TBP Balochi

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ بنجاھی شھر زاھدان ءِ دگ ءَ دو گاڑیانی میان ءُ دگ ءِ وئیل بیتگ ءُ چریشی ءَ سَے مردم بیران ءُ سَے زدگ بیتگ اَنت –

اھوالکار ءِ رد ءَ مروچی سھب ءَ زاھدان ءُ ھاش ءِ دگ ءَ یک سواری گاڑی ءُ یک تریلی ءِ میان ءَ ٹکر وری بیتگ چریشی ءَ چہ سَے مردم بیران بیتگ اَنت –

ھمے وڑ ءَ ڈاکٹر فریبرز راشدی ءَ رسانکاں گوں گپ کنان ءَ گوشتگ کہ مروچی بامسار ءِ ساھت ءَ چہ زاھدان ءَ پنجاہ میل دور ھاش ءِ دگ ءَ دو گاڑیانی ٹکر ورگ ءِ ھال سر بوتگ اَنت –

ڈاکٹر فریبرز ءِ گوشگ اِنت کہ وئیل ءِ ھال سر بوگ ءَ لاش کشیں گاڑی وئیل جاہ ءَ روان دیگ بیتگ اَنت ءُ بیران ءُ زدگ بیتگیں مردم نادراہ جاہ ءَ آرگ بیتگ اَنت –

دی بلوچستان پوسٹ

سر بیتگیں ھالانی رد ءَ تمپ ءِ دمگ ءِ کُنشکلات ءَ پاکستانی پوج ءَ بیڑ برتگ ءُ جنین ءُ چُک ترس ءُ بیم داتگ اَنت –

اھوالکار ءِ رد ءَ مروچی سھب ءَ کنشکلات ءَ پاکستانی پوج ءَ گلام مستپا ءِ لوگ انگیر ءَ کرتگ اَنت ءُ جنین ءُ چُکانی سر ءَ زوراکی کنان ءَ لوگ سرجم ءَ پَٹ ءُ پول کرتگ اَنت –

اھوالکار ءِ رد ءَ ھمے وڑ ءَ بلوچی زبان ءِ گشندہ مھناج مکتار ءِ لوگانی سر ءَ پاکستانی پوج ءَ بیڑ برتگ ءُ اود ءَ جاڑیگیں چُک ءُ جنین ترسینتگ ءُ لوگ پَٹ ءُ ھَنڈ کرتگ اَنت –

زانگ بہ بیت گوستگیں ماہ ءَ گلام مستپا ءِ چُک عربان بلوچ ءُ برمش بلوچ پوجی لشکر کشی ءِ میان ءَ جنگ بیتگ اِت اَنت –

جنگ ءَ پد پوج ءَ عربان بلوچ ءُ برمش ءِ جون شپ ءَ ماں کنڈ کرتگ اَنت ءُ کھول ءَ نہ داتگ اَنت –

جونانی کَل کنگ ءِ پشدر ءَ کھول ءَ ھوار سیاسی ءُ چاگردی مردماں زھرشانی ھم کرتگ اَت ءُ گوشتگ اَت کہ مئے مردمانی جوناں بہ دے بلے پوج ءَ گڈی ءَ جنگ بیتگیں سرمچارانی جون نداتگ اَنت –

اھوالکار ءِ رد ءَ گوستگیں شپ ءَ ھم پوج ءَ کنشکلات ءِ مچکدگ انگیر ءَ کرتگ ءُ پَٹ ءُ پول کرتگ –

اھوالکار ءِ رد ءَ عرپان بلوچ ءِ لوگ ءِ کَش ءُ گور پوج ءَ سرجم ءَ مشین جتگ ءُ سلاھانی گرگ ءِ پَٹ ءُ پول کرتگ –

دمگی مردمانی گوشگ اِنت کہ پوج ءِ گوشگ اِنت شمئے گور ءَ سلاہ ھست اِنت سلاھاں بیار اِت اگاں ناں شما اد ءَ نشت نہ کن ئے –

زانگ بہ بیت بلوچستان ءِ جتائیں ھند ءُ دمگاں پاکستانی پوج ءِ لشکر کشیانی زوراں بازیں کَچے ءَ مھلوک ءَ لڈ ءُ بار کرتگ ءُ روکپتی بلوچستان ءُ کراچی ءُ جتائیں جاھاں شتگ اَنت –

چاگردی ءُ راجداریں مردمانی گوشگ اِنت کہ پوج لشکر کشیانی میان ءَ ھمک وھد ءَ دست ءُ گوشیں مردمانی سر ءَ بیڑ بارت ءُ آیاں لَٹ ءُ کُٹانی نشانگ کنت ءُ بیگواہ کنت –

گڈی ھالانی تہ ءَ ھمے گوشگ بیتگ کہ پوج انگت ءَ دمگ ءَ جاڑیگ اِنت ءُ دمگ ءِ دامگ ءِ بند کرتگ اَنت –

نبشتانک: بساکءِ سنگتانی نام ءَ

نبشتہ کار: سنگت حکیم بلوچ

دی بلوچستان پوسٹ

سیاست ءَ گوں ھمُک بندوکیں باسک ءِ پرز ھمیش بہ بیت کہ ھر وھد ءَ آؤکیں جاورانی دیمپانی ءَ مِک بہ بیت۔ گلانی توک ءَ ھر وھد ءَ جھل ءُ بُرزی بنت چُشیں چیز پہ راجداریں باسکاں پائدگ اَنت پرچہ کہ ایش راجداری دربرگ ءِ بھر اَنت، اِے چیز مردم ءِ راجداری سنچ ءِ بیدار کنگ ءَ کُمک کن انت۔

اگاں ما لوٹ اِیں کہ کس مئے ھلاپ ءَ پاد مئیت ءُ گپ مکنت گُڑا سرپد بہ بہ اِیں کہ ما ھچ کنگ ءَ نہ ایں۔

راجداریں گَلانی توک ءَ باز رند ءَ پیسلہ پردانی تب ءَ کنگ نہ بنت بلکیں ادارہ ءِ تب ءَ کنگ بنت اِے سوب ءَ کسّے چہ گَل ءَ گِستائی جتائی واک ءَ کنت گُڑا من آئی ءَ را یک سیاسی مردمے نہ لیک آں، ھما مردم کہ گرانیں ساھتاں وتی گل ءَ گون نہ اوشت ایت آ کدی پاک ءُ پلگاریں گلی سنگتے بوت نہ کنت۔

باید اِنت ما گیش ءَ چہ گیش گل ءَ مھکم بکن ایں سنگتاں ما ھر وھد ءَ رھشون بوگ ءُ کار کنگ لوٹ ایں چونکہ مھکمیں گَلانی توک ءَ دو دیمی رھشون بوگ ءِ اُمیت سک کم اِنت بزانکہ نا پید اِنت۔

ھر کس کہ گل ءَ کیت ءُ روت یا کہ کشگ بیت اِے ھمائی ءِ جیڑہ اِنت مارا ھر وھد ءَ یات دارگی اِنت کہ ما کُجام بنیاد ءَ گل ءِ توک ءَ بھر زُرتگ۔

سنگتاں راجداریں مردم ھِچبر پْرشت ءُ پروش ءِ بھر نہ بیت راجداری یکجاھی ءُ سَدکی کار کنگ ءِ نام اِنت۔

راجداری ءِ توک ءَ گِلّہ ءُ شِکوہ منی ءُ تئی ءِ گنجائش نیست راجداریں مردم ءِ توک ءَ اوپار ءُ زانتی پیسلہ زورگ ءِ زور اَلمی اِنت ءُ نہ کہ دومی مردمانی گپانی سر ءَ پیسلہ بُزور اِیت۔

مارا political Robot جوڑ بوگی نہ اِنت مردم پرستی سَکِیں سِلیں نادُرھی یے مارا اِے چیز زانگ لوٹ انت کہ ما چیا گَل ءِ باسک بوتگ ایں؟-

ما ھر وھد ءَ گَل ءَ ڈوباریں کہ مارا گَل ءَ چی داتگ؟ اِے جُست ءَ ما پیسر ءَ وت ءَ بکن ایں کہ ما گَلءَ را چے داتگ؟ گَل ءِ باسک من ءُ تو ایں۔ ما کہ گَل ءِ زُرتگیں پیسلھاں پیلو نہ کن ایں ءُ گَل ءِ پْرشت ءُ پْروش ءَ بندات کن ایں گُڑا گَل مارا چے دات کُت کنت؟-

مارا سرپد بوگی ایں کہ گل کسّی ھاتِر ءَ اوشت ءِ آماچ نہ بیت گل یک گل ءِ پُشت ءَ جوڑ کنگ بوتگ، آ زانت ھر وڑءَ دیم ءَ روان بیت بس مرچی کہ مئے وھد انت ما وتی زند ءَ گل ءَ بِدے اِنت چُش مہ بیت کہ مرچی ما مردمانی سوب ءَ ردیں پلینڈیانی بھر بہ بہ ایں ءُ باندا روچ مئے واستا پشومانی چہ اَبید دِگہ ھچ پشت مہ کپ اِیت۔

سنگتاں مارا گیشینگ لوٹ ایت کہ کس چہ گل ءِ راہ ءُ راھبندان بُرزتِر نہ اِنت،لَس باسک بہ بیت یاکہ گل ءِ کماش (بزان چیئرمین)۔ گل ءِ ھر زُرتگیں پیسلہ گل ءِ گھتری ءِ واست ءَ زورگ بنت گل چہ کس ءَ بلیک میل نہ بیت۔بساک ءِ زورتگیں پیسلہ ءِ سر ءَ بساک ءِ باسک پکر بکن انت کہ گل وتی راھبند ءِ سر ءَ گون کسءَ Compromise نہ کنت۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پہ زانت ءِ واستا بلوچ نودربرانی دورپندیں روانک

ٹی بی پی شونگال

پاکستان ءِ پیپلز پاٹی ءِ سرکار ءَ سال 2009 ءَ گوں مزنیں شانے ءَ بلوچستان ءِ ” بزگیانی دور کنگ ” ءِ واستا “آغاز حقوق بلوچستان ” ءِ پوڑی دیگ ءِ جار پِرینتگ اَت۔ اے پوڑی ءِ تہ ءَ جنگ آماچیں دمگ بلوچستان ءِ واستا راجداری، زرکاری، پھزداری ءُ وانگی شوربندی ھوار اِت اَنت ۔زانتکاراں اے پوڑی ریاست ءِ یک دگہ “کاونٹر انسرجنسی ” ءِ گامگیجے گوشتگ اَت، ءُ اے گپ ءِ پیشگوئی کرتگ اَت کہ اے ھم ھمے رنگیں ایندگہ پالیسیانی وڑ ءَ بے سوب بیت اِنت ۔ اے پوڑی ءَ بازیں کول ءُ کرارانی ھمراھی ءَ اے ھم کول کنگ بیتگ اَت کہ بلوچستان ءِ نودربراں گیش ءَ گیش زانت ءِ نیمگ ءَ اسکالرشپس ءِ تہ ءَ یک بھرے دیگ بیت اِنت، کہ چریشی ءِ زور ءَ دمگی ءُ ڈنی ڈیھاں جوانیں وانگ ءُ زانگ ءَ دربرت بہ کن اَنت –

اے کول ءِ سرجم بیگ ءَ دگہ سَے سال گْوست ءُ سال 2012 ءَ دودمانی رنگے ءَ اسکالرشپس ءِ جار پِرینگ بیت، ءُ پنجاب ءِ شھدربرجاھاں اے پرمان دیگ بیت کہ آ بلوچ نودربرانی واستا جاھاں ھالیگ بہ کن اَنت ۔ بنداتی ءَ اے سیٹانی کچ 600 اَت، بلے 2013 ءَ گوستگیں سروزیر بلوچستان ڈاکٹر عبدالمالک ءُ گوستگیں سروزیر پنجاب شھباز شریف ءِ گند ءُ نند ءَ گیش کنگ بیت اَنت۔ شرت ارزان اَت کہ کجام ھم بلوچ نودربر اگاں پنجاپ ءِ کجام شھدربرجاھاں تچک ءَ تچک سیٹاں بہ گِپت گڑا آیاں فیس ءَ ھوار کجام زرگری ھاسٹل ءِگرزانی ھاترءَ بنت گرگ نہ بنت ۔

اے شوربندی بلوچستان ءِ نودربراں باز شریں رنگے اَت، کہ آیانی گور ءَ بلوچستان ءَ وانگ ءِ واستا گچینی نابروبری اَنت ۔ ھزاراں نودربراں بازیں مھنت ءُ جھداں پد پنجاپ ءِ جتاجتائیں شھدربرجاھاں وت ءَ اِش سر کت، بلے گوستگیں شوربندیانی پئیم ءَ اے شوربندی ءِ زندمان ھم گونڈ اَت ۔

گوستگیں دو سالانی وھد ءَ جتائیں وڑ ءُ پیماں اے نودربرانی آسراتی ءُ مُزانی تہ ءَ کمی آرگ بیگ ءَ اِنت ۔ بنداتی ءَ ھاسٹل ءَ ابید ءِ باڑو بُتو ءَ نندگ ھلاس کنگ بیت، ءُ دراھیں نودربراں پرمان دیگ بیت ھاسٹل ءِ واستا زر جَم بہ کن اَنت ۔ بلے بھاوالدین ذکریا شھدربرجاہ ءِ واکدار یک گامے ءَ دیم ءَ شُت اَنت ءُ اے جار اش پِرینت کہ 2020 ءِ بھرزورگ ءِ سال ءَ بلوچ نودربرانی دراھیں اسکالرشپ ھلاس کنگ بنت ۔ شھدربرجاہ ءِ واکدار اشی ءِ سوب پنجاب ءُ بلوچستان سرکار ءِ نیمگ ءَ پوڑی ءِ بندش گوشگ ءَ اَنت، وھدےکہ ھردوکیں سرکار یکے دومی ءِ سر ءَ میار لَڈگ ءَ اَنت ۔

اے شھدربرجاھانی بلوچ ءُ پشتون نودربر گوستگیں دو ماھاں ھمک روچ زھرشانیانی تہ ءَ اَنت۔ زھرشانی بنداتی بُنجل اے نودربراں بھاوالدین شھدربرجاہ ءِ بنجاھی دروازگ ءِ دپ ءَ یک زھرشانی بنجلے جتگ اَت، کہ یک ماھے ءَ گیش وھد برجاہ اَت ۔ زھرشانیاں ابید ھم لوٹانی سرجم نہ بیگ ءِ سر ءَ ھمے نودربراں نِی 800 مِیل ءَ دراجیں پندی روانکے ءِ کشگ بندات کرتگ، کہ چہ ملتان ءَ لاھور ءِ نیمگ ءَ روان اِنت، کہ اشی ءِ منزل پاکستان ءِ بنجاھی شھر اسلام آباد اِنت ۔

زھرشانی کنوکیں نودربرانی بھتام اِنت کہ اسکالرشپس ءِ ھلاسی ھما زات ءِ نابروبری ءِ بھر اِنت، کہ ایشی دیمپانی آیاں پنجاب کنگ کپگ اِنت۔اے بھتاماں راستی ھم ھست پرچاکہ پنجاب شھدربرجاہ، قائد اعظم شھدربرجاہ اسلام آباد، بھاوالدین ذکریا شھدربرھاہ ملتان ءَ ھوار ایندگہ جاھاں وانوکیں بلوچ نودربراں جتا جتائیں وھداں پاکستان ءِ بنجاھی سیاسی گلانی نودربر گلانی دست ءَ لَٹ ءُ کُٹانی آماچ بیان ءُ گندگ بیگ ءَ اِنت ۔

اے اسکالرشپس ءِ دوبر بندات کنگ المی اژدری اِنت تانکہ جھان ءِ ناوانندھیں دمگانی تہ ءَ یکے بلوچستان ءِ نودربر اَنت کہ آ جوانیں زانت ءَ دربہ بر اَنت ءُ وتی دمگ ءِ دیمروی ءُ وشھالی ءِ واستا جوانیں کرداں پیلو بہ کن اَنت ۔ اے مزنیں لوٹے نہ اِنت اگاں ھُرتی ءَ بہ چارے گڑا پنجاپ ءِ فیکٹری بلوچستان ءِ مڈیانی سر ءَ روک اَنت ءُ اود ءِ دیمروی بلوچستان ءِ مڈیانی سر ءِ سواب اَنت ۔زھرشانی کنوکیں نودربر وتی بنکی ھک وانگ ءَ لوٹگ ءَ اَنت آیانی گون ءَ ناوشیں رویش کنگ مہ بیت ۔

سر بیتگیں ھالانی رد ءَ روکپتی بلوچستان ءِ دمگ پنوچ ءَ یک وانگجاھے ءَ اُستاد ءُ نودربراں ھوار دَہ کس کورونا وائرس ءِ نادراھی ءَ گپتگ اَنت –

دی بلوچستان پوسٹ

اھوالکار ءِ ردءَ مروچی پنوچ ءَ یک وانگجاھے ءَ اُستاد ءُ نودربرانی کورونا وائرس ءِ ٹیست کنگ بیتگ اَنت چریشی ءَ دَہ کسانی جان ءَ کورونا نادراھی پدر بیتگ –

کورونا وائرس ءَ گپتگیں مردم ڈبگ ءِ ھاتر ءَ نادراہ جاہ ءَ برگ بیتگ ءُ جتائیں کوٹیانی تہ ءَ کنگ بیتگ اَنت –

اھوالکار ءِ رد ءَ روکپتی بلوچستان ءَ مردمانی ناپھریزی ءَ کورونا وائرس روچ پہ روچ گیش بیان اِنت –

اھوالکار ءِ رد ءَ دمگی مردمانی گوشگ اِنت کہ اد ءَ اے جھانی نادراھی ءِ چوشیں پَٹ ءُ پول نیست اِنت پرے ھاتر ءَ اد ءَ نادراھیانی کچ گیش بیت کنت –

زانگ بہ بیت کورونا وائرس ءِ ایرموش بیگ ءَ پد کورونا وائرس پد ءَ دوبر جھان ءَ زورامند بیگ ءَ اِنت ءُ بازیں ڈیھاں کورونا ءِ گر ءُ دار ءِ ھاتر ءَ وانگ جاہ بند کنگ بیتگ اَنت –

دی بلوچستان پوسٹ

بلوچستان ءِ دمگ کیچ ءُ آواران ءِ جتائیں جاھاں پاکستانی پوج ءِ نیمگ ءَ آپریشن برجاہ اِنت – آپریشن ءِ بندات گوستگیں روچ ءَ کنگ بیتگ کہ مروچی ھم برجاہ اِنت –

دمگی مردماں ٹی بی پی ءَ گوں گوشتگ کہ گوستگیں روچ ءَ پاکستانی پوج ءَ کولواہ ءِ دمگ آشال، رودکان، مراستان ءَ ھوار کش ءُ گوری دمگاں پوجی آپریشن برجاہ کرتگ اَنت – اے وھد ءَ پوج ءَ روگ ءُ آیگی راہ ءُ دربستگ اَنت –

پوجی آپریشن ترند کنگ بیتگ ءُ مروچی ھم دومی روچ ءَ برجاہ اِنت – مروچی کولواہ ءِ زرباری بند (اورماڑہ بند) ءِ ھند بلور، سگک، مراستان، جت، بنگلہ ءُ مادگ ءَ پوج پیش گامی کنگ ءَ اِنت –

پوجی آپریشن ءَ زمینی پوج ءِ ھمراھی ءَ بمبگواریں بالگرد ھم ھوار اَنت –

دمگی مردمانی رد ءَ جتاجتائیں ھند ءُ دمگاں بمبگواریں بالگرد تیرگواری کنگ ءَ گندگ بیتگ اَنت بلے جوانیں دامگی ھالانی نہ بوگ ءِ سوب ءُ پوج ءِ نیمگ ءَ راہ ءُ درانی بند بوگ ءِ سوب ءَ دگہ جانی ءُ مالی تاوانی ھال سر نہ بوتگ اَنت –

زانگ بہ بیت گوستگیں روچاں اورماڑہ ءِ اُرش ءِ آسر ءَ پاکستانی پوج ءُ تیل ءُ گیس ءِ شوھاز کنوکیں کمپجی او جی ڈی سی ایل ءِ چاردہ کارندہ مرتگ اِت اَنت –

بیتگیں اُرش ءِ زمہ واری بلوچ سلاہ بندیں گلانی ھمسنتیں گل بلوچ راجی آجوئی سنگر “براس” ءَ منّ اِتگ اَت – گل ءِ جارکش بلوچ ھان ءَ وتی شنگ کرتگیں درشان ءِ تہ ءَ گْوشتگ اَت کہ بلوچ راجی آجوئی سنگر او جی ڈی سی ایل ءَ ھوار زورگر ءِ دراھیں لُٹ ءُ پُلی کمپنیاں بیھار دنت کہ آ دراھیں لُٹ ءُ پُلی شوربندیاں بند بہ کن اَنت ما چین ءَ ھوار سرجمیں دری زرکاراں اے کلوہ ءَ دے ئِے کہ بلوچستان ءِ مڈیانی پُلگ ءَ زوگر ءِ گوشگ ءَ وتی بگلاں چِست مہ کن اَنت اے مسام بندیاں بلوچ راج نہ منّ اِت اشاں ھچ بستار نیست –

اورماڑہ ءِ اُرش ءَ پد مکران ءِ مزن شھدگ بند کنگ بیتگ ءُ آپریشن بندات اِش کرتگ – وھدےکہ آپریشن ءِ چار ءُ گزاری ءَ برزی ءَ بالگردانی کمک ھم گون اِنت –

اورماڑہ ءِ اُرش ءَ پد بلوچستان ءِ تھی کارانی وزیر ضیاء اللہ لانگو ءَ ھم پوجی آپریشن ءِ شَور ءُ سِلاہ داتگ اَت –

زانگ بہ بیت بلوچ راجدوستانی نیمگ ءَ گوشگ بیتگ پاکستانی پوج آپریشنانی وھد ءَ دمگانی سر ءَ بیڑ بارت ءُ لس دست ءُ گوشیں مردماں نشانگ کنگ ءَ اِنت ءُ چریشی ءَ آیاں جانی ءُ مالی تاوانانی دیمپانی کنگ کپ ایت –

کولواہ ءُ کش ءُ گوری دمگاں بندات بیتگیں پوجی آپریشنانی باور ءَ گڈی ھالانی تہ ءَ تنی وھدی واکدارانی نیمگ ءَ ھچ گوشگ نہ بیتگ –

دی بلوچستان پوسٹ

روکپتی بلوچستان ءِ دمگ لاشار ءَ ناشناسیں مردمانی تیرگواری ءَ یک مردمے بیران بیتگ، بیران بیتگیں مردم ءِ پجار سھراب ء مھمود ءِ نام ءَ زانگ بیتگ –

اھوالکار ءِ رد ءَ لاشار ءِ ھند اسپکہ سرمیچ ءَ ناشناسیں مردماں سھراب ءِ سر ءَ تیرگواری کرتگ ءُ زدگ کرتگ، پد ءَ دمگ ءِ نادراہ جاہ ءَ برگ ءِ وھد ءَ سلاہ بندیں مردماں پد ءَ راہ ءِ نیم گور ءَ گاڑی اش داشتگ ءُ تیرگواری اش کرتگ ءُ سھراب اش کشتگ –

اھوالکار ءِ رد ءَ دمگی مردمانی گوشگ اِنت کہ سپاہ مردماں سلاہ بند کنگ ءُ چرے سوب ءَ ناوشیں وئیل درپیش بیگ ءَ اَنت –

دمگی مردمانی گوشگ اِنت کہ چُشیں وئیل بلوچستان ءِ جتائیں ھند ءُ دمگاں بیگ ءَ اَنت کہ اشانی تہ ءَ سپاہ ھما مردماں سلاہ بند کنگ ءَ اِنت کہ آ پہ ایران ءِ چیریں ادارھانی واستا کار کنگ ءَ اَنت –

دمگی مردمانی گوشگ اِنت کہ مروک ءُ جنوک ھردوک بلوچ وت ماں وت اَنت ءُ ھردوکیں نیمگاں تاوان بلوچاں بیگ ءَ اِنت –

دی بلوچستان پوسٹ

بلوچ یکجھتی کمیٹی کراچی ءِ چیردستی ءَ بلوچ شائر، گشندہ حنیف چمروک ءِ کوش ءِ بگیری ءَ کراچی پریس کلب ءِ دیم ءَ زھرشانی کرتگ –

زھرشانی ءَ سیاسی ءُ چاگردی باسکاں ھوار نودربر ءُ دگہ تکاں بندوکیں مردماں مزنیں کساسے ءَ بھر زرتگ –

زھرشانی ءَ زھرشانی کنوکاں تران کنان ءَ گوشتگ کہ حنیف چمروک شائر ءُ گشندھے ءَ ھوار چاگردی ءُ انسانی ھکانی پانکجن طیبہ بلوچ ءِ کماش بوتگ، طیبہ بلوچ بلوچ ہیومن رائٹس ءِ گوستگیں کسان کمک سرکماش ھم بوتگ ءُ انوں ھم انسانی ھکانی لگتمالی کنوکانی بگیری ءَ جھد ءَ اِنت – بلے بدبھتی ءَ چہ طیبہ بلوچ ءِ کماش ءِ بے رھمیں کوش ءِ بگیری ءَ زمہ واریں ادارھانی بے تواری ناکہ تھنا اجکہ انت بلکیں بلوچستان ءِ تہ ءَ اے ھمکروچی ئیں کشت ءُ کوشانی بلاھیں پدرناکی ءِ کہ مردم چوشیں وئیلاں سرپد بنت ءُ وت ءَ چہ اے زمہ واری شودگ لوٹ انت –

تران کنوکاں گْوشت کہ حنیف چمروک ءِ کوش ناکہ تھنا یک انسانے ءِ کوش انت بلکیں یک شائر ءُ گشندھے ءِ کوش انت، بلوچ چاگردے تہ ءَ زالبولیں بلوچ ایکٹوسٹسانی ھاتر ءَ تُرس ءِ جاور ودینگ ءَ ھنچوش کہ شاہینہ کوش دنیگت ءَ یک دیم ءَ اِنت ھیات ءِ ھون دنیگت ءَ ھما دگ ءِ سر ءَ ھُشک نہ بوتگ انت، برمش دنیگت ءَ وتی مات ءِ کشندھانی سزا ءِ راہ ءَ چارگ ءَ انت، کلثوم ھون ءِ انگت ءَ ھاک ءِ تھتگ ءِ سرون ءَ انت، نون طییبہ ھم اوشتاتگ وتی پت ءِ کوش ءِ بگیری ءَ ھک لوٹگ ءَ اِنت –
آیاں گْوشت کہ بلوچ چاگرد ءِ تہ ءَ اے کُشت ءُ کوشاں تُرس ءِ ودی کرتگ – ھمے ترس ءَ بلوچ چاگرد ءِ تہ زند گوازینوکیں مھلوک ترسے ءِ تہ ءَ دور داتگ مھلوک ھمے ترسی جاوراں بھر ءُ بانگ کرتگ اَنت ءُ ھمے ترس ءَ یک مھکمیں وڑیں زوردست کمک دیگ بوگ ءَ انت –

گڈسر ءَ تران کنوکاں گوشت کہ ابید ءِ ارزی گُرزی ءَ دزگیری بگر تاں ابید ءِ آمیدگسی پرمان ءخ کشت ءُ کوشاں بلوچستان ءِ ھمک ٹک تکانسر کرتگ اَنت، پاکستان ءِ برزی ادارہ ناکہ تھنا حنیف چمروک ءِ کوش ءَ ھواریں کتکاراں سزا بہ دنت بلکیں پہ باندات ءِ ھاتر ءَ اے وڑیں وئیلانی گر ءُ دار ءَ گامگیج بزوریت-

ھمے وڑ ءَ جرمنی ءَ بلوچ نیشنل مومنٹ ءِ چیردستی ءَ حنیف چمروک ءِ کوش ءُ بلوچ نسل کُشی ءِ بگیری ءَ زھرشانی کنگ بیتگ –

بلوچ نیشنل مومنٹ ءِ شنگ بیتگیں درشان ءِ گوشگ بیتگ کہ بلوچستان ءَ دو دھکاں بلوچستان ءَ برجاھیں پوجی آپریشن ءُ انسانی ھکانی لگتمالیانی بگیری ءَ میان اُستمانی سرپدی ءِ پرکاری ءَ جرمنی ءَ زھرشانی کرتگ –

زھرشانی کنوکانی دست ءَ بینر ءُ پلے کارڈ بیتگ اَنت کہ آیانی سر ءَ پاکستان ءِ زُلمانی داستان نبشتگ بیتگ اَنت -زھرشانی کنوکاں پاکستان ءِ بگیری ءَ اوگام جتگ –

جارکش ءَ دیمتر ءَ وتی درشان ءَ گوشتگ کہ پاکستان ءِ دست ءَ بلوچ نسل کُشی ءُ انسانی ھکانی پادمالی ءُ انسانی ھکانی نامی ئیں باسک طیبہ بلوچ ءِ پِت حنیف چمروک ریاست ءِ دست ءَ کوش ءِ بگیری ءَ جرمنی ءَ زھرشانی کرتگ –

بلوچ نیشنل مومنٹ ءَ گوشت کہ حنیف چمروک ءَ ھوار سرجمیں بلوچانی کوش ءَ بلوچ نیشنل مومنٹ دنیا ءِ مزن واکداراں سرپدی دنت ءُ مروچی بیتگیں زھرشانی ءَ بی این ایم ءِ باسکاں ھوار دمگی مھلوک ءَ ھم بھر زرتگ ءُ بلوچستان ءَ بیوکیں زوراکی پدر کرتگ اَنت –

جارکش ءَ گوشت کہ حنیف چمروک ءِ وڑیں ھزاراں بلوچانی کشندہ پاکستان ءِ بگیری ءُ راجی آجوئی ءِ ھاتر ءَ بلوچ نیشنل مومنٹ میان اُستمانی سرپدی ءَ برجاہ داریت – ما انسانی ھکانی میان اُستمانی ادارھاں اے ھال دیگ لوٹ ایں کہ شمئے بے تواری ءَ بلوچانی ھون گیشتر ریچگ ءَ اَنت ءُ اے بے تواری ءِ سوب ءَ میان اُستمانی ادارہ زیردستیں بلوچانی ھونانی وامداری لڈگ بیتگ اِنت –

آسٹریلیا ءِ تہ ءَ بیوکیں گوازی اوپن گالف ٹورنامنٹ دارگ بوتگ، اے اولی رند انت کہ دومی جھانی جنگ ءَ پد اوپن گالف مراگش دارگ بوتگ –

دی بلوچستان پوسٹ

دری رسانکانی رِد ءَ جھانی وبا کرونا وائرس ءِ پژدر ءَ آسٹریلین اوپن گولف ٹورنامنٹ دومی جنگ عظیم ءَ پد اولی رند انت کہ دارگ بوتگ –

ٹورنامنٹ واکدارانی رِد ءَ آسٹریلیا ءِ ت ءَ بندی ءِ سوب ءَ گولف آسٹریلیا ءُ پی جے اے آسٹریلیا پیش ءَ وتی درسیں ایونٹ آنی دارگے جار پرینتگ –

کرونا وائرس ءِ نادراھائی پژدر ءَ نوں اسٹریلیا ءِ زمانگی گولف ٹورنامنٹ آسٹریلین اوپن ھم دارگ بوتگ –

ٹورنامنٹ ءِ نوکیں رمس جار ھم جنگ بوتگ کہ اے ایونٹ دیم ءِ سال جنوری 18 ءَ بگر تاں 31 جنوری ءَ برجاہ بنت – ٹورنامنٹ ءِ بندات میلبورن کنگسٹن ہیلتھ گولف کلب نیمگ ءَ بوھگی بوتگ –

اے اوپن گولف ءِ یکسدءُ پنچمی مراگش بوتگ، اے مراگش 1905 ءِ سال ءَ بندات کنگ بوتگ –

اے تاکبند ءِ تہ ءَ نمیرانیں نثار سباہ ءِ شئر، آزمانک ءُ نبشتانکاں ھوار آئی سر ءَ نبشتہ بیتگیں نبشتانک ھوار اَنت۔

دی بلوچستان پوسٹ

سباہ ءِ گرنچ ھلیل بلوچ ءِ نز آورتگ ءُ دی بلوچستان پوسٹ پبلیکشنز ءِ چیر دستی ءَ چاپ ءُ شنگ بیتگ۔

نثار سباہ ءِ گونڈیں پجار ءِ

شھید نثار سباہ ۱۷ مئی ۱۹۹۰ ءَ حاجی عبدالواحد سیاپاد ءِ لوگ ءَ ھاران ءِ دمگ سرگُردان ءَ ودی بیتگ اَت۔ گوں وتی ماتی زبان ءَ مھر ءِ سوب ءَ آ ھاران ءَ نصیر کُبدانی لبزانکی گل ءِ باسک جوڑ بیتگ اَت ءُ پدا پہ وتی بزگ ءُ لگت مالیں راج ءَ جھد کنگ ءِ ھاتر ءَ بلوچ وانندہ گل آزاد ءَ ھوار بوت۔

چہ بی ایس او آزاد ءَ پارغ بوھگ ءَ پد نثار سباہ بی این ایم ءَ گوں ھمگرنچ بوت ءُ دوھزار پانزدہ ءَ رخشان دمگ ءِ ڈپٹی آرگنائزر گچین کنگ بوت۔

شھید نثار سباہ ءِ سرءَ پاکستانی پوج ءِ نیمگ ءَ دروگیں بھتام جنگ بوت، ناشرکاری ءِ کیس ھم اڈ کنگ بوت اَنت ءُ دزگیر کنگ بوت، بلے آمید گِس ءَ اے گپ ھچ وڑ ءَ ثابت کنگ نہ بوت اَنت ءُ آ چہ بندیگ جاہ ءَ آجو بوت۔

نمیرانیں سباہ دشتیاری ءُ نمیرانیں چیرمین گلام مھمد بلوچ نثار سباہ ءِ آئیڈیل بوتگ اَنت ءُ ھمایانی پگر ءُ لیکہ ءَ دیما بران نمیرانیں نثار سباہ ءَ سیاسی ءُ ادبی جھد دیما بران کُتگ اَنت دانکہ یک روچے پاکستانی پوج ءَ مستونگ ءِ دمگ ءَ نثار سباہ ءَ دزگیر کُت ءُ شھید کُت۔

اے تاکبند ھلیل بلوچ ءِ نیمگ ءَ چہ بلوچ راجی جھد کار نمیرانیں نثار سباہ ءِ جھد ءُ آئی کرد ءَ پہ یک ستاشانی اِنت۔