TBP Balochi

نبشتانک: اے تپاوت پرچا؟

نبشتہ کار: مھتاب بلوچ

دی بلوچستان پوسٹ

مئے راج زالبول ءُ مردین ءِ تہ ءَ پرچا تپاوت کن انت؟ اے تپاوت مئے راج ءِ تہ ءَ چہ بُندر ءَ بوتگ ءُ انگت ھست اِنت اولی گپ ایش انت کہ بائدیں زالبول ءُ مردینءِ تہ ءَ تپاوت مہ کن انت بلئے مئے مھلوک ھاس وتی زالبولانی ھک ءِ درگت ءَ گپ نہ جن انت پرچا کہ ھرچیز ئِے زالبول ءِ درگت ءَ بہ بیت آ ایشی ءَ میار ئِے پھم انت مئے راج ءِ تہ یک جنکے ھم وتی وڑ ءَ وتی مرزی ءَ زندگی کرت نہ کنت، آکر پرچا؟ اے درگت ءَ سرجمیں دنیا ءَ دیمروئی کرتگ – جنک ءُ بچکءِ میان ءَ ھچ تپاوت نہ کن انت – بلئے مئے راج ءِ تہ ءَ زالبول ءَ ھمے گوشگ بیت کہ جنک پہ گِس ءِ کارانی ھاتر ءَ جوڈ بوتگ – ھمے گُش انت کہ ایوک ءَ نگن بہ پچیت لوھیگ ءُ رزان ءُ گُداں بہ شودیت بلے دنیا گوش ایت زالبول ھم بازیں چیزے کُرت کنت ءُ کنگ ءَ اِنت ھم دگہ ملکانی تہ ءَ زالبول پائیلیٹ، انجینیر ءُ سائنٹسٹس جوڈ بوتگ انت بلئے مئے راج ءِ تہ ءَ زالبولاں بس ٹیچرے ءِ بوگ ءَ کِل اَنت مئے راج ءِ تہ ءَ زالبول گِسانی تہ ءَ بندیگ کنگ بوتگ انت سرڈگار ءِ آجوئی ءِ گپ ءَ کن انت بلئے زالبولانی ھک ءِ گپ ءَ نہ کن انت ھر بلوچ ءِ اولی واھشت ھمیش انت کہ بلوچستان آجو بہ بیت جنین ءُ مردین ءُ کلیں راج ءِ واھشت ھمیش انت ءُ بازیں زالبول ھست انت کہ آ لوٹ انت پہ بلوچستان ءِ ھاتر ءَ جنگ بہ کن انت بہ جُنز انت، جنگ ءِ تہ ءَ ھوار بہ بنت بازیں زالبول ھست انت وانگ لوٹ اَنت ءُ بازیں ھست انت کہ آجو بوھگ لوٹاں وتی وڑ ءَ وتی مرزی ءَ زندگی کنگ لوٹ اَنت بلئے اشاں چہ یکے ھم وتی واھشت آں سرجم کرت نہ کنت پرچاکہ آ ایشی ءَ میار پھم انت ءُ آھانی ھک ءَ نہ دئے اَنت – مئے راج ءِ تہ ءَ چُشین ھزاراں مردم ھست اَنت کہ یکے ءَ ھم وتی جنکاں یک (right) ھک ئِے نہ داتگ –

1:اد ءَ من ھنچیں گپے گْوشگ لوٹگ ءَ آں کہ گیشتر مئے زالبولانی درگتءَ انت – ھنچیں زالبول ھست انت کہ لوٹاں جنگ ءِ تہ ءَ ھوار بہ بنت جنگ بہ کن انت بلئے آھانی کھول نہ منّ ایت ھمے گوشگ بیت کہ تو جنکے ئے ءُ میارءِ گپ اِنت بلئے کھول اے گپ ءَ بائدیں بہ زانت کہ جنگ جنک ءُ بچک ءَ سِل نہ کنت، لائکی ءِ سِنچ ءَ سِل کنت ءُ اشی ءِ تہ ءَ میار ءِ گپ نیست اِنت بلکیں پھری گپ ئِے اگاں جنک کمک کنگ بہ بنت گڈا جنگ ءِ تہ ءَ جنک ھم جوانی ءَ جنگ کُرت کن اَنت کُردانی جنک بائدیں پہ شما درور بہ بنت کہ آ پہ سرجمیں دنیاءَ درور جوڑ بوتگ انت اگاں ما وتی گْوستانک ءَ بہ چاریں گڑا مئے زالبول آں ھم جنگ کرتگ پہ درور ءَ گل بی بی، بی بی بانڑی رند، گوھر بلوچ، ماھناز بلوچ، بی بی گنج، ھاتون بی بی ءُ مریم انت اے مئے راجدپتر ءِ درور انت ءُ انوں ھم بائدیں جنگ ءِ تہ ءَ ھوار بہ بنت ءُ جنگ ءَ دیم ءَ بہ بر انت مارا باور انت کہ اگاں زالبول چوشیں گامگیجے بہ زور انت یک زالبولے ءِ جنگ ءِ تہ ءَ ھوار بوھگ ءَ آ سرجمیں راج ءَ پاد کرت کنت ءُ مئے راج ءِ تہ ھاس جنگ ءُ وانگ ءُ زانگ ءِ تہ ءَ زالبول المی انت – بیا اِت بہ جنز اِت، وتی زالبولانی ھک آں بہ دئے اِت ءُ آھاں جنگ ءِ تہ ءَ موہ بہ دئے اِت مئے شھیدانی پِگر ءُ سسّا ءَ دیم ءَ بہ براِت کہ مئے شھید مئے امیت بوتگ انت زالبول ءُ مردین ھردو بیا انت بہ جنز انت ءُ جنگ ءَ وتیگی بہ کن انت ھاس زالبول اگاں ھمے جنگ ءِ تہ ءَ آھگ لوٹ ایت وتی گپ ءَ بہ جنت مہ ترس ایت ما باز اوپار کُتگ ءُ انوں ما وتی ھک ءِ سر ءَ بائدیں گپ بہ جن ایں ما بلوچستان ءِ کُلیں جنک آں لوٹ کن ایں کہ دیم ءَ بیا انت ھمت بہ کن انت ءُ وتی گپ ءَ بہ جن انت بائدیں ما ءُ شما یکجاہ بہ بئیں وتی گپ ءَ بہ جن ایں ءُ مارا باور انت کہ اگاں زالبول جنگ ءِ بھر بہ بنت الم نوکیں چیزے بیت اے جنگ نوکیں داب ءَ کئیت جنک ءُ بچک ءِ تہ ءِ تپاوت ءَ یل بہ دئے اِت مارا دیم ءَ روَگی انت سک باز چیز کنگی اِنت ءُ زالبول ءُ مردین یکجاہ کنگی انت اگاں مئے راج ءِ پِگر مَٹّ نہ بوت تاں ھما وھد ءَ ما دگہ ھچ چیز ءَ دیم ءَ شُت نہ کن ایں –

مئے راج ءِ تہ ءَ پہ زالبول ءَ جنگ کنگ، وانگ ءُ کار کنگ ءَ میار پھم اَنتءُ ائیبے زان اَنت ھمے ھاتر ءَ ما سرجمیں دنیا ءَ پُشت ءَ کپتگ اِنت –

یک زالبولے اگاں وان ایت گڑا سرجمیں پدریچ ءَ آباد کرت کنت مئے مردین بائدیں مئے زالبول آں پہ وانگ ءُ زانگ ءَ دیم بہ دئے اَنت ، اَبید ءِ زانت ءُ زانگ ءَ آ دنیاءِ تہ ءَ ھچ گپت نہ کنت اول ءَ مئے زالبول آں زانت ءِ دربرگ ءَ بلّ اِت پد ءَ ھما زالبول ءِ ھر واھگ ءُ واھشتے کہ بیت بِلّ اِت ئِے پہ سرجم کنگ ءَ جنک ءُ بچک ءِ تپاوت کہ مئے راج ءِ تہ ءَ ھلاس بیت گڑا ما زانت ءُ زانشت ءَ چہ ھر پڑ ءَ ھوار بوت کن ایں –

2: بلوچستان ءَ بازیں مردم ھست اَنت کہ آھانی گِس ءَ جنکے ودی بیت گڑا آئی ءَ پہ نامگپت ئِے دار انت ءُ آئی ءِ نامگپت ھم ھنچین ئِے کہ بیت آئی ءِ اُمر ھم مزن انت پد ءَ وھدیکہ ھما جنک مزن بیت دنیا ءَ گندیت کہ دنیا اینکس دیم ءَ شُتگ ءُ من چہ کسانی ءَ یکے ءِ نام گپت آں آ وت ءَ ڈب ءِ تہ ءَ بندیگیں مُرگ زانت، ءُ اے ھم زانت کہ من ءَ چہ سور ءَ پد آزاتی نہ رس ایت آ لوٹ ایت بہ وان ایت، کار بہ کنت یا سور کنگ نہ لوٹ ایت بلئے آئی ءِ گپ ءَ کس گوش نہ داریت پہ زور سور ئِے دینت ءُ آ ھم آئی ءِ مرزی ءِ بگیری ءَ سینزدہ چاردہ سال ءِ امر ءَ سانگ ئِے دینت اے ھم زوراکی ءِ بھرے ءُ مزنیں گناھے اے زوراکی باید انت کہ ھلاس بہ بیت ھمے وڑ ءَ وتی جنک ءَ دست ءِ وت تباہ کن انت ءُ جاھل جوڑ کن انت وھدیکہ آ سور ءُ سانگ کنت ءُ آئی ءِ زھگ ودی بنت آ ھم جاھل بنت ءُ آھاں وانگ ءُ زانگ ءَ مکن کن انت ھمے وڑ ءَ مئے سرجمیں پدریچ ءِ تہ ءَ ھمے جاھلی مان بیت ءُ اسلام ءِ تہ ءَ ھم ھست انت کہ جنک ءِ مرزی ءِ بگیری ءَ آ زور دیگ مہ بیت آئی ءِ منّگ المی انت –

3: بازیں مردم ھست انت کہ وتی جنک ءَ تاں دوازدہ ءَ وانین انت بلئے آئی ءَ کار کنگ ءِ اجازت ءَ نہ دینت، سانگ دینت اش ھمے گوش انت کہ تو جنکے ءِ تو کار مہ کن گڑا آئی ءِ وانگ ءُ وانینگ ءِ چی سیتّ ءُ نپ بیت؟ آکر پرچا؟ کجام کتاب ءِ تہ ءَ نبشتہ انت کہ جنک بس پہ سور ءُ سانگ کنگ ءِ ھاتر ءَ جوڑ بوتگ؟ وانگ زانگ، جنگ ءُ کار ءُ بار ءِ تہ ءَ ھوار بوگ ءَ جنک ءَ پرچا اجازت نیست؟ مئے اسلام ءَ مئے جنک آن آں ھمک ھک داتگ بلئے مئے مھلوک ءَ نہ داتگ اسلام ءِ تہ ءَ ھست انت کہ جنک ءَ وتی وڑ ءَ وانگ ءِ ھک ھست انت جنک ءَ وتی مرزی ءَ سور سانگ کنگءِ ھک ھست انت وتی زند ءَ وتی وڑ ءَ گوازینگ ءِ ھک ھست انت بلئے مئے مردم اسلام اسلام کن انت بلئے وت نہ زان انت کہ اسلام ءِ تہ ءَ جنک ءَ ھم سرجمیں ھک دیگ بوتگ انت –

4: مئے چاگرد ءَ بازیں ھنچیں مردم ھست اَنت کہ گوں جنک ءَ سور ءَ پد آئی ءِ سر ءَ زوراکی کن انت آئی ءِ لوگواجہ آئی ءَ جنت آئی ءِ سر ءَ زوراکی کنت بلئے جنک ءِ پت ءُ مات جنک ءَ پہ سُھنانی گرگ ءَ نیل اَنت پرچاکہ ھمے گوش انت کہ بَنّامی بیت انت اول وَ جنک ءِ پت ءُ مات آئی ءِ سور ءَ پد آئی ءَ ھمے زوراکی ءِ آماچیں زند ءِ تہ ءَ گوزگ ءَ ھچ نہ گْوش انت بلئے آئی ءِ سھنانی گرگ ءَ نیل انت پد ءَ مئے اسلام ءِ تہ ءَ اے ھم ھست انت کہ جنک وتی مرزی ءَ وتی سُھن آں گپت کنت ھمے گوش انت کہ جنک وتی سانگبندانی گور ءَ ھر وڑیں زوراکی بہ سگ ایت بلئے سھن آں مہ لوٹ ایت –

چو پرچا؟ مئے گناہ چی انت کہ بے سوَب ءَ زوراکی ءِ اوپار ءَ بہ کنیں؟ لٹ بہ وریں بلئے ھچ مہ گوش ایں ھر یک جنکے ھمے زوراکی ءِ آماچ انت بایدیں وتی تُرس ءَ ھلاس بہ کن اَنت ءُ وتی ھک ءِ ھاتر ءَ گپ بہ جن اَنت وتی جند ءِ ھاتر ءَ گپ بہ جن اَنت جنکانی آزاتی، زانت ءُ زانگ ءُ جنگ ءِ تہ ءَ بوگ ءُ آزات بوگ دراہ المی انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

پُل آباد ءِ کارست

نبشتہ کار: شاکر مراد

دی بلوچستان پوسٹ

چوناھا زندگی ءِ تہ ءَ ھمک میتگ ءِ ندارگ چو ابرمی براھداری ءَ دلکش ءُ پُر چاڑ انت بلے ھر میتگ ءِ وتی یک کارست ءُ کاروانے دل چم باتن مدام وتی میتگ ءِ پرُشتگیں کلات ءُ بادگیراں سالانی سال وتی گرنچاں بندیت ءُ یات کنت انچو کہ منی میتگ بزان (پُل آباد ) ھما میتگ انت کہ اے میتگ ءِ کارست ھمک بنیادم ءِ زردءِ کرار ءُ گوں یک آشنائیں زندمانے ءَ بندوک اِنت پُل آباد ءِ کارست کوہ ءُ ڈگار,مچ مچگدگ کھن ءُ کورجو کلات ءُ بادگیراں چہ زانگ بنت پُل آباد یک کوھن ءُ کدیمیں میتگے آئی ءِ گیشتر ڈل ءُ ڈوک شانانی دیم ءِ دمب آئی ءِ کوھن ءُ کدیمی ءِ گواہ انت کرنانی انسانی مانشاں چہ زانگ بنت اود ءِ جُمپ ءُ جول ھم نامدار انت کہ ھمک راج دپترءِ تاکانی اولی بھر انت پُل آباد یک پُر تاھیر کشیں ھلک ءُ میتگ پُل آباد ءِ کارست چہ ھمک وڑیں ناماں چہ سر ریچ انت پُل آباد ءَ تو کجام کردانی لڈ ءَ چماں شانک بہ دئے یے اودا ترا ھمک وڑیں بنیادم ءِ کردانی کوھن ءُ نوکیں لّڑے گندگ ءَ کیت پُل آباد ھچبر چہ کرد ءُ کارستانی دپتر ءَ ھالیگ نہ انت روچ ء مروچی ھمے کاروان ودّان ءُ جُنزان اِنت پُل آباد ءِتو لبزانک کلاسیکل شائری ءُ ادب ءِ اگاں دروشم ءَ چارئے گڑا ملااسمائیل اھدی دور ءِ کلاسیکل شائری ءِ اولی سرپ ءَ زانگ بیت پُل آباد ملا اسمائیل ءِ ھم ھنکین ءُ جاہ گوشگ بیت بلے ملا اسمائیل ءَ چہ ابید اود ءَ دگے ھم نامداریں نامانی لڑانی کمی نہ انت ملا اسمائیل ءِ کاروان پُل آباد ءِ تہ ءَ انگت برجاہ ءُ دیم ءَ روان انت اگاں نوکیں دور ءِ لڑ ءَ وان ئے اود ءَ,ترا اوں لبزانک ءُ شائری ءِ بازیں نام ھم دست کپ انت انچو مروچی پہ لبزانک ءُ ادب ءَ چو کوہ ءِ البرز ءَ پہ لبزانک ءِ کاروان ءَ وت ءَ مک اش کتگ رپیک نواب ،اسحاق خاموش اکرم اکرار، ماسٹر رپیک، مھمد ھسن، عاجز، ڈاکٹر اللہ بکش، عادل کریم، ممتاز ءُ دگے بازیں ورنائیں لبزانکار کہ مرچی وتی سینگ ئِے پہ لبزانکی کاروان ءَ بستگ ءُ مھکم انت انچو کہ مرچی ورناھیں شائر ءُ نبشتہ کارانی جھد چوُ روچ ءِ رُژن ءَ پدر اَنت۔

کہ مرچگیں دور ءِ تہ ءَ آیاں مُلا اسمائیل لبزانکی گل گوں کسانیں بالادءُ ورناھیں پگرے ءَ وتی کوپگاں زرتگ ءُ ملا اسمائیل لبزانکی گل ءِ جھد برجاہ داشتگ ءُ روچ ء مروچی ھمے کاروان ءَ جُنزان انت چہ ملا اسمائیل لبزانکی گل ءِ نیمگا بازیں تاک ءُ تاکبندے ھم شنگ بوتگ ملا اسمائیل لبزانکی گل ءِ اولی تاکبند ارجُل انت کہ سنگتاں وتی شپ ءُ روچ پہ تاکبند ءِ شنگ ءِ ھاتر ءَ یک کرتگ انت مرچی ھم ارجل تاکبند پہ وھد شنگ بوگ ءَ انت۔

ارجل تاکبند ءَ ابید ملا اسمائیل لبزانکی گل ءِ نیمگ ءَ بلوچی زبانءِ مزن ءُ ورناھیں شائرانی کتاب ھم چاپ ءُ شِنگ کرتگ شرف شاد، اکرام، انام رزا، سراج ساحر، ملااسمائیل پُل آبادی ءِ جند ءِ شائری ءِ کتاب شنگ کرتگ انت انگت پہ لبزانک ءِ گھبودی ءُ کارانی برجم دارگ ءِ واستا گل ءِ کر ءَ بازیں کتاب ءِ پہ چاپگ ایرانت۔

اے درست پُل آباد ءِ کارست ءِ کرد ءُ کاروان ءِ داتگیں ٹیکی انت کہ مروچی ورنایاں پہ وت ءَ زرتگ ءُ ودّان انت-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

سندھی آجوئی لوٹوکیں سلاہ بندیں گل ءَ یک مردمے ءِ کوش ءِ زمہ واری منّ اِتگ ءُ رسانکدر ءَ شِنگ کتگیں درشان ءِ تہ ءَ گْوشتگ کہ سندھودیش روولیوشنری آرمی ءِ جارکش سوڈھو سندھی ءَ گوشتگ کہ مروچی سندھڑی میرپورخاص دگ ءَ یک پنجابی سیٹلر ءُ پاکستانی چیریں ادارھانی چاریگ یوسف آرائیں سر ءَ بوتگیں اُرش زمہ واری منّ اِتگ –

جارکش ءَ گوشتگ اے اُرش ءَ آ سک ٹپی بیتگ ءُ آئی ءَ گْوشتگ کہ ایس آر اے سرجمیں دری مردماں مکن کن ایں آ سندھ ءَ یل بدے اَنت ءُ برو اَنت –

جارکش ءَ گْوشتگ کہ ایس آر اے سندھ سرجمی ءَ وتواجھی ءَ داں وتی سلاہ بندیں جُھد ءَ برجاہ دارگ ءِ اِھد کن ایں-

سربوتگیں ھالانی رِد ءَ بلوچستان ءِ دمگ مستونگ ءَ ناشناسیں مردماں گیس کمپنی ءِ کارگس ءِ سر ءَ دستی بمب ءِ سر ءَ اُرش کُتگ –

گیشیں ھالانی رِد ءَ مستونگ ءِ بازار ناشناسیں مردماں گیس کمپنی کارگس ءِ سر ءَ دستی بمب ءِ چگل داتگ ءُ تتکگ انت –

تنی وھدی اُرش ءَ جانی مالی تاوان ءِ ھال سر نہ بوتگ ناکہ اُرش ءِ زمہ منّگ بوتگ –

سربوتگیں ھالانی رِد ءَ ناشناسیں سلاہ بندیں مردماں کیچ ءِ دمگ دشت ءَ پاکستانی پوج ءِ پانگس ءِ سر ءَ اُرش کُتگ ءَ پانگس وتی کبزہ کتگ –

اھوالکار ءِ رِد ءَ اُرش دشت ءِ دمگ سبدان ءَ پوجی پانگس ءِ سر ءَ کنگ بوتگ –

دمگی اھوالکار ءِ رِد ءَ اُرشکار ءُ پوج ءِ میان ءَ سَے ادار ءَ تاں جنگ برجاہ بوتگ – سلاہ بندیں مردماں پانگِس ءِ سر ءَ کبزہ کُتگ ءُ پوج ءِ سلاہ ءُ دگہ مڈی دستیگ کُتگ اَنت –

بلے تنی وھدی پوجی بنشون ءِ نیمگ ءَ اے درگت ءَ ھچ وڑیں ھال شنگ نہ کتگ –

زانگ بہ بیت کیچ ءُ کش ءُ کری گوراں پاکستانی پوج ءِ سر ءَ بلوچ آجوئی لوٹوکین سلاہ بندیں گلاں اُرش کُتگ بلے تنی وھدی اے اُرش ءِ ھچ گل ءِ نیمگ ءَ چہ منّگ نہ بوتگ اُرش ءِ درگت گیشی ھال تنی وھدی نہ اتکگ –

بلوچستان ءَ جونانی دست کپگ ءِ درچ یکشل ءَ برجاہ انت ءُ مروچی بنجاھی شھر شال ءِ واکداراں یک مردمے ءِ جون دزکپتگ -.

گیشیں ھالانی رِد ءَ شال ءَ بالی پٹ ءِ دگ ءِ سر ءَ یک مردمے ءِ جون دست کپتگ کہ تنی وھدی آئی ءِ پجار نہ بوتگ –

ایدھی بنشون ءِ رِد ءَ شال ءَ بالی پٹ دگ ءَ کلی الماس ءَ ناشناسیں مردمے ءِ جون دست کپتگ کہ پجار ءِ ھاتر ءَ نادراھجاہ ءَ برگ بوتگ گیشیں پٹ ءُ پول برجاہ انت –

زانگ بہ بیت بلوچستان ءِ جتا جتائیں ھند ءُ دمگاں جونانی دست کپگ ءِ درچ برجاہ انت گوستگیں روچاں مستونگ ءَ ھم دمگی وکداراں یک مردمے جون ءِ دست کپتگ ات –

مستونگ ءِ وکداراں دست کپتتگیں جون ءِ پجار زورانسری اوار جنگ بوتگیں نعمت اللہ ء عرض محمد ءِ بوتگ – کھول ءِ رِد ءَ نعمت اللہ ھمے سال ءَ پاکستانی پوج فرنٹئیر کور کارمنداں لکپاس ءَ چہ آوار جتگ ءُ بیگواہ کتگ –

بیگواھیں مردمانی پانکجنیں گل وائس فار بلوچ مسنگ پرسنز ءِ رِد ءَ بلوچستان ءَ ھزارانی کچ ءَ مردم زورانسری اوار جنگ ءُ بیگواہ کمگ بوتگ انت ءُ اے بیگواھیں مردمانی تہ ءَ بازینے ءِ زانگولیں جون دست کپتگ انت ءُ اشانی تہ ءَ بازینے ھنچیں بوتگ زانگولی ءِ سوب ءَ اھانی پجار کنگ نہ بوتگ –

بلوچ اسٹوڈنٹس ایکشن کمیٹی ءِ بنجاھی پتر ءَ بلوچ لٹریسی کیمپین ءِ بابت ءَ مزنیں مراگشے اڈ دیگ بیتگ ۔ سیاسی، لبزانکی ءُ زانشتی مراگشانی اڈ دیگ ءِ دْرچ برجاہ دارگ بیت ءُ ھنکینانی لیڈرشپ کلاس اڈ دیگ بنت ۔

پہ زانشت ءُ یکمشتی ءَ پِگری ءُ نظریاتی سنگت وتی جُھد ءَ ھمے پیم ےَ برجاہ بہ داراَنت۔ بنجاھی کماش

بلوچ اسٹوڈنٹس ایکشن کمیٹی ءِ سیمی بنجاھی کمیٹی ءِ دیوان بنجاھی کماش ءِ پاگواجھی ءَ کراچی ءَ برجم دارگ بیتگ۔دیوان ءَ گوستگیں رپورٹ، ایرادگری، گل ءُ میان استمانی ءُ ھندی سیاسی جاورھالانی بنگپانی سر ءَ تران ءَ رند آؤکیں گامگیج بنگپ ءَ نوکیں پیسلہ زورگ بوتگ اَنت۔ نوک زرتگیں پیسلھانی رد ءَ بلوچ لٹریسی کیمپین کارانی تہ ءَ ترندی آرگ بیت ءُ لٹریسی کیمپین بابت ءَ شال ءَ یک مزنیں مراگشے اڈ دیگ بیت اِنت،لبزانکی ءُ زانشتی مراگشانی اڈ دیگ ءِ دْرچ کہ چہ گل ءِ نیمگ ءَ بِندات کنگ بوتگ آؤکیں چار ماھانی تہ ءَ ھمے دْرچ برجاہ دارگ بیت اِنت چہ بلوچستان یونیورسٹی ءَ گار ءُ بیگواہ بوتگیں دو نودربرسھیل بلوچ ءُ فصیح بلوچ ءِ یل کنائینگ ءِ ھاتر ءَ دومی گلاں ھوار جُھد گیش کنگ بنت ۔

بنجاھی مجلس ءِ دیوان ءَ تْران کنان ءَ بنجاھی کماش ءَ گوشتگ کہ بلوچستان ءِ وانگجاھانی جاور ھر گوستگیں روچ ءَ گیش ءَ گیش ناگیگ بوگ ءَ اَنت۔ یک نیمگے ءَ بلوچستان ءِ دمگ ءُ شھراں سک کسانیں کساسے ءَ وانگجاہ جوڑ اَنت ءُ دومی نیمگءَ ھمے وانگجاھاں وانگی ماھول گِندگ نہ بوگ ءَ اِنت۔ بلوچستان ءِ تیوگیں میتگاں اسکولانی کساس کم بوگ ءَ ابید اسکولاں جوانیں ماڑی ھم نیست اِنت، باز جاھانی اسکولانی استاد ساڑی نہ اَنت ءُ بازیں جاھاں نودربر اسکولانی ماڑی نہ بوگ سوب ءَ سرپچیں ڈن وانگ ءَ اَنت۔ دومی نیمگ ءَ اگاں کالج لیول ءِ وانگی ماھولانی سر ءَ چار ءُ بیچار کنگ بہ بیت گُڑا گِندگ کیت کہ بلوچستان ءَ کوئٹہ ءُ تربت ءَ ابید دومی شھر ءُ دمگاں کالج نیست اِنت یا کہ گیر نیستی آماچ اَنت ءُ اود ءَ ھچ پیمیں وانگی آسراتی نیست اِنت۔ پمیشکا بلوچستان ءِ دومی دمگانی نودربر پہ وانگ ءَ دیم ءَ پہ کوئٹہ ءَ دیگ ءَ اَنت ءُ نودربرانی یک مزنیں کساسے کوئٹہ ءِ کالج ءُ اکیڈمیاں پہ وانگ ءَ لاچار کنگ بوگ ءَ انت۔ حکومت یک نیمگے ءَ تعلیمی ایمرجنسی ءِ گپ ءَ کنت ءُ دومی نیمگ ءَ بلوچستان ءِ شھر ءُ دمگاں وانگجاہ چہ سالاں بند اَنت ءُ اے ھوالہ ءَ ھچ پیمیں گامگیج زورگ نہ بوگ ءَ اِنت۔

کماش ءَ تْران کنان ءَ گوشتگ کہ بلوچستان ءِ بنگیجی وانگجاھانی جاورھالانی ھرابی سوب ءَ نودربرانی یک کسانیں کساسے مزن شھدربرجاھاں سر بوگ ءَ اِنت ءُ دومی نیمگ ءَ مزن شھدربرجاہ زانشتی ءُ پٹ ءُ پولی پڑ ءَ جوانیں پیمے ءَ کار کنگ ءَ نہ اَنت۔ پمیشکا ھمے مزن شھدربرجاھاں چہ در اتکگیں نودربر یک جوان ءُ شریں ڈولے ءَ چاگِرد ءِ تہ ءَ وتی کِرد ءَ پیلو کنگ ءَ نہ انت۔ چہ وانگجاھانی تہ ءَ نودربرانی چست کنگ ءُ چہ آئی ءَ پد آھانی گار ءُ بیگواھی یک مزنیں المیہ یے ءُ چوشیں امل نودربراں تُرس ءُ بیم ءِ آماچ کنگ ءَ انت۔ اگاں چار ءُ بیچار کنگ بہ بیت گُڑا گِندگ کیت کہ گوستگیں سال ءَ چہ مزن شھدربرجاھاں نودربرانی چِست کنگ ءُ گار ءُ بیگواہ کنگ ءِ امل نیام ءَ گیش تْرندی پیداک اِنت ءُ سدانی کچ ءَ نودربر گار کنگ بوتگ اَنت۔ ایشی ءِ مستریں درور یکم نومبر 2021 ءَ چہ بلوچستان یونیورسٹی ءَ چِست بوتگیں دو نودربر سھیل بلوچ ءُ فصیح بلوچ ءِ گار ءُ بیگواھی اِنت کہ سدانی کچ ءَ سی سی ٹی وی کیمرھانی بوگ ءَ ابید دوئیں نودربر چہ ھاسٹل ءَ چِست کنگ ءُ گار ءُ بیگواہ کنگ بنت ءُ اے ھوالہ ءَ مزن شھدربرجاہ ءِ انتزامیہ انگت ھاموش اِنت۔ چہ نودربرانی نیمگ ءَ سئے ھپتگانی نِنداک ءَ ابید دوئیں نودربر انگت گار اَنت ءُ نودربرانی ھچ پیمیں ھال نیست اِنت۔

کماش ءَ گوشتگ کہ نودربرانی گار ءُ بیگواھی ءَ رند چہ حکومت نیمگ ءَ بلوچستان یونیورسٹی داں نودربرانی بازیابی ءَ ھرچ پیمیں کار ءُ پروگرامانی ھاتر ءَ بند کنگ بوتگ۔ اے رِد ءَ یونیورسٹی ءَ گوں بستگیں نودربرانی کلاس ءُ چکاس نہ بوگ ءَ اَنت ءُ بازیں نودربرانی کیرئیر ءَ اڑاند پیداک اِنت۔ گل نودربرانی جیڑہ ءُ جنجالاں جوانیں پیمے ءَ زانت ءُ سرپد اِنت کہ مزن شھدربرجاہ ءِ بند بوگ ءِ سوب ءَ چکاس ءُ کلاسانی جیڑہ پیداک بیت بلئے نودربراں سرپد بوگ لوٹ اِیت کہ یک نیمگے اگاں کلاس ءُ پیپرانی جیڑہ اِنت گُڑا دومی نیمگ ءَ دو نودربر ءِ زندگی ءِ سوال اِنت ءُ چوشیں وانگجاہ ءُ چکاسانی چون کنگ بہ بیت کہ آ جاہ ءَ زِند ءِ جند ءَ ھچ پیمیں ارزشتے مہ بیت۔ وھدے کہ بلوچستان ءِ نودربر جتائیں جیڑھانی آماچ اَنت گُڑا اے جنجالانی تہ ءَ کُلاں چہ مستریں جیڑہ نودربرانی گار ءُ بیگواھی اِنت۔پمیشکہ انچیں جاورانی تہ ءَ نودربر چہ وتی جِند ءَ چہ گیش اجتماعی سوچ بہ دار اَنت ءُ گار ءُ بیگواھیں پیمیں گیر انسانی ءُ گیر کانودی امل ءِ ھلاپ ءَ جُھد بہ کن اَنت۔

کماش ءَ تْران کنان ءَ وتی گپانی گڈسر ءَ گْوشتگ بساک ءِ باسک یک مھکمیں لیکھے ءَ گوں گل ءِ کاراں دیم ءَ برگ ءَ اَنت ، چہ گل ءِ نیمگ ءَ گوستگیں چار ماھانی دورانیہ ءَ کوئٹہ، حب چوکی، ڈیرہ غازی خان ءُ لیاری ءَ مزنیں سیاسی، لبزانکی ءُ زانشتی مراگشانی اڈ دیگ ھمے پدر کنت کہ گل ءِ کار گوں مھکمی ءَ دیم ءَ جُنزان انت ۔ گل ءِ کارانی تہ ءَ گیشی ءُ شری ءِ بنیاتی سوب گل ءِ سنگتانی سنچ داریں سنچ ءُ گل ءِ مھکمیں لیکہ بلوچ راجدوستی اِنت کہ چریشی بنیات ءَ گل ھما جاھاں مراگش اڈ دیگ ءَ اِنت کہ بلوچستان ءَ چہ انتظامیہ ھوالہ دور کنگ بوتگ اَنت۔ گل ءِ سنگت بلوچستان ءِ دمگاں انچیں مراگش اڈ دیگ ءِ جُہد بہ کن اَنت ءُ پہ زانشت ءُ یکمشتی ءَ پِگری ءُ نظریاتی سنگت وتی جُہد ءَ ھمے پیم برجاہ داراَنت ءُ دومی بلوچ نودربراں جُھد ءِ بہر بوگ ءِ سکین ءَ بہ دئے اَنت۔

گوستگیں رپورٹ، تنقیدی نشست، تنظیمی امور ءُ میان استمانی ءُ ھندی سیاسی جاورھالانی بنگپانی سر ءَ تران ءَ رند آؤکیں گامگیج بنگپ ءَ نوکیں پیسلہ زورگ بیتگ اَنت ءُ نوکیں پیسلھانی رِد ءَ بلوچ لٹریسی کیمپین ءِ بابت ءَ کوئٹہ ءَ یک مزنیں مراگشے اڈّدیگ بیت، نودربرانی زانشتی ءُ سیاسی کچ ءُ بالاد ءِ گیشی ھاتر ءَ چہ بنجاہ ءِ نیمگ ءَ لیڈرشپ کلاس اڈ دیگ بنت، سیاسی لبزانکی ءُ زانشتی مراگشانی اڈ دیگ ءِ دْرچ برجاہ دارگ بیت۔ دیوان ءَ بنجاھی کمک کارگشاد خالد بلوچ ءُ بنجاھی کمیٹی ءِ باسک یاسر بلوچ ءِ زاتی دست گٹیانی بنیات ءَ دیم داتگیں استعفی زورگ بوتگ انت ءُ آھانی جاہ ءَ بنجاھی کمیٹی ءِ باسک رفیق بلوچ بنجاھی کمک کارگشاد گچین کنگ بوتگ ءُ تربت ھنکین ءِ کارگشاد محمد جان بلوچ ءُ کراچی ھنکین ءِ کارگشاد معراج بلوچ بنجاھی کمیٹی ءِ باسک گچین کنگ بوتگ انت۔

بلوچستان ءَ زورانسری آوارجنی ءِ درچ یکشل ءَ برجاہ انت – ماما قدیر بلوچ –

زورانسری آوار جنگ ءُ بیگواہ کنگ بوتگیں بلوچ راجداریں باسکانی یل کنائینگے ھاتر ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنچ سد ءُ ھپتاد روچ سرجم بوتگ –

کراچی پریس کلب ءِ دیم ءَ برجاھیں بیگواھیں مردمانی پانکجنیں گل ءِ بنجل ءَ مروچی بی آر سی ءِ رھشون زاہد بگٹی، مفتی احمد ءُ دگہ رھشوناں اتکگ ءُ دلپدردی درشان اتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ تہ ءَ راجداریں باسکانی زورانسری آوار جنی ءِ درچ یکشل ءَ برجاہ انت ءُ ریاست بلوچ راج ءَ تاکت ءِ زور ءَ وتی جھد ءَ چہ یکر کنگ ءِ کوشست کنگ ءَ انت –

آئی ءَ گوشتگ کہ گوستگیں لھتے روچانی تہ ءَ بلوچستان ءِ دمگ کیچ ءُ دگہ ھند ءُ دمگاں پاکستانی پوج ءَ بازیں ورنایے آوار جتگ ءُ بیگواہ کتگ –

ماما قدیر بلوچ ءَ گوشتگ بیست ءُ دو سالی تاکت ءِ زور ءَ بلوچستان ءِ مردماں ھچ نگوشگ ءِ پالیسی بے سوب بوتگ ریاست مئے پُرایمنیں جھد ءِ چیر ترینگ ءَ الم بے سوب بیت اِنت –

آئی ءَ گوشتگ کہ اگاں ما یکجاھی ءَ زوراکی ءِ بگیری ءَ توار چِست بہ کنیں گڑا زوت مارا ھک دیگ بیت انت –

آئی ءَ گوشتگ کہ اے وھدی بلوچستان ءَ ریاست زوراکی آکری ھد ءَ تاں برجاہ انت ءُ ھمک روچ مردم آوار جنگ ءُ بیگواہ کنگ بوگ ءَ انت –

ماما قدیر بلوچ ءَ گوشتگ کہ بلوچستان ءَ زورانسری آوارجنیانی بگیری ءَ میان استمانی انسانی گلاں پاکستان ءَ چہ ھساب گرگی انت تاکہ اد ءَ انسانی ھلاسی ءِ ودی مہ بیت –

سر بیتگیں ھالانی رد ءَ روکپتی بلوچستان ءِ دمگ سوران ءَ سلاہ بند ءُ انٹی نارکوٹکس ءِ میان ءَ میڑ ءَ یک کارمندے بیران بیتگ –

گیشیں ھالانی رد ءَ گوستگیں روچ ءَ سوران ءَ ایرانی انٹی نارکوٹکس ءَ اے ھال شنگ کرتگ کہ انٹی نارکوٹکس ءَ نشہ باپاریانی رندگیری کرتگ ءُ چریشی ءَ یک نشہ باپاری جنگ بیتگ –

ھالانی تہ ءَ گوشگ بیتگ کہ اے میڑ ءَ انٹی نارکوٹکس ءِ سوران ءِ سروک وھید سالاری ھم بیران بیتگ-

ایرانی پولیس ءَ اے ٹاہ داتگ کہ اے میڑ داں سِی دمان ءَ برجاہ بیتگ ءُ چریشی ءَ نشہ باپاری کنوکیں یک مردمے جنگ بیتگ، جنگ بیتگیں نشہ باپاری ءِ نام پدر کنگ نہ بیتگ –