TBP Balochi

دی بلوچستان پوست

بلوچستان ءِ دمگ پنجگور ءُ شال ءَ دگ ءِ وئیلاں دہ مردم ٹپی، مسافر کشیں کوچ ءَ آس لگگ ءِ سوب ءَ پنچ مردم بیران ءُ دو مردم ٹپی بوتگ اَنت –

ٹی بی پی پتر ءَ سربوتگیں ھالانی رِد ءَ بلوچستان ءِ دمگ پنجگور ءَ سی پیک دگ ءِ سر ءَ دو گاڑیانی ڈیک ورگے سوب ءَ سَے زالبولاں ھوار دہ مردم ٹپی بوتگ اَنت –

وئیل چتکان ءِ دمگ ءَ دیم ءَ اتکگ کہ گوارگو ءِ دمگ ءَ لوکل کوچ ءُ ایرانی پک اپ گاڑی ءَ ڈیک وارتگ –

ٹپی بوتگیں مردم ہیڈکوارٹر ھسپتال پنجگور ءَ برگ بوتگ انت –

ھمے وڑ شال ءِ نزیک ءَ تیرا میل ءَ ھم گاڑی وئیل ءِ آماچ بوتگ کہ وئیلے سوب ءَ یک مردمے بیران بوتگ –

دومی نیمگ ءَ شال داں کراچی ءَ رؤکیں مساپر بریں کوچ ءَ آس لگ اِتگ –

آس لگگے سوب ءَ پنچ مساپر ستکگ ءُ بیران بوتگ وھدیکے دو مردم سک زدگ بوتگ اَنت –
مساپر کوچ ءَ ھما وھد ءَ آس لگ اِتگ کہ شال داں کراچی ءَ رؤگ ءَ بوتگ کہ کرواڑو ءِ دمگ ءَ کوچ ءَ آس لگ اِتگ –

دومی نیمگ ءَ بلوچستان ءِ دمگ اورماڑہ ءَ ایف ڈبلیو او ءِ گاڑی وئیلے آماچ بوتگ سَے کارمند زدگ بوتگ اَنت –
وئیل بسول ءِ دمگ ءَ دیم ءَ اتکگ وئیل ءَ ایف ڈبلیو او نائیک زاھد، لاس نائیک غلام ءُ سپاھیگ عثمان زدگ بوتگ انت –
زدگ بوتگیں مردم ھما دمان ءَ دمگی نادراھجاہ ءَ برگ بوتگ انت –

نبشتانک: تو واتر کتگ میتگ ءَ

نبشتہ کار۔ نوشین بلوچ

دی بلوچستان پوسٹ

اِمداد پل من سئی نہ اِتاں
اے درائیں روچ ءَ من کار ءُ روزگار ءَ اد ءَ ءُ اود ءَ تتکاں۔ کار ءِ وھد ھلاس بوت دیم پہ وتی کُڈّک ءَ اتکاں جانے ششت ٹینٹ بوتاں گوانکو زرت اِد ءَ اود ءَ گپ ءُ ھال اھوال کت گوں سنگتاں مسکرا ءُ مزاک کُت سے چار ساھت ءَ رند شام کُت پَد ءَ سر ماں نَرمیں بَالشت ءِ سر ءَ ایر کُت پہ ایمنی وپتاں واب کپتاں۔۔۔

سُھب ءِ ادار شش بج بوت چہ واب ءَ پاد اتکاں گوانکو چِست کت گڑا وٹسپ پچ کُت دیوان ءِ کلوھاں چار آں درستاں چہ پیش من انچو پُترتاں دیوانے ءَ چاران چاران ءَ تیر سپتگیں لاشے دیست مُردنی من پجا نیاؤرت کے اِنت من ھیران بوتاں پد ءَ جلدی در اتکاں کلوہ چاراں کت اَنت۔۔ چاراں یک اکسے ءِ سر ءَ شھید ارپان نبشتہ اَت۔۔ من چہ ھستاں نابود بوتاں۔۔ من ترا امداد جان پجا چی ءَ نیاؤرت؟؟؟ چے ءَ کہ تو کسانی ءَ در کپتگ ءُ شُتگ ات ئے۔۔

ارپان جان منی کُلیں راج زانت تئی منزل دو بوتگ اَنت
اولی تئی زمین ءِ آجو کنگ ءُ دومی تئی شھادت۔۔ امداد جان تو وتی منزل ءَ سوبین بوت ئے ءُ منی پجّا نیارگ ءِ سوب تئی کسانی ءِ درکپگ ءُ چہ میتگ ءَ روگ بیتگ اَت۔۔تو آ وھد ءَ در کپتگ ئے تئی بَروتُک نہ سَبز اِتگ اَنت۔ تو کوہ ءُ تلارانی ءُ سنگرانی تہ ءَ رستگ ءُ مزن بوتگ ئے۔داں ھمے سنگرانی تہ ءَ نمیران بوت ئے۔ زیک تئی شھادت ءَ رَند تئی کُلیں راج ءَ ترا زانتگ اَت تو چی یے بوتگ ئے تئی لوٹ چی بوتگ منی گُشگ لازم نہ اِنت ھمبلو۔۔۔
من ھر چُنت تئی ستا ءَ بہ کناں گش ئے کَم اَنت !!!! چے ءَ کہ تو یک سرجمیں سنگتے اِت ئے تئی پکر ءُ سوچ سک باز اَت تو دُژمن ءِ دل ءَ آس روک کُتگ اَت۔ دُژمن بے تاھیر اَت۔
امداد پل۔۔۔ من ھبکہ بوت آں منی چماں تھاری ءَ مانشانت۔۔ ناں چماں تئی بُت دیست نَاں دست سُر اِت اَنت ناں کہ پاد۔۔۔ چو مِسل ء مُردگ ءَ من گش ئے مُرتاں ھِچّیگی نہ بوتاں۔۔۔ سک دردیگ بوتاں ءُ من سک گریت۔۔۔۔
پد ءَ منی چم بْرمشُل ءِ بُت ءَ کپت اَنت نی گڑا اے تُنیگیں چماں سیر کُت پہ ارس ءِ ریچگ ءَ پد ءَ امداد تئی اکس چاراں کُت اَنت۔۔ من چاراں امداد تو واب ئے ھمبلو۔۔
من گنوک اِتاں من نہ زانت چے بہ کناں ھچ ءِ سُد ءَ نہ اِتاں۔۔ پد ءَ امداد تئی ھمے گْونڈکیں تواربند منی گوشاں کپت۔۔ من چاراں امداد تو گشگ ءَ ئے۔
“ھو من ءَ زھیراں زرتگ اَت من شُتاں”
امداد پل تو چو زوت مہ شُتین ئے کُرباناں۔
پد ءَ امداد تئی دومی توار منی گوشاں کپت تو گُشت۔۔۔اے گرماگ ءَ من وت ءَ بچّاریناں دیم ءِ گرماگ ءَ چون کناں؟
دل ءَ پد ءَ پیسکگے جت چم پد ءَ نمبین بوت اَنت ھمبلو۔
پد ءَ نورھان ءِ توار منی گوشاں کپت سک پدرد بوتاں
پد ءَ تئی توپک ءِ اکس دیست اَنت کہ توپک ءِ کر ءَ دو جوڑ جوڑہ نوکیں گُد ایر اَت۔ یک جوڑھے ءِ سر ءَ ناپاکیں شکست وارتگیں لگوریں لشکرے ءِ پاد ایر اِت اَنت۔۔ من باز بدّوا دات من گشت تئی پاداں بادے گرات
پد ءَ من ھرچ اسٹیٹس ءَ چاراں وٹساپ ءِ تئی ءُ برمشل ءِ اکس اِنت۔۔ دراھیں سنگت پہ شما گمیگ ءُ تلوسگ ءَ اِت اَنت۔۔ دراھیں میڈیا شمارا سُھریں دْروت ندر کنگ ءَ اِت اَنت۔۔ منی دست ءُ دل ءَ نہ گپت تئی اکسے ایر بکن آں گوں۔۔
ءُ پد ءَ من ءَ کار ءِ سر ءَ درائیں ھمراھاں یک یک ءَ جُست کُت ھمے یکیں ھبر۔۔۔ تو دوشی دیراں وپتگ ئے تئی چم سُھر اَنت واب ءِ وڑ ءَ اَنت من درستانی پسّو دات ھو دوشی یار من دیراں وپتگاں دراھیں روچ من مُلور مُلور اِتاں بلے ھزار آپرین منی برات گونگیں ھمبلُک ءَ بات۔۔۔ من ءَ باز تسلّہ ئِے دات من ءَ باز سر ءُ سوج ئِے کُت گش اِیت ھچ گمیگ مہ بہ ئے امداد مئے شمئے برات بوتگ۔۔ امداد وتی منزل ءَ سر بوتگ۔۔وتی چکّاس ءَ سوبمند بوتگ۔۔ نوں مئے شمئے باریگ اِنت۔۔ دلاں ڈڈّ کن اِت۔۔ گڑا روچ چو سال ءِ وڑ ءَ میزان میزان ءَ گوزگ ءَ اَت۔۔۔ کار ءِ وھد ھلاس بوت۔ گڑا وھدے من واتر کُڈّک ءَ اتکاں چاراں اے کُڈّک منی ورگ ءَ پیداک اِنت ھر نیمگ ءَ چاراں امداد تو ئے ھرچ چیز تئی رنگ ءَ جنگ ءَ اِنت۔۔
پد ءَ ھما اکس من چار اِت تو ءُ برمش گُلائیش ئے انچو سما بوت شما من ءَ چارگ ءَ اِت ءُ منی سر ءَ کندگ ءَ اِت پد ءَ من ھم بچکندگے جَت گُش ئے دل وش بوت۔
امداد پل منی دوا ھمیش اِنت بس ھرچ مات ءُ پِت چو تئی کبلھیں مات امّا سَپیہ ءُ بابا شھید گُلام مُستپا ءَ بہ بات اَنت۔۔
امداد من ءَ انگت تئی جُدائی باور کنگ ءَ نہ اِنت چے ءَ کہ ترا دہ سال اِنت گندگ نہ بوتگ ئے ھلک ءُ میتگ ءَ نیتکگ ئے شکست وارتگیں لشکر ھر روچ تئی لوگ ءَ اتکگ تئی جُست ئِے کتگ تئی کبلھیں پِت ئِے ھم شھید کُت۔ بلے تو انگت میتگ ءَ دراہ نہ بوت ئے بابا ءِ شھید کنگ ءَ رند تو گیش ءَ چَہ گیش مھکم بوت ئے۔ نیتک ئے دشمن ءِ دیم ءَ سر جَھل نہ کُت۔ داں گُڈی ساہ ءَ شکستیں دشمن ءَ گوں جنگ دات۔۔ داں وتی نُگرھیں جان پہ وتن ندر کُت۔۔۔
سلام اِنت ترا ھمبلو تو دلانی تہ ءَ مُدام زندگ ئے ءُ مئے ھمراہ ئے شما کُل شھید کُل شھیداں سلام اِنت۔
من پمشکہ تئی جدائی ءَ باور نہ کن آں چے ءَ کہ تئی توار تئی رنگ ءُ بالاد منی دیدوکانی نگھبان اِنت۔ اے وھد ءَ تو دراھیں روچ منی دیم ءَ ئے منی نز ءَ تو وتی چکّاس ءَ سوبین بیتگ ئے وتن آجو کُتگ ءُ میتگ ءَ واتر اتکگ ئے ءُ امّا سپیہ ءَ ترا سالونک کُتگ کوشکلات ءِ دْرچک دار ءُ دمک پہ شانے نازینک جنگ ءَ اَنت۔۔ میتگ ءِ دراھیں کاڑانی دپ ءَ تئی نام اِنت۔۔ تو زندگ ئے تئی پگر گون اِنت سنگتاں۔ تو نمیران ئے امداد پُل تو نمیران ئے تو نمیران ئے۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

بہاؤالدین زکریا شھدربرجاہ ملتان ءِ بلوچ نودربرانی وتی ھکانی لوٹگ ءِ لانگ مارچ گوستگیں روچ ءَ پنجاپ ءِ مزن شھر لاھور ءَ سربوتگ – آھاں لاھور ءِ اُستانی راجمان پتر ءِ دیم ءَ ننداک جتگ ءُ نشتگ انت –

مروچی دومی روچ ءَ ھم پنجاپ راجمان پتر ءِ دیم ءَ بلوچ نودربرانی زھرشانی برجاہ بوتگ –

بلوچ نودربر پنجاپ ءِ شھدربرجاہ ءِ تہ ءَ بلوچستان ءَ گوں ھمگرنچیں نودربرانی مُدت ءِ ھلاس کنگے بگیری ءَ زھرشانی کنگ ءَ انت –

دوازدہ روچ ءَ برجاھیں اے روانک ءَ نودربرانی پاد آبلہ بوتگ ءُ آبلہ ترکیتگ ءُ نودربر ٹپی انت –

نودربرانی گوشگ انت کہ اگاں سرکار ءَ مئے لوٹ نہ منت آں گڑا ما دیم پہ بنجاھی واکدار ءِ شھر بزاں اسلام آباد روئیں –

پنجاپ ءِ راجمان پتر ءِ دیم ءَ مروچی دومی روچ ءَ برجاھیں بلوچ نودربرانی زھرشانی ءَ دگہ ورنا گلاں ھوار دیمروئی لوٹوکیں باسکاں بھر زورتگ ءُ آھانی گون ءَ ھمپتی درزشان کتگ –

دی بلوچستان پوسٹ

بلوچستان ءِ دو جتا جتائیں ھنداں تیرگواری وئیلاں سَے مردم بیران ءُ یکے زدگ بیتگ –

سر بیتگیں ھالانی رد ءَ بولان ءِ کوھی دمگ اودباش ءَ سلاہ بندیں مردماں تیرگواری کرتگ ءُ ورنایے کُشتگ-

مَچ لیویز ءِ رد ءَ بولان ءِ کوھی دمگ ادوباش ءَ سلاہ بندیں مردماں تیرگواری کرتگ ءُ نسیب اللہ ء میر ھاجی سمالانی نامیں ورنایے کُشتگ ءُ تتکگ اَنت – کوش ءِ وئیل کوھنیں دشمنی ءِ گوشگ بیگ ءَ اِنت چار ءُ ٹپاس ءَ پد جون کھول ءِ گور ءَ رسینگ بیتگ –

واکدارانی گوشگ اِنت گیشیں پَٹ ءُ پول ءَ مَچ ءِ لیویز کنگ ءَ اِنت –

ھمے وڑ ءَ مستونگ ءِ دمگ پیرکانو ءَ ناشناسیں مردمانی تیرگواری ءَ چہ دو مردم امداد شاہ ءُ نورا بیران بیتگ اَنت ءُ عرفان زدگ بیتگ –

وئیلانی سوب تنی وھدی زانگ نہ بیتگ اَنت – گیشیں پَٹ ءُ پول پولیس کنگ ءَ اِنت –

زانگ بہ بیت ھمے وڑ ءَ گوستگیں روچاں کیچ ءِ دمگ نزر آباد ءَ زمینی جیڑھے ءِ سر ءَ یک زالبولے بیران بیتگ اَت ءُ دو مردم زدگ بیتگ اِت اَنت –

دی بلوچستان پوسٹ

گوستگیں روچ ءَ بنداتی ھالانی تہ ءَ گوشگ بیتگ اَت کہ گوادر ءَ پاکستانی پوج ءُ چیریں ادارھانی کارمنداں ٹی ٹی سی کالونی ءَ شش نودربر آوار جتگ ءُ برتگ چِد ءُ پد سرجمیں ھالانی رد ءَ گِپتگیں مردم سَے بیتگ اَنت –

گیشیں ھالانی رد ءَ گوستگیں روچ ءَ پاکستانی پوج ءُ چیریں ادارھانی کارمنداں ٹی ٹی سی کالونی ءَ بیڑ برتگ ءُ اود ءَ سَے مردم آوار جتگ ءُ برتگ اَت –

آوات جنگ بیتگیں کسان سالیں نودربر بیتگ اَنت ءُ دیوالانی سر ءَ بلوچستان ءِ آجوئی لوٹگ ءِ ھک ءَ نبشتگ اِش کرتگ ھمے بھتام ءَ گرگ ءُ برگ بیتگ اَنت –

آوار جنگ بیتگیں نودربرانی پجار سعید، سوید ءُ سمیر ءِ نام ءَ زانگ بیتگ اَنت ءُ مروچی سھب ءِ ساھت ھپت ءَ سعید ءُ سوید یل بیتگ ءُ وتی لوگاں سر بیتگ اَنت ءُ اشانی ھمراھی ءَ گپتگیں سمیر یل کنگ نہ بیتگ –

آزمانک: کوٹھی نمبر 22 ءَ لھتیں پاھو داتگیں یات ءُ گیر

آزمانکار: شکیل بلوچ یو او بی شعبہ انگلش

دی بلوچستان پوسٹ

منی یاتانی دریگ، مھرانی چراگ، کشتگیں پولانی وشبو، وابانی پاھو، کپوتانی کوکو، جنگل ءِ زیبائی، مھرانی داد ، ھیالانی واب کوٹھی نمبر 22 ءِ باتن ءَ کمبر اَنت۔ وھدے کہ شپ بنیادم ءَ گوزگ ءَ چیکو دنتءُ واب گیجی اِیت، شپ ءِ تہاری گون وت ءَ ھبر کنت، بچکند اَیت ءُ ٹھک دنت ءُ پدا بے توار بیت ءُ جیڑایت ءُ من کوٹھی نمبر 22 ءِ کسانیں در ءِ دپءَ ٹیبل ءِ دیم ءَ نندہ جاہ ءِ سرا کتاب ءِ تہ گار ءُ بیگواہ ءُ بلے سگریٹ منی ھمراہ ءُ ھمکوپگ، ٹیبل ءِ سرا چراگ گمیراں ات۔ واھگیں مھر اگہگیں چمانی تہ گگلیں ارسان گون دریگ ءَ پاھو داتگ اَنت ءُ بس مھر ءِ تاجگیں یات ءُ آزگیں ٹپ واد کتگ اَنتءُ زمیں ءِ ستکگیں باتن ءَ کُل اَنت۔ ھر وھد ءَ کہ تہنا بان گون وابان ھبر کن آں، وت ءَ چہ وت گسر بان، وتئی شوھاز ءَ در کپ آں دور سفر کن آں ، وت ءَ شوھاز کت نہ کن آں، دل پروش بان مھر ءِ مھرانی گوزاگ ءَ واب کپ ءُ مھر منی دیم ءِ میدان سمار اَیت ءُچہ آئیءِ ارسان آئی ءِ جیگ میجل بیت ءُ من چمان پچ کن آں، آ بچکند اَیتءُ وتئی چمانی ارسان ایر برت۔ آئی ءِ چمانی اندر ءِ زر ءِ چول پروشان ءُ منی چمانی کٹ ءَ کپان اَنت۔ کوٹھی نمبر 22 ھما کوٹھی اِنت کہ چاریں نیمگ ءَ بلوچ شاعر ءُ نبشتکارانی اکس لیچتگ اَنت ءُ من انچو کہ سھب ءَ واب ءَ بست کن آں دْرست من ءَ چارگ ءُ بچکندگ ءَاَنت کہ دوشی مشاعر ءَ بوتگ بلے تو۔۔۔

برے برے من کہ کوٹھیءِ چراگ ءَ بند کن آں چمان نز کن آں مرگ ءِ کر ءُ گورا وت ءَ را شوھاز کن آں دان کہ اے آر داد پروپسر سیکا ءِ نام ءَ نبشتہ کتگیں آزمانک ءَ وانگ ءَ اَنت ءُ ایدگہ دْرستان بے تواری ءَ امباز کتگ اَنت ۔

شپ تامر اَت، بے تُک ءُ تواری ءَ آزمان ءُ زمین امباز کتگ اَت، منی کوٹھی ءِ چراگ ھم مرت ءُ من ٹیبل ءِ دیم ءَ نند جاہ ءِ سرا نشتگ ات آں، سگریٹ ئے بن دات ءُ گوستگیں روچ ءَ کہ دشت آس گپتگیں جنگل ءَ سفر کنگ ءَ ات آں لھتیں کپوتانی چنکی کپتگ اِت ھما چنکیانی ءُ کپوتانی آس کپتگیں گدانانی بابت ءَ جیڑگ ءَ ات آں کہ چیزے نبشتہ بکن آں ، کوٹھی نمبر 22 من، جیڑگ، ابیتکی،کتاب ءُ سگریٹ۔۔۔

شپ وتئ سئمی پاسان جنزان ات کہ انگہ کوٹھی ءِ در یک ءَ سک ءَ جت ءُ من چہ ھیالانی وابان جہسریت آں، بلے آ دری بولی ءَ ھبر کنگ ءَ ات ،من در پچ کت ءُ آئی ءَ منی دست کپت ءُ گون سیاھیں پچ ءَ منی چم بست اَنت ءُ منی کمرہ پیش پیش اِش کت ءُ من ھمے درائینت کہ منی،منی،منی کوٹھی ءِ در ءَ الم بند بکن اِت۔

گون ھمے گپ ءَ منی سرا ءَ مات ءُ گھاری زاہ ءُ بد ءِ بھارگ بوت، ءُ یک ساھت ئے رند من ءَ یک تنک ءُ تھاریں کمرہ ءِ تہ تیلانک دات ءُ دگہ بولی ءَ گشت اش بہ سڈ ھمدا ۔ ءُ کمرہ انچو تنک ءُ تھار ات چم پہ چم ءَ گندگ نہ بوت، منا وتی کوٹھی ءِ دیم ءِ بلوچی شاعر ءُ نبشتکارانی اکس سک باز گیر پیداک ات انت۔ لھتیں ساھت ءَ پد یکے اتکءُ منی چمانی پچ دور کت ءُ من ءَ گشت ءِ تو پرچا نبشتہ کن ئے؟

من بچکند اِت ءُ گشت نبشتہ کنگ گناھے ءُ بس دشت ءِ آس کپتگیں جنگل، کوپاتانی کوکو، زر ءِ چول، ءُ وتی مات زمین بلوچستان ءِ بابت ءَ دو ءُ چار دانکہ کماتگ گڈان گناہ ئے ؟

من پدا بچکند اِت۔

آئی ءَ پدا یک بِرے زاہ ءُ بد ءِ بھارگ ءَ کُت۔
گڈاں۔۔۔ پدا منی جان ءُ آئی ءِ دست ءِ چیتر بزان ۔۔۔
آ جنگ ءَ تست ءُ کپت ءُ من ءَ جست ءِ کت زمین ءِ بابت نبشتہ کن ئے یا نہ؟

من بچکند ءُ ھچ پسو نہ دات۔

آ در اتک ءُ شت، دگہ یکے ات من ءَ چو کستریں بْرات ءَ جست ئےکت، چون ئے، ترا ظالم ءَ سک جتگ۔
ءُ من، من گوں وتی کوٹھی ءِ ابیتکی ءَ ھبر کنگ ءَ ات آں، انچو سما بوھگ ءَ ات کوٹھی نمبر 22 پُرسیگ اِنت ءُ ارس گوارگ ءَ اِنت۔

من آئی ءَ را ھچ پسو نہ دات۔

آئی ءَ پدا منا جست کت تئی واستہ گلاسے آپ بیار آں؟
من پسو دات منی تن پہ آپ ءَ نہ پروش اِیت، اگان منی تن ءَ پروشگ لوٹ ءِ گڈاں، منی کتاب، اروح موتک، میرا داگستان، واہے وتن ھشکیں دار، ءُ داد ءِ گدار سیاھگ واتر کنت کہ منی ھواری ءَ آوار جتگ اَنت منا بد اِش بگند ے ھوشام ءَ کتاب ایر بر انَت۔

آ برانز کپت ءُ گشت تئی دل ءَ اے تربت ءِ فدا چوک ءِ سرا بشیر ءِ کتاب ءِ دکان یا بلوچستان مزن شاہ دربر جاہ ، کتاب نھادی اِنت کہ کتاب بیار آں۔

گڈاں جست مکن کہ چہ بیار آں۔

من ءَ بلوچستان ءِ دلبند ءِ دشت ءِ انگر کپتگیں آس ءُ کپوتانی کوکو، ءُ کوٹھی نمبر 22 سک گیر پیداک ات دل ءَ باز ھب ءُ واھگ کتگ ات کہ چیزے نبشتہ بکن آں بلے منی قلم ءُ کاگد ٹیبلءِ سرا بہ ھیال اِت اَنت۔

برےبرے دلءَ اومان کت اگان مرچی سیاھیں کپے چاہءُ یک سگریٹ ئے بوتیں، روتاپ ءَ نشتیں، ءُ ھیالانی واب ءَ سفر کنان، کوٹھی نمبر 22 ٹیبل ءِ دیم من ،چراگ کتاب ءُ سگریٹ دگہ لزتے اِت۔
بلے۔۔۔

او ! ھان ،مزن شاہ دربر جاہ ءِ منی کلاس ءِ کش ءَ کسانیں در دپ ءَ نندگ ءُ میرا داگستان کتاب ءِ وانگ ءُ ھم ھیالیں سنگتانی دیوان ءُ نند جاہ سک گیر کاینت اگان تھاریں کوٹھی ءَ موہ دات الم اے تاجگیں یاتانی بابت ءَ گدارے نویس آں۔

بلے ۔۔۔

باندا اے تھاریں کوٹھی ءِ سفرءَ را یک کبلیں سالے سرجم بوھگ ءَ ات ءُ من جیڈگ ءَ ات باریں منی اکس ماما ءِ کیمپ ءَ گار ءُ بیگواہیں سنگتانی کش ءَ است یا نہ؟
باریں باندا پریس کلب ءِ دیم ءَ چو سمی،سیما ءُ مھلب ءِ وڑا منی اکس ءَ کسے دست کنت اوشتی کہ بالاچ کو بازیاب کرو، اگر اس نے جرم کیا ہو اس کو اپنے کورٹ میں پیش کرو۔

بلے پدا من ءَ گیر اَتک کہ مھکان ءُ مھناز ءِ گشان ءِ لمب ءَ لھتیں یات ءُ گیر الم ڈک داتگ بگندے باندا منی اکس ءِ سرا ارس بہ گوار اَنت۔ اے سفر جنزان ات، دیریں مدتے ءَ رند یکے اتک ءُ پُرسِت کہ تئی گڈی واھگ چی انت؟

من،یک ساھتے ءَ پد پسو دات، ھمے آوار جتگیں کتاباں آجو بکن ءُ من ءَ یک برے کوٹھی نمبر 22 ءَ روگ ءِ موہ بہ دئے کہ ھما پاھو داتگیں یاتان چار آں ءُ بس۔

آ پدا برانز کپت۔۔۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

یک ماھے ءِ گوزگ ءَ پد ھم مئے چُک یلہ کنگ نہ بیتگ ءُ ایشی ءَ پیسر ھم مئے چُکے گرگ ءُ بیگواہ کنگ بوتگ – کھول

سر بیتگیں ھالانی رد ءَ روکپتی بلوچستان ءِ دمگ کسرکند ءَ ایرانی لشکر ءَ یک مردمے آوار جتگ ءُ برتگ ءُ بیگواہ کرتگ –

اھوالکار ءِ رد ءَ یک ماھے ءَ پیسر ایرانی چیریں ادارھاں کسرکند ءِ نادِراہ ءِ کارگس ءَ عبدالرحمان آوار جتگ ءُ برتگ –

اھوالکار ءِ عبدالرحمان یک ماھے ءَ پیسر گار بیتگ مردماں بازیں پَٹ ءُ پول ءَ پد مروچی آیاں ھال سر بوتگ کہ عبدالرحمان ایرانی چیریں ادارھاں دزگیر کرتگ ءُ ناشناسیں زنداناں برتگ –

اھوالکار ءِ رد ءَ عبدالرحمان ءِ برات عبدالحمید چھبار ءَ سپاہ ءِ بنجل ءِ سر ءَ اُرش ءِ بھتام ءَ دزگیر کنگ بیتگ ءُ گار کنگ بیتگ –

عبدالرحمان ءِ کھول ءِ گوشگ اِنت کہ مئے یک چُکے پیسر ءَ مپت ءَ بھتامی گرگ ءُ گار کنگ بیتگ بلے عبدالرحمان ءِ سر ءَ ھچ بھتام ءُ دگہ ناشری نام ءَ نہ بیتگ –

کھول ءِ گوشگ اِنت کہ مئے گپتگیں مردماں ایرانی لشکر یلہ بہ کنت یا کانود ءِ رد ءَ آیاں وتی سپائی ءِ موہ ءَ بہ دنت کہ تانکہ وتی راستی ءَ پدراھی کُرت بہ کن اَنت –

دی بلوچستان پوسٹ

سر بیتگیں ھالانی رد ءَ مروچی پاکستانی پوج ءَ بیڑ برتگ ءُ شش کَس آوار جتگ ءُ برتگ –

اھوالکار ءِ رد ءَ مروچی گوادر ٹی ٹی سی کالونی ءَ پاکستانی پوج ءُ چیریں ادارھانی کارمنداں شش کَس آوار جتگ ءُ برتگ اَنت –

آوار جنگ بیتگیں مردمانی تہ ءَ دو ءِ پجار سعید ء بابو ءُ سمیر ءِ نام ءَ زانگ بیتگ اَنت آ دگہ آوار جنگ بیتگیں مردمانی پجار نہ بیتگ اَنت –

آوار جنگ بیتگیں مردم کسان سال اَنت ءُ نودربر اَنت –

دمگی مردمانی رد ءَ گوستگیں روچ ءَ دمگ ءِ دیوالانی سر ءَ بلوچستان ءِ بارو ءَ نبشتگ کنگ بیتگ ءُ مروچی سھب ءَ پوج ءَ بیڑ برتگ ءُ مردم دزگیر کرتگ اَنت –

دمگ ءِ پھزدارانی نیمگ ءَ تنی وھدی آوار جنیانی ھال دیم ءَ نیاتکگ اَنت –

زانگ بہ بیت بلوچستان ءِ جتا جتائیں جاھاں پاکستانی پوج ءِ زوراکی برجاہ اَنت ءُ دومی نیمگ ءَ بیگواھیں مردمانی درگیجگ ءَ شال ءَ وائس فار بلوچ مسنگ پرسنز ءِ شدکشیں ھرتال برجاہ اِنت –

دی بلوچستان پوسٹ

ملک سنگ ءَ سرمچاراں سنگر بستگ ءُ پاکستانی پوج ءِ سر ءَ اُرش کتگ دو کارمند کُشتگ اَنت – گوھرام بلوچ

گوستگیں روچ ءَ ناشُناسیں سلاہ بندیں مردماں بلوچستان ءِ کوھی دمگ مشکے ءَ پاکستانی پوج ءِ سر ءَ اُرش کُتگ، اُرش ءَ پاکستانی پوج ءَ جانی ءُ مالی تاوان رس اِتگ –

دومی نیمگ ءَ مروچی بلوچ آجوئی لوٹوکیں سلاہ بندیں گل بی ایل ایف ءِ جارکش میجر گْوھرام بلوچ ءَ رسانکدراں وتی شنگ کرتگیں درشان ءِ تہ ءَ گوستگیں روچ ءِ اے اُرش ءِ زمّہ واری منّ اِتگ گوشتگ کہ گوستگیں روچ ءَ سَے شمبے ءَ مئے سرمچاراں مشکے ءَ پاکستانی پوج ءِ راہ بستگ ءُ آھانی سر ءَ اُرش کُتگ –

جارکش میجر گْوھرام بلوچ ءَ گوشتگ کہ پاکستانی پوج تنک کور ءَ شُتگ بوتگ واتری ءِ وھد ءَ تنک ءِ دمگ ملک سنگ ءَ سرمچاراں پیسر ءَ چی راہ ءِ سر ءَ سنگر بستگ ءُ پوج ءِ سر ءَ اُرش کُتگ، اُرش ءِ آسر ءَ پاکستانی پوج ءِ دو کارمند ھما دمان مُرتگ ءُ دو زدگ بوتگ اَنت –

گڈسر ءَ جارکش ءَ گوشتگ مئے اُرش بلوچستان ءِ آجوئی تاں برجاہ مان انت-

دی بلوچستان پوسٹ

بلوچستان ءِ تیابدپی شھر جیوانی ءَ گجہ مافیا ءُ گیرکانودی دری ماھیگری ءِ بگیری ءَ فشرورکر یونین ءِ نیمگ ءَ سرجمیں شھر ءَ ھرتال ءِ جار پرینگ بیتگ ءُ کار ءُ باری بنجل بند کنگ بیتگ اَنت –

گیشیں ھالانی رد ءَ دریاں ورداں زھرشانی روانک کش اِتگ ءُ مزن شھدگ بند کرتگ کہ چریشی ءِ سوب ءَ مکران ءُ کراچی ءَ آؤکیں دگ ءَ رؤگ ءُ آیگی سرجم ءَ مھتل بیتگ –

دریا وردانی گوشگ اِنت کہ فشریز ءِ واکدارانی نیمگ ءَ گجہ جال(وائرنٹ) کارمرد کنگ ءَ دوازدہ میلاں زر ءِ سیمسراں جَلگ ءِ سر ءَ بندش بیتگ –

آیاں گوشت کہ بلوچستان ءِ زر ءِ سیمسری ھداں مانیارگ ءَ سندھ ءَ سیادی کنوکیں ٹرالر جیونی ءَ ھوار بلوچستان ءِ زر ءَ یکے ءَ چہ دو نائیٹیکل میل گیر کانودی ءَ ماھیگ گرگ ءَ دزبند اَنت –

دمگی دریا وردانی گوشگ اِنت کہ وائرنٹ ءِ کارمرد کنگ ءَ ماھیگانی ھلاس کنگ ءِ درپیشی ءِ اِنت –

ٹرالر مافیا زر ءَ شکار کنوکیں ماھیگیرانی سر ءَ لَٹ ءُ کُٹ کن اَنت ءُ دمگی دریا وردانی داماں بُر اَنت ءُ گون وت اش بر اَنت –

زھرشانی کنوکیں دریا وردانی رد ءَ فشریز ءُ بلوچستان ءِ سرکار ٹرالر مافیا ءِ بگیری ءَ گامگیج زورگ ءَ ابید ھم بے توار ءُ بے تھمبلی ءِ سر ءَ نشتگ ءُ مئے ندارگ ءَ چارگ ءَ اِنت –