TBP Balochi

گھار ءِ زورانسری آوار جنی سوب ءَ مئے کھول سک گم ءُ رنجاں دوچاریں، انساپ دیگ بہ بیت-

چہ ھب چوکی ءَ پاکستانی پوج ءُ چیریں ادارھانی نیمگ ءَ چہ آوار جنگ ءَ پد زورانسری بیگواہ کنگ بیتگیں زالبول ءِ برات ءُ کھول ءَ ھب پریس کلب ءَ پریس کانفرنس کنان ءَ زوت یل کنائینگ لوٹ کتگ-

ھب لسبیلہ پریس کلب ءَ پریس کانفرنس کنان ءَ زورانسری بیگواہ فاطمہ ء محمد قاسم سیزدہ جنوری ءَ اکرم کالونی ءَ برجاہ آئی ءِ لوگ ءَ چہ زورانسری بیگواہ کتگ-

برات ءِ رِد ءَ بازیں روچانی گوزگ ءَ ابید آیاں اے گوشگ بیگ ءَ نہ اِنت کہ آئی ءِ گھار کجا ءَ اِنت کجام بھتام یا جرم ءِ بنیاد ءَ آوار جتگ-

کھول ءِ گوشگ اِنت کہ آ ھب چوکی ءِ بنکی جھمنند اِنت ءُ دمگ ءِ مردم اے گپ ءِ گواہ اَنت آیانی کھول ھچ وڑیں درکانودی پُرکاریاں ھمگرنچ نہ اَنت، اگاں فاطمہ سر ءَ کجام وڑیں بھتامے ھست گُڑا آئی ءَ آمیدگس ءَ پیش بہ کن اِت-

آیاں پاکستانی ھکومت ءَ آمیدگس ءَ چہ لوٹ کتگ کہ فاطمہ ءِ یل کنائینگ ءِ ھاتر ءَ زوت کرد پیلو بہ کن اِت ءُ کھول ءَ انساپ بدے اِت-

اسلام آباد ءِ دمگی ءُ سیشن کورٹ ءَ 24 کلاک ءِ تہ ءَ وکیل ءُ انسانی ھکانی جھدکار ایمان زینب مزاری ءُ آئی ءِ لوگ واجہ ھادی علی چٹھا ءِ دزگیر کنگ ءِ پرمان داتگ۔

آمیدگس ءِ کاگدانی رد ءَ ایمان مزاری ءُ ھادی علی چٹھا ءِ سر ءَ سوشل میڈیا ءِ پوسٹانی بنشون ءَ زبانی بنیاد ءَ تپاوت ءِ سبب جوڑ کنگ ءُ اے پُرزور دیگ بوتگ کہ پاکستانی لشکر ناشرکاری ءِ تہ ءَ ھوار اِنت ءُ خیبر پختونخوا ءُ بلوچستان ءَ بیگواھیں مردمانی جیڑھانی زمہ واری سیکورٹی پورسز ءِ سر ءَ ایر کنگ ءِ بھتام جتگ۔

دومی نیمگ ءَ آمیدگس ءِ پیسلگ ءِ سر ءَ پژدر پیش کنان ءَ ایمان مزاری ءَ گْوشتگ کہ اے گپ سک پدّر اِنت کہ اے کیس ءِ بندات ءَ چہ ایشی ءِ یکیں مول ءُ مراد ایش اِنت کہ آھاں زندان ءَ بہ کنت۔

آئی ءَ گوشتگ کہ اے ھما رویش اِنت کہ پیسر ءَ ٹرائل کورٹ ءَ زرتگ ات، وھدے کہ آئی ءِ نابودی ءَ یک نیمگی کارروائی کنگ بوتگ ءُ آئی ءَ را جُست ءُ پُرس ءِ پسو دیگ ءِ ھچ وڑیں ھک دیگ نہ بوتگ۔

ایمان مزاری ءَ گیش گْوشتگ کہ نوں یک رندے پد ءَ نہ ایوک ءَ آئی ءِ پسھی جستاں ءُ وت ءَ پھریزگ ءِ بنیاتی ھک ھلاس کنگ بوتگ بلکیں آمید گس ءَ اے ھم پرمان داتگ کہ آ ایوک ءَ ویڈیو لنک ءِ وسیلگ ءَ پیش کنگ بہ بیت۔ آئی ءِ گشگ ءِ رد ءَ اے کار ءِ مول ءُ مراد پدّر اِنت، نہ آمیدگس ءَ جسمانی ھست بوھگ ءُ نہ پسھی ءُ نہ وت ءَ پھریزگ کنگ ءِ ھست۔

زانگ بہ بیت بازیں ماھے بیت کہ ایمان مزاری ءِ آمید گس ءِ کارروائی برجاہ انت۔ ایشی ءَ چہ پیسر آمیدگس ءَ ایمان مزاری ءُ آئی ءِ لوگ واجہ ءِ دزگیر کنگ ءِ پرمان داتگ ات کہ آئی ءِ وکیلاں چیلنج کتگ۔ بلے نوں یک رندے پد ءَ آمیدگس ءَ دوئیں وکیلانی دزگیر کنگ ءِ پرمان داتگ۔

پاکستان ءَ انسانی ھکانی لگتمالی ءِ ھلاپ ءَ توار چست کنگ ءَ ایمان مزاری ءُ ھادی علی چٹھا دیم ءَ بوتگ اَنت۔ ایشاں چہ بلوچستان ءَ بیگواھیں مردمانی کھول ءُ بلوچ یکجھتی کمیٹی ءِ سروکانی کیس ھم پد ءُ رند کتگ اَنت۔

انسانی ھکانی گل ءُ ھمے رنگ ءَ بلوچ سیاسی گل ءُ چہ بلوچستان ءَ بیگواھیں مردمانی سیاد ءُ وارساں ھم ایمان مزاری ءِ ھلاپ ءَ برجاھیں ارزی ءِ سر ءَ دلپدردی درشان کتگ۔

اے ھکانی گشگ انت کہ ایمان مزاری ءَ بلوچستان ءَ برجمیں زوراکیں بیگواہ کنگ ءِ ھلاپ ءَ توار چست کنگ ءِ سبب ءَ نشانگ جوڑ کنگ بوگ ءَ انت۔

بلوچ سیاد ءُ وارساں گشتگ کہ پاکستان ءَ ھرکس بلوچ ءِ ھک، کمتری ءُ آئین ءُ کانون ءِ ھکمرانی ءِ گپ کنگ گدار نامینتگ انت-

ایشانی رد ءَ اے گپ نوکیں گپے نہ اِنت بلے پاکستان ءِ تہ ءَ ھما زوراکیں تاکتانی دیری ءِ راجدپترے ھست کہ آ ایماندار ءُ دلیریں مردماں گدار گْوشگ ءَ اِنت، مرچی ھمے درچ ءِ رد ءَ ملک ءِ یک مزنیں آبادی یے چندیں زوراکیں مردمانی چماں گدار گْوشگ بیگ ءَ اَنت۔

بلوچ سیاد ءُ وارساں گْوشتگ کہ ما گوں ایمان مزاری ءَ ھمکوپگ اوشتاتگ ءُ ھاموش نہ بہ ایں۔

ایشاں چہ میان اُستمانی براتی ءُ میان استمانی انسانی ھکانی گلاں لوٹ کتگ کہ آ پاکستان ءِ سر ءَ زور بہ دنت کہ ایمان مزاری ءُ دگہ پرامنیں انسانی ھکانی کارکنانی آزار ءُ اذیت ءِ بند کنگ بہ بیت۔

بلوچ یکجھتی کمیٹی ءِ بندیگیں سروک مھرنگ بلوچ ءَ ھم گوستگیں ماہ ءَ چہ زندان ءَ نبشتگیں نمدی یے ءِ تہ ءَ ایمان مزاری ءُ ھادی علی چٹھا ءِ گوما یکجھتی ءِ درشانی کتگ ءُ گْوشتگ کہ من ایمان مزاری ءُ ھادی علی چٹھا ءِ گوں انساپ، انسانی ھک ءُ ھر یکے ءِ جھد ءَ سرجمیں یکجاھی ءَِ اوشتاتگ آں ۔

ماہ رنگ بلوچ ءَ گشتگ کہ ایمان ءُ ہادی ءِ ھمت ءُ جھد ءِ سر ءَ ھاموش-

آئی ءَ گوشتگ کہ بازیں سالاں چہ ایمان مزاری ءُ ھادی علی چٹھا انسانی ھکانی وکالت ءِ تہ ءَ دیم ءَ بوتگ اَنت، چیرتر اتگءں تواراں دیم ءَ آرگ ءَ اَنت ءُُ ھر وڑیں ناانساپی ءُ زلم ءِ ھلاپ ءَ توار چست کنگ ءَ اَنت۔

آئی ءَ گیش گوشتگ کہ آھانی ھلاپ ءَ جوڑ کتگیں کیس ریاست ءِ زوراکیانی پندلاں پدر کنت ءُ اے گپ ءَ پدر کنت کہ انساپ ءِ نزام چہ ھما مردمانی ھلاپ ءَ آسانی ءَ کارمرد کنگ بیت کہ آ بنیاتی انسانی ھکانی پھریزگ ءَ انت۔

بلوچ یکجھتی کمیٹی ءَ وتی دو جتا جتائیں بیانانی تہ ءَ گْوشتگ کہ بلوچستان ءِ جتاجتائیں دمگاں ریاستی کمک ءَ جوڑ بیتگیں سلاہ بندیں ڈیتھ اسکواڈانی کارروائیانی تہ ءَ دو مردم زورانسری بیگواہ کنگ ءُ پد ءَ درکانودی کُشگ بیتگ اَنت کہ رند ءَ ایشانی لاش چہ جتاجتائیں جاھاں دست کپتگ اَنت۔

بیان ءِ تہ ءَ گْوشگ بیتگ کہ کیچ ءِ دمگ نوانو زمران ءَ سیادی داروکیں ملا رزاق ء داد محمد 14 جنوری 2026 ءَ سلاہ بندیں مردماں چہ آئی ءِ لوگ ءَ بے وارنٹ ءُ درکانودی ءَ آوار جتگ۔ دمگی بنشون ءِ رد ءَ آوار جنوک گوں ریاستی کمک ءَ ڈیتھ اسکواڈ ءَ سیادی دار اَنت۔

چمدیستگین مردمانی رد ءَ ملا رزاق چہ آوار جنگ ءَ یک روچے ءَ پد 15 جنوری 2026 ءَ لٹ ءُ کٹ کنگ ءَ پد کُشگ بوتگ ءُ آئی ءِ ٹپ ءُ ٹوریں لاش پد ءَ چہ سمسوری کور ءَ دزکپتگ کہ آئی ءِ لاش ءِ سر ءَ سَکا ترندیں لٹشاپی ءِ پدریں نشانی گندگ بوتگ اَنت۔

بیان ءِ تہ ءَ گوشگ بوتگ کہ ملا رزاق لس مردم ءُ وتی کھول ءِ واستا روزگار ءَ بوتگ۔ آئی ءِ کُشگ بلوچستان ءَ برجاھیں زورانسری بیگواہ کنگ ءُ درکانودی ءِ کشگ ءِ دگہ یک مسالے ۔

آئی ءَ گیش گْوشتگ کہ دومی وئیل ءَ آواران ءِ دمگ گیشکور ءَ میڈیکل ڈسپینسری ڈاکٹر ظریف بلوچ ء محمد یعقوب 14 جنوری 2026 ءَ شپ ءِ 5بج ءِ نزیک ءَ سلاہ بندیں مردماں چہ آئی ءِ میڈیکل اسٹور ءَ آوار جتگ۔

چمدیستگیں مردمانی گشگ ءِ رد ءَ سلاہ بندیں مردماں ڈاکٹر ظریف بلوچ روچ ء رھمانی ءَ ءُ بس دو کلاک ءَ پد شپ ءِ 7 بج ءِ نزیک ءَ کشگ بیتگ۔ آئی ءِ لاش پد ءَ چہ ھوتان کور ءَ دزکپتگ کہ آئی ءِ سر ءَ لٹ شاپی ءِ نشانی گندگ بوتگ اَنت۔

داکٹر ظریف بلوچ جاندراھی ءِ واستا یک ڈاکٹرے بیتگ دمگی آبادی ءَ را درمانی بنیاتی آسراتی دیگ ءَ بیتگ۔ آئی ءِ کوش نہ ایوک ءَ انسانی ھکانی سر ءَ تچک ءَ اُرش اِنت بلکیں میڈیکل ءِ پڑ ءِ سر ءَ ھم دیم پہ دیم اُرش اِنت۔

بیان ءِ تہ ءَ گوشگ بیتگ کہ دوئیں وئیل بلوچستان ءَ زورانسری ءَ بیگواہ کنگ، درکانودی کوش ءُ سرجمیں سزائی ءِ برجاھیں دروشم ءِ درشان ءَ کن اَنت۔ شھری، نودربر، استاد ءُ جان سلامتی ءِ کارندھانی نشانگ جوڑ کنگ ءَ چہ نہ ایوک ءَ چاگرد ءِ درچ ءِ ھلاس کنگ بوھگ ءَ اِنت بلکیں دمگ ءَ ترس ءُ بیم، بدامنی ءُ سکا نپسیاتی پریشانی ھم پیداک کنگ ءَ اِنت۔

انسانی ھکانی جھدکاراں لوٹ کرتگ کہ بلوچستان ءَ اے سنگینیں انسانی ھک لگتمالیانی سر ءَ زوت میان اُستمانی پٹ ءُ پول کنگ بہ بیت ءُ زمہ وار آمید گس ءَ پیش کنگ بہ بنت۔

بلوچ یکجھتی کمیٹی ءِ بنجاھی رھشون سمی دین بلوچ ءَ یک ویڈیو بیانے ءِ تہ ءَ گشتگ کہ ریاست ءَ بلوچستان ءَ زورانسری بیگواہ کنگ، درکانودی کوش ءُ لٹ شاپ کتگیں لاشانی چگل دیگ یک زوریں پالیسی ءِ سر ءَ امل بیگ ءَ انت۔ اے ناگیگی روچ پہ روچ گیش بوگ ءَ اِنت۔ نوں اے زلم ءُ زوراکی ایوک ءَ مردینانی تَک ءَ نہ انت بلکیں جنین آدم ھم زورانسری آوار جنگ ءُ زنداناں دارگ بوگ ءَ اَنت۔ پاکستانی ریاست بلوچ راج ءِ نشانگ جوڑ کنگ ءَ ھچ رنگیں دَر پشت گیجگ ءَ نہ انت-

آئی ءَ گوشتگ کہ اے درگت ءَ زورانسری بیگواہ کنگ یا درکانودی ءَ کشگ ءِ ھرچ وئیل ءِ سجوئیں دزنویشت جوڑ کنگ سک باز المی اِنت ھاسیں رنگ ءَ ھما کیس کہ انگت ءَ ھچ سرکاری یا درسرکاری ادارگ ءَ درج نہ بوتگ اَنت۔ اے سانمندیں کھولانی زمہ واری اِنت کہ اے کیسانی رجسٹریشن ءَ دلستکی بہ کن اَنت۔

ویڈیو بیان ءِ تہ ءَ گوشگ بوتگ کہ اے وھد ءَ (بلوچ یکجھتی کمیٹی) اے سرپدیانی سر ءَ کار کنگ ءَ انت ۔ ما چہ درستیں مردماں دزبندی کنیں کہ آ وتی کیساں چہ بی وائی سی ءَ رجسٹر بہ کن اَنت: سوشل میڈیا اکاؤنٹس، ای میل ءُ بی وائی سی ءِ انسانی ھکانی نمائندگاں سر بہ کن انت۔

ما چہ شما گیشتر دزبندی کنیں کہ اے کیساں زوتاں چہ زوت دیم بہ دئے اِت۔ مئے زانشت ءِ رد ءَ وھدے کہ کیسے رجسٹرڈ نہ بیت یا ھچ وڑیں رسمی ریکارڈ ءِ بھر نہ بیت ءُ پد ءَ آ مردم کُشگ ءُ لاش ءِ رنگ ءَ ایر کنگ بیت گڑا آماچیں ھاندان ءُ گل ءِ گور ءَ ھما ھژدری سبوت نیست کہ آ اے گپ ءَ سابت بہ کنت کہ آ مردم زورانسری ءَ بیگواہ کنگ بوتگ۔ کیس رجسٹریشن مئے گپ ءَ دیم ءَ سر کت کنت-

آئی ءَ گْوشتگ کہ وھدے ما گوں میان اُستمانی برادری ءَ بلوچ نسل کشی ءِ بابت ءَ گپ ءُ تران کن ایں کہ ایشی ءِ تہ ءَ آزار ءُ درد، زورانسری ءَ بیگواہ کنگ ءُ نپسیاتی ٹارچر ھوار اَنت گڑا مئے واستا المی اِنت کہ ما ھر یک مردمے ءِ کسہ ءُ ھر کیس ءِ سرجمیں ریکارڈے بہ بیت۔ میان اُستمانی تَک ءَ اے جوانیں توار ھما وھد ءَ ممکن اِنت کہ شما مئے گوما ھمکاری بہ کن اِت ءُ لوٹوکیں ھال ءُ اھوالداری ءِ دیم ءَ آرگ ءَ کیس ءَ رجسٹر بہ کن اِت۔

گڈسر ءَ آئی ءَ گْوشتگ کہ وتی دوستیں مردمانی ساہ ءَ سرانی رکھینگ ءِ ھاترا زوت کیس نبشتہ بہ کن اِت۔

بلوچ سلاہ بندیں گلانی اُرشاں سال 2022 ءُ 2025 ءِ میان ءَ اُرشانی توک ءَ 63 درسد گیشی بیتگ، یکشل ءَ چار سالانی توک ءَ 4515 پاکستانی پوجی کُشگ بیتگ انت ، ایشانی توک ءَ 50 درسد بلوچ لبریشن آرمی (بی ایل اے) ءَ کتگ انت ءُ 50 درسد دگہ بلوچ سلاہ بندیں گلاں کتگ انت- اے وھداں کساسی 331 بلوچ جنگول جنگ بیتگ انت – ءُ اے جنگ داں دور دور ءَ تالان بوتگ کہ ایشی ءِ توک ءَ 1079 جاہ ھوار انت- چُشکہ اے آپریشنل ءِ گیشی ءُ ترندی ءِ نشانی ءَ کن انت-

گوستگیں چاراں پاکستانی پوج ءِ کُشگ بیتگیں کارندھانی 50 درسد بی ایل اے ءَ کتگ انت- گوستگیں چار سالانی وھد ءَ پاکستانی سیکیورٹی پورس ءِ بیرانیانی توک ءَ یکشل ءَ گیشی اتکگ انت – کہ ایشانی توک ءَ چار ٹِکاں کچ ءُ کساس سر بیتگ انت اے وھدانی میان ءَ بی ایل اے ءِ کاروائیاں ھواریں پاکستانی پوج ءِ بیرانیانی کساسانی توک ءَ یک اندازگے ءَ 44 درسد گیش بیتگ انت، ھمے وڑ 2022 ءُ 2025 ءِ میان ءَ اُرشاں 40 درسد (سی اے جی آر) ءِ تَک ءَ گیشی اتکگ انت- گوستگیں سال درستاں ھترناکیں اُرشاں جعفر ایکسپریس ءِ ھائی جیک کنگ ءُ نوشکی ءَ بسانی کاروان ءِ سر ءَ اُرش،کساسی رنگ ءَ 450 پنجاہ پاکستانی پوج ءِ کارندہ کشگ بیتگ انت- ءُ گوستگیں سال ءَ سلاہ بندیں اُرش ریکارڈ کنگ بیتگ انت گڑا ھما سال ءَ بی ایل اے ءِ 72 جنگول جنگ بیتگ انت چریشانی توک ءَ 10 ، فدائین، ھوار انت ءُ آد دگہ جنگول جنگ ءُ ڈرون اُرشاں جنگ بیتگ انت-

گوستگیں چار سالانی وھد ءَ بلوچستان لبریشن فرنٹ ( بی ایل ایف) ءِ پرکاری یکشل ءَ گیشی بیتگ انت- اُرشاں 49 درسد گیشی (سی اے جی آر) گیشی بیتگ انت- ءُ ھمے وھداں بی ایل ایف ءِ نیمگ ءَ 38 درسد بیرانی نامینگ بیتگ انت- گوستگیں سال گچینی بیتگ چریشی ءَ آئی ءِ نوک دیم ءَ اتکگیں ونگ ‘سوب’ ءُ نوکنڈی ءَ ‘ فدائی’ اُرش سرجم کتگ چُشکہ گل ءِ نیمگ ءَ درستاں ھترناک ءُ گچینی اُرش بیتگ ءُ آپریشن بام ءِ نام ءَ ھم سلاہ بندیں جنگ بیتگ ءُ آ سال ءَ بی ایل ایف ءِ 42 جنگول جنگ بیتگ انت ءُ ایشانی توک ءَ شش فدائی ھوار انت ءُ بی ایل ایف ءِ جنگول سلاہ بندیں جنگ ءُ ٹارگٹڈ کاروائیاں ھم جنگ بیتگ انت-

2022 ءُ 2025 ءِ میان ءَ براس ( بلوچ سلاہ بندیں گلانی ھمسنت) ھواریں اُرشاں کساس 342 درسد گیشی اتکگ انت ھمے وڑ پاکستانی پوج ءَ بیتگیں جانی تاوان کساس 307 درسد انت چُشکہ براس ءِ آپریشناں ترندیانی نشانی ءَ کن انت-2025 ءَ براس گچینی گامگیجانی پدراھی کتگ انت چریشی ءَ ھزدار زھری ءَ یک ماھے ءَ وتی کنٹرول ءَ کنگ ءُ ھمے وھد ءَ براس ءِ جنگولاں بازار ءَ گشت کتگ ءُ مھلوک ءَ گوں تران کتگ- ءُ براس ءَ مارچ ءُ اگست ءَ ترندیں اُرش کتگ انت ءُ پنجگور ءِ دمگ گوران ءَ پوجی بنجل ءِ دستیگ کنگ ھوار انت-

دگہ آجوئی لوٹوکیں گل چُشکہ بی آر جی، بی آر اے ءُ یو بی اے ءِ اُرشانی توک ءَ 25 درسد گیشی اتکگ انت ءُ پاکستانی پوج ءِ بیرانی توک ءَ 13 درسد گیشی اتکگ انت- اے گلاں بنکی رنگ ءَ انفراسٹراکچر ءُ ریاستی جاہ اُرشانی نشانگ کتگ انت ءُ سندھ ءُ پنجاپ ءَ اے گل 34 دمگاں پرکار بیتگ انت-

بلوچستان ءَ سال ءِ بنداتی ءَ زورانسری آوار جنی ءُ زورانسری آوار جنگ بیتگیں مردمانی لاشانی دور دیگ درچ یکشل ءَ برجاہ ءَ اِنت-

گیشیں ھالانی رِد ءَ پاکستانی پوج ءَ مھران ء بیگ محمد جھمنند بل نگور ، دشت تربت نادُراھجاہ ءَ چہ شپ ءِ ساھت دو ءَ آوار جتگ ءُ ناشناسیں جاھے ءَ برتگ – زورانسری بیگواہ کنگ بیتگیں مھران نرسنگ ءِ ھیلکاری ءَ بیتگ-

ھمے وڑ سی یک سالی ئیں سھیل ء لال بخش جھمنند پروم پنجگور چاردہ جنوری 2026 ءِ شپ ساھت دو ءَ چہ لوگ ءَ زورانسری بیگواہ کتگ-

دومی نیمگ ءَ پاکستانی پوج ءِ دست ءَ جتاجتائیں دمگاں آوار جنگ بیتگیں شش مردم یل کنگ بیتگ اَنت-

یل بیتگینانی تہ ءَ سیزدہ جنوری 2026 ءَ آوار جنگ بیتگیں منیر ء جان محمد جھمنند پانوان، ھپت جنوری 2026 ءَ آوار جنگ بیتگیں امجد ء محمد جھمنند مستونگ، صغیر الٰھی ء الٰھی بخش، سلام ء خالد ءُ سراج ء برکت جھمنند ھوت آباد کیچ چاردہ جنوری 2026 ءَ یل کنگ بیتگ اَنت، ھپت جنوری 2026 ءَ آوار جنگ بیتگیں فضیل رفیق ء محمد رفیق جھمنند بلگاثر، کیچ، چاری جنوری 2026 ءَ چہ بالیچہ تمپ ءَ یل کنگ بیتگ، بیست اکتوبر 2025 آوار جنگ بیتگیں پرویز ء سفر جھننند کیلکور کیچ سیزدہ جنوری 2026 ءَ سی ڈی کارگس تربت کیچ ءَ یل کنگ بیتگ-

دومی نیمگ ءَ کیچ ءِ تھسیل زامران نوانو ءِ جھمنند ملا رازق ءِ لاش دزکپتگ-

دمگی اِھوالکار ءِ رِد ءَ ملا رزاق ء داد محمد ھمے سال چاردہ جنوری ءَ ریاستی چیردستی ءَ پُرکاریں سلاہ بندیں ڈیتھ اسکواڈ ءَ زورانسری بیگواہ کتگ-

دمگی اِھوالکار ءُ کھول ءِ رِد ءَ ملا رزاق آئی ءِ دمگ ءَ چہ بید چشیں کانودی وارنٹ ءَ آوار جتگ-

آئی ءَ گوشتگ بژن اِنت کہ زورانسری بیگواھی ءَ تھنا یکروچے ءَ پد، پانزدہ جنوری 2026 ءَ ملا رزاق ءِ ٹپ ءُ ٹوریں لاش دزکپتگ – لاش ءِ سر ءَ بے کساس ٹپّانی نشان ھست بیتگ اَنت، کہ اے گپ ءِ پدری ءَ کنت آ آوار جنی ءِ وھد ءَ بے دردی ءَ کشتگ-

زانگ بہ بیت سیزدہ جنوری 2026 ءَ چہ پنجگور ءِ وشبود ءَ ڈیتھ اسکواڈ ءِ کارندھانی دست ءَ آوار جنگ بیتگیں زوھیب احمد ءِ لاش ھم دزکپتگ اَت-

زانگ بہ بیت سال ءِ بنداتی ماہ ءَ سیزدہ ءَ گیش بیگواھیں مردمانی لاش دزکپتگ اَنت-

نوکتریں ھالانی رد ءَ بلوچستان ءِ شھر ھاران بلوچ سلاہ بندیں مردماں وتی کنٹرول ءَ کتگ-

دمگی مردمانی رد ءَ شھر ءِ جتا جتائیں جاھاں بلوچ سلاہ بندیں مردم گشت کنگ ءَ انت ءُ شھر ءَ چِک ءُ تان کنگ ءَ انت-

چاگردی رسانکجاھاں شنگ بیتگیں تامر بنداں گندگ بیت بازیں کچے ءَ سلاہ بند شھر ءَ گاڑی ءُ پرپٹاں گوں گشت جنگ ءَ انت-

اود ءَ بلوچ سلاہ بند بلوچ مھلوک ءَ گوں شرپ ءُ شان ءِ نگاھے ءَ پیش آیگ ءَ انت –

دومی نیمگ ءَ بلوچ سلاہ بنداں شھر ءِ دکانی سر ءَ سنگر گپتگ ءُ پورسز ءِ سر ءَ اُرش کنگ ءَ انت-

زانگ بہ بیت چِد ءُ پیش زھری ءُ پنجگور ءَ ھم ھمے داب ءَ بلوچ سلاہ بنداں شھر وتی کنٹرول ءَ کتگ انت-

بلوچستان لبریشن فرنٹ ءِ جارکش میجر گْوھرام بلوچ ءَ وتی درشانے ءَ گوشتگ کہ بلیدہ ءِ ھند زامران ءَ ھشت جنوری 2026 ءِ سھب ءِ ادار دہ ءَ پاکستانی پوج ءَ گل ءِ بنجل ءِ سر ءَ ڈرون اُرشے کرتگ۔ چریشی ءِ آسر ءَ بی ایل ایف ءِ چار سرمچار نمیران بیتگ اَنت۔ نمیران بیتگیں سنگت حسین پنّام ءِ کمال بلوچ، اکبر پنام تاھیر بلوچ، وسیم پنام میرو بلوچ ءُ حزیفہ پنّام ءِ نودان بلوچ اِنت۔ گل وتی اے دلیر ءُ مھنتی سنگتاں سھرچکیں دروت ندر کنت۔

جارکش ءَ گوشتگ کہ کیپٹن حسین پنّام ءِ کمال بلوچ ء عبدلغفور بلیدہ گلی چیئرمن بازار ءِ جھمنند اِنت یازدہ پروری 2021 ءَ گل ءَ ھوار بوتگ۔ حسین پنّام ءِ کمال یک دلیر ءُ مھنتی سنگتے بیتگ ءُ بنجل ءِ ڈپٹی کمانڈر ءِ بستار ءَ یک جوانیں کردے پیلو کرتگ۔ آئی ءِ بنجل ءِ ھیلکاری ءُ سنگراں شوربندی ھورت چاری کرتگ ءُ ھمک پیسلہ ءِ سر ءَ گوں بامردی ءَ اوشتاتگ۔ آئی سروکی ءُ مھکمی پہ سنگتاں مادنیں کشکے بیتگ ءُ گل ءِ کاروان مھکم کرتگ۔ کیپٹن حسین پنّام ءِ کمال ءِ دیمونی ءُ کردار سنگتانی توکل ءَ مھکم کنت ءُ پہ آیوکیں پدریچاں یک مسالے۔ گل مدام آئی جپا کشی ءُ دیمونیاں گیر کار ایت ءُ آئی کردار پہ مدامی زندگ مان اِیت۔

جارکش ءَ گوشتگ کہ اکبر پنّام ءِ تاھیر بلوچ ء یعقوب بلیدہ میناز ءِ جھمنند اِنت ءُ آ سیزدہ مارچ 2025 ءَ گل ءَ ھوار بیتگ۔ آ لھتیں وھد ءَ پیش گل ءِ بنجل ءَ آتکگ اَت ءُ آ گل ءِ شھری کاراں پُرکار بیتگ۔ بنجل ءَ آیگ ءَ کمیں وھد ءِ تہ ءَ وتی دلیری، مھنتی ءَ پہ ھمک سنگت ءَ یک مسالے جوڑ بیتگ۔ آئی ءَ ھمک زمہ واری گوں پابندی ءَ سرجم کرت ءُ جتاجتائیں سنگراں جوانیں کردے پیلو کرتگ۔ گل آئی دیمونی ءُ جھد ءَ پہ مدامی گیر کار ایت۔

جارکش ءَ گوشتگ کہ وسیم پنّام ءِمیرو بلوچ ء رسول بکش دشت ءِ جھمنند اِنت ءُ دہ ستمبر 2025 ءَ گل ءَ ھوار بیتگ۔ کمیں وھد ءِ تہ ءَ گل ءِ بنجل ءَ آتکگ بیتگ چہ ایشی ءَ پیش آ گوں گل ءِ سنگتاں اِھوال کنگ ءَ بیتگ ءُ راشن ءُ گوں آدگہ سامانانی کاراں بندوک بیتگ۔ وسیم پنّام ءِ میرو وتی جھد ءُ مھنت ءَ پہ ھمک سنگت ءَ توکلے جوڑ بیتگ اَت۔ آئی ءِ توکل ءُ نوکیں کار ءِ دربرگ ءِ جوزگ آئی ءَ ھمک سنگر ءَ یک نامے بکش اتگ۔ آئی ءَ وتی زمہ واری گوں دل ستک ءَ سرجم کرتگ ءُ پہ ھمک کار ءَ جاڑیگ بیتگ۔ آئی ءِ دیمونی مھکمی پہ مدامی یاد کنگ بنت۔

جارکش ءَ گوشتگ کہ حزیفہ پنّام ءِ نودان بلوچ ء نور حامد جھمنند مند دہ ستمبر 2025 ءَ گل ءَ ھوار بیتگ۔ بنجل ءَ آیگ ءَ پیش گوں سنگتاں ا اِھوال کنگ ءَ بیتگ۔ حزیفہ پنّام ءِ نودان یک مھنتی ءُ پرز شناسیں سنگتے اَت۔ آئی ءَ چہ وتی جھد ءُ توکل ءَ پہ دربرگ ءِ جوزگ ءَ ھمک سنگت ءَ یک مسالے بیتگ۔ آئی ءِ ھمک چیز گوں ھورتی ءَ چار اِتگ ءُ ھر وھد ءَ دربرگ ءُ کار کنگ ءِ جھد کرتگ۔ آئی جھد ءُ مھنت پہ سنگتاں مادنیں کشکے ءُ گل ءِ کاروان ءِ مھکم کنگ ءَ آئی کردار پیش داشتگ۔

آئی ءَ گوشتگ کہ بی ایل ایپ ءِ نمیران بیتگیں سنگتاں وتی زمہ واریانی پیلو کنگ ءَ پہ سرڈگار ءِ رکّینگ ءَ جھد ءِ بھر بیتگ اَنت۔ آیانی دیمونی ھمے پیش دار اَنت کہ زوراکی، آزاردھی ھچ راج ءِ توکل ءَ نزور کرت نہ کنت۔ دژمن ءِ زوراکی بلوچ مھلوک ءِ زانت ءُ گھگیری جوزگ ءَ کدی نزور کرت نہ کنت۔

میجر گوھرام بلوچ ءَ گوشتگ کہ شھیدیں سنگتاں ستک شانی ندر کن ایں۔ دیمونی بیھال کنگ نہ بنت ءُ شھیدانی ھون آیانی جوزگ ءُ دیمونی مدام گوں بلوچ راج ءِ زانت، توکل ءُ آجوئی ءِ جھد ءَ زندگ بنت۔ اے رژن پہ ھمک آیوکیں پدریچ ءَ توکلءُ دیمونی ءِ کلوہ ءَ سر کنت۔

اے دیمونی پما پھر ءِ چیدگ اَنت ءُ ھمے ترانگ ءَ گیج اَنت کہ آجوئی ءِ راہ ارزان نہ اِنت۔ ھمے سوب ءَ جوزگ ءُ مھنت الّمی اِنت۔ ما وتی شھیدانی یات ءَ پہ مدامی زندگ دارین ءُ آیانی واب ءِ پیلو کنگ ءَ جھد ءَ برجاہ دار ایں۔

بلوچ ریپبلکن گارڈز ءِ جارکش دوستین بلوچ ءَ رسانکدر ءَ شنگ کتگیں یک بیانے ءِ تہ ءَ گْوشتگ کہ گْوستگیں شپ ءَ بلوچ ریپبلکن گارڈز ءِ سرمچاراں ڈیرہ بگٹی ءَ زین کوہ چوکی نمبر 6 ءِ نزیک ءَ تراکناک شورواں گوں گیس ءِ پائپ لائن تباہ کتگ۔

آئی ءَ گوشتگ ھمے وڑ مئے سرمچاراں بلوچستان ءِ دمگ کچھی ءِ دمگ ڈھاڈر ءِ نزیک ءَ جاسوسی ءِ واستا ھستیں یوفون ٹاور تراکناکیں شورواں گوں تراکینتگ-

جارکش ءَ گْوشتگ مئے گل بی آر جی اے اُرشانی زمہ واری ءَ من ایت ءُ مئے اے وڑیں اُرش داں بلوچستان ءِ آجوئی ءَ برجاہ مان اَنت۔