TBP Balochi

بلوچ لبریشن آرمی ءَ وتی آفیشل چینل ھکل ءَ آپریشن ھیروپ ءِ دومی بھر ءَ ھواریں سَے فدائینانی اکس ءُ اھوال شنگ کتگ انت-

فدائینانی توک ءَ ھما فدائین ءِ تامر بندی کلوہ ھم ھوار انت کہ آ وتی کھول ءُ ورنایاں کلوہ دیگ ءَ گندگ بیت اِنت-

ھکل میڈیا ءِ رد ءَ اولی فدائین ءِ پجار حامد بگٹی پنام ءِ گنی ء قاسم بگٹی جھمنند مچھ بولان ءِ نام ءَ کتگ کہ آئی ءَ جنوری سال دوھزار ءُ بیست ءُ چار ءَ بی ایل اے ءَ بھر زرتگ ءُ سال دوھزار ءُ بیست ءُ چار مجید بریگیڈ ءَ ھم وت ءَ ھوار کتگ-

ھکل میڈیا ءِ رد ءَ حامد بگٹی ءِ سیادی گھگیری ءِ راجدپتر بولان ءَ بیتگ کہ اود ءَ ھر دور ءَ بلوچ راج ءَ زورگرانی ھلاپ ءَ جنگ کنان ءَ راجدپتر ءَ نمیران کتگ- پاکستان ءِ زورگری ءِ بندات ھم بولان ءِ گھگیری ءِ یک چیدگی رنگے ءَ زانگ بیت انت- شھید فدائین حامد بگٹی ءَ ھما دودمانی گھگیری برجاہ داران ءَ بلوچ راجی آجوئی ءِ جنگ ءَ ستکی دورشم ءَ بھر زرتگ-

ھکل میڈیا ءِ رد ءَ ھامد بگٹء سکا وانندگیں سرمچارے بیتگ کہ آ جنگی راھبند، لشکری سنچ ءُ چیرجنگی ریپکانی تکنیکاں زانشت داریں مردمے بیتگ- آئی ءَ جنگی جاور ءِ وھد ءَ زمین ءُ مولمی جاوراں یک مزنیں دزرسے بیتگ – بولان ءِ پٹ ءَ آئی ءَ زورگریں پوج ءِ ھلاپ ءَ جتا جتائیں وھداں کاروائیانی سر ءَ مزنیں کرد پیلو کتگ انت- بی ایل اے ءِ ھوار بوگ ءَ پد کسانیں وھدے ءَ آئی ءَ مجید بریگیڈ ءَ ھوار بوگ ءِ پیسلہ کتگ کہ آئی ءِ زانشت ءُ ستک ءِ درشانی ءَ کنت-

آپریشن درہ بولان فیز ٹو ءِ وھد ءَ جعفر ایکسپریس ءِ ھائی جیکنگ کنگ ءَ کاروائی ءِ وھد ءَ بنداتی لڑ ءَ بیتگ – آ آپریشن ءِ وھد ءَ آئی ءَ فرنٹ لائن ءَ بوگ ءَ بازیں روچاں دشمن ءِ سر ءَ سکا اُرش کتگ ءُ دشمن ءَ را سکا مزنیں تاوان داتگ-

آپریشن ھیروپ ٹو ءَ آ دالبندین ءِ میدان ءِ بھر مند بیتگ آ بنداتی لڑ ءَ بیتگ ءُ وتی جنگی زانشت ءَ بھادری ءَ جنگ کنان ءَ زورگریں پوج ءُ آئی ءِ ھیڈکوارٹر ءِ توک ءَ بیگ ءَ زوگر پشتکنزی ءَ لاچار کتگ – شھید فدائی ھامد بگٹی دالبندین ءِ میدان ءَ جنگ کنان ءَ شھید بیتگ-

ھکل میڈیا دومی فدائین ءِ پجار شیھک بلوچ پنام ءِ سبزو ء انور بلوچ جھمنند تربت ءِ نام ءَ کتگ کہ آئی ءَ سال دوھزار ءُ بیست ءُ چار ءَ بی ایل اے ءَ بھر زرتگ-

شیھک سبزو ءِ تامر بند ھم بی ایل اے ءَ شنگ کتگ کہ فدائین بوگ ءَ پیش یک گاڑی ءِ توک ءَ نشتگ ءُ وتی کھول ءُ بلوچ ورنایاں کلوہ دیگ ءَ انت – ‘ آ تامر بند ءَ گوش ایت اے جنگ ءَ چہ پیش ما ھمے جیڑ اتگ کہ جنگ تھنا مئے زند ءِ بھر انت آ گوش ایت دشمن ءَ مئے زبان اَچ ما پچ گپتگ، مئے ماس ءُ گوھاران روڈانی سر ءَ گران کنت، مئے ورناہ ءُ کماشاں لٹ شاپ ءُ بیگواہ کنت چرے سبب ءَ ھم یک پیسلہ ءِ زرتگ کہ تھنا اے چیزانی رکینگ دشمن ءَ گوں مِڑگ انت’-

ھکل میڈیا ءِ رد ءَ فدائی شیھک پنام ءِ سبزو ءِ سیادء تربت ءَ بیتگ آئی ءَ سال دوھزار ءُ بیست ءُ چار ءَ بی ایل اے ءَ بھر زرتگ – آئی ءَ کمو وھد ءَ بے تواری ءَ وتی زمہ واری سرجم کتگ انت- ائی ءِ ستک داری ءَ آ سرمچارانی بنداتی لڑاں ھوار بوتگ – آئی ءَ وتی نامدار بوگ ءِ جھد نہ کتگ بلے آئی ءَ جنگ ءِ میدان ءَ وتی جاڑیگ بوگ ءِ پجار زندگ داشتگ-

آپریشن ھیروپ ون ءِ وھد ءَ آ فرنٹ لائن ءَ بوتگ دشمن ءِ سر ءَ تچک ءَ اُرشاں ھوار بوتگ ءُ ٹپی بوتگ – اے جاوراں بازیِن مردم پشتکنز بنت بکے سبزو ءَ واتری وتی نام ءَ کتگ- جانسلامتی ءَ پد آ پیش ءَ گیش مھکم بوتگ ءُ لس رنگ ءَ دوبر میدان ءَ جاڑیگ بوتگ-

آپریشن ھیروپ ٹو ءِ وھد ءَ آ دالبندین ءِ میدان ءَ فوجی بنجل ءِ سر ءَ وی بی آئی ای ڈی ءِ اُرش ءِ نشانگے کتگ ھمے درچ ءِ گڈی سرجمی بیتگ- آئی ءَ پیسلہ زانت ءُ سرپدی ءَ کتگ – آئی ءِ شھیدی یک ھنچیں سرمچارے ءِ چیدگ انت کہ آئی ءَ جد ءُ جھد ازاروکی پشتمان ناں بلکیں یک اوپار داریں زمہ واری ءِ دروشم ءَ کتگ-

سیمی فدائین ءِ پجار بالاچ شاہ پنام ءِ میراس مھر ء شاہ بانز جھمنند بوستان تمپ کیچ ءِ نام ءَ کتگ – آئی ءَ اگس دوھزار ءُ بیست ءُ سَے ءَ بی ایل اے ءَ بھر زرتگ ءُ اکتوبر دوھزار ءُ بیست ءَ سَے ءَ وت ءَ مجید بریگیڈ ءِ بھر مند کتگ- جنگی میدان، کاھان، کوہ سلیمان ءَ بیتگ –

فدائی بالاچ شاہ ءِ سیادی تمپ ءِ دمگ بوستان ءَ بیتگ کہ اے ھنچیں دمگے اود ءَ گھگیری تھنا سیاسی لیکہ نی انت بلکیں چاگرد ءِ بھرے – اگست دوھزار ءُ بیست ءُ سَے ءَ بی ایل اے ءَ ھوار بوتگ پد ءَ کمے وھد ءَ آئی ءَ وتی راستانکی ءُ رھبندی لیکھانی درچ ءَ گل ءِ تہ ءَ وت ءَ زمہ واریں سرمچارے کتگ – اکتوبر دوھزار ءُ بیست ءُ سَے ءَ مجید بریگیڈ ءَ بھر زورگ آئی ءِ لشکری ءُ زھنی چن ءُ لانچ ءِ تچکیں پدراھی انت-

آپریشن ھیروپ ءِ دومی بھر ءَ دالبندین ءِ میدان ءَ آ آپریشن کمانڈ بوتگ – اے گچینی میدان ءَ آئی ءَ نا ایوک ءَ منسوبہ بندی ءُ فیلڈ کوارڈی نیشن کتگ بلکیں چار ءُ تپاسی ھم کتگ بنداتی درچ ءَ بیتگ ھمراھانی رھشونی کتگ تو ھنچیں زمہ واری کنان ءَ نمیران بوتگ ئے –

بلوچستان ءِ جتاجتائیں دمگاں پاکستانی پوج ءِ سر ءَ بیتگیں اُرشانی زمہ واری بی ایل اے ءُ یو بی اے ءَ منّ اِتگ اَنت-

بلوچ لبریشن آرمی ءِ جارکش جیئند بلوچ ءَ شنگ کتگیں درشان ءِ تہ ءَ گوشتگ کہ مئے سرمچاراں مستونگ ءِ دمگ اسپلنجی، مَرو ءَ زورگریں پاکستانی پوج ءِ کاروان ھما وھد ءَ سنگر گپتگ ءُ اُرش ءِ نشانگ کتگ وھدے آ دوازدہ گاڑیانی کاروان پیشگامی کنگ ءَ بیتگ اَنت-

جارکش ءَ گْوشتگ کہ سرمچاراں راکٹاں ءُ دگہ مزنیں سلاھاں چہ زورگریں پوج ءِ کاروان نشانگ کتگ وھدے کہ بی ایل اے اسنائپر ٹولی ءَ زورگریں پوج گیش جانی تاوانانی دیمپانی کتگ اَنت، اُرش ءَ زورگریں پوج ءِ سے کارمند جاہ پہ جاھی مرتگ ءُ بازین ئے ٹپی بیتگ اَنت-

جارکش ءَ گوشتگ بی ایل اے ءِ سرمچاراں دہ فروری ءَ پنجگور ءِ دمگ پروم ءَ زورگریں پاکستانی پوج ءِ بازیں گاڑیاں ھمگرنچیں یک کاروانے ءِ سر ءَ سنگر گپتگ نشانگ کتگ، سرمچاراں مزنیں سلاہ کارمرز کتگ ءُ زورگریں پوج ءِ چار کارندہ کشتگ ءُ بازین ئِے ٹپی کتگ اَنت-

جارکش ءَ گوشتگ کہ زورگریں پوج ءَ اے میان ءَ کواڈ کاپٹر کارمرز کتگ کہ آ سرمچاراں جتگ ءُ دور داتگ-

جارکش ءَ گوشتگ دگہ یک اُرشے بی ایل اے ءِ سرمچاراں گوستگیں شپ ءَ ڈیرہ مراد جمالی ءَ زورگریں پاکستانی پوج ءِ یک چوکی یے دستی بمب اُرش ءَ نشانگ کتگ چریشی ءَ سے کارندہ ٹپی بیتگ اَنت، اے کارندہ ٹریک ءِ پلگاری ءِ واستا اوشتوک بیتگ اَنت-

جارکش ءَ گُڈی ءَ گوشتگ کہ بلوچ لبریشن آرمی اے اُرشانی زمہ واری ءَ منّ اِیت ءُ اے تچک کنگ لوٹ اِیت کہ اے اُرش ھمکروچ ءِ ھساب ءَ تاں برجاہ دانکہ زورگریں پوج بلوچ سرڈگار ءَ دراھگ ءَ لاچار نہ بیت-

ھمے وڑ یونائیٹڈ بلوچ آرمی ءِ جارکش مزار بلوچ ءَ رسانکدر ءَ وتی شنگ کتگیں درشان ءِ تہ ءَ گوشتگ کہ یو بی اے ءِ سرمچاراں مرچی سھب ءِ ساھت 11:15 ءِ نزیک ءَ کچھی ءِ بنجاھی شھر ڈھاڈر ءُ سنی ءِ میانی ھند نوھشم ءَ زورگریں پاکستانی پوج ءِ دہ گاڑیانی کاروان گوں ٹوھیں سلاھاں ھما وھد ءَ نشانگ کتگ کہ آ وتی مزنیں بنجل ءِ نیمگ ءَ روگ ءَ بیتگ اَنت۔ چہ اُرش ءِ آسر ءَ دو کارندہ جاہ پہ جاھی مرتگ ءُ بازیں کارندھے سک ٹپی بیتگ اَنت ۔

جارکش ءَ گڈی ءَ گوشتگ کہ اے وڑیں اُرش داں بلوچستان ءِ آجوئی ءَ برجاہ بنت-

ٹی ٹونٹی ورلڈ کپ ءِ مروچی دگہ سے گوازی یو اے ای ءُ اوگان ، انگلیڈ ءُ اٹلی ، آسٹریلیا ءُ سری لنکا ءِ میان ءَ کنگ بوتگ انت کہ اوگان، سری لنکا ءُ انگلیڈ ءَ وتی گوازی کٹ ات انت ۔

مروچی اولی گوازی اوگان ءُ یو اے ای ءِ میان ءَ ماں دھلی ءَ ارون جیٹلی گوازی پٹ ءَ کنگ بوتگ کہ اوگان ءَ ٹاس کٹ اتگ ءُ اول سرا بالنگ کنگ ءِ شور کتگ ۔ یو اے ای ءَ گوازی کنان ءَ بیست اورانی تہ ءَ یکسد ءُ شست رن جوڈ کتگ انت ۔

دومی نیمگ ءَ اوگان ءَ نوزدھمی اوور ءَ پنچ وکٹانی تاوان ءَ یو اے ای ءِ داتگیں ٹارگٹ پروش اتگ ءُگوازی کٹ اتگ ۔

مروچی بوتگیں دومی گوازی ایڈن گارڑن کولکتہ ءَ انگلیڈ ءُ اٹلی ءِ میان ءَ بوتگ کہ انگلینڈ ءَ ٹاس کٹ اتگ ءُ بیٹنگ کنگ ءِ پیسلہ کتگ ۔
انگلیڈ ءَ گوازی کنان ءَ بیست اوورانی تہ ءَ ھپت وکٹانی تاوان ءَ دو سد ءُ دو رن جوڈ کتگ کہ اٹلی ءَ اے ٹارگٹ پروشت نہ کتگ ءُ آئی ءَ بیست اوورانی تہ ءَ بس یکسدو ھپتاد ءُ ھشت رن جوڈ کتگ ءُ دراہ آوٹ بوتگ انت ۔

مروچی ٹی ٹونٹی ءِ سیمی گوازی پلکیلی انٹرنیشنل کرکٹ گوازی پٹ بلاگولہ ءَ آسٹریلیا ءُ سری لنکا ءِ میان ءَ کنگ بوتگ ۔ اے گوازی ءَ سری لنکا ءَ ٹاس کٹ اتگ بلے اولسر بالنگ کنگ ءِ شور کتگ ۔ گڈا آسٹریلیا ءَ بیست اوورانی تہ ءَ 181 رن جوڈ کتگ ءُ دراھیں لیبی آوٹ بوتگ انت ۔ گڈا سری لنکا ءَ ھژدہ اوورانی تہ ءَ دو وکٹانی تاوان ءَ آسٹریلیائے داتگیں ٹارگٹ پروشتگ ءُ گوازی وتی نام ءَ کتگ ۔

مات ھوری ءِ ودار آسر نہ بوت بلے آئی ءِ زند جھان ءَ آسر بوت، آئی ءَ چاردہ سالاں گرنچ بیتگیں گم ءُ رنجاں جھان ءَ لڈ ءُ بار کت-

7 اگست 2012 ءَ چہ شال ءَ زورانسری بیگواہ کنگ بوتگیں گل محمد مری ء بھار خان مری ءِ مات اماں ھوری وتی بیگواھیں چک ءِ ودار ءَ بیران بوتگ۔

امّاں ھوری ءَ وتی چک ءِ سلامتی ءِ واستا شال ءُ اسلام آباد ءَ زھرشانیاں بھر زرتگ ءُ 14 سال ءَ کمیشن ءُ آمیدگساں وتی بیگواھیں چک ءِ کیس ءِ گھگیری برجاہ داشتگ بلے آئی ءِ چک سالانی سال ءَ پد ھم دیم ءَ آرگ نہ بوتگ۔

آئی ءِ زھگ گل محمد مری پاکستانی لشکر ءِ دست ءَ گرگ ءَ پد زورانسر ءَ بیگواہ کنگ بوتگ۔

امّاں ھوری ءِ بیرانی ءِ سر ءَ بلوچ یکجھتی کمیٹی ءَ گْوشتگ کہ آ گھگیری ءِ چیدگ اِنت، یک انچیں مات یے کہ 2012 ءَ وتی چُک ءِ زورانسری ءَ بیگواھی ءَ پد ھچبر نہ اوشتاتگ۔سی سال ءَ گیش ءُ یکشلیں درداں ابید آئی ءَ وتی چُک ءِ شوھازگ ءُ زھرشانی، کیمپانی تہ ءَ برجاہ داشتگ۔

آئی ءَ گوشت کہ لٹ شاپی، بیھار، گُرس ءُ تھنائی ءِ برداشت کنگ ءَ ابید ھم من پدکنز نی بوتگ ۔ بلوچ راجی مچی ءَ زورانسدی گندگ ءَ پد 2023 ءَ گوں ڈاکٹر ماہ رنگ بلوچ ءَ کیمپ ءَ نشتگ ءُ مچی ءِ ھاتر.ءَ دالبندین ءَ داں سپر کتگ۔ چاردہ سال ءَ آ ھر نماز ءَ وتی چُک ءِ نام ءَ گپت ءُ 2025 ءَ اسلام آباد ءَ سر بوھگ ءَ پد ھم انساپ ءِ لوٹ ءَ ات۔

بی وائی سی ءَ گشتگ کہ مرچی اماں ھوری ءَ ودار ءِ تہ ءَ اے دنیا یلہ داتگ۔ آ گڈی رند ءَ وتی چُک ءَ گوں وتی دیدار ءَ ابید شت ، آئی ءِ نشانے ءِ شوھازگ ءَ ابید زند یل دات ۔ بلے آھانی جھد مروچی ھم زندگ انت، ھر مات ءِ تہ ءَ کہ اکسے دست ءَ اوشتاتگ، ھر توار ءِ تہ ءَ کہ راستی ءُ انساپ ءِ لوٹ ءَ کنت۔

آئی ءَ گشتگ کہ اماں ھوری ءَ پروش نہ وارت ، آ ھما وڑا شت کہ آ زندگ ات، گوں مھر، اوپار ءُ گھگیری ءَ۔ اللہ پاک نوں آئی ءِ دل ءَ سکون بہ دنت ءُ آئی ءِ چُک ءَ بہ زانت کہ آئی ءِ مات ءَ داں وتی گڈی ساہ ءَ آئی ءِ نام یل نہ داتگ۔

گُڈسر ءَ گل ءَ گْوشتگ کہ ما لوٹ کن ایں کہ زورانسری ءَ بیگواھیں درستیں مردم زوت ءُ ایمنی ءَ یل کنگ بہ بنت، دانکہ ماتانی اے دراجیں ءُ دردناکیں ودار ھلاس بہ بیت۔

بلوچستان ءِ جتا جتائیں جاھاں نُھ مردم زورانسری بیگواہ کنگ بیتگ انت ءُ یک بیگواھیں مردمے ءِ لاش دزکپتگ-

چہ بلوچستان ءِ دمگ کولواہ ءُ نوشکی ءَ ھوار 9 مردم زورانسری بیگواہ کنگ بیتگ اَنت۔

پاکستانی لشکر ءَ کولواہ ءِ دمگ آشال ءَ چہ جتا جتائیں وھداں دو برات زورانسری بیگواہ کتگ اَنت۔

ھالانی رد ءَ پاکستانی لشکر ءَ 12 فروری ءَ شپ ءِ دو بج ءَ کیچ ءِ دمگ کولواہ آشال ءَ 18 سالی ئیں ورنا اعجاز بلوچ ء عبدالغفور چہ آئی ءِ لوگ ءَ چست کتگ ءُ بیگواہ کتگ۔

پد ءَ 15 فروری ءِ شپ ءَ اعجاز بلوچ ءِ مستریں برات نواز بلوچ ء عبدالغفور چہ تربت ءَ کولواہ ءَ آھگ ءِ وھد ءَ لوکل گاڑی ءَ ایر کنگ ءَ پد زورانسری بیگواہ کنگ بوتگ۔

چَہ نوشکی ءَ ھپت مردم جتاجتائیں وھداں پاکستانی لشکر ءَ زورانسری بیگواہ کتگ انت ۔

نوشکی ءِ دمگ قاضی آباد ءِ نندوکیں عبدالقدیر بلوچ 30 جنوری ءَ روچ ءِ ساھت سئے بج ءِ نزیک ءَ شال ءِ دمگ لیاقت پارک ءَ پاکستانی لشکر ءَ دزگیر کتگ ءُ ناشناسیں جاہ ءَ برتگ۔

مردمانی گوشگ انت، عبدالقدیر بلوچ ء زُلپکار ءِ کار ءُ کسب ڈیزل پمپ ءَ کار ءَ بیتگ آ وتی کاروباری جیڑھانی سلسلگ ءَ شال ءَ اتکگ بیتگ کہ اود ءَ آ آوار جنگ بیتگ۔

دیمترا ظفر اللہ ء عمر شاہ ءِ جھمنند قاضی آباد ءُ محمود ء حاجی نور احمد جھمنند بدل کاریز 6 فروری ءَ وتی لوگانی سر ءَ بیڑ ءِ وھد ءَ زورانسری ءَ بیگواہ کنگ بوتگ۔

نودربر عبدالحق ء غلام نبی جھمنند جمال آباد، نودربر کامران بلوچ ء حاجی محمد حسن جھمنند جمال آباد 11 فروری بیگاہ ءَ چہ وتی لوگاں زورانسری ءَ بیگواہ کنگ بوتگ انت۔

ھمے وڑ شاہ زمان ء عبداللہ ءِ جھمنند جمال آباد ءُ نصیر احمد ء عبداللہ ءِ 12 فروری ءِ شپ ءَ وتی لوگانی سر ءَ بیڑ ءِ وھد ءَ زورانسری ءَ بیگواہ کنگ بوتگ اَنت۔

ھمے وڑ ءَ چہ سوراب ءَ بیگواہ بیتگیں یک مردمے ءِ لاش دزکپتگ-

کھول ءِ رد ءَ گوستگیں ماہ ءَ چہ شال ءَ بیگواہ بیتگیں کلی ھتھیاری گدر ءِ جھمنندیں جنید احمد ء علی احمد ریکی ءِ لاش دزکپتگ-

دمگی مردمانی رد ءَ ھدا مرزی جی ٹی اے بلوچستان سوراب ءِ سروک علی احمد ریکی ءِ زھگ بیتگ-

لاش ءِ دزکپگ ءَ پد دمگ ءَ زھر ءِ درشان کنگ بیتگ-

ھمے وڑ پنجگور ءَ گوستگیں روچ ءَ دزکپتگیں دگہ یک لاشے ءِ پجار سعید ء مولا داد جھمنند کاٹاگری پنجگور ءِ نام ءَ بیتگ-

چاگردی مردمانی رد ءَ گوستگیں یک ھپتگے ءِ توک ءَ بلوچستان ءَ بازیں کچے ءَ لاش دزکپتگ کہ آیانی توک ءَ تھنا چہ پنجگور ءَ ھشت لاش دزکپتگ انت کہ ھما لاشانی پجار بیتگ انت آ پیسر ءَ کھولاں بیگواھی ءِ ھال پدر کتگ انت-

دومی نیمگ ءَ بلوچ یکجھتی کمیٹی ءَ گوشتگ سوراب ءِ جھمنندیں بیست ءُ دو سالی ءِ نودربر جنید احمد 23 جنوری 2026 ءَ شال ءِ دمگ چلڈرن ھسپتال ءَ ایگل پورس ءُ کانٹر ٹیررازم ڈیپارٹمنٹ ءِ کارندھاں آوار جتگ کہ چریشی ءَ یک ماھے ءَ پد آئی ءِ لاش ایسٹرن بائی پاس ءِ نزیک ءَ دزکپتگ کہ آئی ءِ دست ءُ پاد بندوک بیتگ ءُ جسم ءَ تیرانی ٹپ پِر بیتگ انت کہ آ بندیگ جاہ ءَ کشگ بیتگ-

زندانیانیانی مَٹی ءِ سر ءَ بی ایل اے ءِ الٹی میٹم ءِ واستا ایوک ءَ شش روچ ھست۔

بلوچ لبریشن آرمی ءِ رد ءَ اے ماہ ءَ بلوچستان ءِ ھزدار ءِ دمگ اورناچ ءَ درگیری ءِ وھد ءَ دزگیر بوتگیں ھپت پاکستانی لشکر ءِ یل.کنگ ءُ زندانیانی بدلی ءِ پیشکش ءِ واستا دگہ شش روچ ھست۔

بی ایل اے ءَ وتی میڈیا چینل ”ھکل“ ءَ پاکستانی لشکر ءِ دزگیریں سپاھیگ محمد شھرام ء محمد ریاض علی جھمنند شیخ پورہ ویڈیو شنگ کتگ کہ آ شیخ پورہ ءِ میتگ امیر سنگھ پنجاب ءِ نندوک اِنت ءُ آئی ءِ تہ ءَ پاکستان ءَ را دگہ شش روچ دیگ بوتگ کہ آ بندیگاں بدل بہ کنت۔

شنگ بوتگیں ویڈیو ءِ تہ ءَ گْوشگ بیتگیں کارندہ وتی پجار، دمگ ءُ رُتبہ ءِ گْوشگ ءَ اِنت ءُ اے وھد ءَ آئی ءِ دست ءَ پاکستانی لشکر ءِ سروس کارڈ ءُ دگہ کاگد ھم گندگ بنت۔

بی ایل اے ءَ گوستگیں روچ ءَ یک بیانے ءِ تہ ءَ پاکستانی لشکر ءِ سرجمیں کارندھانی اکس ءُ ھال شنگ کتگ ات ءُ گْوشتگ ات کہ آپریشن ھیروپ دوم ءِ وھد ءَ پاکستانی لشکر ءِ 17 کارندہ دزگیر کنگ بوتگ اَنت کہ ایشانی تہ ءَ 10 کارندہ گوں بلوچ ءُ دمگی پولیس ءَ سیادی ءِ سبب ءَ ھال دیگ بوتگ اَنت۔

جارکش ءِ رد ءَ دگہ ھپتیں کارندہ کہ گوں زورگیریں پاکستانی لشکر ءِ سرجمی ءَ یونٹاں سیادی دار اَنت ءُ بی ایل اے ءِ دست ءَ بوتگ اَنت آھانی سر ءَ بلوچ راجی آمیدگس ءَ سرجم ءَ کیس کنگ بوتگ کہ آھانی سر ءَ جنگی جرم ، شھری آبادی ءِ ھلاپ ءَ کارروائی ، زورانسری بیگواھیانی تہ ءَ کمک کنگ ءِ کاروائی ھم ھوار انت ۔

بی ایل اے ءَ اے گپ ءِ پدر کنگ ءَ گشتگ کہ گل ءِ کمانڈ کونسل ءَ جنگ ءِ میان اُستمانی رھبند ءُ بندیگانی بدلی ءِ ھوالگ ءَ رھبنداں ھیال ءَ دارگ ءَ پاکستان ءَ را ھپت روچ ءِ مھلت دیگ ءِ پیسلہ کتگ اے وھد ءِ تہ ءَ اگاں ریاست سرجمی ءِ رنگ ءَ جنگی بندیگانی بدلی ءِ واستا جاڑیگی پدر کنت گڑا اے ھپتین پوجی کارندہ بلوچ جنگی بندیگانی یل دیگ ءِ مٹی بیت کنت-

مرچی شنگ بوتگیں نوکیں ویڈیو ءِ تہ ءَ گْوشگ بیتگ کہ پاکستان ءَ نوں دگہ شش روچ ھست ۔

گڈسر ءَ گل ءَ گشتگ ھپت دزگیریں فوجی کارندھانی یل کنگ ءِ شرت بلوچ بندیگانی یل کنگ انت۔ اگاں آیوکیں روچاں زورگیر ریاست ءِ نیمگ ءَ چہ املی ءُ دودمانی نہ بوت گڑا آھاں داتگیں سزا ءِ موت بلوچ راجی آمیدگس ءِ پیسلہ ءِ رد ءَ سرجم کنگ بیت انت۔

ٹی ٹوینٹی ورلڈ کپ ءِ گوازی برجاہ انت مروچی بیست ءُ ھپتمی گوازی انڈیا ءُ پاکستان ءِ میان ءَ ماں سری لنکا کرکٹ گوازی پٹ ءَ کنگ بوتگ کہ اے گوازی ءَ پاکستان ءَ شست ءُ یک رناں انڈیا ءِ دیم ءَ پروش وارتگ ۔

دلگوش کرزیں کہ پاکستان ءَ انڈیا ءِ دیم سک باز گوازی ءَ پروش وارتگ ۔ کزا یک گوازی ءِ کٹ اتگ ئے بلے گیشتر گوازیاں آئی ءَ پروش وارتگ ۔ ھردے کہ بیٹسمین انڈیائے بالرانی دیم کائنت آ گیشتر پچ ءِ سرا اوشتات نہ کن انت ، مروچیگیں گوازی ءَ ھم ھمے وڈ بوت۔

ٹی ٹوئنٹی ورلڈ کپ ءِ تہ سرجمی ءَ نھ رند ءَ پاکستان گوں انڈیا ءَ دیم پہ دیم بوتگ بلے آئی ءِ کٹ اتگیں گوازی یک ءِ بوتگ کہ سال 2021 ءَ آئی ءَ انڈیا ءِ دیم ءَ ماں ارب امارات ءَ بوتگیں ٹی 20 گوازی ءَ پاکستان ءَ انڈیا دھ وکٹاں پروش داتگ پدا رند ءَ ناکہ پیسرا پروش دات کتگ ۔

مروچیگیں گوازی ءَ پاکستان ءَ ٹاس کٹ اتگ بلے اولسر ءَ بالنگ کنگ ءِ شور کتگ ۔ انڈیا ءَ 20 اوورانی تہ ءَھپت وکٹانی تاوان ءَ یکسد ءُ ھپتاد ءُ پنچ رن جوڈ کتگ ۔

پاکستان ءَ انڈیا ءِ داتگیں ٹارگٹ پروشت نہ کتگ ءُ ھژدہ اوورانی تہ ءَ آیاں بس 114 رن آورتگ ءُ درسیں لیبی آوٹ بوتگ انت ھمے وڈا مروچیگیں گوازی ءَ انڈیا ءَ 61 رناں گوازی کٹ اتگ ۔

بلوچستان ءِ دمگ نوشکی ءَ پاکستانی پوج ءِ نیمگ ءَ چہ جتاجتائیں دمگاں کاروائی ءِ ھال اِنت-

دمگی اِھوالکار ءِ غریب آباد ءُ بُنجاھی بازار ءِ دمگ انگیر ءَ کتگ ءُ دکان بند کتگ اَنت وھدے کہ دمگ ءَ سُر ءُ پُر دارگ بیتگ اَنت-

اِھوالکار ءِ گوشگ اِنت کہ پاکستانی پوج ءَ اے دمگ ءَ لشکر کشی بندات کتگ چریشی ءَ پد دمگ ءَ پوج ءِ انگیر ءَ اِنت- بلے سرکاری واکدار نیمگ ءَ ھچ وڑیں ھال دیم ءَ نیتکگ-

ھمے وڑ گوستگیں روچ ءَ پاکستانی پوج ءَ نوشکی ءَ کلی مینگل ءُ قادر آباد دمگ سرجمی ءَ انگیر ءَ کتگ لوگانی سر ءَ بیڑبرتگ- پوج ءَ اے میان ءَ دو کماشیں مردم حافظ عبدالستار مینگل جھمنند قادر آباد ءُ میر عبدالرزاق بادینی آوار جتگ ءُ ناشناسیں جاھے ءَ برتگ-

زانگ بہ بیت اکتوبر 2022 ءَ میر عبدالرازق بادینی ءِ چُک فرید بادینی سی ٹی ڈی ءَ ھاران ءَ یک دروگیں میڑے ءَ کُشتگ اَت – فرید بادینی 28 ستمبر 2022 ءَ چہ شال زورانسری بیگواہ کتگ اَت –

پاکستانی پوج ءَ نوشکی ءِ جتاجتائیں دمگاں کلی جمالدینی، کلی مینگل، قادر آباد ءَ لشکر کشی ءَ پد مروچی غریب آباد ءَ لوگ لوگ ءَ لشکر کشی کنگ ءَ اِنت وھدے کہ اے میان ءَ بازار زورانسری بند کتگ –

گوستگیں روچ ءَ نوشکی ءِ ھند کلی مینگل ءُ قادر آباد ءِ دمگ ءَ لوگ پٹ ءُ پول کتگ اَنت لھتے لوگ تاوان داتگ اَنت-

دمگی اِھواالکار ءِ رِد ءَ انّگیں لشکر کشی ءِ میان ءَ کم چہ کم بیست دو مردم آوار جنگ ءِ ھال اِنت ءُ آیانی پجّار انگت نہ بیتگ اَنت-

بلوچستان ءِ دمگ پنجگور ءَ گوستگیں ھپتگ ءِ تہ ءَ 8 لاش دزکپتگ انت۔ چہ دمگی مردم ءُ کھولانی رد ءَ ھما درستیں لاش کہ تاں انوگ ءَ پجارگ بوتگ اَنت آ زورانسری ءَ بیگواہ کنگ ءِ آماچیں مردمانی لاش اَنت۔

نوکیں وئیل ءِ تہ ءَ مرچی پنجگور ءَ دگہ دو لاش دست کپتگ انت کہ ایشانی تہ ءَ یکے جنگیان ء عبدالرشید ءِ نام ءَ زانگ بوتگ کہ گْوشگ بیتگ کہ آ پنجگور ءِ دمگ پروم ءِ نندوک اِنت۔ دگہ لاشے ءِ انگت ءَ پجار نہ بوتگ۔

کھول ءِ رد ءَ جنگیان 26 مئی 2025 ءَ پنجگور ءِ دمگ پروم ءَ پاکستانی لشکر ءَ گوں چار دگہ سیاد ءُ وارساں ھوار آوار جتگ ءُ کھول ءِ گشگ اِنت کہ دگہ مردم پد ءَ یل کنگ بوتگ اَنت بلے جنگیان ءِ بابت ءَ ھچ وڑیں ھال ءُ اھوال دیگ نہ بوتگ۔

جنگیان ءِ مستریں برات ملک میران ءَ سوشل میڈیا ءِ سر ءَ وتی بیان ءَ گْوشتگ کہ آئی ءِ برات پاکستانی لشکر ءُ آیانی چیردستی ءَ ھستیں سلاہ بندیں گلے ءَ دزگیر کُتگ ءُ دمگی درچ ءَ ڈیتھ اسکواڈ ءِ نام ءَ زانگ بیت ءُ پاکستانی لشکر ءِ کیمپ ءَ برتگ اش۔

دمگی چاگردی مردمانی رد ءَ گوستگیں ھپتگ ءِ تہ ءَ چہ پنجگور ءَ 8 لاش دزکپتگ انت۔ آھانی گشگ انت کہ ھما درستیں لاش کہ پجار کنگ بوتگ انت آ ھما مردمانی بوتگ انت کہ آہانی لوگ ءِ مردماں پیسرا چہ آہانی زورانسری ءَ بیگواہ کنگ ءِ اھوال دیم ءَ آورتگ انت ۔