TBP Balochi

پاکستان پوج ءِ ھمگرنچیں ادارہ آئی ایس پی آر ءَ ٹاہ داتگ کہ 29 جنوری 2026 ءَ بلوچستان ءَ دو جتاجتائیں انٹیلی جنس بیسڈ آپریشنزانی میان ءَ یکجاھی ھساب ءَ چل ءُ یک مردمانی جنگ ءِ ٹاہ داتگ-

آئی ایس پی آر ءِ رِد ءَ اولی آپریشن ھرنائی ءِ کش ءُ گور ءِ دمگ ءَ کتگ، چریشی ءِ آسر ءَ تُرندیں تیرگواری ءِ رد ءَ پد ءَ سی مردم جنگ بیتگ انت- درشان ءِ رِد ءَ کاروائی ءِ میان ءَ مزنیں کچے ءَ سلاہ، گولہ بارود ءُ تراکناکیں شورو دزکپتگ انت-

آئی ایس پی آر ءِ گوشگ اِنت کہ دومی انٹیلی جنس بیسڈ آپریشن پنجگور ءَ کنگ بیتگ – پوج ءِ رِد ءَ اے آپریشن ءَ یازدہ مردم جنگ بیتگ انت- درشان ءِ تہ ءَ گوشگ بیتگ کہ کاروائی ءِ میان ءَ سلاہ ءُ گولہ بارود ءَ اَبید پانزدہ دسمبر 2025 ءَ پنجگور ءَ برگ بیتگیں بینکانی زر ھم دزکپتگ اَنت-

بلے تنی وھدی آزاتیں رسانکدر ءَ اے گپ راست کنگ نہ بیتگ-

پاکستانی پوج ءَ پنچ مردم آوار جنگ ءَ پد ناشناسیں جاھے ءَ برتگ اَنت-

چہ سندھ ءَ ھالانی رِد ءَ نواب شاہ ءِ دمگ خیرپور ءَ پاکستانی پوج ءَ لوگ سر ءَ بیڑبرتگ پنچ مردم دزگیر کتگ ءُ وتی ھمراھی ءَ برتگ اَنت چریشی ءَ پد آ دیم ءَ آرگ نہ بیتگ اَنت-

پاکستانی پوج ءِ دست ءَ زورانسری آوار جنی ءِ نشانگ بیتگیں مردمانی پجّار نور محمد ء جمعہ خان، نور محمد ءِ چُک غلام محمد ءُ ظفر ء حضور بخش نام ءَ چہ بیتگ اَنت وھدے کہ آ دگہ دوئیں مردمانی پجّار نہ بیتگ اَنت-

وئیل ءِ ھلاپ ءَ زورانسری آوار جنی ءِ نشانگ بیتگیں مردمانی کھول ءَ خیرپور انتزامیہ ءِ کارگس دیم ءَ زھرشانی کتگ ءُ بیگواھیں مردمانی یل کنائنیگ ءِ لوٹ کتگ-

ھالانی رِد ءَ زورانسری آوار جنی ءِ نشانگ بیتگیں سرجمیں شھری ڈومکی ٹک ءَ چہ سیادی دار اَنت کہ سندھ ءِ دمگ خیرپور ءَ دگہ دمگاں جھمنند اَنت-

بلوچ اسٹوڈنٹس ایکشن کمیٹی ءِ نیمگ ءَ بلوچستان ءِ جتا جتائیں جاھاں کتاب میڑہ یکشل ءَ برجاہ انت کہ اود ءَ جتا جتائیں وھداں کتاب میڑہ کنگ بوگ ءَ انت-

بلوچ اسٹوڈنٹس ایکشن کمیٹی ءَ ھمے نوکیں سال ءَ جار پِرینتگ ات کہ بلوچ اسٹوڈنٹس ایکشن کمیٹی نوکین سال ءَ بلوچستان ءِ جتاجتائیں پھناتاں میڑہ برجاہ دار ایت-

چرے کتاب میڑھانی سر ءَ بازیں وانگی کتاب پیش کنگ بوگ ءَ انت کہ اود ءَ ھمک نودربر کتابی وانگ ءُ زانگ ءِ پِڑ ءَ کتاباں گوں ھبداری ءَ گندگ بوگ ءَ انت-

ھمے وڑ ءَ مروچی بلوچستان ءِ دمگ نصیر آباد ڈیرہ مراد جمالی ءَ بلوچ اسٹوڈنٹس ایکشن کمیٹی ءِ نیمگ ءَ اللہ چوک ءَ یک میڑھے برجم دارگ بوتگ کہ اود ءَ نودربراں کتاب زرتگ ءُ آیانی گون ءَ دلگوشی بیتگ انت-

زانگ بہ بیت اے گپ ھم دلگوشی انت کہ بازیں جاھاں بلوچ اسٹوڈنٹس ایکشن کمیٹی ءَ انتزامیہ ءِ نیمگ ءَ ھم کتاب میڑھانی برجم کنگ ءَ جنجالانی دیمپانی انت-

اود ءَ سرکار ءِ گوشگ انت اے کتاباں انتزامیہ ءِ رَزا گون نہ انت پرے ھاتر ءَ گیشتریں وھداں کتاب میڑھانی سر ءَ اڑانک گندگ ءَ کاینت-

نبشتانک: وتی ناسرجمیں زند

نبشتہ کار: مھُسن ساجدی

دی بلوچستان پوسٹ

اے کسہ من ءَ سک جیڑگ پرما اِیت کہ من وتی زندگی گوں چونیں جَیڑہ ءُ جنجالاں وت ءَ داں اے اُمر ءَ رسینتگ ۔ مردم سک جیڑ اِیت کہ مئے کسانی چی ءَ پَرے ھال ءَ بوتگ من اگاں وتی ھمسراں گنداں آ داں کجام ھند ءَ رستگ اَنت بلے من ھما بے راھیں منزل ءَ گون آں دل سک گمیگ بیت کہ چے بکناں؟ نوں من وتی ھمسراں گنداں من ءَ ھمے گُباں بیت کہ ما چنچو پدمنتگیں چہ وتی  زندگی ءِ گِرانیں منزلاں چہ ھما دیم کپتگ اَنت کہ پد ءَ کَدی واتری ءِ نام ءَ نہ زانت بنی آدم داں زندگ اِنت گڑا آئی ءَ جنزگی اِنت داں کہ آ نہ جُنز اِیت آ کدی وتی زندگی ءَ ناسرجمیں زند گُش اِیت بلے من تَنیگا نہ پھم اِتگ کہ منی گُڈی منزل  کجا اِنت؟ من ءَ کَدی دست کپ اِیت یا نا؟ من ھمائی ءِ رَندگیری ءَ سر کپاں اَنت بس ھمے پھم اِتگ ھما مردم دیمروی کنت کہ آئی ءَ شریں وڑے ءَ مال ءُ مَڈی ھست بزاں زَر ءُ نوکری شریں ھمسپر بلے من ھما  چاگرد ءَ گوں سیادی داراں آ ھما کہ نہ بوتگیں راہ اَنت یا ھما بے بُنیادیں گپ یا دومی مردمانی اِیرجنگ ءُ وت ءَ ھما پھک ءُ پلگاریں مردم  پھم اَنت۔

اے چاگرد ءَ ھرکس نشتگ گُڑا ھمے وڑ ءُ پیم ءَ اِنت پد ءَ پہ گلامیں راج ءَ اے سکیں بلاھیں جنجالے کہ آ راج ءَ مدام پہ وتی ماتیں گُلزمیں ءَ پہ ھون ریزی کتگ بلے انگاں آ راج ءَ چوشیں مردم نیست کہ وتی راجی رھشونانی رَند گیری ءَ بکن اَنت بلے پہ وتی لاپ ءِ ھاتر ءَ کجا داں کجا روان اَنت پد ءَ ھما راج گُش اِیت ما گلامیں بلے تو وت ءَ وت گلام کتگ ءُ گلامی وت زُرتگ  اد ءَ بازیں مردم ھست اَنت دگرانی پاداں کپتگ اَنت دپّیلاں وارت ءُ وتی لاپ ءَ والینی گُڑا ھچبر دیمروی نہ کنت من ھمے چاگرد ءِ بھرے آں کہ ھچبر پہ وتی کسانیں پدریچاں نہ جیڑاں ءُ وتی نوک رُستگین ورنا ءُ وتی بانداتیں ھیال ءَ نہ داریں مرچی  ما بچاریں ھما راج ءِ نوک رستگیں ورنا ھما دری راھاں روگ ءَ اَنت کجام نشہ ءَ آ نہ کنگ ءَ اَنت ھما کہ ھراب تِریں کار اَنت آ کنگ ءَ اَنت اِش وتی زندگی ءِ واست ءَ نہ جیڑ اَنت منی وڑیں نابودیں مردم ءَ کجام راستی ءَ سُوج دیاں من وت ھیراناں من پرچا اے گلامیں راج ءَ گوں سیادی داراں اے چونیں واھگے منی گور ءَ کپتگ بلے انگت ءَ من نہ پھم اِتگ بلے راستیں بھر ھمیش اِنت پہ وتی براتانی بھا کنگ ءَ مات ءُ گوھارانی سر ءَ زوراکی کنگ وتی ھمکوپگیں براتانی گار ءُ بیگواہ کنگ من ءَ وتی سر ءَ بزگ بوگ ءَ اِنت تو کَدی وت ءَ شریں مردمے پھم اِتگ تو چہ آ دگراں شرتر نہ ئے؟

من ایشی ءَ وتی ناسرجمیں زند پھماں پمیشکہ بازیں چیز ھست اَنت من ءَ ھچ وش نہ باں من وت نہ زاناں اے منی نزوری اِنت یا می تنگی اِنت آ راہ ءُ راھبنداں نہ رستگاں یکیں اے ھبر من پھم اِتگ کہ کَس پہ کَس ءَ اد ءَ درد وار نہ بیت ءُ آئی ءَ را بازیں تاوان اَلم دنت مرچاں ما بچاریں برات پہ برات ءَ نہ بیت گُڑا اَلم تو اے پھم ئے کہ ما چہ وشیاں باز گِستا اِیں ءُ پد ءَ سک دُور اَنت اے چاگرد ءَ اَنچیں مردم ھست کہ ترا ھما جُستاں کن اَنت ترا کنگی نہ اَنت ءُ ترا ھما کتابانی نام ءَ گُش اِیت بلے وت نہ زانت ھما کتابانی مَکسد چے اِنت ترا کجام راہ ءَ پِیشداری بازیں وانگجاھاں ھما کتاباں دنت پہ وانگ ءَ نودربرانی واست ءَ ھچ وڑیں شوک پیدا کُت نہ کنت متلب( Motivational) کتاب ترا دنت ءُ لھتیں وانگجاھ دومی ءِ (apposite ) ءَ اُوشتاتگ اَنت بلے بلاھیں جنجالے پہ منی وڑیں نوردرانی واست ءَ تنگی ءَ وتی جند ءَ شریں وڑے ءَ پھم اِت نہ کنت گُڑا کجا اے پیمیں کتاب ونت کنت؟

اگاں من بُگشاں اے شر اَنت پہ نودربراں بزاں من وت تنگاں سرپد نہ آں ءُ من ءَ وت سرپد بوگی اِنت پیسر ءَ پد ءَ وتی آیُکیں پدریچ ءَ شریں (ناول) آورت کُت بکناں ءُ وتی کساں سالیں نبشتہ کارانی (گِدار ءُ آزمانک) وانگی اَنت گوں ایماداری ءَ پد ءَ وتی برات یا کہ زھگانی واست ءَ دست گِرگ بہ بنت۔ من داں کَد ءَ رَستگاں بلے چوشیں مردمے نہ دیستگ کہ بگوش اِیت کہ تو وتی تَب ءِ کتاب ءَ بوان اَلم یک اَنچیں سُوج ئِے دنت گُڑا پد ءَ مردم بندات کنت انچوش پہ دیمیں جیڑگاں بزاں (Overthinking ) ھَد ءَ چہ گیش جیڑگ کہ من پرچا اے کتاب نہ ونتگ من ءَ پِلاں مردم ءَ گُشتگ شریں کتابے یا شریں آزمانکے یا شریں گِدارے۔ من ھمے کسھانی پُشت ءَ بازیں دل رنجی دیستگ بلے لُونٹانی سر ءَ بچکندگ تالاں کُتگ بلے ھما کہ نہ بوتگیں درد ءُ رنج بوتگ اَنت بلے من ءَ اَلم گوں بوتگ اَنت۔ پمیشکہ من ایشی ءَ وتی ناسرجمیں زند گُشاں۔
من اد ءَ کسانیں نبشتانکے نبشتہ کتگ اگاں رَدی بوت من ءَ پھل بکن اِت ءُ ھاں کَسے ءَ ھراب لَگ اِت من ءَ گُشت کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءِ دمگ کیچ ءَ ورنا ءِ زورانسری آوار جنی ءِ ھلاپ ءَ یکرندے پد ءَ زھرشانی دگ بند وھدے کہ چہ کیچ ءِ جھمنندیں ورنایے چہ ھاران ءَ آوار جنگ بیتگ-

گیشیں ھالانی رِد ءَ کیچ ءِ دمگ چہ تجانان، کرکی ءَ پاکستانی پوج ءِ دست ءَ زورانسری بیگواہ کنگ بیتگیں رحمدل ء محمد بخش ءِ کھول ءَ یکرندے پد ءَ سی پیک شھدگ سر ءَ نندانک داتگ-

کھول ءِ نیمگ ءَ چہ تربت ءِ نزیک ءَ ایم ایٹ شھدگ سر ءَ نندانک داتگ گاڑیانی واستا بند کتگ، چریشی ءِ سوب ءَ گاڑیانی دراجیں لین لگ اِتگ-

زانگ بہ بیت اے ورنا ءِ کھول اشی ءَ ساری بیست جنوری ءَ نندانک داتگ چریشی ءَ انتزامیہ ءِ نیمگ ءَ دلجمی دیگ ءَ پد ھلاس بیتگ-

کھول ءِ گوشگ اِنت کہ انتزامیہ ءَ آ دلجمی داتگ ءُ بیگواھیں رحمدل دیم ءَ آرگ بیتگ اَنت، بلے بازیں روچ ءِ گوزگ ءَ اَبید دیم ءَ آرگ نہ بیتگ-

آیاں گوشتگ کہ اگاں انتزامیہ وتی مھاد ءِ سر ءَ کار نہ کت آیانی نندانک سی پیک شھدگ سر ءَ برجاہ بیت-

دومی نیمگ ءَ چارشمبے ءِ روچ ءَ ھاران ءَ پاکستانی پوج ءَ چہ بلیدہ زامران ءَ سیادی داروکیں اسماعیل ملک ء ملک محمد گوں گاڑی ءَ آوار جتگ ءُ ناشناسیں جاھے ءَ برتگ

–

کھول گوشگ اِنت کہ اسماعیل ملک یک ٹیچرے ءُ آئی ءَ یونیورسٹی آف سرگودھا ءَ سوشل ورک ڈپیارنمنٹ ءَ گریجویشن کتگ-

کھول ءَ ھمگرنچیں واکداراں زوت یل کنگ ءُ پلگاریں پٹ ءُ پول ءِ لوٹ کتگ-

ماڑی انرجی لمیٹڈ ءِ نیمگ ءَ شنگ بوتگیں جار ءِ تہ ءَ گوشگ بوتگ کہ ڈیرہ بگٹی کلچاس ساؤتھ بلاک ءَ تبری ون چات ءَ گیس در اتکگ ۔

جار ءِ رد ءَ گیس چات ءِ 7 ھزار 170 پٹ جھلانکی ءَ دست کپتگ ۔ کمپنی ءِ رد ءَ بنداتی کچ ءَ چات ءِ تہ ءَ روچ ءِ 6.5 ءَ بگر 11 ایم ایم ایس سی ایپ ڈی تاں گیس ءِ پریشر ایں ۔

زانگ بہ بیت ڈیرہ بگٹی ءَ بازیں وھدے بیت کہ پاکستان ءِ سوبہ ءِ پنجاپ ءُ کراچی وڈیں شھراں گیس دیگ ءَ انت ، وھدیکہ پاکستان ءِ توانائی صنعت مزنیں کچے ءَ ھمے گیس ءِ سرا انت ۔

ھمے رد ءَ ماڑی انرجی ءَ ھوار دمگی ءُ دگہ میان استمانی کمپنی گیس ءُ دگہ مادناںی شوھاز ءَ بلوچستان ءَ انت ۔

اسلام آباد ءَ برجاھیں ماڑی انرجی لمیٹد پاکستان ءِ یک توانائی کمپنی ءِ ھست کہ سرکار ءِ نیمگ ءَ گوستگیں سال ءَ بلوچستان ءِ تہ ءَ مزنیں کچے ءَ پہ مادن ءِ شوھاز ءَ لیسن ءُ زمین داتگ.

اے کمپنی پوجی فاؤنڈیشن ءِ رد ءَ پوج ءِ چیردستی ءَ انت کہ پاکستانی پوج ءِ چل درسد انت ۔ ماڑی انرجی بنکی ءَ ہائیڈروکاربن بزاں ابرمی گیس. خام تیل ، کنڈینسیٹ ءُ مائع پٹرولیم گیس ھوار انت شوھاز ءِ کنت ۔

زانگ بہ بیت بلوچستان ءَ برجاھیں اے شوربندیانی سرا کار کنوکیں کمپنی سرا بلوچ آجوئی لوٹوکیں سیاسی گلاں بگیری داشتگ ءُ بلوچ آجوئی لوٹوکاں اشانی سرا ارش ھم کتگ ۔

پاکستان ءِ پھازگی واکدار ءُ سرکار بلوچ آجوئی لوٹوک مادن درکنوکانی ھاتر ءَ مزنیں چیلنج کہ آئی ءِ پھازگ ءَ بازیں پھازگی یونٹ جنگ بوتگ انت ۔

بلوچستان ءَ کدرتی مادن بزاں ٹیل ، گیس ، اشکر ءُ دگہ مادن درکنوکیں کمپنی گیشتر بلوچ آجوئی لوٹوکیں سلاہ بندیں گلانی نشانگ ءَ بوتگ انت ۔

بلوچ آجوئی لوٹوک اے شوربندیاں لٹ ءُ پل گوش انت وھدیکہ بازیں بلوچ آجوئی لوٹوکیں سلاہ بندیں گلانی نیمگ ءَ اشانی سرا ارش کنگ بوتگ کہ آیانی تہ ءَ بلوچ لبریشن آرمی مجید برگیڑ ءِ ترندیں ارش ھم ھوار انت ۔

پاکستانی پوج ءَ سے مردم آوار جتگ ءُ ناشناسیں جاھے ءَ برتگ انت-

بلوچستان ءِ تیاب دپی شھر گوادر ءِ تھسیل جیونی ءَ رس اتگیں ھالانی رِد ءَ سال ءِ بنداتی ءَ چہ جیونی ءِ دمگ روبار ءَ چہ پاکستانی پوج ءِ نیمگ ءَ لشکر کشی بندات اِنت-

ھالانی رِد ءَ گوستگیں بازیں روچ ءَ چہ پاکستانی پوج ءِ کاروائی ءِ نشانگ تہ ءَ اَنت، اود ءَ میتگ ءِ مردماں لَٹ ءُ کُٹانی دیمپانی اِنت-

ھالانی رِد ءَ پوج ھرچ شپ لوگاں پُتر اِیت میتگ مردماں لَٹ ءُ کُٹانی نشانگ کنت ءُ لوگاں ساڑی گران بھائیں سامان برتگ اَنت-

اِھوالکار ءِ رِد ءَ شش جنوری ءَ پاکستانی پوج ءَ یک لوگے ءِ سر ءَ بیڑبرتگ اود ءَ دو برات، سی پنچ سالی ئیں آسف عیسیٰ ءُ بیست ھشت سالی ئیں پیری عیسیٰ ء عیسیٰ، آوار جتگ ءُ ناشناسیں جاھے ءَ برتگ-

اشی ءَ دومی ءَ روچ ھپت جنوری، ھمے دمگ ءَ سی سے سالی ئیں شاہ بخش ء عمر ھم آوار جتگ ءُ بیگواہ کتگ-

دمگی مردمانی رِد ءَ جیونی ءِ ھند روبار تنی وھدے پاکستانی پوج ءِ لشکر کشی ءِ نشانگ تہ ءَ اِنت، شھریاں لڑ ءُ بار کنگ ءَ لاچار کنگ ءَ اَنت، وھدے کہ آوار جنگ بیتگیں مردم دیم ءَ آرگ نہ بیتگ اَنت-

تربت ءَ بدامنی، لب ءِ ملام ءَ آوار جنی، دُزی ءُ لٹ ءُ کُٹ ءِ ھلاپ ءَ آل پارٹی کیچ ءِ دزبندی ءِ سر ءَ سرجمیں مکران ءَ شٹر ڈاؤن ھڑتال کنگ بوھگ ءَ اِنت کہ ایشی ءِ سبب ءَ تجارتی بنجل، دکان ءُ کاروباری چست ءُ ایر بند اَنت۔

آل پارٹیز کیچ ءِ رد ءَ ایوک ءَ کیچ ضلع ءَ نہ بلکیں گوادر ءُ پنجگور ءَ ہڑتال ءِ توار کنگ بوگ ءَ انت۔

ھڑتال ءِ مول ءُ مراد تربت ءَ زر ءِ ھاتر ءَ آوار جنگ ءِ گیش بوھوکیں وئیل ءُ بد امنی ءِ ھلاپ ءَ زھرشانی کنگ ءُ بیگواھیں ٹھیکیدار گل جان ءِ زھگ شاہ نواز ءِ زوت ءَ یل کنگ ءِ لوٹ کنگ بوگ ءَ انت کہ آئی ءِ آوار جنوکاں مزنیں زَرے ءِ لوٹ کتگ۔

زانگ بہ بیت کہ شاہ نواز ءِ یل کنائینگ ءُ امن ءُ ایمنی ءِ ناگیگین جاورانی ھلاپ ءَ پیسر ءَ ھم زھرشانی مچی ءُ دیوان ءُ شٹر ڈاؤن ھڑتال کنگ بوتگ اَنت بلے ھما وھد ءَ زھرشانی برجاہ اِنت کہ لوٹ پیلو کنگ نہ بوتگ اَنت۔

سیاسی رھشونانی گشگ انت کہ زر ءِ ھاترا آوار جنگ ءِ وڑیں جرماں شھری سکا ترسینگ بوگ ءَ انت کہ ایشی ءِ پژدر ءَ بے تواری نہ بیت۔

آیاں لوٹ کرتگ کہ شاہ نواز زوت یل کنگ بہ بیت ءُ مکران ءَ امن ءُ ایمنی ءِ جاورانی گھتر کنگ ءِ واستا الکاپیں گامگیج چست کنگ بہ بنت اگاں ناں زھرشانی ءِ پھنات گیش گیش کنگ بیت۔

سیاسی گلانی رد ءَ مکران ءِ جتاجتائیں دمگ بدامنی ءِ آماچ انت کہ اود ءَ زر ءِ واستا آوار جنگ ءُ دُزی روام جوڑ بوتگ انت ءُ شھری وتی گساں ھم ایمنی ءِ سما ءَ نہ کن انت۔

آیاں گشتت کہ پولیس ءُ سیکورٹی ادارھانی مزنیں ھست بوھگ ءَ ابید جاور ھال گیش ءُ گیوار بوھگ ءَ نہ انت کہ چہ ایشی ءَ قانون ءِ سازگاریں ادارھانی بے سوبی ءِ پدر بوھگ ءَ انت۔

بلوچستان ءِ دمگ پنجگور ءَ چین ءُ پاکستان ءِ گزرانکی ءَ گوں ھمگرنچیں راہ ءِ سر ءَ رخشان کور ءِ پھل تراک ءَ چہ تباہ کنگ بیتگ۔

دمگی مردمانی گْوشگ ءِ رد ءَ تراک ءِ توار انچو ترند بوتگ کہ ایشی ءِ توار دوریں دمگاں ھم اشکنگ بیتگ۔

وئیل ءَ چہ پد پاکستانی لشکر وئیل ءِ دمان ءَ جاہ ءَ سر بوتگ اَنت ءُ دمگ انگر کتگ ءُ سرچ آپریشنے بندات کتگ۔ واکدارانی گشگ انت کہ جاور ھال کنٹرول ءَ آرگ بوتگ انت ءُُ دیمتر ءَ ناگیگیں جاورھالانی دیم ءَ دارگ ءِ ھاترا گامگیج گیش کنگ بوتگ انت۔

دمگی انتزامیہ ءِ رد ءَ تراک ءِ دروشم ءُ سبب ءِ پجارینگ ءِ ھاتر ءَ پٹ ءُ پول کنگ بوھگ ءَ اِنت وھدے کہ پل ءِ تاوان ءِ تکنیکی چار ءُ تپاس گرگ بوھگ ءَ اِنت۔

بنداتی ھالانی رد ءَ پل ءِ لھتیں بھراں تاوان رس اتگ کہ ایشی ءِ سبب ءَ ٹریفک ھزاروکی بند کنگ بوتگ بلے پد ءَ راہ پچ کنگ بیتگ۔

سی پیک روڈ بلوچستان ءِ مستریں شھدگاں چہ یکے زانگ بیت۔ زانگ بہ بیت ایشی ءَ چہ پیسر پنجگور ءِ دمگ گوارگو ءَ گوستگیں روچاں پُھلے ءِ تاوان ءِ ھال اتکگ۔

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کتگیں دو جتاجتائیں درشانانی تہ ءَ آواران ءَ پاکستانی پوج ءُ وڈھ ءَ مڈی بروکیں گاڑیانی سر ءَ بیتگیں اُرشانی زمہ واری منّ اَنت وھدے کہ شھید سرمچار جلیل پنّام ءِ جورک سھرچکیں دروت ندر کتگ-

بلوچستان لبریشن فرنٹ ءَ شنگ کتگیں درشان ءِ تہ ءَ گْوشتگ کہ مئے سرمچاراں بیست پنچ جنوری ءَ آواران، کولواہ ءِ ھند کنیچی ءَ برجاہ زورگریں پاکستانی پوج سر ءَ اُرش کتگ، چریشی ءِ آسر ءَ زورگریں پوج ءَ جانی ءُ مالی تاوان چست کنگ کپتگ-

جارکش ءَ گوشتگ کہ اے کاروائی ءِ سرجمیں تامُر گپتگ، کہ گل ءِ رسانکدر چینل “آشوب” ءَ شنگ کنگ بیت-

جارکش ءَ دیمتر ءَ گوشتگ کہ مئے سرمچاراں بیست پنچ جنوری ءَ وڈھ ءِ دمگ دریجی ءَ گرانبھائیں سنگ بروکیں دو گاڑیانی ٹائر تراکینتگ ءُ آ تاوان داتگ اَنت-

جارکش میجر گْوھرام بلوچ ءَ وتی شنگ کتگیں دگہ یک درشانے ءِ تہ ءَ گوشتگ کہ سرمچار جلیل بلوچ ء منیر احمد تر ءُ گرد ءِ میان ءَ دُژمن ءِ نیمگ ءَ چیرکتگیں تراکناکیں شوروانی تراک ءَ چہ سک ٹپی بیتگ ءُ پد ءَ ٹپّانی درد نہ سگ اِتگ ءُ نمیران بیتگ-

جارکش ءَ گْوشتگ کہ سرمچار جلیل بلوچ پنّام ءِ جورک ء منیر احمد جھمنند دِزدِر دشت اگست 2023 ءَ بلوچستان لبریشن فرنٹ ءَ ھوار بیتگ ءُ شھری نیٹ ورک ءِ بھر بیتگ، آ گل ءِ چیریں بھرگ ءَ کار ءَ بیتگ-

جارکش ءَ گْوشتگ کہ سے اکتوبر 2024 ءَ آ اوتاک ءَ دیم دیگ بوتگ ءُ آئی گوں جوانیں ءُ جپاکشی ءَ وتی زمہ واری شریں وڑے ءَ پیلو کتگ اَنت۔

جارکش ءَ گوشتگ کہ بیست ءُ سے جنوری ءَ،جلیل اھمد پہ گل ءِ کارے ءَ سنگتانی ھمراھی ءَ مند ءِ کوہ ءَ تر ءُ گرد ءَ بیتگ کہ چہ دژمن ءِ نیمگ ءَ چیر کرتگیں شورھانی زد ءَ اتکگ سک ٹپی بیتگ –

جارکش ءَ گوشتگ آ پہ الاج ءَ مھریں جاھے ءَ دیم دیگ ءَ بوتگ ایں کہ آئی راہ ءَ ٹپانی درد نہ سگ اتگ ءُ شھید بیتگ۔

میجر گھرام بلوچ ءَ درشان ءِ گڈی ءَ شھید سرمچار جلیل پنّام ءِ جورک ءَ سُھرچکیں دروت ندر کرتگ ءُ گوشتگ کہ ھمے کول ءَ کن ایں کہ بلوچ شھیدانی آزاد بلوچستان ءِ کاروان ءَ ھرچ وڑ ءَ گڈی آسر ءَ سر کن ایں۔