TBP Balochi

بلوچ وومن فورم ءَ وتی شنگ کتگیں درشان ءَ گوشتگ بلوچی زبان ءِ مزن نامیں راجی شائر مبارک قاضی ءِ نمیرانی ءَ دو سال سرجم بوگ ءَ ما آئی ءَ دروت ندر کن ایں۔ آئی ءِ نمیرانی ءَ بلوچ لبزانک ءِ پڑا یک انچیں جاھے ھالیگ کُت پہ اے جاہ ءِ پُر کنگ ءَ کرن درکار بنت۔ مرچی واجہ مبارک قاضی مئے میان ءَ ساڑی نہ اِنت بلے آئی ءَ گوں شائری لبزاں کماتگیں گوھریں دانک پہ مدامی رھشونی کن اَنت۔ نمیرانیں مبارک قاضی نہ ایوک ءَ یک زبان دوستیں شائرے بلکیں آ گوں شائرے ءَ ھوار یک کاملیں بلوچے اَت۔ مبارک قاضی ءَ وتی شائری ءِ تہ ءَ نہ ایوک ءَ زند ءِ زیبائی نازینتگ اَنت بلکیں آئی ءں شائری ءِ تہ ءَ راجدوستی ءِ سکین ءُ راجی ایردستی ءِ درد ءُ تورشت گندگ بنت۔

آئی ءَ گوشتگ نمیرانیں واجہ مبارک قاضی ءَ چہ وتی ازم ءِ درانگازی ءَ ھمے پیش داشتگ کہ راجانی تہ ءَ شائرانی پرز ءُ کرد چے بیت؟ آئی ءَ چہ وتی راجدوستی شائری ءِ سوب ءَ لوگ ءِ سر ءَ دستی بمب ارش، زندانی بوگ ءُ دژمنانی بیھار درس دیستگ اَنت بلے چہ وتی راجدوستی ءِ پگر ءُ لیکہ ءَ پد نہ کنز اتگ۔ آئی ءَ وتی شائری ءِ تہ ءَ راجی ورناھان ءَ چہ سلکاریاں درکپگ ءُ راجدوستی ءِ جھد ءِ تہ ءَ ھوار بوگی ءِ سکین داتگ۔ آئی ءَ بلوچ ءِ نیل بومیں زر ءَ بگر دانکہ بلوچستان ءِ ماتکوہ وتی شئیرانی تہ ءَ نازینتگ اَنت۔ واجہ قاضی ءَ وتی راجی ایردستی ءِ گم پر بوتگ۔ آئی ءَ بیگواھیں مردمانی مات ءُ چکانی درد مار اتگ اَنت۔ آئی ءَ دژمن ءَ را دژمن گوشتگ ءُ وتی راجی پدریچ پہ مزاھمت ءَ سکین داتگ۔

آئی ءَ گوشتگ واجہ مبارک قاضی نہ ایوک ءَ راجی دردواری ءِ گپ جتگ بلکیں آ ھما شائر بوتگ کہ آ ریاستی زوراکیانی ھلاپ ءَ بوتگیں زھرشانیانی تہ ءَ ہم پہ مزاھمت ءَ گندگ بوتگ۔ نمیرانیں واجہ مبارک کازی ءِ بے مٹیں کرد ءُ ازم پہ بلوچ ورنا ءُ نوکیں ادیباں یک مادنیں کشکے۔

وومن فورم ءَ گوشتگ مبارک قاضی بلوچ راج ءِ ھما شائر اِنت کہ آ چہ وتی آشوبی شائری ءِ سوب ءَ زندگی ءَ ھم شرپ دیگ بوتگ آئی ءِ ازم ءُ کرد ءِ سر ءَ جتائیں دیوان ءُ پروگرام برجم دارگ بوتگ اَنت۔ راجدپترانی تہ ءَ ھما شائر ءُ ادیب ابدمان بنت کہ آیانی تہ ءَ راجدوستی پگر گندگ بیت گڑا نمیرانیں واجہ کازی ھما شائر اِنت کہ آئی گوں وتی ازم ءَ انساپ کرتگ ءُ ازم ءِ لوٹانی پیلو کنگ ءِ جھد کرتگ۔

آئی ءَ گوشتگ نمیرانیں مبارک قاضی ءِ شائری ءِ آسر اد ءَ نہ کٹ ایت بلکیں نسل داں نسل ءَ روان کنت ءُ آ ھمک دھر ءَ گوں جوانیں دانکاں یاد کنگ بہ بیت۔

انسداد ءِ ناشرکاری ءِ مٹینگ ءِ ایکٹ

ٹی بی پی شونگال

بلوچستان ءِ مانگش اتگیں سرکار ءَ اسمبلی ءَ انسداد ءِ ناشرکاری ءِ ایکٹ 1997 ءَ مٹینگ منگ بیتگ، چریشی ءِ تک ءَ ھنچیں بھرگ ھوار کنگ بیتگ انت آئینِ پاکستان ءَ دیگ بیتگیں بنکی انسانی ھکاں تچک ءَ گوں ٹکر جن انت- اے مٹینتگی ءَ پد بلوچستان ءَ گچینی ارزی نامہ چیریں آمیدگساں ھلائینگ بنت اِنت – اے گچینی نزام ءَ جج، وکیل، گواہ ءُ ازری ءَ ھواریں دراھیں مردمانی پجار چیر دیگ بیت انت، گواھانی کوڈ ءُ چیدگی نام دیگ بنت انت، پیشی جیلاں یا چیریں جاھاں ورچوئل رنگ ءَ کنگ بیت ءُ توارانی مٹینگ ءَ ٹیکنالوجی کارمرد کنگ بیت انت-

ہیومن رائٹس کمیشن آف پاکستان، وکلا برادری ءُ بلوچستان ءِ سیاسی پاٹیاں اے کانون ءِ سر ءَ زھر ءِ درشان کتگ- آیانی رد ءَ اے مٹینگی آئین درجہ فیئر ٹرائل ءِ ھک ءَ لگتمال کنت- گمان انت کہ اے کانون ھمے رنگ ءَ سیاسی ایراد گر ءُ باسکانی ھلاپ ءَ سِلاہ ءِ ڈول ءَ کاربندگ بیت انت- ھنچش گوست ءَ انسدادِ ناشرکاری ءِ رھبند ءَ کاربندگ بیتگ-

اے گامگیج بلوچستان ءَ ریاستی جبر ءِ ھلاپ ءَ مھلوک ءِ زرمبشت ءِ ھلاس کنگ ءَ یک کڑی یے- مزن واکدار مشتگیں سرکار ءِ زور ءَ اے دابیں کانون آرگ انت کہ چریشی ءِ سبب ءَ سیاسی رھشون ءُ باسکانی بندیگ سکا آسان بیت انت- بیست ءُ ششمی آئینی مٹینتگی ءَ پد آمیدگس پیش ءَ انساپ ءِ دیگ ءَ بے سوب بیتگ انت- بلوچستان ءِ آمیدگس یکشل ءَ ریاستی زور ءَ پولیس ءِ ریمانڈ ءَ گیش کنگ ءُ بلوچ یکجھتی کمیٹی ءِ رھشوناں جیلانی کنگ ءِ امل ءَ کانونی نامو کنگ ءَ انت-

بلوچستان ءِ جنگ آماچیں جاورھال، اود ءَ سیاسی باسک پیش ءَ زورانسری بیگواھی ءُ ارزیانی آماچ انت، اے مٹینگی ایکٹ ءَ پد آیانی ھلاپ ءَ ریاستی کاروائی گیش ترندی بیت انت – اے کانون اسل ءَ انساپ ءِ نام ءَ نا انساپیانی آئینی پوشاک ءِ گور ءَ دیگ ءِ یک جھدے، چشکہ بلوچستان ءِ انیگیں سیاسی نیستی ءَ گیش سانمند کنت-

بی وائی سی ءَ گوشتگ کہ زورانسری آوار جنی ءِ درد پہ کھولانی ھاتر ءَ جانی ءُ ماژگی چیلنج ءِ جوڈ بوتگ ۔ دومی نیمگ ءَ پاکستان بنجاھی شھر اسلام آباد ءَ بیگواھیں مردمانی کھولاں مروچی شست ءُ دو روچ سرجم بوتگ کہ زھرشانی نندانک ءَ نشتگ انت ۔

بلوچ یکجھتی کمیٹی ءَ اھوالکاراں گوں تران کنان ءَ گوشتگ کہ زورانسری آوار جنیانی بگیری ءَ زھرشانی کنوکیں زاھد الی ءِ پت ءِ جاور مروچی سک نگیگ بوتگ انت چریشی مروچی زھرشانی بنجل برجم کنگ نہ بوتگ مروچی اے زھرشانی بنجل ءَ چل ءُ دو روچ سرجم بوگی بوتگ ۔

بی وائی سی ءَ گوشتگ کہ زاھد بلوچ کراچی شھدربرجاہ ءِ میان استمانی سیادی ءِ نودربر ءِ بوتگ کہ آ ھبدہ جولائی 2025 ءَ چہ لیاری ءِ وتی رکشہ ءِ ھمراھی ءَ آوار جتگ ءُ بیگواہ کتگ ۔

بی وائی سی ءَ گوشتگ کہ زاھد الی ءِ زورانسری آوارجنی ءِ بگیری ءَ آئی ءِ کھول ءَ ماں کراچی ءَ زھرشانی گدان ءِ اڈ داتگ کہ داں چل روچ ءَ برجم بوتگ ۔

آئی ءَ گوشتگ کہ زاھد ءِ پت ابدل ھمید ہیپاٹائٹس ءِ نادراہ ئے بلے پدا ھم آئی ءَ گدان برجم داشتگ بلے مروچی انگتی آێی جاور ھراب بوتگ انت کہ دومی رند ءَ زھرشانی گدان بند کنگ بوتگ ۔

درشان ءِ تہ ءَ گوشگ بوتگ کہ اے نگیگیں ساھت ھمے راستی ءَ زاھر کن انت کہ زورانسری آوار جنی ءِ سان بس یک مردمے ءِ سرا ناں بلکنہ سرجمیں کھول ازیت ءِ آماچ بیت انت ۔

کھول بے باوری جاورانی تہ ءَ زند گوازینگ ءَ لاچار انت ءُ وتی ھستی ءُ جانسلامتی ءِ کیمت ءَ انساپ ءِ ھاتر ءَ توار چست کنگ ءَ انتئے۔

کھول ءُ بلوچ یکجھتی کمیٹی یکبرے پدا لوٹ کنت کہ زاھد الی ءَ ھوار درسیں مردم وش ءُ سلامتی یل کنگ بہ بنت ۔

دومیئےنیمگ ءَ مروچی پاکستان ءِ بنجاھی شھر اسلام آباد ءَ بلوچ یکجھتی کمیٹی ءِ سروک ءُ زورانسری آوار جنگ بوتگیں مردمانی کھولانی نیمگ ءَ زھرشانی نندانک ءَ شست ءُ دو روچ سرجم بوتگ انت کہ انگت برجاہ اِنت۔

چہ سرکار ءِ نادلگوشی ءُ ھور ءُ موسم ءِ ھرابی ءَ ابید کھول انگت ءَ پہ وتی لوٹانی ھک ءَ نشتگ اَنت۔ چہ جتائیں بھرگاں سیادی داروکیں مردم پہ آیانی ھمدردی ءَ پیداک اَنت۔

کھولانی گوشگ اِنت کہ ما اے شست ءُ دو روچ ءِ میان ءَ وڑیں جنجالانی دیمپان بوتگ ایں، ھور، گرم ءُ پولیس ءِ زوراکیاں ابید ما انگت ءَ گوں پر ایمنی ءَ زھرشانی ءَ نشتگ ایں۔ بلے چہ سرکار ءِ نیمگ ءَ کس پہ مئے گوش دارگ ءَ نہ یتکگ ءُ سرکار مئے لوٹانی منگ ءَ نہ اِنت۔

آیاں گوشتگ کہ مئے لوٹ ھمیش اَنت کہ بی وائی سی سروک یل کنگ بہ بنت ءُ زوربیگواھیں مردم دیم ءَ آرگ ءُ کھول انساپ دیگ بہ بنت۔ بلوچستان ءَ زوریں بیگواھی درچ ھلاس کنگ بہ بیت۔

آیاں گوں درسیں بھرگاں سیادی داروکیں مردماں لوٹ کرتگ کہ آ مئے گون ءَ توار چست کنگ ءَ وتی کرد ءَ پیلو بہ کن اَنت۔

اسلامی تعاون تنظیم(اوآئی سی ) ءِ سیکریٹری جنرل حسین طہ ءَ گتر ءِ وتواکی ءُ سلامتی سرا اسرائیل ءِ ارش ایرجتگ ءُ گوشتگ کہ اے میان استمانی کانود ءُ اقوام متھدہ چارٹر ءِ بگیری ئے ۔

دوشمبے ءِ روچ ءَ ارب اسلامی سربراھی ءِ مچی ءَ تران کنان ءَ آئی ءَ چہ میان استمان ءَ لوٹ کتگ کہ آ وتی زمہ واریاں پیلو بہ کنت تاکہ اے گپ باوری ءِ بہ بیت کہ اسرائیل وتی درسیں کتکاریانی جوابدھی ءَ لوٹارینگ بیت گتر ءِ سرا ارش پلستینی راج ءِ بگیری ءَ آئیءِ کتکاریانی گیشی ئے ۔

آئی ءَ سلامتی کونسل ءِ قرادادانی لوٹانی سرا زور داتگ کہ جنگ بندی بہ بیت سرجمیں گزہ ءَ انسانی کمک سر کنگ بہ بیت ءُ چہ اودا اسرائیلی پوج در کنگ بہ بیت ءُ پلستین سرکار ءَ اے واک دیگ بہ بیت کہ وتی زمہ واریاں پیلو بہ کنت ۔

آئی ءَ گوشتگ کہ اے سروکی اجلاس ءِ برورداں چہ ارب اسلامی یکجھتی ءَ پائدگ رس ایت ۔

اے اجلاس ءَ اردنی شاہ عبداللہ دوم ءَ گوشتگ کہ اسرائیل ءَ روکپتی کنارہ ءَ درکانودی گامگیجاں چہ دو ریاستی گیشگیواری راھے سرا اڈاند پیداک کتگ ءُ منصفانہ ایمنی ءِ تاوان داتگ انت ۔
آئی ءَ گوشتگ کہ اسرئیلی سرکار لبنان ءُ شام ءِ سلامتی ءَ یکشل ءَ ھترہ ءِ جوڈ کنگ انت ءُ مروچی گتر ءِ وتواکی ءُ سلامتی ءِ سرا ارش کنگ ءَ انت ۔

اردن بادشاہ ءَ میان استان ھم کمے اشی ءِ زمہ دار گوشتگ ، آئی ءَ گئےشتگ کہ اسرائیل وتی زوراکیاں کنگ ءَ انت پرچاکہ میان استمان ءَ آ کانوداں برزتر بوگ ءِ موکل داتگ ۔

اے مچی ءَ تران کنان ءَ عراقی سروزیر محمد شیعہ السوڈانی ءَ گوشتگ کہ گتر ءِ سرا اسرائیل ءِ ارش بیمناک ءُ میان استمان کانودانی بگیری ئے ۔

آئی ءَ گوشتگ چہ اے ارش ءَ اے جیڑھے کم کنگ جھد ءَ تاوان رس ایت ءُ اے یک کلوھے کہ پہ زور ایمنیں گیشگیواری امکان ھلاس کنگ بوتگ انت ۔

آئی ءَ گوشتگ کہ اسرائیل چوش گوشگ انت کہ آ مھلوک زور ءَ میان استمانی سیمسراں مٹ کنت کہ چریشی ءَ میان استمانی کانودانی بگیری درور زاھر انت ۔

آئی ءَ اے گپ پدر کتگ ءُ گوشتگ کہ گزہ ءُ روکپتی کنارہ ءَ ھرچی کہ بوگ ءَ انت آ نوں بس کانود ءِ بگیری دارگ نہ انت بلکیں اشیا دیمتر ءَ بے کساس انسانی جیڑہ ءُ دمگی سلامتی سرا ھم بلاھیں ھترھےئے۔

بلوچستان ءَ پاکستانی پوج ءِ سر ءَ اُرشانی درچ یکشل ءَ برجاہ ءَ اَنت ھمکروچ ءِ ھساب ءَ بمب اُرش ءُ سلاہ بندیں اُرشانی نشانگ کنگ بیگ ءَ اِنت-

گوستگیں دو ماھانی تہ ءَ پاکستانی پوج ءِ سر ءَ تُرندیں اُرشانی نشانگ کنگ بیتگ اَنت اے اُرشانی میان ءَ میجر ءُ کیپٹناں ھوار بازیں کارندھے کُشگ ءُ ٹپیگ کنگ بیتگ اَنت ، بُنجلانی دستیگ کنگ ءَ ھوار سلاہ ءُ گاڑی ھم برگ بیتگ اَنت-

اے اُرشانی زمہ واری گیشتر بلوچ آجوئی لوٹوکیں سلاہ بندیں گل ، بلوچ لبریشن آرمی ، بلوچستان لبریشن فرنٹ ، بلوچ ریپبلکن گارڈز ، بلوچ یکجاھی گل براس ءَ منّ اِتگ اَنت-

ھمے وڑ کیچ ءِ دمگ مند ءِ ھند شند ءَ ناشناسیں سلاہ بندیں مردماں پاکستانی پوج ءِ کاروان ءَ ھوار یک گاڑی یے ریموٹ کنٹرول آئی ای ڈی اُرش ءَ نشانگ کنگ بیتگ-

اے بمب تراک ءِ آسر ءَ کیپٹن وقار کاکڑ ءَ ھوار نائیک جنید، نائیک عصمت، لانس نائیک خان محمد، سپاھی زھور احمد بیران بیتگ اَنت-

تراک ءَ 125 ونگ ءِ گاڑی نشانگ کنگ بیتگ وھدے کہ بیرانیانی تہ ءَ گیشی گمان بیت کنت، اُرش زمہ واری انگت ھچ گل ءَ نہ زرتگ اَنت-

دومی نیمگ ءَ ھُزدار ءِ تھسیل زھری ءَ پاکستانی پوج ءِ جیٹ بالگردانی بمبگواری ءَ چہ لَس آبادیاں تاوان دیمپانی کنگ کپتگ-

ٹی بی پی ءَ دزکپتگیں ھالانی رِد ءَ گوستگیں شپ ءَ پاکستانی پوج ءَ جیٹ بالگرد ءُ ڈرون بالگرداں چہ بمبگواری کنگ بیتگ- دمگی اِھوالکار ءِ رِد ءَ بمبگواری ءَ چہ لَس آبادی نشانگ کتگ اَنت چریشی ءَ چہ تاوان ھال اِنت بلے گیشیں ھالانی آیگ پش کپتگ اَنت-

آیانی گوشگ اِنت کہ بمبگواری ءَ پد داں دیراں بالگرد دمگ ءَ بال بیتگ اَنت- پاکستانی واکدار ءَ تنی وھدے ھچ وڑیں درشان شنگ نہ کتگ-

زانگ بہ بیت گوستگیں ماہ ءَ بولان ءِ جتاجتائیں ھندانی سر ءَ پاکستانی پوج جیٹ بالگرداں چہ بمبگواری کتگ-

ازھار اِش جتگ

نبشتہ کار: ایسی ھمل

دی بلوچستان پوسٹ

ایردستی ھما شومیں ھوپ اِنت کہ ھمک دروشم ءَ ترا تاوان بار کنت پہ تئی راجی مال ءُ مڈیانی لُٹ ءُ پُل کنگ ءَ تئی چُکچینی ءَ کنت مرچی ھمے ایردستی ءَ ازھار جان ھم چہ مارا پُل اِت اے کسہ پہ مارا نوک نہ اِنت ۔۲۷مارچ ۱۹۴۸ ءَ بگر داں کہ روچ ء مروچی ایردستی ءُ زلم ءُ زوراکیانی آماچ اِنت دانکہ ما سما کنیں ھمے کسہ اِنت مئے چمانی دیم ءَ زاھر اِنت مرچی ازھار جان ھم ایردستی ءِ کسہ ءَ ھوار بیت ۔

ازھار جان چہ ھما شوک ءُ زیبا مھروان تِریں کارستاں چہ یکے اَت کہ مدام کندگ ءَ اَت بچکندگاں گُش ئے آئی ءِ لنٹاں گوں اجبیں مھرے ھست اَت داں کہ مرگ ءِ گڈی ساھت ءَ ھم ازھار جان بچکندگ ءَ اَت ۔

سُھب ءِ سر ءَ من چہ واب ءَ پاد اتکاں من ءَ پہ نیٹ ءَ لازمیں کارے ھست اَت وت ءَ گیگ ءُ گور کت دیم پہ بازار ءَ کہ جاگھے ءَ نیٹ کارمرز (use) کناں بلے من بازار ءَ اتکاں من ءَ سنگتے ءَ دگہ جاگھے ءَ بُرت گوں دو کلاک ءَ پد من سنگت ءِ کر ءَ چہ پارک بوتاں نی من گشت کہ رواں اسکول ءِ کواٹر ءَ نیٹے کارمرز کناں من کہ کیمپ ءِ دپ ءَ سر بوتاں من دیست کہ ازھار ءِ کماش واجہ ملا مجیب، زبیر ءُ سر انس اُشتوک اَنت من جست کت زبیر چی بوتگ؟ بلے زبیر ءِ ھاٹیگ ھلاس اَت زبیر ءَ پسو نہ دات گڑا من لوٹ اِت کہ انس ءَ جست کناں بلے پیسر ءَ چہ راستیں کش ءَ آوازے اتک ( بھائی اُس طرف جائیں) ازھار ءِ کماش ءَ مارا گشت بیا اِت آ کش ءَ من انگت زانگ ءَ نہ اِتاں کہ چی بوتگ گڑا من انس جست کت کہ چی بوتگ؟ انس ءَ پسو دات کہ ازھار اِش جتگ ھمے دمان ءَ من ءَ ھوش ءَ یلہ دات پد ءَ من نزاناں کہ چی بوت ءُ چی نہ بوت۔

ازھار جان ھما کارستاں چی یکے اَت کہ ایرستی ءَ چہ مارا پُل اِتگ، ازھار جان ءَ وتی زمین ءِ ھر زیبناکی ءَ گوں مھر اَت مدام کہ دیست گوانگو دست ءَ اِنت ئِے برے کوہ برے درچک برے مُرگ ءُ برے برے وتی زمین ءِ بنی آدمانی تامراں جوڑ کنگ ءَ اِنت ازھار جان ءَ مدام سپر کنگ لوٹ اِت بلے ازھار جان انچو دست گٹ اَت کہ ھمے دست گٹیانی سبب ءَ ازھار ءَ وتی وانگ ھم یل ءَ دات۔

ازھار جان مدام من دیست چیزانی سر ءَ گپ ءُ تران کنگ ءَ اَت یار ازھار جان ترا یات اِنت کہ یک روچے من تئی دُکّان ءَ اتکاں بلے نزاناں چی پیم ءُ کجام (topic) ءِ سرءَ باوست (بحث) کنگ ءَ اتیں ھمے ساھت ءَ تو گشت “یار اے کوم من ءَ ءُ ترا وانینگ لوٹ اِیت ءُ سرپد کنگ لوٹ اِیت”ھمے دمان ءَ من پہ مسکرا ترا کلاگ زُرت ءُ گشت شمے وتسریں مزنیں گپ اَنت شمارا ھِچ جان نیست تو بچکندگے جت ءُ گشت شر بچار تو ۔

یار ازھار تو مدام گوں کوم ءَ یک گلِھے کتگ تو ھمے گشتگ “اے کوم یک ( iPhone mobile )ءُ (125 سائیکلے) ءَ پہ گل بیت کہ منی (واھش) سرجم اَنت اے کوم ءَ شریں (واھش ) ھم نیست گڑا من ھمے سما کت کہ تئی تہ ءَ ھما (critical thinking)ھستیں ھورت چاری ھست اِنت ازھار جان من زاناں ترا ھما دمان یات اِنت کہ من ءَ گوانکو گون اَت تئی تامرے(video) جوڑ کنگ ءَ اِتاں ترا جست ءَ اِتاں تو چونیں مرگے ءَ مِرگ لوٹ ئے ؟ تئی پسو بس ھمیش اَت کہ من بستر سر ءِ مِرگ نہ لوٹاں۔

یار ازھار جان ترا اینچو اشتاپ کنگی نہ اَت انگت ترا جلگی اَت پہ کوم ءَ باز کار کنگی اَت۔ یار اَچ تو پد ھر چیز ءِ زیبناکی ھلاس بیت انت تئی سنگتانی ٹولی پُرشت زندگی چو پیلگچے ءَ بوہ کنگ ءَ اِنت ابیتکی اِنت بے تاھیری اِنت ۔

“تو کہ رپت ئے چداں ھاموشی ءَ”
“دراھیں ساھدار اد ءَ شور ءَ اِنت”

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-

روکپتی بلوچستان ءِ بنجاھی شھر زاھدان (دزاپ) ءَ بندیگیں مردمے پاھو دیگ بیتگ-

پاھو دیگ بوتگیں مردم ءِ پجار آمر ء مھمد انت کہ آ سراوان جھمنند انت ۔

اھوالانی رد ءَ آمر گوستگیں روچ ءِ سھب ءَ ماں زاھدان ءِ زندان ءَ ایرانی آمیدگس ءِ ھکم ءَ پاھو دیگ بیتگ-

گوشگ بوتگ آمر چھار سال پیش ءَ یک کوشے ءِ بھتام ءَ دزگیر ءُ زندان ءَ برگ بوتگ ، آمیدگس ءَ پیش کنگ ءَ پد آئی ءِ سر ءَ پاھو ءِ سزا جنگ بوتگ-

اھوالانی رد ءَ آمر پنچ رَنداں پیش ءَ ھم پہ پاھو دیگ ءَ ایوکی ءِ واڑ ءَ برگ بوتگ کہ اے ششمی رندا پاھو دیگ بوتگ ۔

ایران ءِ دگہ ھوار سیستان و بلوچستان ءَ بازیں مردم جتا جتائیں بھتاماں پاھو دیگ بوگ ءَ انت کہ آیانی گیشتریں بھر سیستان و بلوچستان ءَ انت-

بلوچستان ءَ زورانسری آوار جنی ءِ دْرچ یکشل ءَ برجاہ چار مردم آوار جنگ بیتگ ءُ چار یل کنگ بیتگ اَنت، وھدے کہ اسلام آباد ءُ کراچی ءَ بیگواھیں مردمانی کھولانی زھرشانی نندانک یکشل برجاہ ءَ اِنت-

زانگ بہ بیت بلوچستان ءَ یک بلاھیں مدتے بیت کہ زورانسری آوار جنی ءِ درچ گوں تُرندی ءَ برجاہ ءَ اِنت ھمکروچ بلوچستان ءِ جتاجتائیں دمگاں آوار جنی ءِ رپورٹ نکش بیگ ءَ اَنت –

دومی نیمگ ءَ انسانی ھکانی گلاں اے درگت ءَ تُرس درشان کتگ ھمُک وھد ءَ آ بلوچستان ءِ ریاستی زوراکی ءُ بلوچانی چُکچینی ءِ گر ءُ دار لوٹ کتگ-

گیشیں ھالانی رِد ءَ بلوچستان ءِ دمگ چہ سبی ءَ پاکستانی لشکر ءَ یک دمگی اِھوالکارے آوار جتگ ءُ چریشی ءَ پد آئی ءِ درگت ءَ ھچ وڑیں ھال نیست-

ھالانی رِد ءَ چہ کوھلو ءَ سیادی داروکیں اِھوالکار شیر جان مری ءَ سبی پولیس ءُ سادھیں پوشاکانی تہ ءِ کارمنداں آوار جتگ-

کھول ءِ رِد ءَ آئی ءِ درگت ءَ تنی وھدے ھچ وڑیں ھال سر نہ بیتگ-

گوشگ بیگ ءَ اِنت کہ شیر جان مری سوشل میڈیا سر ءَ زورانسری آوار جنی ءِ ھلاپ ءَ پُرکار بیتگ-

دومی نیمگ ءَ کیچ ءِ ھند بلیدہ ءَ پاکستانی لشکر ءَ دو براتاں ھوار سے مردم آوار جنگ ءَ پد بیگواہ کتگ اَنت۔

ھالانی رد ءَ بیگواھیں مردمانی نام شیھک بلوچ ءُ وسیم بلوچ ء نصرت اللہ ءُ عنایت اللہ بلوچ ء درمحمد اِنت کہ پاکستانی لشکر ءَ 13 ستمبر 2025 ءَ چہ بلیدہ ءِ میتگ میناز ءَ آوار جتگ ءُ بیگواہ کتگ اَنت۔

ھمے وڑ چہ کیچ ءِ تھسیل تمپ ءَ یک ماھے ءَ ساری پاکستانی پوج ءِ دست ءَ زورانسری بیگواہ کنگ بیتگیں سے مردم یل کنگ بیتگ اَنت کہ آیانی پجّار مجیب ء رسول بخش، امجد ء دین محمد ءُ ولید ء نظر محمد ھوار اَنت- وھدے کہ آیانی ھمراھی ءَ زورانسری بیگواہ کنگ بیتگیں راشد ء دین محمد انگت پاکستانی پوج ءِ دست ءَ بیگواہ ءَ اِنت-

دومی نیمگ ءَ گوستگیں سال بیست ھشت اگست ءَ چہ بحرین ءَ ڈی پورٹ کنگ ءَ پد کراچی ایئرپورٹ ءَ پاکستانی پوج ءِ دست ءَ بیگواہ کنگ بیتگیں اسد عثمان بلوچ جھمنند مند پہ سلامتی یل کنگ بیتگ –

ھمے وڑ اسلام آباد ءَ بی وائی سی سروک ءُ بیگواھیں مردمانی کھولانی نندانک ءَ مروچی ششست یک روچ سرجم بوتگ کہ بلے آیانی زھرشانی نندانک انگت برجاہ ءَ اِنت-

زانگ بہ بیت زھرشانی نندانک ءَ نشتگیں کھول ریاستی پولیس ءِ نیمگ ءَ تُرسینگ ءُ بیھار دیگ، ھور ءُ گرم ءَ اَبید آیاں وتی زھرشانی نندانک برجاہ داشتگ-

آیانی لوٹ ھمش اِنت کہ بی وائی سی ءِ بندیگیں سروک ءُ بیگواھیں مردم یل کنگ بہ بنت ءُ زورانسری آوار جنی ءُ دروگیں میڑاں بیگواھیں مردمانی کُشگ بند بہ بیت-

بلے تنی وھدے ھکومت نیمگ ءَ ھچ وڑیں گپ دیوان گوں آیاں کنگ نہ بیتگ-

دومی نیمگ ءَ کراچی پریس کلب ءِ ڈن بیگواھیں نودربر زاھد علی بلوچ ءِ پت زھرشانی نندانک ءَ ھما وھد ءَ اوشت آماچ بیتگ وھدے زاھد ءِ پت عبدالحمید بلوچ ءِ تبیت اناگاہ ءَ ھراب بیتگ، چریشی ءِ سبب ءَ یکروچے ءِ واستا دارگ بیتگ-

یکشمبے ءِ سُھب ءُ عبدالحمید بلوچ ءِ تبیت ھراب بیتگ آ پیسر ءَ چہ ھیپاٹائٹس ءِ نادُراھی ءِ آماچ اِنت کھول ءَ آ دمگی کلینک ءَ برتگ اود ءَ ڈاکٹراں آرام کنگ ءَ گوشتگ-

اے جاور ءِ چارگ ءَ پد زھرشانی بُنجل ءَ برجاھیں شُدکُشیں ھڑتالی بُنجل اداروکی ھلاس کنگ بیتگ-

زاھد علی ءِ مات ءُ پت ءُ کھول گوستگیں چل یکروچ ءَ چہ کراچی پریس کلب ءِ دیم ءَ نندانک ءَ نشتگ اَنت، آئی ءِ گوشگ اِنت آئی ءِ ورنائیں چُک لھتے ماہ ءَ ساری زورانسری بیگواہ کنگ بیتگ ءُ انگت بیگواہ ءَ اِنت-

زاھد علی کراچی یونیورسٹی ءِ نودربرے آ وانگ ءِ ھمراھی ءَ رکشہ ھم چلائینتگ دانکہ لوگ ءِ ھرچ ءُ درچاں سرجم کُت بہ کن آں وتی نادُراھیں پت ءِ الاج ءَ کُت بہ کن آں-

کھول ءِ رِد ءَ پاکستانی پوج ءَ زاھد رکشہ ءَ ھوار آوار جتگ ءُ اشی ءَ پد آ بیگواہ ءَ اِنت-

آئی ءَ کھول ءَ یکرندے پد ءَ ھکومت ءُ انسانی ھکانی ادارھاں چہ دزبندی کتگ کہ زاھد علی ءَ دیم ءَ بیار اَنت ءُ آئی ءَ پہ سلامتی یل کنائینگ ءِ ھاتر ءَ گامگیج بہ زور اَنت-

بلوچستان ءِ دمگ کیچ ءِ دو جتا جتائیں جاھاں پاکستانی پوج ءِ بیڑ برجاہ انت ءُ لوگ پوج ءُ مانداشتگ انت ءُ زالبولے ءِ لٹ ءُ کٹ کنگ ءَ زالبول ءِ جاور ناگیگ –

سر بیتگیں اھوالانی رد ءَ کیچ ءَ پاکستانی فوج ءَ ٹوھیں کچے ءَ آپریشن بندات ۔ مھلوک ءِ گشگ ءِ رد ءَ دمگ ءَ گن شپ ءُ دگہ ھیلی کاپٹرانی آیگ برجاہ انت ءُ جتا جتائیں جاھاں کواڈ کاپٹراں بمبگواری کتگ۔

زامران، ساہ دیم، ءُ جالگی ءَ فوجی آپریشن ءِ زد ءَ اَنت۔ دمگی مردمانی رد ءَ دمگ ءَ گن شپ ھیلی کاپٹراں شیلنگ کنگ ءَ پد کمانڈو ایر کنگ بوتگ اَنت۔

گوستگیں شپ ءَ گردانگ ءِ شھر بلیدہ ءَ کواڈ کاپٹراں بمبگواری کتگ۔ دمگ ءِ نندوکیں مردمانی گشگ ءِ رد ءَ لشکر ءَ کواڈ کاپٹراں لس آبادی ءِ سر ءَ بمب چگل داتگ انت کہ دو لوگانی سر ءَ کپتگ ءُ دو مردم ٹپیگ بوتگ اَنت۔

اے درگت ءَ انگت ءَ واکداراں ھچ وڑیں ھال ءُ اھوال نہ داتگ۔

ھمے وڑ ءَ چہ کولواہ ءَ سر بیتگیں ھالانی رد ءَ پوج ءَ بیڑ برتگ ءُ اود ءَ مھلوک ءِ لوگ مانداشتگ انت-

اھوالانی رد ءَ گوستگیں شپ ءَ کولواہ ءِ دمگ ءَ بیڑ برتگ ءُ لوگ ستکگ ءُ بلڈوزر کتگ انت-

اھوالانی رد ءَ کولواہ سگک ءُ بلور ءَ مروچی سھب ءَ ھم بیڑ برتگ ءُ اود ءَ ھم لوگ مانداشتگ انت –

اھوالانی رد ءَ بلور ءَ درین نامیں زالبولے ءِ سر ءَ پوج ءَ بیڑ برتگ ءُ لٹ ءُ کٹ کتگ ءُ آئی ءِ جاور ناگیگ بیتگ انت ءُ ھمے میان ءَ پوج ءَ درین ءِ لوگ ءُ جاگہ مانداشتگ انت-

اھوالانی رد ءَ دُرین پیش ءَ نادراھیں زالبولے بیتگ ءُ پوج ءِ زوراکیاں پد آ گیشتر ناگیگ بیتگ –