TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ گشت ناشناسیں مردمانی تیرگواری ءَ یک مردمے بیران بیتگ –

بیران بیتگیں مردم ءِ پجار امین سپاھی ءِ نام ءَ زانگ بیتگ، امین سپاھی راہ ءَ روگ ءَ بیتگ کہ ناشناسیں سلاہ بندیں مردماں تیرانی آماچ کرتگ ءُ کشتگ –

اھوالکار ءِ رد ءَ دو اکتوبر ءَ ناشناسیں مردماں امین سپاھی کُشتگ ءُ پد ءَ دمگ ءَ پھزداراں کوشکارانی شوھازگ ءَ دمگ ءَ پَٹ ءُ پول ھم کرتگ ءُ دمگی مردماناں ھمے گوشتگ کہ اے وت ما وتی جنگ ءِ پشدر بیت کنت –

اھوالکار ءِ رد ءَ دمگ ءِ پھزداراں دمگ ءِ نندوکیں مھلوک ءَ گوں گوشت کہ بازیں چوشیں وئیل بیگ ءَ اَنت باید ھمیش اِنت کہ وت ماں وتی جنگ ءُ چوپ ءَ ھلاس بہ کن اِت –

دی بلوچستان پوسٹ

بلوچ راجدوست بلوچ آجوئی لوٹوکیں گل بی ایل ایف ءِ سرکماش ڈاکٹر اللہ نزر بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ بلوچ، سندھی، پختون ءُ پاکستان ءِ ایردستیں کشمیری راج ءُ ھما مھاجر کہ سندھوسندیش ءِ سر ءَ یکین دار انت، پنجاپی زوراک ءَ چہ رکگ ءِ ھاتر ءَ یکجاھیں پترے اڈ بہ دے اَنت – پرچاکہ پاکستان یک ریاستے نہ اِنت بلکیں دنیا ءِ تہ ءَ ناشرکاری ءِ ردوم ءُ مزلوم ءُ ایردستیں راجانی سر ءَ زوراکیانی بنجاہ انت – پاکستان وتی بستار ءَ یک ریاستے ءِ زلورتاں سرجم کرت نہ کنت، بلکیں بلوچ سندھی ءُ پختون سرڈگار وتی ایردست کتگ ءُ برجاہ انت – ءُ ھمیشانی مال مڈیانی لٹ ءُ پُل ءَ وت ءَ تیلانک دیگ ءَ انت –
دنیا ءِ بند ءُ سیمانی تہ ءَ پاکستان ءِ بوگ ءِ مول دنیا ءِ تہ ءَ ناشرکاری ءُ جنجال بوگ انت – تاں ھما وھد ءَ اے ریاست ھست ءُ ساڈی انت دمگ ءَ ھوار سرجمیں دنیا ءِ تہ ءَ دیمروئی، ایمنی ءُ وشھالی بس یک وابے ءِ دروشم ءَ بنت – بلوچ ، سندھی ءُ پختوناں ھوار سرجمیں دنیا ناشرکاری ءُ اے نیکراھی گنوکی ءَ چہ رکّیت نہ کنت –

بی ایل ایف ءِ رھشون ڈاکٹر اللہ نزر بلوچ ءَ دیمتر ءَ گوشتگ کہ پاکستان ءِ درسیں راجکاریں گل اسٹیبلشمنٹ ءِ منشاء رد ءَ جاک ککار الم کن انت بلے آھانی تہ ءَ ھچ کسی ءِ مراگشاں راجانی رکینگ ھوار نہ انت – آ ھمے لوٹ انت کہ پوج مزلوم ءُ ایردستیں راجانی سرا گُٹگیر بہ بیت ءُ آھاں وتی بھر بہ رس اِیت – پمے ھاتر ءَ اگاں کدی کدی اے فیڈریشن ءِ گپ ءَ جن انت بلے آھانی اے زبانی گپ راجدپتر ءَ راستی ءِ سر ءَ ایر نہ کپ انت – پرچاکہ فیڈریشن راجانی زورامندیں گُٹگیر چہ جوڑ بنت وھدیکہ پاکستان بے بنیں راجانی جور کرتگین ءُ روکپتی واجھانی پِٹوی ءَ جوڈ کنگ بوتگ – اشی ءِ تہ ءَ فیڈریشن ءِ ھاتر ءَ گپ جنگ راجدپتر ءِ گوں بید مسکرا ءَ دگہ ھچ نہ انت –

آئی ءَ دیمتر ءَ گوشتگ کہ پنجاپی زوراک ءَ چہ رکگ ءِ ھاتر ءَ بلوچ، سندھی، پختون، مھاجر ءُ پاکستان ءِ ایردست کتگیں کشمیر ءِ راج ءِ ھاتر ءَ یکجاھیں پتر ءِ سر ءَ جد ءُ جھد کنگ وھد ءِ المی لوٹ انت – مئے یکجاھیں پتر ءِ سر ءَ جد ءُ جھد کنگ نا ایوک تھنا چہ پاکستان رکّ انت بلکیں دمگ ءُ سرجمیں دنیا ءِ ھاتر ءَ ایمنی راھے پچ کُرت کنیں -پرچاکہ ناشرکاری ردوم ءُ بنجاہ پاکستان انت – پاکستان ءِ ھستیں سان ءَ آئی ءِ بوگ سرجمیں دنیا ءِ ھاتر ءَ جیڑہھے نشانی انت – ما ایر دستیں راج پیسر ءَ چہ زوراکی دیمپان انت مروچی مئے چُک جنین مات ءُ گھار پاکستانی زالمانی آماچ اَنت –

بی ایل ایف ءِ رھشون ءَ گوشتگ کہ پاکستان ءَ بلوچ راج ءَ ھوار درسیں ایردستیں راج پشتون، سندھی، مھاجر ءُ پاکستان ءِ زورگر کتگیں کشمیر ءِ تہ ءَ زوراکی ءِ درسیں سیمسر سرگڑ کتگ انت -مردمانی زورانسری آوار جنگ ءُ بیگواہ کنگ، ٹارچرسیلانی تہ ءَ لٹ ءُ کٹ کنگ ءُ شھید کنگ، ءُ ھما شھیدانی زانگولیں لاشاں ویرانگاں چگل دیگ پاکستان ءِ پوج ءُ آئی ءِ چیریں اداراھانی ھمک روچی ءِ کار اَنت –

ڈاکٹر اللہ نزر بلوچ ءِ گوشگ انت کہ جیڑہ ءِ کشمیر ءِ سر ءَ پاکستان ءِ وتساچی جاک ءُ کُکار سمج ءَ چہ در انت پرچاکہ پاکستانی پوج ءِ وتی دست ءَ چہ لکاں بلوچ، پشتون، سندھیانی ھوناں چہ ھونین انت – ھمے پاکستان ءَ دنیا ءِ چمانی دیم ءَ سی لک بنگالی کُشتگ، پاکستان ءِ رستریں پوج ءَ ھزاراں بنگالی مات ءُ گھارانی ننگ ءُ ناموس لُٹ اِتگ اَنت-

آئی ءَ گوشتگ کہ پاکستان دمگ ءِ تہ ءَ یک بالادستی ءِ ھاتر ءَ ناشر کاری ءَ ڈنی پالیسی ءُ بلیک میلنگ وڈو ءُ ڈول ءَ کارمرز کنگ انت – افغانستان ءَ وتی چیردست کنگ ءِ ھاتر ءَ پاکستان دزمانجنی ءُ چل سالی وت ماں وتی جنگ ءَ اے ڈیھ تباہ کتگ انگت ءَ تاں پاکستان ءِ دزمانجی ءُ افغانستان ءَ نزور کنگ ءِ پالیسی برجاہ انت –

گڈسر ءَ بلوچ آجوئی لوٹوکیں گل ءِ سرکماش ڈاکٹر اللہ نزر بلوچ ءَ گوشتگ کہ بلوچ ءِ راجکاری بنپد ءَ مدامی دنیا ءِ دیم ءَ پدر کرتگ کہ دنیا ءُ گیشتر ھمے دمگ ءِ تہ ءَ ناشرکاری ءِ بنجاہ پاکستان انت پاکستان ءِ روتگ داں ھست انت دنیا ءُ دمگ ءِ تہ ءَ ھجبر ایمنی اتک نہ کنت – اے گپ ءَ دنیا ھمنچو زوت ءَ سرپد بیت یک جوانیں دنیا ءِ جوڑ کنگ ءَ ھمنچو گیشتر جوانتر ءُ سوب مند انت –

دی بلوچستان پوسٹ

کراچی ءَ نزیکیں بلوچستان ءِ باپاری شھر ھب ءِ دمگ دارو ھوٹل ءَ چہ یک مردمے ءِ جون دزکپتگ۔
واکدارانی رد ءَ جون نادراہجاہ ءَ دیم دیگ بیتگ، داں انگت جون ءِ پجار نہ بیتگ۔

ھمے پئیم ءَ لسبیلہ ءِ ھنکین وندر ءَ ھم یک جون ءِ دزکپتگ۔
واکدارانی ردءَ کمبل ءَ پتاتگیں جون وندر ءِ میتگ باندی کوہ ءِ کشاری پارم ءَ چہ دز کپتگ۔ جون پجار کنگ ءُ المی پولکاری ءِ ھاترءَ نادراہجاہ ءَ دیم دیگ بیتگ۔

یات بہ بیت بلوچستان ءِ جتاھیں دمگاں چہ انچیں مردمانی جون دزکپتگ اَنت کہ آیانی پجار کنگ نہ بیتگ وھدیکہ بازیں رندءَ ابید ڈی این اے ءَ جون بے وارث نامینگ ءُ واکدارانی نیمگ ءَ گور کنگ بیتگ اَنت۔

انسانی اگبالانی گلاں ھوار بلوچ سیاسی مردمانی گمان ءِ رد ءَ اے جون بیگواھیں مردمانی بیت کن اَنت کہ آ ژانگول کنگ ءُ دور دیگ بنت کہ چریشی سوب ءَ اے مردمانی کنگ گران بیت۔

دی بلوچستان پوسٹ

اناگتی آس لگگ ءِ سوب ءَ باگ ءِ بازیں درچکاں تاوان رس اِتگ –

ٹی بی پی پتر ءَ سربوتگیں ھالانی رِد ءَ مکران کیچ ءِ دمگ گھنہ پلانی ءَ مچانی درچکاں آس لگ اِتگ – آس لگگ ءِ سوب ءَ سرجمیں باگ ءِ بازیں دگہ درچکاں تاوان رس اِتگ –

آس لگگ ءِ ھال سربوھگ ءَ کیچ ءِ ڈپٹی کمشنر میجر محمد الیاس کبزئی ءَ میونسپل کارپوریشن ءِ فائر برگیڈ ٹیم ھما دمان ءَ پہ آس توسینگ ءَ دیم داتگ اَنت ءُ آھاں بازیں جھدے ءَ پد آس توسینتگ –

ھمے میان ءَ کیچ ءِ ڈپٹی کمشنر ءُ میونسپل کارپوریشن ءِ چیف افیسر عبید بلوچ ءَ ھم وت ءَ ھمود ءَ سر کُتگ ءُ آس توسینگے نگھداری کتگ –

کیچ ءِ ڈپٹی کمشنر میجر محمد الیاس کبزئی ءَ زمیندار مکن کرتگ انت کہ دیمتر ءَ باگ ءُ ڈگارانی تہ ءَ آس روک مہ کن انت ءُ کاہ ءُ بُچاں مان مدار انت پرچا کہ گوات ءِ سوب ءَ آس برانز گپت ءُ گیشتر تاوان دات کرت کنت –

دی بلوچستان پوسٹ

سر بیتگیں ھالانی رد ءَ نوشکی ءَ تیرگواری ءِ سوب ءَ یک مردمے بیران ءُ چار زدگ بیتگ اَنت –

گیشیں ھالانی رد ءَ تیرگواری ءِ وئیل نوشکی ءِ شھر ءَ اسٹیشن ءِ نزیک ءَ پیش اتکگ کہ اود ءَ تیرگواری ءِ سوب ءَ عبدالشکور نامی ئیں مردمے بیران ءُ چار مردم زدگ بیتگ اَنت، زدگ بیتگیں مردم نادراہ جاہ ءَ برگ بیتگ اَنت –

دمگ ءِ پھزدارانی گوشگ اِنت وئیل لوگی جیڑھے ءِ سر ءَ بیتگ ءُ تنی وھدی دگہ دزگیریانی ھال دیم ءَ نیاتکگ اَنت –

زانگ بہ بیت بلوچستان ءِ بازین ھند ءُ دمگاں وھد وھد ءِ سر ءَ لوگی جیڑھانی سر ءَ وئیلانی ھال چاگردی رسانکجاھاں شنگ بیگ ءَ اَنت –

دی بلوچستان پوسٹ

فٹبال گوازی ماں انگلینڈ ءَ پریمئر لیگ ءِ بیست گوازیانی تہ ءَ مروچی ءِ گوازی ءَ ایسٹن ویلا ءُ لیور پول دیم پہ دیم بیتگ اَنت ایسٹن ویلا ءَ ھپت گول آؤرتگ ءُ لیور پول ءَ دو گولانی تہ ءَ پروش وارتگ –

ماں انگلینڈ ءَ بیست ٹولی ءِ برجاہ بیتگیں پرایمئر لیگ ءِ بھر زورکیں ایسٹن ویلا ءَ مروچی گوازی ءَ باج برتگ ءُ وتی نام ءَ کرتگ –

ایسٹن ویلا ءِ گوزی کنوکیں وٹ سنگن ءَ سَے گول داتگ ءُ اولی گول چار دمان، دومی بیست ءُ دو دمان ءُ سیمی سِی ءُ نُھ دمان ءَ داتگ اَنت –

ھمے وڑ ءَ مسگنن ءَ سِی ءُ پنچ دمان ءَ یک گولے ءُ برکلی ءَ پنجاہ ءُ پنچ دمان ءَ یک گولے ءُ کرلس ءَ دو گول داتگ ءُ یک گولے ھپتاد ءُ پنچ دمان ءَ ءُ دومی شست ءُ شش دمان ءَ داتگ اَنت –
گوازی ءَ دیم پہ دیمی ءَ بیتگیں لیور پول ءِ مھمد سالہ ءَ ایسٹن ویلا ءَ دو گول داتگ ءُ یک گولے سِی ءُ سَے دمان ءَ دومی شست دمان ءَ داتگ ءُ گوازی ھلاس بیتگ ءُ ایسٹن ویلا ءَ گوازی ءَ باج برتگ ءُ وتی نام ءَ کرتگ –

برجاہ بیتگیں گوازی ءَ ایسٹن ویلا دومی شمار ءَ ھوار اِنت ءُ لیور پول پنچمی شمار ءَ ھوار اِنت –

دی بلوچستان پوسٹ

سر بیتگیں ھالانی رد ءَ بلوچستان ءِ دمگ ھزدار ءَ ھوار ایندگہ دمگاں زمین چنڈ سما کنگ بوتگ –

گیشیں ھالانی رد ءَ زمین چَنڈ شناسانی رِد ءَ زمین چنڈ ءِ زور چار وھدیکہ آئی جھلی بیست میل ءَ بوتگ –

زمین چَنڈ شناسانی رد ءَ آئی بنجاہ چہ ھزدار ءَ نود میل دور بوتگ –

زمین چَنڈ ءَ پد دمگ ءَ مھلوک ترس آماچ بیتگ اَنت، بیتگیں زمین چَنڈ ءَ تنی وھدی جانی ءُ مالی تاوانانی ھال نہ بوتگ اَنت –

دی بلوچستان پوسٹ

بلوچستان ءِ دگانی سر ءَ ھمک روچ مردم مرگ ءِ دیمپان انت یک ماھے ئے تہ ءَ ھزار ءَ گیش دگ ءِ وئیل دیم ءَ کیت -ھمے ماہ ءَ ستمبر ءَ یک ھزار ءُ دو سد ءُ ھپت دگ ءِ وئیل دیم ءَ اتکگ اَنت کہ یک سد ءُ بیست ءُ ھشت مردم بیران بوتگ ءُ یک ھزار ءُ ھپت سد ءُ سی زدگ بوتگ اَنت –

چہ بلوچستان یوتھ اینڈ سول سوسائٹی (بی وائی سی ایس) نیمگ ءَ دوھزار ءُ بیست ءِ ستمبر ماہ ءَ دگانی سر ءَ بوتگیں وئیلانی کچ ءُ کساس تالان کتگ کتگ اَنت –
رپورٹ ءِ تہ ءَ ھمے گوشگ بوتگ کہ گوستگین ماہ ءَ یک ھزار ءُ دوسد ءُ شش وئیل دیم ءَ اتکگ اَنت کہ وئیلاں یک سد ءُ بیست ءُ ھشت مردم چہ زند ءَ زبھر بوتگ انت ءُ یک ھزار ءُ ھپت سد ءُ بیست ٹپی بوتگ اَنت –

رپورٹ ءِ رِد ءَ شال، مستونگ پشین، کلات، بوستان ءُ کچلاک ءَ سَے سد ءُ بیست ءُ ھپت دگ ءِ وئیل دیم ءَ اتکگ اَنت اے وئیلاں چارسد ءُ ھشتاد ءُ نُھ مردم ٹپی بوتگ اَنت ءُ بیست ءُ ھشت بیران بوتگ اَنت –

ھمے وڑ ھزدار، سوراب، لسبیلہ، گڈانی، ھب، ویندر، اوتھل ءَ پنچ سد ءُ چل ءُ نُھ وئیل دیم ءَ اتکگ اَنت کہ چریشاں ھپت سد ءُ یک مردم ٹپی بوتگ اَنت ءُ سی ءُ سَے بیران بوتگ اَنت –

ءُ چمن، قلعہ عبداللہ، مسلم باغ، موسی خیل، قلعہ سیف اللہ، گلستان، شنکھائی ءَ ھم دگ ءِ وئیلاں ھشتاد ءُ دو وئیلانی سوب ءَ یک سد ءُ شش ٹپی بوتگ اَنت ءُ ھژدہ بیران بوتگ اَنت –

وھدیکہ ژوب، زیارت، ھرنائی، لورلائی، دکی، شیرانی، خانوزئی، کان میترزئی، سنجاوی، مانی ھواہ، بادیزئیءَ یک سد ءُ شست یک وئیلاں دو سد ءُ بیست ءُ شش ٹپی بوتگ اَنت ءُ چاردہ مردم بیران بوتگ اَنت –

رپورٹ ءِ رِد ءَ نوشکی، ھاران، دالبندین، چاگی، بسیمہ، نوکنڈی ءَ نوزدہ وئیلاں سِی ءُ نُھ ٹپی بوتگ اَنت ءُ یازدہ بیران بوتگ اَنت-

ھمے وڑ ءَ گوادر، تربت، اورماڑہ، پسنی، پنجگور، کیچ ءَ بیست ءُ شش وئیل دیم ءَ اتکگ ءُ کہ اود ءَ ھپتاد ءُ ھپت ٹپی بوتگ اَنت ءُ ھشت بیران بوتگ اَنت –

سبی، نوتال بولان، نصیرآباد، ڈیرہ مراد جمالی، بارکھان، سھبت پور، ڈیرہ بگٹی ، جل مگسی، اوستہ محمد، جعفرآباد، گندواہ، بختیار آباد ءُ کوھلو ءَ ھم چل ءُ سَے وئیل دیم ءَ اتکگ ءُ وئیلانی سوب ءَ نود ءُ دو ٹپی بوتگ اَنت ءُ شانزدہ بیران بوتگ اَنت –

اے رپورٹ ءِ تہ ءَ گوشگ بوتگ کہ اے دگ ءِ وئیلاں ھبدہ کسانیں زھگ ءُ ھپت زالبول ھم بیران بوتگ انت –

زانگ بہ بیت بلوچستان مدامی ئیں وئیلاں بازیں مردمانی جان شُتگ چاگردی ءُ سیاسی مردمانی گُوشگ انت کہ سرکار ءِ نیمگ ءَ چہ بلوچستان ءِ دگانی سر ءَ بوتگیں وئیلاں ھچ دلگوش دیگ بوگ ءَ نہ اَنت –

دومی نیمگ ءَ بازیں مردم دگ ءِ وئیلاں ڈرائیورانی سوب گُشگ ءَ انت کہ اے کسانیں پرشت پروشیں دگانی سر ءَ تیز رؤگ ءِ وئیل بوگ ءَ اَنت –

دی بلوچستان پوسٹ

شبیر بلوچ بی ایس او آزاد ءِ بنجاھی انفارمیشن سیکرٹری بیتگ ءُ آ چار اکتوبر دوھزار ءُ شانزدہ ءَ بلوچستان ءِ دمگ چہ کیچ ءَ دگہ لھتے مردمانی ھمراھی ءَ بیگواہ کنگ بیتگ – بی ایس او آزاد ءُ آئی ءِ کھول ءِ گوشگ اِنت کہ شبیر بلوچ پاکستانی پوج ءُ چیریں ادارھانی کارمنداں دزگیر کنگ ءَ پد بیگواہ کرتگ وھدیکہ شبیر بلوچ ءَ ابید آ دگہ مردم پد ءَ یلہ کنگ بیتگ اَنت –

ٹی بی پی ءِ شال ءِ اھوالکار ءِ رد ءَ بنجاھی شھر شال ءِ پریس کلب ءِ دیم ءَ وائس فار بلوچ مسنگ پرسنز ءُ شبیر بلوچ ءِ کھول ءِ نیمگ ءَ شبیر بلوچ ءِ بیگواھی ءَ چار سال سرجم بیگ ءَ زھرشانی کنگ بیتگ –

زھرشانی ءَ وی بی ایم پی ءِ رھشون، بیگواھیں بلوچانی کھول، نودربر ءُ سیاسی مھلوکاں بھر زرتگ –

زھرشانی ءَ ھسان کمبرانی، ھزب اللہ کمبرانی، ڈاکٹر دین مھمد بلوچ، راشد ھسین بلوچ، فیروز بلوچ شبیر بلوچ ءِ کھول ءَ ھوار وی بی ایم پی ءِ نسراللہ بلوچ ءَ تران کرتگ –

زھرشانی کنوکانی گوشگ اِنت کہ ساجد گوندل ءِ بیگواھی ءِ سر ءَ گامگیج زورگ بیت اِنت بلے زرینہ ءُ سیما گوستگیں چار سالاں ھمک در ءَ ٹکان ءُ پیداک اَنت ءُ کس اشاں دلگوش دیگ ءَ نہ اِنت –
ما واک جاھاں نشتگیں وتی رھشوناں اے جست ءَ کن ایں کہ آ پرچا بے توار اَنت، مارا وتی دمگی ھاکم ءُ نمائندگاں گوں گلگ اِنت کہ اے درگت ءَ پرچا ھچ گوشگ ءَ نہ اَنت –

کھولاں گوشت کہ مئے جست مئے ھاک ءَ چہ سیادی ءَ سرجمیں دنیا ءِ ھستیں مردمان اِنت آ چار سالانی تہ ءَ شبیر بلوچ ءِ واستا پرچا توار جوڑ نہ بیتگ اَنت –

آیاں گْوشت کہ مارا تھنا بلوچ ءِ واستا ناں بلکیں سندھی، پشتون ءُ درستانی واستا انساپ ءِ دیگ ءِ گپ جنگی اِنت –

کھول ءَ گْوشت کہ بلوچستان ءِ ھنچیں جاھے ءَ سیادی دار اَنت کہ اود ءَ ناں ورگی آپ، ناں بجلی، نا وانگی ادارہ ءُ دگ ھست، اے شدکی ءُ بزگی ءِ ھزاراں درداں سرباریں شبیر بلوچ ءَ وانگ زانت گپتگ ءَ وتی ھک ءِ گپ جتگ –

آیاں گوشت کہ شبیر بلوچ آئی ءِ لوگبانک ءِ دیم ءَ دگہ مردمانی ھمراھی ءَ دزگیر کنگ بیتگ ءُ بیگواہ کنگ بیتگ چریشی ءَ پد آئی ءِ ھال ءُ اھوال نیست اِنت – ءُ گوستگیں چار سالاں چہ شبیر بلوچ ءِ لوگ بانک ءُ آئی ءِ گوھار برے پریس کلبانی دیم ءَ، برے کمیشن ءِ دیم ءَ زھرشانی کنگ ءَ اَنت بلے داں روچ ءِ مروچی ءَ اے سرپدی نیست اِنت کہ شبیر بلوچ زندگ اِنت یا ناں –

کھول ءَ گوشت کہ تھی کارانی وزیر بلوچستان ءَ اے سدکی داتگ کہ بیگواھیں مردمانی جیڑو الکاپی ءَ زورگ بیت ءُ ما یک ھپتگے ءَ اشانی گون ءَ گند ءُ نند کن ایں بلے گند ءُ نند ءَ دور تچگ ءَ اَنت –

آیاں گوشت کہ مئے سر ءَ رھم بہ کن اِیت ءُ مارا بے دلگوشی مہ کن ایت –

کھول ءَ گوشت کہ مئے نودربر، مئے ڈاکٹر، مئے استاد درست بیگواہ اَنت پد ءَ گوش اَنت کہ بلوچستان پشکپتگین ھندے – اد ءَ ھزارانی مردم گچین کنگ ءُ برگ بیگ ءَ اَنت –

آیاں گوشت کہ بیگواھیں بلوچ آمید گساں پیش کنگ بہ بنت، اگاں آیانی سر ءَ بھتام ھست سزا دیگ بہ بنت بلے چوشیں بے سریں سزا دیگ ءَ بیگواھیں مردماں ھوار آیانی کھولاں اے وڑ ءَ ابید ءِ آمید گسی کانوداں چوشیں سزا نیست –

زانگ بہ بیت مروچی وائس فار بلوچ مسنگ پرسنز ءِ شدکشیں ھرتال ءَ چار ھزار ءُ ھشتاد ءُ نُھ روچ سرجم کہ آئی ءِ چیردستی ءَ ماما قدیر بلوچ کنگ ءَ اِنت – اے این پی ءِ رھشون نور شاہ اچکزئی، ملک نواب اچکزائی ءُ ھاجی عبداللہ جان اچکزئی بنجل ءَ اتکگ ءُ پدردی ءِ اش درشان کرتگ –

دومی نیمگ ءَ چاگردی رسانکجاہ ٹویٹر ءَ شبیر بلوچ ءِ بیگواھی ءِ ھلاپ ءَ سرپدی ءِ کمپئین کارمرد کنگ بیت –

ھمے وڑ ءَ سندھ ءِ بنجاھی شھر کراچی ءَ وائس فار مسنگ پرسنز آف سندھ ءِ نیمگ ءَ “ بیگواھیں مردمانی پندا روانک ” کنگ بیگ ءَ اِنت کہ چریشی ءَ بیگواھیں بلوچانی کھول ھوار اَنت وھدیکہ چاگردی رسانکجاہ ءَ کمپئین کامرد بیگ ءَ اِنت

انگلش پریمیر لیگ ءَ چلسی ءَ چار گول داتگ ءُ لیب وتی نام ءَ کُتگ ۔

دی بلوچستان پوسٹ

انگلش پریمیر لیگ ءَ چلسی ءِ لیبیاں کرسٹل پیلیس ءِ لیبی چار گول داتگ اولی گول چنویل ءَ گوازی ءِ پنجاھمی منٹ ءَ آورتگ، دومی گول زوھمایا شست ءُ ششمی آورتگ، وھدیکہ گُڈی دوئیں گول پنیلٹی ککسانی سرءَ جورگینو ءَ آورتگ اَنت۔

ھمے وڑ ءَ پریمیر لیگ ءِ دگہ یک گوازی ءِ تہ ءَ ایورٹن ءَ برائٹن چہ دو گول ءِ سرءَ بُرتگ۔ چہ ایورٹن ءِ نیمگ ءَ چار گولانی تہ ءَ یکے ڈی۔ کارلویٹ لیون، یکے وائی. مینا ءُ گُڈی دو گول جے. روڈریگیوز ءَ آورتگ اَنت۔ دومی نیمگ ءَ برائٹن ءِ این. ماؤپے ءُ وائی. بیسوما ءَ یک یک گولے آورتگ۔

مروچیگیں دیمتریں گوازیانی تہ ءَ یک گوازی ءِ لیڈز یونائنٹڈ ءُ مانچسٹر سٹی ءِ نیام ءَ اے ساھت ءَ برجاہ اِنت، ءُ گُڈی لیب نیو کاسٹل ءُ برنلی ءِ نیام ءَ شپ ءَ برتانیہ ءِ وھد ھشت بج ءَ بندات بیت۔