TBP Balochi

شال ءِ جتا جتائیں جاھاں بلوچستان ءِ دمگ سوراب ءَ سیادی داروکیں سَے مردم زورانسری بیگواہ کنگ بیتگ انت- اے سئیں مردم 23 ءُ 24 جنوری 2026 ءَ جتا جتائیں جاھاں پاکستانی پوج ءَ آوار جتگ انت کہ پد ءَ آیانی درگت ءَ ھچ اھوال دیم ءَ نیتکگ انت-

بیگواھیں مردمانی تہ ءَ یک ورنائیں ڈاکٹر، نودربر ءُ اسکول ءِ استاد ھوار انت ۔

ڈاکٹر شاھزین احمد ء غلام حیدر ءِ عمر 25 سال ءِ کساس ءَ انت کہ کار ءُ کسبے ڈاکٹری انت ءُ سوراب ءِ نندوک اِنت۔ آ 24 جنوری 2026 ءَ شال ءِ گنج چوک چہ اسپینی روڈ ءَ آوار جنگ بوتگ۔

جنید احمد ء علی احمد ءِ عمر 22 سال ءِ نودربرے ءُ آئی ءِ سیادی ھم چہ سوراب ءَ اِنت۔ جنوری 2026 ءَ شال ءِ کواری روڈ ءِ چہ چائلڈ ھسپتال ءَ آوار جنگ بوتگ۔

علی احمد ریکی ء راشد احمد عمر 40 سال انت کار ءُ کسبے استادی انت ءُ سوراب ءِ نندوک انت. آئی ءَ را 24 جنوری 2026 ءَ شال ءِ گنج چوک ،چہ اسپینی روڈ ءَ ھم آوار جنگ بوتگ ۔

چمدیستگیں مردمانی رد ءَ آ ھم پورسز ءَ دزگیر کتگ ءُ ناشناسیں جاھے ءَ برتگ کہ بازیں روچانی گوزگ ءَ پد ھم آئی ءِ بارو ءَ سرکار ءَ ھچ اھوال دیم ءَ نیاؤرتگ انت-

بلوچستان ءَ زورانسری جیڑہ گوستگیں دو دھکاں یک سنگینے انسانی ناوشی ءِ جوڑ بیتگ- گچینی رنگ ءَ 2000 ءَ پد بلوچستان ءَ سیاسی باسک،نودربر، استاد، اھوالکار ءُ لس شھری دزگیر کنگ ءَ پد ءَ آ بیگواہ کنگ بوگ ءَ انت-

راجدوستی

نبشتہ کار: باھڑ بلوچ

دی بلوچستان پوسٹ

چوناھا ما بلوچ وت ءَ زُبان دوست ءُ راجدوست گْوش اِیں ۔ما وتی راجی زُبان ءِ وانگ ءُ دربرگ ءَ وھد نہ دے ایں۔راستی اِیش اِنت ما تُرس ءِآماچ ایں کہ بلوچی وانگ ءُ دربرگ گران اِنت ۔وتی جند ءَ زُبان ءَ مہ وان ایں۔وتی راجی زبان ءِ وانگ ءُ دربرگ ءِ جُھد ھم مہ کن ایں گُڑا ما کجام ھساب ءَ راجدوستی ءِ گپ کن ایں یا وت ءَ راجدوست ءُ وانندھیں بلوچ گْوش ایں ؟

ما گوں کالج ءُ یونیورسٹی ءِ نودربراں دزبندی کن اِیں کہ شما راج ءِ اُمیت ءُ باندات ءِ رھشُون اِت۔وتی گوانکو ءَ پہ وھد ءِ زوالی ءُ ٹک ٹوکاں ناں بلکیں پہ زبان دوستی ءُ راجدوستی ءَ کارمرز بکن اِت راجی زُبان ءِ سرمچار جوڑ بہ کن اِت ۔سرمچارے ءِ وڑ ءَ ھر روچ بلوچی وانگ ءُ دربرگ ءِ جُھد بہ کن ات ۔کہ شمارا راج آگاہ ءُ سرپد کنگ لوٹ اِیت تو پنجابی ءِ گُلام ئے۔پارسی ءُ اردو ءَ تئی رُبان لگتمال کُتگ ءُ ھمے بے زُبان ءِ وانگ ءَ تو گار بوگ ءَ ئے۔

ما ھشت یا دہ سال پہ دری زبانانی وانگ ءُ دربرگ ءَ دے ایں ۔بلے ما وتی جند ءِ زُبان ءَ یک ھپتگےنہ دے ایں یک روچے ھم بلوچی دَرونتاں نہ وان ایں ۔ مارا اِے ھم سرپدی نیست کہ وانگ زانگ ءُ نبشتہ چے گْوش اَنت ؟ پہ وانگ ءَ چے لازُمی اِنت ؟ نبشتہ چنکس کاریچ اَنت ؟ ءُ ناں کہ اِے وڑیں چیزانی وانگ ءُ زانگ ءِ جُھد کن ایں ۔ بلوچ راج ءِ یونیورسٹی ءُ کالج ءِ نودربراں پچار اِت کہ آیاں اِے سرپدی ھم نیست کہ نودربر ءِ زمہ واری ءُ آئی ھک چےاَنت؟

ھر روچ مئے دپ ءَ تھنا یکیں گپ اِنت ۔ بلوچی مئے وتی شھدیں زُبان اِنت دری زبانانی نبشتکاں وان ایں ءُ دری زُبان ءَ پوسٹ کن ایں۔ بلے ھچ سُد نیست کہ مارا وتی جند ءَ ھم زبانےھست ما نہ زان ایں کہ ایشی ءَ ما راج ءِ بے سمائی بہ گْوش ایں یا کہ بد بھتی ؟ انی بلوچ راج ءِ نودربراں ھم کمیں جیڑگ لوٹ اِیت کہ زاناں ما بلوچ راج ءِ نودربر پہ وتی راج ءِ زبانانی واست ءَ چے کنگ ءَ ایں ؟ چوناھا گند ئے ما وت ءَ راجدوست ءُ زُبان دوست گْوش ایں؟ بانُک کریمہ جاگھے گُوش اِیت راج ءَ زندگ دارگ ءِ واست ءَ زُبان زندگ بدار۔ اگاں یک بلوچے ءَ ھشت یا دہ تبک (کلاس )ونتگ ءُ مرچی موبائل ئے گوں اِنت گُڑا ھمے بلوچ سئے روچ ءِ تہ ءَ وتی راجی زُبان ءِ وانگ ءُ راست نبیسگ ءَ زبر بیت بَلے بےَ شرت اِیش اِنت کہ آ وتی موبائل ءَ کتابے ءِ وڑ ءَ پچار اِیت ءُ وت ءَ وٹس ایپی ءُ پیسبوکی وانگجاھاں ھوار بہ کنت۔آئی ءِ تہ ءَ زبان دوستی ءُ راجدوستی بہ بیت، آ دلپروش مہ بیت کہ من بلوچی وانگ ءَ سُست آں بلکیں آئی ءِ تہ ءَ زبان ءِ وانگ ءُ دربرگ ءِ واھشت ءُ جُھد کنگ ءِ توکل لازم بہ بیت ۔

دیم ءَ مارا ھر یکے ءَ وتی راجی زبان ءِ سرمچار ءُ جُھدکار بوگی اِنت ۔ وتی پوسٹاں بلوچی ءَ نبشتہ بہ کن اِیں ۔ بِل اِت رَد بہ بنت وھد ءِ ھمراھی ءَ ما بلوچی راست نبیسگ ءَ زبر بَہ ایں۔

شالا زبان دوست ،ءُ راجدوست بات اِت بلوچ راج وت ماں وت تپاک ءُ یکمُشت بات،بلوچی دیمروی بکنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ ریپبلکن گارڈز ءِ جارکش دوستین بلوچ ءَ شنگ کتگیں درشان ءِ تہ ءَ گْوشتگ کہ مئے سرمچاراں شال ءَ چہ پشاور ءَ رؤکیں جعفر ایکسپریس ریل شکار پور ءُ جیکب آباد ءِ میان ءَ شھر سلطان کوٹ ھند سر ءَ آئی ای ڈی پٹ کتگ ءُ ریموٹ کنٹرول تراکے ءَ چہ نشانگ کتگ-

جارکش ءَ گوشتگ ریل ھما وھد ءَ نشانگ کتگ وھدے آئی ءَ زورگریں پاکستانی پوج ءِ کارندہ سپر کنگ ءَ بیتگ اَنت – تراک ءَ بازیں کارندھے مرتگ ءُ ٹپی بیتگ اَنت وھدے کہ ریل ءِ بازیں بوگی پٹڑی ءَ چہ ایر کپتگ ءُ لیٹیتگ-

جارکش ءَ گوشتگ کہ بی آر جی اے اُرش ءِ زمہ واری ءَ منّ اِیت ءُ اے وڑیں اُرش بلوچستان ءِ وتواجھی ءَ برجاہ بنت-

چہ ھب چوکی ءَ پاکستانی پوج ءُ چیرین ادارھانی دست ءَ آوار جنگ بیتگیں ھانی بلوچ مروچی چہ ھب ءَ یل کنگ بیتگ-

ھانی بلوچ ء دلوش بلوچ 20 دسمبر 2025 ءَ چہ ھب چوکی ءَ پاکستانی پوج ءَ گوں ھیر النسا بلوچ ءِ ھواری ءَ آوار جتگ ءُ بیگواہ کتگ بیتگ۔ ھانی بلوچ ءُ ھیر النساء ھردوک یکیں کھول ءِ مردم اَنت کہ کیچ ءِ ھند سنگ آباد کرکی ءِ جھمنند اَنت۔

دمگی مردمانی رد ءَ ھانی بلوچ مرچی چہ ھب چوکی ءَ یل کنگ بیتگ ءُ ھیر النساء بلوچ انگت بیگواہ اِنت۔

ھانی بلوچ ءُ ھیر النساء بلوچ ءَ ابید آیانی کھول ءِ دگہ دو ورنا فرید بلوچ ءُ مجاھد بلوچ ھم چہ کیچ ءَ بیگواہ کنگ بوتگ اَنت۔

آیانی زوریں بیگواھی ءِ بگیری ءَ کھول ءَ دو رند ءَ تجابان ءَ زھرشانی ءَ سی پیک دگ بند کتگ، دو روچ پیش ھب چوکی ءَ ھم زھرشانی کتگ بیتگ۔

بلوچستان ءَ بلوچ زالبولانی آوار جنی ءُ بیگواھی ءِ یک نوکیں درچے بندات بیتگ کہ اود ءَ تنی وھدی بازیں زالبولے گرگ ءُ بیگواہ کنگ بیتگ انت-

زانگ بہ بیت ایشی ءَ پیش چہ ھب چوکی ءَ بیست ءُ دو نومبر دوھزار ءُ بیست ءُ پنچ ءَ آواران ءِ جھمنندیں نسرینہ بلوچ ء دلاور ھم پاکستانی پوج ءَ آوار جتگ ءُ بیگواہ کتگ-

ھمے وڑ یکم جنوری ءَ چہ ھزدار ءَ پرزانہ ءُ چہ دالبندین ءَ رحیمہ ھم آوار جنگ ءُ بیگواہ کنگ بیتگ انت –

ایشاں ابید گوستگیں سال ءَ نودربر ماہ جبین بلوچ انگت ءَ ھم دیم ءَ آرگ نہ بیتگ ءُ بلوچستان ءَ زالبولانی آوار جنی ءِ سر ءَ انسانی ھکانی گل یکشل ءَ پدردی درشان کنگ ءَ انت –

بی وائی سی ءَ گوستگیں وھداں شنگ بیتگیں درشان ءَ گوشتگ بلوچستان ءِ جتا جتائیں جاھاں دوازدہ زالبول آوار جنگ ءُ بیگواہ کنگ بیتگ انت-

بلوچستان ءِ دمگ چہ پنجگور ءَ یک مردمے پاکستانی پوج ءَ آوار جنگ ءَ پد ناشناسیں جاھے ءَ برتگ-

بیگواہ کنگ بیتگیں مردم ءِ پجّار شھزاد ء سیٹھ خیربکش ءِ نام ءَ چہ بیتگ، آئی ءِ درگت ءَ کھول گوشگ اِنت کہ آ لھتے روچ ءَ ساری پنجگور ءِ دمگ چہ وشبود ءَ پاکستانی پوج ءَ آوار جتگ، بلے اشی ءَ پد آئی ءِ درگت ءَ ھچ وڑیں ھال نیست-

بلوچستان ءَ زورانسری آوار جنیانی جیڑہ گوستگیں بازیں سالاں چہ یک سنگینے جیڑھے- انسانی ھکانی جتاجتائیں دمگاں چہ درزنانی مردم بیگواھی ءِ شکایت دیم ءَ آیگ ءَ اَنت، بازیں ماہ یا سالانی پد یل کنگ بنت، وھدے کہ بازیں کیس انگت ھست اَنت-

‏مھروانيں اُستاد ساجد

نبشتہ کار : دروشم بلوچ

دی بلوچستان پوسٹ

من ءَ کہ وهدے تئی آوار جَنگ ءِ هال سر بیت گُڑا منی سرجميں جِسم ءُ جان پَچ لرز اِت اَنت من ھمے ساهت ءَ ھما جاہ ءَ نِندُوک اِتاں کہ ھما جاہ ءَ تو مئے اُستاد بیتگ ئے ھما وانگ جاہ ھمے جاہ ءَ تو مارا مدام سر ءُ سوج کُتگ تو مارا اِے اِیردستی زَمین ءِ درگت ءَ سرپَد کُتگ ساجد مرچی اَگاں منی وڑیں نا بَلدیں نودربر ءِ کِتاب وانیت گُڑا آئی ءِ مستريں سَبب تو ئے تو ھر وھد ءَ مارا ھمے سِکين داتگ کہ کِتاب بُوان اِت اَچ تو مہ کُليں شئے دربُرت ءَ مَرچی منی وڑیں نا بَلدیں نودربَرے کہ دُو نِزوریں لبَز کہ نِبشتہ کنگ اِنت آئی ءِ سَبب تو ئے ساجد اَگاں مرچی مہ بِچار ایں کہ اِے زورانسری بیگواہ بیتگیں مردُم سک ءَ باز اَنت همُک میتگ ءُ کوچگ ءَ مئے مُردم بیگواہ بیگ ءَ اَنت بلے تئی وڑیں بہ سما ءُ سرپَدیں ورناھانی گار ءُ بیگواھی سرجَميں چاگِرد ءَ پہ بلاھيں تاوانے ساجَد تئی آوار جَنگ ءَ پَد من آں یکشَل ءَ تئی یکیں سِکین گُوش ءَ اِنت کہ گونڈل ءَ کِتاب اَلم بُوان اِت پلسپہ بُوان اِت گُلامی راجانی راجدپتر ءَ بُوان اِت گُلام ءِ راج اَلم بُوان اَنت شُمارا کُل ءَ وانگی اِنت ساجد مہ وَ تئی داتگيں سِکين زُرتگ اَنت ۔۔ساجد اِے اِستان ءَ اَچ تو بیم اَتک تئی اِلم ءُ زانت ءَ چہ بیم اَتک تئی بہ سّمائی ءَ چہ بیم ءِ اَتک آئی بہ سّما ءُ سرپدیں ورناھاں چہ بیم کئیت آ یک یک ءَ گِچین کنان ءُ بَران اِنت مئے ورناھاں ھما ورنا ءُ اُستاد ءُ سنگت مارا پہ چّم ءِ چارگ شات نہ بَنت ھمایاں بارت وتئی تھاریں کوٹی ءَ بَند کنت ءُ آهاں تیر باران کنت جَنگل ءُ گیابان ءَ دور دنت یہ سال ءُ کرن ءَ پَد ھما بے نامیں کبراں بارت ءِ کَل اش کنت –

ساجَد من ءَ اُوست اِنت کہ تو وش ءُ سلامتی واتر بہ ئے ءُ گیش مُھکم بہ ئے ۔۔۔ساجد اِے اِستان مارا همُک روچ مئے مردُمانی تِیر سُپتگيں جُون ءَ دیگ اِنت پيک اِنکاونٹر ٹارگٹ کِلنگ روڈ اِیکسڈنٹ کِینسر همُک دُروشُم ءَ مئے چُکچِینی ءَ کنگ اِنت ساجد تو وت سَرپد ءِ اِے اِستان ءَ مئے مردُم ءَ چہ زِندگ بیگ پُل اِتگ ساجد تو مُدام گُشت اِے اِیردستی زمین ءُ چاگِرد ءَ همُک وڑیں جیڑہ ءُ جنجال کاینت بلے پُشت کِنزگی نہ اِنت دیم ءَ جُنزگی اِنت وتئی جُھد برجاہ دارگی اِنت ساجد تو سَرپد ئے اِے اِستان ءَ مئے مات ءُ گوھاراں یک یک آوار جَنان اِنت مئے لاپ پُریں مات ءُ پانزدہ سالی ءِ گوھاراں آئی ءِ سیاہ ءُ تھاریں کوٹی ءَ بَند اَنت ساجَد مئے ورناہ مئے مَڈی اَنت ۔۔بلے اِے کُليں چِست ءُ اِیرانی نِیام ءَ پَمن تئی گار ءُ بیگواھی گيش تورناک اِنت اَچ تو مہ کُليں شئے پهم اِت اَنت ۔

ساجَد پھل کن کہ تئی آوار جَنگ ءَ لھتیں وهد گوستگ من پَر تو دُو لبز نبشتہ کُت نہ کُتگ کہ من ءَ لبزاں ھمراھداری کُت نہ کتگ –

ھرکجا ئے گیش مھکم بات ئے ءُ زوت واتر بات ئے کُلیں نودربر تئی ودار ءَ اَنت کُربان –

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچ آجوئی لوٹوکیں رھشون ءُ بلوچستان لبریشن فرنٹ ءِ سروک ڈاکٹر اللہ نزر بلوچ ءَ چاگردی ترامجاہ ” ٹروتھ سوشل “ ءَ وتی شنگ کرتگیں درشانے ءِ تہ ءَ گوشتگ کہ زورگپتیں بلوچستان ءِ وتگڑیں سروزیر ءَ وتی واجھانی گوشگ ءِ پد ءَ بلوچستان ءِ تہ ءَ زلم ءُ ترس ءِ کانود ءِ آورتگ ۔

بلوچ رھشون ءَ گوشتگ کہ میان استمانی انسانی ھکانی گلاں چہ لوٹ کناں کہ آ اے زوراکیانی بگیری ءَ وتی توار ءَ چست بہ کن انت۔

آئی ءَ گوشتگ کہ اے بندیگ جاہ نازیانی زوراکی ءِ یاتاں پرریناں ، کساس ھمک روچ پاکستان ءِ کانود جوڑ کنوکیں ایجنسی پنچ مردم آوار جن انت ءُ بیگواہ کن انت ، بلوچستان ءِ تہ ءَ اے زوراکیں ریاست ءِ بجن ءُ چگل دیگ ءِ پالیسی ءِ تہ ءَ سک باز گیشی اتکگ-

بلوچ رھشون ءَ گوشتگ کہ ھما بلوچ پارلیمنٹیریناں ھم گوشگ لوٹ آں ک لٹ شاپی بٹاک ءَ جن انت ، اگاں اے راست ایں گڑا ترندیں ریاست ءِ اے زوراکیاں پرچا ھچ نگوش انت ؟ زوراکی ءِ وھد ءَ ھچ نگوشگ بزاں وت ھمے زوراکیاں ھوار بوگ انت ۔

ڈاکٹر ءَ گوشتگ کہ جھان جنگ ءُ جدالی ءِ نیمگ ءَ رؤگ ءَ انت ، بلے اقوام متھدہ انگت ھست انت ءُ آئی ءِ اکلاکی ءُ کانودی زمہ داری انت ، من اقوام متھدہ ، یورپی یونین ، ایمنسٹی انٹر نیشنل ، ہیومن رائٹس واچ ءُ میان استمانی زانتکاراں چہ لوٹ کناں کہ بلوچ راج چکچینی بگیری ءَ توار چست بہ کن انت ۔

گڈسر ءَ بلوچ رھشون ءَ گوشتگ کہ بلوچ آجوئی زرمبشت وتی ھک ءِ سر ءَ انت ءُ میان استمانی کانود ءُ رھبندانی رد ءَ انت ۔ راجدپتر ھمایاں یات کنت کہ زوراکی ءِ دیم ءَ اوشتاتگ انت ءُ ھمایاں ھم کہ دیم پر کتگ ءُ ھچ ءِ نگوشتگ ۔

بلوچستان ءِ دمگ پنجگور ءُ تمپ ءَ بیتگیں دو جتاجتائیں اُرشانی زمہ واری بی ایل اے ءُ بی ایل ایف ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں پنجگور ءَ زورگریں پوج ءِ دوازدہ کارندہ کشتگ ءُ دگہ شش ٹپی کتگ اَنت – زورگریں پوج ھما وھد ءَ اُرشانی نشانگ کتگ اَنت وھدے آ ھمے دمگ ءَ زوراکی ءِ نیئت ءَ وتگڑیں ڈیتھ اسکواڈ ءِ ھمراھی ءَ مزنیں کچے ءَ پیشگامی ءِ جُھد ءَ بیتگ اَنت-

جارکش ءَ گوشتگ کہ گوستگیں روچ ءَ پنجگور ءِ دمگ سوراپ ءَ بلوچ لبریشن آرمی ءِ سرمچاراں زورگریں پاکستانی پوج ءُ دیتھ اسکواڈ ءِ باسک ھما وھد ءَ نشانگ کتگ، وھدے آ مزنیں کچے ءَ گاڑیاں ءُ پیادگ ءَ پیشگامی کنگ ءِ جُھد ءَ بیتگ اَنت- اے میان ءَ زورگریں پوج ءِ کمک ءِ واستا بکتر بند ءُ دگہ گاڑیاں گیشیں کارندھاں پیشگامی ءِ جُھد ءَ بیتگ، چریشی ءَ سرمچارانی دومی ٹولی ءَ اُرش ءِ نشانگ کتگ ءُ پُشتکینزتگ اَنت-

جارکش ءَ گوشتگ کہ نیمروچ ءِ ساھت یک ءَ بگر تاں شپ ءِ ھشت ءَ برجاہ اے دْراجیں میڑاں زورگریں پاکستانی پوج ءِ کمانڈواں ھوار سرجمی ءَ دوازدہ کارندہ مرتگ ءُ شش ٹپی بیتگ اَنت، وھدے کہ دُژمن ءِ یک گاڑی یے تباہ بیتگ ءُ وتگڑیں ڈیتھ اسکواڈ ءِ باسک ھم تاوان ءِ دیمپانی کنگ کپتگ-

جارکش ءَ گوشتگ بلوچ لبریشن آرمی اے اُرش زمہ واری منّ اِیت ءُ دُژمن ءِ سر ءَ گیش تُرندیں اُرش کنگ ءِ کول کنت- بلوچ راج ءِ آجوئی ءَ تاں مئے سلاہ بندیں اُرش برجاہ بنت ءُ زورگریں پوج ءَ را پڑ ءَ بے سوبی ءِ دیمپانی کنگ کپتگ-

بلوچستان لبریشن پرنٹ ءِ جارکش میجر گْوھرام بلوچءَ وتی درشانے ءَ گوشتگ کہ سرمچاراں 24 جنوری ءَ تمپءِ ھند بالیچہ ءَ برجاھیں پاکستانی پوج ءِ بنجل ءِ سر ءَ گرنیڈ لانچر ءِ باز گولا آس داتگ کہ آ نشانگ ءَ لگ اتگ اَنت۔ اے اُرش ءِ آسر ءَ زورگریں پوج ءَ جانی ءُ مالی تاوان بیتگ۔

جارکش ءَ گوشتگ کہ اے اُرش پاکستانی پوج ءِ بُنجل ءِ سر ءَ ھما وھد ءَ کنگ بیتگ کہ پوج ءِ سروکی ءَ یک دیوانے بیگ ءَ بیتگ کہ اے دیوان ءَ تیل ءِ باپاری کنوکیں گاڑیانی واھنداں ٹوکن ءِ لالچ دیگ ءُ پہ آدگہ پوجی بنجلاں راشن برگ ءَ ھوار آدگہ کاراں رازیگ کنگ ءِ جھد بیتگ اَنت۔

جارکش ءَ گوشتگ کہ ما رسانکدر ءِ چہ ءَ پیسر ءَ ھم مردم کڈن کرتگ اَنت کہ کسے دژمنیں پوج ءِ چونیں کمکاری ءَ ھوار بیت آ وتی جانی ءُ مالی تاوان ءِ زمہ وار وت بیت۔

پاکستانی لشکر ءَ تربت ءُ پنجگور ءَ دو مردم آوار جتگ ءُ بیگواہ کتگ اَنت-

بلوچستان ءِ دمگ کیچ ءِ تھسیل تربت ءِ دمگ چہ بالیچہ ءَ رس اتگیں ھالانی رد ءَ پاکستانی لشکر ءَ یک ورنایے آوار جتگ ءُ بیگواہ کتگ-

پاکستانی لشکر ءِ دست ءَ دزگیر کنگ ءَ پد ناشناسیں جاھے ءَ برگ بوتگیں ورنا ءِ پجار 23 سالی نودربر سلیمان بلوچ ء فدا احمد ءِ نام ءَ زانگ بیتگ ۔

گار ءُ بیگواہ کنگ بیتگیں ورنا 24 جنوری ءَ پاکستانی لشکر ءَ تربت بالیچہ ءَ چہ آئی ءِ لوگ ءَ زورانسری بیگواہ کتگ۔

ھمے وڑ ءَ تربت ءَ پولیس ءَ بی اینڈآر کالونی ءَ یک مردمے ءِ لاش دزکپتگ کہ پولیس ءَ لاش چِست کتگ ءُ اژدری چار ءُ تپاس ءِ واستا نادراہ جاہ ءَ سر کتگ-

ھمے وڑ ءَ پنجگور ءِ دمگ وشبود ءَ ناشناسیں گاڑی سواریں سلاہ بندیں مردماں جاسم نامیں مردمے توپک ءِ زور ءَ آوار جتگ ءُ برتگ- پولیس ءِ رد ءَ جاسم ھما وھد ءَ برگ بیتگ کہ آ وتی سروس اسٹیشن ءَ کار ءَ بوتگ-

بی وائی سی ءِ رد ءَ بلوچستان یک مزنیں بندیگ جاہ ءُ یک بلاھیں ڈیتھ سیل ءِ تہ ءَ بدل بوتگ ۔

بلوچ یکجھتی کمیٹی ”بی وائی سی “ ءَ بلوچستان ءِ تہ ءَ سال 2025 ءِ میان ءَ انسانی ھکانی جاورھالانی درگت ءَ وتی ھمک سالی رپورٹ ءِ شنگ کنان ءَ گوشتگ کہ بلوچستان ءِ تہ ءَ زورانسری آوار جنی ، درکانودی کشت ءُ کوش ءُ ریاستی زوراکیانی تہ ءَ سک باز گیشی اتکگ ۔

پریس کانپرنس ءَ تران کنان ءَ بی وائی سی ءِ رھشوناں گوشتگ کہ اے رپورٹ بلوچستان ءَ برجاھیں زوراکیانی سرجمیں اکس ءَ پیش نہ دار ایت بلکنہ اے بس ” ٹپ آف دی آئس برگ “ انت کہ بلوچستان انسانی ھکانی نگیگیں جاورھالانی سرا چمشانک دیگ ءَ بس انت ۔

آیانی رد ءَ بلوچستان یک مزنیں بندیگ جاہ ءُ یک بلاھیں ڈیت سیل ءِ تہ ءَ بدل بوتگ ۔

بی وائی سی ءِ ھمک سالی رپورٹ ءِ رد ءَ بلوچستان ءَ سال 2025 ءَ 1223 مردمانی زورانسری آوارجنی ءِ کیس نبشتہ کنگ بوتگ ، کہ آیانی تہ ءَ 348 مردم یل کنگ بوتگ انت وھدیکہ 832 ھنگت بیگواہ انت ، کہ آیانی تہ ءَ 75 کسانسال ءُ ھژدہ زالبول ھوار انت ، درساں گیشتر کیس کیچ ءِ دمگ ءَ نبشتہ کنگ بوتگ کہ اودا آوارجنی ءِ کچ 339 انت ۔

بی وائی سی ءِ رد ءَ گوستگیں سال ءَ 188 مردم درکانودی کشگ بوتگ ، کہ آیانی تہ ءَ 75 مردم ریاست ءِ نیمگ بلوچستان ءَ برجاھیں بجن ءُ چگل دیگ ءِ پالیسی ءِ رد ءَ کشگ بوتگ انت ، ءُ مکران ءُ آواران اے وئیلاں گیشتر سانمند بوتگ ۔

رپورٹ ءِ رد ءَ سال 2025 ءَ بلوچستان ءَ ھمک روچ مزنیں کچے ءَ لشکر کشی کنگ بوتگ کہ چریشی ءَ دمگی مھلوک ، زالبول ءُ زھگاں ھوار لس مردم سانمند بوتگ انت ، ھزدار ءِ دمگ زھری ءَ برزی ارشاں 20 مردم نمیرانی ءِ ھال ھم اتکگ ۔

بی وائی سی ءِ رد ءَ سرجمیں سال ءَ اے زورانسری آوار جنیانی بگیری ءَ 122 ءَ گیش ایمنیں زھرشانی کنگ بوتگ انت کہ آیانی تہ ءَ کساس 39 زھرشانی پہ زور درگان درگان کنگ بوتگ انت وھدیکہ 400 ءَ گیش درنگاز کنوک دزگیر ءُ بازینے زدگ کنگ بوتگ انت ۔

گل ءِ رد ءَ بلوچستان ءَ کانودی ترام انسانی ھکانی باسک، سیاسی باسک لس مھلوک ءِ بگیری ءَ سلاھے ءِ دروشم ءَ کارمرز کنگ بوگ ءَ انت ءُ انسداد دھشتگردی ءِ کانود ، تھری ایم پی او ءُ سیکشن 144 ءِ رد ءَ ایمنیں توار ایرموش کنگ بوگ ءَ انت ۔ ۔

بی وائی سی ءِ رد ءَ آیانی پنچ رھشون کہ آیانی تہ ءَ گل ءِ بنجاھی آرگنائزر ڈاکٹر ماھرنگ بلوچ ھم ھوار انت تنی وھدی بندیگ انت وھدیکہ ایندگہ باسک ترسینگ بوگ ءَ انت ۔

پریس کانپرنس ءِ گڈسر ءَ بی وائی سی ءَ گوں اھوالکاراں لوٹ کتگ کہ بلوچستان ءِ انسانی ھکانی جاورھالاں شریں وڈی ءَ پیش بہ دار انت ءُ ایردستیں راج ءِ توار جوڈ بہ بنت ۔