بلوچ لبریشن آرمی ءَ سالگشری کاروائیانی اھوال ‘ دک’ شنگ، اھوالاں سال 2025 ءَ کاروائیانی انفوگرافکس، اکس ءُ سرجمیں اھوال درشان کتگ انت-
رپورٹ ءَ گوشگ بیتگ کہ بلوچ لبریشن آرمی ءِ سرمچاراں سال 2025 ءَ دشمن بازیں پِڑاں پروش داتگ – بی ایل اے ءِ جنگولاں زورگریں پاکستانی پوج، آئی ءِ شریکدار، پوجی کار جاہ ءُ چاریگانی ھلاپ ءَ مھکمیں کاروائی برجاہ کتگ انت- بلوچ راجی آجوئی ءِ واستا بلوچ لبریشن ءِ سرمچاراں ترند ءُ جزبگ ءِ ھمراھی ءَ زورگریں پوج ءُ آئی ءِ شریکدارانی گچینی آپریشنانی نشانگ ءَ کتگ انت- ھمے وڑ سوبمندیں انٹیلی جنس بیسڈ کاروائی کتگ ءُ بستار ءِ راج وتی تاکت ءِ پدراھی کتگ-
رپورٹ ءِ رد ءَ بلوچ لبریشن آرمی ءِ سرمچاراں اے سال ءَ کچ ءُ کساسانی تک ءَ دشمن ءِ سر ءَ 512 اُرش کتگ انت- سرمچارانی اے اُرشاں 1060 ءَ گیش دشمن ءِ پوجی کارندہ کشتگ انت ءُ جتا جتائیں رنگ ءُ دروشمانی اُرشانی آسر ءَ 556 ءَ گیش پوجی ءُ چاریگ زدگ بیتگ انت- زورگریں پوج ءِ واستا چاریگری ءُ آسراتیاں ھواریں 75 کارندہ کشتگ انت- چریشانی توک ءَ بیڑی ءُ منانکیں جرماں پد بلوچ راجی آمیدگس ءَ مرگ ءِ سزا دیگ ھوار انت-
بی ایل اے ءِ سرمچاراں اے سال ءَ پانزدہ گچینی آپریشن کتگ انت کہ اے آپریشناں بی ایل اے ءِ گچینی باسک مجید بریگیڈ ءِ چار، فتح اسکواڈ ءِ شش ءُ اسپیشل ٹیکٹیکل آپریشن اسکواڈ ءِ پنچ کاروائی ھوار انت چریشانی توک ءَ زورگرین پوج ءُ آئی ءِ شریکداراں سک ءَ جانی ءُ مالی تاوانانی دیمپانی کنگ کپتگ- اے دراھیں آپریشناں بی ایل اے ءِ انٹیلی جنس ونگ ‘ زراب ’ ءِ گچینی کرد ھوار انت –
رپورٹ ءَ گوشگ بیتگ کہ اے سال ءَ جتا جتائیں رنگ ءُ دروشماں 212 تراکاں دشمن نشانگ کتگ کہ ایشانی توک ءَ یک سد ءُ دوازدہ آئی ای ڈی تراک ھوار انت – اے سرمچاراں دشمنیں پوج سک ءَ مالی تاوانانی دیمپانی کتگ، اُرشاں دشمنیں پوج ءِ 215 گاڑی ءُ پرپٹ، 35 کواڈ کاپٹر ےُ سرویلنس ڈرونز، 7 کمیونیکیشن ءُ سرویلنس ٹاورز، 3 ریل ءِ ٹریک تباہ کتگ انت-
گیش گوشگ بیتگ کہ سرمچاراں زورگریں پوج ءُ چہ آئی ءِ کمکاراں 208 جتا جتائیں رنگ ءُ ڈولیں سِلاہ پچگپتگ انت- ھمے وڑ 48 جاہ دستیگ کتگ انت چریشاں زورگریں پوج ءِ بنجل، پولیس ءُ لیویز ءِ کارگس، چوکی ءُ زھری، منگچر، سوراب، مستونگ ءُ پنجگور ءِ شھر ھوار انت- سرمچاراں سرجمیں بلوچستان ءَ شھدگانی سر ءَ 42 ءَ گیش جاھانی سر ءَ ناکہ بندی کتگ ءُ زورگریں پوج ءِ کارندھاں ھوار 366 کمکار دزگیر کتگ انت-
رپورٹ ءَ گوشگ بیتگ کہ بلوچ لبریشن آرمی ءِ مجید بریگیڈ ءَ 4 آپریشن کتگ انت، چریشانی توک ءَ کساسی 10 فدائیناں بھر زرتگ – مجید بریگیڈ ءِ فدائیناں آپریشن درِہ بولان ءِ دومی بھر ءِ درچ ءَ بولان ءَ پاکستانی پوج ءِ سدانی کچ ءَ کارندھانی بروکیں جعفر ایکسپریس ٹرین ءِ ھائی جیک کتگ ءُ ایشی ءَ سواریں کارندہ دزگیر کتگ انت ھمے وڑ ھمے آپریشن ءِ تَک ءَ نوشکی ءَ زورگریں پوج ءِ کارندھانی بروکیں بسانی کاروان نشانگ کتگ – مجید بریگیڈ ءِ سرمچاراں تربت ءُ دشت ءَ ھم زورگریں پوج ءِ بسانی کاروان اُرشانی نشانگ کتگ انت ءُ پوج ءِ سر ءُ پُر لرزینتگ انت-
رپورٹ ءَ گوشگ بیتگ کہ بلوچ لبریشن آرمی ءِ گچینی باسک فتح اسکواڈ ءُ اسپیشل ٹیکٹیکل آپریشنز اسکواڈ ءَ یازدہ آپریشن کتگ انت – اے باسکاں آپریشن درہ بولان ءَ گچینی کرد پیلو کنگ ءَ ھوار زھری ءُ منگچر ءِ شھر ءِ کنٹرول گپتگ – زورگریں پوج ءِ نوشکی، کلات ءُ شال ءَ ترندیں اُرشانی نشانگ کتگ چریشی ءَ دشمن ءِ میجر رینک ءِ آفیسر ھم کشتگ انت-
دک ءِ رپورٹ ءِ رد ءَ سال 2025 ءَ بلوچ لبریشن آرمی ءِ 72 سرمچاراں شھیدی وتی نام ءَ کتگ انت، چریشانی توک ءَ بی ایل اے مجید بریگیڈ ءِ 11 فدائین ھوار انت کہ آیاں زورگریں پوج ھترناکیں اُرشانی نشانگ کتگ ءُ ندر بیتگ انت – بلوچ لبریشن آرمی دشمنیں لشکر، آئی ءِ شریکدار، کارجاہ ءُ کمکارانی سر ءَ گیش ترندیں اُرشانی نشانگ ءَ ھما وھد ءَ برجاہ دار ایت دانکی دشمن چہ بلوچستان ءَ سرجم ءَ لڈ ءُ بار کنگ ءَ لاچار بہ بیت –
