TBP Balochi

شال ءَ حاجی آزاد خان مری ءُ آئی ءِ ھمراھانی کوش ءِ زمّہ واری ءَ منّیں- بی ایل اے

دی بلوچستان پوسٹ

بلوچستان ءِ مزن شھر شال ءَ مروچی یک شمبے ءِ روچ ءَ ھزار گنجی ءِ دمگ ءَ گاڑی ءِ سر ءَ بمب تراک ءِ کنگ بوتگ – تراک ءِ آسر ءَ سَے مردم حاجی آزاد خان ء مھراب خان، خیراللہ ء جمال خان ءُ شاھنواز ء امیر بکش بیران بوتگ انت ءُ وھدیکہ حاجی شاہ ء امام شاہ ءُ عبدالحمید ء محمد ظاھر زدگ بوتگ انت –

دومی نیمگ ءَ بلوچ آجوئی لوٹوکیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا اے بمب تراک ءِ زمہ واری منّ اِتگ ءُ گوشتگ کہ بلوچ لبریشن آرمی ءِ سرمچاراں مروچی یکشمبے ءِ روچ ءَ شال ءِ دمگ ھزار گنجی ءَ سبزی منڈی ءَ ریاستی چیریں ادارھانی کارندہ حاجی آزاد خان مری گوں ھمراھاں “وی بی آئی ای ڈی ” تراک ناکیں شوروانی نشانگ جوڑ کرتگ ـ چریشی ءَ آ گوں وتی ھمراھاں مرتگ –

جارکش جئیند بلوچ ءَ دیمتر ءَ گوشتگ کہ حاجی آزاد خان مری پاکستانی پوج ءُ چیریں ادارھانی ھاسیں کارندھے بوتگ کہ دژمن ءِ گُشگ ءِ پد ءَ بلوچ سرمچارانی کھولانی تنگ کنگ، جھدکارانی دشمن ءِ دیم ءَ سلاھانی دور دیگ ءَ لاچار کنگ، بزگیں بلوچانی جاہ ءُ دوارانی سر ءَ زورگری کنگ ءُ بلوچ سرمچارانی بگیری ءَ ڈیتھ اسکواڈ ءِ جوڑ کنگ ءِ وڑیں راجی دلاری ءِ کُشت گیری ءِ ھکدار بوتگ – آئی ءِ گوستگیں کتکاریانی تہ ءَ نیوکاھان ءِ بزگیں مری بلوچانی زمینانی سر ءَ زورگر کنگ ھم ھوار انت –

جارکش ءَ گوشتگ کہ بلوچ لبریشن آرمی ءَ پیش ءَ جار پرینتگ کہ ھر ھما مردم بلوچ زرمبشت ءِ بگیری ءَ دژمن ءِ گون ءَ ھوار بیت گڑا بیمناکیں سزائِے دیمپانے ءِ ھاتر ءَ ساڑی بہ بیت – ءُ درسیں بلوچ اے وڑیں راج دشمناں چہ وت ءَ پھازگ ءُ دور بوگ ءِ ھاتر ءَ مکن کنگ بوتگ انت – اے وڑیں مردمانی سر ءَ ھر کجا ھر وڑیں ساھت ءَ اُرش کنگ بیت – اے وڑیں اُرشانی میان ءَ کسے گوں اشاں نزیکی داریت لس مردمے آھانی گور ءَ روت گڑا وتی تاوان ءِ زمہ وار وت انت –

جارکش جئیند بلوچ ءَ دیمتر ءَ گوشتگ کہ ھمے درگت ءَ بلوچ لبریشن آرمی ایشی ءَ المی ءِ لیکیت کہ مروچی شال ءَ بوتگیں پی ڈی ایم ءِ مُچے ءِ درگت ءَ وتی بنگپ ءَ دیم ءَ بیاریت – آئی ءَ گوشتگ کہ پی ڈی ایم ھمے زورگریں ریاست ءِ دومی دیم انت، کہ آئی ءِ دست ھم چہ بلوچ ءِ ھوناں ھونین انت ـ پی ڈی ایم ءَ ھواریں درستیں وفاقی گل گوست ءَ بلوچ ءِ چکچینی ءَ ھمے وڑ ھوار بوتگ انت کہ مروچی تھریک انساپ ءِ سرکار انت – مروچی مسلم لیگ ن مریم نواز ءَ ھما وڑ ءَ بلوچانی دیم ءَ وت ءَ ساپ ءُ پلگارگی جوڑ کنگ ءُ دیم ءَ آرگ انت، آئی ءِ پت ءَ دومی دور ءِ سرکار ءِ تہ ءَ چاگی ءِ تہ ءَ زھرناکیں بمب ءِ چکاس کرتگ ءُ بلوچ سرڈگار ءِ دلبند تراکینتگ اَنت – ءُ سیمی دور ءِ سرکار ءَ ھمائی ءِ منّگ ءَ ھزاراں بیگواھیں مردم شھید کنگ بوتگ انت ءُ پیپلز پارٹی ءِ گوستگیں دور ءِ سرکار ءَ بلوچستان ءِ تہ ءَ یکجاھیں مانشانی در آیگ بندات بوت – بہ جن بہ کوش چگل دئے پالیسی بندات کنگ بوت ءُ ڈیتھ اسکواڈ جوڑ کنگ بوت بلوچ چاگرد ءِ سر ءَ ڈُول کنگ بوت انت – بلوچ سرڈگار ءِ سر ءَ ایشانی مول ءَ مراد بلوچانی گون ءَ ھمدردی نہ انت بلکیں وتی پنڈوکی واکداری انت – پاکستان ءِ تہ ءَ ھر کسے ءِ کہ واک اتکگ آئی ءَ چہ روچ مرچی بلوچستان ءِ تہ ءَ ھچ وڑیں دیگری نہ اتکگ – بلوچستان یک ایردستیں سرڈگار ءِ، کہ اے درسیں سیاسی گلانی پلامرزی ءَ چہ تچکی ءَ پوج ءِ ایردست ءُ آئی ءِ واک انت – بلوچانی ھر اے وڑیں سیاسی یکجاھی ءُ اے وڑیں زرمبشت تہ ءَ بدلی آرگ ءِ امیت دارگ وت ءَ اھمکیانی تہ ءَ یلہ کنگ ءَ انت – اسلام آباد ءِ تہ ءَ توپک ھر کسے ءِ دست ءَ بہ بیت بلوچ ھمے وڑ نشانگ جوڑ بیت ءُ کشگ بیت – بلوچ راج چہ کشندہ ءِ در چنگ ءَ شرتریں اے کشت ءُ کوشاں چہ ءَ رکگ ءُ آجوئی ءِ نیمگ ءَ وتی دلگوش ءَ توان ءَ بہ دنت –

جارکش جئیند بلوچ ءَ گڈسر ءَ وتی درشان ءِ تہ ءَ گوشتگ کہ بلوچ لبریشن آرمی یکرندے پد ءَ درسیں ریاستی کارندھاں مکن کنت ھر کسے بلوچ راجی آجوئی ءِ زرمبشت ءِ بگیری ءَ دژمنیں پوج ءَ گون انت آ وتی راج دشمنی ءَ چہ دور بداریت اگاں ناں اے وڑیں درسیں مردمانی دروشم چو حاجی آزاد خان ءِ وڑ ءَ بیت –

بلوچستان ءِ بنجاھی شھر شال ءَ نوروز ھان اسٹیڈیم ءَ پاکستان اپوزیشن ٹولیانی ھمسنتیں پاکستان ڈیموکریٹک موومنٹ ءِ سئیمی مُچی برجم دارگ بیتگ –

دی بلوچستان پوسٹ

مُچی ءَ پاکستان مسلم لیگ (ن) ءِ کسان کُمک سرکماش مریم نواز شریف، جمیت علماء اسلام ءِ سروک مولانا فضل الرحمان، بلوچستان نیشنل پاٹی ءِ سروک اختر مینگل، پشتوانوا میپ سروک مھمود اچکزئی، نیشنل پاٹی ءِ سروک ڈاکٹر مالک بلوچ ءَ ھوار بازیں رھشوناں تران کرتگ –

گوستگیں سروزیر نواز شریف ءُ پاکستان پیپلز پاٹی ءِ سروک بلاول بھٹو ءَ وڈیو چیڑو ءِ سر ءَ مھلوک ءِ گون ءَ تران کرتگ وھدیکہ پشتون تھپز موومنٹ ءِ مھسن داوڑ گوستگیں روچ ءَ شال ءِ بالی پَٹ ءَ واتر کنگ ءُ کراچی ءَ روان دیگ بیتگ –

شال ءِ مُچی ءَ وھد ءَ مباھل دامگ ھم بند کنگ بیتگ اَنت وھدیکہ اپوزیشن ءِ ھمسنتیں پاٹیاں جتائیں دگانی بند کنگ ءِ سوب ءَ بلوچستان ءِ سرکار ءِ سر ءَ ایراد گپتگ ءُ آیانی رد ءَ بلوچستان ءِ دگانی بند بیگ ءِ سوب ءَ ھزاراں مردم مچی ءَ اتک بیت نہ بیتگ اَنت –

پاکستان مسلم لیگ (ن) ءِ کسان کمک سرکماش مریم نواز شریف ءَ وتی تران ءِ تہ ءَ بیگواھیں مردمانی بارو ءَ ھم گپ کرتگ ءُ گوشتگ اَنی ھسیبہ کمبرانی نامیں یک جنکے ءَ وتی سَے بیگواھیں براتانی کِسہ من ءَ گوشتگ اَنت، مریم نواز ءَ وتی تران ءِ وھد ءَ ھسیبہ کمبرانی وتی گور ءَ لوٹائینتگ ءُ گوشتگ منی مات ءِ بیرانی ءَ پت ءِ دزگیری ءَ منی چماں ھرس در نیتکگ بلے مروچی ھسیہ کمبرانی ءِ دردناکیں کسھاں منی چمانی ھرس رتکگ اَنت، مریم نواز ءَ انیگیں سرکار ءِ سر ءَ ترندی ءَ ایراد گپتگ ءُ بلوچستان ءَ بیگواھیں مردمانی یلہ کنگ ءِ لوٹ کرتگ –

مریم نواز ءَ گوشت کہ یک شپے ءِ لاپ ءَ باپ ءِ نام ءَ پاٹی ءِ جوڑ بیتگ ءُ ھمے پاٹی ءَ یک چُکے پیداگ کرتگ ءُ دومی روچ ءَ سروزیر ءِ تھت ءِ سر ءَ نشتگ –

بلوچستان نیشنل پاٹی ءِ سروک سردار مینگل ءَ مچی ءَ تران کرتگ ءُ گوشتگ کہ وھدیکہ اے ڈیھ ءَ کانود جوڑ کنگ ءَ بیتگ اَنت ءُ مارا گپ ءَ بیتگ اَنت گڑا آ وھد ءَ اے گوشگ نہ بیتگ کہ بلوچانی راجدپتر ھونانی گون ءَ نبشتگ کنگ نہ بیت شمئے گون ءَ بروبری ءُ شرپ ءِ گون ءَ پیشی بیت –

اختر مینگل مچی ءَ جاڑیگیں مردماں جُست کرت کہ ترا برابری ءُ شرپ رسگ اِنت -ھاں اے دگانی سر ءَ تئی واستا بروبری ءِ شرپ کنگ بیگ ءَ اِنت –

اختر مینگل ءَ گْوشت کہ اد ءَ نِی شمارا گوریں مانش دزکپگ ءَ اَنت -آئی ءَ گوشت کہ شال ءِ پریس کلب ءِ ڈن ءَ بیگواھیں مردمانی کھولانی بنجل ءُ آئی ءِ کراچی ءُ اسلام آباد ءِ نیمگ ءَ پند ءَ روگ ءُ زھرشانی روانک ءِ باور ءَ گپ بیتگ،

اختر مینگل ءَ گوشت بیگواھیں مردمانی لوگ بانک مارا کاینت جست کن اَنت کم چہ کم اے سرپدی ءَ بہ دے ئے کہ ما جنوزام اِنت یا ناں؟ اے چکانی بیگواہ کنوک کَے اَنت؟ بلوچستان ءِ پنچمی لشکر کشی کنوک کَے اَنت؟

سردار اختر مینگل گوشت ’راجداری ءِ بھر زیرگ ءِ لوٹ ءَ ھم کن اَنت، ڈبُکاں ما پُر کن ایں – ‘

آئی ءَ گوشت کہ بلوچستان ءَ شپ ء شپ پاٹی جوڑ بنت – انی یک پاٹی ءِ جوڑ بیتگ کہ آئی ءِ نام باپ اِنت -پیسر ءَ آیاں پاٹی ءِ نام پاپ (پاکستان عوامی پاٹی) ایر کرتگ پد ءَ کَسے ءَ گْوشتگ اَنت کہ اشی ءِ متلب گناہ اِنت نِی پد ءَ باپ ءِ نام ءَ اے گناہ مئے زمہ جنگ بیتگ –

آئی ءَ گوشت کہ گوادر بلوچانی ملکت اِنت، وفاق ءَ اے ھک نیست کہ بلوچستان ءِ زر ءَ بہ گپت –

مولانا فضل الرحمان ءَ تران کنان ءَ بیگواھیں مردمانی بارو ءَ گپ درشان کرتگ ءُ گوشتگ کہ انسانی ھکانی پانکجن پرچا اد ءَ بے توار اَنت -آ بیا اَنت ءُ تہ ءَ بہ کپ اَنت –

مولانا فضل الرحمان ءَ گْوشت کہ ما ادارھانی دشمن نہ اِنت – ادارھانی شرپ ءَ کن ایں، ادارہ ڈیھ ءِ واستا اژدری اَنت – ما ادارھانی سروکانی شرپ ءَ کن ایں – بلے وھدیکہ آ مارشلا کن اَنت گڑا وتپرستیں سرکار آیانی پشتگیری ءَ کنت گڑا پد ءَ مارا جست گرگ مئے ھک بیت اِنت –

آئی ءَ گوشت کہ مروچی اگاں اسٹیبلشمنٹ اے سرکار ءِ پشتگیری ءَ دور بہ بیت ءُ پد ءَ اے آئی ءَ واک ءِ تہ ءَ اے ردی بیت ءُ پد ءَ آئی ءِ شرپ بیت اِنت –

آئی ءَ گْوشت کہ اے کجام ریاست ءِ مدینہ اِنت بلکیں کوپہ اِنت –

مولانا فضل الرحمان ءَ گْوشت کہ این ار او ءَ نِی تئی زلورت بیت اِنت – گْوش اَنت یک سالے ءَ یک کروڑے نوکری دنت – آیانی رد ءَ اے ھم 1947 ءَ بہ گر داں مروچی ءَ نہ بیتگ – نِی گْوش اَنت بنگ ءَ بہ ور، چرس ءَ بہ کَش اِت –

آئی ءَ گْوشت کہ من شمئے سرکار ءَ نہ منّاں ءُ من شمارا ھچ وڑ ءَ نہ منّاں – من اولی روچ ءَ اے سرکار نہ منّ اِتگ ءُ مروچی منی گپ ھما اِنت –

بلاول بھٹو ءَ وڈیو چیڑوے سر ءَ تران کنان ءَ گْوشتگ کہ بلوچستان ءِ مردم بامرد اَنت ءُ وتی ھکانی گرگ ءِ واستا اے اُستان ءَ وتی ھون داتگ اَنت – بلوچستان ءِ مردمانی سر برگ بیت بلے آ وتی سر ءَ کسے ءِ گور ءَ جھل نہ کن اَنت –

آئی ءَ گْوشت کہ مردم نِی آجوئی لوٹگ ءَ اَنت، مردم وتی مڈیانی آجوئی ءَ لوٹ اَنت، بے روزگاری ءَ آجو بیگ لوٹ اَنت، جیڑگ ءِ آجوئی ءَ لوٹ اَنت – اے کجام رنگیں آجوئی اِنت – اود ءَ نانکہ مردم آجو اَنت، نا راجداری، نانکہ اھوالکاری ناکہ مئے آمیدگس آجو اَنت –

اے وھد ءَ درستاں مستریں زور جمھوریت اِنت یک اسٹیج ءُ یک سرپے ءَ اُوشتاگ اَنت – نِی درستاں ھمے سرپ ءِ سر ءَ آیگ لوٹ ایت اگاں ناں درستاں لوگاں روگ لوٹ ایت –

بولان ءَ پاکستانی پوج ءِ کارندہ آئی ای ڈی ءِ نشانگ کرتگ اَنت – بی ایل اے

دی بلوچستان پوسٹ

بلوچ راجی آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ تھا گوشتگ کہ مئے سرمچاراں بولان ءِ دمگ سانگان ءَ سفری ءِ ھند ءَ پاکستانی پوج ءِ کارندہ ھما وھد ءَ دیرواگیں آئی ای ڈی ءِ نشانگ کرتگ انت وھدیکے آ پیادگ ءَ وتی چیک پوسٹ ءَ ورد وراکی راشن سرکنگ ءَ بوتگ انت –

جارکش ءَ گوشتگ کہ اے اُرش ءَ زورگریں پوج ءِ یک کارمندے ھما دمان ءَ مرتگ – ءُ اُرش ءِ زمہ واری ءَ بلوچ لبریشن آرمی من اِت۔

ھندوستان

نبیسار: ڈاکٹر مبارک علی

رجانکار: زبیر قومی

دی بلوچستان پوسٹ

ھندوستان ءَ پرنگی ( انگریزانی) ھبدھُمی کرن (سدی) ءَ کاینت آیگ ءَ رند لھم لھم ءَ وتی پاداں مھکم کن اَنت وھد ءِ ھمرائی ءَ وتی واکداری( حکومتی ) ءَ ھندوستان ءِ سر ءَ مھکم کن اَنت ءُ اود ءِ واکدار (حکمران) جوڑ بنت۔ اگاں چارگ بہ بیت چہ انگریزانی آیگ ءَ پیش ھندوستان یک وشھالیں ملکے بیتگ ءُ وتی کچ ءَ دیمروی کُتگیں ملکے زانگ بیتگ بلے انگریز وھدیکہ ھندوستان ءِ تھی جیڑهاں گِند اِیت گُڑا سیّت چست کنت ءُ واکدارانی (حکمرانانی) گوما وتی مُلکاری (سیاسی )سنگتی یے جوڑ کن اَنت وھدیکہ انگریزانی ھُکمرانی وتی نوک سری یے بیت اِنت گُڑا بازیں مردم آیاں گوں نزیکی کن اَنت ءُ وش اتک کن اَنت۔

ایسٹ انڈیا کمپنی:

اِیسٹ انڈیا کمپنی ءَ انگریز ھبدُهمی کرن ءَ وتی زور ءَ کیت اِنت داں نوزدهمی کرن ءَ انگریز سرجمیں ھندوستان ءَ وتی دست ءَ کن اَنت۔ ھندوستان ءِ دستگیری آیانی واست ءَ یک مزنیں سوبمندی یے بیت۔ پرچہ کہ نا انگریز ھندوستان ءَ وتی بازیں مردم راہ دے اَنت نا کہ تھنا اسپیت پوستانی ھُکمرانی ءَ مھکم کن اَنت۔ بلکیں انگریزاں اد ءَ یک انچائیں نوک آباد بوتگیں سرکاری نزامے جوڑ کُرتگ کہ آ ھندوستان ءَ چہ انگریز سئنت ءِ واست ءَ کام مواد( بیش بھائیں) پیداک بہ کن اَنت۔
انگریز درستاں چہ پیش بنگال ءِ سر ءَ اُرش کن اَنت اود ءِ زمین ءُ لس مھلوک ءِ وشھالی ءَ تباہ کن اَنت۔ ایشی سوب ءَ ڈُکّال( قحط) بیت ءُ آئی ءِ سوب ءَ چہ دہ ملیون(سد لک) بنی آدم ءَ گیش مر اِیت۔ چہ اِنکسیں مزنیں مرگ ءُ ھشکاوگی ءَ ابید ھم انگریز ٹِکسانی نیاد ءَ کم نہ کنت ءُ ھمے داب ءَ وتئی هکمرانی ءَ مھکم کنان ءُ جنزان کنت۔ دُومی نیمگ ءَ انگریز چہ ھندوستان ءَ جوڑ بوتگیں (پُچ ءُ پوشاکانی) کمپنیاں بند کنت. پرچا کہ ایشانی سوب ءَ چہ اگلستان ءَ جوڑ بوؤکیں پُچ ءُ پوشاکانی نیاد کم تر اَت۔ گُڑا انگریز چی ھندوستان ءَ دراتکگیں(پیدا بوتگیں) کرپاساں وتی ملک ءَ بارت ھما پچ ءُ پوشاک جوڑ کنت پد ءَ گرانیں نھاد ءَ بھا اِش کنت۔
ھَمے وھداں کہ ویسٹ انڈیز ءَ گلامانی ھلاسی بیت گُڑا بازیں بیوکاری(تاجر) ھندوستان ءَ کاینت ءُ اد ءَ کشت ءُ کشاری کنگ ءَ بندات کن اَنت۔ ایشانی سوب ءَ نوزدُمی کرن ءِ دک ءَ کم ءُ بیش دو سد لک ءَ گیش ھندوستانی بے نانی ءُ شُدّ ءِ سوب ءَ مر اِیت۔

نسل پرستی ءِ سر کَشگ:

ھشدُمی ءِ دک ءَ ھندوستان ءِ تہ ءَ ھمے رنگ ءَ نسل پرستی کنگ بیت انچُش کہ ویسٹ انڈیز ءَ تہ ءَ انگریز کنت- بندات ءَ انگریز ھندوستان ءِ دود ءُ ربیدگ، دودمان (تہذیب) ءُ مردمانی ھرچ روچیگیں نندگ ءُ پاداھگ ءِ توسیپ ءُ ستا ءَ کنت ۔ بلے وھد ءِ ھمرائی ءَ گوں اسپیت پوستی ءِ مزنی ءَ پیش کنت کہ انگریز اے دُگنیا ءِ تہ ءَ ھمے واستہ ودی بوتگ اَنت کہ مردمانی سر ءَ واکداری (حکمرانی) بہ کن اَنت۔ اسپیت پوستی ءِ لیکہ(نظریہ) ءَ شاہ دربرجاہ، رسانک ءُ کتابانی تہ ءَ انچُش پیش دار اَنت کہ انگریزانی کُلیں کار ءُ شے چہ ایندگہ راجاں شرتر اَنت۔
کجام ھم اِستاناں (ریاست) کہ انگریزانی نوک آبادکاری بوتگ گُڈا آیاں الم ءَ وتی نیکراه( مذہب) گیش ءَ چہ گیش اَرزشت داتگ۔ ھمے رنگ ءَ انگریز ھندوستان ءَ اسکولانی، کالجانی تہ ءَ وتی نیکراهی (مذھبی )کتابانی وانینگ ءَ بندات کنت تا کہ لس مھلوک سرپد بہ بیت کہ انگریز ھرچ رنگ ءَ چہ آیاں دیمتر اَنت۔

آجوئی ءَ رند:

چہ دُهمی دُگنیائی جنگ ءَ پد وھدیکہ ھندوستان چہ نوک آبادی ءَ آجو بیت ءُ دو بھر ءُ بانگ بیت بلے انگت روبرکتی ملکانی دست ءَ کارمرز بیت۔ پرچہ کہ سَیمی مُلکانی میان ءَ بیوپاری ءُ سیاسی ھچ وڑیں سیادی نہ بیت ھمے درگت ءَ اے پد ءَ روبرکتکی مُلکانی گوما بندوک بنت۔ پرچہ کہ انگریز چہ وتی روَگ ءَ رند ھم انچائیں مردم وتی جاگہ دار اَنت کہ آ انگریزانی نپ ءُ سیتانی هیال داری ءَ بہ کن اَنت ءُ لَس مھلوک ءَ چہ انگریزانی رسم ءُ رواج ءُ آیانی زانتی (علمی) ءُ ربیدگی (ثقافتی) راهند ءِ (نظام) بارو ءَ سرپدی بدے اَنت۔
داں روش ء مروشی انگریز ھمے مردمانی کمک ءَ روبرکتی دارو ءُ دوا ءُ ٹیکنالوجی ءِ بارو ءَ وتی لس مھلوک ءَ زور دے اَنت۔ بلے انگریزانی اے کُل شے اد ءَ مردمانی واست ءَ زھر ءِ ھساب ءَ کارمرز بوگ ءَ اَنت پرچہ کہ آیانی چیز اد ءِ مردمانی دَرمان ءَ گیش آیاں گنتر نادرہ کنگ ءَ اَنت۔

سرشون:
•مبارک الی، داکتر، گلامی اور نسل پرستی، تاکدیم 88، پکشن ھاوُس۔

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

ایف ڈبلیو او ءِ سر ءَ اُرش کتگ ءُ سَے کاردار کُشتگ ءُ چار زدگ کرتگ – بی ایل ٹی

بلوچ آجوئی لوٹوکیں سلاہ بندیں گل بلوچ لبریشن ٹائیگرز ءِ جارکش میران بلوچ ءَ رسانکدراں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی ساھت دہ ءِ نزیک ءَ بلوچستان ءِ دمگ عبدوئی ءُ اپسی کھن ءِ میانی دمگ ءَ پیسر ءَ چہ سنگر بستگ ءُ ایف ڈبلیو او ءِ کاروان سر ءَ راکٹ ءُ دگہ وتکاریں سلاھانی سر ءَ اُرش کرتگ –

آئی ءَ گوشتگ کہ اُرش ءِ آسر ءَ ایف ڈبلیو او ءِ سَے کاردار مرتگ ءُ چار زدگ بوتگ اَنت، وھدیکہ کاروان ءَ ھواریں یک گاڑی ءِ چہ اے اُرش ءَ سُتکگ ءُ پُر بُوتگ –

گڈسر ءَ جارکش ءَ گوشتگ کہ گل ءِ اے وڑیں اُرش آجوئیں بلوچ ڈیھ ءَ تاں برجاہ مان اَنت –

دی بلوچستان پوسٹ

جھل مگسی ءَ سی پیک دگ ءِ سر ءَ ایپ ڈبلیو او ءِ گاڑی تراک ناکیں شوروانی نشانگ کرتگ – بی آر جی

بلوچستان ءِ دمگ جھل مگسی ءَ ناشناسیں مردماں دگ ءِ سر ءَ کارکنوکیں کمپنی ءِ گاڑی تراک ناکیں شوروانی نشانگ جوڑ کرتگ –

تراک ھما وھد ءَ ڈیمپر ءِ سر ءَ کنگ بوتگ کہ نوتال ءَ بگر تاں گنداواہ ءَ دگ ءِ سر ءَ کار برجاہ بوتگ، تراک ءِ آسر ءَ ڈیمپر گاڑی ءَ تاوان رس اِتگ – بلے جانی تاوان ءِ ھال نیست –

دومی نیمگ ءَ بلوچ راجی آجوئی لوٹوکیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ ایپ ڈبلیو او ءِ مشینری ءِ سر ءَ بوتگیں اے تراک ءِ زمہّ واری منّ اِتگ ءُ گوشتگ کہ مئے سرمچاراں توتال ءَ بگر تاں گنداواہ ءِ سی پیک دگ ءِ سر ءَ کارکنوکیں یک ڈیمپر گاڑی ءِ دیرواگ بمب ءِ نشانگ کرتگ چریشی ءَ گاڑی ءِ ڈرائیور زدگ بوتگ ءُ گاڑی سرجم ءَ پُرشتگ –

آئی ءَ دیمتر ءَ گوشتگ کہ ما نلوٹیں کہ دمگی مردماں تاوان بہ رس ایت اگاں آ مکن کنگ ءَ ابید ایف ڈبلیو او ءِ گوم ءَ سامراجی لٹ ءُ پُل سر ءَ کار کنگ ءَ رازی بنت گڑا آھانی نشانگ کنگ ءَ چک پد نہ بئیں –

گڈسر ءَ جارکش ءَ گوشتگ کہ بلوچستان ءِ آجوئی ءَ تاں مئے جد ءُ جھد ءَ برجاہ بیت –

دی بلوچستان پوسٹ

بلوچستان ءِ دمگ بولان ءَ پاکستانی پوج بمب ءِ گون ءَ نشانگ کنگ بیتگ کہ چریشی ءِ سوب ءَ جانی تاوانانی ھال اِنت –

ناشناسیں مردماں سانگان سپری ءِ ھند ءَ تراکناکیں شورواں پوج ءِ پند ءَ رؤکیں کارندہ نشانگے کرتگ اَنت –

دمگی مردماں ٹی بی پی ءَ گوں گوشتگ کہ تراک ءِ آسر ءَ یک کارمندے مرتگ، بلے تنی وھدی لشکر ءِ نیمگ ءَ اشی ءِ راستی نہ بیتگ –

اُرش ءِ زمہ واری ھچ گل ءَ نہ منّ اِتگ بلے جنگ زدگیں دمگ ءَ اشی ءَ پیسر ھم بلوچ سلاہ بندیں گل پوج ءَ نشانگ کنگ ءَ اَنت –

نبشتانک: کسانیں کسھے

نبشتہ کار: حیراف بلوچ

دی بلوچستان پوسٹ

شھید واجہ میار جان دشت پنودی ءِ جاهمنند اَت. آ بیست ءُ یک نومبر دو هزار هبدہ ءَ گوں وتی سنگت شبیر جان پنام ساهل ءَ هوار دشمن ءَ گوں دیم پہ دیم جنگ دیان ءَ نمیران بوت۔ واجہ میار یک کوم دوستیں مردمے اَت، آ چہ هما کوم دوست ءُ راج دوستاں یکے اَت کہ آ وتی زاتی مال ءُ متاهاں هم پہ کوم ءِ جْوانی ءُ شری ءِ واست ء ندر ءُ کربان کن اَنت۔ واجہ میار کہ وهدے راجی جُنز ءِ بهر بیت گُڑا وتی ڈگار ءُ ٹیکٹر ءَ هم وتی میتگ ءِ مردماں دنت کہ ایشاں پہ وتی کشت ءُ کشار ءَ کارمرز بہ کن اِت. شھید ءِ کوم دوستی ءِ بابت ءَ نبشتہ کنگ ءِ منی چے بستار ؟ بلے یک کسانیں کسھے شمئے دیم ءَ کاراں۔

شھید واجہ میار جان ءِ نمیرانی ءَ دست مانیں یک دلارے کہ رند ءَ بی ایل ایپ ءِ سنگتانی دستاں جنگ بوت، واجہ میار ءَ آئی ءَ بار بار مکن کُرتگ اَت کہ دُشمن ءِ دستاں کارمرز مہ بو، دُشمن ءِ دستاں پہ لھتیں زر ءُ کلداراں تاوان مدے پرچہ کہ اے تھنا منی دُشمن نہ اَنت،اے دْرستیں بلوچ راج ءِ دُشمن اَنت، همے بلوچ راج کہ تو هم آئی ءِ بهرے ئے، تو همے بلوچ راج ءِ پُسگ ئے، تو هم همے بلوچ راج ءِ یک مردمے ئے۔ اگاں بلوچ راج تاوان ءِ بهر بہ بیت گڑا تو هم گون ئے گوں. تو هم همے تاوان ءَ چہ وت ءَ رکّینت کُرت نہ کن ئے۔ بلے بژن کہ آئی ءَ واجہ میار ءِ گپ نہ زُرت ءُ یک دلارے ءِ مَرگ ءَ مُرت۔

واجہ میار وهدے گوں وتی سنگتاں یک تنزیمی کارے ءِ سر ءَ دشت ءِ میداناں پہ آرام ءِ واست ءَ جلّ اتگ اَت گُڑا آ همے دلار اَت کہ واجہ ءُ آئی ءِ سنگتانی اهوال پہ دُشمن ءَ سر کُرت۔ واجہ میار گوں وتی سنگتاں داں دیر ءَ گوں دُشمن ءَ جنگ ئِے دات۔ دُشمن ءَ وهدے وتی پروش مار اِتگ گُڑا پہ کُمک ءَ چہ تُربت ءَ بالگِرد اِش لوٹائینت، واجہ میار ءَ وتی سنگت پہ سلامتی کشّائینت ءُ گوں وتی همراه شبیر جان ءَ هوار داں گُڈی ساه ءَ جنگ اِش دات ءُ نمیران بوت اَنت۔ همے روچ ءَ تربت ءِ نادراه جاه ءَ وت شبیر جان ءُ میار جان ءِ جنگی توکل ءِ کسہ آرتگ اَت۔

بلے دلار ءَ نہ زانتگ کہ آئی ءَ وتی پاد وت بُرّ اِتگ، آ وت هما مھروان ءُ کوم دوستیں سنگت ءَ دُشمن ءِ دستاں شھید کنائینتگ، کہ آ بار بار آئی ءِ ساه ءَ رکینتگ اَت ءُ آرا چہ اے وڑیں کاراں مکن کرتگ اَت، آئی ءَ آ پہ جوانی نندارینتگ ءُ سمجارینتگ کہ تئی کتگیں کار اگاں تھنا من ءَ نُکسے بہ دے اَنت پرواه نیست بلے چوشیں کارے مہ کن کہ آئی ءِ تاوان راج ءَ بہ رس اِیت۔

بلے وهد ءَ گْوزان کرت، دلار پہ لھتیں زرانی هاتر ءَ سنگتانی چُگلی برجاه داشتگ ءُ یک روچے وت سنگتانی تیرانی آماچ بوت۔

وهدے دلار ءِ پس ءَ هال رس اِتگ کہ تئی زهگ سرمچاراں جتگ ءُ کُشتگ گڑا آئی ءِ پس ءَ همے درّائینت کہ ” مرچی من زاناں کہ واجہ ءَ میار نیست اِنت‌”

دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ

سر بیتگیں ھالانی رد ءَ روکپتی بلوچستان ءِ دمگ سراوان ءَ ناشناسیں مردمانی تیرگواری ءَ یک مردمے بیران ءُ یکے زدگ –

اھوالکار ءِ رد ءَ سراوان ءِ دمگ گشت ءَ ناشناسیں مردمانی تیرگواری ءَ یک مردمے بیران ءُ یکے زدگ بیتگ –

بیران مردم ءِ پجار عُمر ھسین بر ءِ نام ءَ زانگ بیتگ ءُ زدگ بیتگیں مردم ءِ پجار عنایت اللہ ھسین بر ءِ نام ءَ زانگ بیتگ، عنایت اللہ ءِ پاد ءَ تیر لَگ اِتگ ءُ سراوان ءِ نادراہ جاہ ءَ برگ بیتگ –

ھمے وڑ ءَ روکپتی بلوچستان ءِ دمگ جادوزھی ءِ چار راہ ءَ ناشناسیں مردمانی تیرگواری ءَ یک مردمے بیران بیتگ –

بیران بیتگیں مردم ءِ پجار عمران ء داد مھمد جھمنند دشتیاری ءِ نام ءَ زانگ بیتگ –

اے وئیلانی بارو ءَ دگہ گیشیں سرپدی نہ بیتگ –

دی بلوچستان پوسٹ

نو ماہ ءَ پیش آوار جنگ بوتگیں مردم یل کنگ بوتگ ءُ پیدارک ءَ دگہ یک مردمے آوار جنی ءَ پد بیگواہ کنگ بوتگ –

ٹی بی پی پتر ءَ سربوتگیں ھالانی رِد پاکستانی پوج ءُ ڈیت اسکواڈ کارمنداں یک مردمے پیدارک چیک پوسٹ ءِ سر ءَ زورانسری آوار جتگ ءُ بیگواہ کرتگ-

آوار جنگ بوتگیں ورنایے پجّار طاھر ء بکشی جاھمنند چہ سری کلگ گورکوپ ءِ نام ءَ بوتگ –

اھوالکار ءِ رِد ءَ طاھر بکشی متحدہ عرب عمارات ءَ پہ کار ءُ روزگار ءَ شُتگ بوتگ کہ گوستگیں روچ ءَ پنچ شمبے ءَ وتی چھٹیانی گوازینگ ءَ ڈیھ ءَ اتکگ بوتگ کہ چہ پیدارک چیک پوسٹ ءِ سر ءَ آوار جنگ ءَ پد بیگواہ کنگ بوتگ –

پاکستانی پوج ءِ دست ءَ آوار جنگ بوتگیں بلوچ پُسگے لشکری آزار جاھاں چہ یل بوتگ ءُ گس ءَ سربوتگ –
اھوالکار ءِ گوشگ انت کہ آ چار شمبے ءِ روچ ءَ چہ عمارات ءَ تاں کراچی ائیرپورٹ ءَ اتکگ بوتگ ءُ پنچ شمبے ءِ سھب ءَ چہ کراچی ءَ دراتکگ بیگاہ ءَ تربت ءَ سربوتگ ءُ اود ءَ وتی دمگی لوکل وین ءَ سوار بوتگ دیم پہ وتی دمگ سری کلگ ءَ رؤگ ءَ بوتگ کہ راہ ءِ نیم ءَ سری کلگ ءَ پاکستان ءِ پوج ءِ داشتگیں ڈیٹھ اسکواڈ ءَ آھانی گاڑی داشتگ ءُ آ گوں وت برگے جھد کرتگ، بلے گاڑی ءَ سواریں زالبولاں آ ڈیتھ اسکواڈ دست ءَ برگ ءَ نہ اشتگ –
ڈیتھ اسکواڈ ءِ کارمندانی ھمے گوشگ بوتگ کہ اے ورنا پیدارک چیک پوسٹ پوج ءَ لوٹیتگ بلے اود ءَ زالبولاں برگ ءَ نہ اشتگ ھمے گشتگ کہ اگاں پوج لوٹ اِیت گڑا چیک پوسٹ دیم ءَ انت – وھدےکہ رھادگ بوتگ انت گڑا ڈیتھ اسکواڈ ءِ کارمنداں آئی ءِ رندگیری کرتگ داں چیک پوسٹ اتکگ ءُ ھمود ءَ چہ گاڑی ءَ ایر اِش گپتگ ءُبیگواہ اِش کرتگ –

دومی نیمگ ءَ پاکستانی پوجی آزار جاھاں چہ نو ماہ ءَ پد یک مردمے یل بوتگ وتی گس ءَ سربوتگ –

گیشیں ھالانی رِد ءَ نو ماہ ءَ پیش پاکستانی پوج ءِ دست ءَ آوار جنگ بوتگیں عزیزاللہ ء وھاڈی بگٹی گوستگیں روچ ءَ چہ پاکستانی ٹارچر سیلاں آجو بوتگ ءُ گس ءَ سربوتگ –

زانگ بہ بیت بلوچستان ءِ جتا جتائیں دمگاں پاکستانی پوج آوار جنی یکشل ءَ برجاہ انت، کمے کساس ءَ مردم یل کنگ بوھگ انت وھدیکے دومی نیمگ ءَ دوسری آوار جنگ بیگواہ کنگ بوھگ انت –

یل بوتگیں مردم ءِ یلہ بیگ ءِ راستی وائس فار بلوچ مسنگ پرسنز ءَ ھم راست کرتگ ءُ گْوشت کہ نُھ ماہ ءَ پیسر بیگواہ بیتگیں عزیز اللہ یلہ بیتگ ءُ وتی لوگ ءَ سر بیتگ –