TBP Balochi

بلوچستان ءِ گوستگیں وزیر داکلہ ءُ ھستیں وھدے اسمبلی ءِ باسک میر ظفراللہ زھری ءَ گوشتگ کہ بلوچستان ءِ تہ ءَ ریاست ءِ رٹ سک باز نزور تر اتگ ، ءُ بلوچستان ءِ شھدگ ھمک روچ سلاہ بندی مردمانی کنٹرول انت ۔

شال ءَ اھوالکاراں گوں تران کنان ءَ آئی ءَ گوشتگ کہ بلوچستان ءِ تہ ءَ بلوچ آجوئی لوٹوک دگاں بند انت ءُ پٹ ءُ پول کن انت ، بلوچ لبریشن آرمی ءِ ھمے زوتاں بوتگیں آپریشن ھیروپ ءِ ارشانی درگت ءَ آئی ءَ جستے ءِ پسو ءَ گوشتگ کہ 31 جنوری ءَ سلاہ بندیں مردماں دگ بندی ءِ میان ءَ آ ھم داشتگ ۔

یک اھوالکارے ءِ جست ءِ پسو ءَ ظفراللہ زھریءَ گوشتگ کہ من سلاہ بندیں مردمانی منت ءَ گراں آیاں مناں شرپ بکش اتگ ، ناں مناں تاوان داتگ ءُ ناکہ مئے سلاہ ءِ زرتگ انت ۔

آئی ءَ گوشتگ کہ سرپراز بگٹی ھر بٹاک ءِ جنت بہ جنت بلے مارا سلاہ بندیں مردم ھر روچ دگانی سرا دار انت ۔

زانگ بہ بیت جاپر ایکسپریس ءِ ارشاں پد بلوچستان اسمبلی ءِ نیاداں جمعیت علمائے اسلام ءِ اسمبلی ءِ باسک میر ظفر زھری ءَ سرکار ءِ سرا ترندی ءَ گوں نگد کنان ءَ گوشتگ ات کہ بلوچستان ءِ تہ ءَ سرپراز بگٹی ءِ ناں بلکیں بلوچ لبریشن آرمیءِ سروک بشیر زیب ءُ بلوچستان لبریشن پرنٹ ءِ سروک ڈاکٹر اللہ نزر ءِ رٹ انت ۔

آئی ءِ رد ءَ آیانی مردم شپ ءَ تر ءُ تاب کن انت ، دگاں بند انت ، مردم پوج ءَ گیش کوہ والایاں وتی ھیرواہ زان انت ۔

آئی ءَ اے ھم گوشتگ ات کہ بلوچ زالبول پہ کمک ءَ وتی سھر ءُ تلاھاں بی ایل اے ءِ مردماں دئیگ ءَ انت ، سرکار تاکت ءِ زور ءَ آیاں داشت نہ کنت ۔ اگاں پہ تاکت ءُ چکچینی ءَ مردم جنگ بنت گڈا مات دگہ چک ودی کن انت ۔

گوستگیں روچاں بزاں 31 جنوری ءَ ھزدار ءِ نزیک ءَ آئی ءِ کاروان پدا دارگ بوتگ ات بلے سلاہ بندیں مردماں آ ھچ تاوان نہ داتگ ءُ یل داتگ ات ۔

بلوچستان اسمبلی ءِ دگہ بازیں وزیر ءِ ھم سرکار ءِ بٹاکانی بگیردار بوتگ ءُ اے گپ من اتگ کہ بلوچستان ءَ سرکار ءِ ھچ رٹ نیست ءُ آ وتی دمگاں شت نہ کن انت ۔

سندھ بلوچستان ٹرانسپورٹ بس کوچ یونین ءَ پاکستانی لشکر ایف سی ءُ کوسٹ گارڈ ءِ گمانی ناشریانی ھلاپ ءَ زھرشانی بندات کتگ کہ ایشی ءِ سبب ءَ مکران ڈویژن ءَ چہ کراچی ءَ کوچ سروس بند کنگ بوتگ انت۔

ٹرانسپورٹرانی رد ءَ تربت ، گوادر ءُ پنجگور ءَ چہ کراچی ءَ روکں کساس 100 بس ھب ءُ وندر ءِ میانی دمگ ناکہ کارڑی ءِ نزیک ءَ ٹول پلازہ ءَ اوشتارینتگ ءُ زھرشانی بندات کتگ ۔

اے زھرشانی ءَ دوئیں نیمگاں ٹریفک ءِ روانی سک باز سان کپتگ۔

یونین ءِ گشگ انت کہ اے گامگیج ایف سی ءُ کوسٹ گارڈ ءِ کارندھانی ناشاری ءِ ھلاپ ءَ چست کنگ بوتگ۔

بلے اے درگت ءَ چہ سیادی داروکیں واکدارانی نیمگ ءَ ھچ وڑیں سرکاری گامگیج چست نہ بوتگ اَنت۔

بڑتال ءِ آسر ءَ نادراہ ءُ نودربراں ھوار ھزاراں مساپر دوئیں نیمگ ءَ مھتل ءُ سکیں مشکلانی آماچ انت۔

لس مھلوک ءَ اے جاور ھال ءِ سر ءَ دلپدردی درشان کتگ ءُ سرکار ءُ ٹرانسپورٹ اتھارٹی ءَ چہ لوٹ کتگ کہ آ اے جیڑک ءَ را زوتیں وھد ءَ بامردیں گپ ءُ تران ءِ وسیلگ ءَ گیش ءُ گیوار بہ کن اَنت۔

بلوچ لبریشن آرمی ءِ میڈیا ونگ ھکل ءِ نیمگ ءَ چہ آپریشن ھیروف دومی بھرگ ءَ جنگ بیتگیں وتی باسکانی سرپدیانی شنگ کنگ ءِ دْرچ برجاہ ءَ اِنت- گوشتگیں روچ ءَ ھکل میڈیا ءِ نیمگ ءَ چہ کماندار سالم بلوچ پنّام ءِ مولم ءُ فدائی ماجد بلوچ پنّام ءِ کمانڈو بادل ءِ سدپدی شنگ کتگ اَنت کہ دوئیں باسکانی تربت ءَ پاکستانی پوج ءِ گوما میڑ ءَ جنگ بیگ ءَ راست کتگ-

پاکستانی پوج ءِ چہ ھمگرنچیں اکاؤنٹسانی نیمگ ءَ چہ اے ٹاہ دیم ءَ اتکگ اَنت پیسر ءَ چہ بیگواہ بیتگیں سالم بلوچ کہ آ بی ایل اے ءَ کماندارے دروشم ءَ نامینتگ، ھچبر ھم بیگواہ نہ بیتگ بلکیں یک دراجیں مدتے ءَ چہ سلاہ بند بیتگ-

اے ھکیکت ءَ رد اِنت، سالم کہ پنجاب یونیورسٹی ءَ ماسٹرز ءِ نودربرے بیتگ کہ چار جولائی 2023 ءَ زورانسری بیگواہ کنگ بیتگ- اے کیس ایمنسٹی انٹرنیشنل، بی بی سی ءُ دگہ میان اُستمانی انسانی ھکانی گلاں کاگدے رپورٹ کتگ اَت-

یک ماھے ءَ درکانودی دزگیری ءَ پد، سالم نُھ اگست 2023 ءَ یل کنگ بیتگ- کہ آئی ءِ پدری وائس فار بلوچ مسنگ پرسنز ءُ کھول ءَ کتگ- آئی ءِ کھول ءُ سنگتانی گوشگ اِنت کہ آ سک لَٹ ءُ لُٹانی نشانگ کتگ ءُ واتر اتکگ ءُ آئی ءَ دوبر زورانسری آوار جنی ءِ ترس ءَ چہ روچ گوازینتگ اَنت-

سالم 29 جنوری 2026 تربت ءَ پاکستانی پوج ءِ گوما یک میڑے ءَ جنگ بیتگ- بی ایل اے ءَ آئی ءِ اوھد ءُ ھمگرنچی راست کتگ ءُ تچکی ءَ گوشتگ کہ ریاستی آوار جنی ءِ یک ماھے یل بیگ ءَ پد سالم ءَ ستمبر 2023 ءَ بی ایل اے ءَ ھمگرنچ بیتگ-

کساس کنوکانی رِد ءَ گوستگیں پنچ سالاں ھزارانی بلوچ ورنا سلاہ ٹولیاں ھوار بیتگ اَنت- اشی ءِ گیشی تچکی ءَ ھمگرنچی پوجی کاروائیاں، زورانسری آوار جنی ءُ لَٹ ءُ کُٹ ھم ھست-

یک زانتکارے ءَ ٹی بی پی ءَ گوشتگ، سالم بلوچ ءِ سلاہ بند بیگ ریاستی گامگیج ءِ نشانی اِنت کہ آئی ءَ آ اود ءَ سر کتگ- وھدے تو بے میاریں نودربرانی گوما دُژمنیں رویشگ کن ئے گُڑا تو آیاں ھمے وڑ جوڑ کن ئے-

پاکستانی لشکر ءِ گشگ اِنت کہ بلوچستان ءِ دمگ پشین ءَ آپریشن ءِ وھد ءَ یک گمانی وت کُش اُرشکارے ءَ وت ءَ تراکینتگ ءُ چار دگہ جنگول کشتگ اَنت۔

پاکستانی پوج ءِ جارکش آئی ایس پی آر ءِ نیمگ ءَ دوشمبے ءِ روچ ءَ شنگ بوتگیں بیان ءَ گوشتگ کہ 22 فروری ءَ پشین ءَ جنگولانی جاڑیگ بوھگ ءِ ھال ءِ پد ءَ سیکورٹی فورسز ءَ آپریشن بندات کتگ۔

بیان ءِ تہ ءَ گوشگ بوتگ کہ ‘آپریشن ءِ وھد ءَ وت کُشیں بمب تراک کنوک ءَ مزنیں تیرگواری ءَ پد وت ءَ تراکینتگ۔’ آئی ایس پی آر ءَ گیش گْوشتگ کہ سیکورٹی فورسز ءَ چار دگہ سلاہ بندیں مردمانی پد ءُ رند کتگ ءُ کُشتگ۔

آئی ایس پی آر ءِ رد ءَ کشگ بوتگیں گمانی جنگولانی دست ءَ سلاہ، گولہ بارود ءُ تراکناکیں چیز ھم دز کپتگ اَنت –

بلوچستان ءَ اے وھد ءَ پاکستانی پوج ءِ جتاجتائیں شھراں بیڑ ءُ دزگیریانی دْرچ گیش بیتگ- بازیں دمگاں اے ھال ھم دزکپتگ کہ اود ءَ ٹاہ دیگ بیگ ءَ اِنت لوگانی سر ءَ بیڑانی میان ءَ کارمندانی نیمگ ءَ چہ گرانبھائیں سامان زر برگ بیتگ اَنت-

چہ نوشکی ھالانی رِد ءَ یک لوگے ءَ بیڑ ءِ میان ءَ نوک سور کتگیں بانور ءُ سالونک سُھر ءُ کساس دو لک نیم کلدار برتگ اَنت- کھول ءِ گوشگ اِنت کہ بیڑ سیکورٹی کاروائی ءِ نام ءَ جنگ بیتگ، بلے اشی ءَ پد لوگ ءَ ھستیں گرانبھائیں سامان گار اَنت-

ھمے وڑ تیاب دپی شھر گوادر ءَ دگہ یک وئیلے ءِ ھال سر بیتگ اود ءَ دمگی اِھوالکار ءِ رِد ءَ یک لوگے ءِ سر ءَ بیڑ ءِ میان ءَ یک گرانبھائیں گھڑی یے ءُ کساس یک لک سی ھزار کلدار برگ ءِ ھم ٹاہ دیگ بیتگ-

شال ءِ سریاب دگ ءِ دمگ ءَ ھم بازیں شکایتے دیم ءَ اَتکگ اود ءَ ٹاہ دیگ بیتگ کہ جتاجتائیں لوگانی سر ءَ بیڑانی میان ءَ گرانبھائیں سامان گار بیتگ اَنت-

زانگ بہ بیت کہ 31 جنوری ءَ بی ایل اے ءِ نیمگ ءَ چہ بلوچستان ءِ بُنجاھی شھر شال ءَ ھوار بلوچستان ءِ جتاجتائیں دمگاں ادروکی دستیگ کنگ ءَ پد پوج ءِ نیمگ ءَ جتاجتائیں دمگاں اشی ءِ پُشدر ءَ لَس مردمانی لوگاں پروشگ ءُ بیڑانی درچ برجاہ ءَ اِنت-

ھُزدار ءِ دمگاں اورناچ ءُ نال ءَ ھوار کش گوراں پاکستانی پوج ءِ آپریشن دومی روچ ءَ ھم برجاہ-

اِھوالکار ءِ رِد ءَ مروچی سُھب ءَ بازیں تیرگواریں ءُ دگہ ھیلی کاپٹر ھُزدار ءِ کینٹ ءَ سر بیتگ اَنت، اود ءَ چہ آ دوبر ھمے دمگانی نیمگ ءَ شتگ اَنت-

بلے سرکاری نیمگ ءِ آپریشن ءِ درگت ءَ ھچ وڑیں درشان شنگ نہ کتگ-

دومی نیمگ ءَ بلوچ لبریشن آرمی ءَ آپریشن ھیروپ دومی بھرگ ءِ میان ءَ اورناچ ءِ دمگ ءَ چہ پاکستانی پوج ءِ ھپت کارمندانی دزگیر کنگ ءُ بندیگانی مٹ کنگ وھد داتگ-

بلوچ لبریشن آرمی ءَ وتی ھکل چینل ءَ آپریشن ھیروپ ءَ بھر زیروکیں دو براتاں ھوار پنچ وتی سرمچارانی اکس ءُ اھوال شنگ کتگ انت-

اولی ءِ پجار فدائی ماجد بلوچ پنام ءِ کمانڈو بادل ء امجد بلوچ جھمنند سند بازار ھوشاپ ءِ نام ءَ کتگ آئی ءَ دسمبر دوھزار ءُ بیست ءُ سَے ءَ بی ایل اے ءَ بھر زرتگ ءُ پد ءَ دوھزار ءُ بیست ءُ چار ءَ مجید بریگیڈ ءَ بھر مند بیتگ ءُ بیست ءُ نُھ جنوری دوھزار ءُ بیست ءُ شش ءَ تربت ءَ شھید بیتگ-

ماجد بلوچ ھما راجی زانشت ءِ وَل ءِ بھر بیتگ کہ دھکاں زوراکی، راجی گلامی ءُ بلوچ نسل کشی ءِ ھلاپ ءَ برانزیگ انت – سند بازار ءَ سیادی داروکیں اے ورنا کجام ازاروکی برانز ءَ چِست نہ بیتگ بلکیں ھما نسل ءِ آواز بیتگ وتی راجی پجار ءُ راجی ءِ جست ءَ زند ءِ بنکی بھر لیک انت-

ماجد یک ھنچیں چاگردے ءَ ورنا بیتگ کہ اود ءَ راجی ھمک روچی جستانی زندمان ءِ بھر انت- ایشی ءِ واستا آجوئی ءِ اوگام نہ انت بلکیں یک راجدپتری ءِ درگت انت- تو آپریشن گنجل ءَ شھید بیتگیں کمانڈر فدائی بادل پنام ءِ ریاست ءِ نزیکیں سیاد بیتگ ئے – بیست ءُ نُھ جنوری ءَ تربت ءَ تو آپریشن ھیروپ ءَ بھر زیرگ ءَ روگ ءَ بیتگ ئے راہ ءَ پوج ءِ گون ءَ ڈک وارتگ ءُ کہ اود ءَ تو گڈی تیر ءَ جنگ کنان ءَ شھید بوتگ ئے – فدائی ماجد بلوچ پنام ءِ کمانڈو بادل ءِ شھیدی ایوک ءَ یک پردے ءِ کربانی نہ انت بلکیں ھما اھد ءِ نشانی ءَ کنت کہ بلوچ ورنایانی نسل ءَ بے تواری ءِ پروشگ ءِ پیسلہ کتگ –

دومی ءِ پجار سالم بلوچ پنام ءِ مولم ء عبدالستار جھمنند آبسر تربت ءِ نام ءَ کتگ، آئی ءَ ایم اے ھسٹری پنجاپ یونیورسٹی ءَ کتگ- زورانسری بیگواھی ءُ بندیگی ءَ پد زرمبشتِ آجوئی ءِ بھر بیتگ- آئی ءَ بی ایل اے ءِ کوھی میدان ءَ ستمبر دوھزار ءُ بیست ءُ سَے ءَ شتگ-

سالم بلوچ یک گوریلاھیں سرمچارے نہ بیتگ بلکیں ھما وانندگیں بلوچ چاگرد ءِ بھر بیتگ کہ آیاں پنجاپ یونیورسٹی ءِ ایواناں راجدپتر ونتگ ءُ پد ءَ ھما زرمبشت ءَ را وتی ھونانی مٹ کنگ ءِ پیسلہ کتگ – آپسر تربت ءِ اے بچ زانشت ءِ واھند بیتگ ءُ وھدیکہ دشمن دلیل ءِ زبان ءَ بے ھیال بیتگ گڑا کوھانی میان ءَ بے تواری ءَ درستاں گیش توانمندیں پسو جوڑ بیت انت-

سنگت سالم ءِ زندگی ءِ جاور ھما وھد ءَ مٹ بوتگ انت وھدیکہ آ زورانسری بیگواہ کنگ بیتگ- زندانانی تھاریں کوٹی آئی ءَ را ترس ءِ آماچ اش کت نہ کتگ – بلکیں یل بوگ ءَ پد لگوریں زند ءَ را شھیدی ءِ نام پیوند کنان ءَ ستمبر دوھزار ءُ بیست ءُ سَے ءَ سرجم ءَ کوھی دمگ ءَ پھریزان ءَ بی ایل اے ءِ ایس ٹی او ایس یونٹ ءِ یک پرکاریں کمانڈرے ءِ رنگ ءَ شھری میدان ءُ بنجلانی تہ ءُ دشمن ءَ را ترس ءِ آماچ ءِ چیدگ جوڑ بیتگ- بیست ءُ نُھ جنوری ءَ وھدیکہ آ آپریشن ھیروپ ءِ چن ءُ لانچاں بیتگ گڑا تربت ءَ اناگتی زورگریں پوج ءِ دیم ءَ جنگ ءَ ڈِکے وارتگ گڑا جنگ کنان ءَ شھید بیتگ- سالم ءِ کربانی اے راستی ءِ پدر انت کہ نی بلوچ راج ءِ وانوکیں تَک گلامی ءِ زنجیرانی پروشگ ءَ میدان ءَ ایر کپتگ انت-

دگہ دو فدائیانی پجار جمالدینی برادرز ءِ نام ءَ کنگ بیتگ انت-

فدائی اللہ نور جمالدینی پنام ءِ روکین ءُ آصف جمالدینی پنام ءِ زبیر ء پیر بخش جمالدینی جھمنند قاضی آباد نوشکی ءِ نام ءَ کتگ انت آیاں مارچ دوھزار ءُ بیست ءُ اکتوبر دوھزار ءُ بیست ءُ چار – بی ایل اے ءَ ھواری جولائی دوھزار ءُ بیست ءُ چار ءُ دوھزار ءُ بیست ءُ پنچ یونٹ مجید بریگیڈ (اگست 2024) ءُ فتح اسکواڈ ءُ شھیدی ءِ جار آپریشن ھیروپ ٹو نوشکی ءِ میدان –

بلوچ ءِ ڈوکانی شیپ ءُ ءُ تپتگیں ریک ایوک ءُ نابیدیانی گواہ نہ انت بلکیں گھگیری لیکہ ءِ آماچگاہ انت کہ اود ءُ نسل در نسل آجوئی ءِ واب ءَ چماں گندگ ءَ انت- نوشکی ءِ دل ءُ جان قاضی آباد ءَ سیادی داروکیں دو برات اللہ نور جمالدینی ءُ آصف جمالدینی ءِ داستان ءِ زندمان تھنا یک کھولے ءِ کربانی نہ انت بلکیں ھمے سیاسی ءُ زانشتی آشوبی کربانی انت- کہ مروچی بلوچ ورنایانی رگ ءُ جان ءِ توک ءَ چکروکی دیگ ءَ انت-

اللہ نور جمالدینی، کہ آ گھگیری ءِ سرپاں کہ اود ءَ “روکین ” ءِ نام ءَ زانگ بیتگ – آئی ءِ املی ءُ سیاسی لیکہ ءِ منوک بیتگ کسانوکیں جزباتیانی پن ءَ دور بیتگ – آئی ءَ مارچ دوھزار ءُ بیست ءُ چار ءَ سرجم ءَ راجی زرمبشت ءَ بھر زرتگ – جولائی دوھزار ءُ بیست ءُ چار ءَ آئی ءَ کوھی میدان ءَ زمہ پھریز اتگ انت- راستی ءَ اے یک پکری میدان ءِ جنگ ءِ درچ بیتگ- اللہ نور ءِ دھشت راجمستری ءِ لیکہ اے بیتگ آئی ءَ زانت کہ راجی گڈی جنگ ءَ مرگ ءِ ترس، گلامی ءِ زندگی ءِ کستر بیت انت- ھمے پکر ءِ درچ ءَ اگست دوھزار ءُ بیست ءُ چار ءَ مجید بریگیڈ ءِ وڑیں ھترناکہں یونٹاں بھر زیرگ کہ فدائیت ءِ گڈی رنگ ءُ دروشم زانگ بنت-

مستریں برات ءِ رندپداں گران ءَ آصف جمالدینی ( پنام زبیر) ءَ ھم ھمے ھترناکین راہ گچین کتگ – آصف ءَ اکتوبر 2024 ءَ زرمبشت ءَ بھر زرتگ ءُ دوھزار ءُ بیست ءُ پنچ ءَ کوھی دمگ ءَ شتگ- آئی ءِ واستا اللہ نور بس ایوک ءَ یک براتے نہ بیتگ بلکیں یک سیاسی رھشون ءُ پکری نور ءِ چیدگ بیتگ- آصف ءَ یک سالے ءَ داں شھری تک ءَ یکدم بے کساس ءَ مشکلیں وھد ءَ مشن پھریز اتگ کہ آئی ءِ کتگیں کارانی منانک انت –

راجدپتر ءِ تاکاں ” آپریشن ھیروپ ” ءَ یک ھنچیں بنھشتے ایر کنی ءَ یاداشت کنگ بیت کہ اود ءَ بلوچ گھگیری وتی برزشانی سنچ ءَ آسن کنگ ءَ انت- اے درچ ءَ اللہ نور جمالدینی ءَ نوشکی ءَ ایف سی ءِ ھیڈ کوارٹرز ءِ سر ءَ اُرش ءِ وھد ءَ سیکنڈ گروپ ءِ کمانڈ ءُ دومی گیٹ ءِ دشمن الگار جتگ- ھمے درچ ءَ آصف جمالدینی ءَ فتح اسکواڈ ءِ بھر بیتگ ءُ دشمن ءِ انگیر ءِ پروشگ ءَ سوبمند بیتگ – اے میتگ ءَ دوئیں براتانی یکیں وھد ءَ جاڑیگ بوگ ھمے درچ ءِ گچینی پریچ انت کہ وھدیکہ ھاک توار جَنت گڑا درست یل کنگ ءُ روگی انت-

پنچمی فدائین ءِ پجار فدائی ظھیر پرکانی پنام ءِ مش یار ابنِ بی بی سعیدہ جھمنند نیام غنڈی شال ءِ نام ءَ کتگ آئی ءَ مارچ دوھزار ءُ چار ءَ بی ایل اے ءَ بھر زرتگ- شھری گوریلہ ءَ یک سالے ءَ پد کوھی میدان ءَ دوھزار ءُ بیست ءُ پنچ ءَ شتگ- آئی ءَ اپریل دوھزار ءُ بیست ءُ پنچ ءَ مجید بریگیڈ ءَ بھر زرتگ ءُ رینک گشتی کمانڈر بیتگ ءُ شش دسمبر دوھزار ءُ بیست ءُ پنچ ءَ کلات ءَ شھید بیتگ-

ظھیر بلوچ ءِ داستان ءِ زندمان ھما جبر ءِ پدراھی انت کہ بلوچ ورنا جیڑگانی دمب ءَ کپگ ءَ ابید گھگیری ءِ راہ ءَ گندگ بنت- شال ءِ کوچکی دمگ نیام گنڈی ءَ سیادی داروکیں زانتکاریں ورنا جون دوھزار ءُ بیست ءُ یک ءَ ریاست ءِ زنداناں سگگ ءُ اوپارے سگ اتگ- وھدیکہ سی ٹی ڈی ءَ آ زورانسری بیگواہ کتگ گڑا آئی ءَ راجی زانشت ءِ توک ءَ مزنیں کردے ودی کتگ – یل بیگ ءَ پد آ بے توار بوگ ءَ ابید اے نزام ءِ زوراکی ءِ پروشگ ءَ مارچ دوھزار ءُ بیست ءُ چار ءَ سرجمی ءَ سلاہ بندیں جد ءُ جھد ءِ بھر بیتگ-

ظھیر پرکانی ءَ یک سالے ءَ داں شھری گوریلا ءِ میدان ءَ وتی پرکاری کاربست کتگ ءُ پد ءَ دوھزار ءُ بیست ءُ پنچ ءَ کوھی میدان ءَ شتگ آئی ءِ پکری پھتوئی ءُ بے ترسی ءِ واھند بیتگ آئی ءَ زوت مجید بریگیڈ ءِ وڑیں گچینی یونٹ ءَ ھوار بیتگ- 6 دسمبر 2025 ءَ وھدیکہ آپریشن ھیروپ ءِ چن ءُ لانچ ءَ بیتگ گڑا یک گچیجی مشنے ءَ بیتے- کلات ءِ تلارانی توک ءَ دشمن ءَ گوں ڈکے وارتگ ءُ وتی ھاک ءِ واستا کربان بیتگ-

اوگانستان ءِ واکدارانی رد ءَ شمبے ءُ یک شمبے ءِ میانی شپ ءَ اوگانستان ءِ رودرآتکی استان ننگرھار ءِ ضلع بھسود ءَ یک لوگے ءِ سر ءَ پاکستانی بالی اُرش ءَ کم چہ کم 17 مردمانی بیرانی ھال اِنت۔

طالبان ءِ سرکار ءِ ءُ دود ءُ ربیدگ ءِ وزارت ءِ سروک امر قریشی ءَ بدان گوشتگ کہ بیران بوتگیں مردمانی تہ ءَ 11 زھگ ھوار اَنت ءُ شش جنین ءُ مردین ھوار اَنت۔

ھال دیگ بوگ ءَ اِنت کہ اُرش ءِ آسر ءَ گس سرجم ءَ تباہ بوتگ ءُ لاشانی در کنگ ءِ کوشست بیگ ءَ اِنت ۔

امر قریشی ءِ رد ءَ پنچ ٹپیگ ننگرہار ءِ دمگی نادراھجاہ ءَ سر کنگ بوتگ اَنت کہ اود ءَ آیانی جاور ھال وش گشگ بوگ ءَ اِنت۔

اوگانستان ءِ رودراتکی اُستان ننگرھار ءِ واکداراں گوشتگ کہ زِلہ بھسود ءِ گردی کیچ ءِ دمگ ءَ شھاب الدین نامیں مردے ءِ لوگ نشانگ جوڑ کنگ بوتگ ءُ ایشی ءِ تہ ءَ جنین ءُ چُک ھوار بیست مردم بیران بوتگ اَنت۔

آماچیں ھاندان ءِ یک مردمے ءَ گْوشتگ: ھرچی ھلاس بوتگ، منی چُک شتگ اَنت، منی برات ءُ منی مرد شتگ اَنت ءُ منی جنیچُک کُشگ بوتگ اَنت۔

چمدیستگیں مردمانی گشتگ کہ شپ ءِ دیر ءَ اے لوگ ءِ بالی اُرش ءَ نشانگ جوڑ کنگ بوتگ۔

ننگرھار پولیس ءِ جارکش سید طیب حماد ءَ طلوع نیوز ءَ گوں تران کنان ءَ گْوشتگ: پاکستانی لشکر ءَ استان ءِ دمگ بھسود ءَ یک شھری یے ءِ لوگ نشانگ جوڑ کتگ ءُ ھمے ھاندان ءِ 23 مردم بیران بوتگ اَنت۔ “تاں انوگ ءَ لوگانی لوگانی چیر ءَ بس ایوک ءَ چار مردم در کنگ بوتگ ءُ جاہ ءَ ریسکیو آپریشن برجاہ اِنت۔”

‘پکتیکا ءَ مدرسہ نشانگ جوڑ کنگ بوتگ’ اوگانستان ءِ اوستان پکتیکا ءَ طالبان ءِ سرکاری بنشون ءَ گشتگ کہ شپ ءِ 11:30 ءِ نزیک ءَ برمل ءَ برزی مدرسہ ءِ سر ءَ بالی اُرش کنگ بوتگ۔ شمبے ءِ شپ ءَ دمگی وھد ءِ رد ءَ مدرسہ ءِ ماڑی ءِ لھتیں بھراں تاوان رس اتگ-

بنشون ءِ گشگ اِنت کہ اے اُرش ءَ ھچ وڑیں تاوان ءِ ھال رسگ ءَ نہ اِنت پرچا کہ مدرسہ پہ رمضان ءَ بند بوتگ۔

سوشل میڈیا ءِ سر ءَ شنگ بوتگیں اکساں چہ پدر اِنت کہ مدرسہ ءِ بُن ھشت ءِ یک بھرے ھراب بوتگ ءُ اودا ھواریں نیکراھی کتاب ھم ھراب بوتگ اَنت۔

چہ دژمن ءِ زُلم ءَ نپرت

نبشتہ کار: پاتما بلوچ

دی بلوچستان پوسٹ

چہ آپریشن ھیروپ 2.0 ءِ سوبمندیں اُرش ءُ جنگی مولءُ مُرادانی سرجم کنگ پد راجی لشکر بی ایل اِے ءَ آجوئی جنگ ءَ یک نوکیں بدلی یے ءُ جتائیں دْروشمے داتگ۔ بلوچ گوریلہ جنگ مجید برگیڈ ءُ کھر ءِ دْروشم ءَ چہ کوہ ءُ کوچگاں درکپت ءُ دژمن ءِ بُنجل، شھر ءُ شاھدگاں سر بوتگ۔ انی پاکستان کہ آئی ءِ گوں بلوچ راج ءُ بلوچستان ءَ ھچ سیادی ءُ نزیکی نیست مرچاں بلوچ راجی جنگ ءِ دیم ءَ پْروش ءِ آماچ اِنت ءُ پاکستان چہ اے پْروش ءُ بے سوبی ءِ آسر ءَ بلوچ راج ءِ ورنائیں نودربر ءُ بے گناھیں مردماں آوارجنت، بیگواہ کنت، ماں زِندان ءُ آزارجاھاں آزار دنت ءُ پد ءَ سی ٹی ڈی ءِ نام ءَ کُش ایت ءُ آیانی لاشاں چگل دنت۔

چوناھا دُنیا ءِ گْوستانک ءِ رد ءَ وھدیکہ زورگِری دُژمن یک دلیریں راجے ءِ گوریلہ جنگ ءَ پْروش ءِ آماچ بیت گُڑا بدواہ وتی راستیں دْروشم ءَ پیش دار ایت۔ اگاں ما تھنا پاکستان ءِ گْوستانک ءَ بہ چار ایں پاکستانی پوج ءَ ھم مُدام ھمے وڑ ءَ کُتگ۔ وھدیکہ 1970 تا 71 ءَ بنگالی راج ءِ ھلاپ ءَ پاکستان ءَ مار اِت کہ پنگالی زالبول، نودربر، اُستاد، لس وانِندہ، ورنا ءُ کماش اے جنگ ءَ ھوار اَنت، انی بنگالی راج گوں پاکستان ءَ نپرت دار اِیت ءُ بنگالی چہ وتی دل ءُ مجگ ءَ پاکستانی نہ منّ اَنت گُڑا بیرگری یا گْوش ئے زھر ءِ ھلاسی ءَ 26 مارچ 1971 ءَ آپریشن سرچ لائیٹ ئِے بُنگیج کُت کہ ھمے آپریشن ءَ بے کساس بنگالی شھزانت، ازمکار، نودربر، استاد ءُ رھشون شھید کنگ بوت اَنت۔

گِند ئے مرچاں پاکستانی پوج بلوچستان ءِ تہ ءَ ھم ھمے وڑیں بے سوبی ءِ آماچ اِنت۔ پرچا کہ اے بلوچ راجی آجوئی جنگ ءَ لس بلوچ مھلوک توری آ زالبول، نودربر ءُ اُستاد بِہ بنت یا توری لس وانِندہ، ورنا ءُ کماش بنت ماں اِے جنگ ءَ گوں راجی لشکر بی ایل اے ءَ ھمگام ءُ ھمکوپگ اَنت۔ پاکستان ءِ زانتکاریں سْیاسی، پوجی، جرنلسٹ ءُ سرسوجی گل(تنک ٹنک) دْراہ سرپد اَنت کہ بنگال ءِ وڑ ءَ بلوچ راج ھم گوں پاکستان ءَ نپرت دار ایت ءُ چہ وتی دل ءُ مجگ ءَ پاکستانی نہ اَنت ءُ راستی ھم ھمیش اِنت۔ آزات بلوچستان بلوچ راج ءِ سسایے، بلوچ راج ءِ یک دیستگیں وابے ءُ اے واب ءِ راست کنگ ءَ بلوچ راج ءَ بے کساس کُربانی داتگ ءُ انگت دنت۔ پاکستان زانت کہ پْروش ایشی ءِ نسیب ءَ اِنت پمیشکا انی پاکستانی پوج جنگ ءِ گڈی بھر ءَ بلوچ راج ءِ لس مھلوک ءِ سر ءَ آپریشن سرچ لائیٹ ءِ رِد ءَ بے کساس زلم کنت۔ زھرشانی کنوکیں راج ءِ مچیانی سر ءَ ڈاریکٹ تپنگاں آس دنت۔

چوناھا دژمن وَ زُلم کنت۔ گِند ئے اے زُلم راج ءِ تہ ءَ دُژمن ءِ ھلاپ ءَ نپرت ودی کنت ءُ نپرت ایردستیں راجاں آجوئی ءِ راہ ءَ پیشدار ایت گُڑا باید اِنت بلوچ راج ھم دژمن ءِ اِے زلم ءُ جبر ءِ ھلاپ ءَ سرجھل مہ بیت بلکیں اے زلم ءُ جبر ءَ ماں نپرت ءَ بدل دنت۔ راجدپتر ءِ رِد ءَ بلوچ یک بھر ءُ بانگیں راجے۔ راستی ءَ ما بلوچ ماں ٹَکراں(قبائل) بھر ءُ بانگ ایں۔ ما بلوچ راج ھچر یکمُشت ءُ تپاک نہ بوتگ ایں بلے پاکستان ءِ زُلم ءُ زوراکیاں بلوچ راج پہ وتی راجی آجوئی ءُ ڈیھ ءِ وتواجھی ءَ بے وس کُت کہ انی ما یکجاہ، یکمُشت، ھمکوپگ ءُ ھمگام بِہ بَہ ایں مرچیگیں بلوچ راجی آجوئی ءِ جنگ ءَ پاکستان تُرس ءِ آماچ اِنت۔ اِے راج وت ءَ وش بھت بِہ پھم ایت کہ بلوچستان ءَ ھم یک دلیر ءُ ناتُرسیں راجی لشکرے ھست کہ آئی ءِ تہ ءَ چیریں ترامگیج زِراب، کھر ءِ یونٹ ءُ پدائین گل ھم ھست اَنت کہ سرجمیں جھان ءَ مجید برگیڈ ءِ نام ءَ زانگ بیت۔ راج ءِ ھمے جنگی گل دلیریں ءُ کُنگریں جنگولاں سر ریچ انت۔

پاکستانی پوج ءِ ھمتواریں سرسوجی گل انسٹیٹوٹ آپ پِیس اینڈ کنپلکٹ اسٹڈی(IPCS) ءِ سروک آمر رانا گْوش ایت چہ 20 سال ءَ برجاھیں بلوچ راج ءِ نوکیں گوریلہ جنگ ءَ پاکستانی پوج پْروش ءِ آماچ اِنت ءُ مستریں سبب ئِے ایش اِنت کہ بلوچ آجوئی جنگ چہ سردار، نواب ءُ میرانی دست ءَ درکپت ءُ لس وانِندھیں ورنایانی دست ءَ شُت۔ آجوئی جنگ ءِ رھشونی ءَ بلوچ زالبول ءُ وانِندھیں ورنا کنگ ءَ اَنت۔ بلوچ راج گوں پاکستان ءَ نپرت کنت پمیشکا بی ایل اِے چہ یک گوریلہ گلے ءَ بدل بوتگ ءُ یک سرجمیں راجی لشکرے جوڑ بوتگ پمیشکا چہ 2023 ءُ 2024 ءِ اُرشاں انیگیں سال ءَ ارش %70 گیش بوتگ اَنت۔ بلوچ آجوئی لوٹوکیں گل بی ایل اے ءُ بی ایل ایپ ءَ سک دیمروی کُتگ۔ بی ایل اِے ءَ یک راجی لشکر ءِ وڑ ءَ اسپیشل جنگی یونٹز، مجید برگیڈ ءِ وڑیں ایلیٹ کلاس ءِ جانّدْری گل ءُ انٹیلیجنسی گل زِراب ھم اڈ داتگ اَنت کہ انی پاکستان ءِ ھلاپ ءَ شریں دابے ءَ کار کنگ ءَ اَنت۔ چی ایشی ءَ ھوار بلوچ راج ءِ تہ ءَ پاکستان ءِ ھلاپ ءَ یکشل ءَ نپرت پیداگ بوگ ءَ اِنت۔ پاکستانی سرسوجی گلIPCS ءِ رِد ءَ چہ اکبر بگٹی ءُ بالاچ مری ءِ شھادت ءَ پد بلوچستان ءِ آجوئی جنگ چہ سردار ءُ نواباں درکپتگ ءُ بلوچ ورنائیں رھشونانی دست ءَ شُت آیانی تہ ءَ زالبول ھم ھوار اَنت پمیشکا پاکستان ءِ واست ءَ دِگہ راہ ءُ سوج ھم نیست کہ گوں کَے ءَ گپ ءُ تْران بہ بیت؟

پاکستانی پوج زیت چہ اِے جنگ ءَ پْروش ایت ءُ بے اِزتی ءَ چہ بلوچستان ءَ درکپ ایت۔ دومی نیمگ ءَ باید اِنت راجی لشکر بی ایل اِے کوہ سلیمان ءِ دمگ انچوشکہ ڈیرہ مُراد جمالی، جھل مگسی، ڈیرہ بگٹی، جیکب آباد ءُ ڈیرہ گازی ھان ءِ دمگاں ھم بلوچ راجدوستی آشوب ءُ سرمچاراں ودی کنگ ءِ جھد بہ کنت پرچا کہ مارا وتی سرڈگار ءِ ھمُک انچ آجو کنگ اِنت۔ چہ آجوئی ءَ پد ءَ ھمے بلوچ راج ءَ ماں وانگجایاں براھوئی ءُ بلوچی زبان ءَ دژمن ءِ زُلم ءُ جبر کِسہ ءُ راجدوستی وانینگ بیت کہ پاکستان ءِ دْروگیں مھر ءُ دوستی شُودگ ءُ ھلاس بہ بنت۔

شالا بلوچ راج وت ماں وت تپاک ءُ بلوچستان آزات بات، بلوچ راج وتی ماں وت ھمکوپگ، ھمگام ءُ ھمدرد بہ بات۔ شالا بلوچ راج یکمُشت ءُ راجمستری(جمھوری) بلوچستان دیمروی بہ کنات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی ءِ درشانی انت-