شال، پشاور ءُ رؤکیں جعفر ایکسپریس ءِ سر ءَ اُرش، اُرش ءِ زمہ واری ءَ بلوچ ریپبلکن گارڈ ءَ من اتگ-
گیشیں ھالانی رد ءَ پنچ شمبے ءِ روچ ءَ بلوچستان ءِ دمگ سبی ءَ ریل ٹریک ءِ سر ءَ تراکے کنگ بوتگ کہ چہ پشاور ءَ شال ءَ آیوکیں جعفر ایکسپریس چہ اود ءَ گوزگ ءَ بوتگ۔
ریل ءِ بنشون ءِ رد ءَ تراک سبی ریل اسٹیشن ءِ نزیک ءَ ناشناسیں مردمانی دست ءَ کنگ بوتگ کہ چہ ایشی ءَ ریل ٹریک ءَ را تاوان رس اتگ ۔
وئیل ءَ پد پولیس ءُ سیکورٹی پورس ءِ مزنیں کچے ءَ جاہ ءَ سر بوتگ ءُ دمگ ءِ انگیر کتگ۔
دومی نیمگ ءَ رسانکدر ءَ رس اِتگیں بیانے ءِ تہ ءَ بلوچ ریپبلکن گارڈز ءَ اے اُرش ءِ زمہ واری زرتگ ءُ گْوشگ کہ بلوچ جنگولاں اوٹر سنگل ءِ نزیک ءَ جعفر ایکسپریس گوں ریموٹ کنٹرولیں آئی ای ڈی ءَ نشانگ کتگ۔
گل ءِ جارکش دوستین بلوچ ءِ رد ءَ چہ تراک ءَ ریل ءَ را سک باز تاوان رس اتگ۔ جارکش ءَ گیش گوشتگ کہ بی آر جی اے اُرش ءِ زمہ واری ءَ من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔
یات بہ بیت گوستگیں لھتیں روچاں بلوچستان ءِ دمگ بولان ءِ نزیک ءَ جعفر ایکسپریس ءِ پائلٹ انجن ءِ سر ءَ ناشناسیں سلاھبنداں تیرگواری کتگ ات کہ آئی ءِ تہ ءَ پائلٹ انجن نشانگ جوڑ کنگ بوتگ ات۔
چہ ایشی ءَ پیسر جولائی ءِ گڈسر ءَ جعفر ایکسپریس ءَ را شکار پور ءِ نزیک ءَ ھمایون شریف ءَ ریموٹ کنٹرول آئی ای ڈی ءِ ھم نشانگ جوڑ کنگ بوتگ ات کہ ایشی ءِ زمہ واری بی آر جی ءَ ھم من اِتگ۔
گل ءِ رد ءَ آ اُرش ءَ ٹرین ءِ تہ ءَ سواریں پاکستانی لشکر ءِ کارندہ نشانگ جوڑ کنگ بوتگ اَنت کہ ایشی ءِ آسر ءَ بازیں کارندہ ٹپیگ بوتگ اَنت وھدے کہ ٹرین ءِ بازیں بوگی ریل ءَ چہ دراتکگ اَنت۔
ھمے وڑ ءَ 18 جون ءَ بلوچ ریپبلکن گارڈاں جعفر ایکسپریس ءِ سر ءَ اُرش ءِ زمہ واری ھم من اتگ ات۔
یات بہ بیت کہ جعفر ایکسپریس یک ھاسیں ریل سروسے کہ شال ءَ بگر داں پشاور ءَ بازیں دوری ءِ سر ءَ رؤت ءُ گوستگیں وھداں ھم بازیں اُرشانی آماچ بوتگ۔
اے اُرشانی زمہ واری کچ ءُ کساسی ءَ بلوچ سلاہ بندیں آجوئی گلاں من اتگ انت-
اے سال ءِ مارچ ءَ بلوچ لبریشن آرمی ءَ ھم جعفر ایکسپریس ھائی جیک کتگ ات ءُ سواریں دو سد ءَ چہ گیش پاکستانی سپاھیگ گپتگ ءُ کشتگ انت ۔
