TBP Balochi

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ آماچ بوتگیں چِل ءُ سَے دگہ نوکیں کیس دیم ءَ اتکگ اَنت ءُ اے وھد ءَ کرونا وائرس ءَ آماچ بوتگیں درسیں مردمانی کچ بیست ءُ شش ھزار ءُ دوسد ءُ ھپتاد پنچ ءَ سر بوتگ اَنت-

بلوچستان ءَ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ دو شمبے ءَ ھشت سد ءُ شانزدہ مردمانی کرونا ٹیسٹ کنگ بوتگ اَنت کہ آھانی تہ ءَ بلوچستان ءِ بنجاھی شھر شال ءَ بیست ءُ سَے،کیچ ءَ شش، ھزدار ءَ پنچ، آواران ءَ چار، گوادر ءَ دو، پنجگور، کلات، مستونگ ءَ یک یک مردمے کرونا وائرس پدر بوتگ، چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ بیست ءُ شش ھزار ءُ دوسد ءُ ھپتاد ءُ پنچ ءَ سر بوتگ اَنت-

رپورٹ ءِ رِد ءَ گوستگیں بیست ءُ چار ادارانی میان ءَ یک سد ءُ دہ مردم وش بوتگ اَنت، وش بوتگیں مردمانی کچ نوکیں کیساساں ھوار سرجمی ءَ بیست ءُ پنچ ھزار ءُ نوزدہ انت-

رپورٹ ءِ رِد ءَ بلوچستان ءِ تہ ءَ کرونا وائرس ءِ نُہ سد ءُ شست ءُ دو نادراہ ھست انت ءُ آھانی تہ ءَ سِی نادراہ ہائی لاؤ آکسیجن فلور ءِ تہ ءَ الاج انت، وھدیکہ جھانی وبا کرونا وائرس نادراھی ءَ دوسد ءُ نود ءُ چار مردم بیران بوتگ اَنت ءُ بلوچستان کرونا نادراھی گیش تالان بوگ ءِ پنچ ٹک بیست ءُ شش درسد بوتگ-

کوپا امریکہ اولی گوازی برازیل ءُ دومی گوازی ءَ کولمبیا ءَ باج برتگ، پورو کپ ءَ چیک ریپبلک ءُ سولوکیا دو دو گول ءَ باج برتگ گوازی وتی نام ءَ کتگ انت –

کوپا امریکہ ءِ گوازی برجاہ انت مروچی اولی گوازی برازیل ءُ وینزیلا میان ءَ بوتگ ءُ دومی گوازی کولمبیا ءُ ایکواڈور میان ءَ بوتگ – اولی گوازی ءَ برازیل ءَ سَے گول ءَ وینزیلا ءَ چہ باج برتگ ءُ گوازی وتی نام ءَ کتگ وھدیکہ دومی گوازی ءَ کولمبیا ءَ یک گول ءَ ایکواڈور ءَ چہ باج برتگ ءُ گوازی وتی نام ءَ کتگ –

برازیل ءِ نیمگ ءَ چہ اولی گول گبرائیل ءَ دومی مارکینوس ءُ سیمی نیمار داتگ گوازی وتی نام ءَ کتگ وینزیلا ءِ نیمگ ءَ چہ ھچ گول کنگ نہ بوتگ وھدیکہ دومی گوازی ءَ کولمبیا ءِ لیبی ایڈوین ءَ یک گول داتگ گوازی وتی نام ءَ کتگ – کوپا امریکہ ءِ دیم ءِ گوازی ارجنٹینا ءُ چیلے ءِ ، پراگاؤ ءُ بولویا میان ءَ بوگ ءَ انت ـ

دومی نیمگ ءَ یورو کپ فٹبال گوازی مروچی اسکاٹ لینڈ، چیک ریپبلک، پولینڈ، سولوکیا، میان ءَ گوازی بوتگ وھدیکہ اسپین ءُ سویڈن ءِ میان ءَ گوازی مروچی گوازی بیت انت –

اولی گوازی اسکاٹ لینڈ ءُ چیک ریپبلک ءِ میان ءَ بوتگ کہ چیک ریپبلکن دو گول ءَ اسکاٹ لینڈ برتگ ءُ گوازی وتی نام ءَ کتگ، دومی گوازی ءَ پولینڈ ءُ سولوکیا ءِ میان ءَ بوتگ کہ پولینڈ ءَ یک گولے داتگ سولوکیا دو گول داتگ ءُ گوازی وتی نام ءَ کتگ وھدیکہ مروچیگیں روچ ءَ سیمی گوازی اسپین ءُ سویڈن ءِ میان ءَ ھم بوگ ءَ انت –

اولی گوازی ءَ چیک ریپبلکن ءَ دو گول باج برتگ دومی گوازی ءَ پولینڈ یک گول ءِ داتگ سولوکیا دو گول داتگ گوازی برتگ –

یورو کپ ءِ دیم ءِ گوازی ھنگری ءُ پرتگال ءِ میان پرنس پسکاس ءِ پٹ ءُ دومی الیانس ارینا ءِ پٹ جرمنی ءُ پرانس ءِ میان ءَ گوازی کنگ بیت انت –

زانگ بہ بیت یورو ٹونٹی ٹونٹی گوستگیں سال ءَ بوگی بوتگ بلے جھانی وبا کرونا وائرس ءِ سوب ءَ اے گوازی برجم دارگ نہ بوتگ بلے ھمے سال ءِ یازدہ جون ءَ اے ایونٹ بندات کنگ بوتگ ورلڈ کپ ءَ پد یورو کپ دنیا ءِ فٹبال گوازیاں چہ مستریں ایونٹ زانگ بیت کہ اشی ءِ تہ ءَ برآعظم یورپ ءِ بیست ءُ چار ٹیم دیم پہ دیم بنت – اے ایونٹ یازدہ جون ءَ بندات بوتگ ءُ تاں یازدہ جولائی برجم دارگ بیت انت اے ایونٹ ءَ سرجمی ءَ پنجاہ ءُ یک گوازی جتا جتائیں جاھاں کنگ بیت انت-

سربوتگیں ھالانی رِد ءَ بلوچستان ءِ بنجاھی شھر شال ءَ تیر گواری ءُ دگ ءِ وئیلاں یک مردمے بیران دوازدہ ٹپی بوتگ انت –

گیشیں ھالانی رِد ءَ شال ءَ ناشناسیں مردمانی تیرگواری ءَ یک مردمے ٹپی ءُ یکے بیران بوتگ –

ریسکو ءِ بنشون ءِ رِد ءَ شال ءَ سریاب مل ءِ نزیک ءَ ناشناسیں مردمانی تیرگواری ءَ ٹکری حمزہ ابابکی بیران بوتگ وھدیکہ دگہ یک مردمے ٹپی بوتگ – ریسکو ءَ ٹپی ءُ بیران بوتگیں مردم دست گپتگ شیخ زید نادراھجاہ ءَ سرکتگ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ –

دگہ وئیل ءِ گوستگیں روچ ءَ بلوچستان ءِ بنجاھی شھر شال ءَ دیم ءَ اتکگ کہ سیل سواد ءَ شتگیں مردمانی گاڑی ءِ چپی بوگ ءَ یازدہ مردم ٹپی بوتگ اَنت –

وئیل منگچر ءَ شیخ حاجی ھند ءَ دیم ءَ اتکگ کہ چہ شال خیصار جوھان ءَ رؤکیں گاڑی ءِ ٹائیر ترکگ ءِ سوب ءَ چپی بوتگ یازدہ مردم ٹپی بوتگ اَنت –
ٹپی بوتگیں مردمانی پجار طفیل احمد ء نبی داد، خلیل احمد ء نبی داد، عبدالعلی ء حاجی حضور بخش، غلام عباس ء عبدالحمید، غلام محمد ء محمد ابرار، عبداللہ ء حاجی اسلم، محمد زاہد ء سلطان محمد، الطاف احمد ء محمد نواز، نور احمد ء محمد اکرم، عبدالرزاق ء محمد اقبال ناماں چہ بوتگ انت – ٹپی بوتگیں مردم ھما دمان ءَ ار ایچ سی نادراھجاہ ءَ سر کنگ بوتگ انت اود ءَ ٹپانی درمان کنگ ءَ پد پہ گیشیں الاج ءِ ھاتر ءَ شال ءَ دیم دیگ بوتگ انت –

بلوچستان ءِ دمگ کیچ ءِ بنجاھی شھر تربت ءَ نیٹورکانی ھرابی ءِ واستا لس مھلوک ءَ برانزی سوڑ اِتگ ءُ نیٹورکانی کارگسانی بند کنگ جیڑ اِتگ –

گیشیں ھالانی رد ءَ مروچی تربت ءَ سول سوسائٹی ءِ رھشون ءُ باسکاں الوارد جیز کمیونیکیشن ءِ فرنچائز سیلز منیجر ءُ دگہ واکداراں گوں گند ءُ نند کرتگ، سیلز منیجر ءَ دیم ءِ ھپتگ ءَ نیٹورکانی گھتری ءِ سدکی داتگ ءَ چریشی ءَ پد کارگس ءِ بند کنگ ءِ گپ ھلاس کنگ بیتگ –

تربت ءَ ھمک وھد ءَ نیٹورکانی ھرابی ءِ سبب ءَ تربت سول سوسائٹی ءِ باسکاں ھمے سوڑگ کرتگ کہ اے کیمونیکیشناں بند کن ایں اشاں مھلوک سرجم ءَ دزکشی کنت ءُ چریشی ءَ نیٹورک کمیونیکیشن ءَ یک ھپتگے ءِ مھلت لوٹ اِتگ ءُ پد ءَ آیاں ھمے گپ ءِ سر ءَ سدکی داشتگ ءُ داں دیم ءِ ھپتگ ءَ وداری ءِ آسر ءَ گپ ءُ تران سرجم بیتگ –

دو شمبے ءِ سھب ءَ تربت سول سوسائٹی ءِ کنوینر گلزار دوست، کیچ سول سوسائٹی ءِ التاز سخی ءُ انجمن تاجران ءِ جنرل سیکرٹری غلام اعظم دشتی ءِ سروکی ءَ یک ٹولی ءَ وارد کمیونیکیشن کمپنی ءِ فرنچائز ءَ شتگ ءُ اود ءَ سیلز منیجر ءُ دگہ واکداراں گوں دُچار کپتگ اَنت –

اود ءَ نیٹورکانی ھرابی ءُ سول سوسائٹی ءِ زھرشانی شکایتانی بارہ ءَ مھلوک ءَ زھر ءِ درشان کرتگ ءُ شتگیں مردمانی گوشگ اِنت فرنچائز ءِ سدکی ءَ پد کارگس ءِ بندی ھلاس کنگ بیتگ ءُ گپ ءُ تران ءَ گپ گیشینگ بیتگ –

آیانی گوشگ اِنت کمیونیکیشن ءِ واکداراں نیٹورکانی ھرابی ءِ دور کنگ ءِ گامگیج نہ زُرت ءُ مھلوک ءَ آسراتی سرجم کنگ نہ بیت اَنت گڑا کیچ سول سوسائٹی ءُ انجمن تاجران ھوار بیت ءُ فرنچائز ءَ ایوک ءَ بند نہ کنت بلکیں شھر ءِ دراھیں جیز ءِ ٹاور بند کنگ بنت اِنت –

ھمے گپانی پژدر ءَ فرنچائز ءِ واکداراں گوشتگ کہ نیٹورکانی گھتری ءِ کار برجاہ اَنت ءُ شُمئے زھر ءِ درشان ءَ پد اے کار بندات کنگ بیتگ ءُ گوستگیں دو ھپتگاں باز گھتری اتکگ –

نیٹورک واکدارانی گوشگ اِنت تربت سیٹلائٹ ٹاؤن ءَ دگہ دو ٹاورانی کار برجاہ اِنت ءُ تربت ءِ دگہ جاھاں ھم ٹاورانی سر ءَ کار بندات کنگ بیت اِنت ءُ اشی ءِ برورد کارمرد کنوکاں دیم ءِ ھپتگ ءَ رس ایت اِنت –

سول سوسائٹی ءِ باسک ءُ رھشوناں گڈی سدکی ءَ فرنچائز ءِ منت گپتگ ءُ گوشتگ کہ ما امیت داریں کیمونیکیشن وتی کاراں بھتر کنت ءُ مھلوک ءَ شریں آسراتی رس ایت اِنت –

نبشتانک: ٹی ٹی پی ءِ دیمروئی ءُ بلوچ راج ءِ راجی جُنز

نبشتہ کار: گلزار یوسپزئی ءُ ماھگُل بلوچ

دی بلوچستان پوسٹ

بِہ گِند ئے 2020 ءِ سال چہ بازیں جیڑھاں دُچار کپان ءُ دنیا ءِ یک دزگٹّیں سالے بیتگ، ھمے سال ءَ دوھا ءِ منّگ نامہ ھم بیتگ چریشی ءَ اوگانستان ءَ ھوار کِر ءُ کش ءِ دمگی جاورال ھم یکشل ءَ تْرُندی ءَ بدل بُوان اَنت اگاں تیوگیں دمگ ءِ جاورال یکشل ءَ بدل بہ بنت ءُ پاکستان ءِ نام مئیت اِے کُجام ھساب ءَ نابُوتّنی گپے بیت؟ بلے اِے وھد ءَ لھتیں انچیں ھال ھست اَنت آ پہ پاکستان ءِ سرکار ءَ شر نہ اَنت۔اِے ھال چو اِے وڑ ءَ انت کہ سال 2020 ءَ چہ پنچ ءَ گیش کسان ءُ مزن سِلاھبندیں چیرجنگی گل گوں پاکستانی تالبان ءِ جُنز ” ٹی ٹی پی” ءِ بُنجاھی کمانڈ ءَ ھوار بیتگ اَنت چہ ھمیشاں “جماھت الاھرار، ھزب الاھرار، تھریک تالبان، ھکیم اُلہ گل، استاد الیم ھان گل، لشکر جھنگوی سندھ، شانی گل ءُ موسا گل ھوار اَنت۔ اگاں اِے دْراھیں تبکانی نپری، سیاسی ءُ جنگی ھاٹیگ یکجاہ ءُ ھوار بہ بنت گُڑا اِے چہ ٹی ٹی پی ءَ سک گیشتر بنت، بہ گِند ئے چریشی ءَ ٹی ٹی پی ءِ زور سے درجہ ود ایت۔ ھمے تیوگیں گلاں گْوستگیں سال ءِ دومی بھر ءَ ھستیں وھد ءِ ٹی ٹی پی ءِ سروک مُپتی نور ولی مسھود ءِ دیم ءَ منّگ زُورت۔

چہ بُنجاہ ءَ لھتیں انچیں ھال رسگ ءَ انت چہ اِے ٹوھیں یکمُشت ءُ تپاکی ءَ پد ٹی ٹی پی ءَ یک نوکیں دَورے گِندگ ءَ پیداک اِنت چریشی ءَ آ وت ءَ اوگان تالبان ءِ وڑیں بُنھِشتے اڈ کنگ ءَ دزگٹّ اَنت البت اِے درگت ءَ آ باز سوبمند ھم بوگ ءَ انت من گوں ٹی ٹی پی ءَ ھمگرنچیں بازیں مردماں رھوت کُت ءُ لھتیں ھال ءُ اھوال گپت کہ آیانی رِد ءَ اِے یکمُشتی رھبند ءِ ھیال ءُ سسّا جماھت الھرار (گْوست ءِ گل) ءِ سروک واجہ اُمر ھالد ھُراسانی ءُ واجہ مُپتی نور ولی ءَ داتگ اَنت ءُ تالبان ءِ رِد ءُ بند آنی ھساب ءَ اِے رھبند ءَ ”دلگی نظام“ گْوش اَنت کہ مانا ئِے ” ٹولی یا گل” اِنت۔

اُمر ھالد ھُراسانی ءِ نزیکیں کامریڈانی رِد ءَ اِے رھبند ءِ اڈ کنگ ءِ بُنکی مول ءُ مُراد ھمیش اَنت ٹی ٹی پی ءِ تہ ءَ دمگی امیر ءُ وتواھیں شھنشاھی ھلاس کنگ بہ بیت ءُ ھمے ”دلگی نظام“ ءِ آسر ءَ ٹَکری ایجنسی (ٹرائبل ایجنسی ) ءُ دمگاں امارات ءِ رِد ءُ رھبند ھلاس بنت ءُ اوگان تالبان ءِ وڑ ءَ گورنر ءُ آیانی چیر ءَ دمگی دمگدار بنت ءُ پد ءَ ھمے دمگدارانی چیر ءَ ”دلگی مشران“ بزاں جنگی ٹولی بنت ءُ ھر یکے وتی واجکار ءِ پنتاں منّ ایت ءُ آئی ءِ ھکم ءِ زمہ وار بیت۔ اے سرجمیں گورنرانی گل ماں دو بھراں، گوریچی آبند ءُ زِرباری آبند ءِ میان ءَ بھر کنگ بیتگ اَنت۔ ءُ گورنرانی ھر آبند ءَ شش نپری یک مجلِسے اڈ دیگ بیتگ ءُ ھمے شش نپری مجلِس ءِ کار گورنرانی رھشُونی اِنت کہ ھک ءُ انساپ بہ بیت ءُ چریشی ءَ دمگاں ھم ھَک رس اتگ کہ ھر دمگ ءَ راستیں جاھگیر اڈ دیگ بہ بیت۔ اِے مجلِس ءَ ھر آبند ءِ جیڑہ ھلاس کنگی انت چریشی ءَ گل ءَ ھم دیمروئی رس ایت ءُ سرجمیں گورنر ھم ھمے مجلِس ءِ جوابدار اَنت۔

اے وھد ءِ ھالانی رِد ءَ پشاور، باجوڑ ملاکنڈ، مردان، بنوں ءُ ڈیرہ اسمائیل ءِ گورنرانی نام رِد ءِ سر ءَ اُمر ھراسانی، کمانڈر شاھد اُمر، مپتی برجان، کمانڈر استاز الیم ھان ءُ ابو یاسر ءِ نام دیگ بیتگ اَنت اِے گورنرانی نامینگ ھم چہ بُنجاھی مجلِس ءَ بیتگ ءُ ایشاں ھوار کُمک گورنز، زرکاری کارمستر، دیمروئی کارمستر ءُ پَھم کارمستر(انٹیلیجنس وزیر) آنی نامینگ ھم سرجم کنگ بیتگ۔ بِہ گند ئے اُمر ھُراسانی گوں مھمند ایجنیسی ءَ سْیادی دار ایت ءُ چہ ایشی ءَ پیسر واجہ اُمر ھالد ھُراسانی کُمکار گُشاد ءُ جماھت الھرار ءِ واجکار ھم بیتگ اَت باجوڑ ایجنسی ءِ شاھد اُمر سکنہ واجہ مولانا پکیر مھمد ءِ راستیں دست ءِ ھساب ءَ اَت نوں کساس ھشت سال ئِے ماں زِندان ءَ گْوازینت ءُ آتک۔ مُپتی برجان چہ سوات دمگ ءَ سْیادی دار ایت ءُ چد ءُ ساری ءَ ھزب الھرار ءِ واجکار بوتگ اَت۔ ھمے وڑ ءَ استاد الیم چہ گوریچی وزیریستان ءَ سْیادی دار ایت ءُ وتی یک مُھکمیں چیرجنگی گلے ءِ واجکار اَت بلے ابو یاسر چہ زِرباری وزیرستان ءَ سْیادی دار ایت ءُ مسھود تالبان ءِ یک دلیریں رھشُونے زانگ بیت

بُنجاہ ءِ گْوشگ اِنت یک چیر جنگی بِستار ءَ ٹی ٹی پی بازیں وھد ءُ چِست ءُ ایر ءِ ھوار بازیں سنگتانی دْروہ ءِ ھم آماچ بیتگ بلے اِے وڑیں جیڑھاں زوت توجیل دیگ بیتگ اَنت چریشی ءَ اِے گل ءِ تہ ءَ دلجمی یے ھم ودی بیتگ کہ نی چد ءُ پد ھر وڑیں جیڑھاں توجیل دیگ بیت۔ بزاں ٹی ٹی پی چہ تھی پْروشت ءُ پْروش ءَ در کپتگ ءُ نوکیں ھاٹیگ ءُ سنجاں زُوران اِنت-

ما دلگوش بِہ بَہ ایں کہ اِے تیوگیں جاورال پہ پاکستانی لشکر ءُ سرکار ءَ انچائیں ھالات نہ بنت بلے پہ ٹی ٹی پی ءَ ھم انگت انچیں موھے نیست کہ پاکستان ءِ توک ءَ یک سرجمیں دمگے ءَ زورگِر ءُ بُنجاھے اڈ بہ کنت البت جنگی اُرشانی دْرچ چہ گْوست تْرُند ءُ گیش بیت کہ ایشی ءِ درور ما گْوستگیں سال ءَ گلانی یکمُشتی ءَ پد چار اِت ءُ مار ات۔ اگاں ٹی ٹی پی ءَ اوگان تالبان ءِ وڑیں جنگی رِد ءُ رھبند زُورت ءُ پاکستانی لشکر ءِ سر ءَ ٹوھیں اُرش برجاہ داشت اَنت گُڑا پاکستان ءِ لشکر پد کیز ایت ءُ ٹی ٹی پی ءَ دمگ ءُ بُنجاہ ھم رس اَنت پد ءَ ٹی ٹی پی پاکستان ءِ وتگڑیں سرکار ءُ راجمانی ءَ پْروش دنت اگاں امریکہ، نیٹو ءُ اوگان سرکاری لشکر اسلامی چیرجنگ ءِ دیم ءَ پْروش ورگ ءَ انت گُڑا پاکستان ءِ لشکر زاناں چے کسے، بزاں زیت وَ ناں بلے دیر ٹی ٹی پی پاکستان ءِ لشکر ءَ الم پْروش دنت۔

نی ما بچار ایں کہ اوگانستان وت یک ابرمی مُلکے اَت، اوگانستان ءَ بازیں وھد ءَ اُلسی جنگاں ھوار سرکاری لشکر ھم بازیں وھداں بدل ءُ مٹ بوتگ اَنت بلے اوگانستان وَ بھر ءُ بانگ نہ بوتگ ءُ ناں کہ اوگان لس مھلوک ءَ پہ اوگانستان ءِ بھر ءُ بانگ ءَ ھیالے ھم کُتگ چی ءَ کہ آ وت ءَ دْرہ اول اوگان گْوش اَنت پد ءَ کسے وت ءَ تاجک، اُزبک، ھزارا، بلوچ ءُ پشتون گْوش ایت بلے اگاں پاکستان ھم اوگانستان ءِ ڈول ءَ السی جنگے ءِ آماچ بیتگ ءُ لشکر ئِے پْروش وارتگ گُڑا زاناں پاکستان وت ءَ زِندگ دار ایت یا کسے سندھی ءُ کسے وت ءَ پنجابی ءُ پشتو گْوش ایت گُڑا مئے بلوچ راج زاناں پہ اِے موہ ءَ تیار انت کہ اگاں پاکستان ءِ سرکار یا لشکر ءَ اسلامی چیرجنگی گل ٹی ٹی پی ءِ دست ءَ پْروش وارتگ بلوچ راجی رھشُون دیم ءَ کا اَنت ءُ وتی راج ءَ چہ پاکستان ءِ السی جنگ ءَ پھریز اَنت۔ اگاں پاکستان ءِ نیکراھی سِلاھبندیں گل یکمُشت بنت گُڑا باید انت بلوچ راج ءِ سِلاھبندیں گل وتی وتواھی ءُ زاتی پائدگاں مہ چار اَنت ءُ یکیں گلے ءَ ھوار بہ بنت بلوچ راجی سِلاھبندیں جُھد شالا سوبین بات ءُ راج ءِ سرڈگار بلوچستان آجو بات ءُ بلوچستان دیمروئی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سربوتگیں ھالانی رِد ءَ بلوچستان ءِ تہ ءَ جھانی وبا کرونا وائرس ءِ نادراھی ءَ دگہ دو کس بیران بوتگ ءُ چِل ءُ نُھ نوکیں نادراہ پدر بیتگ انت –

بلوچستان ءِ جانسلامتی ءِ نیمگ ءَ شنگ بوتگیں رپورٹ ءِ رِد ءَ گوستگیں روچ ءَ بلوچستان ءَ یک ھزار ءُ سی مردماں کرونا نادراھی ءِ ٹیسٹ کنگ بوتگ کہ آھانی تہ ءَ چل ءُ نھ مردماں کرونا نادراھی پدر بوتگ، کہ اھانی سیادی گون نُھ ضلع ءَ انت –

رپورٹ ءِ رِد ءَ گوستگیں روچ ءَ شال ءَ نُھ سد ءُ پنجاہ ءُ پنچ مردماں کرونا ٹیسٹ کنگ بوتگ کہ آھانی تہ ءَ بیست ءُ نُھ مردمے ٹیسٹ پوزٹیو اتکگ انت شال ءَ کرونا نادراھی گیش تالان بوگ سَے درسد بوتگ – کیچ ءَ دہ مردماں، پنجگور ءَ چار مردمانی رپورٹ پوزٹیو اتکگ انت ءُ ھزدار ، نصیرآباد، جعفرآباد، چاگی، لورلائی ءُ گوادر ءَ یک یک مردمے ءِ کیس رپورٹ بوتگ وھدیکہ بلوچستان ءِ بیست ءُ چار ضلع ءَ ھچ وڑیں کرونا ٹیسٹ کنگ نہ بوتگ اَنت –

رپورٹ ءِ رِد ءَ گوستگیں روچ ءَ کرونا نادراھی ءَ دگہ دو مردم بیران بوتگ اَنت ، بیران بوتگیں مردمانی کچ نوکیں کساساں ھوار دوسد ءُ نود ءُ چار ءَ سر بوتگ انت – بلوچستان ءَ تنی وھدی کرونا نادراھی ءِ یک ھزار شست ءُ ھشت نادراک ھست انت –

رپورٹ ءِ رد ءَ بلوچستان ءِ تہ ءَ کرونا نادراھی گیش تالان بوگ ءَ کمی اتکگ، گوستگیں روچ ءَ کرونا نادراھی گیش تالان بوگ ء چار بما ھپتاد ءُ پنچ درسد بوتگ وھدیکہ دو روچ ساری ھپت بما شست ءُ ھپت بوتگ –

مار ءَ درسیں انسان دوستاں یکجاہ بوگ ءُ توار چست کنگ لوٹ ایت تانکہ بلوچستان ءِ تہ ءَ ھونریچیں دست دارگ بہ بنت – ماما قدیر

بلوچستان ءِ بنجاھی شھر شال ءَ بیگواھیں مردمانی ھاتر ءَ وائس فار بلوچ مسنگ پرسنز ءِ زھرشانی برجاہ ، زھرشانی ءَ مروچی چار ھزار ءُ سَے سد ءُ چل ءُ چار روچ سرجم بوتگ –

شال پریس کلب ءِ دیم ءَ بازیں وھدے ءَ برجمیں بنجل ءَ سیاسی ءُ چاگردی باسکاں کھولانی گون ءَ دلپدری درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءِ گوشگ ات کہ بلوچستان ءِ تہ ءَ زورانسری اوار جنی ءِ نہ اوشتوکیں درچ بندات بوتگ ، پاکستان ءِ زورگیری انسانی ھک ءُ اُستمان ءِ کانودانی لگتمالی، میان اُستمانی ادارہ اقوام متھدہ ءِ ھچ نگوشگ ءَ اد ءَ انسان کُشی ودی بوگ ءَ انت –

آئی ءِ گوشگ ات کہ پاکستان ءَ بلوچستان ءِ سر ءَ زورگری کتگ بلوچ ءِ درسیں ھک پچ گپتگ انت ءُ ائی ءَ پد روچ ء مروچی انسانی ھک ءُ دگہ میان اُستمانی کانودانی لگتمالی برجاہ انت درسیں انسانی ھکانی ادارہ پاکستان ءِ رپورٹ بلوچستان ءِ تہ ءَ پاکستانی ریاست ءِ کرد پدر کتگ ءُ پاکستان ءِ دست ءَ ھزارانی کچ ءَ بلوچ پرزندانی آوار جنی ءُ شھیدی ءِ منانک زاھر کتگ انت –

آئی ءَ بنجل ءَ اتکگیں مردمانی گون ءَ تران کنان ءَ گوشتگ گوستگیں بازیں روچاں چہ بلوچستان ءِ تہ ءَ زورانسری آوار جنیانی تہ ءَ گیشی آرگ بوتگ ءُ بلوچستان ءِ جتا جتائیں دمگاں ورنا آوار جنگ ءُ بیگواہ کنگ بوگ ءَ انت –

آئی ءِ گوشگ ات کہ پاکستان میان اُستمان ءِ ھچ نہ گوشگ ءَ بلوچ چک چینی ءِ پالیسی برجاہ داشتگ انت – پرایمنیں جھدے بگیری ءَ چست کن بہ جن چگل دے پالیسی ءِ سر ءَ امل کنگ انت پاکستان ءِ چیریں ادارھاں لھتے سالانی تہ ءَ ھزاران بلوچ پرزند اوار جنی ءَ پد شھید کرتگ انت – بلے میان اُستمانی ادارہ ءُ انسانی ھکانی ڈاھور دیوکیں ڈیھانی نیمگ ءَ ھچ وڑیں گامگیج زورگ بوگ ءَ گندگ آیگ ءَ نہ انت –

آئی ءِ گوشگ ات کہ بلوچستان ءِ تہ ءَ زورانسری آوار جنی ءِ بگیری ءَ درسیں انسان دوستاں یکجاہ بوگ ءُ توار چست کنگ لوٹ ایت تانکہ بلوچستان ءِ تہ ءَ انسان کُشی دارگ بہ بیت –

سربوتگیں ھالانی رِد ءَ بلوچستان ءِ بنجاھی شھر شال، ھب، شیرانی، چاگی، ڈیرہ مراد جمالی، نوشکی، ڈھاڈر، اوستہ محمد ءَ تیرگواری ءُ دگہ وئیلاں یازدہ مردم بیران ءُ دو ٹپی بوتگ اَنت –

گیشیں ھالانی رِد ءَ بلوچستان ءِ دمگ ھب ءَ تیز رؤکیں گاڑی ءُ پرپٹے ءَ ڈیک وارتگ ءُ یک مردمے بیران بوتگ –

بیران بوتگیں مردم ءِ پجار پرپٹ سوار محمد یوسف ء امید علی ءِ نام ءَ چہ بوتگ – ایدھی ءَ ایمبولینس ءَ جون دست گپتگ ءُ کراچی ءِ نزیکیں نادراھجاہ ءَ سرکتگ –

ھمے وڑ شیرانی ءَ دو پرپٹانی ڈیک ورگ ءَ یک مردمے بیران بوتگ ءُ یکے ٹپی بوتگ –
پولیس ءِ رِد ءَ وئیل شیرانی ءَ کپیپ چیک پوسٹ ءِ نزیک ءَ دیم ءَ اتکگ، وئیل ءَ شیرانی مانی خواہ پولیس تانہ ءِ اسسٹنٹ سب انسپکٹر عبدالرشید بیران بوتگ وھدیکہ محمد شاہ نامیں مردمے ٹپی بوتگ – پولیس ءَ ھردو مردم چِست کرتگ ءُ نادراہ جاہ ءَ سر کتگ انت – اژدری چار ءُ ٹپاس ءَ پد پولیس انسپکٹرے جون کھول ءِ ھوالگ ءَ کنگ بیتگ –

دگہ دگ ءِ وئیلے بلوچستان ءِ دمگ چاگی ءَ دیم ءَ اتکگ کہ گاڑی ءِ چپی بوگ ءَ یک مردمے بیران بوتگ –

وئیل چاگی ءَ تیزروگ ءِ سوب ءَ دیم ءَ اتکگ کہ چپی بوگ ءِ سوب ءَ بلوچ خان نامیں مردمے زدگ بوتگ کہ آ نادراھجاہ ءَ برگ ءَ بوتگ کہ نیم راہ ءَ ٹپانی درد نہ سگتگ ءُ بیران بوتگ –

دومی نیمگ ءَ بلوچستان ءِ دمگ ڈیرہ مراد جمالی ءَ ناشناسیں مردمانی تیرگواری ءَ یک مردمے بیران ءُ یکے زدگ بوتگ –

پولیس ءِ رِد ءَ وئیل ڈیرہ مراد جمالی ءِ شھر ءَ سی این جی ءِ نزیک ءَ دیم ءَ اتکگ کہ ناشناسیں مردماں اسگر علی ءُ برکت علی ءِ سر ءَ تیرگواری کتگ ءُ تتکگ انت، چریشی ءَ اسگر علی بیران بوتگ ءُ برکت ٹپی بوتگ –

ٹپی ءُ بیران بوتگیں مردم منجوٹی ءِ نندوک انت، پولیس ءَ ھردو چِست کرتگ ءُ نادراھجاہ ءَ سرکتگ انت اود ءَ اژدری چار ءُ ٹپاس ءَ پد بیران بوتگیں مردمے جون کھول ءِ ھوالگ ءَ کنگ بیتگ –

ھمے وڑ نوشکی ءِ دمگ سیاہ کوہ ءَ ناشناسیں مردمانی تیرگواری ءَ یک مردمے بیران بوتگ –

بیران بوتگیں مردم ءِ پجار حاجی محمد اکبر ء تاج محمد ءِ نام ءَ چہ بوتگ کہ سر ءَ تیرلگتگ ءُ بیران بوتگ – دمگی پولیس ءَ جون چِست کرتگءُ ٹیچنگ نادراہ جاہ ءَ سرکتگ اود ءَ اژدری چار ءُ ٹپاس ءَ پد کھول ءِ ھوالگ ءَ کنگ بیتگ –

دگہ تیرگواری ءِ وئیلے بلوچستان ءِ دمگ ڈھاڈر ءَ دیم ءَ اتکگ کہ ناشناسیں مردماں یک مردم ءِ تیر باران کتگ تتکگ انت –

وئیل ڈھاڈر ءِ نزیک ءَ کرد کیمپ ءَ دیم ءَ اتکگ کہ ناشناسیں پرپٹ سواراں نوکر خان راہیجہ ء گلام قادر تیرباران کتگ کُشتگ ءُ تتکگ انت – دمگی پولیس ءَ وت ءَ وئیل جاہ ءَ سر کتگ مرد ءِ جون دستگپتگ ڈھاڈر سول ھسپتال ءَ سرکتگ اود ءَ اژدری چارٹپاس ءَ پد جون کھول ءِ ھوالگ ءَ داتگ – ھمے گوشگ بوگ ءَ انت وئیل زاتی جیڑہ ئِے سر ءَ ودی بوتگ –

ھمے وڑ اوستہ محمد ءَ تیرگواری ءِ وئیل ءَ ورنایے بیران بوتگ ءُ کشندہ دزگیر کنگ بوتگ –

وئیل گنداخہ ءِ دمگ موندر کوٹ ءَ دیم ءَ اتکگ کہ نور محمد نامیں مردمے ءَ ٹی ٹی پسٹل ءِ سر ءَ محبوب پنام مٹھا خان ءِ سر ءَ تیرگواری کتگ ءُ ٹپی کتگ –
وئیل ءِ ھال سر بوگ ءَ دمگی پولیس ءَ وت ءَ وئیل جاہ ءَ سرکتگ ءُ ٹپی بوتگیں مردم لاڈکانہ ءِ نادراھجاہ ءَ برتگ کہ اود ءَ آئی ءَ وتی ٹپانی درد نہ سگتگ ءُ بیران بوتگ – پولیس ءَ کتکار دزگیر کتگ ھمے گوشگ بوگ انت وئیل زاتی جیڑہ ئِے سر ءَ ودی بوتگ پولیس اے درگت ءَ گیشیں پٹ ءُ پول کنگ انت –

دگہ وئیلے بلوچستان ءِ بنجاھی شھر شال ءَ دیم ءَ اتکگ کہ چات ءِ ساپ کنگ ءِ میان ءَ گیس پُر بوگ ءَ چار مزور دمتوس بوتگ ءُ بیران بوتگ انت –

وئیل شال ءِ دمگ مری آباد ءَ خار تار ءَ دیم ءَ اتکگ، چاریں مزورانی جون کشگ بیتگ ءُ نادراھجاہ ءَ برگ بوتگ انت اود ءَ اژدری چار ءُ ٹپاس ءَ پد جون کھولانی ھوالگ ءَ دیگ بوتگ انت –

بلوچستان ءَ ھمک روچ بیتگیں وئیلاں بازیں کچے ءَ مردمانی جان زوال بیگ ءَ اَنت بلے سرکار ءُ آئی ءِ واکدار ھچ رنگ ءَ گامگیج زورگ ءَ گندگ بیگ ءَ نہ اَنت –

جھاؤ ءَ پاکستانی پوج ءِ تر ءُ گرد کنوکیں ٹولی ءِ سر ءَ اُرش کتگ دو کارمند کُشتگ اَنت- میجرگوھرام بلوچ

سربوتگیں ھالانی رِد ءَ آواران ءِ دمگ جھاؤ ءَ ناشناسیں سلاہ بندیں مردماں پاکستانی پوج ءِ پیادگ ءَ تر ءُ گرد کنوکیں ٹولی ءِ سر ءَ اُرش کتگ – اُرش جھاؤ ءِ دمگ بارگیں گزی ءَ پاکستانی پوج سر ءَ کنگ بوتگ دمگی مردمانی رد ءَ چریشی ءَ پوج ءَ جانی تاوان رس اتگ، سلاہ بندیں مردم درایگ ءُ روگ ءَ سوبمند بوتگ انت –

دومی نیمگ ءَ بلوچ آجوئی لوٹوکیں سلاہ بندیں گل بلوچستان لبریشن فرنٹ ءِ جارکش میجر گوھرام بلوچ ءَ رسانکدراں وتی شنگ کرتگیں درشان ءِ تہ ءَ اے اُرش ءِ زمّہ واری منّ اِتگ ءُ گوشتگ کہ مئے سرمچاراں یکشمبے ءِ سھب ءَ آواران ءِ دمگ جھاؤ ءَ بارگیں گزی ءِ ھند ءَ پیش ءَ چہ راہ بستگ ءُ پاکستانی پوج ءِ پیادگ ءَ تر ءُ گرد کنوکیں ٹولی ءِ سر ءَ راکٹ ءُ دگہ مزنیں سلاھانی گون ءَ اُرش کتگ، اُرش ءِ آسرا پاکستانی پوج ءِ دو کارمند مرتگ ءُ چار ٹپی بوتگ اَنت-

میجر گوھرام بلوچ ءَ گڈسر ءَ وتی درشان ءِ تہ ءَ گوشتگ کہ پاکستانی پوج ءِ سر ءَ اُرش بلوچستان ءِ آجوئی ءَ تاں برجاہ مان انت –

بلوچستان ءِ بنجاھی شھر شال ءَ سر بیتگیں ھالانی رد ءَ شال ءِ دمگ چمن ءَ مروچی چارُمی روچ ءَ دگ گاڑیانی واھنداں بند کرتگ –

گیشیں ھالانی رد ءَ گاڑیانی واھندانی گوشگ اِنت کہ ایف سی ءَ پَٹ ءُ پول کرتگ ءُ مئے گاڑی گپتگ اَنت چریشی ءَ داں مئے گاڑی یلہ نہ بنت ما وتی پُر ایمنیں زھرشانی برجاہ داریں –

گوستگیں شپ ءَ انتزامیہ ءِ واکدار دگ ءِ پچ کنگ ءَ گپ ءُ تران ءَ شتگ اَنت بلے زھرشانی ءَ نندانک ءَ نشتگیں مردماں انتزامیہ ءِ گپ نہ منّ اِتگ اَنت –

آیانی گوشگ اِنت انتزامیہ ءَ وتی سوبمندی ءِ ھال چاگردی رسانکجاھاں شنگ کرتگ بلے اے گپ رد اِنت ءُ ما انگت ءَ نشتگ ایں –

آیانی گوشگ اِنت کہ ایف سی ءَ پَٹ ءُ پول کرتگ ءُ “نان کِسٹم “گاڑی گپتگ اَنت ءُ زھرشانی کنوکاں کوژک ءِ ھند ءَ مزن شھدگ بند کرتگ ءُ رؤک ءُ آؤکیں مساپر مھتل کرتگ اَنت –

مساپرانی گوشگ اِنت اے ترندیں گرم ءَ دگ بند اِنت ءُ ما اد ءَ ٹوھیں جنجالانی دیمپان اِنت ءُ باید اُستان ءِ سرکار زوت ءَ زُت گامگیج بہ زور ایت ءُ مردمانی گپ ءُ تران ءَ سِتکی بہ کنت –