TBP Balochi

بلوچستان ءَ جاور یکشل ءَ ناگیگ اَنت- آپریشن ھیروف 2 ءَ گوادر ءَ ھوار بُنجاھی شھر شال ءُ دگہ بازیں شھراں وھد وھدے سر ءَ تراک ءُ تیرگواری ءِ توار اش کنگ بیگ ءَ اِنت-

گیشیں ھالانی رِد ءَ پاکستانی لشکر ءَ آپریشن ھیروف ءِ میان ءَ بلوچستان ءِ تیاب دپی شھر گوادر ءَ یک کمپاؤنڈے ءِ سر ءَ اُرش کتگ، کہ اود ءَ گیشتر مزدور جھمنند بیتگ اَنت- سانمندیں مردمانی سیادی تھسیل زھری ءِ دو کھولاں چہ گوشگ بیگ ءَ اِنت- اُرش ءِ آسر ءَ زالبول ءُ چُکاں ھوار دوازدہ مردم بیران وھدے کہ دہ نزیک ءَ مردم ٹپی بیتگ اَنت-

بیران بیتگیں مردمانی پجّار نور محمد فقیر زھری ء ملا جُورک، آئی ءِ چُک غلام یاسین ءُ دگہ مردین ھوار اَنت، وھدے کہ چار زالبول ءُ پنچ چُک ھم اُرش ءِ آسر ءَ بیران بیتگ اَنت- ٹپیانی کچ گیشتر بلوچ زالبولان ءُ چُکانیگ اِنت-

ھمے وڑ تربت ءَ ھال سر بیتگ کپ پُل آباد ،تربت ءَ پاکستانی پوج ءِ نیمگ ءَ چہ شھری آبادی سر ءَ مارٹر گولہ آس داتگ ، چریشی ءِ آسر ءَ پانزدہ سالی ئیں انس بلوچ ء ابراھیم، بیران بیتگ – اے اُرش ءَ یک پنچ سالی ئیں چُک ءُ دو زالبول سک ٹپی بیتگ اَنت- اُرش ءَ پد پاکستانی پوج ءَ دمگ لوگانی پروشگ بندات کتگ-

دی بلوچستان پوسٹ ءَ سر بیتگیں ھالانی رِد ءَ ،بلوچستان ءِ گیشتر شھرانی جاور سک ناگیگ اَنت- انٹرنیٹ ءُ ھال اھوالی نزام بندی سوب ءَ جانی ءُ مالی تاوانانی وھد ءُ سرجمیں کچ زانگ نہ بنت-

بلوچ لبریشن آرمی ءَ شنگ کتگیں درشان ءِ تہ ءَ گوشتگ کہ آپریشن ھیروف دومی بھرگ ءِ پانزدہ کلاکانی گوزگ ءَ پد ھم بلوچستان ءِ جتاجتائیں شھراں ءُ گچین ءِ دمگاں برجاہ ءَ اِنت- بازیں ھندانی سر ءَ سرمچارانی دستیگ یکشل ءَ برجاہ ءَ اِنت ءُ دُژمن ءِ سُر پُر سک زور ءِ تہ ءَ اِنت-

جارکش ءَ گوشتگ کہ برجاھیں کاروائیانی سوب ءِ زمینی جاور یکشل ءَ مَٹ بیگ ءَ اَنت ءُ دُژمن جتاجتائیں جنگ پڑاں مزنیں کچے ءَ جانی ءُ مالی تاوان داتگ اَنت- آپریشن ءِ دیمروئی رِد ءَ گیشیں سرپدی ءُ آسری ءِ سرپدیاں شریں وھدے ءَ زوت رسانکدر ءَ شنگ کنگ بنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءَ گوشتگ بی ایل اے ءَ آپریشن ھیروپ ءِ دومی درچ ءَ سرمچاراں بلوچستان ءِ 14 شھرانی تہ ءَ 48 جتا جتائیں جاھانی سر ءَ مھکمیں اُرش کتگ انت کہ اود ءَ سرمچاراں گوستگیں دہ کلاکاں چہ مھکمیں کنٹرول برجاہ داشتگ۔ شال ، نوشکی، مستونگ، دالبندین، قلات، خاران، پنجگور، گوادر، پسنی، تربت، تمپ، بُلیدہ، منگوچر، لسبیلہ، کیچ ءُ آواران ءَ یکیں وھد ءَ دژمن ءِ فوجی، انتزامی ءُ سیکورٹی ڈھانچہ نشانگ جوڑ کنگ بوتگ انت۔ اے کارروائیانی تہ ءَ زورگیریں پاکستانی لشکر ، پولیس ، انٹیلی جنس ایجنسی ءُ سی ٹی ڈی ءِ سرجم ءَ 84 کارندہ مرتگ اَنت ، درجناں ٹپیگ ءُ 18 کارندہ زندگ ءَ دستگیر کنگ بیتگ اَنت کہ انوگیں وھد ءَ بلوچ لبریشن آرمی ءِ دست ءَ اَنت ۔ سرمچاراں زور گیریں لشکر ءِ مرکزی ہیڈ کوارٹر ءَ ھوار بازیں پوسٹانی سر ءَ وتی قبضہ ءَ کنگ ءَ سوبین بوتگ ءُ اے جاھاں وتی مھکمیں پوزیشن برجاہ داشتگ۔ دژمن ءِ جتا جتائیں شھراں روگ ءُ آیگ ءِ سر ءَ سک باز بندش جنگ بوتگ ءُ سرمچاراں وتی مھکمیں سنگر برجاہ داشتگ۔

آئی ءَ گوشتگ آپریشن ءِ وھد ءَ 30 ءَ چہ گیش سرکاری جائیداد کنٹرول ءَ گرگ ءُ تباہ کنگ بوتگ اَنت کہ ایشی ءِ تہ ءَ بینک، سرکاری کارگس ءُ جیل ھم ھوار اَنت۔ ایشی ءَ ابید دژمن ءِ 23 ءَ چہ گیش گاڑی سوچگ بوتگ اَنت۔ بازیں شھراں انتزامی ڈھانچھانی سر ءَ زور ءِ سبب ءَ دژمن ءِ روچ مرزی کار ءُ پیسلہ کنگ ءِ راہ ءُ در بند بوتگ انت ءُ شھری دمگاں فوج ءُ پولیس ءَ را پُشت ءَ کشگ ءُ پھریزی پوزیشن ءِ زورگ بوتگ۔

آئی ءَ گوشتگ اے کارروائیانی تہ ءَ بلوچ لبریشن آرمی ءِ 7 سرمچار شھید بیتگ اَنت کہ آیانی تہ ءَ 4 فدائین سرمچار شھید ھم ھوار اَنت کہ آ دژمن ءِ کیمپانی تہ ءَ شُت اَنت ءُ زورگیریں لشکر ءَ نشانگ جوڑ کُتگ ۔ شھیدانی کربانیانی آسر ءَ دژمن ءِ گچینی فوجی طنجل مزنیں دمگاں کنٹرول بوتگ کہ اود ءَ بازیں جاہاں جنگ ءَ پد پوزیشن ءِ سر ءَ سوبمند بوتگ انت۔ اے کربانیان آپریشن ءِ تیزی ءُ دراج کش کنگ ءِ برجاہ دارگ ءَ مزنیں کردے پیلو کتگ۔

آئی ءَ گوشتگ بلوچ لبریشن آرمی ءِ جتاجتائیں یونٹ مھکم ءُ ھمپنتیں رنگ ءَ آپریشن ہیروپ فیز دومی ءِ تہ ءَ بھر زورگ ءَ انت۔ فتح اسکواڈ، مجید بریگیڈ، انٹیلی جنس ونگ زراب ءُ ایس ٹی او ایس ءَ ہمگرنچی ءَ جتا جتائیں شھر ءُ دمگاں دیم ءَ شتگ انت کہ ایشی ءِ آسر ءَ یکیں وھد ءَ دژمن ءِ بازیں ڈھانچہ ءِ سر ءَ جوانیں اُرش برجاہ انت۔

آئی ءَ گوشتگ اے پڑ ءَ بلوچ راج ءِ کرد تچک بوتگ۔ دراھیں شھر ءُ دمگاں بلوچ راج ءَ سرمچارانی سرجمیں ھمایت کتگ کہ ایشی ءِ آسر ءَ سر ءُ پر ، روھتی ءُ زمینی کنٹرول ءِ جوانیں وڑے ءَ برجاہ بوتگ۔ راجمانی ھمایت ءَ دژمن ءِ پروپیگنڈا، دباؤ ءُ ترس ءِ درچ ناکام کتگ ءُ سرمچارانی سوبمندی ءَ را ستکی جوڑ کتگ۔ اے راجمانی یکجاھی ءِ مستریں سبب آپریشن ءِ برجاہ دارگ ءُ کنٹرول ءِ برجاہ دارگ بوتگ۔

آئی ءَ گوشتگ اے اھوال بنداتی ھالانی سر ءَ بندوک اَنت۔ اے ھال نبشتہ کنگ ءِ وھد ءَ بلوچستان ءِ جتاجتائیں دمگاں آپریشن ہیروپ فیز دوم برجاہ اِنت ءُ زمینی جاور ھال ءِ رد ءَ کچ ءُ کساسانی گیش بوھگ ءِ گمان اِنت۔ گڈی ھال، تاوان ءُ دگہ تک ءُ پھنات رسانکدر ءِ وسیلگ ءَ ھما وھد ءَ شنگ کنگ بنت۔ سرمچار اے وھد ءَ سرجمیں بلوچستان ءِ دراجی ءُ پھناتانی سر ءَ مھکمیں کنٹرول ءَ دار اَنت ءُ دژمن ءِ ھلاپ ءَ آپریشن برجاہ اِنت۔

بلوچستان نیشنل پارٹی ءِ سروک ءُ گوستگیں سروزیر بلوچستان سردار اختر مینگل ءَ گوشتگ اے وھد ءَ بلوچستان ءِ جاور سک ناگیگ اَنت ءُ اے دمگ نہ روگی دمگاں مٹ بیتگ اَنت-

آئی ءَ گوشتگ کہ رسانکدر بے توار اِنت، من وتی سرجمیں زند ءَ ھچبر ھم جاور ھال اے وڑ تُرسناکی ءَ ندیستگ اَنت- سروزیر گوشت کنت کہ آ ایس ایچ او کجا ءَ اِنت?

زانگ بہ بیت کہ بلوچستان ءَ بلوچ لبریشن آرمی ءِ نیمگ ءَ چہ برجاہ آپریشن “ھیروف”2 ءِ رِد ءَ اُرشانی درچ گیش تُرند کنگ بیتگ اَنت- بلوچستان ءِ جتاجتائیں دمگاں وتکشتراکیں اُرش، سلاہ بندیں میڑ ءُ سرکاری شوربندیانی سر ءَ دستیگ کنگ ھال سر بیگ ءَ اِنت-

بلوچستان ءِ بنجاھی شھر شال ءَ ھوار بلوچستان ءِ جتا جتائیں جاھاں پشت ماں پشت ءَ اُرشانی درچ یکشل ءَ برجاہ انت- دومی نیمگ ءَ بلوچ لبریشن آرمی ءَ اُرشانی زمہ واری من اتگ ءُ اے اُرش ءَ را ھیروپ دو ءِ نام داتگ-

مروچی سھب ءَ شال، نوشکی، دالبندین، ھاران، کلات، منگچر، تربت، گوادر، پسنی ءُ مند ءُ تمپ ءُ دگہ دگہ جاھاں سلاہ بندیں مردماں اُرش بندات کتگ انت-

اُرشانی بندات ءَ بلوچ لبریشن آرمی ءِ سروک بشیر زیب بلوچ ءَ یک تامر بندے ءَ گوشتگ سرجمیں بلوچ راج چہ لوگاں در بہ ایت ءُ اے جنگ ءَ ھوار بہ بیت-

دومی نیمگ ءَ بلوچ لبریشن آرمی ءَ وتی آفیشل چینل ھکل ءَ جتا جتائیں بنجلانی دستیگ کنگ ءُ تہ ءَ پُترگ ءِ تامر بند شنگ کتگ انت-

بی ایل اے ءِ جنگولانی شنگ بیتگیں تامراں گندگ بیت انت کہ آ پوجی بنجلانی توک ءُ روڈانی سر ءَ گشت کنگ ءَ گندگ بنت-

لس مھلوک ءِ گوشگ انت اے وھد ءَ سرجمیں بلوچستان ءَ جنگی جاورھال انت کہ اود ءَ ھر ھما ساھت ءُ دمان ءَ تیرگواری ءُ تراکانی اشکنگ بوگ ءَ انت-

دومی نیمگ ءَ منگچر ءِ ھند ءَ بلوچستان اسمبلی ءِ باسک میر زپر زھری ھم سلاہ بندیں مردماں داشتگ ءُ پد ءَ یل داتگ-

ھمے وڑ نوشکی ءَ جوڈیشل کورٹ سلاہ بنداں مانداشتگ ءُ ڈپٹی کمشنر نوشکی ءِ دزگیری ءِ تامر شنگ کتگ ءُ آ تامر بند ءَ گوشگ انت من اے وھد ءَ بی ایل اے ءِ دست ءَ آن –

دومی نیمگ ءَ سیکورٹی ءِ واستا بلوچستان ءِ گچینی جاہ گوادر ءَ ھم سلاہ بنداں دور کتگ ءُ پورٹ کمپلکس ءِ تہ ءَ پترگ ءِ ھال انت-

بی ایل اے ءَ وتی آفیشل چینل “ ھکل” ءُ سرجمیں بلوچستان ءَ آپریشن ھیروپ ءِ درچ ءَ اُرشانی جار جتگ-

ھمے وھد ءَ گل ءِ سروک بشیر زیب ءِ ویڈیو کلوہ ھم شنگ کتگ کہ آئی ءِ تہ ءَ آ گوں وتی سرمچاراں پیشدارگ بوتگ۔ ویڈیو ءِ تہ ءَ آ براھوئی ءُ بلوچی زبان ءَ وتی کلوہ ءَ آپریشن ھیروف ءِ دومی بھر ءِ بندات ءِ جار ءَ جنگ ءَ اِنت۔

بشیر زیب بلوچ ءَ وتی کلوہ ءِ تہ ءَ گوں بلوچ زالبول ءُ مردیناں دزبندی کتگ کہ آ چہ وتی گساں درکپ انت ءُ اے جنگ ءَ بھر بہ زور انت۔

بی ایل اے ءِ سروک گشتگ کہ بی ایل اے ءَ پیسلہ کنوکیں جنگے بندات کتگ۔ آئی ءِ گْوشگ ءِ رد ءَ چہ بلوچستان ءَ پنجابی لشکر ءُ پنجاھی ریاست ءِ درکنگ ءِ کارروائی بندات بوتگ ءُ اے جنگ ءَ سوب مندی بلوچ راج ءِ ئیگ انت۔

آئی ءَ وتی کلوہ ءِ تہ ءَ یکشل ءَ راج ءَ گوں تران کتگ ءُ گْوشتگ کہ مرچی چہ وتی گساں درکپ اِت، اے جنگ راجی آجوئی ءِ جنگ اِنت، ءُ بلوچستان ءَ چد ءُ پد ھچ وڑیں لشکر یا ریاست ءِ ادارھے جوڑ کنگ مہ بیت۔

آئی ءَ گوشتگ کہ اگاں ما مرچی دراتک نہ ایں ءُ آپریشن ھیروپ ءَ ھواریں وتی برات ءُ گھارانی ھمراھی ءَ اوشتات نہ کن ایں گڑا راجدپتر مئے شکست ءَ ریکارڈ کنت، سر دیوک ءُ زوروک راجدپتر نبشتہ کن اَنت ءُ راجدپتر ءِ نبشتہ کنگ ءِ پڑ ھمیش اِنت۔

آئی ءَ گیش کرتگ کہ “ما انتھا پسند نہ ایں بلے وھدے کہ وتی زمین ءُ راج ءِ گپ کیت گڑا ما ھرچ ھد ءَ روگ ءَ تیار ایں، ما ھچ راج ءِ سر ءَ قبضہ نہ کتگ، بلکیں مئے سر ءَ قبضہ کنگ بوتگ، مئے جنگ راستی ءِ جنگ اِنت۔”

آئی ءَ گوشتگ کہ آیوکیں روچاں پشومانی ءِ بدل ءَ بلوچ راج مرچی ھمے گھگیری ءِ بھر جوڑ بہ بیت۔ “اگاں ھدا مہ کنت ما مرچی مزاحمت ءِ راہ ءَ نہ زرتگ ات گڑا مئے گیشتریں برات ءُ گھارانی لاش مئے کوچگاں کپ انت۔”

آئی ءَ گْوشتگ کہ مرچی کُربانی ءِ روچ اِنت ءُ ما درکپگ ءَ ایں ءُ پنجابی دژمن ءِ دیم ءَ اوشتاتگیں ۔

گڈسرا آئی ءَ گشتگ کہ مرچی مئے تہ یَ چنچو کساس کشگ بہ بیت راج کدی دلپروش مہ بیت ءُ مزاحمت ءَ برجاہ بہ دار ایت۔

شمبے ءِ سھب ءَ بلوچستان ءِ جتاجتائیں دمگاں سلاہ بندیں جنگ ءُ تراکانی ھال رس اِتگ اَنت ھمے وھد ءَ بلوچ بلوچ لبریشن آرمی ”بی ایل اے“ ءَ وتی آپریشن ھیروف ءِ دومی بھر ءِ بندات ءِ جار جتگ۔

بلوچستان ءِ بازیں دمگاں جاورھال ناگیگ انت-

شال ریڈ زون ءَ تیرگواری ءُ تراکانی ھال۔

بلوچستان ءِ بنجاھی شھر شال ءِ گچینی دمگ ریڈ زون ءَ تیر گواری ءُ تراکانی ھال رس اِتگ اَنت، شھر ءِ جتا جتائیں جاھاں تراک ءُ تیر گواری برجاہ اَنت۔

نوشکی: سینٹرل جیل ءُ ایف سی ءِ بنجاھی کارگس ءِ نزیک ءَ جنگ ءُ چوپ بوتگ۔

بنشون ءِ رد ءَ نوشکی ءِ سینٹرل جیل ءِ نزیک ءَ مزنیں تیرگواری ءِ ھال بیتگ ءُ لس ھالانی تہ ءَ بی ایل ءِ سینٹرل جیل دستیگ کتگ-

دومی نیمگ ءَ نوشکی ءَ ایف سی ءِ بنجاھی ھیڈکوارٹر ءِ نزیک ءَ ھم سلاہ بندیں جنگ ءُ چوہ برجاہ اَنت کہ اود ءَ توپ ءُ تیرگواری ءُ مزنیں تیرگواری ءِ توار اِش کنگ بیتگ۔ وھدے کہ نوشکی ءَ سی ٹی ڈی ءِ کارگس بی ایل اے ءِ سرمچاران دستیگ ءُ بازیں کارندہ دزگیر کنگ بیتگ اَنت۔

ڈھاڈر ، کچھی پولیس ءِ سر ءَ سلاہ بندیں مردماں اُرش کتگ ۔

کچھی ءِ دمگ ڈھاڈر ءَ بازیں کچے ءَ سلاہ بندیں مردماں شھر ءِ تہ ءَ پترگ ءِ ھال انت پد ءَ پولیس ءِ سر ءَ اُرش کتگ۔ اے اُرش ءِ تہ ءَ پولیس ءِ بازیں گاڑی سوچگ بوتگ اَنت ءُ بازیں کارندہ ٹپیگ بوتگ اَنت۔

کلات: لشکر ءِ بنجل ءِ گیٹ ءَ تراک، جنگ ءُ چوپ برجاہ انت

کلات ءَ سلاہ بندیں مردماں آپریشن ءِ وھد ءَ تراکناکیں گاڑی ءَ گوں لشکر ءِ مستریں دروازگ ءَ نشانگ جوڑ کتگ ءُ ایشی ءَ پد سلاہ بندیں جنگ بندات بوتگ۔

شال سریاب روڈ : پولیس ءِ موبائل ءِ سر ءَ اُرش ۔

شال ءَ سریاب روڈ ءِ نزیک ءَ پولیس اسٹیشن سریاب ءِ نزیک ءَ پولیس ءِ موبائل ءِ سر ءَ سلاہ بندیں مردماں اُرش کتگ ءُ ایشی ءِ آسر ءَ دو پولیس کارندہ بیران بوتگ اَنت۔ پولیس ءِ موبائل سرجم ءَ سُتکگ ءُ ھاک بوتگ۔

ریل اسٹیشن ءَ چہ تیرگواری ءُ تراک ءِ توار ھم بوتگ۔

بی ایل اے ءِ آپریشن ”ہیروف“ ءِ دومی بھر بندات کنگ بوت-

بلوچ لبریشن آرمی ءِ نیمگ ءَ یک کسانیں بیانے ءِ تہ ءَ گْوشگ بیتگ کہ آپریشن ھیروف ءِ دومی بھر بلوچستان ءِ جتا جتائیں دمگانی تہ ءَ بندات کنگ بیتگ ۔ اے گل ءَ اے کار ءَ را “ریاستی لشکر ءُ انتظامی ڈھانچھانی ھلاپ ءَ جنگ” لیک اِتگ۔ بیان ءَ چہ دمگی مھلوک ءَ ھم دزبندی کنگ بوتگ کہ آ گوں اے گل ءَ ھمکاری بہ کن اَنت۔

بی ایل اے ءِ آفیشل چینلاں ھم اُرشانی زمہ واری ءِ منگ ءُ کلو ءُ ویڈیو شنگ کنگ بوتگ اَنت۔

گل ءِ سروک ءَ تامربندی درشان شنگ کتگ

بی ایل اے ءِ سروک بشیر زیب ءَ دراجیں کلوھے شنگ کتگ ءُ بلوچ راج ءَ چہ وتی گساں درکپگ ءُ پاکستانی لشکر ءِ ھلاپ ءَ جنگ کنگ ءِ لوٹ کتگ۔ اے پیغام سوشل میڈیا پلیٹ فارم ءُ گل ءِ چینلاں شنگ بوتگ۔

بلوچستان ءِ جتاجتائیں دمگاں ترندیں اُرشانی ھال دیم ءَ آیگ ءَ اِنت دومی نیمگ ءَ بلوچ لبریشن آرمی ءَ وتی یک بیانے ءِ تہ ءَ گْوشگ بیتگ کہ آئی ءَ آپریشن ھیروف ءِ دومی بھر بندات کُتگ۔

بنداتی ھالانی رد ءَ ھاران، گوادر، شال، نوشکی، پسنی ءُ دالبندین ءَ ھوار بازیں دمگاں تراک ءُ مزنیں تیرگواریانی توار اشکنگ بوگ ءَ انت۔

بی ایل اے ءِ نیمگ ءَ شنگ بوتگیں بیان ءِ تہ ءَ گْوشگ بیتگ کہ سرجمیں بلوچستان ءَ آپریشن ھیروف ءِ دومی بھر بندات کنگ بیتگ کہ گل ءَ ایشی ءَ را ریاستی سیکورٹی ءُ انتظامی ڈھانچانی ھلاپ ءَ گھگیری نامینتگ۔ بیان ءَ چہ دمگی مردماں ھم دزبندی کنگ بوتگ کہ آ گل ءِ ھمراھی ءَ بہ اوشت اَنت۔

زانگ بہ بیت کہ بی ایل اے ءِ آپریشن ہیروف ءِ اولی بھر 26 اگست 2024 ءَ بندات کنگ بوتگ کہ ایشی ءِ تہ ءَ بی ایل اے ءِ جتا جتائیں سرمچاراں جتا جتائیں جاھاں پد ماں پد ءَ اُرشانی بندات کتگ- ھمے وڑ بی ایل اے ءِ سرمچاراں بیلہ بنجل ءِ سر ءَ اُرش کتگ ءُ بیست ءُ چار کلاکاں گیش آیاں وتی دستیگی ءَ داشتگ-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں بیانے ءِ تہ ءَ گْوشتگ کہ سرجمیں بلوچستان ءَ آپریشن ھیروف ءِ دومی بھر بندات بیتگ کہ آ زور گیریں ریاست ءُ آئی ءِ دراھیں جنگی ءُ انتزامیہ ءِ ھلاپ ءَ سکیں ٹوھیں جنگے برجاہ اِنت۔

آئی ءَ دیمترا گْوشتگ کہ بلوچ راج گوں سرمچاراں ھمراہ بہ بنت ءُ ھر شھر ءُ ھر کوچگ ءُ ھر میتگ ءَ دژمن ءَ بے سوب بہ کن انت ءَ دژمن ءَ را پدّریں کلوہے بہ دنت کہ آئی ءَ ماں بلوچستان ءَ ھچ جاگہ ​​نیست۔

شال ءَ گیس ءِ لیک ءِ سوب ءَ مردے، یک جنینے ءُ دو زھگ دمتوس بوتگ ءُ بیران بوتگ اَنت۔

ھالانی رد ءَ بلوچستان ءِ بنجاھی شھر شال ءِ دمگ نواں کلی لیبر کالونی ءَ یک لوگے ءِ تہ یَ گیس ءِ لیک ءِ سبب ءَ دم ءِ بند بوھگ ءَ چہ چار مردم بیران بوتگ انت۔

لاش پہ گیشیں چار ءُ تپاس ءَ نادراھجاہ ءَ سر کنگ بوتگ اَنت کہ نادراھجاہ ءِ انتزامیہ ءِ رد ءَ بیران بوتگیں مردمانی تہ ءَ مرد ءُ جن ءُ آیانی دوئیں چُک ھوار اَنت۔

زانگ بہ بیت کہ شال ءَ گیس ءِ لوڈ شیڈنگ، بے وھد ءَ گیس بند کنگ ءُ زمستان ءَ اناگہ ءَ پچ کنھمگ ءِ سبب ءَ اے وڑیں وئیل باز رند ءَ بوتگ انت۔

شال ءَ گیس ءِ لیک ءُ دگہ اے رنگیں وئیلان بازیں شھریانی ساہ گپتگ انت، ایشی ءِ سبب ءَ شھری زمستان ءَ گیس ءِ کارمرز کنگ ءَ ترسگ ءَ انت۔

شھریاں گشتگ کہ بازیں دزبندیاں ابید واکداراں ھچ وڑیں الکاپیں گامگیج زورگ نہ بوتگ کہ ایشی ءِ سبب ءَ شھریانی جان ءُ ساہ مرگ ءُ زند ءِ تہ ءَ انت-