TBP Balochi

بلوچ لبریشن آرمی ءِ جارکش جیئند بلوچ ءَ گْوشتگ کہ مئے سرمچاراں پنچ شمبے ءِ شپ ءَ زورگریں لشکر کوسٹ گارڈ ءِ بُنجل نزیک ءَ کوارٹراں جھمنندیں ریاستی ھمکارانی سر ءَ یک دست بمب اُرشے کتگ، چریشی ءِ آسر ءَ آھاں جانی تاوان چست کنگ کپتگ-

سے شمبے ءِ روچ ءَ مستونگ شھر ءَ بس اڈہ ءِ نزیک ءَ ھستیں گیس کمپنی ءِ کارگس ھم بی ایل اے سرمچاراں گوں دست بمب ءَ نشانگ کتگ-

اے دوئیں اُرشانی زمہ واری ءَ بلوچ لبریشن آرمی منّ اِیت- دُژمن پوج ، ریاستی کار ءُ کمکارانی سر ءَ مئے اُرش برجاہ بنت-

بلوچ یکجھتی کمیٹی ءِ جارکش ءَ رسانکدراں وتی شنگ کرتگیں درشان ءِ تہ ءَ مند ءَ ریاستی زوراکیانی بگیری ءَ توار چِست کنوکیں چاگردی باسک کپٹن ادھم بلوچ ءِ کوش ترندی ءَ گوں ایرجتگ ءُ گوشتگ کہ بلوچستان ءَ سرکارے چیردستی ءَ کار کنوکیں سلاہ بندیں ٹولی بلوچ ءِ چُک چینی ءَ ھوار انت –

آئی ءَ گُشتگ بلوچستان ءِ تہ ءَ شوربندی ءِ رِد ءَ سلاہ بندیں ٹولی یکرندے پد ءَ مھکم کنگ بوگ ءَ انت – یک نیمگے بازیں مردمے آوار جنگ ءُ بیگواہ کنگ بوگ ءَ انت دومی نیمگ ءَ راجدار ءُ چاگردی باسکاں ھوار لس مھلوکانی کوش برجاہ انت – بلوچ یکجھتی کمیٹی کپٹن ادھم بلوچ ءِ کوش ءَ ترندی ءَ گوں ایرجنت ءُ بلوچستان ءِ مھلوک ءَ چہ لوٹ کنت کہ اے وڑیں زوراکیانی بگیری ءَ گِساں چہ دربیایاں توار چست بہ کن اَنت –

جارکش ءَ دیمتر ءَ وتی درشان ءِ تہ ءَ چہ متحدہ ارب امارات ءَ آوار جنگ بوتگیں عبدالحفیظ زہری ءِ زورانسری آوار جنی ءَ پدردی درشان اتگ ءُ گوشتگ کہ بلوچستان ءَ ھمک روچ بازیں کساسے ءَ مردم زورانسری آوار جنگ بوگ ءَ انت بلے نوں ڈنی ملکاں ھم بلوچ زورانسری آوار جنگ بوگ ءَ انت کہ پدردی گپے – عبدالحفیظ زہری بیگواھیں راشد حسین بلوچ ءِ کھول ءَ گوں سیادی داریت کہ آ پیسر ءَ متحدہ ارب امارات ءَ آوار جنگ ءُ پاکستان ءِ ھوالگ ءَ کنگ بوتگ کہ آئی ءِ آوار جنی ءِ چم دیستیں گواہ عبدالحفیظ بلوچ بوتگ بلے نوں آ ھم آوار جنگ بوتگ – عبدالحفیط زہری ءِ کھولے بازیں مردمے پیسر ءَ ھم نشانگ کنگ بوتگ اَنت بلے نوں دری ڈیھاں اے مردمانی زورانسری آوار جنی پدردی ھال اَنت –

جارکش ءَ گوشتگ کہ متحدہ ارب امارات ءِ سرکار زمہ داری ءِ گوم ءَ عبدالحفیظ ءِ کھول ءَ آئی ءِ درگت ءَ سرپدی بہ دنت آئی ءَ زاھر بہ کنت –

جارکش ءَ گڈسر ءَ وتی درشان ءِ تہ ءَ گوشتگ ھمک روچ مزنیں کساسے ءَ مردمانی زورانسری آوار جنی، سلاہ بندیں ٹولیانی دستاں دست ءُ گوشیں مردمانی کوش، سی ٹی ڈی ءِ دست ءَ دروگیں میڑ ءَ بلوچانی نشانگ کنگ بلوچ چکچینی بیمناکیں دیمے – زانشجاھاں بگر تاں دری ڈیھاں بلوچ ھچ جاہ ءَ پھریز نہ انت بلوچ راج ءَ گوں دستبندی انت کہ اے چکچینی ءِ بگیری ءَ نوں ھاموش مہ بیت ءُ مھکمیں وڑے ءَ زھرشانی ءِ راہ ءَ گچین بہ کنت –

بلوچستان ءِ جتائیں دمگ ضلع نوشکی ضلع چاغی ءَ سے مردم بیران ءُ یکے چست کنگ بوتگ-

سربوتگیں ھالانی رِد ءَ دو روچ ءَ ساری ضلع نوشکی ءِ دمگ تازینہ ءَ یک دکانے ءِ تہ ءَ سلاہ بندیں مردم پترتگ ءُ تیرگواری کتگ ءُ کُشتگے-

تیرگواری ءِ آسر ءَ بیران بوتگیں مردم ءِ پجّار علی جان ءِ نام ءَ چہ بوتگ ءُ آ یک دکاندارے بوتگ-

دمگی اھوالکارانی رِد ءَ کُشکارانی سیادی گوں سرکاری چیردستی ءَ کارکنوکیں ٹولی ءَ اِنت ءُ کُوش ءِ سوب انگت زانگ نہ بوتگ-

ھمے وڑ نوشکی ءَ ھمے ٹولی ءَ سیادی داروکیں مردماں نوشکی زرین جنگل ءَ مالدار محمد نور مینگل ءِ لوگ ءَ بیڑبرتگ ءُ آئی ءِ کسانیں چُک حبیب چست کتگ ءُ گوں وت برتگ وھدے کہ وتی ھمراھی ءَ درزانے ءَ گیش پس ءُ دلوت ھم برتگ اَنت-

زانگ بہ بیت راجدوست مدام ھمے بھتام ءَ جن اَنت کہ پاکستانی پوج ءُ چیریں ادارہ بلوچستان ءَ مزنیں کچے سلاہ بندیں ٹولی جوڑ کتگ ءُ آ بلوچانی چست کنگ ، کُشگ ءَ ھوار بازیں چاگردی سلکاریاں ھوار اَنت پوج ءَ اے سرجمی ءَ یل داتگ اَنت-

ھمے وڑ بلوچستان ءِ ضلع چاغی ءِ ھند پینام ءَ دُزاں تیرگواری کتگ ءُ پک اپ ڈرائیورے ءَ ھوار دو مردم بیران بوتگ اَنت-

اے مردم ھما وھد ءَ تیرجنگ ءُ کُشگ بیتگ اَنت وھدے آ ویرانگیں جاھے ءَ وتی گاڑی ءَ شر کنگ ءَ بوتگ اَنت-

کُشگ بوتگیں مردمانی پجّار اسرار احمد جھمنند خاران ءُ حمیداللہ جھمنند چاغی ناماں چہ بوتگ اَنت-

اسسٹنٹ کمشنر دالبندین عرفان خلجی رِد لاش پرنس فہد نادُراھجاہ ءَ برگ بوتگ اَنت گیش چار ءُ ٹپاس ءَ پد لاش کھول ءِ دستیگ کتگ اَنت-

وئیل ءِ درگت ءَ گیشیں پٹ ءُ پول برجاہ ءَ اِنت ءُ اھوالکارانی رِد ءَ دُزاں کُشگ بوتگیں مردمانی لکّانی ھساب ءَ کلدار ءُ گرانبھائیں سامان گوں وت برتگ اَنت-

نبشتانک: سُرمگیں هاک ءِ سوگِند اِنت

نبشتہ کار: جلال اهمد

دی بلوچستان پوسٹ

درکسانی ءَ بالاچ یک مهنتی گونڈلے اَت ءُ وهدیکہ بالاچ وانگ جاه ءَ شُتگ اَت گُڑا مُدام گوں وتی سنگتاں بلوچ ءِ زندمان ءِ بابت ءَ گپ اِش کتگ اَت، کدی کدی گوں سنگتاں مسکرائی ءُ همک سُهب وانگ جاه ءِ دیم ءَ گونڈلانی مُچ کنگ ءُ آیان ءَ چُکیں بلوچانی وانگ پرمایگ ءُ راجی گپ ءُ رپ هر وهد کتگ اَت ئے ءُ چکّاسانی وهد ءَ چہ پیسر تیار اَت وهدے کہ چکّاس بُوتگ اَت اَنت اولی لمبر اتکگ اَت، وانگ جاه ءَ چہ رند بیگاه ءَ چہ مشک ءَ چاگلے آپ کتگ اَت ءُ دیم پہ رمگ ءِ چارینگ ءَ شُتگ اَت گرماگی روچ اِت اَنت گُڑا بالاچ ءَ وتی رمگ دوار جاه ءَ برتگ اَت ءُ کور ءَ جان ءِ شُشتگ اَت –

برے برے وتی دویں سنگتے زُرتگ اِت اَنت ءُ دیم پہ جنگل ءَ مُرگ ءِ شکار ءَ شُتگ اَت ءُ بالاچ ٹِکتیرے اَت وتی دویں سنگتاں چہ پیسر مُرگے وت جتگ اَت اَنت ءُ چہ هور ءَ چیزے روچ رند آ شُتگ اَت کُوه ءَ آسک ءِ شکار ءَ ءُ دائم شکار ءَ چہ رند گِس ءَ هُشکیں دستاں نہ یتکگ اَت اَلّم بالاچ ءَ وتی شکار کتگ اَت انچیں وهداں بالاچ ءَ آسک زندگ ءَ هم آؤرتگ اِت اَنت-

گُڑا همے پیم ءَ دھکے ءَ رند وهد مٹ بُوان بُوت ءُ دشت ءِ جاور نہ گیگ بُوان بُوت اَنت همروچ دْژمن ءِ زوراکی ءُ گِسانی پٹ ءُ پول کنگ ءُ ورناه ءُ کماشانی بیگواه کنگ بندات بیت اَنت، گُڑا دْژمن ءِ اے اِلّت بالاچ ءَ را دوست نہ بُوت آں چو کہ بالاچ وانِنده ءُ سرپدیں جْوانے اَت بالاچ ءَ را دْژمن ءِ زوراکی دوست نہ بُوت اَنت گُڑا یک روچے بالاچ ءَ وت ءَ گوں وت پیسلہ کت کہ نوں من ءَ انچیں راھے پہ وت درگیجگی اِنت کہ من ءَ نوکیں بانداتے ءِ واهُند بہ کنت همے ڈول ءَ گُڑا یک بیگاھے ءَ بالاچ شُت وتی هما دویں سنگتانی گْور ءَ کہ من وت ءَ گوں پیسلھے کتگ اگاں شُمئے دوینانی تہ ءَ کسے رازی اِنت گُڑا منی همراھداری بکنت بلے بالاچ ءِ سنگتاں گوں بالاچ ءَ همراهداری نہ کت آیاں پسّو دات کہ ما اے راه ءَ اتک نہ کن ایں گُڑا بالاچ ءَ دویں سنگت رُکست کت اَنت ءُ اتک گِس ءَ گوں وتی مات ءَ همے بارو ءَ گپے کت مات ءَ گُشت من رازیاں اگاں تو کہ گپے کتگ من پہ تئی گپ ءَ کُرباناں گُڑا سھتے ءَ رند بالاچ رپت ءُ بالاچ ءَ گوں دگہ مردمے ءَ هال ءُ اهوال کت ءُ سنگت اتک بالاچ ءِ دیم ءَ بالاچ ءَ را گوں وت بُرت ئِے-

بالاچ ءُ سنگت دان دو ادار ءَ سپر ءَ بُوت اَنت ءُ دو ادار ءَ چہ رند وتی منزل ءَ سر بُوت اَنت گُڑا بالاچ ءَ وتی سنگت ءَ دْرؤت ءَ دْراه بات کت ءُ همے پیسلہ کت کہ من ءَ اے سُرمگیں هاک ءِ سوگند اِنت من وتی هک ءَ پیلو کن آں-

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ دمگ ڈیرہ بگٹی ءَ یک بمب تراکے ءَ دو مردم بیران ءُ پنچ زدگ بیتگ اَنت-

تراک ڈیرہ بگٹی ءِ دمگ ٹلی مٹ ءَ پیش اتکگ –

زدگ ءُ لاش سول ھسپتال ڈیرہ بگٹی ءَ برگ بیتگ اَنت ھسپتال ءَ تراک ءَ اتکگیں ھپت مردمانی راستی بیتگ اَنت-

ھسپتال ءِ رد ءَ تراک ءَ دو مردم بیران بیتگ اَنت ھمے وڑ ءَ سینیٹر سرفراز بگٹی ءَ چار مردمانی بیرانی ءِ ھال راست کتگ اَنت دومی نیمگ ءَ پنچ مردم زدگ اَنت ءُ بیرانی گیش بوگ ءِ گمان اِنت-

تراک ءِ زد ءَ اتکگیں مردمانی سیادی سرکاری پلامرزی ءِ ھستیں ٹولی ءَ گوشگ ءَ اَنت بلے داں انگت ءَ اے تراک ءِ زمہ واری ھچ گل ءَ نہ منّ اِتگ –

نبشتانک: تو وابیں زندمانے ئے

نبشتہ کار: لطیف سکی

دی بلوچستان پوسٹ

گْوش انت بنی آدم زند ءِ چکاس جاھاں اجب داب ءُ بے مٹیں ھاجت ءُ رنگراھیں یات ءُ زند ءَ گرنچ بستگیں ابیتکی ءُ مھر ءُ لگتامالیں چاگرد ءِ یاتانی بازیں سکی ءُ سوری ءُ کپگ پاد آیگ ءَ دزمان جان بیت ءُ ھڑینتگیں بالاد ءَ یک سادے ءِ دروشم ءَ گِر بند ایت ءُ تچ ایت۔اے کردانک ءِ اندیم ءَ بازیں یات ءُ ترانگانی دمب ءَ برے رُسواہ اِنت ءُ برے سوبینی ءِ جاکاں ھوار بیت ،برے چو وتگلائیں مردمانی ٹوکاں باپُشتی کسھے بیت اے پد منتگی ءَ مئے وڑینانی زند ءِ پڑ چو ریٹائیں ملنگ ءَ چو کاگدے ءِ بستار ءَ برے من کوش ءِ داباں مٹ بیت ءُ چَکر ایت ۔ھمئے اھد ءِ کسھانی واست ءَ بنی آدم ءِ چینچو تلوسیں لوٹ باز بنت، لھتیں سرجم بنت لھتیں ادارُکی پشت کپ انت، لھتیں چو پاھو ءَ بستگیں کنٹ ءَ ایر دول بنت، ترا ھنچو سما بیت منی زند ءُ اگَڑی داتگیں بالاد انت، اے چک پروشیں ھیال یانکہ زندمانے تئی باندات ءِ واب بہ بنت یا آشوبیں ودی بوتگیں ھیال دانکہ پہ وتی جند ءَ باندات ءِ داشتگیں سرجمیں واب کہ تو پہ وتی جند ءَ ابدمانی ءِ کسہ ءُ کارست شوھازے ھمئے زندمان ءَ من وتی جند یک بے سوبیں وابے ءِ داب ءَ گْش ئے شپی پاساں شوھاز ات اے پاسانی تہ ءَ من باز دلءَ گَڑ ءُ منج جَت بلے اَھد ءِ مردمانی دست ءَ چورھے بوت آں ۔

اے واب من ھمئے ساھت ءَ دیستگ ات وھدے من وانگی ساچُستاں نوک دست جنان ات آں، زند وَ ھچ دراجیں کیلگ ءُ کشک ءُ رنگراھاں سرپد نہ ات وھدے سر ماں شال، کیچ ءُ اوتھل ءِ رَپتگیں یاتانی رم ءَ سر کپت انت من ءَ پیسریگیں جاھاں باز یات پشت کپتگیں ھواری گندگ ءَ بوت ،وھدے بازیں ھمبل بیلی یار ءُ سوجکار کہ آھاں پہ یک بانداتے ءِ گچین ءَ من ءَ سوج دات وھدے اے زندمان ءِ سیمسراں لگتمالیں دُروشم ءَ سرکپان بوان یک آپسریں جاھے ءَ سر بوت آں بلے ھنچو سما بوت من ایوکی ءِ منوگرے آں مدام وت تھاری ءِ دزموش ءَ پہ وت شر لیکیں چیا کہ زند ءِ بازیں چکاسانی بے سوب بوگ ءَ من ءَ ھنچو سما بوت من ایوکیں پجارے ءَ گندگ باں بَرے وھد ءِ زینت بَرے وتی ایوکی، برے دست ءَ چہ شُتگیں کارست کہ پرائی ءَ من دائم زند ءِ بازیں گم دل ءَ ایرموشتگ انت۔

ھمئے بے سوبی ءَ من مھر ءِ یک دامے ایوک ءَ دیست اولی روچ ءَ ادَروک ءِ گندگ ءَ من ءَ ھنچو گیر اھت اے گْوست ءِ پڑ ءُ ایوکی ءِ ندارگ من ءَ دوبر ھاوند ءَ نسیب ءَ کتگ انت ۔من ءَ یات انت آئی ءَ را یک سبزیں جوڑی یے گَد گوار ءَ ات یک زانشتی جاہ ءَ یکرے ءِ نشت ءُ دودانی پاسدار ات اے زانشتی تران برجاہ ات، من یکوئی وتی موجیں ھیالانی تہ ءَ ایردول گران ات آں، منی چم گل ءِ مھلکائیں دیم ءُ سبز چکیں لُنٹاں سک ات انت زانشتی تران دانکہ یک ساھتے ءَ گیش آسری ءِ نیمگ ءَ روان ات آئی ءِ اولی دیدار ءَ من ھمئے لوٹ ات ءُ چَہ ھاوند ءَ منی دُوا ھمیش ات کہ اے ترانکار ءَ تو ھمچیں ھاٹیگے مان بکن دانکہ روچ ءَ من دیدار ءَ سیر بہ باں بلے منی دوا سرجم نہ بوت ، زانشتی تران ھلاسی ءِ نیمگ ءَ سر بوت ءُ درُت ءُ دراہ ءَ پد ھرکس گوں وت جوڑی تیاری ءَ گلاش بوت، گَٹ بوت اے اولی دیدار ءَ من گوں کسہ تران کاری نہ کت منی چم رھادگ ات انت اے مردم کجا نشتگ باریں من پٹ ءُ لوٹ کناں ،باز دل ءَ چیر ءُ پیر کت یک چاگردی تژن یکے نا درستی من ءَ ھمئے سما بوت اے منی باندات ءِ داشتگیں واب انت ءُ ھما واب زند ءَ من دیستگ ھما سوجکار بازیں سوج ءُ سراں چہ پد آ چمن جد ءَ بوتگ انت بازیں گسر کپتگ انت آھانی مَٹ ایش بیت چیا کہ اے بازیں اوست ءُ امیت ءِ سیاھگ ءَ منی چمانی اندیم ءَ ات بلے وھد روان ات من ایشی ءِ پُشت یل ندات ھما مردم گوں ایشی ءَ نزدینک ات انت من چماھاں جُست گپت بلے من ءَ ھچ سرپدی گندگ نہ بوت دیراں پد کموکیں یکدوستیگیں مردمئے ءَ من ءَ ھال دات کہ اے کجام کھول ءِ مردم انت ،گڑا آئی ءَ پہ شُبینے من ءَ جست گپت تو ایشی ءَ چے کن ئے؟ترا زاناں کارےھست؟ یانکہ ترا دوست بیت؟ چَہ اے جستاں من یکبرے ھبکہ بوت آں، ھیالاں گوں دچار شت آں من ءَ ھنچو سما بوت منی درستیں راز اے سنگت ءِ دیم ءَ پدر اَنت-

ھیر وھد ات چو نودانی وڑ ءَ دائم ساھیل ات چو شپی پاساں روان ات من دائم آئی ءِ گوازکیں دزگھارانی ھم مکتبی دوستانی کشکاں گوں وتی چم زیٹیں تن کجا گومن ترانے بکنت، بلے اے روچ دائم روان ات انت من اے آدت یل ندات انت ، چیا کہ آئی ءَ را ھچ سما ھم نیستگ ات کہ اے ریٹائی کجام بستار ءَ مدام اے کشکاں تچ ایت اے ھم سما نیستگ ات ئِے وت ھم اے بچکو نودربرے آ گوں وتی ھیالاں دچار ات گڑا آئی ءِ کر ءَ اے جست ءِ ھچ سنچ نیستگ ات، یکے آ چمن چہ نوک ات، ھمئے داباں کسہ دیم ءَ روان ات من آئی ءِ ھر کدم پہ بانداتے ءِ واب ءِ نیت ءَ چار اِتگ ات ،ھما کشک وھدے گٹ گیر بوت چہ بدیں دژمنانی چماں من چہ اے دست کپتگیں مردم ءِ چمانی تہ ءَ مار اِت ھنچو یک پِگر ءُ لیکھے من آئی بالاد چار اِت ،ھمئے راھانی روانی ءَ پد منی دل ءَ مدام لوٹ ات آئی ءِ پشت کپتگیں پداں سجدہ بہ کن آں بلے اے اھد ءِ مردمانی بدیں چارگ ءَ دل ءَ نہ مرینت بانداتیں روچاں دگہ بھتامے منی سر ءَ مہ بیت ھنچو گوست ءَ منی زندمان ءِ بازیں ھاجت بیلی من ءَ چہ گسر کتگ ات انت ،بس لھتیں کار پشت کپتگ ات، گڈی وھد ءَ داں آئی ءِ ھبر بندی گپ اناگت ءَ منی دیم ءَ شَھار گپت ھنچو سما بوت یک کوھے ءِ ڈوکے منی بالاد ءَ کپت، منی زندمان ءِ واھشت ھاکاں ھوار بوت انت، من ءَ اے بژن نہ بوت اے زندمانءِ روچاں من گوں تو دچار نہ کپت آں، منءَ اے بژن نہ بوت تو دگرے ءِ مانزمان بوت ئے،من ءَ اے ھجک ءَ بوت دو سال ءِ تئی لیکہ ءِ ھمروچیگیں دیدار ءَ من الکاپے ءَ گوں تو تران نہ کت بس اپسوزی من ءَ نہ انت بس دوا انت گوں ھاوندءَ تئی زند وش گْوزات ،بس منی زند ءِ داشتگیں واب ارمانیں یات انت کہ بالاد ءَ چونڈ انت، اے داشتگیں نیت منی زندمان ءِ آ گھیں دیستگیں وابانی بھرے تو سلامت بات ئے۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

بلوچستان ءِ تیاب دپی شھر گوادر ءَ شراب جاھانی بندش ءُ لائسنس دارگ ءِ بگیر ءَ بلوچستان ھائیکورٹ ءَ گوستگیں روچ ءَ ارزبندی گوشدارگ ءِ وھد ءَ ھکومتی پیسلہ نہ منّگ بوتگ-

گیشیں ھالانی رِد ءَ شراب جاھاں چہ ارزبندی ھندوبرادری ءُ کم کچانی نیمگ ءَ چہ بلوچستان ھائیکورٹ ءَ کنگ بوتگ- کیس ءِ گوشدارینگ بلوچستان ھائیکورٹ ءِ جج جسٹس نزیر احمد لانگو ءَ کتگ-

وھدیکہ ھندوبرادری ءِ نیمگ ءَ چہ کیس چارگوزاری جوانیں کاندوی مرد امان اللہ کنرانی ءَ کتگ- ارزبندی یے تہ ءَ گوشگ بوتگ کہ ھکومت نیمگ ءَ مارا ناں گوشگ بوتگ نانکہ جار شنگ کنگ بوتگ-

ارزبند ءَ گوشتگ کہ ھکومت نیمگ ءَ گوادر کم کچیں مردم ءُ ھندوانی گوم ءَ گیشی کنگ بوتگ-

امان اللہ کنرانی ءَ آمیدگس ءَ گْوشتگ کہ ھکومت ءَ لائسنس دارگ ءُ باپاری بند کنگ ءِ آئیں ءِ دھمی آرٹیکل ءِ بگیری کتگ-

ھمے درگت ءَ بلوچستان ھائیکورٹ ءَ ھندوں ءُ کم کچیں مردمانی ھداروکی دکانانی پچ کنگ ءِ موکل داتگ-

بلوچستان ھائیکورٹ جج ءَ گْوشتگ کہ گوادر ءَ آؤکیں گوشدارینگ ءِ سر کم کچیں ھندو برادری ءَ شرابجاھانی پچ کنگ ءِ موکل دیگ بیت-

آمیدگس ءَ کیس ءِ گوشدارینگ تاں مارچ ءِ اولی ھپتگ داشتگ-

زانگ نہ بیت بلوچستان ھکومت ءَ گوادر ءَ نندانک ءَ نشتگیں مردمانی یک لوٹے ءَ سرجمیں شرابجاھانی بند کنگ ءِ پرمان داتگ- ڈائریکٹر جنرل ایکسائز ءَ 15 دسمبر 2021 ءَ گوادر ءَ کم کچیں برادریانی سرجمیں لائسنس داشتگ اِت اَنت-

بلوچستان ھائیکورٹ ءِ پیسلہ ءَ پد ھک دے تھریک سروک ھدایت الرحمان بلوچ ءَ گوشتگ کہ شرابجاھاں راجی زور ءَ پچ کنگ ءَ نیل ایں-

آئی ءَ گوشتگ کہ گوادر ھندو برادری پدریں جار بہ جن اَنت آ شراب دکان لوٹ اَنت یا ناں –

ھدایت الرحمان ءَ گْوشتگ کہ آ ادارہ اللہ ءُ رسول ءِ ھُکمانی ازت ءَ نہ کن اَنت اے ادارہ ءِ ازت ءَ ما ھم نہ کن ایں-

سربوتگیں ھالانی رِد ءَ بلوچستان ءِ باپاری شھر ھب ءَ بمب تراک ءِ توار بوتگ –

اھوالکارانی رِد ءَ مروچی پنچ شمبے ءِ شپ ءَ ھب ءِ بازار ءَ کوسٹ گارڈ بنجل ءِ نزیک ءَ بمب تراک ءِ کنگ بوتگ – بلے تنی وھدی دمگی واکدارانی نیمگ ءَ چہ اے درگت ءَ ھچ وڈیں ھال شنگ نہ کُرتگ –

زانگ بہ بیت بلوچستان ءِ دمگ ھب ءَ پاکستانی پوج ءِ سر ءَ اشی ءَ پیش ھم باز براں اُرش کنگ بوتگ کہ آھانی زمہ واری بلوچ آجوئی لوٹوکیں سلاہ بندیں گلاں منّ اِتگ انت بلے تنی وھدی اے اُرش ءِ زمہ واری ھچ گل ءَ نہ منّ اِتگ –

گوستگیں بازیں روچاں ھب ءِ شھر ءَ گیس ءُ دگہ آسراتیانی نہ بوگ ءِ ھلاپ ءَ مھلوک زھرشانی کنگ ءَ اِنت – گوستگیں روچ ءَ شھریاں ڈی سی کارگس ءِ دیم ءَ زھرشانی نندانک ءَ ابید ھم گیس ءَ چہ زبھر بیتگ اَنت-

ھب ءِ بازیں جاھاں لاسی دگ، مھمد آباد دگ، فردوس کالونی، عدالت دگ، اکرم کالونی، چیزل آباد ءُ بلوچ کالونی ءَ سوئی گیس ءِ بندش آزابے جوڑ بیتگ، گیس ءِ نہ بوگ ءِ سبب ءَ شھری یکدم پریشان اَنت-

دمگ ءِ مھلوک ءِ رد ءَ ھب ءِ شھر ءَ دو ماھاں چہ سوئی گیس ءِ بندش ءُ کم پریشر شھریانی واستا ازابے جوڑ بیتگ شھریانی لوگانی آس چُل مرتگ، گیس ءِ بندش ءُ کم پریشر ءِ سبب ءَ شھری بازیں اداراں شدلاپی ءَ نندگ ءَ لاچار اَنت-

مھلوک ءِ گوشگ اِنت کہ ایل پی جی گیس ءِ نھاد آسمان ءَ سر اِنت سوچگ ءِ واستا دار ھم گران نھاد اَنت چریشی ءِ سبب ءَ سوئی گیس مئے واستا نھاداریں چیزے ءَ کم نہ اِنت بلے اے جیڑہ ءِ سر ءَ ما ھما چُکی ءِ ھساب ءَ چارگ بیگ ءَ اِنت مارا سوئی گیس ءِ بندش ءُ پریشر ءِ کمی ءِ سبب ءَ ترندیں مشکل ءُ پریشانی دیمپانی اِنت بلے بژن اِنت کسے مئے گوشداروک نیست اِنت-

آیاں گوشتگ اد ءَ کس نیست اِنت نا مھکمہ سوئی گیس ءِ دیم شر کنگ بہ بیت مارا سوئی گیس ءِ پجگ سرجمی کنگ بہ بیت اِنت بلے اے درگت ءَ مھلوک ءِ نمائندگ ءُ انتزامیہ ءِ بے تواری جیڑینین ایت –

زانگ بہ بیت ھب ءِ شھری بازیں روچاں چہ گیس ءَ ھوار دگہ آسراتیانی نہ بوگ ءِ ھلاپ ءَ زھرشانی کنگ ءَ اَنت شھریانی لوٹ اِنت گیس ءُ دگہ آسراتی سرجم کنگ بہ بنت-

وائس فار بلوچ مسنگ پرسنز ءِ زھرشانی بنجل ءَ 4572 روچ سرجم بیتگ اَنت یکجاھی درشانگ ءِ ھاترءَ اتکگیں مردمانی تہءَ تھرپارکر ءَ چہ سندھی سیاسی ءُ چاگردی باسک یاسر علی، شاد احمد ءُ دگراں اتکگ ءُ کیمپ ءَ یکجاھی درشان اِتگ۔

وی بی ایم پی ءِ وائس چیرمین ماما قدیر بلوچ ءَ گُشتگ بلوچستان ءَ ھوار نی درملکاں ھم بلوچانی کُوش ءُ بیگواھیانی تہءَ لھتیں سالانی تہءَ سک گیشی گندگ ءَ پیداک اِنت پیسرءَ راشد حسین چہ متحدہ عرب امارات چیریں ادارگاں دزگیر کنگ ءَ پد گیر قانودی پئیمءَ پاکستان ءِ دست ءَ داتگ ءُ کینیڈا ءَ بانک کریمہ ءُ سویڈن ءَ ساجد حسین ءِ کوشاں اے راستی پدر کُتگ کہ بلوچ جھان ءَ ھچ جاہ ءَ نہ رکیتگ اَنت۔

ماما قدیر ءَ دیمترءَ گُشتگ کہ گوستگیں شپ ءَ یکبرے پدءَ متحدہ عرب امارات ءِ چیریں ادارگاں بلوچستان ءِ دمگ خضدار ءِ جھمنندیں حفیظ زہری دبئی ءَ دزگیر کنگ ءَ پد بیگواہ کُتگ اے درگت ءَ انگت واکدار ھچ پئیمیں اھوال دیگ ءَ نہ اَنت۔

آئی ءَ گُشتگ کہ حفیظ ءِ درگت پیسرءَ ھچ چُشیں اھوال نہ اتکگ، زانگ نہ بیت پرچہ اناگتی چُش عرب امارات ءَ حفیظ بلوچ ءِ بیگواہ کنگ ءِ حیال اتکگ۔

آئی ءَ گُشتگ کہ اے اولی وئیل نہ اِنت چریشی ءَ پیسر ھم متحدہ عرب امارات ءَ حفیظ بلوچ ءِ تری زتک راشد حسین متحدہ عرب امارات ءَ شش ماہ ءَ بیگواہ کنگ ءَ پد پاکستانی چیریں ادارگانی دستءَ داتگ اَت آئی ءَ انسانی اگبالانی گلاں چہ دزبندی کُتگ ءُ لوٹ کُتگ کہ راشد حسین ءُ حفیظ بلوچ ءِ یل کنائینگ ءِ ھاترءَ وتی کرد ءَ پیلو بہ کن اَنت پرچہ کہ اِشانی زند ھترہ ءِ تہ اَنت۔