TBP Balochi

سر بیتگیں ھالانی رد ءَ کیچ ءِ بنجاھی شھر تربت ءِ بازیں جاھاں سُھرک ءِ نادراھی شنگ ءُ تالان بیتگ، اے نادراھی ءَ بازیں زھگ آماچ بیتگ اَنت –

مھلوک ءَ دمگ ءِ جانسلامتی ءَ را ھال سر کرتگ ءُ گوشتگ کہ دمگاں سُھرک ءِ نادراھی شنگ ءُ تالان بیتگ ءُ اشی ءِ گر ءُ دار کنگ بہ بیت کہ تنی وھدی بازیں زھگ ھمے نادراھی ءِ آماچ اَنت-

نادراھی تربت ءِ ھند آبسر ءِ میتگ شاہ آباد ءُ آسکانی بازار ءَ سھرک ءِ نادراھی شنگ ءُ تالان بیتگ –

نادراھی ءِ ھال ءِ سر بیگ ءَ مکران ڈویژن ءِ کوآرڈینیٹر ڈاکٹر فاروق رند ءَ دمگاں تر ءُ تاب کرتگ ءُ نادراھانی چار ءُ ٹپاس کرتگ اَنت –

ھمے وھد ءَ ای پی آئی کیچ ءِ اے ایس وی اللہ بکش بلوچ، سول ڈسپنسری بلوچی بازار آبسر ءِ انچارج سبزل خان کولواھی، پاکستان پیرا میڈیکل اسٹاف ایسوسی ایشن کیچ ءِ گوستگیں سروک کامریڈ باقی بلوچ ھوار بیتگ اَنت –

آئی ءَ آباد آپسر ءِ نادراھانی بارہ ءَ چار ءُ ٹپاس کرتگ اَنت ءُ ھمے وھد ءَ ای پی آئی مکران ڈویژن ءِ آفیسر ڈاکٹر فاروق رند ءَ سول ڈسپنری بلوچی بازار آپسر ءَ پرمان کرتگ ءُ گوشتگ کہ دلجمی ءَ شاہ آباد آسکانی بازار ءَ ھما مردم کہ نادراھی ءِ آماچ اَنت آیانی جاندراھی ءَ بہ کنت ءُ ھرکسے ءَ کہ اے نادراھی ءِ مانشان ءِ گمان اِنت آئی ءِ ھون ءِ ٹِسٹ کنگ بہ بنت –

ناشناسیں مردماں بلوچ مسنگ پرسنز ءِ بنجل ءِ پُروشگ ءِ جُھد کتگ – ماما قدیر

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ ھبدہ روچ سرجم بوتگ – نیشنل پاٹی ءِ کلانیں رھشون میر عبدالغفار قمبرانی ءُ دگہ مردماں بنجل ءِ تر ءُ تاب کرتگ ءُ بیگواھیں مردمانی کھولانء گون ءَ دلپدردی درشان اتگ –

وائس پار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ گوستگیں شپ ءَ ناشناسیں مردماں گار ءُ بیگواھیں مردمانی واستا جوڑ کرتگیں بنجل ءِ تمبو کروتکگ ءُ گوں وت برتگ – آئی ءِ گوشتگ ما درستاں زان ایں کہ اے چونیں مردم بوتگ انت –

ماما قدیر بلوچ ءِ گوشگ ات کہ اے وڑیں زوردستانی زوردستی ءَ من وتی زھرشانی ھلاس نہ کناں، ھرکس ءَ ھرچی کنگی انت بہ کنت بلے ما وتی زھرشانی ءَ برجاہ داریں ءُ اے زھرشانی بنجل ھچ وڑ ءَ بند کنگ نہ بیت اِنت –

زانگ بہ بیت اشی ءَ پیش ھم باز براں وی بی ایم پی بنجل سوچگ ءِ وئیل دیما اتکگ انت –

سر بیتگیں ھالانی رد ءَ کیچ ءِ دمگ بلیدہ میناز ءَ لس مھلوک ءِ نیمگ ءَ یاسر ظفر ءُ اسماعیل ء ابراھیم ءِ کوش ءِ ھلاپ ءَ زھرشانی کنگ بیتگ –

زھرشانی بلیدہ میناز ءَ بندات بیتگ ءُ بٹ ءَ پولیس ءِ کارگس ءِ دیم ءَ زھرشانی کنوکاں نندانک جتگ ءُ نودربر یاسر ظفر ءُ اسماعیل ابراھیم ءِ کشندھانی دزگیری ءِ لوٹ کرتگ اَنت –

زھرشانی ءَ لس مھلوک ءَ بازیں کَچے ءَ بھر زرتگ ءُ نبشتگیں تاکانی سر ءَ ھردوکیں بیران بیتگیں مردمانی انساپ ءِ دیگ ءِ بارہ ءَ نبشتگ بیتگ اَنت –

مھلوک ءِ گوشگ اِنت کہ اُستانی سرکار بے سوب اِنت ءُ دمگ ءَ کُشت ءُ ھون گیش بیتگ اَنت ءُ یک نودربرے وتی ھند ءَ ایمنی ءَ نشت نہ کنت –

زانگ بہ بیت یاسر ظفر نُھ مئی ءَ بلیدہ ءَ ناشناسیں مردمانی تیرگواری ءَ بیران بیتگ اَت –

یاسر ظفر کراچی شھدربرجاہ ءِ نودربرے بیتگ کہ آ موکلانی وھد ءَ وتی ھنکین ءَ شتگ بیتگ –

یاسر ظفر ءِ کوش ءِ پژدر ءَ مھلوک ءِ زھر ءِ درشان گیش بیتگ اَنت کہ آیانی گوشگ اِنت سلاہ بندیں مردم کاینت ءُ مردماں مُپت ءِ ھدا جنگ ءُ کُشگ ءَ اَنت –

یاسر ظفر ءِ کوش ءِ بارہ ءَ دمگ ءِ انتزامیہ ءَ تنی وھدی ھچ گپ دیم ءَ نیاؤرتگ ءُ نانکہ دگہ جرمکار دزگیر کنگ بیتگ اَنت –

ھمے وڑ ءَ کیچ ءِ بنجاھی شھر تربت ءَ دو مئی ءَ ناشناسیں مردمانی تیرگواری ءَ اسماعیل ء ابراھیم بیران بیتگ اَت –

ناشناسیں مردمانی دست ءَ کُشگ بیتگیں ھردوکیں بیران بیتگیں مردمانی کُشندھانی دزگیری کنگ ءِ لوٹ کنگ بیگ ءَ اَنت –

ھمے رنگ ءَ بلوچ یکجھتی کمیٹی کیچ ءَ ھم وتی پیس بک تاک ءَ شنگ کرتگیں درشانی ءَ گوشتگ کہ ھردوکیں مردمانی کُشندہ گرگ بہ بنت ءُ آئی ءَ اے وئیل ایر جتگ –

سر بیتگیں ھالانی رد ءَ روکپتی بلوچستان ءِ دمگ کسرکند ءَ ھواریں دمگ ھمیری ءَ ایرانی سپاہ ءِ میان ءَ جنگ ءُ چوپ ءَ جنگ بیتگیں دو بلوچ سلاہ بندیں مردمانی جون تنی وھدی ایرانی سپاہ ءَ کھول ءِ گور ءَ نہ رسینتگ اَنت –

کھول ءِ گوشگ اِنت مئے جون تنی وھدی دیگ نہ بیتگ اَنت ءُ ایران ءِ انتزامیہ ءَ جون وتی گور ءَ داشتگ اَنت ءُ آ جونانی دیگ ءَ انکاری کنگ ءَ اِنت –

ایرانی سپاہ ءِ گوشگ اِنت کہ جوناں ھما شرت ءَ دے آں کہ جون مئے کارندھانی جاڑیگ بیگ ءَ کل ءُ کسارات ءُ دگہ اکس برداری، فلم برداری کنگ نہ بیت اِنت –

روکپتی بلوچستان ءَ بندوکیں بلوچ فعالین ءِ گوشگ اِنت گمان ھمیش اِنت کہ اے جون زانگول کنگ بیتگ اَنت چریشی ءَ ایرانی سپاہ اے جوناں کھولانی گور ءَ رسینگ ءَ نہ اِنت – بلوچ فعالین ءَ گوشتگ کہ انسانی ھکانی کانود ءِ رد ءَ اے جون کھولانی دست ءَ دیگ بہ بنت ءُ آ وتی واھشت ءَ اے جوناں کل کت کن اَنت باید سرکار اے جوناں کھولانی دست ءَ بہ دنت –

زانگ بہ بیت آدینگ ءِ روچ ءَ کسرکند ءَ پانزدہ میل دوری ءَ ھُمیری نامیں میتگے ءَ سلاہ بندیں مردمانی ءُ ایرانی سپاہ ءِ میان ءَ جنگ ءُ چوپ بیتگ اَت –

دمگی مردمانی رد ءَ جنگ سھب ءِ ساھت چار ءَ بہ گر داں ساھت یک ءَ برجاہ بیتگ، جنگ ءَ دو کسانی کُشگ ءِ جار ایرانی سپاہ ءَ درشان کتگ ءُ وتی یک کارندھے ءِ زدگ بیگ ءِ ھال شنگ کرتگ –

جنگ ءُ چوپ ءَ ایرانی سپاہ ءِ میان ءَ بیران بیتگیں مردمانی پجار مھراب سلاھی ءُ نعیم رئیسی ءِ ناماں زانگ بیتتگ اَنت کہ ھردُک سلاہ بندیں گلے ءَ بندوک بیتگ اَنت –

بلوچستان ءِ بنجاھی شھر شال ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چارھزار ءُ سَے سد ءُ شانزدہ روچ سرجم بوتگ – شیعہ رھشون مقصود احمد ڈومکی ءَ بنجل ءَ اتکگ ءُ بیگواھیں مردمانی کھولانی گون ءَ دلپدری درشان اتگ –

مقصود احمد ڈومکی ءِ گوشگ ات کہ ما لوٹ ایں مردمانی آوارجنی ءِ درچ بند بہ بیت، پاکستان ءِ تہ ءَ کانود ءُ رھبند ھست انت- اے جنگل ءِ نہ انت کہ کانود ءِ مہ بیت – اگاں ریاستی ادارہ وت کانود ءُ رھبندانی لگتمالی ءَ کن انت، وتی آمیدگسانی اوست ءَ پروش انت گڑا لس مردم چون اے آمیدگسانی سر ءَ اوست داشت کن انت –

آئی ءِ گوشگ ات کہ من ھمے پھم آں اگاں کسے ءَ جُرمے کتگ گڑا ریاست ءِ گور ءَ کانود ءُ ادارہ ھست انت، آھاں آمیدگس ءَ بہ بر انت ءُ جُرم ءَ پدر بہ کن انت – کانود ھمے گوش ایت تاں ھما وھد ءَ امیدگس آئی ءِ سر ءَ جرم ءَ سابت نہ کنت آ ھچ وڑ ءَ کتکار لیکگ نہ بیت –

ھمے وھد ءَ ماما قدیر بلوچ ءِ گوشگ ات کہ بلوچ زالبولاں راجدپتری ءِ تہ ءَ دیمداری ءِ پدر کنگ ءِ سرجمی ءَ جھد کنگ بیتگ – شانزدھمی سدی ءَ بگر تاں بیست ءُ یکمی سدی ءَ تاں زالبولانی کرد چی بیتگ آئی ءَ دیم ءَ آرگ ءَ بنداتی جھد ھمے بوتگ کہ ناسرجمی سابت بیتگ ھما درچی زباناں ھما کہ زالبولی کرد ءَ چہ سرجمیں آشنائی ءَ رسینگ ءَ جاڑیگ انت، مھناز بہ بیت یا ھانی یا بانڑی یا بی بی بیو گراناز بہ بیت یا چھگلی، سیمک بہ بیت یا گل بی بی فرزانہ بہ بیت یا ماھرنگ، شکر بی بی بہ بیت یا بانک کریمہ اے ھما کِردانی واھند انت اگاں آھانی داستان بلوچستان ءِ دودمانی رژنائی ءَ چہ درکنگ بہ بنت تو بوت کنت تہ ءَ جان ءِ بہ بیت –

آئی ءِ گوشگ ات کہ اے کرد ھکانی جنگ ءَ دیمروی کنان ءَ چاگردی بنھِشت ءَ گوں جنگ کنگ زانت توار چست کنگ پہ تمردی ءِ گھگیری پاسداری کنان ءَ سفارتکاری ءِ پرز ءَ پیلو کن انت –

آئی ءِ گوشگ ات کہ بیست ءُ یکمی کرن ءَ دنیاء راج ءُ ڈیھانی لَٹ شاپی کنت کہ دیمروئی لوٹوکیں چاگرد بنیادی مھکمی ءُ مدامی دیمروئی رؤگ ءِ راہ راست کنگ ءِ ھاتر ءَ المی انت کہ زالبول ءِ دامن ءَ پجار کش ءَ بوشتارین ایت –

سر بیتگیں ھالانی رد ءَ مروچی آدم حقانی اکیڈمی آواران کولواہ ءِ چیردستی ءَ ائید ءِ وشیانی درچ ءَ ساز ءُ زیملی دیوان بیتگ –

دیوان ماڈل ھائی اسکول آواران ءَ برجم دارگ بیتگ، دیوان ءَ بازیں کچے ءَ مھلوک ءَ بھر زرتگ –

دیوان ءَ ساز ءُ زیملی مھلوک ءَ ھوار شائر ءُ کواساں ھم بھر زرتگ ءُ دیوان ءِ گوں ساز ءُ زیملی، شائری نیاد ءَ بیتگ –

زانگ بہ بیت بلوچستان ءِ تیادپی دمگاں ھم ائید ءِ وشیانی روچاں گوست ءَ دیوان برجم دارگ بیتگ اَنت دیواناں بھر زیروکیں مردمانی گوشگ اِنت کہ بلوچستان ءَ دگہ زند ءِ آسراتی نیست اَنت بلے ائیدانی نیاد ءُ دیوان کاینت گڑا گُمانے ءَ دل ءَ تاھیر بکش اَنت –

آیانی گوشگ اِنت کہ بلوچستان ءِ جاور پیش ءَ گیش ناوش اَنت کہ ھمک در ءَ مھلوک ءِ ناوشیانی آماچ اَنت تر ءُ تاب ءُ دگہ زند ءِ آسراتیانی درایگ ءَ مھلوک باز کم در کیت اِنت –

سر بیتگیں ھالانی رد ءَ بولان پیر گیب ءَ دو ورناہ جانشودگ ءِ میان ءَ آپ بُک اتگ ءُ بیران بوتگ انت –

گیشیں ھالانی رِد ءَ بلوچستان ءِ دمگ بولان ءَ سیل سواد ءِ دمگ پیرگیب ءَ دو ورناہ جان شودگ ءِ میان ءَ آپ ءَ بک اتگ ءُ بیران بوتگ انت –

بیران بوتگیں ورنایانی پجار اسامہ جاوید ء محمد جاوید ءُ اسداللہ ءِ ناماں زانگ بیتگ انت –

ھردو ورنایانی جون چہ آپ کشگ ءُ ایدھی ایمبولینس ءِ کمک ءَ دمگی نادراھجاہ ءَ سرکنگ بوتگ انت –

ھمے وڑ ءَ شال ءَ یک جونے دزکپتگ، جون چِست کنگ بیتگ ءُ نادراہ جاہ ءَ سر کنگ بیتگ –

گیشیں ھالانی رد ءَ شال ءِ دمگ سیٹلائٹ ٹاؤن ءَ مانشجاہ ءَ یک جونے دزکپتگ، جون چِست کنگ ءُ گیشیں چار ءُ ٹپاس ءِ واستا سول نادراہ جاہ ءَ سر کنگ بیتگ –

زانگ بہ بیت بلوچستان ءِ جتا جتائیں جاھاں اے وڑیں جون یکشل ءَ دزکپگ ءَ اَنت آیانی پجار نہ بیگ ءَ اَنت چریشی ءِ پژدر ءَ جوناں ابید ڈی این اے ٹیسٹ ءَ جوناں بے وارس کنگ انتزامیہ ءِ نیمگ ءَ کَل ءُ کسارت کنگ بیگ ءَ اَنت –

انسانی ھکانی ادارھاں ھوار سیاسی پھناتانانی گمان ءِ رد ءَ جون بیگواھیں مردمانی بیت کن اَنت کہ آیاں زانگول کن اَنت ءُ چگل اش دے اَنت کہ آیانی پجار کنگ باز مُشکل اِنت –

لونی دگ ءَ گوستگیں ڈی آئی جی حیدر بگٹی ءِ گِس ءِ سر ءَ اُرش کرتگ، اُرش ءَ آئی ءِ جند بچ اِتگ یک کارمندے ٹپی بوتگ – دوستین بلوچ

سربوتگیں ھالانی رِد ءَ گوستگیں شپ ءَ ناشناسیں مردماں سبی ءَ لونی دگ ءَ گوستگیں ڈی آئی جی حیدر بگٹی ءِ گِس ءِ سر ءَ دز بمبے چگل داتگ – اُرش ءَ یک کارمند ءِ ٹپی بوتگ ءُ ڈی آئی جی ءِ جند بچ اِتگ –

ٹپی بوتگیں کارمند ءِ پجار شوکت ء بارام خان ءِ نام ءَ بوتگ – ارشکار درآیگ ءُ رؤگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچ ریپبلکن گارڈ ءِ جارکش دوستین بلوچ ءَ رسانکدراں وتی شنگ کرتگیں درشان ءِ تہ ءَ ڈی آئی جی گِس ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ مئے سرمچاراں گوستگیں شپ ءَ بلوچستان ءِ شھر سبی ءَ لونی دگ ءَ گوستگیں ڈی آئی جی ءُ چیریں ادارھانی ھستیں ھاسیں کارندہ حیدر بگٹی ھما وھد ءَ دزبمب اُرش ءِ نشانگ کتگ کہ آ وتی گِس ءَ ساڑی بوتگ ءُ اُرش ءَ حیدر بگٹی ءِ جند بچ اِتگ بلے آئی ءِ کارندہ شوکت ء بارام خان سک باز ٹپی بوتگ-

جارکش ءَ گْوشتگ کہ مئے نشانگ جی آئی ڈی بوتگ پرچاکہ اے مرد پولیس ءِ کار ءَ ریٹائرمنٹ ءَ رند ایم آئی ءَ لگتگ ءُ بلوچ راج ءِ بگیری ءَ بازیں سلکاریاں ھوار بوتگ – جارکش ءَ دمگ ءِ درسیں بلوچاں چہ لوٹ کتگ کہ آ حیدر بگٹی ءَ چہ دور بہ بہ اَنت اشی ءِ سر ءَ کجام وھد ھم اُرش بوت کنت – آئی ءَ گوشتگ کہ حیدر بگٹی ءَ ھوار سرجمیں راج ءِ دشمن مئے نشانگ ءِ تہ ءَ اَنت-

گڈسر ءَ جارکش دوستین بلوچ ءَ گوشتگ کہ مئے جھد ڈیھ ءِ آجوئی ءَ تاں برجاہ مان انت –

سر بیتگیں ھالانی رد ءَ کیچ ءِ دمگ بلیدہ زامران ءَ نامی ئیں عالم دین مولانا عبدالمجید بلوچ مروچی سھب ءَ الندور بلیدہ ءَ بیران بیتگ –

مولانا عبدالمجید بلوچ نامی ئیں عالم دیناں بیتگ ءُ زامران ءَ نامی ئیں عالم دین مولانا عبدالغفار زامرانی ءِ نزیکیں وارسے بیتگ –

آئی ءِ بارہ ءَ گوشگ بیتگ کہ آ دمگ ءَ شرعی سلاہ ءُ تراناں دیم ءَ بیتگ ءُ مزنیں عالم دیناں آ مزنیں نگاھاں چار اِتگ –

آئی ءَ بلوچی، عربی، فارسی، اردو ءُ براھوئی ءِ زبان ءِ زنوگریں مردمے بیتگ آئی ءَ سعودی عرب ءِ نامی ئیں شھدربرجاہ جامعہ الحدیث الخیریہ ءَ وتی وانگ سرجم کرتگ –

آئی ءَ اود ءَ اسلامک لاء ءِ ڈگری ءِ گرگ ءَ پد ادارہ ءِ سروک مفتی اعظم سعودی شیخ ابن ءِ دست ء راست بیتگ –

آ بازیں وھداں شکر ءِ نادراھی ءُ میدہ ءِ نادراھی ءَ ھوار بازیں نادراھیانی آماچ بیتگ ءُ چریشانی سوب ءَ مروچی آئی ءَ اے کوڑیں امروز یل کرتگ –

سر بیتگیں ھالانی رد ءَ شال ءَ ھواریں دمگ چمن ءَ ناشناسیں مردمانی تیرگواری ءَ بیران بیتگیں الیاس ءِ کھول ءِ نیمگ ءَ زھرشانی –

زھرشانی کنوکاں ڈپٹی کمشنر چمن ءِ کارگس ءِ دیم ءَ نندانک جتگ ءُ نشتگ اَنت –

کھول ءِ گوشگ اِنت گوستگیں شپ ءَ ڈُزاں تیرگواری کرتگ ءُ الیاس کُشتگ، آیانی گوشگ اِنت کہ زھرشانی نندانک ھما وھد ءَ برجاہ مان اِیت کہ کشندہ دزگیر کنگ نہ بنت –

زھرشانی کنوکاں مال دگ ءَ ڈی سی کارگس ءِ دیم ءَ نندانک جتگ ءُ زھرشانی کنگ ءَ اَنت –

زانگ بہ بیت بلوچستان ءِ جتا جتائیں جاھاں تیرگواری وئیلاں مردم بیران بیگ ءَ اَنت کہ چریشی ءَ لس سیاسی ءُ چاگردی مردمانی گوشگ اِنت کہ سرکار شھریانی پھریزگ ءَ بے سوب بیتگ –

ھمے وڑ گوستگیں روچاں بلوچستان ءِ دمگ پنجگور ءَ ھم بازیں مردمانی جنگ ءُ زدگ بیگ ءِ ھال رسانکدراں شنگ بیتگ اَنت –

زھرشانی برجاہ اِنت زھرشانی بیران بیتگیں مردم ءِ کھول ءِ ھواری ءَ بازیں مردم ھوار اَنت، کھول ءِ گوشگ اِنت الیاس ءِ کشندہ دزگیر کنگ ءُ سزا دیگ بہ بنت –

آیانی گوشگ اِنت ھمک وھد ءَ چوشیں وئیل دیم ءَ آیگ ءَ اَنت کہ اے انیگیں سرکار بہ بیت یا گوست ءِ سرکار بہ بنت ھرکسی باریگ ءَ چوشیں وئیل دیم ءَ اتکگ ءُ آیگ ءَ اَنت –

آیانی گوشگ اِنت کہ سرکار لس مردمانی سر ءَ نگاھاں ایر کنت بلے دُز ءُ سلاہ بندیں مردم بازارانی تہ ءَ مانریچ اَنت ءُ مردماں کُشگ ءُ جنگ ءَ اَنت سرکار ءِ انتزامیہ ءَ دست چمان اَنت ءُ بس مارا چار ایت –