھلوک ءَ زھرشانی ھم کرتگ ءُ نشہ ءِ بند کنگ ءِ لوٹ ءَ کنگ ءَ اَنت –

دمگی مردمانی رد ءَ نشہ باپاری کنوکانی پُشت ءُ پناھی ءَ سرکاری فرینٹرکور ءُ دگہ چیریں ادارہ کنگ ءَ اَنت –

مروچی بیتگیں اُرش ءِ زمہ واری تنی وھدی ھچ گل ءَ نہ من اِتگ –

دی بلوچستان پوسٹ

سر بیتگیں ھالانی رد ءَ کیچ دشت ءُ تمپ ءِ میان ءَ پاکستانی پوج ءُ بلوچ سلاہ گل ءِ میان ءَ بیتگیں جنگ ءُ چوپ ءَ جنگ بیتگیں عرفان گلام مستپا ءُ نورخان نوربکش ءِ ادیرھانی سر ءَ لیویز لشکر نگھپانی ءَ دارگ بیتگ –

دمگی مردمانی رد ءَ مروچی تمپ ءَ عرفان ءُ نور خان ءِ کھول پاکستانی پوج ءَ کڈن کرتگ ءُ گوشتگ اَنت کہ بیا اِت وتی مردمانی ادیرھاں بہ بند اِنت –

دمگی مردمانی گوشگ اِنت پاکستانی پوج ءَ دو کنڈ جتگ ءُ دو ادیرہ دروشمیں جوڑ کرتگ اَنت ءُ لیویز لشکر ادیرھانی سر ءَ نگھپانی ءَ داشتگ اَنت –

زانگ بہ بیت گوستگیں روچ ءَ عرفان بلوچ ءُ نورخان ءِ کھول ءَ تربت پریس کلب ءَ تران کنان ءَ گوشتگ کہ مارا مئے مردمانی لاشاں دیگ ءَ نہ اَنت ءُ مارا ھچ منّانک ھم پیشدارگ ءَ نہ اَنت کہ اے ادیرہ شمئے مردمانیگ اَنت –

ھمے وڑ گوستگیں روچ ءَ تربت پریس کلب ءَ بیتگیں زھرشانی ءَ ہیومین رائٹس کمیشن آف پاکستان ءِ مکران ءِ چیپٹر کورینٹر غنی پرواز ءَ ھم بھر زرتگ ءُ گوشتگ کہ آ مردمے جنگ ءِ میان ءَ جنگ بیتگ اے ھمک انسان ءِ ھک اِنت بے ساھیں کُنٹاں کھولانی دست ءَ بہ دنت ءُ آئی ءِ پُشت ءِ مردماں اے ھک دیگ بہ بیت –

نورخان ءِ گوھار ءِ گوشگ اِنت کہ منی برات جنگ ءَ جنگ بیتگ بلے پوج ءَ بس دو دو جُتگ چَوٹ آؤرتگ ءُ داتگ کہ اے شمئے مردمانی گڈی نشانی اَنت آئی ءِ گوشگ اِنت کہ منی برات ءَ چَوٹ پادا نہ بیتگ بلکیں آئی ءِ پاد ءِ بُٹ بیتگ ءُ مارا دروگیں منّانک پوج پیشدارگ ءَ اِنت –

عرفان بلوچ ءِ گوھار ءَ گوشتگ کہ گوستگیں چار روچاں ما ایپ سی ءِ بنجل ءَ شتگ ءُ پریات کرتگ کہ مئے جتگیں مردمانی لاشاں مئے دست ءَ بہ دے تانکہ ما آیانی گڈی کسارات ءَ انسانی رنگ ءَ کُرت بہ کن ایں –

آئی ءَ گوشت کہ چار روچاں دانکہ ما زگریں روچ ءُ تھاریں شپ ءَ وتی چم داشتگ اَنت کہ مئےلاش مارا دیگ بنت بلے ایپ سی ءَ لاش نداتگ اَنت ءُ گڈی ءَ مارا دو کنڈ پیشداشتگ ءُ گوشتگ کہ شمئے مردم ما اد ءَ کَل ءُ کسارات کرتگ اَنت –

زانگ بہ بیت بیست ءُ ھشت ستمبر ءَ تمپ ءُ دشت ءِ میانی دمگ مزبند ءَ بلوچ سلاہ بند ءُ پاکستانی پوج ءِ میان ءَ بیتگیں جنگ ءُ دو بلوچ سلاہ بند جنگ بیتگ اَنت کہ آیانی تہ ءَ یکے ءِ پجار عرفان بلوچ جھمنند کُنشلات ءُ نور خان جھمنند ھیر آباد ءِ ناماں زانگ بیتگ اِت اَنت –

چِد ءُ پد لاش پوج ءَ چِست کرتگ ءُ تمپ ءَ وتی بنجل ءَ برتگ اَنت اود ءَ تمپ ءَ ایپ سی ءُ گڑیڈ ءِ میان ءَ کَل کرتگ ءُ مردماناں گشتگ کہ شمئے مردم کل کنگ بیتگ اَنت ءُ رند ءَ مردم شتگ انت دو کنڈ اَنت ءُ چِد ءُ پد میتگی مردماں ادیرہ ءِ دروشم ءَ گیشتر ھال پِر کرتگ اَنت بلے پوج ءَ مردم لَٹ ءُ کُٹ کرتگ اَنت –

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سرباز ءَ ایرانی لشکر ءِ دست ءَ دزگیر کنگ بیتگیں مولانا فضل الرحمن کوھی ءِ سر ءَ شش سال ءُ چار ماہ زندانی بندگ بیتگ اَنت –

اھوالکار ءِ گوستگیں روچ ءَ ایران مشھد ءَ ایرانی آمیدگس ءَ بلوچ عالم دین مولانا فضل الرحمن کوھی ءِ سر ءَ شش سال ءُ چار ماہ زندانی جنگ بیتگ بیتگ –

اھوالکار رد ءَ مولانا فضل الرحمن کوھی ءِ نیکراھی وانگ جاہ سرباز پشامگ ءِ کسان کمک سرکماش مولانا مھمد امین آسکانی ءَ گوشتگ کہ سِی ستمبر ءَ مولانا فضل الرحمن کوھی ءَ گوانکو ءِ سر ءَ گپ جتگ ءُ گوشتگ کہ ایرانی آمیدگس ءَ منی سر ءَ شش سال ءُ چار ماہ زندانی قید جنگ بیتگ –

زانگ بہ بیت مولانا فضل الرحمن کوھی بیست ءُ ھشت نومبر دوھزار ءُ نوزدہ ءَ ایران ءِ واکداراں مشھد ءَ آیگ ءِ پرمان کرتگ ءُ اود ءَ آ گپتگ ءُ زندانی کرتگ –

مولانا فضل الرحمن کوھی ءِ دزگیری ءَ روکپتی بلوچستان ءِ چاگردی ءُ نیکراھی مردمانی گوشگ اِنت کہ مولانا فضل الرحمن کوھی انسان دوستیں مردمے کہ آ ایران ءَ زورانسری گپتگ ءُ بندیگ کرتگ –

دی بلوچستان پوسٹ

انسانی ھکانی باسک راشد ھسین ءِ بیگواھی ءِ سر ءَ مروچی چارگردی رسانکجاہ ٹوئیٹر ءَ کمپین کارمرد بیگ ءَ اِنت –

چہ امارات ءَ بیگواہ بیتگیں ءُ پد ءَ پاکستان ءِ دست ءَ دیگ بیتگیں بلوچ انسانی اگبالانی جھدکار راشد ھسین بلوچ ءِ ھاتر ءَ مروچی چاگردی رسانکدر ءِ تندجاہ ٹوئیٹر ءَ یک کمپین ءِ جنزینگ بیگ ءَ اِنت۔

راشد ھسین ءِ بیگواھی ءَ ایر جنگ ءُ آئی یل کنگ ءِ ھاتر ءَ بلوچ چاگردی جھدکار، راشد ھسین ءِ کھول ءُ انسانی اگبالانی جھدکارانی نیمگ ءَ چہ جتگیں جار ءِ تہ ءَ گوشگ بیتگ کہ مروچی بلوچستان ءِ وھدے چار بج ءَ پہ بیگواھیں راشد ھسین ءَ یک ٹوئیٹر کمپین ءِ گوں #UAEWhereIsRashidHussain ءِ ھیشٹیگ ءَ جنزینگ بیت۔

زانگ بہ بیت بیست ءُ شش دسمبر دو ھزار ءُ ھژدہ ءَ بیگواہ بیتگیں راشد ھسین شش ماہ ءَ امارات ءَ زوریں بیگواھی ءَ پد پاکستانی چیریں گلانی دست ءَ دیگ بیتگ ءُ آئی ءَ پد راشد ھسین ءِ داں انگت ءَ ھچ وڑیں ھال نیست۔

راشد ھسین ءِ بیگواھی ءَ آئی ءِ کھول ءَ کراچی ءُ شال ءِ پریس کلباں زھرشانی کنگ ءُ پیداک اَنت –

وی بی ایم پی ءِ وائس چیرمین ماما قدیر ءَ ھم وتی یک درشان ءِ تہ ءَ بلوچ راج ءَ چہ دز بندی کُتگ کہ پہ راشد ھسین بیوکیں کمپین ءِ بھر زورگ بہ بیت ءُ بیگواھیں مردمانی کھولاں گوں ھمراہ داری کنگ بہ بیت۔