TBP Balochi

سربوتگیں ھالانی رِد ءَ بلوچستان ءِ دمگ ژوب ءَ دو جتائیں وئیلاں زالبولے ءَ ھوار دو مردم بیران بوتگ –

گیشیں ھالانی رِد ءَ بلوچستان دمگ ژوب ءَ میر علی خیل دگ ءِ سر ءَ ڈیمپر ءُ آپ ءِ ٹینکی ءِ ڈیک ورگ ءِ سوب ءَ شفیق نامیں مردمے بیران بوتگ – وئیل ءَ بیران بوتگیں مردم ءِ جون دمگی نادراھجاہ ءَ سر کنگ بوتگ-

دگہ وئیلے بلوچستان ءِ دمگ ژوب ءَ دیم ءَ اتکگ کہ اناگتی تیرلگگ ءِ سوب ءَ یک زالبولے بیران بوتگ –

وئیل نوکیں آبادی برپ پیکٹری ءِ نزیک ءَ دیم ءَ اتکگ کہ چریشی ءَ زالبولے بیران بیتگ ءُ ریسکو ءَ جون دست گپتگ دمگی نادراھجاہ ءَ سر کتگ اود ءَ اژدری چار ءُ ٹپاس ءَ پد کھولے ھوالگ ءَ کنگ بیتگ –

دمگی مردمانی گوشگ اِنت زالبول ءَ ناگتی تیر لگ اِتگ ءُ چریشی ءَ آئی ءَ ساہ داتگ اَنت -بلوچستان ءَ بازیں جاھاں چوشیں وئیل پیش آیگ ءَ اَنت –

بلوچستان ءِ بنجاھی شھر شال ءِ پریس کلب ءِ دیم ءَ زورانسری آوار جنگ بوتگیں بلوچانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ چل ءُ ھشت روچ سرجم بوتگ – مروچی این ڈی پی سینٹرل کمیٹی باسک ثناءاللہ بلوچ، نیشنل پاٹی ءِ عبدالغفار قمبرانی، بیبگر بلوچ ءُ دگہ مردماں بنجل ءِ تر ءُ تاب کتگ بیگواھیں مردمانی کھولانی گوما دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی گوما تران کنان ءَ گوشتگ کہ بلوچ راج ریاستی زلم ءُ زوراکیانی آماچ ءُ ھمک روچ ورنایانی جونانی چگل دیگ ءِ رد ھم برجاہ انت –

آئی ءِ گوشگ ات کہ ایردستیں بلوچستان ءِ جاور ھال یک پلم یا ناولے ءَ چہ کم نہ انت کہ اود ءَ زوراکیانی بے رھمی روچ ءِ برانزاں چہ ھم گرم تر انت ڈیھ ءِ پرزندانی ھون ھاک ءَ گوں ھوار کنگ بنت سرڈگار ءَ پُرایمنیں جھد ءِ گامانی سوب جوڑ بوگ ءِ انت –

آئی ءِ گوشگ ات کہ بلوچ ریاست ءِ زورکیانی گوں تمردی ءَ دیمپانی ءَ کنگ ءَ انت ءُ نوں اے مئے زندے بھرے جوڑ بوتگ اَنت –

آئی ءِ گوشگ ات کہ بلوچستان ءِ تہ ءَ بازیں وھداں ریاستی زورکی برجاہ انت کوھلو، ڈیرہ بگٹی، مشکے، آواران ءَ ھوار سرجمیں بلوچستان ءِ مردم ریاستی زوراکیان آماچ انت –

ماما قدیر بلوچ ءَ گوشتگ کہ بلوچستان ءِ تہ ءَ پاکستانی پوج ءِ نیمگ ءَ انسانی ھکانی لگتمالی برجاہ انت بلے اشی ءَ ابید ملکی ءُ میان استمانی رسانکدر بلوچستان ءِ درگت ءَ ھچ نگوشگ ءَ انت بلوچستان ءِ تہ ءَ ودی بوتگیں انسانی ھکانی لگتمالی بگیری یو این ءُ ایمنسٹی جوانیں گامگیج بہ زور انت –

سربوتگیں ھالانی رِد ءَ ناشناسیں سلاہ بندیں مردماں بلوچستان ءِ دمگ کیچ ءِ ھند ڈنک ءُ کولواہ ءَ پاکستانی پوج ءِ سر ءَ اُرش کتگ – اُرشاں پاکستانی پوج ءَ جانی ءُ مالی تاوان رس اتگ سلاہ بندیں مردم درآیگ ءُ رؤگ ءَ سوبمند بوتگ انت –

بلوچ آجوئی لوٹوکیں سلاہ بندیں گل بلوچستان لبریشن فرنٹ ءُ بلوچ ریپبلکن آرمی ءِ جارکش ءَ پاکستانی پوج ءِ سر ءَ بوتگیں اُرشانی زمّہ واری منّ اِتگ –

بلوچستان لبریشن فرنٹ ءِ جارکش میجر گوھرام بلوچ ءَ رسانکدرں وتی شنگ کرتگیں درشان ءِ تہ ءَ گوشتگ کہ مئے سرمچاراں مروچی پنچ شمبے ءِ روچ ءَ سھب ءِ ادار یازدہ ءَ کیچ ءِ شھر تربت ڈنک ءَ پٹرول پمپ ءِ نزیک ءَ پاکستانی پوج ءِ پرپٹ سواریں کاروان ءِ سر ءَ ھما وھد ءَ گوں مزنیں سلاھاں اُرش کتگ کہ وتی بنجل ءَ در اتکگ ءُ دیم پہ ڈی بلوچ ءِ نیمگ ءَ رؤگ ءَ بوتگ انت – جارکش ءَ گوشتگ کہ اے اُرش ءَ یک پوجی کارمندے ھما دمان ءَ مُرتگ ءُ وھدیکہ یکے زدگ بوتگ – میجرگوھرام بلوچ ءَ وتی درشان ءِ تہ ءَ گوشتگ کہ زورگیریں پوج ءِ سر ءَ مئے اُرش ایردستیں بلوچستان ءِ آجوئی ءَ تاں برجاہ مان انت –

ھمے وڑ بلوچ ریپبلکن آرمی ءِ جارکش بیبگر بلوچ ءَ کولواہ ءَ پاکستانی پوج ءِ سر ءَ بوتگیں اُرش ءِ زمّہ واری منّ اِتگ ءُ گوشتگ کہ گوستگیں روچ ءَ سھب ادار شش ءَ کیچ ءِ دمگ کولواہ ءَ بلور زیارت ءَ مئے سرمچار تر ءُ تاب ءَ بوتگ انت کہ ھمے میان ءَ آھاں گوں زورگریں پوج ءَ ڈیک وارتگ ءُ جنگ بندات بوتگ، میڑ ءِ میان ءَ مئے سرمچاراں گوں تمردی ءَ پاکستانی پوج ءِ دیم داشتگ ءُ گوں آئی ءَ جنگ کتگ میڑ ءَ پاکستانی پوج ءِ دو کارمند مرتگ بازینے ٹپی بوتگ اَنت ءُ مئے سرمچار پہ وشی جنگ جاہ ءَ در آیگ ءَ سوبمند بوتگ انت –
جارکش ءَ گوشتگ کہ زورگیریں پوج ءَ سرمچارانی دست ءَ پروش ورگ ءَ پد لس مھلوک ءِ سر ءَ لشکرکشی بندات کتگ کہ آئی ءِ پروش ورگ ءَ پدّر کنت –

جارکش ءَ بیبگر بلوچ ءَ گوشتگ کہ مئے اے دابیں اُرش بلوچستان ءِ آجوئی ءَ تاں برجاہ مان انت –

دی بلوچستان پوسٹ پترھال ءَ سر بیتگیں ھالانی رد ءَ بلوچستان ءِ جتا جتائیں جاھاں جام سرکار ءِ ھلاپ ءَ متحدہ اپوزیشن پاٹی ءِ نیمگ ءَ دگ بند کنگ بیتگ اَنت –

گوادر ءَ اپوزیشن پاٹی ءِ نیمگ ءَ مزن شھدگ بندگ کنگ بیتگ ءُ دوئین نیمگاں روگ ءُ آیگی راہ ءُ در بند بیتگ اَنت –

ھمے رنگ ءَ مستونگ ءَ ھم متحدہ اپوزیشن ءِ بلوچستان نیشنل پاٹی ءُ جمعیت علماء اسلام ءَ نواب ھوٹل ءِ دیم ءَ دگ بند کرتگ ءُ ھردوکیں نیمگاں روگ ءُ آیگی مھتل کرتگ اَنت –

ھمے رنگ ءَ نوشکی ءَ اپوزیشن ءِ پاٹی ءَ اسٹیشن ءِ ھند ءَ مزن شھدگ بند کرتگ ءُ روگ ءُ آیگی مھتل کرتگ اَنت –

آیانی گوشگ اِنت بجٹ “مالی زرداری ” ءَ اپوزیشن ءِ ھند ءُ دمگ بے دلگوش کنگ بیتگ اَنت چریشی ءَ جام سرکار ءَ تھنا وتی سوبمندیں ھلکاں دلگوش داتگ ءُ چریشی ءَ اپوزیشن نہ منّ اِیت –

چریشی ءِ پژدر ءَ اپوزیشن سرکار ءِ پتر ءَ نندوکیں بگیر داروکیں پاٹی ءَ بلوچستان ءِ بازیں جاھاں برانزی کرتگ –

نبشتانک: مناپِکیں اَدیب

نبشتہ کار: میار دشتی

دی بلوچستان پوسٹ

اول منی جِند ءِ زات میاربار اِنت چی ءَ کہ ما ایراد گرگ زان ایں ءُ رسانکدر ءَ کلوھے دور دیں کہ باید اِے وڑ کنگ بہ بیت بلے کار ءِ دْروشم ءَ ما ھِچ وڑیں گامگیج نہ زیر ایں۔

چوناھا ما وت ءَ وتچاریں مردم جوڑ کُتگ مردم گِریں مردُم مئے توک ءَ نیست اگاں ھست گڑا باز کم نی پمشکہ ما چو سربتگیں شپانک ءَ گار ایں۔

ما وتی الّمی ءَ را اے سرپد بہ ایں بس کا ایں چاگردی رسانکدر ءَ کلوھے چگل دے ایں کہ باید گھرام ءِ کوش ءِ بگیری ءَ راج بے توار مہ بیت، من ءَ چے پد دومی کَیت ھمے کلوہ ءَ چگل دنت ، سیمی کیت ھمے وڑ ھمے یکّیں لبز، نی شرّیں من سرپد بہ باں کہ راج کَے اِنت ؟ راج من ءُ تویں من ءُ تو کہ چاگردی رسانکدر ءِ چگل داتگیں دوئیں لبزاں وتی ھکّ ءِ اَدا کنگ پھمیں گڑا پہ راج ءَ کے توار چِست کنت؟-

اِے پراہ ءُ شاھگانیں بلوچستان ءِ تہ ءَ ادیب ، شائر، زبانزانت ھزارانی ھساب ءَ گِند ئے بلے دراہ بے تْرکّ ءُ بے توار بس ندارھی جوڑ بیتگ اَنت ھمے تو گِند ئے کہ سے چار ھست کہ ناانساپیاں ءُ زلم ءَ ایر جن اَنت نی ھمے زاھر بیگ اِنت کہ ھزارانی کچّ ءَ ادیب ءُ زانتکارانی تہ ءَ بس سے چار دیم ءَ کَیت نی اِے وڑیں مناپکیں اَدیب راج ءَ ءُ پہ زبان ءَ تاوان اَنت۔

مں برے برے جیڑاں کہ اِے وتواھی ءِ جُنز کدی آسر بیت؟ پد ءَ اِد ءَ مں جیڑگ ءَ کپاں کہ شما زانتکار اَدیب چو گُنگ اِت بس ندارھی جوڑ بیتگ اِت بلوچستان ءِ تہ ءَ دگہ ھزارانی کچّ ءَ بے وانندگ ھم ھست گڑا آ چی مار اَنت چی سما کن اَنت؟-

بہ چار مرچگیں کِسّہ جنگجو ءِ آشوب دوست ءِ نہ اِنت بلکیں مرچیگیں کِسّہ بس بلوچ ئیگ اِنت تئی میار بس بلوچ اِنت، اگاں ما بلوچ ءُ بلوچیت ءِ سر ءَ جھد نہ کُت ءُ یکمُشت نہ بیتیں گڑا مارا شھیدانی ھون ھِچ وڑ ءَ ماپ نہ کن اَنت ءُ باندات ءِ پدریچ مارا ھم پِٹّ کنت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: زمین ءِ ابدمانیں بچ

نبشتہ کار: نبیل بلوچ

دی بلوچستان پوسٹ

راجدپتر چہ کردار ءَ پُر اِنت انچیں کردار کہ آوانی بابت ءَ دپتر ءِ درائیں تاکاں نبیسان بہ کن ئے انگت سرجم نہ بنت انچیں کردار کہ آواں واگن وتی کِرد پیشداشتگ ءُ وتی جان ندر کُرتگ نِیلیں زر ءَ بہ گر داں کوہ ءُ کوچگ ءَ بیا اے سِنگ ڈوک ھم آوانی گواھی ءَ دے اَنت آوانی توسیپ ءَ کن اَنت آوانی روگ ءَ اے ھم ارس ریچ اَنت ءُ گُلزمین ءِ دلبند ءَ تچوکیں ھوناں گوں وتی ارساں ھور کن اَنت ءُ دانکہ گُلزمین سیراپ بہ بیت اے کردارانی تہ ءَ یک کردارے شھید شاہ دوست اِنت کہ زمین ءَ پہ نمیران اِنت سرڈگار ءِ آشکیں بچ شاہ دوست شھید آجز جان ءِ ھمرائی ءَ بلوچستان ءِ دمگ کُلبر ءِ کوہ ءُ گراں پہ مادریں زمین ءِ رکینگ ءِ ھاتر ءَ گوں دژمن ءَ دیم پہ دیمی جنگ ءَ شھید بنت ءُ یکرندے پد ءَ دپتر ءِ تاکاں شاہ دوست ءُ آجز ءِ کرد نبیسگ بوت استالے سِست ءُ زمین وتی بچانی گم ءَ چوناھا چورہ اِنت کہ آئی ءِ دلبند ءِ سر ءَ روچے بچے شھید بیت ءُ روچے یکے گار ءُ بیگواہ کنگ بیت ءُ تھاریں کوٹیانی باھوٹ کنگ بیت بلے شاہ دوست ءِ روگ زمین ءَ سک تور اِیت پرچا کہ شاہ دوست نوک رُستگیں ورناھے اَت شاہ ءَ وتی ورنائی ءِ روچاں کیچ ءِ دمگ یلداتگ اِت اَنت ءُ وتی پیریں پت ءِ دست ءِ لٹ جوڑ نہ بوت آ بلکیں توامیں راج ءِ دست ءِ لٹّ جوڑ بُوت ءُ وتی راج ءَ چہ دژمن ءَ رکینگ ءِ جھد ءَ کنگ ءَ اَنت مدام گوں پنجابی لشکر ءَ گوں جنگ ءَ اَنت کہ منی زمین ءِ وارس مناں من وتی زمین ءِ رکینگ ءَ ساڑی آں اے راج ءُ کوم اے زبان منی اِنت چہ منی زمین ءَ درا مُدام ھمے جھد ءَ گوں گُلائیش اَنت بلوچ راجی پوج بی ایل اے ءِ یک تمردیں جنگولیں باسکے اَت شاہ دوست شھید ریاست شھید اکیل جان شھید عمر جان شھید الیاس نزر ءِ ھنکین ءَ نشتگ اَت مرچی شاہ دوست ءَ وتئی نام ھمیشانی تہ ءَ ھوار کُرت شاہ دوست ترا گُشاں گپ ءِ زان ئے ترا چہ پیسر ما چہ سنگتانی نیمگ ءَ چورہ بُوتگیں چونیں مھروانیں سنگتاں مارا یل کُتگ تنیگہ ھماھانی زھیراں گوں زندگی پیڑ اتگ اَنت پد ءَ تو ھم اشتاپی شُت ئے مارا یلدات اے رستریں وھد ءِ تہ ءَ تو ھم مارا تھنا کُت ترا چہ پد زمین زادگیں بچ ماما بُگٹی ءُ اسد ءُ بیبگر ھم رپت ءُ شُت اَنت بہ گند ئے تئی میتگ ءَ اَتکگاں گوں ترا دُچار کپتگ اَنت اے زمین ءِ موکگاں زمین زادگیں بچاں سنگر انگت داشتگ ءُ دژمناں گوں جنگ کنگ ءَ اَنت لھتیں روچ پیسر ءَ بولان ءَ سنگتاں ملٹری کیمپ ءِ سر ءَ اُرش کُتگ ءُ آ کیمپ گِپتگ ءُ وتئی دست ءَ کُتگ اد ءَ چہ ھم مئے سے سنگت شگید آپتاب گوں وتی دو سنگتاں شھید بُوت شاہ دوست اے کاروان راھی اِنت اے جنگ آجوئی ءَ داں برجاہ اِنت پاکستان ءِ یزیدیں لشکر ءَ نوں شکست وارتگ کہ اود ءَ تئی وڑیں گونڈلیں بچاں اے سُھریں تیر وتی سینگ ءَ جاہ داتگ اَنت اے باج الّم بلوچ ئیگ اِنت اے باج ءَ دُنیا ءِ ھچ کُجام تاکت چہ بلوچ ءَ بُرت نہ کنت ءُ الم بلوچ وتی منزل ءَ سر بیت شاہ دوست تئی ھنکین ءَ ھم بلوچ ءِ دژمنانی سر ءَ اُرش بوگ ءَ اِنت ءُ دژمن سک نگیگ اِنت اے جنگجاہ ءَ گواڑگ انگت رُدان اَنت ھونانی گوکرت تچان اَنت ءُ زمین ءِ دلبند سبز ءُ آباد بوان اِنت ھمیش اِنت شاہ دوست تئی جنگانی کسہ ایر اَنت بلوچ داں ھپت پُشت ءَ وانان ئِے کنت ءُ آیان بیت تئی لیکہ ءِ پابند بیت ءُ ھر یک جُست ءِ جواب ءَ چہ بدواھیں دژمن ءَ لوٹ اِیت۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کارے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

یوئیفا یورو کپ فٹبال گوازی برجاہ دوشی شپ پائینلینڈ ءُ رشیا، ترکی ءُ ویلس ءُ اٹلی ءُ سویزرلینڈ ءِ میان ءَ دومی راؤنڈ ءِ گوازی کنگ بوتگ –

دوشیگیں گوازی ءَ رشیا ءَ پائینلینڈ دیم ءَ یک گولے، ویلس ءَ ترکی ءِ دیم ءَ دو گول ءُ اٹلی ءَ سویزر لینڈ ءِ دیم ءَ سَے گول ءَ باج برتگ ءُ گوازی وتی نام ءَ کتگ –

یوئیفا یورو کپ ءِ دومی رؤنڈ ءِ اولی گوازی پائینلینڈ ءُ رشیا ءِ میان ءَ بوتگ کہ رشیا ءِ لیبی ایلیکسی ءَ یک گولے اسکور کتگ ءُ پائینلیڈ ءِ دیم ءَ باج برتگ ءُ گوازی وتی نام ءَ کتگ –

دومی گوازی ترکی ءُ ویلس ءِ میان ءَ بوتگ ویلس ءَ دو گول ءَ چہ باج برتگ ترکی ءِ نیمگ ءَ ھچ گول کنگ نہ بوتگ ویلس ءِ لیبی آرون رمسے ءُ کنور روبرٹ ءَ دو گول اسکور کتگ گوازی وتی نام ءَ کتگ –

سیمی گوازی اٹلی ءُ سویزرلینڈ ءِ میان ءَ بوتگ اٹلی ءِ لیبیاں جوانی ءَ گوازی کنان ءَ سَے گول ءَ باج برتگ سویزرلینڈ نیمگ ءَ چہ ھچ گول اسکور کنگ نبوتگ اٹلی ءِ نیمگ ءَ دو گول اٹلی لیبی ایم -لوکیتلی ءَ ءُ یک گولے کیرو ایموبائیل داتگ ءُ گوازی وتی نام ءَ کتگ –

یورو کپ ءِ دیم ءِ گوازی یوکرین ءُ نارت میکدونیا، ڈینمارک ءُ بیلجئیم، نیدرلینڈ ءُ آسٹریا ءِ میان ءَ جتا جتائیں پٹاں بوگ ءَ انت –

بلوچ یکجھتی کمیٹی ءَ وتی درشانی ءَ گوشتگ کہ لشکریانی زنداناں گیر انسانی لَٹ ءُ کُٹانی دیمپانی کنان ءَ شھید بیتگیں تمپ کُنشکلات ءِ جھمنندیں ورناہ گوھرام ءِ ٹپ ھما ٹپاں تاجگ کن اَنت کہ پیسر ءَ بیتگ اَنت –

آئی ءَ گوشتگ کہ کسان سالیں گوھرام لشکریانی دست ءَ گیر انسانی لَٹ ءُ کُٹانی چیر ءَ شھیدی بلوچستان ءَ لشکر ءِ گیر انسانی گامانی یک دگہ پدراھی ءَ کنت ھمک ورنا ھمے داب ءَ کُشگ ءُ ڈلگ بیگ ءَ اَنت ءُ ورنائیں گوھرام ءِ کوش ءِ ھما پھناتاں ھوار اِنت کہ بلوچستان ءَ دو دیکاں برجاہ اَنت –

آئی ءَ گوشتگ کہ بلوچستان ءَ پوج ءِ نیمگ ءَ بازیں ناوشی گندگ ءَ آیگ ءَ اَنت ءُ زالبولاں بہ گر داں چُکاں در ءَ ھچ کس پھریزی ءَ نہ اَنت ءُ مھلوک ءِ دل ءُ جاناں ترس ءُ بیمی جاورھال ودیتگ اَنت ءُ جاورھال گیش ناوش بیان اَنت –

آئی ءَ گوشتگ کہ اگاں اے جاورھال ءُ پوج لگام کنگ نہ بیت گڑا آؤکیں وھداں اے جاورھال گیشتر بلوچستان ءَ سوچان کن اَنت ءُ چریشی ءَ ھمک ءَ بندوکیں مردم نیست ءُ نابود کنگ بنت اِنت –

بلوچ یکجھتی کمیٹی ءَ گوشت: پاکستان ءِ راجپتر ءَ نیشتگیں مردم، سیاسی پاٹی، میڈیا کامرد کنوک ءُ انسانی ھکانی گلانی بے تواری ءِ دیم ءَ یک شھماتے بیت کُت کنت –

جارکش ءَ گوشتگ کہ کُنشکلات ءَ پوج ءَ یک گیر کانودی لشکر کشی ءِ میان ءَ کسان سالیں گوھرام گوں دگہ سَے کسانی ھمراھی ءَ آوار جتگ ءُ برتگ ءُ پد ءَ ھشت روچ ءِ گوزگ ءَ پد گوھرام ءِ لَٹ ءُ کُٹ کتگیں جون آئی ءِ کھول ءِ دست ءَ داتگ ءُ گوھرام کجام بنیاد ءَ گرگ بیتگ؟ کجام رنگ ءَ جنگ ءُ بیتگ ءُ داں کہ آ زندانانی تہ ءَ شھید بیتگ –

آئی ءَ گوشتگ کہ ریاستی ادارھاں وتی کانود وت لگت جتگ ءُ وت کانود ءِ پاسپانی ءِ گپ ءَ جن اَنت بلے آ وت تنی وھدی وتی کانود ءَ نہ دار اَنت –

آئی ءَ گوشتگ کہ گوھرام ءِ وئیل بلوچستان ءِ ھما ٹپاں پد ءَ تاجگ کنگ ءَ اِنت کہ پوج آیاں ھروھد ءَ کنگ ءَ اِنت ءُ گوست ءِ کسہ ءَ پد ءَ پوج ھمک روچ نوک کنان ءُ پیداک اِنت ءُ گوھرام ءِ گون ءَ اے گیر انسانی لَٹ ءُ کُٹ کرتگیں بدن پریات کنگ ءِ اِنت کہ کجام بنیاد ءَ منی ھازگیں بڈ ءَ ساھگیری کنگ بیتگ –

آئی ءَ گوشت کہ ادارھاں اے گیر انسانی رویشانی سر ءَ بے توار اَنت ءُ اشی ءَ زانگ بیت کہ پاکستانی پوج ءَ سرجمیں واک دیگ بیتگ ءُ کشگ ءُ ریچگ ءُ ڈلگ ءُ دور دیگ، آئی ءَ گوشت کہ بلوچ ورنا یک رندے پد ءَ تھاریں دمک ءُ زنداناں چگل دیگ بیگ ءَ اَنت اگاں ادارھاں ھچ نہ گوشت گڑا پاکستانی پوج ءِ ھونی یے دست گیش دراج کش بنت ءُ اے جاورھال ٹوھیں تکاں شت کن اَنت –

آئی ءَ درشان ءِ گڈسر ءَ گوشتگ کہ بلوچستان ءَ سیکورٹی ءِ کارمنداں یک نوکیں تکے دیگ بیتگ کہ بلوچ ورنایاں بہ کُش ایت ءُ اشی ءِ ھواری ءَ گار ءُ بیگواہ کنگ ءِ درچ پیسر ءَ ھم برجاہ بیتگ اَنت ءُ اشانی دارگ ءُ سزا دیگ وتی جاہ ءَ دگہ کارمندانی پشتگیری کنگ بیگ ءَ اِنت ھوشاپ ءَ کسان سالیں زھگ ءِ گون ءَ جنسی زوراکی، تربت ءَ ملکناز ءُ کلثوم ءِ لوگانی تہ ءَ دور کنگ ءُ آیاں بے دردی ءَ شھید کنگ بلوچستان ءَ سیکورٹی پورسز ءِ گیر کانودی رھبند روچ پہ روچ گیش رُدوم زوران اِنت اگاں اے دارگ نہ بیت گڑا بلوچستان ءَ ٹوھیں کچے ءَ انسانانی کوش برجاہ مان اَنت –

سربوتگیں ھالانی رِد ءَ بلوچستان ءِ دمگ شال، بولان، پشین، دکی ءُ نوشکی ءَ جتا جتائیں وئیلاں زھگ ءُ زالبولاں ھوار ھپت مردم بیران بوتگ اَنت ءُ نُھ ٹپی وھدیکہ بارکھان ءَ دیوال ءِ کپگ ءِ سوب ءَ مالدار ءِ شست دلوت مرتگ اَنت-

گیشیں ھالانی رِد ءَ بلوچستان ءِ بنجاھی شھر شال ءَ گاڑی ءِ چپی بوگ ءَ کسانیں زھگے بیران بوتگ ءُ ھشت مردم ٹپی بوتگ اَنت –

پولیس ءِ رِد ءَ وئیل شال ءَ لکپاس ءِ دمگ ءَ دیم ءَ اتکگ کہ گاڑی چپی بوگ ءَ امین اللہ نامیں گونڈلے بیران بوتگ وھدیکہ زھگ ءُ زالبولاں ھوار ھشت مردم ٹپی بوتگ انت – پولیس ءَ ٹپی ءُ بیران بوتگیں مردم شیخ زید نادراہ جاہ ءَ سر کنگ بیتگ انت اود ءَ اژدری چار ءُ ٹپاس ءَ پد گونڈل ءِ جون کھول ءِ ھوالگ ءَ کنگ بیتگ –

دومی نیمگ ءَ بلوچستان ءِ دمگ بولان ءَ ناشناسیں مردمانی تیرگواری ءَ یک مردمے بیران بوتگ – لیویز ءِ رِد ءَ کچھی ءِ دمگ سنی ءَ ناشناسیں مردماں عطا محمد ء محمد امین تیرباران کتگ ءُ کشتگ – لیویز ءَ مرد ءِ جون دست گپتگ ءُ نادراہ جاہ ءَ سر کتگ اود ءَ اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ – لیویز ءِ رِد ءَ وئیل پیشی زاتی جیڑہ ئِے سوب ءَ بوتگ –

ھمے وڑ گوستگیں روچ ءَ بلوچستان ءِ دمگ پشین ءَ سَے وئیلاں دو زالبولاں ھوار سَے مردم کُشگ بوتگ اَنت –

ھالانی رِد ءَ بوستان ءِ دمگ جلوگیر ءَ یک ناشناسیں جِنک ءِ تیر سپتگیں جون دست کپتگ کہ گُٹ ءَ تیر جنگ کشگ بوتگ، دمگی لیویز ءَ اژدری چار ءُ ٹپاس ءِ ھاتر ءَ جون پشین نادراہ جاہ ءَ سر کتگ – دومی وئیل بوستان کلی ملا خیل ءَ دیم ءَ اتکگ کہ عبدالاھد ءَ وتی لوگی ءَ را کارچ جتگ کشتگ ، دمگی لیویز ءَ کشندہ دزگیر کتگ جون اژدری چار ءُ ٹپاس ءِ ھاتر ءَ پشین نادراھجاہ ءَ سر کتگ –
ھمے وڑ پشین شھر کلی غریب آباد ءَ ناشناسیں مردماں سردار ء شیر محمد تیرباران کتگ کشتگ ءُ آئی ءِ ھمراہ علاوہ دین ٹپی کتگ ءُ تتکگ انت دمگی پولیس ءَ ارزی نبشتہ کتگ کشندھانی پٹ ءُ پول برجاہ انت –

دگہ وئیلے بلوچستان ءِ دمگ دکی ءَ دیم ءَ اتکگ کہ اشکرانی کاریز ءَ ھاک ءِ کپگ ءَ یک کاریز کارے بیران بوتگ –

وئیل ءَ بیران بوتگیں مردمے پجار زبیح اللہ جھمنند اوگانستان ءِ نام ءَ چہ بوتگ – اژدری چار ءُ ٹپاس ءَ پد جون کھول ءِ ھوالگ ءَ کنگ بوتگ ءُ اے درگت ءَ دمگی پھازدار گیشیں پٹ ءُ پول کنگ انت ـ

ھمے وڑ نوشکی ءَ کرنٹ لگگ ءِ سوب ءَ زالبولے بیران بوتگ –
ھالانی رِد ءَ نوشکی ءِ دمگ قادر آباد ءَ کرنٹ لگگ ءِ سوب ءَ زالبولے بیران بوتگ، ھمے گوشگ بوگ ءَ انت وئیل ٹرانسفارمر ھرابی ءِ ءُ بازیں والٹیج سوب ءَ دیم ءَ اتکگگ – وئیل ءَ ابید دمگی مردمانی بازیں الکٹرک سامان ءِ چریشی ءِ سوب ءَ ستکگ انت ءُ ناکارہ بوتگ انت ـ دمگی مھلوک ءَ چہ کیسکو ءَ لوٹ کتگ کہ مدامی دمگی لیناں چیک ءُ تان بہ کن انت تانکہ چشیں وئیل دو بر مہ بیت –

دگہ وئیلے بلوچستان ءِ دمگ بارکان ءَ دیما اتک ھورانی سوب ءَ دیوال ءِ کپک ءَ مالدار ءِ شست دلوت مرتگ انت – وئیل بارکان ءِ دمگ رڈکن ءَ دیم ءَ اتکگ کہ ھور ءِ سوب ءَ حق نواز حسنی ءِ لوگ ءِ دیوال کپتگ ءُ چریشی ءَ شست دلوت مرتگ اَنت – ھمے گوشگ بوگ ءَ انت کہ مالدار ءَ کساس ھپت لک ءِ مالی تاوان بوتگ اَنت –

بلوچستان ءِ بنجاھی شھر شال ءِ پریس کلب ءِ دیم ءَ زورانسری آوار جنگ بوتگیں بلوچانی یل کنائینگ ءِ ھاتر ءَ وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ سَے سد ءُ چل ءُ ھپت روچ سرجم بوتگ – مروچی چہ ھب چوکی ءَ سیاسی ءُ چاگردی باسک اللہ داد بلوچ، غلام محمد بلوچ ءُ چہ شال ءَ سلطان کاکڑ ءُ دگہ مردماں بنجل ءِ تر ءُ تاب کتگ بیگواھیں مردمانی کھولانی گوما دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءِ تہ ءَ زوراکی برجاہ انت ءُ پاکستان ءِ بنجاھی سرکار ھم اے جیڑہ ءِ سر ءَ پد ماں پد وتی درشاناں بدل کنت راستی ءَ پنجاہ ھزار گیش بلوچ پرزند پاکستان ءِ زنداناں بندیگ انت ھمگ روچ مرگ ءِ دیمپانی ءَ کنگ انت بلے پاکستانی ھاکم وتی اے کتکاریاں چہ انکاری انت –

آئی ءَ دیمتر ءَ گوشتگ کہ میان اُستمان ءِ رد دیگ ءِ ھاتر ءَ پاکستانی سرکار ءَ بازیں مراگش ءِ اڑ داتگ ءُ بازیں کمیٹی ءِ ھم اڑ داتگ بلے ھچ وڑیں کمیٹی ءَ روچ ء مرچی ھچ وڑیں رپورٹ دیم ءَ نیاؤرتگ پرچا کہ بلوچستان یک چھاونی (پوجی بنجل) دروشم ءَ جوڑ بوتگ کہ اود ءَ درسیں پیسلہ پوج ءُ ایجنسیانی دست ءَ انت اگاں اد ءَ چیریں ادارھانی زوراکی بگیری ءَ کسے توار چست بہ کنت گڑا آ نشانگ کنگ بیت دومی نیمگ ءَ انسانی ھکانی میان اُستمانی ادارھانی بس سالانہ رپورٹ ابید دگہ ھچ نہ انت – بلوچستان ءِ تہ ءَ ھچ وڑیں میکنزم نیست ءُ تاں ھما وھد ءَ اے جاور ھال کسی ءَ منیٹر نہ کرتگ انت اشی ءَ ابید انسانی ھکانی ادارھانی نیمگ ءَ بیگواھیں مردمانی کھولاں ھچ وڑیں کانودی کمک گون نیست –

ماما قدیر بلوچ ءِ گوشگ ات کہ دلگوش کرزیں گپ ءِ ایش انت کہ انسانی ھکانی ادارھاں ھما کچ کہ بیگواھیں مردمانی شنگ کرتگ آ وی بی ایم پی ءَ رد کتگ – اے جاورھانی تہ ءَ ھمک روچ بلوچستان ءَ نودربر، استاد، وکیل، ڈاکٹر، سیاسی باسک ءُ دگہ پگرانی منوگر پاکستانی ایجنسیانی دست ءَ آوار جنگ ءُ شھید بوگ ءَ انت ھمے ھاتر ءَ وی بی ایم پی ءُ بلوچ راج ءَ پاکستانی ھاکم پارلیمنٹ ءُ دگہ ادارھانی سر ءَ ھچ وڑیں اوست نداریت پرچاکہ آ دوازدہ سالاں بگیر چہ دروگیں تسلی دیگ ءَ دیم شت نہ بوتگ ھمے ھاتر ءَ بلوچ راج اقوام متھدہ ءِ سر ءَ اوست داریت امیت کنت کہ ھما وڑ ءَ آئی ءَ رودراتکی تیمور ءُ کوسوو جیڑہ ءِ سر ءَ گامگیج زرتگ ھمے وڑ بلوچستان ءِ تہ ءَ ھم کنگ بہ بیت ءُ بلوچ راجداریں باسک ءُ دگہ پگرانی منوگریں مردماں ھوار سرجمیں بلوچ راج ءَ زورگیر ءِ زوراکیاں چہ رکینگ ءَ وتی کرد ءَ پیلو بہ کنت –