دی بلوچستان پوسٹ
بیران بیتگیں مردم ءِ پجار بلوچی زبان ءِ ازمکار حنیف چمروک ءِ نام ءَ زانگ بیتگ –
بلوچستان ءِ دمگ کیچ ءِ بنجاھی شھر تربت ءَ گوستگیں شپ ءَ تیرگواری ءِ وئیل ءَ حنیف چمروک بیران بیتگ –
بیران بیتگیں مردم بلوچی زبان ءِ ازمکارے بیتگ – دمگی مردمانی رد ءَ تیرگواری ءِ وئیل تربت ءِ ھند سنگانی سر ءَ پیش اتکگ کہ اود ءَ لوگ ءِ نزیک ءَ وتی سنگتانی ھمراھی ءَ نندوک بیتگ کہ ناشناسیں دبوکہ پرپٹ سواریں مردماں تیرباران کرتگ –
تنی وھدی کوش ءِ سوب زانگ نہ بیتگ –
نبشتانک: جمیل ءِ دل ٹُنگ اَت
ارپان منی چم، منی باسک، منی ارواہ، منی باور ات-
نبشتہ کار: منھاج مکتار
دی بلوچستان پوسٹ
ارپان ءِ دل چہ کسانی ءَ ٹُنگ ات نادراہ ات بلے ارپان ءَ وتی نادراھی ءِ گپ ھچ کس ءَ گوں نہ گشتگ منی گس ءِ مردم ات من زانتگ ات بلے من ھر وھدے کہ جُست کت چون ئے؟ آئی ءِ پّسوانی تھ ءَ نزوری گلِگ زنگ نیست ات برو براں ڈڈّاں – ارپان دوھزار ءُ دہ ءخ ۲۰۱۰ ءَ بلوچ راجی جنز ءَ گوں ھمگرنچ بوت یک جون دوھزار ءُ یازدہ ءَ سیاھجی ءِ مزنیں پرّگ ارپان ءَ وتی سنگر جوڑ کت انت ءُ چہ ارپان ءَ جمیل بوت انچش کہ آئی ءِ نام جمیل ات ھمے وڑا آ وتی نام ءِ بزانت ءِ پد ءَ پہ سنگتاں مدام پرُمھر ات زیبا ات وش روھ ات-
بلے ھمے میان ءَ وھدے سالے کپے گوزگ ءَ پد کہ استاد واھد کمبر چہ زندان ءَ آجو بوتگ ات ءُ ھمے الاکھاں اتکگ ات سنگتانی گندگ ءَ ھمے روچاں جمیل ءِ تبیت نگیگ بوت ساہ ئِے پُر بوگ ءَ نہ ات سِٹّگ کپگ ءَ ات ما کل سنگت تکانسُر ات ایں کہ جمیل ءَ چون انت استاد واھد کمبر برے سوچنے برے گولی یے استاد ھمے گشگ ءَ ات کہ سنگت ءَ پیش ءَ چشیں نادراھی بوتگ اگاں ناں گڑا من ھمے گشت استاد جمیل ءِ دل چہ کسانی ٹنُگ بزاں(سوراخ)بوتگ دگہ چشیں نادراھی نہ بوتگ ئِے استاد ءَ نُرنڈ ات سنگتانی سر ءَ کہ سنگت ءِ تبیت جوان نہ انت اللہ ھیر بکنت اے وڑیں نادراھی ءُ کوہ،،گڑا سنگتاں اشتاپ اشتاپی اسٹیچرے بزاں دار ءِ تھتے جوڑ کت ھمے تھت ءِ سر ءَ واپینت ساد ٹٹات کہ گوں اے سِٹگاں مہ کپ ایت کوہ ءَ الاج نہ بیت جاھے پہ الاج ءَ سنگت پون کتگ ات انت کہ دیم ءَ بیا ات ما پیداکیں جمیل انچش ناگیگ ات ھمے تھت ءِ سر ءَ دل پہ لاپ ھم وپت نہ کت ئِے، ساہ ئِے پرُبوگ ءَ نہ ات گڑا سنگتاں ھمے تھت دور دات ءُ دو دو سنگتاں بگلاں زرت پاد ئِے گرِّان ات انت ءُ سنگت جنزان ات انت شش ھپت اِراد (گنٹھ) ءِ سپر ءَ مرچیگیں بیگاہ ءِ چار بج ءَ جمیل سنگتاں ھمے وڑ ءَ گرِان کت ءُ اے وھداں سارتی وتی زور ءَ ات سک سارت ات شپ کپتیں جاھے داشت سارتی ءِ َسما کس ءَ نہ کت کجام جاہ ءَ کہ ھوش ءَ اتک سنگتاں گش ایت من بروبراں من ءَ مہ بر ات من وشاں سنگتاں توکل دیگ ءَ ات بلے پد ءَ ھمے سٹگ تکلیفی تانکہ سھب ءَ مھلہ ھما سنگتانی کر ءَ سنگت سر بوت ایں دوئیں سنگت مئے ودار ءَ نشتگ ات انت سنگتاں جمیل برت پہ الاج ءَ سنگت پد ءَ وتی جاہ ءَ شت انت
لھتیں وھد ءَ پد امداد زھری کہ شھید کنگ بوت گڑا جمیل ءَ وتی نام جمیل ءَ چہ بدل کت امداد ایر کت پرچاکہ شھید امداد جمیل ءِ سکّین دوستیں سنگتے ات دوھزار ءُ سیزدہ ءِ گچینکاری ءِ بے سوب بوگ ءَ پد پاکستان ءِ یزیدین لشکر ءَ کونشکلات ءُ نزرآباد ءَ آپریشن کت بازین گسے مانداشت ھمے میان ءَ شھید امداد ءِ کماش شھید گلام مستپا، شھید آسم ءُ شھید اللہ بکش کہ آ دھکان کارے ات وتی ڈگارانی سر ءَ کار ءَ ات اَنت دگہ یک بلوچے کہ آ نشہ ءِ آماچ ات رؤپ آ ھم شھید کت اش شھید امداد ءِ کماش ءِ شھادت ءَ پد امداد گیشتر مھکم بوت اما سپیہ ءَ امداد گون ھمراھان ھمے سکین دات کہ من گد دوچی کناں چے وڑ کناں وتی گس ءَ داراں تئی کستریں برات ءُ گھاراں سمبھالاں بلے شما وتی جھد ءَ دیم ءَ بران کن ات زمین شمے مات انت وتی دومی مات ءَ چہ اے بے لجیں لشکر ءَ چہ پچگر ات-
شھید امداد ءَ وانگ جاھاں ھچ نہ ونتگ ات بلے شھید امداد ءِ زانت ءُ پوھی ات کہ آئی ءَ ھر جیڑہ گوں ھوُرتی ءَ چار اِتگ ءُ پیسلہ زُورگ آئی ءَ دہ سال ءِ تجربہ اِت انت شھید امداد یک سرجمیں گوریلاے ات پہ چیرجنگی ءَ شھید وتی درور وت ات شھید امداد ءَ وتی چاگرد ءِ ھر زلم ءُ زوراکی گوں وتی چماں دیستگ ءُ مزن بوتگ ات بلوچ چاگرد ءَ بلوچ آجوئی ءِ جنگ ءَ شھید امداد وانینتگ ءُ زانت بکشتگ اِت اَت-
بیست ءُ ھپت تاریک ءِ شپ ءِ نُوہ بج ءَ من ءَ سنگتے ءَ ھال کت کہ مزن بند ءِ لھتیں سنگت ءِ شھادت ءِ ھال انت ھالے بگر من ءَ سرپد کن گوں من سنگتاں گوں ھال کنگ بندات کت سنگت گشگ ءَ ات انت کہ اے دروگے سنگت کل سلامت انت امداد ءُ برمش چو سپرے ءَ جاھے درکپتگ انت ھال بوگ ءَنہ انت نمبر اِش بند انت بلے آ دگہ نیمگ ءَ انت اد ءَ کہ آپریشن انت اد ءَ نہ انت من وپتاں مُبائل بند کت بلے سرجمیں شپ جمیل ءُ برمش منی دیم ءَ ات انت من ءَ واب ھم نیتک پجر ءَ وھدیکہ پاد اتکاں مُبائل چار ات تاں دوئیں سنگتانی اکس انت شھید بوتگ ات انت اے دمان ءَ من چون ات آں من چنچو پرشتگ ات آں ھدا سرپد ات ءُ منی کر ءَ نشتگیں سنگت ءُ ھمراہ ھمے دمان ءَ من ءَ استاد کمبر ءِ ھما گپ گیراتک کہ چشیں نادراہ باید اِنت کوھان آرگ مہ بنت کہ اد ءَ یا اشانی الاج نہ بیت تکلیپ بنت بلے اے ھما نادراھیں جمیل ات کہ دل ئِے ٹنُگ ات پد ءَ سے سال ءَ گردھانی نادراہ ات کہ نادراھی ءِ بسترانی سر ءَ نہ مُرت بلکیں لگوریں پاکستانی لشکر ءُ بلوچ دلارانی گوما جنگ ئِے دات ءُ شھید بوت وت ءَ نمیران ئِے کت
شھید امداد ءِ وڑیں سنگتے ءِ دوری ءُ کّمی ءَ ما المّ پدر ایں شھید ءِ جاہ ءِ پرُکنگ ءَ بوت کنت باز وھد درکار بہ بیت بلے شھید ءِ بے بھائیں کربانی ءُ شھادت مارا توکل بکش انت ءُ گام گام ءَ مئے رھشونی ءَ کن انت تو نمیران ئے-
شھیدکپٹن ارپان ءُ شھید نورھان شمارا سھریں دروت شمے ارواہ آسودگ بات
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
دی بلوچستان پوسٹ
سر بیتگیں ھالانی رد ءَ روکپتی بلوچستان ءِ دمگ دلگان ءِ ھند چاھکیچی ءَ ناشناسیں مردمانی تیرگواری ءَ یک مردمے بیران بیتگ –
بیران بیتگیں مردم ءِ پجار یار مھمد ءِ نام ءَ زانگ بیتگ-
اھوالکار ءِ رد ءَ مروچی دلگان چاھکیچی ءَ ناشناسیں مردماں یار مھمد ءِ سر ءَ ھما وھد ءَ تیرگواری کرتگ کہ آ وتی زمینانی سر ءَ کار ءَ بیتگ ءُ ناشناسیں مردماں آئی ءِ سر ءَ اُرش کرتگ ءُ کُشتگ –
زانگ بہ بیت گوستگیں شپ ءَ ایرانشھر ءَ ایرانی اطلاعات ءِ تیرگواری ءَ دو مردم بیران ءُ یکے زدگ بیتگ اَت –
روکپتی بلوچستان ءِ چاگردی مردمانی گوشگ اِنت کہ ایرانی چیریں ادارہ بلوچاں توپک وت دیگ ءُ وت ماں وتی ءِ تہ ءَ ناتپاکی ودی کنگ ءَ اِنت کہ چریشی ءَ چہ بازیں کوشکاری دیم ءَ آیگ ءَ اَنت –
دی بلوچستان پوسٹ
گومازی شنکن بازار ءَ پاکستانی پوج ءَ یک مردمے زورانسری آوار جتگ ءُ گون وت برتگ-
ٹی بی پی پتر ءَ سربوتگیں ھالانی رِد ءَ مروچی تمپ ءِ دمگ گومازی ءَ پاکستانی پوج ءَ دینار ء ھیدر زورانسری آوار جتگ ءُ گون وت برتگ –
اھوالکار ءِ رِد ءَ دینار پاکستانی پوج ءَ ھما وھد ءَ گپتگ کہ آ گومازی ءَ گیراج ءِ نزیک ءَ ھجام ءَ شتگ بوتگ کہ پوج ءِ گاڑی ءُ سَے پرپٹ سواراں اتکگ ءُ آ زورانسری دست ءُ پاد بستگ اَنت ءُ گوں وت برتگ –
اھوالکار ءِ رد ءَ ھمے گمان بیت کہ پرپٹ سوار دمگی ڈیتھ اسکواڈانی کار مند بوتگ انت –
زانگ بہ بیت تمپ گومازی ءَ ھوار بلوچستان ءِ جتا جتائیں دمگاں پاکستانی پوج ءِ زوراکی یکشل ءَ برجاہ انت – بازیں مردمے آوارجنی ءَ پد بیگواہ کنگ بوتگ اَنت –
دی بلوچستان پوسٹ
سر بیتگیں ھالانی رد ءَ روکپتی بلوچستان ءِ دمگ پھرہ “ایرانشھر ” ءَ ایرانی اطلاعات ءُ سپاہ ءَ یک گاڑی ءِ سر ءَ تیرگواری کرتگ ءُ دو نپر کُشتگ ءُ یکے زدگ کرتگ –
اھوالکار ءِ رد ءَ گوستگیں شپ ءَ پھرہ “ایرانشھر ” ءِ ھند اھمد آباد ءَ ایرانی اطلاعات ءُ سپاہ ءَ یک گاڑی ءِ سر ءَ تیرگواری کرتگ ءُ چریشی ءَ دو مردم بیران بیتگ ءُ یکے زدگ بیتگ –
اھوالکار ءِ رد ءَ ایرانی اطلاعات ءِ گوشگ اِنت کہ اے گاڑی ءَ بندشی مال مان بیتگ کہ چریشی ءَ ایرانی اطلاعات ءَ تیرگواری کرتگ –
دمگی مردمانی رد ءَ گاڑی ءِ تہ ءَ ھچ بندشی مال مان نہ بیتگ ءُ مپت ءِ ھدا گاڑی ءِ سر ءَ تیرگواری کنگ ءُ مردم کُشگ بیتگ اَنت –
چاگردی باسکے ءَ نام پدر نہ کرتگ ءُ ٹی بی پی ءِ اھوالکار ءَ گوں گپ کنان ءَ گوشتگ کہ ایرانی پوج ھمک وھد ءَ لس بے میاریں بلوچانی سر ءَ اُرش کنگ ءُ کُشگ ءَ اِنت –
آئی ءِ گوشگ اِنت کہ روایرشُتی بلوچستان ءَ بلوچ مھلوک ءَ اِزت ءُ شرپی ءِ نگاہ ءَ ایرانی پوج ءُ آدگہ ادارہ چارگ ءَ نہ اَنت پرے ھاتر ءَ ایرانی پوج دگہ ادارہ بلوچانی کُشت ءُ ھون ءَ کنگ ءَ اَنت –
چاگردی باسک ءِ رد ءَ گاڑی ءِ تہ ءَ ھچ بندشی مال مان نہ بیتگ ءُ نانکہ ءِ چوشیں چیزے اود ءَ شناسی ءَ دز کپ ایت کہ گاڑی ءِ سر ءَ تیرگواری کنگ ءُ لس مردمانی کُشت ءُ ھون ءَ گیش کنگ –
آئی ءِ گوشگ اِنت کہ ایرانی پوج ءُ ایندگہ ادارہ شکی ءِ بنیاد ءَ گاڑیانی سر ءَ تیرگواری کن اَنت ءُ پد ءَ بھتام جن اَنت کہ گاڑی ءِ تہ ءَ بندشی مال مان بیتگ –
دی بلوچستان پوسٹ
چار روچانی میان ءَ بلوچستان ءِ جتا جتائیں دمگاں ھپت مردمانی جون دست کپتگ اَنت –
ٹی بی پی پتر ءَ سربوتگیں ھالانی رِد ءَ بلوچستان ءِ دمگ اورماڑہ ءُ مستونگ ءَ دو مردمانی جون دست کپتگ اَنت، دزکپتگیں جونانی پجار دنیگت ءَ نہ بوتگ اَنت –
اھوالکار ءِ رِد ءَ اورماڑہ کالونی ءَ آپ ءِ ٹانکی ءَ پنجاہ سالی ئیں کماشے ءِ زانگولیں جون دست کپتگ – پیرمرد اورماڑہ ءِ جاھمنند گوشگ بوگ ءَ اِنت –
اورماڑہ ءِ پھازدارانی نیمگ ءَ چہ پٹ ءُ پول برجاہ انت بلے دنیگت ءَ آئی ءِ پجار نہ بوتگ –
دومی نیمگ ءَ مستونگ ءَ ولی خان لیویز تھانہ ءِ نیام ءَ جنگل کراس ءِ نزیک ءَ ھم ناشُناسیں مردمے ئِے جون دست کپتگ –
جون ھما دمان ءَ سیول ھسپتال ءَ برگ بیتگ ءُ پد ءَجون گیشین پجار ءِ ھاتر ءَ سیول ھسپتال شال ءَ دیم دیگ بوتگ –
زانگ بہ بیت گوستگیں چار روچانی میان ءَ بلوچستان ءِ جتا جتائیں دمگ پنجگور، ھب، کچلاک، اورماڑہ، مستونگ ءَ ھپت مردمانی جون دست کپتگ اَنت –
دی بلوچستان پوسٹ
شام ءَ تراک ناکیں شورواں پُریں گاڑی ءَ بمب تراک بیتگ چریشی ءَ ھژدہ مردم بیران ءُ ھپتاد زدگ بیتگ اَنت –
ٹی بی پی ءَ چاگردی رسانکجاھاں سر بیتگیں ھالانی رد ءَ درملکی ھالتاکانی رد ءَ تراک ترکی ءِ منوکیں جنگولانی زیردست کرتگیں دمگ الباب ءَ پیش اتکگ –
درملکی ھالتاکانی رد ءَ شام ءَ بیتگیں تراک ءَ چُکاں ھوار چِل ءُ شش مردم بیران رپورٹ ءِ رد ءَ تراک بس اسٹیشن ھِ نزیک ءَ پیش اتکگ، تراک ءِ کش ءُ گوراں آس کپتگ ءُ نزیکیں ماڑیاں ھم تاوان بیتگ –
تراک ءَ پد بازیں مردمے دیوال ءِ چیر ءَ چیر تر اِتگ اَنت، ھمے وڑ تراک ءَ بیران بیتگینانی تہ ءَ زالبول ءُ چُک ھوار اَنت، تراک ءِ زمہ واری تنی وھدی ھچ گل ءَ نہ منّ اِتگ –
دیوانے گوں ناکو مراد بکش ءَ
سرھال:راج ءِ جُست ءُ ناکو ءِ پسّو
سفرخان بلوچ
دی بلوچستان پوسٹ
ناکو آئی ءَ پیسر کہ من جُستانی امباراں پچ بہ کن آں، منی ھیال ءَ چاھے بہ بیت۔ اے گپ من ھما وھد ءَ کُت کہ ، من ناکو گْوشتگ اَت لھتیں جُست پہ ترا منی کِرّ ءَ مھلونک ءَ دیم داتگ اِیشانی پسّو ءَ کدیں دئے۔ ناکو ءَ گْوشت انوں! ناکو ءَ منی گپ ءِ پسّو ھم دات ءُ گْوشت، بیا رویں مچکدگ ءَ انگور ءِ چیر ءَ نِندیں دیوان کن آں۔ ما چہ لوگ ءَ درآتکاں ءُ ناکو ءِ لوگانی دیمی نیمگے مچکدگ ءَ شُتاں ءُ انگور ءِ چیر ءَ نشتاں۔ من گوں نِندگ ءَ ھوار وتی جستانی امبار پچ کت۔
من گْوشت ناکو چہ پروم ءَ ترا جوھر سلام دَیَگ انت ءُ جست کنگ اِنت، ھما ورنا کہ کوہ ءَ گوں شُدلاپی ءَ جنگ ءَ اَنت ، آیانی جنگی ءُ زِند گُزران ءِ لوٹ ءُ زلورت پرچا پورا نہ اَنت؟
ناکو ءَ گوں سلام ترّینگ ءَ ھوار گْوشت! بچار اگاں من گپ ءَ اے دیم ءُ آ دیم بہ کن آں کُتے ؤ کناں کہ پرچا سنگتانی زلورت پورا نہ بنت ۔ لھتیں کتابی درور ھم دات کناں کہ پِلاں جاگہ ءَ چوش بوتگ ، بلے من اِد ءَ یک گپّے گیش کنگ لوٹاں کہ تھنا کوہ ءَ نندوکیں سنگتانی زلورت پورا بُوَگ ءَ نہ اَنت؟ یا مئے یک کارے ھم شری ءَ بُوَگ ءَ نہ اِنت؟ دومی گپ مئے کِرّ ءَ کُجام کار اِنت کہ سرجم ءُ پہ طریقہ ء کار بُوَگ ءَ اِنت۔ یک چوشیں کارے تو من ءَ پیش بدار کہ سرجم ءُ طریقہ ءِ سر ءَ بُوَگ اِنت۔ راستی ؤ اش اِنت کہ مئے پوزیشن ھم اے نہ انت کہ سنگتاں دو وھد ءِ ورگ مہ رس اِیت، مئے کِرّ ءَ ادارہ نیست کار کنگ ءُ پرمائینگ ءِ طریقہ نیست ، مئے کِرّ ءَ ھرچ چیز اللہ ھیر ءِ سر ءَ اِنت ، ما اگاں بچاراں ما کُجام کار ءِ سر ءَ منصوبہ بندی کُتگ آ کار گُڑا تاریخی کار بوتگ اَنت۔ تئی کِرّ ءَ شریں منصوبہ بندی مہ بیت ، ادارہ مہ بیت ، برابری مہ بیت چیز درس اللہ ھیر ءِ سر ءَ بہ بنت الم انچوش بیت، دگہ یک گپّے گْوش آں مئے سیاسی رویہ ءِ تھا پاکستان ءِ سیاست کنوکیں مردُمانی سیاسی رویہ ءِ تھا ھاسیں پرکے نیست، بس ما وت ءَ انقلابی مردم گوش آں بلے راستی ءَ انقلابی بُوَگ ءَ تیار نہ اِیں ، یک گپّے ھست آشوب وتی زھگ ءَ وت وارت ۔ ءُ اے گپ فرانس ءِ انقلاب ءَ پد دیم ءَ آتکگ ، اے ھما مردمانی کُشگ ءَ پد دیم ءَ آتکگ کہ فرانس ءِ آشوبی مردماں وتی زاتی مفادانی واستا وتی مردم وت کُشتگ اَنت ءُ پد ءِ آیاناں دگراں کُشتگ۔
ناکو دگہ یک جستے کہ اے سنگت گْوش اِیت منی نام ءَ مہ گر ، بلے جست چو اے وڑ ءَ اِنت کہ ناکو تو مظاہرہ نہ منّ ئے ، تو سفارت کاری نہ منّ ئے، ریلی ءُ جلسہ ، جلوس نہ منّ ئے، تو ھچ نہ منّ ئے ، تو گْوش ئے دِگہ ھچ مکن اِت بس جنگ بہ کن اِت ، جنگ ؟
تو بگُش؟ بلوچ ءِ کِرّ ءَ ابید چہ جنگ ءَ دِگہ چی پشت کپتگ ، ھپتاد سال ءِ تھا آ دگہ دُرائیں راہ ما کارمرز کتگ اَنت مارا چی رستگ ؟ مروچی اگاں بلوچ ءِ پجّار رکّ اِتگ آ ھمے جنگ ءِ بدولت اِنت، بلوچ ءَ ریلی کتگ ،مظاہرہ کتگ ، لانگ مارچ کتگ بلوچ راج ءَ را چی رستگ؟ بچار اے سنگت ءِ جُست منی جند ءِ سر ءَ کتگ ، من گڑا وتی جواب ءَ دے آں کہ من نا انسانی ھکّانی پاسبانے ءَ آں ، نیکہ دگہ سوشل میڈیا اکٹیویسٹ ءُ خود ساختہ سفیر ءِ آں ، من اے سرپداں بلوچ گُلام اِنت ءُ آجو کنگی اِنت۔ بس ھرچی کنگی اِنت ، پہ آجوئی ءِ جھد ءَ کنگی اِنت ۔ ماما قدیر سئے ھزار کلو میٹر لانگ مارچ کنت، بلے انگت بیگوائیں بلوچ آجو نہ بنت۔ چی ءَ کہ آزادی ترا پہ کوکار ءَ چوں رس اِیت؟ اگاں راستی ءَ تو لوٹ ئے بلوچ آجو بہ بیت ، گُڑا جنگ بہ کن ۔ جنگی مردمانی ھمایت ءَ بہ کن ۔ ھر وڑ ءَ آیانی ھمراہ ببُو ، آیانی کارانی تہ ءَ ھمراہ ببُو، دگہ پہ ترا ھچ راہ پشت نہ کپتگ ۔ھاں! پہ وتی جند ءِ رد دَیَگ ءَ تو ھزار کار کُت کن ئے ، بلے دُرس بے پائدہ۔
من ناکو گْوشت، ناکو تو اِد ءَ گپّے کار مرز کت من سرپد نہ بوت آں۔ چو مانگیش اِتگیں گپّے اَت۔ خودساختہ سفیر ؟ اِد ءَ تو چی گْوشگ لوٹ ئے ؟
ھو! مئے ھرچی کہ ڈنّی مردُم ھست اَنت ، اِیشانی تھا بلکیں یکّے یا دو مردُم بہ بنت کہ پارٹی ءُ گلّاں پلینگ کتگ ءُ را داتگ اَنت ، گیشتری ھما اَنت کی جنگ اِد ءَ تیز بوت اِیشاں وتی چادر چنڈّ اِت ءُ دیم پہ ھما دمگ ءَ شُت اَنت کس جست ھم نہ کت ، نوں پد ءَ ھما مردم وت ءَ تھنک ٹینک گْش اَنت ءُ ایشانی واھگ اِنت جنگ مئے تب ءَ بہ بیت ، اَجیب اِنت! جنگ ءَ پیش تتکگیں سپاہی سپاہ سالار ءَ بِہ گْوش اِیت تو جنگ نہ زان ئے ایشاں من چی بگُش آں دگہ ؟
ناکو اِد ءَ یکّے ءَ جُستے را داتگ گْوشی کہ تو یکرندے لطیف جوھر بد ءُ رد گْوشتگ پرچا ؟ ناکو اے راستے؟
بچار ورنا من لطیف جوھر کدی بد ءُ رد نہ گْوشتگ ،اے گپ من گْوستگیں ماہ ءَ کُتگ اَت کہ لطیف جوھر بے سریں ٹوئیٹے کتگ اَت ۔ من بس ھمے گپ جت کہ لطیف ءَ داں کولواہ ءَ تربت ءَ کس ءَ دیم نہ داتگ ، ما بڈّ ءَ جتگ ءُ واجہ کینیڈا ءَ سر کُتگ انچوش بیت، ءُ اگاں راستی ءَ جوھر کینیڈا ءَ بی ایس او ءَ را داتگ اے تاریخی ردی یے لیکگ ءُ زانگ بیت۔ منی کِرّ ءَ نِشتگیں منی سنگتے ءَ من ءَ گْوشت اے زاھد ءِ کیس ءِ ھاتر ءَ شُتگ ، من گْوشت اکبر بگٹی ءِ شھیدی ءَ پد سلیمان داؤد انچوش شُت کہ من بلوچستان ءِ کیس ءَ عالمی عدالت ءَ براں ءُ جوھر چل روچ شد ھڑتال ءَ نِشت۔ پد ءَ گْوشی زاھد ءَ من رواں چہ کینیڈا ءَ آجو کناں ، بلے روچ ء مروچی ءَ ناکہ زاھد آجو بوت ناکہ بلوچستان ءِ کیس میان اُستمانی آمد گِس ءَ شُت، من جوھر ءِ بابت ءَ دِگہ ھچّ نہ گْوشتگ کہ مھلوک زھر ءُ کولنجی اَنت۔ اگاں من دِگہ گپّے بہ گْوشتیں، من تچک ءَ تچک ترا گْوشت کہ من واجہ جوھر ءَ چے گْوشتگ۔ وسر ءُ بے بُنیں گپ مردم پُشت ءَ باز جن اَنت ، بلے من ءَ ترا راستی ءِ دامن یلہ کنگی نہ اِنت کہ کئے چے گْوشگ ءَ اِنت ءُ کئے چے گْوش اِیت ، کئے کہ بِہ بیت ۔ پوہ بوت ئے ورنا؟ اگاں نا اے بابت ءَ دِگہ روچے مئے وتی نام ءَ کن ئے۔۔۔ ھاھاھاھاھاھا۔
گوں ناکو ءِ ٹھک ءُ کندگاں منی اے ( لطیف جوھر ءِ درگت ءَ) جُست چہ ھمد ءَ آسر بوت ءُ دیوان انگت برجاہ اِنت۔
دیوان برجاہ اِنت
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
دی بلوچستان پوسٹ
بلوچستان ءِ دمگ چہ کچلاک ءَ شال ءِ جھمنندیں مردمے ءِ جون دزکپتگ کہ آئی ءِ گُٹ برگ ءُ کشگ بیتگ –
کچلاک پولیس ءِ رد ءَ کچلاک ءِ ھند کلی کرک ءِ پَٹ ءَ عالمو چار راہ ءَ شال ءِ جھمنندیں مسمی منظور اھمد ء مھمد رفیق کاکڑ جھمنند گل مھمد شال دردناکیں رنگے ءَ گُٹ برگ بیتگ ءُ دیم ءِ پوست دیر اش کرتگ ءُ چم اش کش اِتگ اَنت –
کچلاک ءِ پولیس ءَ ھال ءِ سر بیگ ءَ وت ءَ رسینتگ –
ھمے وھد ءَ ایس پی صدر شفقت مھمند، سرکل ڈی ایس پی کچلاک شفقت مھمود جنجوعہ، ایس ایچ او کچلاک نور الھسن، انچارج اسپیشل برانج ملک کبیر اھمد بازئی ءَ جون چِست کرتگ ءُ اژدری چار ءُ ٹپاس ءَ نادراہ جاہ ءُ رسینتگ –
ھمے وھد ءَ جون ءِ پُشپد ھم جاڑیگ بیتگ اَنت ءُ کوش ءِ سوب زانگ نہ بیتگ –
دی بلوچستان پوسٹ
سر بیتگیں ھالانی رد ءَ مروچی سھب ءَ روکپتی بلوچستان ءِ دمگ چھبار ءَ ایرانی سپاہ پاسداران ءِ چیریں بالیگ”ڈرون ” ءِ کپتگ ءُ سرجم ءَ تباہ بیتگ –
اھوالکار ءِ رد ءَ مروچی سھب ءَ چھبار ءِ دمگ پلانیگ ءَ ایرانی سپاہ پاسداران ءِ یک ڈرونے کپتگ ءُ تباہ بیتگ –
اھوالکار ءِ رد ءَ ڈرون ھما وھد ءَ کپتگ کہ دمگ ءَ چیریں جاوراں چارگ ءَ بیتگ ءُ اے درگت ءَ ایرانی سپاہ ءِ نیمگ ءَ تنی وھدی دگہ ھال دیم ءَ نیاتکگ –
