TBP Balochi

بلوچستان ءِ دمگ ڈیرہ مراد جمالی ءَ ناشناسیں سلاہ بندیں مردماں پاکستانی لشکر ءِ کاروان ءِ سر ءَ اُرش کتگ ءُ دگہ یک وئیلے ءَ تراکناکیں شوروانی تراک ءَ ٹرانسمیشن ءِ مستریں لائن تباہ کنگ بوتگ۔

دمگی مردمانی گشگ انت کہ اے اُرش گوستگیں شپ ءَ بیدار پھل ءِ نزیک ءَ بوتگ۔ ھالرسان ءِ رد ءَ یک مزنیں افسرے ءِ گاڑی کہ آئی ءِ تہ ءَ کرنل ءِ رینک ءِ افسر (ونگ کمانڈر) سوار بوتگ، کاروان ءِ بھر بوتگ۔

جانی ءُ مال ءِ تاوان ءِ ھال انگت ءَ پدر نہ بوتگ انت۔

دومی نیمگ ءَ ڈیرہ مراد جمالی ءِ دمگ میر حسن ءِ نزیک ءَ اوچ پاور پلانٹ ءَ روگ ءَ دو مستریں کمبھ ھم گوستگیں شپ ءَ ناشناسیں مردمانی نیمگ ءَ تراکناکیں شوروانی تراک ءَ تاوان بوتگ اَنت ایشی ءَ پد بجلی ءِ سپلائی بند کنگ بوتگ۔

بلوچستان ءِ دمگ مستونگ ءِ ھند دشت ءَ کاؤنٹر ٹیررازم ڈپیارنمنٹ (سی ٹی ڈی) ءَ انٹیلی جنس بیسڈ آپریشن ءِ میان ءَ بلوچ لبریشن آرمی( بی ایل اے) ءِ سیادی داروکیں پنچ مردمانی کُشگ ءِ ٹاہ داتگ- بلے گوستناک ءَ سی ٹی ڈی ءَ بازیں کاروائی ءِ سر ءَ چست بیتگیں جست ءُ درکانودی کوش بھتام ءَ اے نوکیں کاروائی ءَ ھم شکی گوشگ بیگ ءَ اِنت-

سی ٹی ڈی ءِ جارکش ءِ رِد ءَ اے کاروائی نوزدہ جنوری ءَ بیگاہ چار چل پنچ ملٹ سر ءَ ھمے وھد ءَ کنگ بیتگ وھدے ادارہ چیریں ادارھانی ھال سر بیتگ کہ سلاہ بندیں مردم مستونگ ءِ دمگ دشت ءِ نزیک ءَ کوھی دمگ ءَ ساڑی اَنت ءُ شال – سبی شھدگ بند کنگ ءِ ھمراھی ءَ ناشرکاری کاروئی ءِ شوربندی کنگ بیگ ءَ اِنت-

جارکش ءَ گوشتگ کہ ھالانی سر بیگ سر بیگ سی ٹی ڈی کارمنداں دمگ انگیر ءَ کتگ چریشی ءِ میان ءَ تیرگواری ءِ رِد برجاہ بیتگ- اے گمانی میڑ ءِ آسر ءَ پنچ مردم جنگ بیتگ وھدے کہ آ دگہ سنگت ناگیگیں کوھی راھاں چہ پائدگ چست کتگ ءُ تچگ ءَ سوبمند بیتگ اَنت-

سی ٹی ڈی ءِ رِد ءَ جنگ بیتگیں مردماں چہ دست ءَ پنچ سب مشین گنز ( ایس ایم جیز) ھپت دستی بمب ءُ سے پرپٹ دزکپتگ اَنت-

لاش نزیکیں نادُراھجاہ برتگ وھدے کہ وئیل ایف آئی آر سی ٹی ڈی شال ءَ نکش کنگ بیتگ-

زانگ بہ بیت اشی ءَ ساری ھم سی ٹی ڈی ءَ سلاہ بندانی جنگ ٹاہ داتگ بلے پد ءَ جنگ بیتگیں مردمانی پجّار پیسر ءَ چہ بیگواھیں مردماں چہ بیتگ اَنت بلے تنی وھدے اے مردمانی پجّار نہ بیتگ-

نودربراں سنگتیں نودربر شعیب بلوچ ءُ زمیز بلوچ ءِ یل کنائینگ ءِ ھاتر ءَ واک برجم داشتگ-

بھاؤالدین زکریا یونیورسٹی ءِ جنک ءُ بچکیں نودربرانی نیمگ ء چہ زورانسری آوار جنی ءِ نشانگ بیتگیں بلوچ نودربر زمیز بلوچ ءُ شعیب بلوچ ءِ سلامتی ءُ زوت یل کنائینگ ءِ لوٹ ءِ ھاتر ءَ پُرایمنی واک برجم داشتگ-

نودربرانی رِد ءَ اے واک ءِ مول ءُ مراد ھمراھیں نودربرانی زورانسری آوار جنی ءِ وئیل ءِ سر ءَ سک دلپدردی درشان اِتگ ءُ راجی ھساب ءَ سرپدی دیگ بیتگ-

زھرشانی بلوچ اسٹوڈنٹس کونسل، پشتون اسٹوڈنٹس کونسل ءَ ھوار جتاجتائیں نودربریں گلاں بھر زرتگ ءُ بلوچ نودربرانی ھلاپ ءَ برجاہ ریاستی زوراکی ایر جتگ-

اے درگت ءَ ترانکاراں گوشتگ کہ پُرایمنی ءُ جمھوری گامگیج انساپ ،انسانی ھکانی ءُ چاگرد ءَ نودربرانی رکینک ءَِ جزم ءِ درشان اِیت-

آیاں ھمگرنچیں ادارھاں چہ لوٹ کتگ کہ زمیز بلوچ ءُ شعیب بلوچ زوت یل کنگ بہ بنت ءُ اے وڑیں وئیلانی گر ءُ دار ھاتر ءَ جوانیں گامگیجے زیرگ بہ بیت-

بلوچ ریپبلکن گارڈز ءِ جارکش دوستین بلوچ ءَ وتی شنگ کتگیں درشان ءَ گوشتگ گوستگیں شپ ءَ بلوچ ریپبلکن گارڈز ءِ سرمچاراں ڈیرہ بگٹی ءِ دمگ سوئی ءَ محمد ءُ مندوانی کالونی ءِ نیام ءَ 24 انچ گیس پائپ لائن تراکناکیں شورواں گوں تباہ کتگ-

جارکش ءَ گوشتگ ھمے وڑ بلوچستان ءِ دمگ نصیر آباد ءِ ھند ڈیرہ مراد جمالی ءَ ھادی بخش رند ٹاور ءِ نزیک ءَ مئے سرمچاراں تراکناکیں چیز ایر کتگ ءُ ریل ءِ ٹریک تباہ کتگ۔

اے اُرشانی زمہ واری ءَ مئے گل بی آر جی من ایت ءُ اے وڑیں اُرش داں بلوچستان ءِ آجوئی ءَ برجاہ مان اَنت۔

زانگ بہ بیت گوستگیں سالے ءُ شش ماہ ءَ بلوچستان ءَ روکیں ریل ءُ آئی ءِ کارجاھانی سر ءَ کم چہ کم 27 اُرش بیتگ انت ءُ چریشی ءَ پورسز ءِ کارندھاں ھوار دوسد مردم بیران ءُ سَد ءَ گیش زدگ بیتگ انت-

اے اُرشانی درستاں ھترناکیں اُرش مارچ 2025 ءَ پیش اتکگ کہ اود ءَ جعفر ایکسپریس ءِ سر ءَ دَرہِ بولان ءَ بلوچ لبریشن آرمی ءِ سدانی کچ ءَ باسکاں اُرش کتگ ءُ پاکستانی لشکر ءِ کارندھاں ھوار 450 مردم الگار کتگ انت – چریشی ءَ پد لس مردم یل دیگ بیتگ ات انت پوجی مردمانی یل دیگ ءِ مٹ ءُ سَٹ ءِ گپ بیتگ ات-

اے اُرش ءَ پد ٹرین ءُ ریل ءِ کارجاھانی سر ءَ پھزداری ترند کنگ بیتگ بلے اُرش دارگ نہ بیتگ انت-

گوستگیں یک سالے ءِ توک ءَ مساپر بریِ ٹرین ءُ ریل ءِ ٹریکس ءِ سر ءَ کساس 20 اُرش بیتگ انت کہ چریشی ءَ پنچ رند ءَ ٹرین ءِ بوگی اَچ پٹڑی ءَ لگوشتگ انت-

شکارپور ءُ جیکب آباد ءِ میان ءَ بیتگیں اُرشانی اھوال دیم ءَ اتکگ انت نہ ایوک ءَ بلوچستان ءَ بلکیں سیمسری ھواریں دمگ سندھ ءَ سیکیورٹی جیڑہ جاڑیگ انت-

جعفر ایکسپریس: چہ شال ءَ پنجاب ءَ رؤکیں یکیں ٹرین انت-

چہ شال ءَ پنجاب ءَ رؤکیں یکیں ریل جعفر ایکسپریس انت۔ اے چہ سبی، سکھر ءُ ملتان ءَ لاھور ءَ روت ءُ پد ءَ راولپنڈی ءُ گڈی ءَ پشاور ءَ روت۔ چہ شال ءَ داں لاھور ءِ سفر 24 کلاک ءَ کمیں وھد ءَ کم کم ءَ سرجم بیت۔

بلوچستان ءَ ریل ءِ راہ 1880 ءِ دھک ءَ انگریز راج ءَ پہ جنگی ءُ کاروباری کارانی ھاتر ءَ جوڑ کتگ۔ دو دھک ءِ جنگ ءِ وھد ءَ اے لائن ءُ ایشی ءِ سر ءَ رؤکیں ٹرین ھاسیں رنگ ءَ جعفر ایکسپریس باز رند ءَ نشانگ جوڑ کنگ بوتگ۔

2014 ءَ سبی اسٹیشن ءَ اوشتاتگیں جعفر ایکسپریس ءِ سر ءَ اُرش ءَ 17 مردم بیران بوتگ اَنت۔ نومبر 2024 ءَ شال ریل اسٹیشن ءِ سر ءَ مجید بریگیڈ ءِ ’فدائی‘ اُرش ءَ سی ءَ چہ گیش مردم بیران بوتگ اَنت کہ گیشتریں مردم فورسز ءِ کارندہ بوتگ اَنت کہ آ وتی ھنکین ءَ واتر روگ ءَ بوتگ اَنت۔

مارچ 2025 ءَ درہ بولان ءَ جعفر ایکسپریس ءِ دستیگ کنگ دمگ ءِ راجدپتر ءِ تہ ءَ اے وڑیں اولی مزنیں اُرش بوتگ۔

سرکاری کساس ءِ رِد ءَ گوستگیں دو دھکانی تہ ءَ بلوچستان ءَ ریل ءُ ریل ءِ پٹریانی سر ءَ دو سد ءَ گیش اُرش بوتگ انت ۔

مسافر ٹرینانی سر ءَ گیشتر اُرش شال ءُ سبی ءِ میان ءَ درہ بولان ءَ ھترناکیں راہ ءِ دیمپانی بیت انت۔ نزیک ءَ 70 کلومیٹر ءِ دراجیں درے ءَ ٹرین 17 سرنگ ءُ 350 پل ءِ سر ءَ چہ سِنگ دابیں کوھانی سر ءَ گوزگ ءَ انت۔

چڑھائی ءُ ڈھلانی سر ءَ کنٹرول ءِ گار کنگ ءِ ترس ءِ سبب ءَ 40 کلومیٹر / گھنٹہ ءَ چہ کم تیزی ءَ دارگ بیت ءُ مشکلیں دمگ ءُ سستیں رواج اُرشکاراں موہ دنت۔

ریل ءِ دستیگ کنگ ءُ مزنیں اُرشانی زمہ واری بلوچ لبریشن آرمی ءَ زرتگ انت بلے گوستگیں سالے ءَ سبی ءُ سکھر ءِ میان ءَ گیشتر کم زوریں اُرشانی تہ ءَ بلوچ ریپبلکن گارڈز ءَ ھم زمہ واری زرتگ انت۔

آزادی دوستیں گلانی گوشگ انت کہ آ فوجی سر ءُ مانسرانی سبب ءَ ٹریناں نشانگ جوڑ کن انت۔

انوگیں وھد ءَ بلوچستان ءَ ایوک ءَ سئے ریل روگ ءَ اَنت کہ ایشانی تہ ءَ جعفر ایکسپریس مستریں ءُ یکیں ریل اِنت کہ پنجاب، سندھ ءُ خیبر پختونخوا ءَ گوں بلوچستان ءَ ھمگرنچ کنت۔ بولان میل شال ءُ کراچی ءِ نیام ءَ ھپتگے ءَ ایوک ءَ دو رند ءَ روت ءُ چمن پاسنجراں روچے شال ءَ چہ اوگانستان ءِ سیمسر ءِ شھر چمن ءَ روت بلے اے لوکل ٹرین ایوک ءَ 120 کلومیٹر ءِ سپر ءَ کنت۔

بلوچستان ءِ دمگ کیچ ءِ ھَند تمپ گومازی ءَ گوستگیں شپ ءَ پاکستانی لشکر ءُ دمگی ڈیتھ اسکواڈاں بازیں لوگانی سر ءَ بیڑ برتگ

دمگی مردمانی گشگ اِنت کہ مھروم پھلان نامیں مردمے ءِ لوگ ءِ سر ءَ شپ ءِ دیر ءَ بیڑ برگ بوتگ کہ اود ءَ جنین ءُ چُک لٹ ءُ کٹ کنگ بوتگ اَنت ءُ لوگ ءِ دگہ ارزشت داریں چیز موبائل ءَ ھوار دگہ ساز ءُ سامان برگ بیتگ انت-

یات بہ بیت کہ گوستگیں روچاں گومازی ءَ پاکستانی لشکر ءِ سر ءَ اُرش ءَ پد لشکر ءُ آھانی کمک ءَ بوتگیں دمگی ڈیتھ اسکواڈ دمگی آبادی ءِ ھلاپ ءَ کارروائی کنگ ءَ انت۔

بلے انگت ءَ ھچ وڑیں دزگیری ءِ پدر کنگ نہ بوتگ۔

ھمے وڑ ءَ بلوچستان ءِ دگہ جاھاں ھم پاکستانی لشکر ءِ زوراکی برجاہ انت ءُ انسانی ھکانی گل یکشل ءَ پدردی درشان کنگ ءَ انت ءُ گوستگیں روچاں ھاران ءَ ھم پورسز ءَ بیڑ برتگ ءُ اود ءَ مردمانی بیھار دیگ ءُ دگہ وئیل دیم ءَ اتکگ انت-

ایشی ءَ پیش جیونی ءَ ھم پورسز ءَ بازیں روچاں لشکر کشی کتگ ءُ اود ءَ بازیں کچے ءَ مردم آوار جتگ ءُ بیگواہ کتگ بیتگ انت-

بلوچستان ءِ جتاجتائیں دمگاں پاکستانی پوج ءِ دست ءَ ھپت مردم بیگواہ ءُ پنچ یل کنگ بیتگ اَنت-

گیشیں ھالانی چہ شال ءِ دمگ کلی قمبرانی ءَ بیڑانی میان ءَ دو ورنا عبدالقھار ء عبدالجبار قمبرانی ءُ مصور قمبرانی ء افضل قمبرانی آوار جتگ ءُ ناشناسیں جاھے ءَ برتگ اَنت-

ھمے وڑ چہ کیچ ءِ بُنجاھی شھر تربت ءَ پانزدہ جنوری ءَ ھسپتال ءِ دیم ءَ روچ رھماں پاکستانی پوج ءَ یک ورنایے آوار جتگ ءُ ناشناسیں جاھے ءَ برتگ – بیگواھیں ورنا ءِ پجّار مھران بلوچ ء بیگ محمد نام ءَ چہ بیتگ کہ بل نگور ءِ جھمنند اِنت ءُ نرسنگ ءِ نودربرے-

چہ ھاران شھر ءَ پاکستانی پوج ءِ نیمگ ءَ لشکر کشی کتگ – ڈیری فارم محلہ بلوچ آباد ءَ بیڑ ءِ میان ءَ اویس احمد قمبرانی ء محبوب قمبرانی گاڑی ءَ ھوار آوار جتگ ءُ برتگ، بلے کھول ءَ تنی وھدے دزگیری ءِ درگت ءَ ھچ وڑیں ھال نداتگ-

ھمے وڑ ھاران شھر کش گوراں برجاھیں لشکر کشی ءِ میان ءَ مخفر عابد سیاپاد، منیب سیاپاد احمد سیاپاد نامیں سے ورنا زورانسری بیگواھی ءِ ھال اِنت-

دومی نیمگ ءَ لھتے دمگاں چہ زورانسری بیگواھیں مردمانی یل بیگ گپ ھم دیم ءَ اتکگ- کیچ ءِ تھسیل تمپ ءِ ھند چہ ھوت آباد ءُ بالگتر ءَ ھپت جنوری ءَ بیگواہ کنگ بیتگیں صغیر ء الھی بخش، سلام ء خالد ءُ فضائل ء محمد رفیق یل بیتگ ءُ وتی لوگ ءَ سر بیتگ اَنت-

ھمے وڑ گوادر ءِ تھسیل چہ جیونی پانوان ءَ سیزدہ جنوری ءَ بیگواہ کنگ بیتگیں منیر ء جان محمد ءُ دشت، مستونگ ءَ بیست شش 2025 ءَ زورانسری آوار جنی ءِ نشانگ کنگ بیتگیں امجد علی ء محمد سلطان پانزدہ جنوری ءَ گوادر ءُ شال ءَ یل بیتگ اَنت-

بلوچستان لبریشن فرنٹ ءِ جارکش ءَ میجر گوھرام بلوچ ءَ وتی شنگ کتگیں درشانے ءَ گوشتگ کہ سرمچاراں پانزدہ جنوری ءِ نیمروچ ءِ دو ءُ نیم ءَ گل ءِ شوربندی ءِ رد ءَ کاروائی کرتگ ءُ ھاران ءِ سرجمیں شھر دستیگ کرتگ۔ کاروائی ءِ بندات ءَ سرمچارانی یک ٹولی یے ءَ ھاران سٹی پولیس تھانہ ءِ سر ءَ اُرش کرتگ ءُ سرجمیں کارمند دزگیر کرتگ اَنت ءُ تھانہ ءَ ھستیں سرکاری سرجمیں سلاہ ءُ آدگہ سامان دستیگ کرتگ اَنت۔ تھانہ ءَ بندیگیں درزناں گیش بندیگ یل کرتگ اَنت۔ کاروائی ءِ سرجم بیگ ءَ پد تھانہ ءِ ماڑی، سرکاری ریکارڈ ءُ پولیس ءِ گاڑی تاوان داتگ اَنت۔

جارکش ءَ دیمتر ءَ گوشتگ کہ ھمے میان ءَ سرمچارانی یک دگہ ٹولی یے ھاران ءِ مزنیں بازار ءَ پترتگ ءُ نیشنل بینک، میزان بینک، الحبیب بینک ءُ آ دگہ سرکاری نزام نشانگ کرتگ ءُ دژمن ءَ باز تاوان داتگ۔ بینک ءِ پھازدار ءَ سرمچارانی سر ءَ اُرش کنگ ءِ جھد کرتگ کہ سرمچاراں نشانگ کرتگ ءُ کشتگ۔ سرمچاراں بازار ءَ کشندہ ٹولی ءِ سروک شاھد گل ملازئی ءِ کارندھانی سر ءَ ھم اُرش کرتگ کہ چریشی ءِ آسر ءَ عبدالحکیم ءُ غلام حسین نامیں دو کارمند ٹپی بیتگ اَنت۔

جارکش ءَ گوشتگ کہ سرمچارانی کاروائی ءِ پھازداری کنگ ءَ گل ءِ جھلی ادارہ کربان یونٹ ءِ یک ٹولی یے ءَ ریڈ زون ءَ دگ بستگ ءُ پہ دژمن ءِ کمک ءَ آؤکیں پاکستانی پوج ءِ سے گاڑیانی کاروانے گوں مزنیں ءُ نوکیں سلاھاں چہ نشانگ کرتگ۔ اے اُرش ءَ پوج ءِ پانزدہ کارندہ مرتگ ءُ سے ئیں گاڑی سرجم ءَ تباہ بیتگ اَنت۔ سرمچاراں مرتگیں کارندھانی سلاہ دستیگ کرتگ اَنت۔ کربان یونٹ ءِ کماندار عبدالرازق پنّام ءِ بارگ جان ٹپی بیگ ءَ ابید گوں وتی ٹولی ءَ جنگجاہ ءَ داں گڈی ءَ اوشتاتگ ءُ مھکمی ءَ وتی زمہ واری پیلو کرتگ۔

جارکش ءَ گوشتگ کہ ریڈ زون ءِ میڑ ءَ مرتگیں کارندھانی لاشانی چست کنگ ءَ آؤکیں پوج ءِ ٹولی سرمچاراں نشانگ کرتگ اَنت۔ پوج ءِ بکتر بند گاڑی ءُ پیادگیں کارندھاں سرمچارانی انگیر کنگ ءِ جھد کرتگ۔ چریشی ءَ سرمچارانی ءُ پوج ءِ میان ءَ ترندیں میڑے بیتگ کہ داں سے کلاکاں برجاہ بیتگ۔ مھکمیں شوربندی ءِ رد ءَ اے دیم پہ دیمی میڑ ءَ پاکستانی پوج ءِ دگہ بیست ھپت کارندہ مرتگ ءُ مزنیں کچے ءَ ٹپی بیتگ اَنت۔ دو بکتر بند گاڑی سرجم ءَ تباہ بیتگ اَنت۔ آدگہ بکتر بند گاڑی ءُ کارندہ پشت ءَ کنز اِتگ اَنت ءُ مرتگیں کارندھانی لاش ھما جاہ ءَ یل داتگ ءُ تتکگ اَنت۔

جارکش ءَ گوشتگ کہ شپ ءِ ساھت ھپت ءَ ھاران ءِ ھند کلان ءَ پاکستانی پوج ءِ کارندھاں بازیں کچے ءَ بکتر بند گاڑی ءُ آدگہ گاڑیانی کاروانے ءَ دیم ءَ آیگ ءِ جھد کرتگ کہ آیانی تہ ءَ ایس ایس جی کمانڈو ھم ھوار بیتگ اَنت۔ سرمچارانی یک دگہ ٹولی یے ءَ گوں مزنیں ءُ نوکیں سلاھاں چہ سک ءَ نزیک ءَ آیانی سر ءَ اُرش کرتگ کہ اے اُرش داں شپ ءِ ساھت یک ءَ برجاہ بیتگ۔ اے اُرش ءِ آسر ءَ پوج ءِ سَے گاڑی سرجم ءَ تباہ بیتگ اَنت ءُ درزنانی کچ ءَ کارندہ مرتگ ءُ باز ٹپی بیتگ اَنت۔ مرتگیں کارندھاں ھشت ایس ایس جی کمانڈو ھم ھوار بیتگ اَنت۔ آدگہ کارندھاں وتی مرتگیں ءُ ٹپی بیتگیں کارندہ یل داتگ ءُ تتکگ اَنت۔ سرمچاراں لھتیں مرتگیں کارندھانی سلاہ ءُ آدگہ سامان ھم دستیگ کرتگ اَنت۔

جارکش ءَ گوشتگ کہ اے ترندیں میڑ ءَ کربان یونٹ ءِ سرمچار سنگت حفیظ پنّام ءِ یاسر بلوچ دیم پہ دیمی میڑ ءَ نمیران بیتگ۔ ھمے میان ءَ گل ءِ جھلی یونٹ اسنائپر ٹیکٹیکل اسکواڈ ءِ سرمچاراں وتی جنگی رپککار گپتگ اَنت ءُ پوج ءِ یک اسنائپر شوٹرے ءَ ھوار ھشت کواڈ کاپٹر ھم نشانگ کرتگ ءُ تباہ کرتگ اَنت۔

جارکش ءَ گوشتگ کہ کاروائی ءَ سرجمیں نشانگانی سرجم کنگ ءَ پد سرمچاراں وتی سنگر یل کرتگ ءُ وتی اوتاکانی نیمگ ءَ شتگ اَنت۔ چہ ایشی ءَ پد پوج ءَ کوھی دمگاں سرمچارانی سر ءَ برزی اُرش کرتگ ءُ ڈرون ءِ سر ءَ دو میزائل جتگ کہ چریشی ءَ کیپٹن سرمچار مبین بلوچ پنّام ءِ ملا رھمین ءُ سرمچار محسن بلوچ پنّام ءِ مرید نمیران بیتگ اَنت۔ بی ایل ایف ءِ سرمچاراں اے کاروائی ءَ نمیران بیتگیں سرمچاراں سَے نمیران بیتگیں سرمچارانی لاش کش اِتگ ءُ گلزمین ءِ میار کرتگ اَنت۔

جارکش ءَ گوشتگ کہ اے نُھ ادار ءِ دراجیں میڑ ءَ پاکستانی پوج ءِ کماندار کرنل ودھان ءُ میجر عاصم ءَ ھوار باز کارندہ ٹپی بیتگ اَنت۔ نائب سوبیدار شپکت ءَ ھوار پنجاہ ءَ گیش دژمن ءِ کارندہ مرتگ۔

جارکش ءَ گوشتگ کہ نمیرانیں سرمچارانی سرجمیں درشان رند ءَ شنگ کنگ بیت۔

میجر گْوھرام بلوچ ءَ دژمن ءِ بگیری ءَ ھاران آپریشن ءِ زمہ واری من اِتگ ءُ گوشتگ کہ ھمے کول ءَ کن ایں کہ داں بلوچستان ءِ آجوئی ءَ زورگریں دژمن ءُ آئی شوربندیانی سر ءَ اُرش برجاہ بنت۔

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گوشتگ کلات ءِ دمگ شور پارود ءَ دوازدہ جنوری ءَ زورگرین پاکستانی پوج ءَ بلوچ لبریشن آرمی ءِ یک آزاروکی گشتی بنجلے ءِ سر ءَ ڈرون اُرش کتگ، چریشی ءِ گل ءِ چار بامردیں سرمچار سنگت زوھیر پنام ءِ ھک نواز، منظور کرد پنام ءِ بختیار چیتا، سمیع اللہ پنام ءِ جاوید پھلیہ ءُ نصیر احمد پنام ءِ میرک ءَ شھیدی وتی ناماں کتگ انت-

آئی ءَ گوشتگ شھید سنگت زوھیر پنام ءِ ھک نواز بلوچ ء محمد افضل فقیرزئی ءِ سیادی نوشکی ءِ دمگ احمد وال ءَ بیتگ، آ 2023 ءَ بلوچ لبریشن آرمی ءَ گوں ھوار بیتگ ءُ وتی پرکاریانی سبب ءَ یک سالے ءِ توک ءَ ٹریننر ءِ زمہ واری دیگ بیتگ انت – سنگت زوھیر ءَ مستونگ، کلات ءُ نوشکی ءِ میداناں وتی پرز پیلو کتگ انت-

سنگت زوھیر گل ءِ توک ءَ رھبند ءُ لشکری سنچ ءِ درگت ءَ یک زانوکیں مردمے زانگ بیتگ، تو ورنائیں سرمچارانی زانشت ءِ سر ءَ گچینی دلگوشی داتگ انت-

شھید سنگت منظور کرد پنام ءِ بختیار چیتا ء محمد رحیم کرد ءِ سیادی چہ شال ءِ ھند برما ھوٹل ءَ بیتگ- بیست ءُ دو سالی ئیں منظور کرد 2016 ءَ بلوچ لبریشن آرمی ءَ ھوار بیتگ ءُ بستار ءِ شھری گوریلا ءِ کاراں گوں ھمگرنچ بیتگ – پد ءَ 2018 ءَ کوھی دمگاں اتکگے – تو بولان، ناگاھو ءُ کلات ءِ دمگاں وتی کرد پیلو کتگ انت-

سنگت منظور کرد ءِ برات محی الدین پنام ءِ سنگت نجیب 2016 ءَ بولان ءِ دمگ یخو ءَ شھید جنرل اسلم بلوچ ءِ سر ءَ اُرش ءِ وھد ءَ پاکستانی پوج ءِ کمانڈوزاں گوں دیم پہ دیمی جنگ ءَ شھید بیتگ ءُ ھمے وڑ آئی ءِ کھول ءَ بازیں مردم زورگریں پوج ءَ بازیں بیڑانی وھد ءَ زورانسری بیگواھیانی آماچ کتگ انت بلے سنگت منظور کرد داں گڈی ساہ ءَ وتی لیکھاں پشتکنز نہ بیتگ-

آئی ءَ گوشتگ شھید سنگت سمیع اللہ پنام ءِ جاوید پھلیہ ء دینار خان کیازئی ءِ سیادی بولان ءِ دمگ مَچ ءَ بیتگ- آ 2023 ءُ بلوچ لبریشن آرمی ءَ ھوار بیتگ ءُ بولان ءُ کلات ءِ میداناں وتی کردے پیلو کتگ – تو یک کسانوکیں وھدے ءَ گل ءِ واستا یک مڈی ءِ جوڑ بیتگ ءُ وتی ھمک روچی جھدانی سبب ءَ سرمچارانی گور ءَ نامدار بوتگ ئے-

شھید سنگت نصیر احمد پنام ءِ میرک ء نبی بخش سمالانی ءِ سیادی شاھرگ ءَ بیتگ – تو دو سال پیش بلوچ لبریشن آرمی ءَ گوں ھوار بوتگ ئے ءُ بولان ءُ کلات ءِ میداناں وتی کرد پیلو کتگ انت – سنگت میرک جنگ ءِ پِڑ ءَ رھبندیانی زمہ واری بیتگ- تئی یک براتے سنگت خیر بخش سمالانی پنام ءِ فرید نومبر 2022 ءَ بولان ءَ جنگ ءِ میدان ءَ زورگریں پوج ءِ دیم ءَ ترندیں جنگ ءُ چوپے ءِ وھد ءَ گڈی تیر ءِ پلسپہ سرجم کتگ ءُ شھید بیتگ ئے-

جارکش ءَ گوشتگ بلوچ لبریشن آرمی وتی شھیدیں سچارانی ستاشانی ءَ کنت ءُ اے کول ءَ کنت شھیدانی ریتکگیں ھوناں ڈگار سبز ایت ءُ آیانی رھبند ءُ لوٹانی پد ءَ جنزان کنت-

بلوچستان ءِ دمگ گوادر ءِ تھسیل اورماڑہ ءِ نزیک ءَ مکران کوسٹل ھائی وے ءِ سر ءَ یک مساپر کوچے تُرسناکیں وئیلے ءِ آماچ بیتگ-

تُرند رؤگ ءِ سوب ءَ کوچ مرینگ نہ بیتگ دگ ءَ چہ لیٹیتگ، چریشی ءِ آسر ءَ نُھ مساپر بیران بیتگ اَنت وھدے کہ سی شش مردم ٹپی بیتگ اَنت-

وئیل ءِ آماچ بیتگیں کوچ، کہ آئی ءِ نام العثمان گوشگ بیگ ءَ اِنت، کراچی ءَ چہ جیونی ءَ روگ ءَ بیتگ – وئیل ءَ پد دمگی مردم ءُ ریسکیو ٹولی وئیلجاہ ءَ سر بیتگ اَنت کمکی کاروائی بندات ءِ کتگ –

بیران بیتگیں مردمانی لاش ءُ ٹپی نادُراھجاہ ءَ برگ بیتگ اَنت، اود ءَ ھپت ٹپیانی جاور ناگیگ گوشگ بیگ ءَ اِنت-

بلوچستان ءِ دمگ آواران ءِ تھسیل چہ گشکور ءَ پاکستانی پوج ءَ دو مردم آوار جتگ ءُ ناشناسیں جاھے ءَ برتگ-

گیشیں ھالانی رِد ءَ ھمے سال ھپت جنوری ءَ پاکستانی پوج ءَ چہ گشکور ءِ بازار عبدالباقی ء امام بخش ءُ گنج بخش ء میروک زورانسری بیگواہ کتگ اَنت-

کھول ءَ وتی دوستناکانی پہ سلامتی یل کنائینگ لوٹ کنان ءَ ھمگرنچیں واکدار ءَ چہ دزبندی کتگ کہ آیاں زوت یل بہ کن اِت-

دمگ مردمانی گوشگ اِنت کہ ما سرجمیں انسانی ھکانی گلاں، سول سوسائٹی ءُ رسانکدر ءَ چہ لوٹ کن ایں کہ آ اے وئیل ءَ زوت گامگیج بزور اِیت، دوئیں بیگواھیں مردماں یل بہ کنائین اِیت ءُ بلوچستان ءَ زورانسری آوار جنی دْرچ ءَ بدار اَنت-