TBP Balochi

سندھ ءِ بنجاھی شھر کراچی ءَ بلوچ دمگاں جھمنندیں مردماں یکشل ءَ بیگواھیانی دیمپانی انت کہ اود ءَ نندوکیں مھلوک ءِ ورنا یکشل ءَ پاکستانی پورسز ءِ دست ءَ بیگواہ بوگ ءَ انت-

کراچی ءَ ھما دمگاں کہ بلوچ آباد اود ءَ بلوچستان ءِ جاورانی گندگ ءِ بوہ مردم ءَ کیت انت کہ چریشی ءِ سبب ءَ چاگرد ءَ بندوکیں نودربر، سیاسی مھلوک ءُ دگہ تکاں بندوکیں مردم یکشل ءَ بیگواھی ءِ درد ءَ اوپار کنگ ءَ گندگ بنت-

کراچی ءَ کھول پہ وتی دوستیں مردمانی یل کنائینگ ءِ ھاتر ءَ دگانی سر ءَ زھرشانی، پریس کلبانی دیم ءَ نندانک ءُ دگہ پڑاں وتی توار چِست کنگ ءَ گندگ بنت انت-

مروچی کراچی ءِ ماڑی پور ٹکری میتگ ءِ راہ ءَ زورانسری بیگواھی آماچیں کھولاں پہ وتی نزیکیں مردمانی یل کنائینگ ءِ ھاتر ءَ زھرشانی کتگ ءُ زھرشانی کنوک ءُ شھر ءِ مردماں راہ بند کتگ ءُ وتی زھرشانی ریکارڈ کتگ۔

زھرشانی کنوکاں لوٹ کتگ کہ آھانی زورانسری بیگواھیں نزیکیں مردم زوت یل کنگ بہ بنت ءُ زورانسری ءَ بیگواہ کنگ ءِ سلسلگ بند کنگ بہ بیت۔

زھرشانی ءِ تہ ءَ 25 سالی نودربر زاھد علی ءِ کھول کہ 17 جولائی ءَ زورانسری ءَ بیگواہ کنگ، دو برات شیر ​​آز ءُ سیلان کہ 23 ​​مئی 2025 ءَ سی ٹی ڈی ءُ پاکستانی لشکر ءِ نیمگ ءَ کراچی ءَ چہ وتی لوگ ءَ زورانسری ءَ بیگواہ کنگ بوتگ اَنت۔

26 فروری ءَ چہ برھانی نادراھجاہ کراچی ءَ زورانسری بیگواہ کنگ بوتگیں سرفراز بلوچ ءِ کھول ءُ 15 جون ءَ بیگواہ بوتگیں عبدالرحمن ء خدا بخش کھول ءَ ھم بھر زرتگ-

زھرشانی کنوکاں گْوشتگ کہ آھانی نزیکیں مردم فورسز ءَ برتگ اَنت ءُ چہ ھما وھد ءَ پد دیم ءَ آرگ نہ بوتگ اَنت۔

کھولاں لوٹ کرتگ کہ اگاں آیانی نزیکیں مردمانی ھلاپ ءَ ھرچ وڑیں کیسے جوڑینگ بیتگ یا اگاں ایشاں ھرچ وڑیں جرمے کتگ گڑا آ آمیدگس ءَ پیش کنگ بہ بنت ءُ کانود ءِ رد ءَ سزا دیگ بہ بنت بلے ماھانی گوزگ ءَ پد ھم آ ناشناسیں بندی جاھاں بند کنگ ءُ کھولاں آیانی بابت ءَ ھچ وڑیں سرپدی نیست ءُ ھال دیگ بوگ ءَ ھم نہ انت-

زانگ بہ بیت گوستگیں یک ماھے ءَ چہ بلوچ کھول کراچی ءَ زورانسیر بیگواھیانی ھلاپ ءَ کراچی پریس کلب ءِ دیم ءَ زھرشانی نندانک ءَ نشتگ ءُ وتی نزیکیں مردمانی یل کنگ ءِ لوٹ ءَ کنگ ءَ انت۔

پاکستان ءِ بنی آدمی ھک کمیشن ءُ بلوچ یکجھتی کمیٹی ءَ کراچی ءَ نشتگیں مردمانی لوٹانی سرجم کنگ ءِ لوٹ کتگ –

دومی نیمگ ءَ پاکستان ءِ بنجاھی شھر اسلام آباد ءَ گوستگیں چِل ءُ ھشت روچاں بلوچ کھول زھرشانی نندانک ءَ نشتگ انت-

اسلام آباد ءَ زھرشانی ءَ بی وائی سی ءِ رھشون ءُ بیگواھیں مردمانی کھول ھوار انت کہ آیانی گوشگ انت بی وائی سی ءِ سروکانی سر ءَ بے بنیں بھتام جنگ ءُ آ زندانی کنگ بیتگ انت-

بلوچستان ءَ انسانی ھکانی لگتمالی ءِ یک درچے کہ گوستگیں دو دھکاں گیش برجاہ انت اود ءَ ورنا گرگ ءُ بندیگ کنگ بوگ ءَ انت-

اوگانستان ءَ ابرمی آپت ءِ آیگ ءَ کساس دو سد ءُ پنجاہ مردم مرگ ءِ ارجان بیتگ انت اے زمین چنڈ ءَ نا ایوک ءَ دو سد ءُ پنجاہ مردمانی ساہ گپتگ انت بلکیں اود ءَ پنچ سد ءَ گیش مردم ٹپ ءُ ٹور کتگ –

اوگانستان ءِ استان کنڑ ءِ ڈیزاسٹر مینجمنٹ ڈیپارٹمنٹ ءِ واکداراں گشتگ کہ گوستگیں شپ ءَ زمین چنڈ ءِ سبب ءَ صوبہ ءِ جتا جتائیں زلھانی تہ ءَ 250 مردم بیران ءُُ 500 ءَ چہ گیش ٹپی بوتگ انت۔

کابل ءَ طالبان انتزامیہ ءِ نیمگ ءَ شنگ بوتگیں بیان ءَ گشگ بوتگ کہ ‘بنداتی ھالانی رد ءَ ایوک ءَ نورگل، چوکی، واٹپور، ماٹوگی ءُ چپادرہ ءِ ضلع ءَ 250 ءِ کساس ءَ مردم بیران بوتگ اَنت ءُ 500 ءَ چہ گیش مردم ٹپیگ بوتگ اَنت۔

یک شمبے ءُ دو شمبے ءِ میانجی ءِ شپ ءَ (پاکستانی وھد ءِ رد ءَ شپ ءِ 12.30 ءِ نزیک ءَ) پاکستان ءُ اوگانستان ءَ زمین چنڈ ءِ مارشت بوتگ کہ ایشی ءِ شدت شش لرزگ ریکارڈ کنگ بوتگ۔

پاکستان ءِ تہ ءَ زمین چنڈ بنجاھی شھر اسلام آباد، کش ءُ گور ءِ دمگ ءُ خیبر پختونخوا ءِ بازیں زلھانی تہ ءَ سماہ کنگ بوتگ۔

محکمہ پاکستان ءِ موسمیات ءِ نیشنل سیسمک مانیٹرنگ سنٹر ءِ رپورٹ ءِ رد ءَ زمین چنڈ شپ ءِ دو بج ءُ نیم ءَ بوتگ ءُ ایشی ءِ مرکز جنوب مشرقی اوگانستان ءَ بوتگ۔

اے زلزلہ ھندوکش کوہانی تہ ءَ 15 کلومیٹر ءِ جھل ءَ ریکارڈ کنگ بوتگ۔

پشاور، مردان، مری ءُ کش ءُ گور ءِ دمگاں ھم ترندیں لرزگ ءِ مارشت بوتگ کہ چہ ایشی ءَ مردم ھبکھی ءَ چہ وتی لوگاں دراتکگ اَنت۔ چکوال، ٹیکسلا، واہ کینٹ ءُ لاھور ءَ چہ ھم ھمے رنگیں ھال رس اتگ اَنت۔

بلے پاکستان ءَ تاں انوگ ءَ مزنیں تاوان ءُ جانی تاوان ءِ ھال گندگ نہ بیتگ۔

ایشی ءَ پد زلزلہ شناسی مرکز ءَ اسلام آباد، راولپنڈی، چترال ءُ پشاور ءَ ھم رند ءِ زلزلہ ءِ ھال داتگ۔

لھتیں ھالانی ردا زمین چنڈ ءِ لرزگ ھندوستان ءِ لھتیں دمگاں ھم سماہ کنگ بوتگ انت۔

کابل انتظامیہ ءِ رد ءَ اوگانستان ءَ زمین چنڈ گیشتر رودراتکی صوبہ کنڑ ءَ بوتگ کہ پاکستان ءِ صوبہ خیبر پختونخوا ءَ گوں سیمسر انت۔

کابل انتظامیہ ءِ رد ءَ صوبہ کنڑ ءِ چوکی ءَ یوہ گل ءُ نور گل زیارت ءِ نیمگ ءَ روگ ءِ راہ زمین چنڈ ءِ سبب ءَ بند کنگ بوتگ انت کہ ایشی ءَ چہ کمکی کارروائیاں تاوان رس ایت۔

افغان واکدسر ءَ گشتگ کہ ہوائی کمک ءِ زور ءَ سانمندیں مردماں سکا کمک ءُ رکھینگ ءِ کوشست کنگ بوگ ءَ انت۔

اوگانستان ءِ واکدارانی گشگ اِنت کہ اے مرگ ءُ ٹپیانی کچ ءُ کساس ھلاس نہ اَنت پرچا کہ دوریں دمگاں انگت گوں دمگی نندوکاں رھوت برجاہ اِنت ءُ کمکی ٹیم آھانی گور ءَ سر بوھگ ءِ جھد ءَ اَنت۔

لھتے ھالانی رد ءَ انگت ءَ زمین چنڈ ءِ لرزگ وھد وھد ءَ سما بوگ ءَ اَنت۔

بلوچستان ءَ گوستگیں دو دھکاں بیگواھیانی یک ٹوھیں جیڑھے بندات بیتگ کہ اود ءَ ھمک مھلوک وتی دل ءَ یک تُرسے ءِ زندے سما کنت، اے دوئیں دھکاں بلوچستان ءَ انسانی ھکانی گلانی رد ءَ ھزارانی ھساب ءَ بلوچ ورنا، استاد، ڈاکٹر، ءُ ھمک تک ءَ بندوکیں مردم گار کنگ یا کُشگ ءُ آیانی لاش چگل دیگ بیتگ انت –

اَچ بلوچستان ءَ اے جاور گندگ ءَ ھم کاینت کہ اود ءَ بازیں زھگ وتی پتانی ودار، گوھار براتانی ودار، زال وتی جودانی ودار ءَ نشتگ ءُ آیانی وداریگ انت چوشکہ چوشیں جاوراں اود ءَ گندگ ءَ کیت بازیں کھول یا مات ھمے ودارانی میان ءَ وتی زند ءَ آسر کن انت ءُ دنیا ءَ رکُست بنت-

چَرے بیگواھیانی درچ تھنا ایوک ءَ بلوچستان ءَ نا بلکیں ھَر ھما دمگاں بلوچ وانگ یا آباد انت اود ءَ ھم بلوچ اَچ وتی زند ءَ رکگ بوگ ءَ انت- بیگواھیانی ویلانی گیش بوگ ءَ کھول بلوچستان ءَ ھوار پاکستان ءِ دگہ جاھاں ھم زھرشانی، نندانک، سمینار ءُ دگہ دگہ انسانی ھکانی پِڑاں برجم بیتگیں نیاداں ھوار انت ءُ وتی دردانی درشان کنگ ءَ گندگ بوگ ءَ انت-

گوستگیں روچ ءَ ھیومن رائٹس کمیشن آف پاکستان ءِ نیمگ ءَ گوستگیں روچ ءَ کراچی ءَ زورانسری آوار جنی ءِ سانمندانی میان استمانی روچ برجم دارگ بیتگ-

اے مراگش ءِ سروکی سادیہ بلوچ ءَ کتگ وھدے کہ انسانی ھکانی رھشون ڈاکٹر توصیف، زالبول فاؤنڈیشن ءِ ڈائریکٹر مھناز رحمان ءُ سنیئر اِھوالکار سھیل سانگی ءَ تران کتگ-

اے مراگش ءَ بیگواھیں زاھد بلوچ ، سرفراز بلوچ، شیراز بلوچ ءُ سیلان بلوچ ءِ کھول ءَ ھم وتی درد ءُ ھم درشان کتگ اَنت ءُ آ بازیں روچے بیت کہ وتی دوستناکانی یل کنائینگ ءِ ھاتر ءَ ماں کراچی پریس کلب ءِ دیم ءَ نندانک ءَ نشتگ اَنت بلے تنی وھدے ھچ وڑیں گامگیچ زیرگ نہ بیتگ –

ھمے میان ءَ بلوچ یکجھتی کمیٹی ءِ بُنجاھی ڈپٹی آرگنائزر لالا وھاب بلوچ، عثمان بلوچ ، زاھد بگٹی ءُ خالق جونیجو ءَ ھم مراگش ءَ بھر زرتگ ءُ سانمندیں کھولاں گوں ھمدردی درشان کتگ-

ایچ آر سی پی ءَ کوام متھدہ ءِ تر گردیں ٹولی ءَ گوں لوٹ کتگ کہ آ بئیت پاکستان ءَ جاوراں ھالاں تچکی ءَ بچار اَنت سانمندیں کھولانی آجوئی لیکہ ءُ پُرایمنیں زھرشانی ءِ ھک ءَ مُھر کنگ ءِ ماھول ءَ کارمرزی ءِ زمانت ءَ بدنت-

کمیشن ءَ زور داتگ کہ حکومت زمہ واری اِنت اے جیڑہ ءَ دلگوش گور بہ کنت ءُ جوانیں گامگیجے بزور اِیت-

ھمے وڑ اسلام آباد ءَ بیگواھیں مردمانی کھولانی زھرشانی نندانک ءَ مروچی چل ءُ ھپتمی روچ ءَ ھم برجاہ بیتگ-

اے زھرشانی نندانک ءَ بی وائی سی ءِ سروک ڈاکٹر ماہ رنگ بلوچ ءِ گھار نادیہ بلوچ، بیگواھیں آصف ءُ رشید ءِ گھار سائرہ بلوچ، بیگواھیں راشد حسین ءِ گھازرتک ماہ زیب بلوچ ءَ ھوار بی وائی سی ءِ رھشون سمی دین بلوچ ءَ اَبید دگہ بیگواھیں مردمانی کھول ھوار اَنت –

زانگ بہ بیت اسلام آباد ءِ زھرشانی نندانک ءَ ساڑی سائرہ بلوچ ءِ برات آسپ ءُ رشید ءَ مروچی ھپت سال سرجم بیتگ کہ آ بیگواہ ءَ اَنت ھمے میان ءَ سائرہ بلوچ آیانی بیگواھی ءِ درگت ءَ تران کتگ ءُ آیانی یل کنائینگ ءِ لوٹ کتگ-

بلوچستان ءِ آجوئی لوٹوکیں سلاہ بندیں گلانی ھمسنتیں گل بلوچ راجی آجوئی سنگر ( براس) ءِ جارکش بلوچ ھان ءَ رسانکدراں وتی شنگ کرتگیں درشان ءِ تہ ءَ گوشتگ کہ ھزدار ءِ دمگ زھری ءَ سرمچارانی کنٹرول ءَ انت ۔ اے انگر ءُ ارشاں زورگریں پوج ءِ 37 کارمند کشتگ انت، وھدیکہ سرمچاراں دژمنیں پوج ءِ گاڑی ، سلاہ ءُ دگہ مڈی دستیگ کتگ انت وھدیکہ بیڑانی میان ءَ زورگریں پوج ءِ سَے ءُ سی ٹی ڈی ءِ یک کارمند ءِ دزگیر کتگ ۔

جارکش ءَ گوشتگ کہ براس ءِ سرمچاراں کردگاپ ، سوراب ،مشکے ءُ مستونگ ءَ ھم پوج ءِ سر ءَ اُرش کتگ ءُ دگ ھم بستگ انت ۔

جارکش بلوچ ھان ءَ گوشتگ کہ اے کار بلوچ راجی آجوئی سنگر ءِ ترند ءُ مھکمیں اُرشانی بھر انت کہ 10 اگست ءَ بندات کنگ بوتگ انت ۔ چد ءُ پیسر براس ءَ 71 اُرشانی زمہ واری منّ اتگ انت ۔ اے نوکتریں اُرشانی ھواری ءَ سرجم ءَ ھپتاد ءُ شش اُرش انت ۔

جارکش ءَ گوشتگ کہ براس ءِ سرمچاراں 11 اگست ءَ ھزدار ءِ دمگ زھری ءَ مھلوک ءِ مچی ءَ تران کتگ ۔ ھمے میان ءَ سرمچاراں شوربندی ءِ رد ءَ بنجاھی شھدگ ءُ دگانی سر ءَ سنگر گپتگ ءُ نشتگ انت ۔ زورگریں پوج ءِ 13 گاڑیانی کاروان ءَ دمگ ءِ تہ ءَ آیگ ءِ جھد کتگ کہ سرمچاراں پیسرا گزان ءِ ھند ذوالفقار آباد ءَ دگ بستگ ءُ آیانی سر ءَ مزنیں ءُ وتکاریں سلاھاں گوں اُرش کتگ ۔

بلوچ ھان ءَ گوشتگ کہ پوج ءِ ھشت گاڑی اُرش ءِ زد ءَ اتکگ ءُ زورگریں پوج ءِ یک ٹرک ءِ سرجمی ءَ تباہ بوتگ ، وھدیکہ سرمچاراں دو گاڑی گوں ھمراھے پوجی مڈیاں دستیگ کتگ ۔ آئی ءَ گوشتگ کہ اُرش ءِ میان ءَ پوجی کارمند تتکگ ءُ باگانی نیمگ ءَ شتگ انت بلے سرمچاراں آ انگر کتگ ءُ بازینے کشتگ ءُ لھتے پوجی کارمند تتکگ ءُ مردمانی گساں پترتگ انت کہ اود ءَ چک ءُ جنین دیمپان کنگ ءِ جھدے کتگ پد ءَ کہ شپ بوتگ ءُ تچگ ءِ جھد ءَ بازیں کارمندے مرتگ ءُ زدگ بوتگ انت ۔

جارکش ءَ گوشتگ کہ براس ءِ سرمچاراں گزان ءِ دمگ سینکوری ءَ پاکستانی پوج ءِ یک پانگسے ءِ سر ءَ راکٹ ءُ دگہ وتکاریں سلاھاں گوں اُرش کتگ وھدیکہ زالکان ءَ آؤکیں پوجی کارمندانی سر ءَ ماں اسپیدک ءِ ھند ءَ اُرش کتگ ءُ پدکنزگ ءَ لاچار کتگ انت ۔

براس ءِ جارکش ءَ گوشتگ کہ دو روچاں برجاہ بوتگیں اے اُرشاں زورگریں پوج ءِ 37 کارمند مرتگ ءُ بازینے زدگ بوتگ انت ۔ پوج ءَ بالگردانی سر ءَ شیلنگ ءُ ڈرون ،کواڈ کاپٹرانی سر ءَ بمبگواری ھم کتگ بلے پد ءَ ھم بے سوب بوتگ ۔

جارکش بلوچ ھان ءَ گوشتگ کہ براس ءِ سرمچاراں 20 روچ انت کہ زھری ءَ کنٹرول گپتگ ءُ آیاں بنجاھی پترگ ءِ دگانی سر ءَ پانگس ھم جوڑ کتگ ۔

جارکش ءَ گوشتگ کہ زھری ءَ بیڑانی میان ءَ سرمچاراں زورگریں پوج ءِ سَے کارمند دزگیر کتگ انت ، وھدیکہ زھری – کلات ءِ شھدگ ءِ سر ءَ دگ بندی کتگ ءُ ھمے میان ءَ کاؤنٹر ٹرررازم ڈیپارٹمنٹ (سی ٹی ڈی) ءِ یک کارمندے ءَ ھوار دگہ یک مردمے دزگیر کتگ ۔ آیانی جست ءُ پرس برجاہ انت کہ پد ءَ رند ءَ بلوچ راجی آمیدگس ءِ شور ءِ رد ءَ یل دیگ یا سزا دیگ بنت ۔

جارکش ءَ گوشتگ کہ سرمچاراں 11 اگست ءِ شپ ءَ مستونگ ءِ دمگ کھڈکوچہ ءَ پوجی بنجل ءِ سر ءَ اُرش کتگ ۔

آئی ءَ گوشتگ کہ سرمچاراں 11 اگست ءَ مستونگ ءِ دمگ کردگاپ ءَ بنجاھی شھدگ بازیں اداراں تاں بستگ وھدیکہ لیویز ءِ پانگس سر ءَ بیڑ برتگ ءُ دو گاڑی دستیگ کتگ انت ۔ پد ءَ رند ءَ پوج ءَ بالگردانی سر ءَ دمگ ءِ پرپٹ سوارانی سر ءَ شیلنگ کتگ کہ چریشی ءَ سَے مردم بیران بوتگ انت ۔

جارکش ءَ دیمتر ءَ گوشتگ کہ براس ءِ سرمچاراں 13 اگست ءَ کیچ ءِ دمگ سامی ءَ زورگریں پاکستانی پوج پانگسے ءِ سر ءَ راکٹ ءُ دگہ مزنیں سلاھاں گوں اُرش کتگ ءُ چریشی ءَ پوج ءَ جانی ءُ مالی تاوان ءِ دیمپانی کنگ کپتگ ۔

بلوچ ھان ءَ گوشتگ کہ براس ءِ سرمچاراں 14 اگست ءَ مشکے ءِ دمگ تنک گرمیں کئور ءَ پوج ءِ سر ءَ اُرش کتگ اے اُرش ادارے ءَ گیش برجاہ بوتگ کہ چریشی ءَ پوج ءَ مزنیں کچے ءَ جانی ءُ مالی تاوان ءِ دیمپانی کنگ کپتگ ۔

جارکش ءَ گوشتگ کہ سرمچاراں 16 اگست ءِ بیگاھے وھد ءَ سوراب ءَ تارکی ڈیم ءِ نزیک ءَ شال – کراچی ءِ بنجاھی شھدگ سَے ادار ءَ تاں بستگ ۔

براس ءِ جارکش بلوچ ھان ءَ گوشتگ کہ اے درسیں کارانی زمہ واری ءَ بلوچ راجی آجوئی سنگر (براس) من ایت ۔ ءُ ما اے گپ ءَ تچک کن ایں کہ زورگریں پاکستانی پوج ، آئی ءِ چیریں ادارہ ، کشندہ ٹولی ءُ ایندگہ کمکار کہ ھر کجا بلوچ راجی ھستی ، سرڈگار ، مڈیانی بگیری ءَ کار ءَ انت آیاں اے گھگیری ءِ دیمپانی کنگ کپ ایت ۔ مئے جھد آجوئی ءُ وتواکی ءَ تاں برجاہ مان ایت ءُ زورگریں تاکتانی سرا ارشانی تہ ءَ چد ءُ گیشتر ترندی آرگ بیت انت ۔

روکپتی بلوچستان ءَ بازیں وھداں برجاھیں پاھو ءِ لڑ اوشت ءِ آماچ نہ بیتگ کہ اود ءَ ھمک وھد ءَ بندیگیں مردم جتا جتائیں بھتامانی دَرچ ءَ پاھو دیگ بوگ ءَ انت-

اود ءَ یک ھسابے ءِ تک ءَ گیشتریں مردم نشہ واپاری ءِ بھتام ءَ بندیگ کنگ ءُ پد ءَ پاھو ءِ دار ءَ درنجگ بوگ ءَ انت کہ چریشی ءَ چاگرد ءَ ھمک ھما مردم سانمندی ءَ گندگ بیت کہ آئی ءِ مردم گرگ ءُ بندیگ کنگ بیتگ –

ھَر ھما مردم ءِ توک ءَ اے ترس ودی بوت کنت کہ آئی ءِ مردم شَک ءِ سر ءَ گرگ بیتگ ءُ پد ءَ آئی ءَ تھنا ایوکی ءَ آمیدگس ءِ دیمپانی کنگ کپتگ –

ھمے وڑ ءَ مروچی یک مردمے ماں روکپتی بلوچستان ءِ بنجاھی شھر دزاپ ءَ یک بندیگیں مردمے پاھو دیگ بیتگ-

گیشیں اھوالانی رد ءَ 31 اگست 2025 ءِ سھب ءَ یک بلوچ زندانی یے مرگ ءِ سزا دیگ بیتگ۔

اھولانی رد ءَ پاھو ءِ دیگ بیتگیں مردم ءِ پجار اھمد براھوئی ء نعمت اللہ ءِ نام ءَ زانگ بیتگ ءُ آ زاھدان ءِ جھمنند گوشگ بوگ ءَ انت-

اھوالانی رد ءَ اھمد اکتوبر دوھزار ءُ بیست ءُ چار ءَ کوش ءِ بھتام ءَ گرگ بیتگ ءُ آئی ءِ سر ءَ آمیدگس ءَ پاھو ءِ ھکم داتگ بیتگ-

ایران ءَ کوش ءِ بھتام ءَ گرگ بیتگیں گیشتریں مردم پاھو دیگ بوگ ءَ انت کہ کساس کمے ءِ ھساب ءَ مردم اَچ پاھو ءَ رک اَنت ءُ واتر یل بنت-

ھمے گوزوکیں سال ءَ سیستان و بلوچستان ءِ بیست ءُ سَے شھراں کساس ءَ یک سد ءُ یازدہ مردم پاھو دیگ بیتگ انت کہ ایشانی توک ءَ ھشتاد ءُ سَے مردم نشہ واپاری ءِ بھتام ءَ ءُ بیست ءُ پنچ کوشانی ءُ سَے جتا جتائیں دگہ بھتاماں پاھو دیگ بیتگ انت-

کتاب ءِ بارو ءَ دو دانک

نبشتہ کار: آئشہ بلوچ

دی بلوچستان پوسٹ

اِلم یک انچیں دریا یے ھمینچو زِر ءَ ایر بہ کپ ئے گیشتر جُھلانک تِر بیت، راج دپتراں دیمروی ھما راجاں کتگ کہ اِلم اِش بیتگ یک مردمے دنیا ءِ سجھیں الم ءَ ھاسل کُت نہ کنت، بلے کد ء وت بہ کنت باید ھرکس جھد بہ کنت منی نز ءَ آسانتریں الم ءِ ھاسل کنگ کتاب ءِ وانگ اِنت

گڑا ما شما پرچا کتاب مہ وانیں؟ بیا اِت ما شما ھم وت ءَ پَشت مہ گیجین ءُ وتی زانت ءُ زانشت ءَ دیم ءَ بہ بریں تا وتی منزل ءَ سر بہ بہ ایں۔ من ھمے گوشاں کہ کتاب بْوان اِت ءُ وتی راج ءَ وتی آیوکیں پدریچ ءَ ھم پنت ءُ سوج بہ دے اِت کہ گوں کتاباں مھر بکنت۔

کتاب ترا دنیا ءَ پیش دار اِیت ءُ تئی ھیال ءَ پراہ ءُ شاھگاں کنت، تئی زانت ءَ دیم ءَ بارت تئی راج ءَ دیم ءَ بارت ءُ ترا تئی منزل ءَ سر کنت۔

من گندگ ءَ آں منی راج ءَ گوں کتاباں مھر نیست اول ایش کہ ما گلامیں مارا ھمے سکین دیگ بیتگ کہ ما مہ وانین ءُ دیمروی مہ کنیں ما زھنی گلام جوڑ بیتگیں بلے مارا ھچ سد ءُ سما نیست اِنت۔

اے چیز ءَ کہ ما گوں وانگ ءَ گستا ایں گڑا مئے دژمن ءَ گل کتگ، بلے مارا ھوش کنگی اِنت سما کنگی اِنت وانگی اِنت ءُ زانگی اِنت وتی اندر ءَ زانت ءُ زانشت آرگی اِنت۔

کتاب تئی لوگ ءِ کندیل اِنت، کتاب تئی لوگ ءِ روژنائی اِنت، کتاب تئی راج ءِ باندات اِنت، کتاب تئی چاگرد ءِ دیم ءَ بروک اِنت، کتاب تئی چمّاں پچ کنوک اِنت، کتاب تئی زانت ءُ زانشت ءَ دیم ءَ بروک اِنت ءُ کتاب ترا دنیا ءَ پیش داروک اِنت۔

مئے چاگرد سک پُشت ءَ پَشت کپتگ چی واستا؟ اے واستا کہ نہ وانین ءُ وتی وھد ءَ بے سریں جاگھاں ببا دئیں۔ گڑا مارا بس وانگی اِنت سما کنگی اِنت گوں کتاباں مھر کنگی اِنت۔

دگہ نیمگے ما بچاریں مئے زالبول گنتر پُشت ءَ کپتگ اَنت بازیں زالبولے پہ وانگ ءَ پابند کنگ بیتگ بزاں گیشتریں زالبول پہ وانگ ءَ گوں مکن کنگ بیتگ اَنت، کہ وانگ پہ جنکاں نہ اِنت-

گڑا من ھمے گپ ءَ گوشاں چاگرد ءِ تہ ءَ دانکہ زالبول نہ وان اَنت گڑا چاگرد گیشتر پشماندو بیت انچش کہ مردین وان اَنت انچش زالبول ھم بْوان اَنت زالبول کہ وان اِیت زالبول وتی پدریچ ءَ گیشتر زانت ءُ سرپدی دات کنت، گڑا چاگرد دیمروی کنان کنت۔

پد ءَ دگہ گپے ھم ھست اِنت کہ چونیں کتاب وانگی اِنت؟ بچار ھما کتاب کہ ترا سیتّ ءُ نپ دنت، ھما کتاب کہ تئی لوگ ءِ روکیں کندیل بہ بیت، چُشیں کتاب مہ وان کہ ترا تاوان بہ دنت، ءُ تئی لوگ ءِ مُرتگیں چراگ بہ بیت یاکہ ترا گیشتر پُشت ءَ چگل بدنت کتاب ءِ زیرگ ءِ وھد ءَ بچار ھما کتاب کہ ترا سیتّ نپ دنت ھما کتاب ءَ گچین کن ءُ بزیر۔

کتاب ایوک ءَ بلوچی کتاب نہ اَنت، ھرچ زبان ءِ وانگ ءَ زان ئے گڑا ھما زبان ءِ کتاباں گچین کن ءُ بْوان تاں جاھے ءَ سر بہ بہ ئے بلے اے دیم ءَ ھم دلگوش کن وتی زبان ءِ وانگ ھژدری اِنت، وتی زبان ءَ بْوان، وتی زبان ءِ گالاں بزان ءُ وتی زبان ءَ نبشتہ بہ کن۔

وھدے کہ تو کتاب ءِ وانگ ءَ بندات کن ئے گڑا ترا انچیں مھرے گوں کتاباں بیت اے مھر تئی جبین ءَ نند اِیت گڑا تو وت کتاباں یلو دات نہ کن ئے ءُ کتاب ترا وتی نیمگ ءَ ژپّ اَنت، ھر چینچُک کہ دزگٹ ئے بلے پہ کتاب ءِ وانگ ءَ ترا الم وھد کشگی اِنت۔

بلوچستان میزران بات، بلوچ راج تپاک ءُ یکمشت بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بیگواھیانی روچ سِی اگست پرچا دارگ بیت؟ اے روچ پرچا پہ بیگواھیں مردمانی روچ ءَ گچین کنگ بیتگ – میان اُستمان ءِ گوشگ انت اے روچ ءَ ھما گاریں مردم یات کنگ بنت کہ آ اَچ وتی کھولاں زورانسری سِندگ ءُ گستا کنگ بیتگ انت ءُ چوشکہ سرکاری یا گیر سرکاری گلاں آوار جتگ ءُ بندیگ کتگ انت پرے ھاتر ءَ اے روچ ھمے درگت ءَ یک یاتگاری روچے ءِ دروشم ءَ دارگ بیت انت- اے روچ ءَ تھنا دنیا سانمند نہ انت ایشی ءِ توک ءَ بلوچستان ءَ بندوکیں مردم ھم بے ھساب ءَ سانمند انت-

اسلام آباد، شال، کراچی ءُ دگہ شھراں سانمندیں کھولاں یاتگاری لانگ مارچ نندانک، زھرشانی برجاہ داشتگ انت- ھاسکار بلوچ زالبول ءُ مات ءُ گوھارانی جُھد جھانی رسانکدرانی دلگوش ءِ بُنجاہ جوڑ بیتگ انت-

زورانسری بیگواھیں مردمانی میان استمانی روچ ءِ درگت ءَ اسلام آباد ، کراچی ءُ بلوچستان ءِ جتاجتائیں دمگاں یاتگاری روانک کش اتگ –

اسلام آباد ءَ زورانسری آوار جنی ءَ چہ سانمنداں میان استمانی روچ ءِ درگت ءَ بلوچ یکجھتی کمیٹی ءِ نیمگ ءَ برجم بیتگیں ” شناخت ہی یاد ہے” ءِ سرھال ءَ کانفرنسے برجم دارگ بیتگ-

اے کانفرنس زھرشانی نندانک ءِ بنجاہ ءَ برجم دارگ بیتگ کہ اود ءَ عائشہ مسعود، آمنہ مسعود جنجوعہ، پی ٹی ایم اے فرمان وزیر، طاہرہ عبداللہ ءُ دگراں کارنفرنس کتگ-

ھمے وڑ کراچی پریس کلب ءِ دیم زورانسری آوار جنی بیتگیں سانمنداں میان استمانی روچ ءَ چہ لیاری ءُ ماڑی پور ءَ زورانسری بیگواہ کنگ بیتگیں سرفراز، سیلان، شیراز ءُ زاھد بلوچ ءِ کھول ءَ زھرشانی روانک کش اِتگ ءُ زھرشانی کتگ-

زانگ بہ بیت مروچی کراچی ءَ زورانسری آوار جنی ءِ ھلاپ ءَ نندانک ءَ بیست ءُ شش روچ سرجم بیتگ بیگواھیں ورنایانی کھول زھرشانی نندانک ءَ نشتگ اَنت-

زھرشانی ءَ نشتگیں کھولانی گوشگ اِنت کہ مئے مردم بے میار اَنت آیاں گوں ھچ وڑیں پُرکاریاں سیادی نیست اگاں آیاں چیزے کتگ گُڑا آیاں آمیدگس ءَ پیش بہ کن اِت –

کھول ءَ جار جتگ آیانی جُھد تاں ھما روچ ءَ برجاہ بیت دانکہ آیانی دوستناک یل کنگ نہ بنت-

ھمے وڑ دالبندیں ءَ زورانسری آوار جنی ءِ یاتگاری ءَ میان اُستمانی روچ ءِ درگت ءَ بلوچ یکجھتی کمیٹی ءِ نیمگ ءَ کانفرنسے برجم دارگ بیتگ ءُ زورانسری آوار جنگ بیتگیں مردمانی بیگواھی ءِ درگت ءَ تران کتگ-

ھمے وڑ زورانسری آوار جنی بیتگیں مردمانی میان استمانی روچ ءِ درگت ءَ

بلوچ یکجھتی کمیٹی کیچ ءَ زورانسری بیگواھیں مردمانی کھول ءَ تُربت پریس کلب ءِ دیم ءَ بے تواریں روانکے کش اتگ-

اے زھرشانی بیگواھیں مردمانی کھول ءَ چہ سیادی داروکیں زالبول، چُک، کماش ءُ جتاجتائیں پڑ ءَ سیادی داروکیں مردماں مزنیں کچے ءَ بھر زرتگ-

اے درگت ءَ زھرشانی کنوکانی دست ءَ پلے کارڈز ءُ بینرز چست کتگ بیتگ آیانی سر ءَ بلوچستان ءَ زورانسری آوار جنی ءِ ھلاپ ءَ اوگام ءُ سانمندیں کھولانی ھک ءَ کلوہ نبشتگ بیتگ اَنت-

زھرشانی کنوکانی گوشگ اِنت کہ بلوچستان ءَ ھزرانی مردم سالانی سال زورانسری بیگواہ اَنت آیانی کھول درد ءُ گمیں زند گوازینگ ءَ لاچار اَنت-

زھرشانی کنوکانی گوشگ اِنت کہ آ پُرایمنیں وڑے ءَ وتی توار ءَ واکدار ءَ تاں سر کنگ ءَ اَنت دانکہ بیگواھیں مردمانی یل کنگ بہ بنت ءُ آیانی کھول ءَ انساپ دیگ بہ بیت زھرشانی کنوکاں لوٹ کتگ کہ بلوچستان ءَ زورانسری آوار جنی ءِ درچ ءَ زوت بدار اِت ءُ انّگیں بیگواھیں مردماں یل بہ کن اِت-

بلوچ یکجھتی کمیٹی ءِ گوشگ اِنت کہ گوستگیں بازیں دھکاں چہ بلوچستان ءَ زورانسری آوار جنی ءِ دْرچ برجاہ ءَ اَنت، ءُ اے گم ءَ ھزارانی کھول ویران کتگ اَنت-

آیاں دیمتر ءَ گوشتگ کہ میان اَستمانی گلاں ھم لوٹ اِیت کہ آ بلوچستان ءَ اے انسانی ھکانی لگتمالی ءِ سر ءَ بے تواری ندارگ جوڑ بیگ جاہ وتی کرد ءَ پیلو بہ کن اَنت-

ھمے وڑ سندھ ءِ زورانسری آوار جنی ءِ سانمنداں میان استمانی روچ ءَ درگت ءَ نصیر آباد ءَ زھرشانی روانکے کش اِتگ ءُ مزنیں کچے ءَ چک ءُ زالبولاں بھر زرتگ-

زانگ بہ بیت اے روچ بزانکہ سی اگست درستاں چہ پیش لاطینی امریکا ءِ گل ءَ ایر کتگ ءُ اے روچ آیاں 1981 ءَ اولی رند ءَ برجم داشتگ دانکہ لاطینی امریکی زوراکانی وھد ءَ زورانسری بیگواہ کنگ بیتگیں مردماں یات بہ کن اَنت-

پد ءَ اکوام متھدہ ءِ جنرل اسمبلی بیست ءُ یک دسمبر ءَ کولبند نمبر 65/209 منّ اِتگ، چریشی ءِ بُنیاد ءَ ھرچ سال ءَ سی اگست زورانسری آوار جنی ءِ میان استمانی روچ ءِ برجم دارگ جار جتگ-

اشی پد اولی رند ءَ اے روچ سی اگست دوھزار ءُ یازدہ ءَ اکوام متھدہ ءِ سروکی ءَ میان استمانی ھساب ءَ برجم دارگ بیتگ-

بلوچستان ءَ مردمانی بیگواہ کنگ ءِ درچ برجاہ، اسلام آباد ءُ کراچی ءَ بیگواھیں مردمانی کھولانی زھرشانی برجاہ انت-

اسلام آباد ءَ بی وائی سی ءِ رھشون ءُ بیگواھیں مردمانی کھولانی زھرشانی نندانک ءَ چِل ءُ شش روچ سرجم بیتگ ءُ کراچی ءَ بیگواھیں زاھد علی ءِ کھول ءِ زھرشانی نندانک ءَ بیست ءُ شش روچ سرجم بیتگ ءُ اَچ بلوچستان ءَ دگہ دو مردم بیگواہ کنگ بیتگ انت-

اھوالانی رد ءَ بلوچستان یونیورسٹی ءِ سوشل ورک ڈپارٹمنٹ ءَ بندوکیں نودربر عمران بلوچ ءِ کھول ءِ رد ءَ آ بیست ءُ ھپت اگست ءِ شپ ءَ شال ءَ اے ون سٹی ءَ چہ جند ءِ لوگ ءَ آوار جنگ ءُ بیگواہ کنگ بیتگ-

کھول ءِ رد ءَ عمران یک پُرایمنیں شھری یے ءُ وانگ ءَ گوں بندوک انت ءُ عمران ءِ سر ءَ کجام بھتامے ھست آمیدگس ءَ پیش کنگ بہ بیت انت-

ھمے وڑ ءَ چہ شال ءَ زھری ءِ جھمنندیں عنایت اللہ نامیں مردمے آوار جتگ ءُ برتگ-

عنایت اللہ ءِ برات عزت اللہ ءَ گوشتگ منی کستریں برات عنایت اللہ زھری بیست ءُ ھپت اگست ءَ شپ ءِ ساھت یازدہ بج ءَ گیس کالونی سریاب کسٹم شال ءَ لس پوشاکی کارندھاں گوں وت برتگ-

ھمے ڈول ءَ ھمے روچ ءَ کیچ نوانو ءَ لیاقت ء غلام رسول ھم پاکستانی پوج ءَ آوار جتگ ءُ بیگواہ کتگ-

ھمے وڑ اَچ کراچی ءَ کھول سکیں نادراھی ءَ ابید ھم وتی زھگانی یل کنائینگ ءِ ھاتر ءَ پریس کلب ءِ دیم ءُ بیست ءُ ششمی روچ ءَ ھم زھرشانی نندانک ءَ نشتگ انت-

زھرشانی زاھد علی ، شیراز بلوچ ، سیلان بلوچ ءُ سرپراز ءِ کھول ءَ نیمگ ءَ کنگ بوگ ءَ انت –

زھرشانی ءَ ھواریں سرپراز ءِ مات بی بی گلشن نادراھی ءَ ابید ھم نندانک ءَ جاڑیگ انت ءُ ایشی ءِ ھواری ءَ زاھد علی ءِ پت ھم نادراھی ءِ آماچ انت بلے چوشیں جاوراں ابید ھم آیانی گون ءَ گپ ءُ تران ءَ انتزامیہ گندگ نہ بیت انت-

ھمے وڑ اسلام آباد ءَ ھم بلوچ کھولانی زھرشانی نندانک مروچی چِل ءُ ششمی روچ ءَ برجاہ بیتگ-

زھرشانی نندانک بی وائی سی ءِ سروکانی بندیگی ءِ ھلاپ ءَ ھوار بیگواھیں مردمانی کھولانی نیمگ ءَ کنگ بوگ ءَ انت-

کھولانی گوشگ انت ما داں انساپ ءِ لوٹ ءَ وتی زھرشانیاں برجاہ داریں –

پاکستان ریلوے واکدار ءَ شمبے ءِ روچ ءَ پشاور ءَ چہ شال ءَ رؤکیں جئپر ایکسپریس ءَ جیک آباد ریلوے اسٹیشن سر ءَ داشتگ- واکدار ءِ رِد ءَ اے گامگیج سیکیورٹی تُرس ءِ سبب ءَ بیتگ-

ریلوے واکدار ءَ پدر کتگ ریل چہ جیک آباد دیم روگ ءِ اجازت دیگ نہ بیتگ ءُ مساپراں بلوچستان ءَ سر بیگ ءِ ھاتر ءَ ٹرانسپورٹ چن ءُ لانچ کنگ بیگ ءَ اِنت-

جئپر ایکسپریس چہ پشاور ءَ روگ ءَ بیتگ ءُ شال ءِ نیمگ ءَ جنزان بیتگ وھدے وکدار ءَ آ جیک آباد ءَ داشتگ-

تنی وھدے واکدار ءَ اے سیکیورٹی تُرس ءِ درگت ءَ ھچ وڑیں سرپدی نداتگ-

ریلوے واکدار ءِ گوشگ اِنت کہ جاور ھالانی سر ءَ نگاہ دارگ بیگ ءَ اِنت ءُ انچش سیکیورٹی پلگاری رس اِیت، ریل سروس ءِ پچ کنگ بیت-

بلوچستان ءِ جاورھالانی گر ءُ دار کنگ ءَ سرکار ءَ یک رندے پد ءَ موبائل نیٹورک بند کتگ انت – لس سیاسی مھلوک ءِ گوشگ ءِ انت سرکار ءِ نیٹورکانی بند کنگ ءَ بس تھنا لس مردم سانمند بیگ ءَ انت-

شال ءَ ھوار سرجمیں بلوچستان ءَ یک رندے پد ءَ موبائل فون انٹرنیٹ بند کنگ بیتگ انت-

موبائل انٹرنیٹ سروس 30 اگست ءَ گیش کنگ ءُ 6 ستمبر ءَ داں بندگ کنگ ءِ جار پرینگ بیتگ، پاکستان ٹیلی کمیونیکیشن اتھارٹی ( پی ٹی اے) ءَ اُستانی سرکار ءِ دزبندی ءَ نوٹیفکشن شنگ کتگ-

مھکمہ داکلہ ءِ گوشگ انت کہ پھزداری ءِ بنیاد ءَ اُستان ءَ موبائل انٹرنیٹ سروس مھتل کتگ-

ایشی ءَ پیش شش اگست ءَ بلوچستان ءَ انٹرنیٹ سروس بند کنگ بیتگ انت – بیست ءُ یک اگست ءَ بلوچستان ھائی کورٹ ءَ شال ءَ انٹرنیٹ سروس دو اداراں پچ کنگ ءِ ھکم داتگ ات ءُ آمیدگسی ھکم ءَ پد شال ءُ چمن ءِ بازیں جاھاں موبائل انٹرنیٹ پچ بوگ بندات بوتگ انت-

بلوچستان ءَ انٹرنیٹ سروس ءِ بند کنگ ءِ سبب اود ءَ بلوچ آجوئی لوٹوکانی اُرشانی دارگ ءِ ھاتر ءَ کنگ بیتگ انت-

بلوچستان ءِ سرکار ءِ نیمگ ءَ نیٹورکانی بند کنگ ءَ ابید ھم بلوچستان ءَ اُرشانی دارگ سرجمی نہ بیتگ انت اود ءَ یکشل ءَ اُرش گندگ ءَ اتکگ انت-

مروچی مستونگ ءَ مڈی بروکیں گاڑیانی سر ءَ تیرگواری کنگ بیتگ انت-

کھڈ کوچہ ءِ ھند ءَ ناشناسیں سلاہ بندیں مردماں مڈی بروکیں دو ٹرکانی سر ءَ تیرگواری کتگ ءُ اود ءَ گاڑیانی ڈرائیور گڈی بیھار دیگ ءَ پد بیتگ انت-

دمگی اھوالانی رد ءَ سلاہ بنداں ٹرکانی ٹائر بشٹ کتگ انت ءُ دگہ جانی تاوان نہ بیتگ –

ھمے وڑ ءَ بلوچستان ءِ دمگ پنجگور ءَ سلاہ بندیں مردماں یک مردمے آوار جتگ ءُ برتگ-

دمگی مردمانی رد ءَ آدینگ ءِ بیگاہ ءَ پنجگور چتکان قلم چوک ءَ مھراب ء منظور نامیں مردمے پنچ سلاہ بندیں مردم ایگوزو گاڑی ءَ سوار بیتگ ءُ مگرب ءِ وھد ءَ اتکگ ءُ ورنا اش آوار جتگ ءُ برتگ-

دمگی مردمانی رد ءَ آوار جنوکانی سیادی سرکاری پلامرزی ءَ ھستین گل ڈیتھ اسکواڈ ءَ انت-

ڈیتھ اسکواڈ ءِ بارو ءَ گوشگ بیت کہ اے گل بلوچستان ءَ بلوچ ورنایانی آوار جنگ ءُ بیگواہ کنگ ءُ کوشکاں دزمانجن انت-

دمگی مردمانی رد ءَ اے گل ءَ پنجگور ءَ بازیں ورنا نشانگ کتگ ءُ کشتگ انت کہ ھمے زوتاں اود ءَ زیشان زھیر نامیں فٹبالرے آوار جتگ ءُ پد ءَ دومی روچ ءَ آئی ءِ تیرسپتگیں لاش چگل داتگ ات-

بلوچستان ءِ بازیں جاھاں ڈیتھ اسکواڈ پہ ناشری ءَ زانگ بیت انت کہ بازیں جاھاں مھلوک ءِ لوگانی سر ءَ بمب چگل دیگ ءُ دگہ دگہ ویلاں دزمانجنی ءَ گندگ بیت انت-

سیاسی ءُ انسانی ھکانی گلانی گوشگ انت کہ اے گل بلوچستان ءَ پہ وانندگیں مردماں ھوار لس مردمانی نشانگ کنگ ءَ جوڑ کنگ بیتگ بلے سرکاری تکاں اے گل ءَ البت دراھیں واک دیگ بیتگ انت ءُ بلے تنی وھدی سرکار اے بھتاماں وتی سر ءَ زیرگ ءَ تیار نہ انت-

لس سیاسی مھلوک ءِ گوشگ انت اگاں اے گل ھمے ڈول ءَ یلو بوج کنگ بوت گڑا بزانکہ بازیں ورنا آئی ءِ نشانگ ءَ بنت بزانکہ سرکاری پلامرزی ءَ ھستیں گل لس مردماں نشانگ کنگ ءَ پر واک کنگ بیتگ-