TBP Balochi

مستونگ ءِ دمگ دشت عمر ڈور ءَ ھستیں ایف سی چیک پوسٹ ءِ کارندھانی تیر گواری ءَ یک ورنایے بیران بوتگ۔

پولیس بنشون ءِ رد ءَ تیرگواری ءِ وئیل ھما وھد ءَ بوتگ کہ چیک پوسٹ ءِ نزیک ءَ رکشہ گوزگ ءَ بوتگ۔ تیرگواری ءِ آسر ءَ رکشہ ڈرائیور کہ کلی ڈنڈ ءِ جھمنند بیتگ ءُ ھما جاہ ءَ بیران بیتگ-

وئیل ءَ پد بیران بوتگیں ورنا ءِ سیاد ءُ دمگ ءِ نندوکیں مردماں تُرندی ءَ زھرشانی کتگ۔ زھرشانی کنوکاں نواب ھوٹل ءَ مزن شھدگ ءِ سر ءَ لاش ایر کتگ ءُ سڑک بند کتگ کہ ایشی ءِ سبب ءَ گاڑیانی دراجیں لین لگ اتگ انت ءُ ٹریفک روانی سانمند بیتگ-

پولیس ءِ بنشون ءِ رد ءَ اے وئیل ءِ ھلاپ ءَ زھرشانی ءِ دھرنا انگت ءَ برجاہ اِنت۔

بلوچستان پریویشن ڈیٹینشن اینڈ ریڈیکلائزیشن رھبند 2025

ٹی بی پی شونگال

بلوچستان ءَ ھستیں واکداریں ٹولی پاکستان پیپلز پاٹی ءِ سرکار ءِ مانگش اتگیں سروزیر سرپراز بگٹی ءِ چیردستی ءَ اُستانی کابینہ ءِ نیاد بیتگ – اے نیاد ءَ زورانسری بیگواھیاں کانونی درچ دیگ ءُ زورانسری بیگواھیں مردماں دزگیری بنجل ءَ دارگ ءِ مانگش اتگیں پیسلہ کنگ بیتگ، اود ءَ آیاں کاؤنٹر ٹیررازم ڈیپارٹمنٹ ءِ پولیس آفسرانی چیردستی ءَ پٹ ءُ پولی کنگ بیت انت-

پاکستان ءِ زورداریں دستانی ھستیں سرکار ءِ نیمگ ءَ بلوچستان پریوینشن ڈیٹینشن اینڈ ریڈیکلائزنشن رولز 2025 ءِ منگ نامہ، بلوچستان ءَ زورانسری بیگواھیاں کانونی دَرچ ءِ دیگ ءِ یک جھدے دانکہ زورانسری بیگواھی ءُ ریاستی زوراکیانی ھلاپ ءَ چِست بیتگیں زرمبشت ھلاس کنگ بہ بیت ءُ زورانسری بیگواھیانی کھولانی توار ایرموش کنگ بہ بیت – زورانسری بیگواھیں مردماں ناشرکار گوشگ ءُ آیاں آمیدگس ےَ پیش کنگ ءَ ابید دزگیری بنجل ءَ پٹ ءُ پول کنگ،آئین پاکستان ءِ دیگ بیتگیں انسانی ھکانی بگیری انت-

بلوچستان ءِ سر ءَ مُشگ بیتگیں سرپراز بگٹی ءِ سرکار بنداتی روچ ءَ ھم زورانسری بیگواھیانی وڑیں سنگینیں انسانی جیڑہ ءَ دروگ کنگ ءَ انت ءُ زورانسری بیگواھیانی درگت ءَ ریاستی بنگپ ءَ دیم ءَ آرگ ءَ انت- بلوچستان ءَ سیاسی باسکانی زورانسری بیگواھی دروگ بیت کت نہ کنت، میان اُستمان ءِ انسانی ھکانی ادارہ، ایمنسٹی انٹرنیشنل، ہیومن رائٹس کمیشن پاکستان ءُ دگہ ادارہ بلوچستان ءَ زورانسری بیگواھیانی جیڑہ ءَ یکشل ءَ چِست کنگ ءَ انت ءُ پاکستان ءِ مزن واکدارین ءُ سرکار اے سنگینیں انسانی جیڑہ ءَ گیشنگ ءَ زھر درشان کنگ ءَ انت-

بلوچستان ءِ سرکار یک نیمگے زورانسری بیگواھیاں رد کنگ ءَ انت ءُ دومی نیمگ ءَ پریوینشن ڈیٹینشن اینڈ ریڈیکلائزیشن رولز ءِ درگت ءَ پیسلہ، اے گپ ءِ منانک انت کہ بلوچستان ءَ زورانسری بیگواھیاں ریاستی ادارہ ھوار انت – بلوچستان پریوینشن ڈیٹینشن اینڈ ریڈیکلائزیشن رولز ءِ منگ نامہ دیگ ریاستی ادارھاں سیاسی باسکانی زورانسری بیگواہ کنگ ءِ مھار پچ کنگ ءِ برابری انت – زورانسری بیگواھیانی ھلاس کنگ ءَ ابید آیاں کانونی درچ دیگ ءَ چہ اے جیڑہ گیش مانگش ایت ءُ آ گیر آئینی ءُ انسانی ھکانی سنگینیں لگتمالی یے – تاکت ءِ زور ءَ زورانسری بیگواھیاں کانون ءِ درچ دات کن ئے بلے آئی ءِ ھلاپ ءَ چِست بیتگیں توارانی ایرموش کنگ ناممکن انت-

ھالانی رِد ءَ شپ ءِ وھدے ءَ شال ءِ دمگ کلی قمبرانی دگ ءَ پاکستانی پوج ءَ یک لوگے ءِ سر ءَ بیڑبرتگ ھسان قمبرانی آوار جنگ ءَ پد زورانسری بیگواہ کتگ-

اِھوالکار ءِ رِد ءَ اسپیت رنگیں کسانیں گاڑیاں ءُ سیاہ رنگیں ویگو ءَ سوار ایف سی، سی ٹی ڈی ءُ ایم آئی ءِ کارندھاں شپ ءِ ساھت دو نیم ءَ لوگانی سر ءَ بیڑبرتگ کھول ءِ سر ءَ زوراکی کنگ ء پد ھسان قمبرانی وتی ھمراھی ءَ برتگ-

زانگ بہ بیت کہ ھسان قمبرانی اشی ءَ پیش ھم چاردہ فروری 2020 ءَ چہ کلی قمبرانی ءَ زورانسری بیگواہ کتگ اَت، داں پانزدہ ماہ ءَ بیگواہ ءَ پد ھپت مئی 2021 ءَ یل بیتگ اَت – اشی ءَ ابید دوشی یکرندے پد ھمے دمگ ءَ چہ زورانسری بیگواہ کتگ-

ھسان قمبرانی ءِ گھار ھسیبہ قمبرانی ءَ وئیل تُرندی ءَ گوں ایر جنان ءَ گْوشتگ کہ منی برات ءَ زوت دیم ءَ بیار اِت ءُ مارا بگش اِت کہ اشی ءِ میار چی اِنت- اگاں اشی ءِ سر ءَ کجام وڑیں بھتامے ھست گڑا آئی ءَ آئین ءُ کانود ءِ رِد ءَ آمیدگس ءَ پیش بہ کن اِت، نانکہ اے وڑ درکانودی ھساب ءَ زورانسری آوار جنی ءِ نشانگ بکن-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں اورناچ ءَ زورگریں پاکستانی پوج ءَ یک اُرشے ءَ نشانگ کتگ وھدے کہ بلیدہ ءَ دزگیریں چاریگ مرگ ءِ سزا ءِ سر ءَ کار کتگ-

جارکش ءَ گوشتگ کہ ھُزدار ءِ دمگ اورناچ ءَ پانزدہ جنوری ءَ بلوچ لبریشن آرمی ءِ سرمچاراں شھدگ سر ءَ زورگریں پاکستانی پوج ءِ گاڑیانی سر ءَ سنگر گپتگ ءُ اُرش ءِ نشانگ کتگ اَنت، زورگریں پوج ءِ یک گاڑی یے تچکی ءَ اُرش ءِ نشانگ ءَ اَتکگ چریشی ءِ آسر ءَ سے کارندہ جاہ پہ جاھی مرتگ اَنت-

جارکش ءَ گوشتگ بلوچ لبریشن آرمی ءِ سرمچاراں بیست پنچ دسمبر بلیدہ ءِ دمگ چہ گلی ءَ نوید احمد ء محمد ھاشم جھمنند بلیدہ گلی دزگیر کتگ – نوید ھاشم ءَ جُست پُرس ءِ میان ءَ منّ اِتگ کہ زورگریں پوج ءِ صوبیدار ءِ سروکی ءَ چہ چاریگی ءِ کار کتگ-

جارکش ءَ گوشتگ کہ نوید ھاشم ءَ منّ اِتگ کہ دکاندار ءِ دروشم ءَ آ سرمچارانی سُر ءُ پُرانی نگاہ داشتگ وھدے کہ بٹ، الندور ءُ زندان ءَ زورگریں پوج ءِ بنجلانی واستا راشن ءُ دگہ سامان سر کنگ ءَ ھوار پوج ءِ گوشگ ءِ پد ءَ بدکرداریں جنین بُنجل ءَ برتگ اَنت-

جارکش ءَ گوشتگ چاریگ نوید ھاشم ءَ منّ اِتگ کہ آ بلوچ ورنایانی چارگ ءُ آیاں زورگریں پوج ءُ وتگڑیں ڈیتھ اسکواڈ ءِ دست ءَ زورانسری آوار جنی ءَ ھم ھمگرنچ بیتگ- اشی ءِ بدل ءَ زورگریں پوج ءِ نیمگ ءَ آئی ءَ کلدار دیگ بیتگ ءُ ٹوکن دیگ ءِ کول کتگ-

جارکش ءَ گوشتگ نوید ھاشم راجی میارباری ءِ بیگ سر ءَ بلوچ راجی آمیدگس ءَ مرگ ءِ پرمان داتگ چریشی ءَ سرمچاراں کار کتگ آ تربت ءِ دمگ پیری کھن ءَ کشتگ- نوید ھاشم ءَ بازیں چاریگانی نام پاشک کتگ کہ زوت وتی گُڈی آسر ءَ سر بنت-

جارکش ءَ گوشتگ بلوچ لبریشن آرمی اے دوئیں کاروائیانی زمہ واریاں منّ اِیت-

بلوچستان ءِ دمگ کیچ ءِ ھند تمپ ءَ یک ورنایے ءِ لاش دزکپتگ کہ آئی ءِ پجڑار نعمان ء ھیدر ، جھمنند مند گوک نام ءَ چہ بیتگ-

کھول ءِ رِد ءَ نعمان کساس دو ماہ ءَ ساری پاکستانی پوج ءَ آوار جتگ کہ تاں ھما روچ ءَ بیگواہ بیتگ-

آئی ءِ گوشگ اِنت کہ نوزدہ نومبر ءَ نعمان پکنک ءَ شتگ اَنت کہ اود ءَ پاکستانی پوج ءَ تیرگواری کتگ نعمان ءِ ھمراہ اسماعیل جاہ پہ جاھی کشتگ وھدے کہ نعمان ٹپی ئیں جاوراں اوار جتگ-

چارشمبے ءِ روچ ءَ دمگی مردماں تمپ ءِ دمگ رودبن ءَ یک لاشے دزکپگ ءِ ھال داتگ چریشی ءَ پد آئی ءِ پجّار چہ نعمان نام ءَ چہ بیتگ-

نمیرانیں سلمان ھمل بلوچ ءِ کتاب ماں صباء انسٹی ٹیوٹ آف ریسرچ اینڈ پبلیکیشنز ءِ نیمگ ءَ چھاپ ءُ شنگ بیتگ-

صباء انسٹی ٹیوٹ آف ریسرچ اینڈ پبلیکنشنز ءِ شنگ کتگیں جار ءِ رد ءَ سلمان ھمل بلوچ ءِ سرگوستانی تاک دیم ‘ آجوئیں مرگ ءِ تلب ’ ءِ چھاپ ءُ شنگ بیتگ-

زانگ بہ بیت صباء پبلیکیشنز یک چاپکاری ادارھے کہ اود ءَ بلوچی، براھوئی ءُ اردو تاک دیم شنگ بیتگ انت آ گیشتر پٹ ءُ پولی کارانی تہ ءَ شنگکاری ادارھے ءِ نام ءَ پدر بیت کہ آ گیشتر ندکارانی پٹ ءُ پولی تاک دیماں دلگوش گوری کنگ ءَ انت-

بلوچستان ءِ دمگ گوادر جیونی کنٹانی ھور ءَ پاکستانی سیکورٹی فورسز ءِ نیمگ ءَ تیل ءِ واپار کنوکانی بنجل سوچگ بیتگ انت۔ تیل ءِ واپار کنوکیں مردمانی گوشگ انت تیل ءِ واپار جاہ کوسٹ گارڈ ءَ مانداشتگ انت کہ چریشی ءَ سرجمیں بنجلاں آس کپتگ –

تیل ءِ واپار کارانی گوشگ انت تیل ءِ مزدوری ءَ ھواریں بازیں مھلوکے ءِ لاپ ءِ والینگ چرے کار ءَ بوگ ءَ انت بلے ایشانی آس دیگ ءَ بازیں کھول اَچ والینگی ءَ زبھر بوگ ءَ انت-

دمگی مردمانی رد ءَ چہ سرجمیں مکران ءَ ھزاراں مردم کنٹانی ءَ روزگار ءِ ھاتر ءَ اتکگ انت کہ اود ءَ آ چہ دریا ءَ آیوکیں تیل ءِ ٹرانسپورٹ ءُ ھمے گوں ھمگرنچیں کاراں ھوار اَنت۔ اے مردم زِر ءِ کش ءُ گوراں ازارُکی جاہ، ڈپو ءُ بنجلانی تہ ءَ نشتگ اتنت کہ بیڑ ءِ وھد ءَ سُتکگ ات انت۔ سانمندیں مردمانی گشگ انت کہ اے امل ءِ تہ ءَ آہانی ارزشت داریں مال ھاک ءُ پُر بیتگ انت۔

اے وئیل ءِ سبب انگت ءَ سرکاری تکاں پدر کنگ نہ بیتگ-

زانگ بہ بیت چِد ءُ پیش ھم اے دابیں وئیل پیش اتکگ بیتگ انت کہ اود ءَ مھلوک ءِ روزگار ءِ ھَک جنی بیتگ-

روکپتی ءُ رودراتکی بلوچستان ءِ مھلوک ءِ مستریں زرکاری سیمسر انت کہ چرے زرکاری ءَ مھلوک وتی گزران ءَ کنگ ءَ انت بلے کنٹانی ھوار دگہ سیمسراں ھم جھمنندیں روزگاری مھلوک ءَ سرکار ءِ نیمگ ءَ جنجلانی دیمپانی انت-

مھلوک ءِ گوشگ انت لکانی ھساب ءَ ٹیکس دیگ ءَ ابید ھم اود ءَ سرکار مئے روزگار ءِ ھک جنی ءَ کنگ ءَ انت کہ اے سکیں زُلمے ءِ ھساب ءَ زانگ بیت انت-

بلوچستان ءِ بُنجاھی شھر شال ءَ وتی لوٹانی ھک ءَ زھرشانی کنوکیں درزنانی سرکاری کاردار دزگیر کتگ اَنت-

کارداراں زھرشانی ءِ سر ءَ شال شھر موباھل فون سر ءَ انٹرنیٹ سروس ھم بند کنگ بیتگ-

سرجمیں بلوچستان ءِ کاردار ڈسپیریٹی ریڈکشن الاؤنس ءِ واستا زھرشانی کنگ ءَ اَنت چریشی ءِ سبب ءَ چہ گیشتر سرکاری کارگساں کار اوشت آماچ بیتگ اَنت-

کادارانی گلانی الائنس ءَ لوٹانی منّنیگ ءِ ھاتر ءَ مروچی بلوچستان ءِ بُنجاھی شھر شال ءَ ریڈزون ءَ نندانک دیگ ءِ جار جتگ- اے مول ءُ مراد ھاتر ءَ سرجمیں بلوچستان ءَ چہ سرکاری کاردارانی یک مزنیں کچے ءَ شال ءَ سر بیتگ اَنت-

بلے کادارانی پُترگ ءَ ریڈزون ءَ دارگ ھاتر ءَ گوستگیں شپ ءَ کنٹینرز جتگ ریڈزون سرجمی ءَ بند کتگ- ریڈ زون ءِ بند بیگ ءِ سوب ءَ کارداراں زھرشانی ءِ ھاتر ءَ پریس کلب ءِ ڈن ءَ مچ بیگ بندات بیتگ بلے پولیس ءَ آ اود ءَ مُچ بیگ ءَ نہ اشتگ اَنت بلکیں اود ءَ چہ درزنانی سرکاری کاردار دزگیر کتگ اَنت-

اے دزگیریاں پد گرنیڈ الائنس ءِ نیمگ ءَ جیل بھرو تھریک ءِ جار جتگ-

اود ءَ انتزامیہ ءَ ریڈزون بند کتگ اود ءَ نیمروچ ءَ شال شھر ءُ آئی ءِ کش ءُ گور ءِ دمگاں اے زھرشانی ءِ ُپُشدر ءَ موباھل پون ءِ سر ءَ انٹرنیٹ سروس ھم بند کتگ-

انٹرنیٹ سروس ءِ بندی ءِ سوب ءَ کارمرز کنوکاں دلسیاھی ءِ دیمپانی کنگ کپتگ-

کیچ ءِ دمگ تجابان کرکی ءَ بیگواھیں ورناھے ءِ کھول ءِ مردماں زھرشانی کتگ ءُ سی پیک ایم 8 شاھدگ (تربت کوئٹہ روڈ) بند کتگ۔ زھرشانی کنوکاں گْوشتگ کہ کرکی تجابان ءِ نندوکیں رھمدل ء محمد بخش زورانسری بیگواہ کنگ بیتگ ءُ آئی ءِ یل کنائینگ ءِ ھاتر ءَ اے گامگیج چِست کتگ-

دمگی مردمانی رد ءَ زھرشانی کنوکاں شاھدگ ءِ سر ءَ دھرنا داتگ ءُ روانی بند کتگ انت کہ ایشی ءِ سبب ءَ تربت ءِ زمینی راہ گوں پنجگور ءُ کوئٹہ ءَ کٹگ بوتگ۔ سڑک ءِ دوئیں نیمگ ءَ مساپر گاڑی ءُ مال برداریں ٹرک مھتل انت۔

زھرشانی کنوکیں مردمانی گْوشگ اِنت کہ پیسر ءَ ھم چہ ھمے دمگ ءَ بازیں ورنا بیگواہ بوتگ اَنت کہ آیانی یل کنائینگ ءِ ھاترا دمگی مردماں پیسر ءَ ھم سی پیک ایم 8 شاھدگ ءِ سر ءَ زھرشانی ءُ دھرنا کتگ اَت بلے انگت ءَ ھچ وڑیں گیش ءُ گیواری دیم ءَ نہ اتکگ انت۔

زھرشانی کنوکاں لوٹ کتگ کہ واکدار رھمدل ءِ یل دیائینگ ءَ دلستکی بہ کن اَنت اگاں نہ دھرنا برجاہ بیت۔ انوگ ءَ تاں ضلعی انتظامیہ ءُ سیکیورٹی کارندھانی نیمگ ءَ چہ اے بابت ءَ زھرشانی کنوکاں گوں رھوتی کنگ ءِ ھچ وڑیں ھال ءُ اھوال نہ بوتگ۔

گوستگیں شپ ءَ 2بج ءِ نزیک ءَ پاکستانی لشکر ءَ تربت ءِ دمگ گوگدان ءَ علی فقیر سنگھور ءِ لوگ ءِ سر ءَ اُرش کتگ ، بیڑ ءِ وھد ءَ کارندھاں لوگ ءِ جتا جتائیں کوٹیانی دروازگ پروشتگ انت ، الماری پروشتگ اَنت ءُ آھانی تہ ءَ ایریں سامان شنگ ءُ تالان کتگ اَنت ءُ جنینانی موبائل چِک کتگ اَنت ۔

دمگی مردمانی رد ءَ اے بیڑ شپ ءِ دو بج ءِ نزیک ءَ کنگ بوتگ کہ ایشی ءِ تہ ءَ جنین ءُ چُک چہ واب ءَ پاد کنگ بوتگ اَنت ءُ لوگ ءِ پٹ ءُ پول کنگ بوتگ۔ لوگ ءِ مردمانی گشگ اِنت کہ اے وھد ءَ جنین آدماں گوں بے شرپیں ھبر کنگ بوتگ ءُ زھگاں چہ آھانی بابت ءَ جُست ءُ پُرس کنگ بوتگ۔

علی فقیر سنگھور ءِ کھول ءِ گشگ ءِ رد ءَ فورسز ءِ کارندھاں آئی ءِ 125 سی سی ءِ موٹر سائیکل ھم برتگ بلے اے بیڑ ءِ وھد ءَ کس دزگیر نہ بوتگ۔

یات بہ بیت کہ گوستگیں سال ءَ ڈنک ءِ دمگ ءَ آپریشن ءِ وھد ءَ فورسز ءَ علی فقیر ءِ زھگ گوں آئی ءِ دو ھمراھاں کُشتگ اَنت کہ رند ءَ یک پرکاریں سلاہ بندیں گلے ءَ آئی ءَ را باسک لیک اِتگ ءُ زمہ واری ءِ منگ ءِ جار جتگ ات۔ دمگ ءِ مردمانی گشگ ءِ رد ءَ گوستگیں شپ ءَ ارش ءِ وھد ءَ فورسز ءِ کارندھاں آئی ءِ اکس چہ کوٹی ءَ در کتگ ءُ ٹُکّر جتگ ءُ آئی ءِ سر ءَ آئل مُشتگ۔

دمگ ءِ مردم ءُ سانمندیں کھول ءِ گشگ اِنت کہ لشکر ءَ انوگیں ارش ءِ ھچ وڑیں سبب پیش نہ کتگ کہ ایشی ءَ چہ دمگ ءَ ترس ءُ بیم شنگ بوتگ۔ سانمندیں کھول ءَ اے وئیل ءِ تچکیں پٹ ءُ پول ءُ آیوکیں وھد ءَ اے وڑیں وئیلانی بند کنگ ءِ لوٹ کتگ ءُ ھاسیں رنگ ءَ زالبولانی بے شرپی بند کنگ بہ بیت-

دومی نیمگ ءَ اے وئیل ءِ سر ءَ انگت ءَ فورسز ءِ نیمگ ءَ سرکاری لیکہ درشان نہ بیتگ انت۔