TBP Balochi

ایمنسٹی انٹرنیشنل ءَ ماہ جبین ءُ آئی ءِ برات ءِ زورانسری آوار جنی ءِ سر ءَ تُرندیں پدردی درشان کنان ءَ ھکومت ءَ آئی ءِ یل کنائینگ ءِ لوٹ کتگ-

ادارہ ءِ رِد ءَ بیست سے سالی ئیں ماہ جبین بلوچ ءَ بیست نُھ مئی 2025 ءَ آئی ءِ ھاسٹل ءَ چہ آوار جتگ- اے وئیل ءَ چہ پنچ روچ ءَ ساری آئی ءِ برات یونس بلوچ ھم بیگواہ کتگ اَت-

ایمنسٹی ءِ گوشگ اِنت کہ ماہ جبین ءُ یونس بلوچ ءِ کھول تنی وھدے آیانی درگت ءَ ھچ وڑیں ھال دز نہ کپتگ ءُ آ دوئینانی واتری ءِ ودار ءَ اَنت-

گل ءَ واکدار ءِ سر ءَ زور داتگ کہ زورانسری آوار جنی ءِ اے دْرچ ھلاس کنگ بہ بیت ءُ ماہ جبین بلوچ، یونس بلوچ ءَ ھوار سرجمیں بیگواھیں مردمانی درگت ءَ زوت سرپدی دیگ بہ بیت-

بلوچ یکجھتی کمیٹی ءِ سروک ڈاکٹر صبیحہ بلوچ ءِ گْوشگ اِنت کہ انوگیں وھد ءَ شال ءَ یک دیوانے بوتگ کہ ایشی ءِ تہ ءَ میر، واجہ سردار ءُ دگہ ھاسیں مردم لوٹائینگ بوتگ انت۔ لھتے مردماں دیوان ءِ مول ءُ مراد ءِ بابت ءَ دیم پہ دیم گْوشگ بوتگ ءُ لھتے مردماں دعوت دیگ بوتگ کہ اے بس یک ٹیکی جرگھے کہ جاور ھال ءِ ھراب بوھگ ءِ سوب ءَ گْوشگ بوتگ۔

آئی ءَ گوشتگ کہ وھدے مردم سر بیتگ اَنت گڑا پدر بوت کہ وردی پوشیں مردمے دیوان ءِ سروکی ءَ کنگ ءَ اِنت۔ بکول کسّہ گشوک ئیگ ءَ اے مردم ءِ نام ءُ پجّار کس ءَ گْوشگ نہ بوتگ۔ دیوان ءِ مستریں بُن گپ اش بیتگ کہ بلوچ ورنا پرچا جنگ ءِ نیمگ ءَ روگ ءَ انت۔

”بشیر زیب ءُ اللہ نزر ءِ درگت ءَ گْوشگ بیتگ کہ اگاں چہ اد ءَ ورنا برتی کنگ مہ بنت گڑا آ ھچ کُت نہ کن اَنت، یکے ءَ گوں ھیرانیں چماں گْوشت: ”واجہ اے بچک کسے ءِ گپ ءَ گوش نہ دار اَنت، اے درست وتی وشی ءَ روگ ءَ اَنت۔“ اشی ءِ سر ءَ ھما اپسر ءَ زھر ءَ پُر بیتگ ھرکس ءَ شگان ئِے جتگ ءُ زاہ ئِے داتگ ءُ یک یکے ءَ گوں گپ کتگ گوشتگ : ”تو؟ تئی ھچ بستار نہ بیتگ ، ما ترا اے اوھد ءَ داتگ۔”

“آئی ءَ گوشتگ کہ آئی ءَ درستانی نزوری دگراں پدر کت ءُ پرمان داتگ: “اے بچکاں رشوت بہ دئے، زرّ بہ دئے، کار بہ دے، آھانی کھول چست بکن ھرچی کہ ترا کنگی اِنت بکن-بلے یک وڑے ءَ آیاں چہ کوھاں روگ ءَ بدار اِت واتر بیار اِیت-

صبیحہ بلوچ گوشتگ کہ من نہ زاناں کہ دیوان کجا ءُ چون آسر بوتگ۔ بلے جرنیلاں اے گپ گشگ لوٹ آں کہ ھما ورناہ کوہ ءَ شتگ اَنت آیانی واتر آرگ ارزان نہ اِنت۔ اے بار ءَ نزوریں کوپگاں ایر کنگ سرجمی ءَ ناانساپی اِنت۔ اگاں شما راستی ءَ جیڑھاں کم کنگ لوٹ اِت گڑا اولی کار ایش اِنت کہ ورناھاں کوھانی نیمگ ءَ روگ ءِ کار بندات کتگ آئی ءَ بند بہ کن اِت-

آئی ءَ گوشتگ کہ باز رند ءَ گوشگ بوتگ کہ پُرایمنیں سیاسی کارکنانی آوار جنگ، آھانی سر ءَ بندش جنئگ ءُ ایمن سیاست ءِ راہ ءَ بند کنگ ورنایاں جنگ کنگ ءَ لاچار کنت اے کار ءَ بند کن اِت۔ سیاسی کارکن ءَ یل بہ کن اِت نہ چہ شما زرّ لوٹ اَنت ءُ نہ کہ اگدہ ءِ لوٹ کن اَنت ءُ نہ کہ کرپشن ءِ دکان پچ کن اَنت۔ وتی سیاست ءَ ورنا کوھانی بدل ءَ گپ ءُ تران ءِ راہ ءَ گچین کن اَنت۔

صبیحہ بلوچ ءَ گشتگ کہ اگاں راستی ءَ مارا ایمنی لوٹیت گڑا مارا لٹ ءُ پُل،زورگری ءُ زلم ءِ ھلاس کنگ لوٹیت۔ اگاں ناں ایمنی ءِ واب بے مانا بنت-

آئی ءَ گوشتگ بلوچ یکجھتی کمیٹی ءِ باسک نذر بلوچ ءِ زورانسری آوار جنی ءِ درگت ءَ گوشتگ کہ نذر بلوچ ءِ زورانسری بیگواہ کنگ کابل اوپار اِنت۔ دراھیں زوربیگواھیں مردم یل​​کنگ بہ بنت ءُ پرامنیں سیاست ءِ واستہ جاگہ ​​جوڑ کنگ بہ بیت، راستی ایمنی ءِ راہ ھمیش انت

بلوچستان ءِ دمگ بولان ءَ پاکستان پوج ءِ لشکر کشی، ڈرون بالگرد بُرز بالی ءَ گندگ بیتگ اَنت-

ھالانی رِد ءَ بولان ءِ دمگ مچھ ءُ کش گور لشکر کشی ءِ زد ءَ اَنت-

زانگ بہ بیت سے روچ ءَ ساری دے دمگ ءَ پاکستان پوج ءِ جیٹ بالگرداں بمبگواری کتگ اَت بلے تنی وھدے اے درگت ءَ ھچ وڑیں درشان دیم ءَ نیتکگ-

مروچی بیؤکیں لشکر کشی ءِ آسر ءَ تاوانانی درگت ءَ ھچ وڑیں سرپدی دز نہ کپتگ-

بلوچستان ءِ بُنجاھی شھر شال ءِ دمگ کلی قمبرانی ءَ چار بیگواھیں مردم یک ماھے ءَ پد یل بیتگ ءُ وتی لوگاں سر بیتگ اَنت-

یل بیتگیں مردمانی تہ ءَ ضیاء اللہ الرحمن قمبرانی، فضل الرحمن قمبرانی، شیرباز بنگلزئی ءُ اصغر قمبرانی ھوار اَنت-

چہ بلوچستان ءَ گوستگیں دو دھکاں زورانسری آوار جنی ءِ جیڑہ ءِ نشانگ اِنت- انسانی ھکانی گل ءُ بلوچ سیاسی کارکنوں بھتام جتگ کہ ریاستی ادارہ بازیں ورنا ءُ شھریاں بید کانودی سوب ءَ آوار جن اَنت ءُ آیانی کھولاں آیانی جاور ءُ ھند ءِ درگت ءَ نہ گوش اَنت گوں-

بلوچ لبریشن آرمی ءِ جارکش جیئند بلوچ ءَ رسانکدر ءَ شنگ کتگیں درشان ءَ گْوشگ کہ بی ایل اے ءِ سرمچاراں پنجگور، کچھی، شال، جیونی، ھاران، بلیدہ ءُ دالبندین ءَ ھشت جتا جتائیں کارروائیانی تہ ءَ پاکستانی لشکر ءُ آئی ءِ چاریگ نشانگ کتگ انت۔ اے اُرشانی تہ ءَ زورگیریں لشکر ءِ راشن پجارینوکیں گاڑی تباہ کنگ بیتگ اَنت وھدے کہ پولیس کارندھانی سلاہ پچگپتگ انت۔

جیئند بلوچ ءَ گشتگ کہ گوستگیں روچ ءَ بلوچ لبریشن آرمی ءِ سرمچاراں پنجگور ءِ دمگ پروم ءَ پاکستانی فوج ءِ گاڑی ءِ سر ءَ ریموٹ کنٹرول آئی ای ڈی اُرشے ءِ نشانگ جوڑ کتگ۔ تراک ءِ آسر ءَ شش کارندہ جاہ پہ جاہ ءَ مرتگ انت ءُ گاڑی سرجم ءَ تباہ بوتگ۔

جارکش ءَ گشتگ کہ پروم ءَ لھتے مردم زورگیریں لشکر ءَ راشن ءُ دگہ سامانانی سر کنگ ءَ ھوار گندگ بوتگ انت۔ بلوچ بوھگ ءِ سوب ءَ گْوشگ بوتگیں مردماں گُڈّی رند ءَ ھال دیگ ءَ ایں اے کار ءَ یل بہ کن انت ءُ وتگڑیں ڈیتھ اسکواڈ ءَ گستا بہ بنت کجام ھم وھد ءَ سرمچار اُرش کن انت-

آئی ءَ گوشتگ کہ دومی نیمگ ءَ کچھی ءِ کولپور ءِ دمگ ءَ بی ایل اے ءِ سرمچاراں زورگیر پوج ءِ بمب ءِ ڈسپوزل کارندہ ھما وھد ریموٹ کنٹرول آئی ای ڈی ءَ گوں نشانگ جوڑ کتگ انت وھدے کہ آ ریل ٹریک ءِ پلگارگ ءَ دزبند بیتگ انت۔ تراک ءِ آسر ءَ یک کارندھے ھما جاہ ءَ مرتگ۔

“ھمے روچ ءَ بلوچ لبریشن آرمی ءِ سرمچاراں کولپور ءَ زورگیریں لشکر ءِ دگہ گاڑی یے نشانگ جوڑ کتگ کہ ایشی ءِ آسر ءَ آھاں جانی ءُ مال ءِ تاوان چِست کنگ کپتگ۔”

جارکش ءَ گوشتگ کہ بلوچ لبریشن آرمی ءِ سرمچاراں شال ءِ دمگ میاں گنڈی ءَ زورگریں پاکستان ءِ پولیس پورس ءِ کارندہ دزگیر کتگ انت۔ سرمچاراں کارندھانی سلاہ پچگپتگ اَنت کہ آھانی تہ ءَ سئے کلاشنکوف ھم ھوار اَنت ءُ آ چہ بلوچ راج ءِ سر ءَ زلم ءُ زوراکیانی تہ ءَ ھوار نہ بوگ ءَ پد یلہ کنگ بوتگ اَنت۔

آئی ءَ گْوشتگ: پنچ شمبے ءِ شپ گوادر ءِ شھر جیونی ءَ بلوچ لبریشن آرمی ءِ سرمچاراں زورگیریں لشکر ءِ بندری کیمپ ءِ سر ءَ دزبمب اُرشے کتگ، ایشی ءِ تہ ءَ لشکر ءَ تاوان چست کنگ کپتگ۔

آئی ءَ گیش گوشتگ ھمے رنگ ءَ بی ایل اے ءِ سرمچاراں 21 اگست ءَ ھاران ءِ دمگ گواش ءَ زورگیریں لشکر ءِ چاریگ منیر تیرگواری کتگ ءُ کشتگ – اے مرد زورگریں پوج ءِ چیریں ادارھانی واستا کار ءَ بوتگ-

جارکش ءَ گْوشتگ: بلوچ لبریشن آرمی ءِ سرمچاراں 23اگست ءَ بلیدہ کوشگ ءَ زورگیریں لشکر ءِ واستا سامان بروکیں سئے ٹرک ءُ یک کرینے سوتکگ ءُ تباہ کتگ انت۔

آئی ءَ گْوشتگ کہ ایشی ءَ ابید 23اگست ءَ بلوچ لبریشن آرمی ءِ سرمچاراں چاگی ءِ ھند دالبندین ءَ مڈی بروکیں دو گاڑی سوتکگ انت-

جارکش جیئند بلوچ ءَ گشتگ کہ بلوچ لبریشن آرمی اے ھشتیں اُرشانی زمہ واریاں من ایت-

مھکمیں راستی

ٹی بی پی شونگال

بلوچ یکجھتی کمیٹی ءِ رھشوناں پنچ ماھانی گوزگ ءَ پد ھم زندان ءَ انت ءُ ریاستی آیاں گیش بندیگ کنگ ءِ ھاتر ءَ نوکیں زوراکی پندل سازگ ءَ انت- سیاسی دروشم ءِ کیسزانی بوگ ءُ منانکانی نہ بوگ ءَ ابید بلوچستان ءَ آمیدگساں دو ماھاں چار رنداں بلوچ رھشونانی ریمانڈ منگ بیتگ انت ءُ کراچی ءِ آمیدگس ءَ یک بوگسیں ارزی نامگے ماہ رنگ بلوچ ءِ دزگیری ءِ جار شنگ کتگ ءُ دانکہ آ دزگیر کنگ بہ بیت ءُ کراچی جیل ءَ آرگ بہ بیت – پشتون رھشون علی وزیر ءِ سر ءَ دو سالاں داں ھما ھُنر ءُ پندل سازینگ بیتگ انت نی ھما دروشم ءَ بلوچ یکجھتی کمیٹی ءِ رھشونابی ھلاپ ءَ کارمرد کنگ ءَ انت-

بلوچ رھشونانی کھول ءُ بلوچ یکجھتی کمیٹی ءِ آیانی یل کنگ ءِ ھاتر ءَ چِل ءُ پنچ روچاں پاکستان ءِ بنجاھی شھر اسلام آباد ءَ زھرشانی نندانک اش داتگ ءُ نشتگ انت- بلے سرکار اے جیڑہ ءَ سنگینی ءَ زیرگ ءَ ابید بلوچستان ءَ مانگش اتگیں سیاسی مھلوک ءَ پریس کانفرنس ءَ پرمایگ ءُ زورانسری بیگواھیاں دروگ کرار دیگ ءِ جھد ءَ انت- چُشکہ ھیومن رائٹس کمیشن آف پاکستان ءِ گوستگیں فیکٹ فائنڈنگ ءِ رپورٹ ءَ سرکاری ٹاپار رد کتگ انت ءُ بلوچستان ءِ جاورھال سنگین کرار داتگ ءُ تچک کتگ “ بلوچستان ءَ یک اجب دردناکی ءِ ودی بیتگ: زورانسری بیگواھیانی درچ برجاہ، جمھوری آجوئیاں لگتمال کنگ ، اُستانی وت واکی نیزور بیتگ، اھوالکاری گٹگیر کنگ بیتگ، کانون ءَ برز تری ءِ دیمروی دیم ءَ انت ءُ بے لگام بیتگ- اے دراھیں امل بلوچستان ءِ مھلوک ءِ زندمان ءُ سیاسی کرداں گیش جھلانک کنگ ءَ انت-”

بلوچستان ءَ ریاستی زوراکی ءُ زورانسری بیگواھیانی مھکمیں راستیاں درشانانی زور ءَ دروگ ءِ جھد ءَ بنکی راستی مٹینگ نہ بیت – سیاسی رھشوناں بندیگ کنگ ءَ ابید ریاستی زوراکیں پالیسیانی ھلاپ ءَ گھگیری توار چِست بنت-

شال ءَ سلاہ بندیں مردماں میاں غنڈی ءِ دمگ ءَ پولیس کارندھانی دزگیر کنگ ءَ پد آیانی سلاہ وتی وتی دستیگ کتگ اَنت، بلے پد کارندہ بید تاوان ءَ یل داتگ اَنت-

دمگی اِھوالکار ءِ رِد ءَ اے وئیل ھما وھد ءَ دیم ءَ اتکگ وھدے پولیس گشت ءَ بوتگ کہ سلاہ بندیں مردماں آ دزگیر کتگ ءُ آیانی سلاہ پچ گپتگ اَنت-

بلے واکدار ءِ درشان اے درگت ءَ شنگ نہ بیتگ-

گوستناک ءَ اے وڑیں وئیلانی زمہ واری بلوچ آجوئی لوٹوکیں سلاہ بندیں گلاں زرتگ اَنت – بلے مروچگیں وئیل زمہ واری انگت ھچ گل ءَ نہ زرتگ-

کراچی ءَ زورانسری آوار جنی ءِ ھلاپ ءَ زھرشانی ءِ دْرچ تنی وھدے برجاہ، ءُ اے زھرشانی وتی بیست چارمی روچ ءَ پُترتگ-

کراچی پریس ءِ کلب ءِ ڈن ءَ برجاہ زھرشانی نندانک ءَ بیگواھیں مردمانی کھول زھرشانی کنگ ءَ اَنت کہ اود ءَ آ وتی دوستناکانی اکس، بینرز ءُ پلے کارڈز چست کتگ اِت کہ آیانی سر ءَ انساپ، آجوئی ءُ انسانی ھکانی بھالی ءِ لوٹ نکش بیتگ اَنت-

زھرشانی کنوکانی گوشگ اِنت کہ آ وتی دوستناکانی یل کنائینگ ءَ تاں زھرشانی ءَ ھلاس نہ کن اَنت-

چہ کراچی ءَ زورانسری بیگواہ بیتگیں نودربر زاھد علی بلوچ ءِ پت حمید بلوچ کہ گوستگیں بیست چار روچ ءَ چہ کراچی پریس کلب ءِ دیم ءَ نندانک داتگ اِت رسانکدر ءَ چہ تران کنان ءَ گوشتگ کہ آئی ءِ چُک چُشیں کانودی نوٹس یا آمیدگسی پرمان ءَ بید زورانسری بیگواہ کتگ-

آیانی گوشگ اِنت کہ اگاں زاھد سر ءَ کجام وڑیں بھتامے ھست گُڑا مناکانی ھمراھی ءَ کانود ءِ رِد ءَ کاروائی بہ اَنت ، آمیدگس ءَ نہ دلگوش کنگ شھریاں بیگواہ کنگ انساپ ءِ کوش ءُ آئین ءِ تچکی ءَ ھلاپ ورزی اِنت-

کراچی پریس کلب ءِ دیم برجاہ نندانک ءَ زورانسری بیگواہ سرفراز بلوچ ءِ مات بی بی گلشن بلوچ ھم ھوار اِنت-

آئی ءَ اے درگت ءَ گوشتگ کہ آئی ءِ چُک سرفراز بے میارے منی چُک بے جرم ءَ چہ لوگ ءَ چست کتگ، اگاں منی چُک واکی کجام وڑیں جرمکارے ءَ ھوار اِنت آئی ءَ آمیدگس ءَ پیش بہ کن اِت دانکہ ما ھم راستی ءَ بہ زان ایں-

آئی ءِ گوشگ اِنت زورانسری آوار جنی ءِ اے کار ءَ سرجمیں کھول سک زھنی ءُ مالی درد ءُ گماں دوچار کتگ-

ھمے وڑ کراچی ماری پور ءِ دمگ چہ سنگھور پاڑہ ءَ سیادی داروکیں دو برات، شیراز ءُ سیلان بلوچ ءِ کھول ءَ گوشتگ کہ بیست سے مئی ءَ کاؤنٹر ٹیررازم ڈیپانمنٹ ءِ کارمنداں آئی ءِ لوگ سر ءَ بیڑبرتگ ءُ دوئیں ورنا دزگیر کتگ اَنت ءُ برتگ اَنت چریشی ءَ پد آیانی ھچ وڑیں ھال دز نہ کپتگ-

آیانی مات سبزی بلوچ ءَ گوشتگ منی دوئیں چُک بے گناہ اَنت آیانی بیگواھی منی لوگ ویران ءُ زندمان بزگ کتگ، ناں تھنا مان سک زھنی گم ءُ دردانی آماچیں بلکیں مئے کھول مالی دروشم ءَ ھم تباہ بوتگ-

زھرشانی بُنجل ءَ ھوار زھرشانی کنوکاں گوشتگ کہ زورانسری آوار جنی ناں تھنا سانمندیں کھول ءِ واستا یک گمے نہ اِنت بلکیں اے ریاست ءِ نیمگ ءَ چہ شھریانی بُنکی آئینی ھکانی سنگین ءِ پادمالی اِنت ھم-

زھرشانی کنوکاں چیف جسٹس پاکستان ، وزیراعظم ءُ وزیر داخلہ ءَ چہ لوٹ کتگ کہ آ اے سنگین ءِ جیڑہ ءَ زوت گامگیج بزور اَنت ءُ بیگواھیں ورنایاں آمیدگس ءَ پیش بہ کن اَنت دانکہ انساپ بہ رس اِیت-

ھمے وڑ اسلام آباد ءَ بلوچ بیگواھیں مردمانی کھول ءُ بلوچستان ءَ دزگیریں بلوچ یکجھتی کمیٹی ” بی وائی سی ” ءِ سروکانی کھول گوستگیں چل چار روچ ءَ چہ پاکستان ءِ بُنجاھی شھر اسلام آباد ءَ زھرشانی نندانک ءَ نشتگ اَنت-

زھرشانی کنوکاں ھکومت ءُ ریاستی ادارھاں چہ وتی زورانسری بیگواھیں دوستناکانی یل کنائینگ ءُ آسری کاروائی ءِ ھلاس کنگ لوٹ کتگ، بلے تنی وھدے ھچ وڑیں ھکومت ءِ نمائندگ ءَ اشاں گوں گپ ءُ دیوان یا ھال نہ کتگ-

زھرشانی بُنجل ءَ ھوار کھول ءِ گوشگ اِنت کہ آ بندات ءَ چہ ریاست ءِ دیم ءَ دو بُنکی لوٹ ایر کتگ ءُ آیگ ءَ اَنت آیانی تہ ءَ بلوچستام ءَ زورانسری آوار جنی ءِ ھلاس کنگ ءُ بیگواھیں مردماں پہ سلامتی یل کنائینگ ءَ ھوار بلوچ یکجھتی کمیٹی ءِ سروکانی ھلاپ ءَ برجاہ آسری کاروائیانی دارگ ءُ دزگیریں رھشونانی یل کنائینگ ھوار اَنت-

زھرشانی کنوکاں گلہ کتگ کہ دراجیں زھرشانی بُنجل ءَ اَبید واکدار ءِ نیمگ ءَ چہ یکشل ءَ بے تواری گیش بوگ ءَ اِنت، چریشی ءَ چہ کھول ءِ تکانسری ءُ نا اُمیتی گیش بیتگ-

نندانک ءَ ھوار کھولاں اے ھم گوشتگ کہ زھرشانی ءِ میان آ پولیس ءِ تُرسینگ ءِ دیمپانی کنگ کپگ ءَ اِنت، چریشی ءِ سبب ءَ پھاز ءُ بُنکی شھری ھکانی درگت ءَ چہ گیش تُرس ودی بیگ ءَ اِنت-

کھول ءَ دیمتر ءَ گوشتگ کہ مئے اسلام آباد ءَ برجاہ نندانک اے گپ ءِ نوکیں مسالے کہ بلوچستان ءِ راج وتی دوستناکانی یل کنائینگ ءُ بُنکی ھکانی گرک ءِ ھاتر ءَ یکشل ءَ توار چست کنگ ءَ اَنت، بلے مئے توار تنی وھدے اکتدار ایوناں تاں سر نہ بوتگ-

دیمتر ءَ نندانک ءَ ھوار کھولاں جار جتگ کہ آ سی اگست ءَ زورانسری آوار جنی ءِ میان اُستمانی روچ ءِ درگت ءَ یک کانفرنسے برجم دار اَنت، اے درگت ءَ چہ آیاں اسلام آباد ءَ ساڑی اِھوالکاراں، سول سوسائیٹی ءُ انسانی ھکانی کارکناں چہ بھر زیرگ ءِ دزبندی کتگ-

بلوچستان ءِ دمگ پنجگور ءُ کچھی ءَ بمب تراکاں پاکستانی فوج نشانگ جوڑ کنگ بوتگ کہ ایشی ءِ تہ ءَ پاکستانی فوج ءِ سوبیدار ءَ ھوار بازیں کارندہ بیران بوتگ انت۔

مرچی سھب ءَ کچھی ءِ کولپور ءِ دمگ ءَ پاکستانی پوج ءِ بمب ڈسپوزل اسکواڈ ءِ آئی ای ڈی ءِ اُرش ءِ نشانگ جوڑ کنگ بوتگ وھدے کہ آ ریل ٹریک ءَ کلئرینس ءَ دزبند بیتگ-

دومی نیمگ ءَ کولپور ءَ ھم فورسز ءِ گاڑی نشانگ جوڑ کنگ بوتگ بلے اے درگت ءَ ھچ وڑیں ھال ءُ اھوال سر نہ بیتگ انت۔

دومی نیمگ ءَ پنجگور ءِ دمگ پروم ءَ پاکستانی پوج ءِ گاڑی وتی پوسٹ ءَ چہ درکپگ ءِ وھد ءَ ناشناساں آئی ای ڈی بمب تراکے ءِ نشانگ کتگ-

ھالانی رد ءَ تراک ءِ سبب ءَ فورسز ءِ سوبیدار عبدالرزاق ءَ ھوار بازیں کارندہ بیران بوتگ انت۔

واکداراں انگت ءَ اے اُرش ءِ بابت ءَ ھچ وڑیں ھال ءُ اھوال نہ داتگ۔

بلوچستان ءَ پاکستانی لشکر ءِ نیمگ ءَ پہ زور بیگواہ کنگ برجاہ اَنت، نوکیں ھالانی رد ءَ دو مردم دزگیر کنگ ءَ پد بیگواہ کنگ بیتگ اَنت، وھدیکہ یک مردمے یل بیتگ ءُ لوگ ءَ سر بوتگ۔

ھالانی رد ءَ 21 اگست ءَ پاکستانی لشکر ءَ چہ گوادر ءَ اجمل ء یاسین نامیں مردمے دزگیر کتگ ءُ ناشناسیں جاھے ءَ برتگ-

آئی ءِ بیگواھی ءَ پد آ دیم ءَ آرگ نہ بیتگ ءُ نانکہ آئی ءِ کھول ءَ دگہ اھوال دیگ بیتگ انت-

زانگ بہ بیت کہ اے روچاں گوادر شھر ءَ سیکورٹی ءِ جاورھالانی سبب ءَ شھر ءَ کرفیو جنگ بیتگ ءُ پاکستانی پوج ءَ شھر ءِ روگ ءُ آیگی راہ بند کتگ انت-

بازیں شھراں بازیں کچے ءَ پاکستانی پوج اوشتارینگ بیتگ ءُ اود ءَ سیکورٹی جاورھال ترند کنگ بیتگ انت-

دومی نیمگ ءَ آواران ءِ دمگ جھاؤ ءِ ءَ لوگانی سر ءَ پاکستانی پورسز ءَ بیڑ برتگ میران ء ابراھیم نامیں مردمے آوار جتگ ءُ برتگ ۔

مردمانی رد ءَ میران پہ روزگار ءِ ھاتر ءَ متحدہ عرب امارات ءَ بوتگ ءُ انوگیں وھد ءَ پہ دوا ءُ درمان ءِ ھاتر ءَ وتی ڈیھ ءَ واتر بوتگ ۔ آ ھم مئی 2025 ءَ یک رندے بیگواہ بوتگ ات بلے پد ءَ یلہ کنگ بوتگ۔

دیمترا تربت ءِ ڈپٹی کمشنر بشیر احمد بڑیچ ءَ ٹاہ داتگ کہ آئی ءِ کوشست ءِ سبب ءَ حاتم علی ء حاتر کہ کیچ ضلع ءِ دمگ درمکول ءَ چہ زورانسری بیگواھی ءں آماچ بوتگ ، یل کنگ بیتگ ءُ وتی لوگ ءَ سر بیتگ-

بلے ڈپٹی کمشنر ءَ آئی ءِ آوار جنگ ءُ بیگواہ کنگ ءِ ھوالگ ءَ ھچ وڑیں ھال ءُ اھوال نہ داتگ۔