TBP Balochi

بلوچستان ءَ بلوچ ورنایانی بیگواہ کنگ ءِ درچ گوستگیں دو دھکاں گیش برجاہ انت کہ اود ءَ ورنا گرگ ءُ بیگواہ کنگ بوگ ءَ انت-

دومی نیمگ ءَ بیگواھیانی ھلاپ ءَ بلوچ زالبول روڈانی بند کنگ ءُ جاک ءُ کوکار کنگ ءَ گندگ بوگ ءَ انت کہ اود ءَ گیشتریں وھداں مردم زھرشانی کنگ ءَ گندگ بنت انت کہ ھمے درچ ءَ سندھ ءِ مزن شھر کراچی ءُ پاکستان ءِ بنجاھی شھر اسلام آباد ءَ دو ماہ ءِ کچ ءَ بلوچ کھول پہ وتی مردمانی یل کنگ ءِ ھاتر ءَ زھرشانی نندانک ءَ نشتگ انت-

بلوچ کھولانی لوٹ انت کہ بلوچستان ءَ بیگواہ کتگیں مردم دیم ءَ آرگ ءُ آمیدگس ءَ پیش کنگ بہ بنت ءُ بلوچستان ءَ بیگواھیانی درچ ھلاس کنگ بہ بیت انت-

ھمے وڑ ءَ گوستگیں روچ ءَ کیچ ءَ ھواریں دمگ بلیدہ ءَ پاکستانی پوج ءَ سَے ورنا آوار جنگ ءَ پد بیگواہ کتگ انت-

اھوالانی رد ءَ بلیدہ ءِ دمگ میناز ءَ گوستگیں روچ ءِ بیگاہ ءَ پوج ءَ بیڑ برتگ ءُ سَے کس آوار جتگ ءُ بیگواہ کتگ انت-

آوار جنگ بیتگیں مردمانی پجار شے حق ء نصر اللہ، وسیم ء نصرت اللہ ءُ عنایت اللہ ء در مھمد ءِ ناماں زانگ بیتگ انت- ھرسئیں مردم بلیدہ میناز ءِ جھمنند انت-

دمگی مردمانی رد ءَ اے سئینانی آوار جنگ ءَ پد بیگواہ انت ءُ دگہ مردمانی آوار جنگ ءُ بیگواہ کنگ ءِ ھال دیم ءَ ھم آیگ ءَ انت-

بلوچستان ءَ بیگواھیانی یک نہ کُٹوکیں درچے چہ گوست ءَ بندات بیتگ کہ اود ءَ ھروھد ءَ انسانی ھکانی گل وتی زھر ءِ درشان ءَ کنگ ءَ انت-

اسلام آباد ءَ بلوچ کھولانی زھرشانی نندانک ءَ دو ماہ سرجم بوتگ بلے سرکاری تکاں آھانی لوٹانی سر ءَ ھچ وڑیں گامگیج زیرگ نہ بوتگ ۔

کھولانی گْوشگ انت کہ اے وھد ءَ چہ ریاستی ادارگ ءُ انتزامیہ ءِ نیمگ ءَ کمک ءِ بدل ءَ ایوک ءَ آزار ءُ مشکلانی دیمپان انت۔

کھول گوستگیں دو ماہ ءَ چہ اسلام آباد ءَ زھرشانی نندانک ءَ نشتگ ءُ بلوچ یکجھتی کمیٹی ءِ رھشونانی دزگیر کنگ ءُ زورانسری بیگواھیں مردمانی یل کنگ ءِ لوٹ ءَ کنگ ءَ اَنت۔

زھرشانی کنوکیں مردمانی گشگ اِنت کہ آیاں سرکار ءِ دیم ءَ دو بنیاتی لوٹ ایر کتگ اَنت کہ آھانی تہ ءَ بی وائی سی ءِ رھشونانی ھلاپ ءَ بندشانی ھلاس کنگ ءُ چہ بلوچستان ءَ زورانسری بیگواہ کنگ ءِ ھلاس کنگ ھوار اَنت۔

زانگ بہ بیت کہ جولائی ءَ اسلام آباد ءَ نزیکیں مردمانی نیمگ ءَ جوڑ کتگیں زھرشانی کیمپ یک روچے پیسر پولیس ءَ پاد کتگ ءُ ایشی ءَ پد زھرشانی کنوکاں پچیں آسمان ءِ چیر ءَ نندگ ءَ لاچار بوتگ۔

کھولانی گشگ ءِ رد ءَ اے وھد ءَ آھاں پریس کلب ءَ روگ ءَ دارگ بیگ ءَ انت۔ زھرشانی ءِ جاہ ءِ کش ءُ گوراں چادر ءُ کنٹینر ایر کنگ بوتگ اَنت کہ چہ لس مھلوک ءُ رسانکدر ءِ چماں دور بہ بنت ءُ آھانی نندگ جاہ ءَ آپ ءُ بجلی بند کنگ بوتگ ءُ آ زورانسری ءَ پاد کنگ بیتگ انت-

کھولانی گشگ انت کہ آ اسلام آباد ءَ اتکگ انت پمیشکا ریاست ءِ لیکہ ھمیش انت کہ بلوچ گپ نہ کنت یا گپ کنگ نہ زانت۔ ما دو ماہ اِنت کہ اِد ءَ نشتگ ءُ گپ ءُ تران کنگ ءَ ایں بلے مارا مدام ڈلچار کنگ ءَ اَنت۔

آیانی رد ءَ اسلام آباد ءَ زھرشانی کنوکیں مردمانی گون ءَ ھما رویش ءَ کنگ ءَ انت کہ بلوچستان ءِ مھلوک ءَ گوں ھاسیں رنگ ءَ گندگ ءَ اَنت۔ پاکستانی میڈیا ءَ مئے سر ءَ بندش جنگ بہ بیت یا بلوچستان ءِ انٹرنیٹ ءِ بندش بہ بیت مھلوک ھر چیز ءَ گندگ ءُ سرپد بوگ ءَ انت۔

کھولاں گیش گْوشتگ کہ آیانی لوٹ گوشدارگ ءِ بدل ءَ بی وائی سی ءِ سروکی گیشتر ناجائزیں ریمانڈ ءَ روان دیگ بیگ ءَ اَنت ءُ بلوچستان ءَ زورانسری ءَ بیگواہ کنگ ءِ سلسلگ گیش بوتگ۔ ریاست مارا اے کلوہ ءَ دئیگ ءَ اِنت کہ شما ھر چنچو لوٹ بہ کن اِت، ھچ پرواہ نیست۔

آیام چہ اقوام متحدہ ، انسانی ھکانی ادارہ ءُ میان استمانی برادری ءَ دزبندی کتگ کہ آ بلوچستان ءَ برجاہیں زورانسری بیگواھی ءُ ریاستی ناشری ءِ ھلاپ ءَ گامگیج ءَ بہ زور اَنت ءُ سرکار ءَ را اے جست ءَ بہ کن اَنت۔

بلوچستان ءَ تیرگواریانی سبب ءَ مردمانی بیرانی ھمک روچ پیش آیگ ءَ انت ءُ گوستگیں روچاں تمپ ءَ ھمے ڈولیں یک تیرگواری ویلے ءَ یک مردمے بیران بیتگ ات ءُ مروچی تربت ءَ ناشناسیں مردماں تیرگواری کتگ ءُ یک مردمے کشتگ ءُ چہ پنجگور ءَ پوج ءِ دست ءَ آوار جنگ بیتگیں یک مردمے ءِ لاش دزکپتگ-

گیشیں اھوالانی رد ءَ بلوچستان ءِ کیچ ءِ بنجاھی شھر تربت ءَ شمبے ءِ روچ ءَ ناشناسیں سلاہ بندیں مردمانی تیرگواری ءَ یک مردمے بیران بوتگ۔

اے وئیل نیشنل بینک ءِ نزیک ءَ فرنیچر ءِ دکان ءَ بوتگ کہ اود ءَ نامالومیں مردماں تیرگواری کتگ۔ تیرگواری ءِ آسر ءَ کلگ ءِ نندوکیں عبدالغفار ء شیر دل سک ٹپیگ بوتگ۔ ءُ ٹپیگیں جاوراں نادراھجاہ ءَ سر کنگ بوتگ بلے چہ وتی ٹپاں بیران بوتگ۔

کوشکار تنی وھدی زانگ نہ بیتگ ءُ نانکہ بنشوناں دگہ گپ درشان کتگ انت-

ھمے وڑ بلوچستان پنجگور ءِ دمگ کوھنیں پروم کراس ءِ نزیک ءَ یک بیگواھیں مردمے ءِ تیرسپتگیں لاش دزکپتگ-

پولیس ءِ رد ءَ پنجگور ءِ کوھنیں پروم کراس ءِ دمگ ءِ نزیک ءَ یک مردے ءِ لاش دزکپتھ کہ آئی ءِ لاش ءِ سر ءَ تیرانی نشان گندگ بوتگ اَنت۔

پولیس ءِ رد ءَ لاش ءِ پجار اسداللہ ء ء ھاجی عبدالحالق ءِ نام ءَ بوتگ کہ آ دیز پروم ءِ نندوک اِنت کہ انوگ ءَ چیتکان ءَ جھمنندی بیتگ ۔

دمگی مردمانی گشگ اِنت کہ 9 ستمبر 2025 ءِ شپ ءَ پنجگور ءِ دمگ دیز پروم ءِ نندوکیں حاجی عبدالخالق ءِ چک اسداللہ پاکستانی لشکر ءَ پنجگور ءَ چہ وتی لوگ ءَ زورانسری ءَ بیگواہ کتگ۔

بلوچستان ءَ پاکستانی دست ءَ ھمود ءَ مردم بیگواہ بنت گڑا چریشی ءَ اود ءَ باز کم مردمانی زند واتری بیت بازیں مردمانی ٹپ ءُ ٹوریں لاش گندگ ءَ کاینت مھلوک وتی بے وسی ءَ زھرشانی ءَ ابید دگہ وڑ ءُ پیماں اے لاشانی دزکپگ بند نہ بیتگ-

گوستگیں روچ ءَ بلوچستان ءِ دمگ مستونگ ءَ پاکستانی لشکر ءِ بنشون ءَ ھم چار سلاہ بندیں مردمانی جنگ ءِ ٹاہ داتگ ات بلے تنی وھدی آ لاشانی پجار یا سلاہ بندانی نیمگ ءَ چوشین درشان دیم ءَ نیتکگ انت-

بلوچستان ءِ دمگ مستونگ ءَ ریل بمب تراک ءِ نشانگ کنگ بیتگ چریشی ءِ آسر ءَ ریل ءَ ھوار ٹریک ءَ تاوان رس اِتگ- اُرش ءِ زمہ واری بلوچ ریپبلکن گارڈز ءَ منّ اِتگ-

لیویز واکدار ءِ رِد ءَ تراک ٹریک ءِ نزیک ءَ بیتگ ءُ تُرندیں تراک ءِ توار دیر دیر اشکنگ بیتگ – پولیس ءُ لیویز کارندہ زوت وئیلجاہ ءَ سر بیتگ اَنت ءُ تراک ءِ تُرندی ءُ وئیل ءَ ھواریں مردمانی پٹ ءُ پول اش بندات کتگ-

تراک ءَ پد دمگ ءَ سیکورٹی ھائی الرٹ کنگ بیتگ، واکدار ءَ دلجمی داتگ کہ مستونگ ءُ آئی ءِ کش گوراں سک پٹ ءُ پول کنگ بیگ ءَ اِنت دانکہ دیمتر ءَ چُشیں وئیلاں داشت بہ کن ایں-

اے وئیل ءَ راجی پھاز ءِ درگت ءَ چہ تُرس ودی کتگ ءُ بلوچستان ءَ ٹرانسپورٹ ءِ ھاسیں راھانی نشانگ کنوکانی جُھد کنوکانی ھلاپ ءَ تُرندیں گامگیجے ءِ زرورت اِنت-

زانگ بہ بیت گوستگیں ماہ ءَ ھم دشت ءِ دمگ جعفر ایکسپریس ریموٹ کنٹرول آئی ای ڈی اُرش ءَ نشانگ کتگ چریشی ءِ آسر ءَ ریل شش بوگیاں چہ چپی بیتگ-

اے اُرش زمہ واری بلوچ سلاہ بندیں آجوئی لوٹوکیں یکجاھی بلوچ راجی آجوئی سنگر ( براس ءَ) منّ اِتگ اَت-

مروچی ریل سر ءَ تراک ءِ زمہ واری بی آر جی ءَ منّ اِتگ- گل ءِ جارکش دوستین بلوچ ءَ شنگ کتگیں درشان ءِ تہ ءَ گوشتگ کہ بلوچ ریپبلکن گارڈز ءِ سرمچاراں مروچی مستونگ ءِ دمگ دشت تیرہ میل ءِ ھند سر ءَ ریل ریموٹ کنٹرول آئی ای ڈی ءَ چہ نشانگ کتگ- اے تراک ءِ آسر ءَ ریل ءِ انجن ءَ ھوار بوگیاں سک تاوان رس اِتگ-

جارکش ءَ گوشتگ اے اُرش زمہ واری ءَ مئے گل بی آر جی منّ اِیت ءُ اے وڑیں کاروائی بلوچستان ءِ وتواجھی ءَ تاں برجاہ بنت-

‏نِمدی یے پہ شے پُل ءَ

نبشتہ کار : آئشہ بلوچ

دی بلوچستان پوسٹ

مھروانیں شے اِے ساهت ءَ شَپ ءِ نیم پاس ءِ 3 بَج بوگ اِنت من چہ واب ءَ بُست کُتگ اَت گوانکو چار اِت کہ چاراں چُنت بَج اِنت منی چّم اِسکرين ءَ تئی اَکس ءَ کپت اَنت کہ ترا سِگريٹ دپ ءَ اِنت ءُ تو بِچکندگ ءَ ئے گُڑا اِے ساهت ءَ دِل ءَ گُشت کہ پہ تو دو لبز نِبشتہ بِکن آں بلے منی ارواہ من نہ زان آں کہ کُجا بِندات بِکن آں ءُ کُجا آسر بِکن آں نانکہ نِبشتہ کنگ دو لبز زان آں بلے گوں نِزوريں لبزاں پہ تو دو لبز نِبشتہ کن آن ءُ من زان آں اَگاں ترا منی نِبشتانک سر بوت تو ٹھک دے ءِ ءُ گوش ئے اڑے بیبُو ھم نِبشتہ کنگ زانت تو وَ مئے نابُودی ءَ سرپد ئے پد ءَ من ءَ کلاگ ھم بَند ئے من زان آن ءُ گوش ئے کہ تو بِشتّیں اِے بِری تو شر کلاگ بَند بلے من وتی نِبشتانک ءَ سرجم کن آں شیھو من کجُام گپ ءُ کِسّہ ءَ نِبشتہ بِکن آں یار ؟ کُجام تُوسیپ ءُ ستا ءَ بہ کن آں تئی مھروانی ءِ اَگاں تَمردی ءِ؟ شیھو تو وَ گُشتگ اَت کہ منی ستا ءَ مہ کن اِت کسے کہ اَگاں تئی ستا کُت ترا بھ وش نہ بوتگ پرچاکہ تو زانتگ اَت کہ تو اَنچيں کِردے ءِ واهُند ئے توسيپ سَتا کنگ کسے ترا بھ دوست نہ بُوت تو گُشتگ اَت کہ وهد ھر کس ءَ ھر کسے کِرد ءَ وت پَدر کنت ۔

شيھو من زان آں اِے دمان ءَ تو گوں ناکو جان ءُ تاھر پُل ءُ ھاتم جان ءَ دیوان ءَ ئے تو کُلبر ءُ اُوتاک ءِ کِسّہ ءَ کنگ ءَ ئے ءُ ھاتم نِشتگ مچکدگ ءُ هامین ءِ کِسّہ ءَ کنگ ءَ اِنت ناکو من زان آں دائمی وڑ ءَ بے تواری ءَ نِشتگ ءُ بِچکندگ ءَ اِنت تاھر نِشتگ ءُ ھسپتال ءِ کِسّہ ءَ کنگ ءَ اِنت ءُ من زان آں تو هاتم ءَ کلاگ بَندگ ءَ ئے شيھو تو سرپد ببو کہ تلال جان ھم مزن ءُ ورنا اِنت ءُ تئی مھلبو ھم مزن ءُ شُوکيں جِنکے مھلبو من زان آں گوں دزگُھاراں نِند اِیت ءُ تئی مھروانی ءِ کِسّہ ءَ اَلّم کنت ءُ پہ تو پھر بَند اِیت ءُ من ترا هال دیگ لوٹ آں کہ دُژمن تئی برات ءُ همبلاں سِرين پُروش کُتگ سّسی نادُراہ کُتگ آ چہ وتی بُنجل ءَ نہ سُر اِيت شيھو تو گِندئے ھردیں گوں سُنٹُک ءَ ڈیکّ وارت گُڑا آئی ءَ هال بِد ئے کہ تئی گِس ءَ نِندُوکیں لشکر ھمُک هپتگ آس ءُ اَنگراں کُتگ شُمئے یار ءُ بیلاں ءُ سُنٹُک ءَ بُگش گومازی ءَ دُژمن تنیگت ءَ تئی نام ءِ اِشکُنگ ءَ پَچ لرز اِیت ،من زان آں الی جان ءَ شُمارا کُليں هال سر کُتگ اَنت شُما کُل ھم نیاد بیتگ ئے ٹھک داتگ ءُ کلاگ بَستگ دُژمن ،شيھو دُژمن ھمینکس نِزور ءُ پُروش داتگ تئی برات ءُ همبلاں کہ دست ئِے پہ چُک ءُ زالبُول ءَ كُتگ چہ مند ءُ تَمپ ءَ توارے کیت آ چہ وتی بُنجل ءَ پَچ لرز اِیت ۔۔

شيھو ترا گْوش آں ناکو جان ءَ چہ منی نیمگ ءَ اَمبازاں کن دست ءُ سران ئِے بہ چُک آئی ءَ بُگش کہ تئی بیبُک ءَ گُشتگ من ءَ پر تو بے کِساس زهیر کنت بُگش من تئی اَکس ءَ بھ چار اِت نہ کن آں ھردیں کہ چاران ئِے نِزوری بالاد ءَ گیشتر پُروش اِیت ءُ هلاس بیتارس شیپ گران بنت تاں مردُم ءَ بے وار کن اَنت ءُ ناکو ءَ بُگش من زان آں تو گوں من گِلّہ ئے کہ تئی داتگيں نام من مَٹ کُتگ بلے بُگش باور کن من ءَ تئی داتگيں نام گیش دوُست بیت ءُ من وشاں من ءَ ھمُک مردُم تئی داتگيں نام ءِ سر ءَ توار پِر بِکنت ءُ بُگش اِیت سری بازار ءَ من ءَ تنیگت ءَ کُل تئی داتگيں نام ءِ سر ءَ توار پِر جن اَنت ءُ ناکو ءَ بُگش سری بازار تنیگت ءَ پر تو مُوتک کار اِیت ءُ، تو من ءَ پھل کن کُربان آں کہ تئی گُڈی اَکس من گار کُت یار تو من ءَ گُڈی وهد ءَ اَکس دیم داتگ ءُ گُشتگ اَت اِے اَکس ءَ بِدار کہ رُوچے بہ چار ئِے ءُ مارا گیر بیار ئے شيھو گیر من ترا ھمُک روچ کاراں بلے یار تئی راھداتگيں گُڈی اَکس من گار کُت شيھو تِپليں مھمد تئی میار اِنت من زان آں تو مھمد ءِ شھیدی ءَ پَد ٹھک داتگ ءُ گُشتگ کہ رستر ءِ دُژمن ءَ مئے تِپلُکيں مھمد ھم نہ بَکش اِت گوں بَمب ءُ ٹوپاں شھید ئِے کُت، شیھو بلے اِے بری پَمن چنکيں بِچکند روان بِد ئے شیهو تو پہ زمین کُل بکشات اَنت من زان آں شُمئے رتکگيں هُون لگتمال ءُ دِرتہ پُچ ءُ گُژنگی راج ءَ وشھالی باندات ءِ واهُند کن اَنت شیھو مرچی ترا هال دیاں کہ بلوچستان ءِ کُنڈ کُنڈ ءَ ھرچ میتگ ءُ کوچگ ءَ رستريں دُژمن ءِ زُوراکی گوں تُرندی ءَ برجاہ اِنت آ همُک روچ تئی راج ءَ لاش دیگءَ اِنت همُک مات ءِ گُشان راڑ راڑ اِنت همُک گُهار ءِ جَبین ءَ آس بُن اِنت ءُ مئے باسما ئیں برات ءُ ورنایاں یک یک ءَ گار کنان ءُ شھید کنگ ءَ اِنت شيھو رستریں دُژمن ءَ کُشنڈہ ٹولی ءُ وتی چانوگِر بے کِساس بے لگام کُتگ اَنت آ همُک رُوچ ماتے ءِ دِل ءَ آس پِر دارگ ءَ اَنت همُک گُھار ءِ لُنٹ ءِ سر ءِ بِچکندگ ءَ گار کنان اَنت همُک مات ءِ آہ ءُ پِریات آزمان ءُ زمین ءَ پچ لرزین اَنت بلے من جَزم گوش آں کہ سیاه شَپ رُژناہ بیت
گُڈی ءَ کُليں شھیداں سلام کن کُربان۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 

تْرانگ: شہید کیّا جان

نِبشتہ کار: کیّازی بلوچ

دی بلوچستان پوسٹ

سنگت تئی ترانگ ءَ ￴کپتگ آں! من نہ زاناں چے نبشتہ بہ کناں یار، دل دردیگ ءُ چمّانی اَرس دارگ نہ بنت۔ تئی اِشتاپی ءَ ￴مارا باز بے تاھیر کُتگ، من نہ زاناں کُجا چہ گَپ ءَ ￴بندات بہ کن آں۔ پرچا کہ منی کِرّ ءَ گال نیست من ترا بہ گش آں ( شہید کیا پُل بِھشت ءَ ￴بات ئے￷)، چیاکہ من ءَ ￴تو اِے وڑ گْوشگ ءَ ￴دل نہ بہ ئے￷ یار۔ تئی روگ پمّن ءَ ￴باز گْران اِنت، نوں اِے میتگ ابیتک ابیتک اَنت بے تئیگ ءَ، ￴مارا وشّ ھَم نہ بیت ءُ من چَٹ بے تاھیر آں۔ من ءَ ￴انگت سنگت ءِ ￵گپّے یات اِنت، گْوشتگ اَت ئے: ” یار تو وتی میتگ ءِ مردماں سرپدی بہ دئے ءُ بہ گْوش بہ وان اِت۔“ وت سرپد بہ اِت، چوش کہ بازیں چیزّے یات اِنت بلے نبشتہ نہ بنت۔

کیّا جان : باریں ترا چونے ءَ ￵زالم ءَ اَچ ما دور کُت، تئی یات ءُ ￶زھیر بے کساس پیداک اَنت۔ ما چَٹ اِیوک ایں، تئی داتگیں مھر مارا باز اندوہ بکشک ءَ ￴اَنت۔ منی پگر، ￶ھیال ءُ لیکک تئی نیمگ ءَ ￴اَنت، دل ھما اِنت تئی پگر ءَ ￴کپتگ۔ تئی گِیر گیش ءَ ￴چہ گیش پیداک اِنت، تو پرچا چو اِشتاپ کُت۔ تئی سنگت ءُ ￶دوست ترا یات آرگ ءَ ￴اَنت، تئی انچیں مھرے ￵ھر مردم ءِ دل ءِ توک ءَ ￴زندگ اِنت۔

کیّا جان :مرچی چراگ تھار ءُ تئی رُوژنائی ھم شُتگ، بلے زھیر ءُ ￶یات انگت دل ءِ ￴توک ءَ ھست اَنت۔ پُل تئی گَیر گیش ءَ ￴چہ گیش پیداک اِنت، اِے گال گوں من ٹاھینگ ھَم نَہ بوَگ ءَ ￴اَنت۔ چیاکہ تئی انچیں مھرے مئے دل ءَ ￴ھِچ وڑ ءَ ￴در نئیت۔ پُل تئی مھر مئے دل ءِ ￵توک ءَ ￴زندگ اِنت، تئی زھیر ءُ ￶یات ￴بازیں مردم ءِ دل ءِ ￵توک ءَ ￴زندگ اِنت۔ تئی روگ مارا باز درد دیگ ءَ ￴اِنت، گندئِے￸ مرگ ھمروچ کئیت۔ ھرچ بنی آدم ءِ ￵سر ءَ کئیت، اگاں مرگ کئیت گُڑا اِے وڑیں مرگ ماتانی دل ءَ نزور کنت۔ زالم زور ءُ ￶زوراکی کن اَنت، ماتانی شھزادگیں بچّاں ￴پَچگِر اَنت گُڑا بزاں مات ءِ ￵چمّاں ھون ءِ ￵اَرس رِچ ایت۔

کیّا جان : تئی مات ءِ ￵دست ￵سر ءَ اَنت ءُ ￶چمّانی اَرس جیگ ءَ ￴چہ ترمپ ترمپ ءَ ￴رِچان اَنت، ھمے گْوشگ ءَ ￴اِنت منی پُلیں بچ تئی توار گار اِنت؟ تو چرے دنیا ءَ ￴نہ رپتگ ئِے ءُ بْیا واتر کن، منی چم تئی رھچار اَنت۔ منی پُل نہ زاناں ￴تو کُجا شُتے ءُ ￵ترا چونے ءَ دژمن ءَ ￴ترا اَچ من دور کُت؟ منی ساہ! اِے کُجام زالمیں دژمن اِنت کہ اِے وڑیں بچّان چہ ماتاں ￴دور کن اَنت؟ باریں چنچو بچ وتی مات ءَ ￴چہ دور اِنت؟

کیّا جان: تئی داتگیں مھر تھنا مئے کِرّ ءَ یل دات ءُ ￶شُت ئے￷، بس تئی مھر انگت مئے دل ءِ ￵توک ءَ زندگ اِنت۔ بِھشت تئی ھَنکیں ءُ گُلباگ ءِ شادھاں شادمان بات ئِے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت- 
￵

پاکستانی پوج ءِ تک ءِ بنشون ( آئی ایس پی آر) ءَ گوشتگ کہ بلوچستان ءِ دمگ مستونگ ءَ چیریں اھوالے ءِ رد ءَ سر بیتگیں اھوالانی تک ءَ آپریشن ءَ چار مردم بیران بوتگ انت۔

بیان ءِ رد ءَ آدینگ ءِ روچ ءَ بوتگیں آپریشن ءِ وھد ءَ پاکستانی لشکر ءُ سلاھبندانی میان ءَ جنگ ءُ چوپ بیتگ انت۔

آئی ایس پی آر ءَ گشتگ کہ آپریشن ءَ پد جنگجاہ ءَ چہ سلاہ، گولہ بارود ءُ تراکناکیں شورو دزکپتگ انت وھدے کہ دمگ ءَ سرچ آپریشن برجاہ انت۔

بلے آئی ایس پی آر ءَ انگت ءَ اے اُرش ءَ بیران بوتگیں مردمانی پجار پدر نہ کتگ انت۔

بلوچ سلاہ بندانی نیمگ ءَ ھم اے درگت ءَ ھم درشان دیم ءَ نیتکگ انت ءُ ناکہ لس اھوالانی اے دابیں اھوالانی بارو ءَ دیم ءَ اتکگ انت-

گوست ءَ پیش ءَ ھم پاکستانی پوج ءَ چوشیں ویلانی توک ءَ مردمانی جنگ ءِ ٹاہ داتگ بیتگ انت-

پاکستانی لشکر ءَ بلوچستان ءِ دمگ چہ کیچ ءَ یک مردمے دزگیر ءُ بیگواہ کتگ ءُ ھشت ماہ پیش چہ نوشکی ءَ بیگواہ بیتگیں دو مردم یل بیتگ ءُ وتی لوگاں سر بیتگ انت-

گیشیں ھالانی رد ءَ پاکستانی لشکر ءَ کیچ ءِ دمگ زامران نیوانو ءَ یک مردمے دزگیر کتگ ءُ بیگواہ کتگ کہ آئی ءِ پجار بور جان ء غوث بخش ءِ نام ءَ زانگ بیتگ۔

دمگی مردمانی رد ءَ بور جان 8 ستمبر ءَ دزگیر کنگ بیتگ ءُ چہ ایشی ءَ پد آ بیگواہ اِنت۔

دومی نیمگ ءَ ھشت ماہ پیش چہ نوشکی ءَ بیگواہ بوتگیں رسول بخش مینگل ءُ سھیل احمد یل بیتگ ءُ وتی گساں سر بیتگ انت-

بلوچستان ءَ زوراکی ءَ بیگواہ کنگ ءِ ویلاں انسانی ھکانی گلانی دلگوش وتی نیمگ ءَ ترینتگ انت-

بلوچستان ءِ زورانسری بیگواھی ءِ درچ گوستگیں دو دھکاں گیش برجاہ انت ءُ اود ءَ کمتر مردم یل بنت ءُ دگہ دو کچ گیش بیگواہ کنگ بیگ ءَ انت-

دومی نیمگ ءَ کراچی ءُ اسلام آباد ءَ بیگواھیانی ھلاپ ءَ گوستگیں بازیں روچاں زھرشانی نندانک برجاہ انت کہ اود ءَ کھول وتی مردمانی یل کنگ ءِ لوٹ ءَ کنگ ءَ انت-

روکپتی بلوچستان ءِ دمگ چھبار ، نیکشھر ، زاھدان ءُ سرباز ءَ جتا جتائیں دمگاں ایرانی لشکر ءِ دست ءَ پنچ مردم آوار جنگ ءَ پد بیگواہ کنگ بوتگ انت ھمے وڑ ءَ سراوان ءَ بیگواہ کنگ بوتگیں مردمے یل بوتگ ۔

سرباز ءِ دمگ اھوران ءَ ایرانی لشکر ءِ دست ءَ بلوچ ورنایے بیگواہ کنگ بیتگ ۔ ھالانی رد ءَ سرباز ءِ دمگ اھوران ءَ ایرانی لشکر ءَ میرزا رھمت زھی آوار جنگ ءَ پد بیگواہ کرتگ ، میرزا ءِ درگت ءَ گوشگ بوگ ءَ انت گیریج ءَ کار ءَ بوتگ ءُ گریبے مردمے ۔

دمگی مردمانی رد ءَ چیریں ادارھانی کارمنداں میرزا لٹ ءُ کُٹ کرتگ ءُ زوریں منانک گپتگ کہ ھکومت ءِ ھلاپ ءَ ناشر کاریں گلاں گوں ھوار انت۔

میرزا زی آمیدگس ءَ پیش کنگ بوتگ اود ءَ آئی ءِ سر ءَ گوں ناشرکاریں گلاں ھوار بوگ ءِ بھتام ءَ دوازدہ سال بندیگ بوگ ءِ ھُکم جَنَگ بوتگ ۔

ھمے وڑ ءَ زاھدان ءَ ایرانی لشکر ءَ بلوچ ورنایے آوار جتگ ۔

زاھدان ءِ شھر ءَ آزادی کوچگ ءِ تھ ءَ ایرانی لشکر ءِ چیریں ادارھانی کارمنداں بلوچ ورنایے آوار جنگ ءَ پد بیگواہ کرتگ ۔

بیگواہ کنگ بوتگیں مردم ءِ پجار اُمر ء پکیر اللہ انت کہ آ زاھدان جھمنند انت ۔

ھالانی رد ءَ اُمر ایرانی لشکر ءَ چہ وتی نان بھا کنگ دُکان ءَ آوار جتگ ءُ بیگواہ کرتگ کہ آئی ءِ ھچ وڑیں اھوال نیست ۔

ھمے وڑ چھبار ءِ جھمنندیں دو ورنا کہ راسک ءَ لشکری کیمپ ءَ پہ وتی پیشیانی دیگ ءَ شتگ انت لشکریاں اوار جتگ ءُ بیگواہ کرتگ انت ۔

زوربیگواہ بوتگیں مردمانی پجار ماجد ءُ ھلیل انت کہ ھر دو برات انت در مھمد ءِ چُک انت ۔

ھالانی رد ءَ آھانی سر ءَ کیسے بوتگ کہ آ ھلاس بوتگ ءُ دوئیں براس مدام راسک ءَ پہ وتی پیشیانی دیگ ءَ شتگ انت بلے اے رندی آ دزگیر کنگ بوتگ انت ءُ کھول ءِ جُست ءَ پرس ءَ رند زانگ بیتگ کہ چھبار ءِ زندان ءَ بندیگ انت-

ھمے وڑ نیکشھر ءَ ایرانی لشکر ءِ سپاہ ءِ چیر اندری بھر ءَ بلوچ ورنایے آوار جنگ ءَ پد بیگواہ کرتگ ۔

بیگواہ کنگ بوتگیں مردم ءِ پجار مھمد ھسین ء کریم بکش انت کہ آ نیکشھر ءِ دمگ ھیتان جھمنند انت ۔

گوشگ بوگ ءَ انت مھمد ھسن سپاہ ءِ چیر اندری کارمنداں اوار جتگ ءُ بیگواہ کرتگ کہ آئی ءِ ھھچ وڑیں اھوال نیست انت ءُ آئی ءِ کھول پریشان انت ۔

چہ سراوان ءَ زوربیگواہ کنگ بوتگیں رزا شھلی بُر مروچی یل بوتگ ۔

اھوالانی رد ءَ رزا شپ ءِ دو ءَ لشکریاں اوار جتگ ءُ دو روچ یکشلا لٹ ءُ کُٹ کرتگ کہ آں زی یل کنگ بیتگ ۔

دمگی مردمانی گوشگ انت لشکریاں رزا کڈن کرتگ کہ آں وتی کُشگ بیتگیں برازتک ءِ ھوناں بیھال بکنت ءُ لشکری کارمندانی پُشتا کیس جوڑ مکنت ۔

گڈی امباز
(وھدے زندگی ءَ ترا چہ مارا پُل ات)

نبشتہ کار: ابداللہ لتیپ

دی بلوچستان پوسٹ

لھتے مردم ھست کہ اچ مئے زندگی ءُ اچ مئے ھیالاں پہ ارزانی در نیا انت، آ چوں گرماگی لیوار سوچیں چاھڑاں سارتیں کوش ءِ شیکگ بنت ءُ وتی ھست بوھگ ءِ گواھی ءَ دے انت ،تاں جھان ھست انت آ شموشگ نہ بنت ، آ گوں وتی مھر، ایمانداری ءُ وپاداری ءَ مدام مئے دلانی تہ ءَ جاگہ کن انت ، بلے اے دابیں مردم سک ءَ کم بنت ءُ ازھار جان چہ ھما کمیں مردماں چہ یکے ات-

ازھار جان— منی ھمبل تو چہ سنگتی ءَ گیش یک مھروانیں براتے بیتگ ئے، تو چہ درستاں جتا ات ئے تئی دل سپاھی، تئی مھروانی، تئی مدامی بچکند ، کجام ھم وڑیں گرانیں ساھتاں چوں کوہ ءَ مھکم اوشتگ من ترا یک روچی ھم پہ جزباتی برانز گرگ ءَ نہ دیست،تو وتی تہ ءِ ھستیں درد ءُ رنج مدام گوں بچکنداں چیر دات انت،تئی پرپُکیں لُنٹانی سر ءَ بس تئی پل گوھریں بچکند ات انت کہ سھرا اِت انت، تو مدام گوں وتی بچکنداں دیوان وشنود کت انت ءُ سنگت کندینت انت ،من مدام ھمے سما کتگ کہ اے گمجتیں چاگرد ءِ تہ ءَ تو پہ مئے سھڑینگ ءُ دلگوش کنگ ءَ یک درمانے بیتگ ئے کہ تئی ھست بوھگ ءَ ما اے ٹپ ءُ ٹوریں چاگرد ءِ رنج شمشتگ انت۔

ازھار جان، من ترا ءُ مھاز ءَ چہ دیر انت کہ آشنا بیتگاں بلے گوں ترا ءُ مھاز ءَ چیزے وھد بیت سک ھور بیتگ آں ، انچو سما کناں کہ زندگی ءَ منا اے کسانیں موہ داتگ ات کہ ترا ءُ تئی مھر ءِ جھلانکی سرپد بباں، مئے میان ءَ اے کسانیں مدتے ءِ سنگتی ات بلے دائمی بوت تو زان ءِ سالانی سال چشیں مھروانیں برات سک کم دست کپ ایت، گوں تو مئے کندگ، مسکراہ دیوان ءُ کوچرائی برے برے ھاموشی، اے درست نی بس تھنا یات بیت انت پشت کپت انت تئی دوری ءِ رنجاں چوں ھما مُرگ ءَ پیسکگ ءَ آں کہ آئی ءِ کُدوہ آئی ءِ دنیا ءَ چی آئی ءَ پچگرگ بہ بیت-

تو پہ وتن انچوں شیدا اِت ئے چش کہ بالو پہ چراگ ءَ تو بلوچستان ءِ ھمک زیبائیا‌نی گندگ ءَ پند جت تو بلوچستان ءِ ابرم ءِ زیبائی چہ نزیک دیستگ ات انت سما کتگ ات انت ھمے کہ تو گلزمین ءِ زیبائی ءِ گپ پچ کت، تاں انچیں دریگے پچ بیت کہ آئی ءِ تہ ءَ گلزمین چو تئی دل ءِ چھرگ ءَ ات ، آئی ءِ تہ ءَ راسکوہ ءِ کوھانی بلندی چو تئی مھکمیں اوپار ءَ سھرا ات انت، اے نیلیں زِر تئی پگر ءِ جھلانکی درشان کنگ ءَ ات ، بے تواریں ریگزار تئی دانائی بے ھبری ءَ پیشدارگ ءَ ات ، تو مدام من ءَ ھمے سرپدی داتگ ات کہ گلزمین گوں دل ءِ چماں چارگی انت، ھما ندارگاں بگند کہ آ مئیم ءَ‌ نیا انت، ھما چیزاں گوش بدار کہ گوش دارگ نہ بنت ، زمین ءِ سینگ ءَ دست بجن آئی ءِ اندر ءِ اُپاراں بہ زان، تو اے زمین ءِ ابرم ءُ آئی ءِ زیبائی انچو مارا پیش داشت انت چوں کہ دیوانگیں مست ءِ شئیراں سمو ءِ دوستی بیان کنگ بیتگ ،وھدے تو بلوچستان کتگ تئی آ مھر شئیر ءُ گالاں گوں نبشتہ نہ بیتگ انت بلکیں گوں اکساں، تامُراں ، یاداشتاں ءُ زمین ءِ مھراں چہ سرِّچان بیتگ انت-

گوں من اگاں چیزے یات ءُ یاتگار پشت کپتگ۔۔ آ ھما کلاہ انت بگندے کسانیں چیزے بلے منی دل ءَ سک مزن انت تو کہ لوٹائین اتگ ات من سر ءَ کُت چار ات تو گشت بزیرے ترا شرتر لگ اتگ من ءَ وَ سک دوست بیت بلے من ءَ زیرگی نہ ات تو گشت نزیرے ئے من چگلے دیاں، تو ءُ مھاز ءَ من ءَ وس کُت کہ بزیرے ، اے کلاہ چوناہ ءَ من ءَ سک دوست بیت یکے کلاہ ءِ جند شوک ات چوں تئی چھرگ ءَ جنگ ءَ ات دومی تو پہ دل من ءَ سوگات کتگ ات پمیشکا من کس ءَ ھم ندات ، اے یاتگار من ءَ تئی نزیکی ءِ گُمان ءَ دنت ،بِلے تو جسمانی دروشم ءٔ چہ مارا سک دور شتگ ئے بلے انچو گمان بیگ ءَ انت تو مئے گور ءَ ئے مارا چارگ ءَ ئے ءُ بچکندگ ءَ ئے وتی ھاموشی ءِ تہ ءَ , اے کلاہ بگندئے پہ دگرانی واستا یک کسانیں بے ارزشیں چیزے بہ بیت بلے منی واستا یک چیدگے کہ تئی ھستانک ءَ پیشداریت کہ تو ھمد ءَ مئے میان ءَ ساڑی یے ءُ ھچبر شموشگ نہ بہ ئے۔

ازھار جان، گرانتریں ھبر ھمیش انت تئی اناگھی روگ، تو زان ئے اے روچی من وت سھب ءِ ھشت بج ءَ وپتاں سرجمیں شپ ءَ آگاہ بیتگاں چیا کہ وانگ ءَ چٹی ات ، پد ءَ من سکیں گرانیں وابے ءَ چہ بُست کت دانکہ چاراں درستاں وتی بستر چست کتگاں گپ ءَ انت من وتی بسترانی پیچگ ءَ لگ اتاں تاں ناکو گپ ءَ ات گشی ملا مجیب ءِ چک انت من ءَ ساہ ءَ یل کُت من ھما دمان ءَ آزمان ءَ جست کُت چی بیتگ گشی اڑے ابود ازھار ءِ جت من گشت چی گشگ ءَ ئے تو ؟ سئے رند ءَ گشتی ازھارے جت یار ازھارے جت، من ءَ باور نہ بیگ ءَ ات نشتاں دل درھگ ءَ ات ، پون ءَ پچ کناں چاراں تھنا تو ئے منی دیم ءَ ، یار ازھار چشیں اشتاپی گڑا؟ من ترا وت پیسرگیں مگرب ءَ گپ کُت مزاک ءُ کوچرائی کت مئے گڈی گپ ھمیش ات پاداں بدار تو گشت من وتی پاد داشتگ انت بلے ایدگہ سھب ءَ تو ۔

ازھاز جان تو گوں وتی اشتاپی ئیں روگ ءَ انچیں دردے مئے دل ءِ سر ءَ ایر کُت کہ بیدے تو درمان نہ بیت دل تاھیر ءُ آرام نہ گیپت، تئی بچکنداں چو سھب ءِ درپشوکیں بام ءِ وڑ ءَ تاھیر بکش اتگ اے ھم چہ مارا پُلگ بوت انت ، تئی نرمُکیں توار کہ مدام مارا سکینے داتگ چہ مارا گستا کنگ بیت ،بلے تئی پگر تاں جھان ھست انت مان ایت ، تو مئے دلانی تہ ءَ زندگ ئے ،مئے ھور کش اتگیں اکسانی تہ ءَ،مئے ھما وھد ءُ پاسانی تہ ءَ کہ ھور گوازینتگ انت ،ھما زمین ء٘ کہ تو پہ مدامی وتی سر ایر کتگ ءُ وش وابے-

ازھار جان ، تو زان ئے مستریں درد چی انت؟ ھمے کہ تئی گڈی دیدار نہ بوت گڈی رند ءَ ترا امبازاں زرت نہ کُت، دریگتیں اے ساھت ءَ من ھمود ءَ ساڑی بوتیناں وتی دست تئی گرانھبائیں سر ءِ سر ءَ ایر کتیں تئی پیشانیگ بہ چُک اتیں ترا ھال بداتیں کہ گوں تو چینچو مھر بوتگ تئی ھست بوھگ چینچو پُر ارزشت بوتگ مئے زند ءِ تہ ءَ ، دریگتیں گڈی رند ءَ ترا امبازاں بہ زرتیں ھما امباز کہ آئی ءِ تہ ءَ تئی سرجمیں مھر ، دوستی ، سنگتی پہ دائمی ھمے امباز ءِ تہ ءَ کید کُتیناں ۔۔۔ بلے پھل کن کہ گلامی ءِ داتگیں سوگاتاں ھپت دریا پُشت چگل داتگ کہ تئی گُڈی امباز ءُ دیدار نہ بوت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-