TBP Balochi

متحدہ عرب امارات ءَ بلوچستان ءِ جھمنندیں مردمے ھمودے چیریں ادارگاں دزگیر کنگ ءَ پد ناشناسیں جاھاں بُرتگ۔

زورانسری بیگواھی ءِ آماچ بیتگیں مردم ءِ پجار عبدالحفیظ زہری ءِ نام ءَ بیتگ۔

ٹی بی پی ءَ رس اتگیں اھوالانی رد ءَ بلوچستان ءِ دمگ خضدار ءَ نندوکیں شھید حاجی محمد رمضان زہری ءِ زھگ ءُ شھید مجید ءُ شھید حئی ءِ مستریں برات عبدالحفیظ زہری متحدہ عرب امارات ءِ چیریں ادارگاں آئی ءِ لوگ ءَ انٹرنیشنل سٹی چہ دبئی ءَ گوستگیں شپ ءَ ادار دو ءَ بیگواہ کُتگ ءُ گوں وت بُرتگ چریشی ءَ پد آئی ءِ ھچ پئیمیں اھوال نہ رس اِتگ۔

زانگ بہ بیت حفیظ زہری ءِ برات مجید بلوچ بلوچستان ءِ دمگ خضدار ءَ زورانسری بیگواھی ءَ پد 24 اکتوبر 2010 ءَ آئی ءِ ژانگولیں جون دزکپتگ اَت وھدیکہ حفیظ زہری ءِ پِت ناموریں باپاری مردم حاجی رمضان زہری 2 فروری 2012 ءَ سلاہ بندیں مردمانی تیر گواری کُتگ ءُ بیران کُتگ اَت۔

ھندی اھوالانی رد ءَ دویں وئیلانی تہ ءَ پاکستانی چیریں ادارگانی ءُ سرکاری چیردستی ءَ کارکنوکیں سلاہ بندیں ٹولی ھوار بیتگ اَنت۔

چریشی ءَ پیسر عبدالحفیظ زہری ءِ ناکوزتک انسانی اگبالانی باسک راشد حسین 26 دسمبر 2018 ءَ متحدہ عرب امارات ءِ چیریں ادارگاں بیگواہ کُتگ ءُ شش ماہ ءَ داں وتی کِر ءَ دارگ ءَ پد راشد حسین ابید قانودی پئیماں پاکستان ءِ دست ءَ داتگ کہ داں انگت بیگواہ اِنت۔

راشد حسین بلوچ ءِ دزگیر کنگ ءَ پد متحدہ عرب امارات ءِ پولیس ءُ چیریں ادارگانی کارمنداں حفیظ زہری ءِ لوگ ءَ بیڑ بُرتگ اَت وھدیکہ کھول ءِ رد ءَ کارمنداں راشد حسین ءِ پاسپورٹ ءِ زیرگ ءِ ھاتر ءَ بیڑ بُرتگ اَت۔

زانگ بہ بیت راشد حسین ءِ کھول ءِ رد ءَ آھانی کر ءَ راشد حسین ءِ گیر قانودی پئیم ءَ پاکستان دیم دیگ ءِ نبشتھی منانک ھست اَنت۔ وھدیکہ کھول ءِ نیمگ ءَ شال، کراچی ءُ اسلام آباد ءَ زھرشانی کنگ بیتگ اَنت۔

عبدالحفیظ زہری ءِ زورانسری بیگواھی ءِ درگت ءَ داں انگت متحدہ عرب امارات سرکار ءِ نیمگ ءَ ھچ پئیمیں لیکہ دیم ءَ نیتکگ اَنت-

کراچی ءِ مزن شھدربرجاہ ءَ بلوچی ءِ سرٹیپکٹ (بنگیجی) کورس ءِ وانینگ بندات کنگ بیتگ ءُ جار ءِ پد ءَ اے سرٹیپکغ کورسانی بھر زورگ ءِ رمس سِی ءُ یک جنوری ایر کنگ بیتگ –

شھدربرجاہ ءِ بلوچی ءِ وانینوکانی گوشگ اِنت اے کورسی سرٹیپکٹ ءَ شھدربرجاہ ءِ نودربراں ھوار ابید ڈن ءِ مردم ھم بھر زرت کن اَنت –

شنگ بیتگیں جار بلوچی ڈپارٹمنٹ ءِ گوشگ اِنت کہ بلوچی زبان ءِ ھدمت کنگ ءُ آئی ءِ وانینوک دراھیں لبزانکار ءُ زانوکارانی سر ءَ المی اِنت مہ وتی پدریچ ءَ ماتی زبان ءَ بہ وانین اَنت ءُ آئی ءِ کدر ءُ نھاد ءَ بہ زان اَنت تانکہ ھما راج وتی ماتی زبان ءَ ارزشت دنت گڑا آئی ءِ نھاد دنیا ءِ دگہ زبانانی وڑ ءَ دیمروئی کُت کنت-

شنگ بیتگیں جار ءَ لوٹ کنگ بیتگ کہ اے کورس ءِ ھمراھداری بہ کن اِت ءُ اے کورس ءِ سبب ءَ گمان بیت شھدربرجاہ ماعا سرٹیپکٹ کورس ءِ ھواری ءَ بلوچی مائینرسبجکٹ ءِ رزامندی ءَ بہ دنت-

اے بلوچی کورس ءَ بلوچی زبان ءِ لبزانکار شرپ شاد پہ استادی ءَ گچین کنگ بیتگ –

شنگ بیتگیں جار ءَ بلوچی زبان ءَ واھگداری ءَ آئی ءِ باسکاں گوں نزیکی کنگ ءِ گیشتریں سرپدی ءِ واستا گوشگ بیتگ –

پاکستان ءَ انسانی ھکانی وزارت ءِ نیمگ ءَ چہ انسانی ھکانی بگیری ءِ درگت ءَ جوڑ کتگیں شکایتی سیل انسانی ھکانی گل ءُ سیاستدان ءَ بے مانا گوشگ ءَ اِنت ئِے-

زانگ بہ بیت اے سیل ءَ چریشی ءَ دوشمبے ءَ وزارت ءِ وزیر انسانی ھکانی شیریں مزاری ءَ پچ کتگ، ھرچ وڑیں شھری آزمانکی دروشم ءَ ای میل ، یا فون سر ءَ انسانی ھکانی بگیری ءِ درگت ءَ چہ شکایت نکش کُت کن اَنت چریشی ءَ پٹ ءُ پول ءَ پد نمدی ءَ ھمگرنچیں ادارھانی دست ءَ دیگ بنت ءُ اشی ءِ چست ءُ ایری چارگ بیت-

بلوچستان زورانسری آوار جنی ءِ بگیری ءَ کار کنوکیں گل وائس فار بلوچ مسنگ پرسنز ءِ وائس چیئرمین ماما قدیر بلوچ ءَ جرمن ریڈیوے ادارہ ڈویچ ویلے ءَ چہ گپ تران کنان ءَ گْوشتگ کہ آیاں اے شکایت سیل ءَ ھچ وڑیں اُمیت نیست ، آمیدگس اے وڑیں سیلاں چہ گیشتر زوراور اَنت – کمیشن پیسر ءَ چہ ساڑی اِنت چریشی ءِ سروکی ءَ یک پارگ بوتگیں ججے کنگ ءَ اِنت – اے کمیشن ءَ تاں مروچی بیگواھیں مردمانی درگت ءَ ھچ وڑیں کردار کنگ نہ بوتگ گُڑا اے شکایتی سیل چی کُت کنت-

ماما قدیر ءِ رِد اے تھنا ھکومت ءِ زبھری اِنت – کہ جھانی گل ءُ جھانی مردمانی پیشدارگ ءِ ھاتر ءَ اِنت بلے ھکومت بیگواھانی شوھازگ ءَ واھگ ندار اِیت-

نیشنل پارٹی ءِ راھشون سینیٹر اکرم دشتی ءِ گوشگ اِنت کہ پاکستان ءَ زورانسری بیگواہ کنگ بوتگیں مردمانی گوم ءَ بے انسانی سلوک ءُ مزھب توھین ءُ توھین رسالت سر ءَ مردماں کُشگ انسانی ھکانی یک بلاھیں ھلاپ ورزی یے – آئی ءِ گوشگ اِنت انسانی ھکانی درگت ءَ چہ ریاستی پالیسی ءَ بدل کنگ الّمی اِنت-

آئی ءَ گْوشتگ کہ ڈی ڈبلیو ءَ گوشتگ کہ انسانی ھکانی ءِ درگت ءَ چہ شکایت سیل جوڑ کنگ ءَ کار دیم ءَ شُت نہ کنت بلکیں اے درگت ءَ چہ ریاست ءِ پالیسی بدل بوگ لوٹ اَنت- گوستانک ءَ چیف جسٹس افتخار محمد چودھری ءَ ھم اے درگت ءَ جُھد کتگ بلے اشی ءِ ھچ وڑیں شری گندگ نیتکگ ھمے وڑ اے شکایتی سیل ءِ ھم ھچ وڑیں پائدگ نہ بیت وھدے ریاست وتی پالسیاں بدل نہ کنت-

انسانی ھکانی گلانی گوشگ اِنت ھمے وڑیں شکایتی سیل یا کمیشن پیسر ءَ ھم جوڑ بوتگ اَنت بلے چُشیں ھاسیں شری گندگ نیتکگ ءُ اشی ءَ ھم گیش اُمیت دارگ ءَ نہ ئے- پاکستان ءَ زورانسری آوار جنی ءِ بگیری ءَ کارکنوکیں آمنہ مسعود جنجوعہ ءَ گوشگ اِنت کہ انسانی ھکانی ءِ بگیری یک ھاسیں جیڑھے زورانسری بیگواہ کنگ بنت ءُ آیاں نہ لگ اِیت کہ شکایتی سیل اے درگت ءَ یک کارے کُت بہ کنت- آئی ءَ گْوشتگ کہ ڈی ڈبلیو ءَ گوشتگ کہ گوستگیں سال ءَ جولائی ءَ منی ءُ وزیراعظم عمران خان ءَ گوں گند ءُ نند بوتگ ءُ آئی ءَ گوشتگ کہ پانزدہ روچ توک ءَ سرجمیں مردماں یل کن ایں ءُ بیگواھاں پٹ ءُ پول کنگ بنت- ما دوھزار ھشت سد ءُ سی مردم ءِ لِسٹ داتگ چریشی ءَ ھپتاد ءِ سرپدی رستگ ءُ آ جتائیں بندیگجاھاں وھدے کہ چار سد ءِ نزیک انچیں مردم اَنت کہ آیانی درگت ءَ گوشگ بوتگ کہ آیانی سر ءَ بھتام ھست اِنت یا آ جتائیں بندیگجاہ ءَ اَنت یا لھتے یل کنگ بوتگ بلے انگت دوھزار ءَ گیش انچیں مردم اَنت آیانی ھچ وڑیں ھال ایوال نیست-

زانگ بہ بیت بلوچستان ءَ بیگواھیں مردمانی یل کنائینگ ءَ جوڑ کتگیں ھکومتی کمیشن ءِ بازیں سالاں ساری بوتگ وھدے کہ بیگواھیں مردمانی کھول اے کمیشن ءَ دلجم نہ اَنت ءُ بازیں وھداں آیاں شکایت کتگ کہ کمیشن ءِ رویشگ بے مناسب اِنت-

بلوچ نیشنل موؤمنٹ ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ گْوشتگ کہ آئی ایس آئی ءِ چریکاں روکپتی بلوچستان ءِ دمگ پیشن ءَ بلوچ جُھدکار ءِ برات ءُ بی این ایم ءِ دوزواہ خدابخش پنام کماش ء پُھلان جھمنند گومازی شھید کُرتگ – ما اے وئیل ءَ گوں تْرندی ءَ ایرجنیں ءُ کول کنیں کہ شھیدانی ھون ھچبر پھل کنگ نہ بنت-

جارکش ءَ گوشتگ کہ خدابخش ء پھلان پاکستانی پوج ءِ زوراکیاں تنگ بیتگ ءُ گْوستگیں ھشت سال بیت کہ روکپتی بلوچستان ءِ پیشن ءَ باھوٹی زندے گْوازینگ ءَ بیتگ کہ دو روچ پیش پاکستانی پوج ءُ چیریں ادارہ (آئی ایس آئی) ءِ چریکاں شھید کُرتگ-
آئی ءَ گْوشتگ کہ چہ رودراتکی بلوچستان ءَ برجاھیں پاکستانی پوج ءِ ناشرکاریاں ھزاراں کھول روکپتی بلوچستان ءُ اوگانستان ءَ لَڈّگ ءُ آھگ ءَ لاچار بیتگ اَنت بلے نہ اوگانستان ءُ نہ روکپتی بلوچستان ءَ بلوچ باھوٹی پھریز اَنت – آیاں پاکستانی پوج ءُ چیریں ادارہ مدام نشانگ کنگ ءَ اَنت-

جارکش ءَ روکپتی بلوچستان ءِ جھمننداں چہ دزبندی کُرتگ کہ آ پہ وتی مھمان ءُ باھوٹیانی پھریزگ ءَ گامگیج بہ زور اَنت، پرچاکہ اے مردماں پہ وتی زاتی دُژمنی ءِ سْوب ءَ نہ بلکیں پہ یک مزنیں راجی مول ءُ مرادے ءَ وتی گِس ءُ جاہ،مال ءُ متاہ دُرس یل کُرتگ اَنت ءُ باھوٹی زندے ءِ گْوازینگ ءَ لاچار اَنت-

بلوچستان ءِ دمگ کیچ ھوشاپ ءَ زھگے ءِ گون ءَ ھراب کاری کنوکیں ایف سی ءِ کارمند ءَ را آمیدگس ءَ ھبدہ سال کید ءِ سزا داتگ –

تربت سیشن آمیدگس ءِ جج عبدالصبور مینگل ءَ ارزی نمبر 02/020 جرمB/ 377 ءَ نامزدیں کتکار ایف سی ءِ کارمند ھبدہ سال کید ءِ سزا داتگ –

ارزی ءَ نامزدیں کتکار ریحان خان کہ ایف سی ءِ کارمندے ءُ آئی ءِ سر ءَ ھمے الزام انت کہ آئی ءَ مراد ء گنگزار نامیں کسانیں زھگے ءِ گون ءَ ھراب کاری کتگ –

آمیدگس ءَ جرم کنگ ءِ سر ءَ مروچی کتکار چاردہ سال کیز ءُ دہ لک کلدار جرمانہ کتگ ءُ آھانی تہ ءَ پنچ لک اسرمبد مراد علی ءَ دیگ بیت اِنت – اگاں جرمانہ اد ءَ کنگ نہ بوت اَنت دگہ شش ماہ جیل بیت – مقدمہ ءِ پیروی سرکار ءِ نیمگ ءَ چہ شبیر احمد بلوچ ایڈوکیٹ ءُ ظفر بلوچ ایڈوکیٹ ءَ کتگ –

زانگ بہ بیت 21 اکتوبر ءَ دوھزار بیست ءُ یک ءَ ایف سی ءِ کارمنداں کیچ ءِ دمگ ھوشاپ ءَ دہ سالی ئیں زھگ ءِ گون ءَ جنسی زوراکی کنگ بوتگ ات کہ آئی ءِ جاور نگیگ بوتگ ءُ زھگ بیھوشی ءَ تربت نادراھجاہ ءَ برگ بوتگ ات –

زھگ ءِ پجار مراد امیر ءِ نام ءَ چہ بوتگ ات کہ آ ھوشاپ گریڈ بازار ءِ نندوک انت – دمگی مردمانی رِد ءَ زھگ ءِ گون ءَ ھراب کاری وئیل ھما وھد ءَ بوتگ کہ زھگ جنگل ءِ نیمگ ءَ شتگ بیتگ –

دمگی مردماں وئیل بگیری ءَ زھرشانی کتگ ھوشاپ دگ بند کرتگ ات –

کراچی پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنچ سد ءُ ھپتاد ءُ یک روچ سرجم بیتگ، ھمدردی کنوکانی تہ ءَ چہ ملیر کراچی ءَ سیاسی ءُ چاگردی باسک سلیم بلوچ، یاسر بلوچ مھمد، اشرف بلوچ بنجل ءَ اتکگ ءُ پدردی اش درشان اش کرتگ-

وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ گپ کنان ءَ گوشتگ بلوچستان ءَ جتا جتائیں پگراں بندوکیں مردم ھمک روچ ابید آمیدگسی پرمان ءَ گرگ ءُ بیگواہ کنگ ءَ تچکی ءَ ریاستی چیریں ادارہ ءُ کانون سازیں ادارہ ھوار اَنت –

آئی ءَ گُشتگ مروچی زانگولیں لاشانی کپگ ءِ وئیلاں ھوار انسانی ھکانی ٹوھیں لگتمالی بلوچستان ءَ برجاہ اَنت،بلے پاکستانی رسانکدراں گندگ بیت گڑا بلوچ ءِ جیڑہ کجا بلوچ راج یا بلوچستان ءِ نام ھم گندگ نہ بیت اِنت-

بلوچی بُنگیجی درونت

ٹی بی پی درونت

پہ بلوچی زبان ءِ نوک باھندیں وانوکانی ھاتر ءَ دی بلوچستان پوسٹ ءَ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونتاں چہ بلوچی زبان ءِ راست نبیسگ ءَ ھیل کُت کن اَنت-

مئے دومی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائری ءِ لڑ کہ دی بلوچستان پوسٹ ءِ تندجاہ ءَ آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

آں، اں، ے، ئِے ءُ ایت

آں : پہ “من” ءَ کارمرز بیت انچوشکہ:- من رو آں۔ من بلوچی کتاباں وانگ ءَ آں ءُ من بلوچے آں۔
اں: پہ باز ءَ کارمرز بیت۔ درونتاں، سنگتاں، دزگْوھاراں ءُ نودربراں۔
ے : پہ یک چیزے ءَ کارمرز بیت انچوشکہ:- درونتے، سنگتے، دزگْوھارے ءُ نودربرے وھدے کہ گال ءِ گُڈسر ءَ “ا،ی ءُ ے” بئیت گُڑا دو ٹِکیں “یے” کارمرز بیت انچوشکہ:- نمدی یے، نادْراھی یے ناھُدایے، کوجایے ءُ بَے یے۔

ئِے(ئےِ): پہ سیمی ناساڑی ءَ کارمرز بیت:- درائینت ئِے، گْوشت ئِے یا آپ ئِے وارت ءُ شُت۔

رھدربری گالرِد

1- من شُمارا راجی زبان ءَ وانین آں۔
2- اگاں رَدی یے بوتگ گُڑا من چہ شُما پھلی لوٹ آں۔
3- من لیب ءَ روگ ءَ آں۔
4- من سْیاھیں گُداں گور ءَ کن آں۔
5- من پہ تو پسے بھا زُور آن ءُ کا آں۔
6- بلوچ گوکاں دار اَنت
7- دْرچک گُڈ اتگ اَنت ئِے یا دْرچک ئِے گُڈ اتگ اَنت۔
8-من گْوش آن ئِے باندا وت کار ایت ئِے۔
9- من بینگّاں لاھو نہ کن آں۔
10- من پِشی یے لاھو کن آں۔
11- من ورنایے آں پمیشکا من جْوانیں لیبی یے آں۔
12- اَلی ءُ ساکب بَے یے ءَ گلائیش اَت اَنت۔

اِیت: کُمکّار گالے کہ گالانی رند ءَ کَیت ءُ آیانی بزانت ءَ وتی رنگ ءَ گیشّین اِیت – اِے ھما کار گالانی رند ءَ کَیت کہ آیانی گُڈ سر ءَ ھمے گالوار کَیت انچوش کہ کٹّگ ، کٹ اِت ءُ کٹ ایت۔ سُرَگ ، سُر اِت ءُ سُر اِیت۔ کندگ ، کند اِت ءُ کند اِیت

1- ھور تْرُندی ءَ گْور ایت۔
2- پِت پہ وتی چُک ءَ موٹلے بھا زُور ایت۔
3- بور تچ ایت گُڑا نابلدیں لیبی چہ بور ءَ کپ ایت۔
4- ھلیل ترا گِند ایت ءُ کَند ایت۔
5- ساھتے ءَ پد وان ایت ئِے۔

پہ راجی زُبان ءِ دیمروئی ءَ ما شُمئے مھر ءُ ھمراھداری لوٹ ایں۔

بلوچستان لبریشن فرنٹ ءِ جارکش میجر گوھرام بلوچ ءَ وتی شنگ کُتگیں درشان ءِ تہ ءَ کیچ ءِ ھنکین کھیر کور، دشت ءَ بیتگیں ترندیں اُرش ءِ زمہ واری زیران ءَ گُشتگ کہ کیچ ءِ ھند کھیر کور، دشت ءَ بستگیں پاکستانی پوجی چوکی ءِ سر ءَ 25 جنوری 2022 سَے شمبے ءِ روچ ءَ بیگاہ ءِ ادار شش ءَ بی ایل ایف ءِ سرمچاراں اُرش کُتگ، اے اُرش ءِ تہ ءَ دژمنیں پوج ءِ 17 کارمند کُشگ اَنت۔ میجر گوھرام ءَ گُشتگ کہ بلوچ سرمچاراں دژمن ءِ سلاہ ءُ دگہ پوجی ساز ءُ سامان دستیگ کُتگ اَنت ءُ چوکی مان داشتگ۔زورگیریں دژمن ءِ ھلاپ ءَ اے اُرش ءِ تہ ءَ بی ایل ایف ءِ سرمچارممتاز پنام ءِ بالاچ دژمن ءِ ھلاپ ءَ دلیری ءَ گوں جنگ کنان ءَ نمیران بیتگ۔

بی ایل ایف ءِ جارکش میجر گوھرام بلوچ ءَ اُرش ءِ درگت ءَ گیشتریں اھوال دیان ءَ گُشتگ کہ بی ایل ایف ءِ سرمچاراں کھیر کور، دشت ءَ بستگیں ریگولر آرمی چوکی ءِ سر ءَ اُرش کُتگ۔ آئی ءَ گُشتگ اُرش ءِ وھد ءَ کیمپ ءَ ساڑی ئیں 13 پوجی کُشگ بیتگ اَنت وھدیکہ یکے تتکگ دومی نیمگ ءَ چار پرپٹ سواریں پوجی کارمند کہ چوکی ءِ پوجیانی کمک ءَ آیگ ءَ بیتگ اَنت آ ھم نشانگ کُتگ ءُ کُشتگ اَنت۔ بی ایل ایف ءِ اُرش ءِ آسر ءَ زورگیریں پوج ءِ 17 کارمند مرتگ اَنت۔

میجر گوھرام ءَ گُشتگ سوبمندیں اُرش ءَ پد بی ایل ایف ءِ سرمچاراں پوجی چوکی ءَ جاڑیگیں زورگیریں پاکستانی پوج ءِ درستیں سلاہ ءُ دگہ پوجی مڈی دستیگ کُتگ اَنت ءُ بنجل مان داشتگ۔ آئی ءَ گُشتگ کہ دژمنیں پوج ءِ سلاہ ءُ مڈیاں ھوار وتی نمیرانیں ھمراھیں سرمچار ممتاز پنام بالاچ ءِ جون ھم وتی ھمراھی زرتگ ءُ پھازیتگیں جاہ ءَ سربیتگ اَنت ءُ گوستگیں شپ ءَ شھید ممتاز ءِ گلزمین ءِ ھاکانی باھوٹ کُتگ۔

میجر گوھرام بلوچ ءَ شھید سرمچار ممتاز بلوچ پنام ءِ بالاچ ءَ آئی ءِ دلیری، راج دوستی ءُ وتن دوستی ءُ مزن شانیں دیمھونی ءَ ستاشانی درشان اِتگ ءُ آئی مِشن ءَ برجاہ دارگ ءُ بلوچستان ءِ آجوئی ءَ داں زورگیریں پاکستانی پوج ءُ تاکتداریں پھناتانی سر ءَ اُرشانی برجاہ دارگ ءِ اھد کُتگ۔

دی بلوچستان پوسٹ پتر ھال ءَ سر بیتگیں ھالانی رد ءَ گوستگیں روچ ءَ پنجگور ءَ ناشناسیں سلاہ بندیں مردمانی دست ءَ آوار جنگ بیتگیں دو مردمانی لاش مروچی پنجگور انتزامیہ ءَ دزکپتگ اَنت –

پولیس ءِ رد ءَ انتزامیہ ءَ پنجگور ءَ دو مردمانی لاش دزکپتگ اَنت- کہ آیانی جسماں تیرانی ٹپ پر اَنت، لاشانی پجار سمیر ءُ ضغیر ءِ ناماں زانگ بیتگ اَنت-

انتزامیہ ءِ رد ءَ لاش پنجگور ءِ دمگ پنچھی کلگ ءَ دزکپتگ اَنت کہ ھردوک برات اَنت کہ گوستگیں روچ ءَ سلاہ بندیں مردماں آوار جتگ اَنت-

دمگی مردمانی اے کُشگ بیتگیں مردمانی آوار جنوکانی سیادی سرکاری پلامرزی ءَ چلوکیں ٹولی ءَ اِنت – زانگ بہ بیت سرجمیں بلوچستان ءَ سدانی کچ ءَ پوج ءَ مردم سلاہ بند کتگ اَنت کہ آیانی لس نام ڈیتھ اسکواڈ ءِ نام ءَ زانگ بیت اِنت –

گوستگین روچ ءَ بلوچستان ءِ دمگ پنجگور ءَ سلاہ بندیں مردمانی تیرگواری ءَ یک مردمے کشگ بیتگ اَت ءُ دو برات سمیر ءُ صغیر آوار جتگ ءُ گون وت اش برتگ اِت اَنت وئیل پنجگور ءِ دمگ شاپاتان ءَ پیش اتکگ اَت تیرگواری ءِ وئیل ءَ کشگ بیتگیں مردم ءِ پجار نواز ءِ نام ءَ زانگ ںیتگ اَت-

انتزامیہ ءَ لاش ھسپتال ءَ سرکرتگ ءُ وئیل ءِ بارو ءَ دگہ گہ شنگ نہ بیتگ اَنت-