TBP Balochi

روکپتی بلوچستان ءَ کوشکاری یا دگانی سر ءَ ویل یا سرکار ءِ نیمگ ءَ لس مردمانی سر ءَ تیرگواری ءُ چریشی ءَ چہ مردمانی بیرانی یا ٹپی بوگ ءِ ھال نوک نہ انت کہ اے گوستگیں بازیں وھداں وھد وھد ءِ سر ءَ برجاہ انت-

روکپتی بلوچستان ءَ بندوکیں مردمانی گوشگ انت کہ اود ءَ لس سلاہ بندیں مردم لس شھریاں آسانی ءِ گون ءَ نشانگ کن انت ءُ پد ءَ پشت ءَ ماندے انت ءُ رو انت-

اود ءَ مھلوک ءِ گوشگ انت کہ اے ویلانی گر ءُ دار کنگ ءَ انتزامیہ یا واکداریں مھلوک ھچ ھساب ءَ گندگ نہ بیت انت ءُ اے ھم زانگ نہ بیت کہ اے کوشکار کے انت-

روکپتی بلوچستانءِ دمگ لاشار ، ایرانشھر ، میناب ءُ سراوان ءَ جتاجتائیں وئیلاں سے مردمے لاش دزکپتگ انت یک مردمے کارچ جنگ ءُ ٹپی کنگ بیتگ-

ایرانشھر ءِ دمگ کلینیک ءَ نوک جوڑ بُوْکیں لوگے ءِ تہ ءَ بیران بیتگیں مردمے لاش دزکپتگ بیران بیتگیں مردم ءِ پجار زانگ نہ بوتگ-

ھمے وڑ ءَ میناب ءِ زِر ءَ مردمے تیر سُپتگیں لاشے دزکپتگ ۔ بیران بیتگیں مردم پجار زانگ نہ بوتگ ، ھالکار ءِ گوشگ انت کہ آئی ءِ سرا تیر جنگ ءُ کشگ بیتگ – لاش ماھیگ گیری ءُ دمگی مردماں در کرتگ تیاب پھازیں ایرانی لشکر ءِ دستا داتگ ۔

لاشار ءِ دمگ اسپکہ ءَ ھم مردمے لاش دزکپتگ ، مردمانی گوشگ انت کہ ریل راہ گُرا مِرساد ءِ نوک جوڑ بووْکیں ماڑی ءِ کِرا آئی ءِ لاش دزکپتگ- گوشگ بوگ ءَ انت لاش ءَ کساس دو ھپتگ بیت انت- دزکپتگیں لاش ءِ پجار زانگ نہ بیتگ-

ھمے وڑ ءَ سراوان ءَ بلوچ ورنایے ءِ سر ءَ ناشناسیں مردماں اُرش کرتگ ءُ ٹپی کتگ-

ھالکار ءِ رد ءَ چہ سراوان ءَ دیم پہ پتوکان ءَ رووکیں گاڑی ءِ راہ بستگ ءُ آئی ءِ سرگ ءَ کارچ جتگ ءُ بیھوش کنگ ءَ پد چہ وئیل جاہ ءَ تتکگ انت۔

ٹپیگ بیتگیں مردمے نام مھدی زھروزھی انت کہ آ سراوان ءِ دمگ کوھک ءِ جھمنند انت-

ھندی مردمانی گوشگ انت کہ اے دومی رند انت مھدی ءِ سر ءَ اے وڑیں اُرش بوگ ءَ اَنت ۔

ٹپیگیں مردم پہ اِلاج ءَ نادراہ جاہ ءَ برگ بوتگ-

جبّار تُمپ ءِ مزن توکلیں ورنا

نبشتہ کار: دُودا بلوچ

دی بلوچستان پوسٹ

تُمپ ءِ مچکدگ وتی سر بُرزی ءَ چنڈینان اَت ءُ بُرزتریں مچ وتی سر ءَ چنڈینان اِت اَنت ءُ شھید بوتگیں ورناھاں گوات نازینگ ءَ اَت۔ ابرم گُش ئے آجوئی ءِ جَنگ ءَ ھوار اَت برے مچکدگ ءِ رنگ ءَ ءُ برے کوھانی دروشم ءَ سھرا اَت۔ بیگاہ ءِ ساھت ءَ سرجمیں شھر گوں چیزے ناں چیزے ءَ دل گوش اَت، کسے وتی باندات ءَ سمبھینگ ءَ اَت ءُ کسے راج ءِ باندات ءِ سمبھینگ ءَ کُربان بوگ ءَ اَت ءُ ھمے رنگ ءَ جبّاریں سر پہ زمین ءَ ھون ریچان ءَ کُربان بوّان اِت اَنت۔

یک نیمگے مزن توکلیں ورنا زمین ءِ آجوئی ءَ پہ وتی شپ ءُ روچاں ندر کنان اِت اَنت بلے دومی نیمگ ءَ استانی دلّار پہ لب ءُ لالچ ءُ پہ دوکلدار ءَ آجوئی ءِ راہ ءِ دیم ءَ اڑاند پیداک کنگ ءُ آجوئی ءِ راہ ءَ تاوان بار کنان اِت اَنت ءُ پہ زمین ءَ جنگ ءَ در کپتگیں ورناھانی ھونانی چُسّگ ءَ تُنّیگ اِت اَنت داں دو کلدار بہ رس اِیت ءُ زندگی شادان بہ بیت بلے پہ زمین جنگولیں سر ناں پنجابی ریاست ءِ پادتراپاں پُشت ءَ کِنز اِتگ اَنت ءُ ناں کہ بے بستار ءُ لگوریں دلّارنی دیم ءَ پُشت کِنز بوتگ اَنت بلکیں پہ زمین ءَ ھر نیمگ ءَ گونڈلیں تیراں وتی دلبند ءَ سارت کنان اِت اَنت۔

شھید جبّار پنام اسد جان اُوں ھمے داب ءَ مڑان اَت گوں دُژمناں جنگ کنان اَت داں ساہ کندن ءِ گُڈی ھکّگ ءِ گُڈسر ءَ جنگ ءَ اَت۔ بیگاہ ءِ وھد ءَ تُمپ ءَ وھدے یک دلّارے ھمود ءَ دُکّانے ءِ دپ ءَ نندوک بیت گُڑا جبّار جان ءَ ھال سر بیت کہ اے دلّار اد ءَ نشتگ شھید بلوچستان بیرک ءَ بوس اِیت ءُ دلّار ءِ جَنَگ ءَ در کپ اِیت، شھید ءَ چوناھا ءَ دلّار چست کنگی بیت گُڑا پمیشکا گُش اِیت دستاں چست کن بلے دلّار ءِ پِستول پیسر ءَ چہ پیش تیر بیت ءُ جبّار ءِ سر ءَ تیر گواری کنت ءُ تچگ ءَ لگّ اِیت شھید یک تیرے لاپ ءَ وارت بلے دلّار ءِ سر ءَ رشے جنت آ یک تیرے دست ءَ وارت تچ اِیت جبّار رند ئِے کپ اِیت گُڑا دلّار لوگے ءَ دور کنت ءُ گار بیت۔

شھید ءِ ھمراھیں سنگت شھید ءِ تیر وارتگیں لاپ ءَ چادر ءَ بند اِیت ءُ سینکل ءَ سوارے کنت کمّو دیم ءَ روت شھید کپ اِیت پُشت ءَ چہ گُڑا شھید ءِ لوگ ھمد ءَ نزّیک ءَ بنت شھید ءِ لوگ ءِ مردُم گنداں اے جبّار اِنت گُڑا اے گُش اَنت ما زمین‌ ءِ تمردیں بچ ءَ اِسپتال ءَ سر کنیں بلے سنگت گُش اِیت مارا گوں وت برگی اِنت، لوگ والا نہ دینت ئِے ءُ باز زور دینت گشُ اَنت کہ ما وت اسپتال ءَ سر ئِے کنیں۔ لوگ ءَ والا برنت ئِے اِسپتال ءَ داکتر ڑرپے جنت ئِے۔ شھید ھمد ءَ گُش اِیت “منی سنگت چون بوت اَنت پہ سلامتی درکپتاں من ءَ سنگتانی ھالاں بہ دے اِت کہ سلامتی در کپتگ اَنت ناں” اُپ کُربان شھید ءِ مزن پگری ءُ تمردی ءَ کہ تیر وارتگ ءُ ھون سک باز رتکگ بلے اولی ھیال سنگتانیگ اَت کہ سنگت چون اَنت۔

شھید ءِ ھون باز رِچ اِیت جان ئِے زرد ترّ اِیت ءُ نزور بیت بلے پگر ئِےچہ پیسری پگر ءَ مھکم تر ءُ مستر بیت، شھید ءَ چہ تُمپ ءِ اِسپتال ءَ در کن اَنت ءُ پہ اِلاج ءَ تُربت ءَ برگ ءَ بنت، چہ اسپتال ءَ در کپ اَنت کمو دیم ءَ رو اَنت کہ پوج رس اِیت ءُ شھید ءَ گیپت ھمے جاہ سک جنت ئِے، یک دلّارے گون بیت گوں پوج ءَ شھید ھمد ءَ دلّار ءَ گُش اِیت کہ تئی روچ کمُّک اَنت ءُ تو نہ رک ئے۔ گُڑا ھمد ءَ پوج شھید ءَ سک باز جنت ءُ اے گُڈی ساھت ئِے بیت ءُ شھید بے ھوش بیت ءُ رستریں پوج شھید ءَ گاڑی ءِ پُشت ءَ دور دنت ءُ بارت ئِے تُمپ ءِ آرمی ءِ کیمپ ءَ بلے جبّار جان راہ ءِ نیم ءَ ساہ دنت ءُ پہ بلوچ راج ءُ زمین ءَ کُربان بیت۔

سنگت جبّار ءِ وڑیں مزن پگر ءُ تمردیں جنگول بلوچستان ءِ سرزمین ءَ دُژمن ءَ پہ ایمنی نیل اَنت۔ اے ورناھاں شھیدانی سوگند وارتگ کہ داں زمین آجو نہ بیت ما پہ ماتیں زمین ءَ جنگ کن ایں، ما ھر گرانیں ساھتانی دیمپانی ءَ تیار این ءُ کُربان بوگ ءَ پہ یک دمانے چک ءُ پد نہ بہ اِیں۔ سنگت سدّک اَت کہ من ءَ چہ پد ورنا منی تپنگ ءَ بڈّ ءَ کن اَنت راج ءِ باندات ءُ پہ وتی ھاک ءِ آجوئی ءَ کُربانی دیگ ءَ ھچ چک ءُ پد نہ بنت، سنگت رخصت اَف آوارُن ءُ یکجاہ ایں۔

“اے زمین ءَ پہ سرانی ندر کنوک ھست اَنت”
“اے ھاک ءَ پہ ھمُک روچ، جبّار کُربان بنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 

بلوچستان ءَ اَبید کراچی ءَ ھم بلوچ نودربرانی زورانسری آوار جنی ءِ دْرچ یکشل ءَ برجاہ ءَ اِنت –

کراچی ءَ زھرشانی نندانک ءَ سی روچ سرجم ءُ اسلام آباد ءِ زھرشانی نندانک ءَ پنجاہ روچ سرجم بی وائی سی ءِ بندیگیں رھشون ءُ بیگواھیں مردمانی کھول اے تُرندیں ھور ءُ واکدار ءِ تُرسینگ ءَ اَبید آیاں وتی زھرشانی نندانک برجاہ داشتگ آیانی لوٹ ھمش اِنت کہ بندیگیں بی وائی سی ءِ رھشون ءُ بیگواھیں مردمانی یل کنائینگ ءُ آوار جنی ءُ دروگیں میڑاں بیگواھیں مردماں کُشگ ءِ بند کنگ بہ بنت-

ھمے وڑ کراچی ءِ پریس کلب ءَ دیم ءَ بیگواھیں زاھد علی بلوچ ءِ پت حمید ءَ آ دگہ بیگواھیں مردمانی کھول نندانک ءَ نشتگ اَنت آیانی لوٹ ھمش اِنت کہ مئے مردماں اگاں چُشیں کارے کتگ آیاں آمیدگس ءَ پیش بہ کن اِت ءُ چو آیاں بیگواہ ک
مہ کن اِت ءُ مارا ازیت مدے اِت-

بلے اے زھرشانی نندانکاں چہ اَبید ھم زورانسری آوار جنی ءِ اوشت آماچ نہ بیتگ-

اِھوالکار ءِ رِد ءَ چہ سندھ ایگریکلچر یونیورسٹی ٹنڈو جام ءِ ھاسٹل ءَ چار بلوچ نودربر پاکستانی پوج ءَ آوار جنگ ءَ پد ناشناسیں ھندے ءَ برتگ، آیانی درگت ءَ تنی وھدے ھچ وڑیں ھال دز نہ کپتگ-

نودربریں سنگتانی گوشگ رِد ءَ بیگواہ کنگ بیتگیں ورنا بلوچستان ءِ جتاجتائیں دمگ وڈھ ءُ سوراب ءَ سیادی دار اَنت-

ھالانی رِد ءَ چہ اوتھل یونیورسٹی وڈھ کیمپس ءَ سیادی داروکیں اے چاریں نودربر گوستگیں روچاں سندھ ایگریکلچر یونیورسٹی ءِ پڑ درچکانی “زرائت” ءِ چارگ ءَ ٹنڈو جام ءَ سر بیتگ اَنت- نودربرانی گوشگ اِنت کہ یونیورسٹی ھاسٹل ءَ سادھیں پوشاکانی تہ ءِ کارندھاں ھمے ورنا گپتگ ءُ برتگ اَنت چریشی ءَ پد آیانی درگت ءَ ھچ وڑیں گپ دیم ءَ نیتکگ-

بیگواہ کنگ بیتگیں نودربرانی پجّار عمران ء سیف اللہ جھمنند وڈھ، آفتاب ء غلام مصطفیٰ جھمنند وڈھ، مھر اللہ ء محمد قاسم جھمنند وڈھ ءُ شعیب ء عبدالحی جھمنند سوراب نام ءَ چہ بیتگ اَنت-

ایس سی او ءَ برزشانیں درشان

ٹی بی پی شونگال

شنگھائی کمکی گل ءِ بیست ءُ پنچمی سروکی ڈیھانی کونسل ءِ نیاد ءُ برزشانیں درشان بلوچستان ءِ دمگ ھزدار ءَ اسکول بس ءِ سر ءَ اُرش ءُ ڈھاڈر ءَ جعفر ایکسپریس ءِ ھائی جیک کنگ ایر جنگ بیتگ انت- اے برزشانیں مُچی نیاد ءَ بلوچ راجی جنز ناشرکاری ءَ ھمگرنچ کنگ ءِ جھد بیتگ چوشکہ بلوچستان ءِ زمینی جاوراں یکدم دور انت- ھپت دھکاں ھواریں بلوچ زرمبشت ناشری پرکاری ناں بلکیں راجی ھک، آجوئی ءُ وتواجھی ءِ جد ءُ جھد انت- آئی ءَ اے ڈول ءَ ناشری ءَ ھوار کنگ راستی ءِ گار کنگ ءِ برابری انت-

پاکستان ءِ سر وزیر شھباز شریف ءَ نیاد ءَ تران کنان ءَ ٹاہ داتگ کہ پاکستان ءَ ھروھد ءَ یکشلیں جھد، گپ ءُ تران ءُ سپارتکاری ءِ سر ءَ ستک داشتگ- بلے راستی ایش انت بلوچستان ءِ کمی اسلام آباد ءَ ھروھد ءَ گپ ءُ تران ءَ ابید پوجی تاکت ءِ زور وتی پُشت کتگ، چوشکہ پاکستان ءِ پالیسیاں پاشک کن انت- بنجاھی درشانداب ءُ بلوچستان ءَ برجاھیں املی گامگیجانی میان ءَ اے تپاوت ءَ تچک کنت کہ ریاستی رویش اَندری ءَ تاکت ءُ زوراکیاں ھوار انت بلے میان اُستمانی تکاں امن ءُ گپ ءُ تران ءِ پوشاک پوشگ بیت انت-

میان اُستمانی تکاں بلوچ جد ءُ جھد ءَ ناشرکار نامینگ ءِ مھم زمینی جاورانی مٹ کنگ ءَ سوبمند نہ بیت پرچاکہ اے زرمبشت ءِ بنھشت زمین انت – ڈنی مھلوک ءِ جاڑیگ بوگ یا نہ بوگ ءَ گیش اے جد ءُ جھد ءِ اُنڈال بلوچ چاگرد ءُ آئی ءِ گوستانک ءَ گوں پیوند انت- بلوچ آجوئی ءِ واستا پرکاریں سلاہ بندیں گلانی سر ءَ میان اُستمانی بندش ھم جنائینگ بیتگ انت بلے اے بندشاں زرمبشت سرین پروش کنگ نہ بیتگ بلکیں گیش توانمند بیتگ ءُ دیم ءَ اتکگ- ایشی ءَ تچک بیت انت ڈنی زوراں زرمبشت ءِ برزشانی سانمند بیت نہ کنت-

بلوچ راجی زرمبشت ءَ شنگھائی کمکی گل ءِ واستا ترس نامینگ راستی ءَ پاکستان ءِ بنکی ھادت انت ایشی ءِ مول ءُ مراد میان اُستمان ءَ وتی ھمدردی ءُ پلامرزی ءِ گرگ انت – راستی ایش انت بلوچستان ءَ برجاھیں جد ءُ جھد ءِ نشانگ کجام ھم ڈنی ریاست یا دمگ ءِ ھلاپ نہ انت بلکیں وتی مڈی ءُ زمین ءِ وتواجھی ءِ درچ انت – ھمے درچ دومی جیڑہ ءَ جتا کنت- آئی ءَ بس “ ناشرکار ” ءِ درشان ءَ بندوک کنگ دَر راستی رویشے –

بلوچی زبان ءِ نامداریں تامر ساچ زھور پزل ءِ نوکتریں تامر ”سیمسر“ چہ زیردان یوٹیوب چینل ءَ گوستگیں روچ ءَ بزاں یک ستمبر ءَ شنگ بوتگ۔ تامرے کسہ کار سئود بلوچ انت ءُ اے تامر بلوچستان ءِ نامداریں اکس کش نمیرانیں کمانچر بلوچ ءِ نام ءَ کنگ بوتگ ۔

تامر سیمسر یک چاگردی کسھے کہ بلوچ ءِ جیڑہ ءُ جنجالاں سر ءَ جوڑ کنگ بوتگ ، ھمے درگت ءَ زھور پزل ءَ گوں مئے ھندی اھوالکار ءِ گوم ءَ تران کنان ءَ گوشتگ کہ سیمسر ! منی چوناھا ھر تامر متلب ایش انت سپر انت کہ بلوچستان ءِ ھر دمگانی جاورھالاں من چوں پیش بہ داراں۔

بلوچستان ءَ تامرانی جوڑ کنگ ءَ آسراتی گندگ نہ بیت، شمارا کسے ءَ آسراتی داتگ یا وتی ھرچ ءُ درچاں کنگ ءَ ئے؟ اشی ءِ پسو ءَ زھور پزل ءَ گوشتگ کہ :“ بلوچ ءِ گور ءَ ناں ادارہ ھست ءُ ناکہ سرھیلیں مردم کہ اے نیمگ ءَ سر بہ جنت ، ھالانکہ اگاں زر بہ جنت آ وتی زراں کش ایت کنت ۔ پرچاکہ بلوچ ءِ تامرانی بجٹ کساس شش ھپت لک ءَ گیش نہ بیت بلے پد ءَ اگاں اشی ءِ اسکرینگ ءَ بہ کنت یا نیٹ ءَ گڑا بازیں تک ءُ پھناتے ءَ وتی زراں کش ایت کنت ۔بلے مئے کرا چشیں مردم ھوں نیست کہ زر بہ جنت ءُ ناکہ مئے گور ءَ ادارہ ھست ۔ ھرکس کہ کنگ ءَ انت آ وتی ھرچ ءُ درچ ءَ کنگ ءَ انت ۔ مئے گور ءَ سیٹ ءِ زرورت نہ انت توکہ ھمے دمگاں روے اودے بلوچ انت آ تئی کمک ءَ کن انت کسے تر ءَ سبارگے دنت شامے دنت ، گاڑی ءُ سیکلے، اگاں تو کوھی دمگے ءَ بہ روئے بہ دار ئے گڑا ھر وڑیں ھرچے ءِ بیت ایشاں سنگت وت کن انت ۔”

تامر ءِ ھرچ ءُ درچانی کمک رسگ ءُ نہ رسگ ءِ درگت ءَ آئی ءَ گوشتگ کہ “اناں آ وڑ ءَ کہ رسگی انت نہ رس ایت البتہ ایش انت کہ اَنو مئے کِر ءَ چیزے وھد انت کہ دکان والائے گش ایت کہ مئے ایڈا مان کن ، یا دگہ کمپنی ءِ وتی چیزاں پروموٹ کنگ لوٹ ایت آ مارا بیست یا سی ھزار کلدار دنت ما ھمیشاں یکجاہ کن ایں آیانی ایڈاں جوڑ کناں پد ءَ پلم کہ کئیت آیانی منت ءَ گریں ۔ تامر کہ در کئیت ھرچی کہ ھرچ بوتگ آ وَ شتگ انت ھمے کہ درکایاں اے ھمے سنگتانی سپر ءِ گاڑیانی ھرچ انت کہ رواں اسکرینگ کن انت یا دگہ کسانیں اژدری سامانے کہ مئے گور ءَ نیست زور انت ۔ بلے ھما کسانیں سامان بکایا مئے گور ءَ گیشتر پچ گرگ ءِ سر ءَ انت ھر مزنیں چیزے ءِ زرورت بیت گڑا یکے دومی ءِ گور ءَ پچ اش گریں ۔ ”

مکران ءِ تامر ساچ وتی تامرانی تہ ءَ مکران ءَ در ءِ زیداں پیش ندارگ ءِ جست ءِ سر ءَ زھور پزل ءَ گوشتگ کہ “ما مکران ءَ گیشتر ھمے واستا بندوک ایں کہ مئے واک ایں ، ما ستر زور بہ جناں مکران ءِ بازیں دمگاں شت نہ کناں ، پرچاکہ ما ٹیم ورکی کار ءَ انت ٹیم ءِکساس پانزدہ بیست مردم انت ، تو کساس کن ما چہ تربت ءَ دربایاں گوادر ءَ بہ رواں چنچئو ھرچہ کئیت ۔ نوں اگاں ما دگہ جاھے ءَ بہ رواں گڑا سک باز ھرچہ کئیت پمیشکا لاچاری ءَ ما وتی دائرہ در کپت نہ کنیں البتہ منی کسہ ءُ چیزانی لوٹ ھم ھست انت بلے ما شت نہ کنیں ، اگاں مزنیں بجٹے زرے بہ بیتیں گڑا ما الم مکران ءَ در اتک ءُ سلیمان ءُ چابھار ءَ شتگ اتیں ۔ باز چکر ءَ کسھانی لوٹ ھم بیتگ بلے کارانی تب مٹ کنگ کپ ایت ۔ ”

تامر ءِ تہ ءَ کجام دمگانی جاور دیم ءَ آرگ بوتگ انت اے جست پسو ءَ آئی ءَ گوشتگ کہ “سیمسر ءِ تہ ءَکیچ ءُ بلیدہ ، بالگتر شاپک ، پنجگور ءَ گیشتریں شوٹنگ ھمے دمگاں بوتگ انت ، اے واستا کہ کسھے لوٹ بوتگ ءُ اے دراہ بلوچ ءِ جاور انت ۔ اے واستا بلوچ ءِ جاور انت کہ اے چکر ءَ ما ھما چیز دست جتگ انت کہ بلوچ ءِ گوم ءَ بوگ ءَ انت چوشکہ مئے گور ءَ بازیں گونڈو آپ ءَ کپ انت ءُ مر انت ، نشہ ءِ آماچ انت ءُ آ کسانیں جیڑھے ءَ ھسپتالے ءَ کائنت ءُ آیانی جیڑہ سرجم نہ بیت ، پہ تپ ءَ مر ایت ، پد ءَ مئے گور ءَ اڑاند چینچوک انت اے ھم پیش داشتگ کہ کجام کجام وڑیں اڑاند بلوچ ءِ دیم ءَ ھست انت ۔ ما یکجاہ کتگ ءُ کسھے ءِ دروشم ءَ آورتگ انت ۔”

“تامر ءِ مول ءُ مراد ءِ درگت ءَ تامر ساچ ءَ گوشتگ کہ ما وتی مارشتاں یا کہ چاگردی اڑ ءُ جنجالاں ، یا راجے ءِ وتی دود ءُ ربیدگاں در کومے ءَ سر کنوں یا وتی آدگہ ھند ءُ دمگاں ، متلب ما مکران ءِ جیڑھاں زوراں کوہ ءِ سلیمان ءَ پیش داراں بوت کنت آ اے جیڑھاں دیم پہ دیم نہ یاں یا چابھارے مردم ایشاں مار انت یا کہ درکومے ھمساھگے ، سرپد کن ایں ، پد ءَ مرچی رسانک ءِ دور انت کہ دری راجے ءِ چم کپ انت تئی تامرے چنڈے ءَ کہ گند انت بلوچ ءِ جاورھال چش انت ، پد ءَ ایشاں اگاں تو کسھی مارشتی رنگ ءَ بہ کن ئے آیاں گیشتر ٹچ کنت پرچاکہ کسہ ءُ زیمر اے لھتے ھنچیں تک ءُ پھناتاں کہ مارگ بنت شرتر پھمگ بنت ، تو ھر راج ءِ زیمر ءُ تامراں چارے اگاں زبان ءَ سرپد مہ بہ ئے بلے کسہ ءُ ندارگ ھنچوش پیشدارگ انت تو زان ئے چی بوگ ءَ انت ۔ ما ھم وتی تامراں ھمے نیت ءَ زوریں کہ وتی اڑ ءُ جنجالان وتی زمین ءِ وتی زبان ءِ ھمے رنگ ءَ درنگاز بہ کن ایں کہ آ بہ گنداں بلوچ ءِ جاورھال اے پیم ءَ گوزگ ءَ انت ۔ ”

تامر ساچ زھور پزل ءَ بلوچ راج ءُ تامر ساچاں ھمے کلوہ دیان ءَ گوشتگ کہ مئے بازیں تامرکار ھست انت کہ آ مئے بلوچی تامر ءَ بر انت ءُ ھندی ءُ انگلش یا پارسی تامرانی کساس ءَ چار انت ما ھمے جیڑاں کہ بلوچ ءِ وتی جیڑھاں بلوچ ءِ وتی زبان ، بلوچ ءِ وتی زمین ، البتہ تیکنیکی ھوالہ تو گپ جت کن ئے کہ تامرے رھبند انت ھمدپ بوت کنت ۔ بلے کسہ یاکہ جیڑہ یاکہ بلوچ ءِ مارشت گوں دگہ کوماں ھچبر یک بوت نہ کنت ۔ بلوچی تامر بلوچی وڑ ءَ بنت آیانی کساس ءَ بِھ نیا انت تو ھرچی کہ توانا بہ بہ ئے بلے ایش انت کہ جیڑہ تئی انت ، گریبے ءِ جیڑہ گریب ئیگ انت آیانی جیڑھاں پرک انت ۔ نوں ناکہ یک زبانے ، ناکہ زمین ئے ءُ ناکہ دودمانے جیڑھاں تو گوں آیاں ھمدپ کت نہ کن ئے ۔ دری راجانی تامراں بہ چار ایت ، چہ آیاں در بہ بر ایت بلے تامر وتی زبان ءِ ، وتی جیڑیانی سر ءَ جوڑ بہ کن انت-

تامر لنک

بلوچستان نیشنل پارٹی ءَ مچی ءَ سردار اختر مینگل ءِ گاڑی سر ءَ تراک، بازیں کارکنی ٹپی، بلے پارٹی ءِ رِد ءَ سردار اختر مینگل سلامت اِنت-

گیشیں ھالانی رِد ءَ شال سریاب ءَ بلوچ راجدوستیں رھشون سردار عطاءاللہ مینگل ءِ چارمی سالروچ ءَ برجم دارگ بیتگیں مراگش ءِ سر ءَ سردار اختر مینگل ءِ گاڑی تراک ءِ نشانگ کتگ بلے سردار اختر مینگل رکّ اِتگ، تراک ءَ چہ جانی تاوان ءِ گمان کنگ بیگ ءَ اِنت-

پارٹی اِھوالکار ءَ مُچی ءِ آسری ءَ بمب تراک ءِ پدری کتگ ءُ گوشتگ کہ سردار اختر مینگل ءِ گاڑی واتری ءِ واستا گوزگ ءَ بیتگ کہ آئی ءِ سر ءَ تراک ءِ نشانگ کتگ، پارٹی اِھوالکار ءِ رِد ءَ گاڑی ءَ گوزگ پد بیتگ بلے وشبھتی ءَ سردار اختر مینگل رکّ اِتگ – آیانی رِد ءَ تنی وھدے تراک ءِ جاگہ چہ ءَ ٹپی کارکناں چست کنگ ءُ نادُراھجاہ ءَ برگ ءَ اَنت آیانی تہ ءَ سکّیں ٹپی ھم ھوار اَنت – بلے تنی وھدے بیران ءُ ٹپیانی کچ زانگ نہ بیتگ اَنت-

نوکیں ھالانی رِد ءَ اے تراک وتکشے بیتگ ءُ وتکش تراک ءِ آسر ءَ دہ مردم بیران سی ٹپی بیتگ اَنت بلے گیشیں جانی تاوانانی گمان-

بلوچستان ءِ دمگ کیچ ءُ گوادر ءَ دو مردم آوار جنگ ءَ پد پوج ءَ بیگواہ کتگ انت ءُ اسلام آباد ءُ کراچی ءَ بیگواھیں مردمانی ھاتر ءَ زھرشانی نندانک برجاہ انت – اسلام آباد ءَ زھرشانی نندانک ءَ مروچی چل ءُ نُھ روچ سرجم ءُ کراچی ءَ زھرشانی نندانک ءَ بیست ءُ نُھ روچ سرجم بیتگ –

یک ستمبر ءَ بلوچستان ءِ دمگ کیچ ءِ مزن شھر تربت ءِ آسکانی ءِ میتگ ءَ پاکستانی لشکر ءَ یک ورناھے آوار جنگ ءَ پد بیگواہ کتگ –

دمگی مردمانی رد ءَ بیگواھیں ورنا ءِ پجار امیر بخش ء نبی بخش ءِ نام ءَ بوتگ کہ چہ وتی دکان ءَ آوار جنگ ءُ بیگواہ کنگ بیتگ-

کھول ءِ گشگ اِنت کہ آئی ءِ دزگیر کنگ ءَ پد آئی ءِ بابت ءَ ھچ وڑیں ھال ءُ اھوال دیگ نہ بوتگ انت۔

ھمے وڑ ءَ گوادر ءَ روکیں دشت ءِ جھمنندیں ورنا دور کنڈگ چیک پوسٹ ءَ پوج ءَ آوار جنگ ءَ پد بیگواہ کتگ-

دمگی مردمانی رد ءَ بیست ءُ چار اگست ءَ دشت شولی ءِ جھمنندیں محبوب ء عطاء اللہ دیم پہ گوادر ءَ روگ ءِ وھد ءَ دورکنڈگ چیک پوسٹ ءَ پوج ءَ آوار جتگ ءُ بیگواہ کتگ کہ چریشی ءَ پد آئی ءِ بارو ءَ ھچ وڑیں اھوال نیست انت-

زانگ بہ بیت بلوچستان ءَ بیگواھیانی درچ یکشل ءَ برجاہ انت ءُ دومی نیمگ ءَ بلوچ کھولانی زھرشانی زھرشانی ماں اسلام آباد ءُ کراچی ءَ برجاہ انت-

اھوالانی رد ءَ پاکستان ءِ بنجاھی شھر اسلام آباد ءَ گوستگیں چِل ءُ نُھ روچاں بلوچ یکجھتی کمیٹی ءُ بیگواھیں مردمانی کھولانی زھرشانی نندانک برجاہ انت-

اسلام آباد ءِ زھرشانی ءَ دو ماہ سرجم بوگ ءَ انت بلے اود ءَ انتزامیہ ءِ رویش انگت ءَ مٹ نہ بوتگ انت ءُ کھول پریس کلب ءِ دیم ءَ روگ ءَ انگت ءَ ھِلگ نہ بیتگ انت-

کھولاں انسانی ھکانی گل، سیاسی پاٹی ءُ چاگردی مھلوک ءَ گوں دزبندی کتگ کہ آ بے رھبندیں رویش ءِ ھلاپ ءَ مئے توار جوڑ بہ بنت ءُ مارا پُرایمنیں رنگے ءَ نندنگ ءَ بیل انت-

ھمے وڑ ءَ کراچی پریس کلب ءِ دیم ءَ بیگواھیں زاھد علی کھول ءَ ھوار دگہ کھولانی زھرشانی نندانک ھم برجاہ انت –

ھمے وڑ کراچی ءِ جتا جتائیں جاھاں لھتے روچانی توک ءَ بازیں ورناہ بیگواہ کنگ بیتگ انت آیانی تہ ءَ ماری پور ءُ لال بکھر ھاکس ءَ شیراز بلوچ، سیلان بلوچ، سرفراز بلوچ، رمیز بلوچ، رحیم بخش بلوچ ءُ رھمان بیگواہ کنگ بیتگ انت-

ھمے وڑ چہ ملیر ءَ بالاچ بلوچ ءُ صادق مراد ءِ کھول ھم کراچی پریس کلب ءِ زھرشانی نندانک ءَ ھوار انت-

بلوچستان ءَ ھوار دگہ جاھاں بلوچ مھلوک ءِ آوار جنگ ءُ بیگواہ کنگ ءِ درچانی توک ءَ کمی نیتکگ بلکیں ھمک روچ اے جاورانی تہ ءَ ترندی آرگ ءُ ورنا گرگ ءُ بیگواہ کنگ بوگ ءَ انت-

بلوچستان ءَ انٹرنیٹانی بندش یک ماھے ءَ گیش برجاہ بیتگ ءُ چریشی ءَ لس سیاسی مھلوک ءَ سرکار ءِ سر ءَ سکا ترندیں ایراد گپتگ ءُ گوشتگ سرکاری وتی رِٹ ءَ برجاہ داشت نہ کنت چریشی ءِ سبب ءَ آ لس شھری ءُ واپاری مھلوک ءَ تاوان دیگ ءَ انت-

مستونگ ءَ انٹرنیٹ ءِ بندش دو ماہ سرجم بوتگ ، وھدیکہ ھزدار ءَ سرکاری ڈیڈ لائن ءِ ھلاس بوگ ءَ پد پد ءَ انگت ءَ انٹرنیٹ سروس پچ کنگ نہ بوتگ ۔

گوستگیں روچ ءَ یک ستمبر ءَ مستونگ ءَ انٹرنیٹ سروس کمے وھد ءَ پچ کنگ بوتگ کہ ایشی ءِ سر ءَ شھری آں امیت درشان کتگ کہ 31اگست ءَ پد اے سروس دائمی رنگ ءَ پچ کنگ بیت۔

البت لھتیں کلاک ءَ پد اے سروس پد ءَ بند کنگ بوتگ کہ ایشی ءَ چہ شھریاں امیتی درشان کتگ بوتگ ۔

انٹرنیٹ بند بوھگ ءِ سبب ءَ نودربر سک باز وانگ ءُ زانگ ءِ جنجالاں گوں آماچ انت ۔ آ نہ ایوک ءَ آن لائن کلاس، داخلہ فارم، اسکالرشپ ءِ درھواست ءُ وانگ ءُ زانگ ءِ ساماناں چہ زبھر انت بلکیں آ دگہ المی وانگ ءُ زانگ ءِ کارانی تہ ءَ ھم جنجالانی آماچ انت۔

ھمے رنگ ءَ لس شھری آن لائن بینکنگ، روزگار ءِ درچ، ءُ جاورھال ءُ دگہ ھمک روچی کاراں سکیں جنجالانی دیمپانی انت-

اے بندش ءِ سبب ءَ نہ ایوک ءَ وانگ ءُ زانگ ءِ بلکیں چاگردی ءُ زرکاری پڑ ھم سک باز تاوان دیگ بوگ ءَ اَنت۔

شھری ءُ مستونگ نودربر فورم ءَ سک باز لوٹ کتگ کہ انٹرنیٹ سروس زوت ءُ دائمی ءِ رنگ ءَ پچ کنگ بہ بیت دانکہ نودربر ءُ شھری وتی وانگ ءُ زانگ ءُ ھمک روچی کاراں ابید جنجالاں برجاہ بہ دار اَنت۔

دومی نیمگ ءَ ھزدار ءَ انٹرنیٹ بند برجاہ اِنت۔ اُستانی سرکار ءِ نیمگ ءَ چہ داتگیں پرمانانی رد ءَ انٹرنیٹ سروس تاں اگست ءِ ماہ ءَ بند بوگی بیتھ بلے ڈیڈ لائن ءِ سرجم بوھگ ءَ ابید ھم سروس ءِ پچ کنگ نہ بوتگ۔

کارمرز کنوکانی رد ءَ اگست ءِ ماہ ءَ سرجمیں بلوچستان ءِ وڑ ءَ ھزدار ءَ ھم موبائل انٹرنیٹ سروس بند کنگ بوتگ ۔ یک ستمبر ءَ اے سروس بس یک کلاکے ءِ واستا پچ کنگ بوتگ ات کہ ایشی ءَ پد پد ءَ بند کنگ بوتگ ات۔

شھریاں گشتگ کہ کمے پچ کنگ ءِ وھد ءَ ڈیٹا پیکج کہ زرتگ بیتگ بلے دوبر بند کنگ ءِ سبب ءَ مئے زَر زوال بیتگ انت۔

زانگ بہ بیت کہ پاکستان ٹیلی کمیونیکیشن اتھارٹی ءَ بلوچستان سرکار ءِ گوشگ ءِ سر ءَ سرجمیں بلوچستان ءَ موبائل انٹرنیٹ سروس مھتل کتگ۔

پی ٹی اے ءِ نیمگ ءَ شنگ بوتگیں نوٹیفکیشن ءِ رد ءَ سرجمیں اگست ءِ ماہ ءَ انٹرنیٹ سروس مھتل دارگ بوتگ بلے ستمبر ءِ بندات ءَ پد ھم بلوچستان ءِ بازیں دمگاں انگت ءَ انٹرنیٹ سرجمی ءَ پچ نہ بوتگ۔

آوار اُن مھِر

نبشتہ کار: بِنتُل بلوچ

دی بلوچستان پوسٹ

“گوں تئی جُنزگ ءَ زندگی گیمریت
مھلباں گوات بارت”
“تو کہ لڈئے چداں رنگ نادُراہ بنت
ساہگاں گوات بارت”

ساھگ : بگند ئے من اِنچو وھد اِنت ھاموش بوتگاں، پہ تو لبزے اوں نبشتہ نہ کُتگ، بگند ئے تو جیڑئے کہ من گوں وتی دست گٹی آں دل گوش آں بلئے اِناں چوش نہ اِنت. من باز رند ءَ کَلم دست ءَ کُتگ پہ نبشتہ کنگ ءَ بلئے کُت نہ کُتگ، نِزور بوتگاں.

ھو شنکاں: من زاناں نزوری پہ من ءَ شات نہ بیت ترا ءُ گُڈی تْران ءَ تو دست سر ءَ ایر کُت ءُ گُشت نِزور بوھگی نہ اِنت، گشئے دل ءَ زانت
من ءَ پھِل کن برے برے من ءَ پتو زھیر کنت، پہ تئی بچکندگ آں، پہ تئی تْراناں ، توار ءَ، مھراں-

“کسے ہمراہ منی نئیکہ من ایوکاں
روچ ھست انت نہ شپ”

مھروان : آ روچ ءَ تو اَچ من رَپت ئے، گشئے من چورا بوتاں، ھردیں من سَر بوت آں ءُ منی چم ترا کَپت انت گڑا من بے سَمائی ءَ گام تیز کُت انت ءُ اَتک آں، تئی سَر زُرت وتی کُٹ ءَ ایر کُت، تئی دیم ءِ پُلک من وتی چادر ءَ گوں ساپ کُت آں، تئی چم ءِ مچاچ اوں بوسہ دات انت، تئی چمانی سَرا دست ایر کُت ترا پہ مھر ءِ نگاھے چار اِت ءُ منی چمانی اَرس شیپ گِپت انت، تئی دیم ءِ سَر ءَ کپتاں، من ساپ کُت آں کہ تو مہ زان ئے من گریوگ ءَ آں انوں،
من ترا توار پِر جَت
“ ساہ، بچار کئے اَتکگ “

اڑے من ءَ مرچی تو من ءَ ھم چارگ ءَ نہ ئے، بچار پد ءَ لُنٹ کن آں، کلاگ مہ زور من ءَ، من کند اِت بلئے چاراں تو چارگ ءَ نہ ئے من ءَ، تو کندگ ءَ ھم نہ ئے دل ءَ آہ یےِ چست بوت ءُ من ترا امبازاں زُرت وتی ءُ گریت ءُ گُشت من ءَ چورہ کُت ناں، ءُ پد ءَ ترا گوں سُھریں ءَ پُلاں رُکست کُت ءُ مئے مھر ءِ چادر تئی امانت کُت۔

“تئی جتائی توارے کہ مانا نہ بیت
گم توانے تئی ھچ دروشم نہ گیپت
چونیں تھنائی یےِ شنگتہ ھلکہ ءَ”

مِھر بنی آدام ءَ ھچ بھر جتا کت نہ کنت ھمے مِھر انت کہ من ءَ تئی نزیک ءَ کن انت ترا یات کن انت ترا امباز کن انت، بس تھنا ھمے گوش آں کہ اگاں ھردیں من ترا یات اتکاں گڑا بس تھنا چَنکے ھاک پہ من شھار ءُ بہ گوش بِنتُل زمین ءَ اَچ کس بے مھر بوت نہ کنت-

آوار اُن مھِر

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

بلوچستان ءَ یک نیمگے کھول وتی بیگواھیں مردمانی یل کنائینگ ءِ ھاتر ءَ دگ ءُ پریس کلبانی دیم ءَ نشتگ ءُ زھرشانی کنگ ءَ اَنت ءُ زورانسری آوار جنی ءِ بند کنگ لوٹ ءَ کنگ ءَ اَنت بلے دومی نیمگ ءَ ھمکروچ بلوچستان ءَ زورانسری آوار جنی ءِ رپورٹ نکش بیگ ءَ اَنت ھمے وڑ چہ ھب چوکی ءَ دگہ دو ورنا آوار جنگ ءُ بیگواہ کنگ بیتگ اَنت-

چہ ھب چوکی ءَ دو ورنا آوار جنگ ءُ بیگواہ کنگ بیتگ اَنت کہ آیانی پجّار شاہ نواز ء حاتم بلوچ، آواران ءِ دمگ توبو کاڈ جھاؤ ءِ جھمنند اِنت، سی یک اگست ءِ شپ ءَ نادُراھجاہ ءَ چہ واتری ءَ ھب چوکی ءِ نزیک ءَ دارگ بیتگ ، آ پاکستانی پوج ءَ آوار جنگ ءَ پد بیگواہ کتگ-

ھمے شپ ءَ عنایت بلوچ ء بشام کہ کیچ ءِ دمگ چہ ڈنڈر مادگ کلات ءَ سیادی دار اِیت مزدوری کنت، کہ آ ھم چہ ھب چوکی ءِ دمگ بھوانی ءَ آئی ءِ لوگ ءَ چہ آوار جتگ-

تنی وھدے آیانی درگت ءَ ھچ وڑیں ھال نیست-