بلوچ یکجھتی کمیٹی ءَ یک پملفٹے ءَ شنگ کتگ ءُ گوشتگ بلوچ راج اے وھد ءَ یک شوربندی، ریاستی سروکی ءَ برجاھیں نسل کشی ءِ دیمپانی ءَ انت نا ایوک ءَ انسانی ھکانی بلکیں میان اُستمانی رھبندانی لپاشگ انت-
پمفلٹے ءَ گوشگ یتگ ھرچ انسانے گوں زندگ بیگ ءِ ھک ءَ ودی بیت ءُ دنیا ءِ ھچ کانود ناں اشی ءَ دات کنت ناں کہ پچ گپت کنت۔ دنیا ءِ تہ ءَ کجام ھم جاھے بہ بیت، کجام ھم زبان بہ بیت، کجام ھم مزھب بہ بیت یاکہ راج ، اگاں کسے ءِ پجار ءِ بنیاد ءَ اے ھک پُلگ بہ بیت گڑا اے چکچینی ءِ زمرہ ءَ کیت.
آئی ءَ گوشتگ کہ چکچینی ءِ وتی ھاسیں پجارے ھست ، اشی ءِ گونڈگری اِش انت کہ راجے ءِ ھلاس کنگ ءِ پندل سازگ، چکچینی انچو یک ھاسیں ویلے ءَ گوں بندوک نہ انت۔ اے مھمکیں پالیسی یے ءِ بنیاد ءَ کنگ بیت. اکوامِ متھدہ ءِ ھساب ءَ چکچینی ءَ چہ مراد ھما سرجمیں امل انت کہ آ ھاسیں راجے، پدریچ یا مزھبی ٹولی یے ءِ سرجم ءَ یا آئی ءِ بھرے ءِ ھلاس کنگ ءِ نیت ءَ کنگ بہ بنت. اے پجار ءِ تہ ءَ دو گال مان: یکے “سرجم” ءُ دومی “بھرے”۔ سرجمی ءَ ھلاس کنگ ءَ چہ مراد کہ ھاسیں پجارے ءِ مردمانی کُشگ یا آیاں ترندیں زھنی یا جسمانی تاوان دیگ یا انچیں جاورھال ودی کنگ کہ آیاں جسمانی ھساب ءَ تباھی ءِ نیمگ ءَ بہ بر انت چو کہ مالی ناکہ بندی، تُن، ڈُکال، الاج ءِ آسراتیانی زبھری، چک ءِ ودی بوگ ءِ دارگ پہ درور ھاسیں راجے ءِ زال یا مردانی جسمانی ھساب ءَ بے کار کنگ کہ اے بائیولوجیکل جینوسائیڈ گشگ بیت۔ ھمے رنگ ءَ زورانسری نوکیں پدریچ ءَ دومی ٹولیانی تہ ءَ دور دیگ چو کہ تُرس ودی کنگ یا زبان ءُ دود ءُ ربیدگ ءِ سر ءَ پابندی جنگ ءُ دیگہ دیگہ۔۔۔
آئی ءَ گوشتگ کہ بھرے ءِ چکچینی ءَ چہ مراد سرجمیں راج ءَ ناں بلکیں ھما راج ءِ لھتیں ھما مردم کہ پجارگ بوت کن انت، آیاں نشانگ کنگ، چو کہ نودربر، دانشور ءُ زانتکار، سیاسی ورکر یا زالبولاں نشانگ کنگ، زورانسری گار ءُ بیگواھی ءِ آماچ کنگ ءُ دود ءُ ربیدگاں گار کنگ۔ اکوامِ متھدہ ءِ ھساب ءَ چکچینی یک مزنیں جرمے، کجام ھم تاکتوریں تبکے ءِ پجار ءِ بنیاد ءَ دومی راج ءِ چکچینی کنگ جرم ءِ زمرہ ءَ کیت اگاں آ ایمنی ءِ وھد بہ بیت یا جنگی جاورھال۔ بِلے کہ بلوچستان ءَ آزاتی ءِ جنگ جنزگ ءَ انت بلے اے جنگ پاکستانی استان ءَ اے ھک ءَ نہ دنت کہ آ بلوچ راج ءِ چکچینی ءَ بہ کنت۔ مرچی ھر روچ کہ بلوچ ٹارگٹ کلنگ ءِ آماچ کنگ بوگ ءَ انت، یا گار ءُ بیگواہ کنگ بوگ ءَ انت ءُ پد ءَ ژانگولیں جون اش دور دیگ بوگ ءَ انت، یا ھواری ءَ کبرانی تہ ءَ کل کنگ بوگ ءَ اِنت، اے سرجم ءَ چُکچینی ءِ زمرہ ءَ کاینت۔
آئی ءَ گوشتگ کہ مرچی مئے مردم ءَ گار ءُ بیگواھی ءِ وھد ءَ گنتریں آزارانی آماچ کنگ بوگ ءَ انت ءُ اگاں کسے زندگ ءَ یلہ کنگ ھم بہ بیت گڑا آ گنتریں زھنی ءُ جسمانی آزار ءَ پد آ لس زندگی ءِ گوازینت نہ کن انت۔ ھر روچ لوگانی سر ءَ بیڑ، چیک پوسٹانی سر ءَ زلیلی، لٹ ءُ کٹ ءِ نشانگ کنگ- اے درست زھنی تشدد ءِ انتھا انت۔ نوکری ءِ نہ دیگ، کار کنگ ءِ سرجمیں موھانی پچ گرگ، کہ آیانی تہ ءَ سیمسری بیپار، کشت ءُ کشاری زمینانی سر ءَ کبزہ، زور لڑینگ ءُ کشت ءُ کشاری ءَ دارگ ھوار انت- اے درست مالی چکچینی ءِ برابر انت کہ اے وردن ءِ کمی ءُ گژن ءِ جاورھال ودی کنگ ءَ اِنت.
آئی ءَ گوشتگ کہ کوہِ سلیمان ءَ یورینیم ءِ بے سوبیں کشگ، ھُزدار ءَ ایٹمی سلاھانی تیار کنگ ءُ چاگی ءُ ھاران ءَ ایٹمی اُرشانی تجربگاں شومک ءِ نادراھی ، ھون ءُ تھائیرائیڈ ءِ نادراھی بے لگام کتگ انت۔ اشانی واستا جان دراھی ءِ آسراتی ءِ نہ بوگ ءِ سبب ءَ سال ءِ سر ءَ ھزاراں مردم مرگ ءِ آماچ بوگ ءَ انت۔ روڈ وئیلاں بگر داں منشیات ءِ کشت ءُ کشار ءُ سرِ بازار ءَ بھا ءَ داں، بلوچ راج ءِ چکچینی بوگ ءَ انت۔ ءُ اے سرجم ءَ سیکیورٹی پالیسی ناں بلکیں مھمکیں چکچینی ءِ پالیسی ءِ بھر اَنت ءُ اے سرجمیں ویل وتی تہ ءَ وت اے گپ ءِ واستا بس اَنت کہ پاکستانی استان مجرم نامینگ بوت کنت۔
آئی ءَ گوشتگ کہ بلوچ راج چو کہ ما مرچی چکچینی ءِ آماچ ایں پمیشکا لس راجے ءِ نسبت ءَ مئے سر ءَ گیش زمہ واری کیت۔ وتی راج ءَ ناں تھنا چہ اے چکچینی ءَ رکینگ بلکیں اے چکچینی ءِ سبوتانی یکجاہ کنگ ءُ آیاں دنیا ءِ دیم ءَ آرگ ھم مئے زمہ واری ءِ بھر اِنت۔ ھرچ ھما ویل کہ گوں ما بیگ ءَ انت، مئے پجار ءِ بنیاد ءَ بوگ ءَ انت پمیشکا ناں چہ آئی ءَ تچگ بیت ناں کہ چہ آئی ءَ رکگ ءِ واستا وتی پجار یلہ دیگ بوت کنت پرچا کہ وتی جند ءِ پجار ءِ یلہ کنائینگ ھم ھمے چکچینی ءِ بھر اِنت۔
آئی ءَ گوشتگ کہ استان ءِ یک مکسدے اش انت کہ بلوچستان بہ بیت بلے بلوچ مہ بیت، داں اے گلزمین وتی سر ءَ دری تاکتاں جاہ بہ دنت ءُ اشی ءِ مال ءُ مَڑی دری تاکتانی پائدگاں پیلو بہ کن انت۔ پمیشکا بلوچ راج ءِ سر ءَ الّم انت کہ آ وتی چکچینی ءَ بہ زانت ءُ وتی رکینگ ءِ واستا اے چکچینی ءِ دیم ءَ اڈاند بوگ ءِ املی کردار پیلو بہ کنت۔
آئی ءَ گْوشتگ کہ باشئوریں بلوچ راج اے مھمکیں چکچینی ءِ ھلاپ ءَ مئے مُچانکی جدوجھد ھستیں وھد ءِ ارزشتداریں زلورتے۔ مرچی ارزشتداریں جُست اِش انت کہ استان ءِ ھمے مھکمیں چکچینی ءِ دیم ءَ انچو یکشل ءَ پُر بوان بئین یا ما وتی گم ءُ درد ءَ پگر ءِ تہ ءَ مٹ کنیں ءُ امل ءِ نیمگ ءَ بر ایں؟ اے الّم انت کہ مارا چکچینی ءِ اھساس بہ بیت۔ ھر بلوچ وتی پجار ءَ گوں اے اھساس ءَ زندگ بہ کنت، آ بلوچ وتی گلزمین ءَ بہ بیت یا دریں دیارے ءَ۔
اے اھساس ءَ زندگ کنگ ءَ پد دیمی کار اشی ءِ شئور ءِ تہ ءَ بدل کنگ انت کہ ما بہ جیڑ ایں کہ ما اے چکچینی ءِ دیم ءَ کجام شوربندی ءَ بزوریں ءُ رکینگ ءِ اے جد ءَ جھد ءَ چوں برجاہ بہ داریں ءُ پد ءَ امل ءِ نیمگ ءَ برو ایں۔ اے ھما مرھلہ انت کہ اشانی تہ ءَ پیچ ءُ تاب ھزار انت بلے اے جد ءُ جھد ءَ بگیر ھچ بوت نہ کنت پرچا کہ اِشی ءِ سیادی گوں بلوچ راج ءِ رکینگ ءَ بندوک انت۔
آئی ءَ گوشتگ کہ مرچی ھرچ بلوچ ءِ سر ءَ الّمی انت کہ آ وتی سر ءَ بؤکیں ھرچ زُلم ءَ دیم ءَ بیاریت ءُ آئی ءَ چکچینی ءِ یات داشتانی تہ ءَ بہ رکینیت۔ اے چکچینی ءِ بارو ءَ دنیا ءَ سرپد بہ کنت ءُ آیاں اے چکچینی ءِ دارگ ءِ واستا املی کردار پیلو کنگ ءِ واستا بگش اَنت۔ ھما بلوچ کہ اے چکچینی ءِ تہ ءَ کمکار اِنت، آ وتی دست ءَ بہ کش انت پرچا کہ اے چکچینی یک لوگے یا ھندے ءِ جیڑہ نہ اِنت بلکیں سرجمیں راج ءِ جیڑہ انت ءُ ھما بلوچ کہ مرچی اِشی ءِ بھر اِنت، باندا ھمایانی پدریچ ھم اے چکچینی ءِ آماچ بنت ءُ باز بر ءَ بوتگ اَنت ۔
آئی ءَ گوشتگ ھما بلوچ کہ استانی ڈیتھ اسکواڈ ، سی ٹی ڈی، ایف سی یا آرمی ءِ بھر بنت ءُ وتی مردماں تاوان دیگ ءَ انت، آ انوگ ءَ چہ اشی ءَ یلہ بہ کن انت۔ ھما کہ چاگرد ءِ تہ ءَ منشیات ءِ ڈولیں زھر دیگ ءَ انت، آ اِشی ءَ یلہ بہ کن انت۔ ھما کہ ٹکی جنگانی بھر انت یا راجی زمہ داریاں سرپد نہ انت، آ اِشی ءَ بلوچ راج ءِ واستا رد بہ لیک انت ءُ یلہ بہ کن انت۔
آئی ءَ گوشتگ کہ ھما بلوچ کہ راجی جنز ءَ چہ آژنا انت، آ اشی ءِ جھلانکی ءَ شوھازگ ءُ توانا کنگ ءِ کوشست بہ کناں۔ پہ وتی راج ءِ زندگ دارگ ءَ مارا وتی زبان ءُ ربیدگ زندگ کنگی اَنت، جھد گوں زانت ءُ پگر ءَ سلاھبند کنگی اِنت، ءُ نہ تھنا یک روچے بلکیں وتی سرجمیں زند ءَ پہ بلوچ راج ءَ ندر بہ کنیں۔ اے مئے پدریچ ءِ مستریں ذمہ واری اِنت۔ ما وتی امل ءِ نیام ءَ ھمینکس نزوری کنیں، مئے آؤکیں پدریچ دو ھمینکس ازاب ءُ تورشتانی دیمپان بنت، پمے ھاتر ءَ پہ راجی رکینگ ءُ باندات ءَ، وتی ھست ءِ میان ءَ امل کنگ الم اِنت۔
