TBP Balochi

بلوچستان ءُ کراچی ءَ زورانسری آوار جنی ءِ وئیلانی درچ یکشل ءَ برجاہ اِنت- نوکیں ھالانی رِد ءَ چہ کراچی ءَ یک کسان سالی ئیں نودربرے ءُ چہ ھب چوکی ءَ پنجگور ءِ جھمنندے یک ورنایے زورانسری بیگواہ کتگ، وھدے کہ جمعیت علمائے اسلام ءِ رھشون سردار علی محمد خان قلندرانی ءِ بچّ یوسف علی قلندرانی یل کنگ بیتگ-

اِھوالکار ءِ رِد ءَ ھپدہ سالی ئیں نودربر امیر ء جاسم ولی داد، جھمنند بلوچ آباد مند، نوزدہ دسمبر 2025 ءِ بیگاہ ءِ کساس شش ءَ کراچی ءِ دمگ چہ لیاری، آٹھ چوک ءَ ایم آئی ءُ سی ٹی ڈی کارندھاں آوار جتگ ءُ وتی ھمراھی ءَ برتگ – کھول ءِ رِد ءَ وئیل ءَ پد امیر ءِ درگت ءَ ھچ وڑیں ھال دیگ نہ بیتگ، چریشی ءَ کھول سک تُرس آماچ اِنت-

ھمے وڑ چہ ھب چوکی ءِ دمگ الہ آباد ٹاؤن ءَ چہ پنجگور ءِ جھمنندیں ورنایے کلیم اللہ ء حاجی اسد اللہ شپ ءِ کساس دو بج ءَ چہ لوگ ءَ ناشناسیں مردماں چست کتگ بیگواہ کتگ – کھول ءِ رِد ءَ کلیم اللہ ءِ سیادی خدابادان، پنجگور ءَ اِنت ءُ وئیل ءَ پد آئی ءِ درگت ءَ ھچ وڑیں ھال نیست- کھول ءَ جتاجتائیں ھنداں شوھازگ ءَ اَبید ھچ وڑیں گامگیج نہ بیگ دلپدردی درشان کتگ-

کھول ءَ ھمگرنچیں ادارھاں چہ لوٹ کتگ کہ کلیم اللہ ءُ امیر ءَ زوت یل کنگ ءِ دلجمی بدے اِنت ءُ آئی ءِ زورانسری آوار جنی ءِ درگت پلگاریں پٹ ءُ پول کنگ بہ بیتگ- کھول ءَ راج، سول سوسائٹی ءُ انسانی ھکانی گلاں چہ دزبندی کتگ کہ آ اے وئیلانی ھلاپ ءَ توار چست بہ کن آں-

دومی نیمگ ءَ جمعیت علمائے اسلام ءِ رھشون سردار علی محمد خان قلندرانی ءِ بچّ یوسف علی قلندرانی ءِ یل کنگ بیتگ-

یوسف علی قلندرانی گوستگیں سال ھپدہ اگست ءَ کراچی ءَ زورانسری بیگواہ کتگ اَت، پد ءَ آ سی ایم پی او ءِ رِد ءَ ھُزدار جیل ءَ کتگ – مروچی نزیکیں مردمے ءَ پدر کتگ کہ آ یل بیتگ پہ سلامتی لوگ ءَ سر بیتگ-

انسانی ھکانی گلاں زورانسری آوار جنی ءِ برجاہ وئیلانی سر ءَ دلپدردی درشان کنان ءَ لوٹ کتگ کہ بیگواھیں مردماں زوت دیم ءَ بیار اِت-

پنچ شمبے ءِ روچ ءَ شال ءَ ایڈیشنل چیف سیکرٹری داکلہ بلوچستان حمزہ شفقات ءِ ھمراھی ءَ پریس کانفرنس ءِ وھد ءَ سی ٹی ڈی بلوچستان ءِ ڈی آئی جی اعزاز گوریا ءَ زورانسری ءَ بیگواہ بوتگیں ساجد احمد ءِ دزگیری ءِ پدر کتگ۔

ڈی آئی جی اعزاز گوریا ءَ ٹاپار داتگ کہ ساجد احمد مزنیں کساسے ءَ سلاہ چہ پنجگور ءَ تربت ءَ برگ ءَ بیتگ۔ آئی ءِ رد ءَ دزگیریں ملزم سوشل میڈیا ءِ سر ءَ بندش جتگیں ادارگانی مواد ءِ شنگ کنگ ءِ کرد ءَ پیلو کنگ ءَ بیتگ۔

آئی ءَ گیشتر ٹاپار جتگ کہ جھانزیب مھربان نامیں مردمے ھم دزگیر کنگ بیتگ کہ آ ریکی ءُ زرّ ءِ پھجارینگ ءَ ھوار بوتگ ءُ جھانزیب ءَ گوں وت ءَ 18 سالی بچک ھم ھوار کتگ۔

ڈی آئی جی ءِ رد ءَ ساجد احمد ءَ تربت یونیورسٹی ءَ وانینگ ءِ کار ھم کتگ وھدے کہ ساجد ءِ نشار ءِ بابت ءَ ھم اے ٹاپار دیگ بوتگ کہ آ بی وائی سی ءِ کارانی تہ ءَ ھوار بوتگ۔ آئی ءَ گْوشتگ: گیشیں کارروائیانی وھد ءَ بیزال ءُ ھاران ءِ جھمنند سرفراز ھم دزگیر کنگ بیتگ انت۔

زانگ بہ بیت کہ اسلامک انٹرنیشنل یونیورسٹی اسلام آباد ءِ نودربر ساجد احمد گوستگیں سال ءِ دسمبر ءَ چہ پنجگور ءَ پاکستانی لشکر ءِ دست ءَ دزگیر کنگ ءَ پد زورانسری بیگواہ کنگ بوتگ۔

آئی ءِ لوگ ءِ مردمانی گشگ ءِ رد ءَ ساجد احمد وتی لوگ ءَ واتر بوھگ ءَ بوتگ کہ راہ ءَ زورانسری چست کنگ بوتگ۔

ساجد احمد ءَ گوں بلوچی لبزانک ءَ مزنیں ھب ءُ واھگے ھست ءُ چہ اسلامی انٹرنیشنل یونیورسٹی اسلام آباد ءَ گریجویشن کتگیں زانتکارے۔ آئی ءِ کھول ءَ آئی ءِ بیگواھی ءِ پژدر ءَ پدردی درشان کتگ-

بلے مرچیگیں پریس کانفرنس ءَ ساجد احمد ءِ دزگیری ءِ جاہ ءِ بابت ءَ ھچ گپ ءُ تران نہ بوتگ۔

زانگ بہ بیت کہ بلوچستان ءَ زورانسری بیگواہ کنگ بوتگیں مردمانی ھلاپ ءَ دروگیں کیس جوڑ کنگ ءُ درکانودی کوش ءِ بازیں ویل دیم ءَ اتکگ اَنت۔

کیچ ءِ بنجاھی شھر چہ تربت ءَ زَر ءِ ھاتر ءَ آوار جنگ بوتگیں ورنا حسیب یاسین چہ بلیدہ ءَ یل کنگ بوتگ۔ حسیب یاسین گوستگیں ماہ ءَ اپسر ءِ دمگ ءَ چہ وتی دکان ءَ لوگ ءَ روگ ءِ وھد ءَ ناشناسیں سلاہ بندیں مردماں آوار جتگ ءُ پد ءَ آوار جنوکاں آئی ءِ یلہ کنگ ءِ ھاتر ءَ ٹوھیں کچے ءَ زَرانی لوٹ کتگ۔

تربت ءَ گوستگیں ھپتگ ءَ حسیب یاسین ءِ سلامتی ءَ یل کنگ ءِ ھاتر ءَ لس مھلوک ءَ ٹوھیں کچے ءَ زھرشانی کتگ۔ جتا جتائیں سیاسی گل، چاگردی گل ءُ شھری مھلوک ءِ نیمگ ءَ یکشلیں دیوان، زھرشانی مچی ءُ شٹر ڈاؤن ھڑتال کنگ بیتگ کہ ایشی ءِ تہ ءَ مزنیں کساسے ءَ شھریاں بھر زرتگ ءُ آوار جنگ ءِ گیش بوھوکیں وئیلانی سر ءَ سک باز جیڑہ درشان کتگ ءُ آئی ءِ زوتیں یل کنگ ءِ لوٹ کتگ۔

بنشون ءِ رد ءَ چار شمبے ءِ شپ ءَ دیر ءَ حسیب یاسین بلیدہ ءَ یل کنگ بوتگ ءُ ایشی ءَ پد آئی ءَ را اپسر ءَ وتی لوگ ءَ پہ سلامتی سر کنگ بوتگ۔

دومی نیمگ ءَ تربت ءِ دمگ ملائی بازار ءَ چہ آوار جنگ بوتگیں نامداریں ٹھیکیدار گل جان ءِ چُک شاہ نواز انگت بیگواہ اِنت۔ شاہ نواز دسمبر 2025 ءَ ملائی بازار ءَ لوگ ءَ روگ ءِ وھد ءَ ناشناسیں مردماں آوار جتگ ءُ پد ءَ دشتی بازار ءِ نزیک ءَ آئی ءِ گاڑی دزکپتگ ۔

ھالانی رد ءَ آوار جنوکاں آئی ءِ یل ءِ کنگ ءِ ھاتر ءَ بازیں کساسے ءَ زَر ھم لوٹ اِتگ بلے آئی ءِ دیم ءَ آرگ انگت ءَ سرجمی نہ بیتگ۔

راجمانی ءُ سیاسی دمگاں حسیب یاسین ءِ یل کنگ ءَ را وش آتکیں ءُ جوانیں گامگیج لیک اِتگ ءُ گْوشتگ کہ داں دگہ بیگواھیں شھری پہ سلامتی ءَ یل کنگ نہ بنت،زر ءِ ھاتر ءَ آوار جنگ ءِ ھلاپ ءَ زھرشانی ءُ راجمانی زور برجاہ بیت۔

کیچ ءِ دمگ ھوت آباد ءَ پاکستانی پوج ءَ بیڑبرتگ ءُ مزنیں کچے مردم آوار جتگ ءُ بیگواہ کتگ اَنت-

دمگی مردمانی رِد ءَ پوج ءَ بیڑ وھد ءَ ریاض یعقوب، داد کریم، جلیل، سلیم، علی بخش، ساجد، شاھجان ، ولی ، ریاض حسن آوار جتگ اَنت وھدے کہ آ دگرانی پجّار انگت نہ بیتگ اَنت-

زانگ بہ بیت مروچی ھوت آباد ءَ پاکستانی پوج ءِ کارندھانی سر ءَ اُرش ءَ پد آبادی ءِ سر ءَ بیڑبرتگ مردم آوار جتگ اَنت اشی ءَ ساری ھم پوج ءِ سلاہ بندانی نیمگ ءَ اُرش ءِ نشانگ کنگ ءَ پد آ چو مدامی وڑ ءَ آبادیانی سر ءَ بیڑبرت یا کہ تیرگواری کنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں پنجگور ءُ کلات ءَ زورگریں پاکستانی پوج ءِ دو جتاجتائیں اُرشاں نشانگ کتگ ءُ جانی ءُ مالی تاوان ءِ دیمپان کتگ-

جارکش ءَ گْوشتگ کہ بی ایل اے ءِ سرمچاراں چارشمبے ءِ روچ ءَ پنجگور ءَ کسٹم ءِ نزیک ءَ زورگریں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ کتگ- تراک ءَ زورگریں پوج ءِ دو کارندہ جاہ پہ جاھی مرتگ ءُ دگہ گیش سے ٹپی بیتگ اَنت وھدے کہ آیانی گاڑی ءَ ھم تاوان رس اِتگ-

جارکش ءَ گْوشتگ کہ سرمچاراں مروچی کلات شھر ءَ زورگریں پاکستانی پوج ءِ بُنجاھی بُنجل ءِ میس سر ءَ گرنیڈ لانچر ءَ چہ بازیں گرنیڈے آس داتگ جانی ءُ مالی تاوان ءِ دیمپانی کتگ-

جارکش ءَ گوشتگ بلوچ لبریشن آرمی اے اُرشانی زمہ واری ءَ منّ اِیت-

بلوچستان ءِ دمگ کیچ ءَ ناشناسیں مردماں اُستانی وزیر ءِ لوگ ءِ سر ءَ ھوار سیکورٹی پورسز ءِ سر ءَ اُرش کتگ انت-

گیشیں اھوالانی رد ءَ کیچ ءِ دمگ مند ءَ پاکستان مسلم لیگ ( ن) ءِ رھشون ءُ اُستانی وزیر برکت رند ءِ لوگ ءِ نزیک ءَ بمب تراکے بیتگ-

پولیس ءِ واکدارانی رِد ءَ تراک ھما وھد ءَ بیتگ کہ اُستانی وزیر ءِ لوگ ءَ یک یک جرگھے برجاہ بیتگ، کہ ناشناسیں مردماں جرگہ ءِ وھد ءَ لوگ ءِ نزیک ءَ دزبمبے چگل داتگ کہ گاڑیانی جاہ ءَ کپتگ ءُ تراک بیتگ-

تراک ءِ آسر ءَ گاڑیاں کمے کساس ءَ تاوان بیتگ انت بلے اود ءَ جاڑیگیں مردم بچ اتگ انت-

ھمے وڑ ءَ کیچ ءَ ھواریں دمگ ھوت آباد ءَ ناشناسیں مردماں دگ بستگ ءُ پٹ ءُ پول بندات کتگ-

دگ بندی ءِ ویل تربت ءُ دشت ءِ میانی دمگ لوڑی جنگجاہ ءَ بیتگ کہ اود ءَ ناشناسیں مردماں دگ بستگ ءُ گاڑیانی پٹ ءُ پول ءِ وھد ءَ پولیس ءِ چیک پوسٹ ءِ سر ءَ بیڑ برتگ ءُ پولیس ءِ کارندہ دزگیر کتگ ءَ سلاہ گون وت برتگ انت-

تنی وھدی پیش اتکگیں ویلانی زمہ واری کس ءَ پہ وت ءَ نہ زرتگ انت ءُ زانگ بہ بیت اے دمگ ءَ بلوچ آجوئی لوٹوکیں گل پرکار انت-

بلوچستان ءِ دمگ آواران ءِ ھند چہ بریت ءَ دو انچیں مردمانی لاش دزکپتگ اَنت کہ کھول ءُ دمگی اِھوالکار ءِ رِد ءَ بازیں ماھاں چہ ساری پاکستانی پوج ءَ زورانسری بیگواہ کتگ-

کُشگ بیتگینانی پجّار ایاز بلوچ ءُ زریپ اھمد نام ءَ چہ بیتگ اَنت-

دمگی اِھوالکار ءِ رِد ءَ ایاز بلوچ ء دوست محمد ءِ سیادی کولواہ ءِ دمگ گیشکور ءِ میتگ چہ سنڈم ءَ بیتگ اَنت- کھول ءِ گوشگ اِنت کہ آ شانژدہ اکتوبر 2026 ءِ امداد بلوچ نامیں ورنایے ءِ ھمراھی ءَ آوار جتگ ءُ چریشی ء پد بیگواہ بیتگ-

ھمے وڑ زریپ اھمد ء مستری فقیر محمد، کہ کولواہ ءِ دمگ مالار سیاہ کل ءِ جھمنند بیتگ، بیست ھشت ستمبر ءَ وتی لوگ ءَ چہ آوار جتگ ءُ برتگ- اشی ءَ پد آئی ءِ ھمراھی ءَ دزگیر کنگ بیتگیں مردمے یل کتگ، بلے زریپ احمد ءِ درگت ءَ ھچ وڑیں ھال سر نہ بیتگ، ءُ زی آئی ءِ لاش دزکپتگ-

لاشانی دزکپگ ءَ پد سانمندیں کھول ء بھتام جتگ کہ دوئیں مردم بندیگجاہ ءَ کشتگ ویرانگ ءَ دور داتگ اَنت-

بلوچستان ءَ زورانسری آوار جنی ءِ جیڑہ گوستگیں دو دھکاں چہ یک گیچینے بُنگپے – انسانی ھکانی گلانی رِد ءَ دوھزار ءَ چہ اے وڑیں وئیلانی تہ ءَ گیشی اتکگ- بیگواھیں مردم ءِ کھول گیشتر پاکستانی پوج سر ءَ دزگیری ءُ پد بیگواھیں بھتام جتگ-

وائس فار بلوچ مسنگ پرسنز ءُ دگہ گلاں ٹاہ داتگ کہ ھزرانی مردم انچین اَنت درگت ءَ سالانی سال ھچ وڑیں سرپدی دز نہ کپتگ- اے گلانی رِد ءَ باز کیس ءَ بیگواھیں مردمانی لاش پد ءَ جتاجتائیں دزکپتگ اَنت، اشی دمگی ھساب ءَ کل اینڈ ڈمپ پالیسی گوشگ بیت-

بلوچستان ءَ ریل یکشل ءَ سلاہ بندیں مردمانی نشانگ ءَ انت کہ چریشی ءَ ریل ءَ بازیں کچے ءَ تاوانانی دیمپانی انت-

گوستگیں بازیں وھداں ریل ءِ روانی چہ ترندیں اُرشاں ریل ءِ واکداراں ریل مھتل کتگ کہ اود ءَ بازیں کچے ءَ اُرشانی ترس ءِ سبب زانگ بیتگ-

اے ویل ھنچیں وھدے ءَ پیش اتکگ کہ گوستگیں سال ءَ بلوچستان ءَ جعفر ایکسپریس ءَ ھواریں بازیں ریل نشانگ کنگ بیتگ انت کہ آیانی توک ءَ درستاں سربرزیں اُرش جعفر ایکسپریس ءِ دستیگ کنگ ھوار انت کہ بی ایل اے ءِ مجید بریگیڈ ءَ ٹرین ھائی جیک کتگ ءُ ریل ءَ سواریں پاکستانی پوج ءِ کارندھانی آوار جنگ ءُ ریل ءِ انفراسٹرکچر ءَ را تاوان داتگ-

مروچی نصیر آباد ءَ ریل ءِ ٹریک تراکناکیں شورواں گوں تراکینگ بیتگ کہ اے اُرش ءِ زمہ واری بی آر جی ءَ زرتگ-

بی آر جی ءِ جارکش دوستین بلوچ ءَ گوشتگ گوستگیں شپ ءَ بلوچ ریپبلکن گارڈز ءِ سرمچاراں بلوچستان ءِ دمگ نصیر آباد ءِ ھند ڈیرہ مراد جمالی ءِ نزیک ءَ ریل ءِ ٹریک ءِ سر ءَ شورو کل کتگ ءُ تباہ کتگ-

آئی ءَ گوشتگ اے دابیں اُرش بلوچستان ءِ آجوئی ءَ داں برجاہ بنت ءُ اے اُرش ءِ زمہ واری ءَ بی آر جی من ایت-

پاکستانی انسداد ناشرکاری پولیس ءَ کراچی ءَ مزنیں آپریشنے ءِ وھد ءَ نزیک ءِ دو ٹن تراکناکیں شورو دست کپتگ ءُ سئے جرمکار دزگیر کنگ ءِ ٹاپار جتگ ۔ اگدہ دارانی رد ءَ بلوچ لبریشن آرمی مزنیں اُرشے ءِ شوربندی ءَ بیتگ ۔

انسداد ناشرکاری ءِ سینئر افسر ذوالفقار علی لاریک ءُ ڈپٹی انسپکٹر جنرل پولیس غلام ازپر مھسر ءَ دو شمبے ءِ روچ ءَ پریس کانفرنس ءَ گْوشتگ کہ ا تراک کنوکیں چیز آجوئی لوٹوکیں گل بلوچ لبریشن آرمی ءِ بوتگ اَنت کہ کراچی ءَ اُرشانی واستا کارمرد کنگی بوتگ اَنت۔

لاریک ءَ گْوشتگ کہ یک گاڑی یے ءَ تراکناکیں سامان ھوار بوتگ ءُ پہ اُرش ءَ تیار بوتگ۔ آئی ءِ رد ءَ اے شورو چہ بلوچستان ءِ گوریچانی روکپتی استان چہ کراچی ءَ سر کنگ بوتگ انت۔

مھسر ءَ گشتگ کہ کراچی ءَ چھاپہ پولیس ءُ انٹیلی جنس ایجنسیانی یکجائی آپریشن ءِ آسر انت۔ آئی ءِ گشگ ءِ رد ءَ بندات ءَ یک ملزمے دزگیر کنگ بوتگ ءُ جست ءُ پرس ءِ وھد ءَ آئی ءَ چہ دست کپتگیں ھالانی رد ءَ دگہ دو جرمکار دزگیر کنگ بوتگ انت۔ آئی ءَ گْوشتگ کہ نیٹ ورک ءِ رند ءِ باسکاں دزگیر کنگ ءِ ھاتر ءَ گیشیں بیڑ برگ بوھگ ءَ اِنت کہ آ چہ ھما جاہ ءَ جِستگ اَنت۔

تراکناکیں چیزانی دزکپگ ءِ کیس درج کنگ بوتگ ءُ کیس سرکاری شکایت ءِ ڈول ءَ سی ٹی ڈی ءَ درج کنگ بوتگ۔ واکداراں گشتگ کہ انسداد ناشرکاری ءُ تراکناک ایکٹ ءِ سیکشن کیس ءِ تہ ءَ ھوار کنگ بوتگ انت ءُ کیس ءِ تہ ءَ بلوچ لبریشن آرمی ءِ سروک بشیر زیب بلوچ ءُ آئی ءِ ھمراھانی نام گرگ بوتگ انت۔

بلوچستان ءِ مزن شھر چہ شال ءُ کیچ ءَ پاکستانی لشکر ءِ دست ءَ بیگواہ بیتگیں کسان سالیں بچکے ءَ ھوار چار مردم یل کنگ بیتگ اَنت۔

گیشیں ھالانی رد ءَ ھمے سال ءِ 4 جنوری ءَ چہ کلی کمبرانی ءَ زورانسری ءَ بیگواہ کنگ بیتگیں میر نصیب اللہ ءُ ورنائیں گوھرام گوں دگہ ھمراھاں یل بیتگ انت۔

ایشی ءَ ابید تربت ءِ دمگ سری کھن ءُ آسکانی بازار ءِ دو مردم ماجد ء مولا بخش جھمنند آسکانی بازر کہ پنچ ماہ ءُ پانزدہ روچ ءَ بیگواہ بوتگ ءُ نور احمد ء علی جان جھمنند سری کھن پنجاہ روچ ءِ بیگواھی ءَ پد یل بیتگ ءُ وتی لوگ ءَ سر بیتگ-

بلوچستان ءَ زورانسری بیگواھیانی ھلاپ ءَ پرکاریں باسکاں چہ سرکار ءَ دزبندی کتگ کہ دراھیں بیگواھیں مردماں کانود ءِ تَک ءَ دیم ءَ بیار انت ءُ سانمندیں کھولاں انساپ بہ دے انت-