TBP Balochi

سربوتگیں ھالانی رِد ءَ گوستگیں بیست ءُ چار ادارانی میان ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں شست ءُ پنچ دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءِ آماچ بوتگیں درسیں مردمانی کچ سی ءُ چار ھزار سَے سد ءُ چِل ءُ دو ءَ سر بوتگ اَنت-

بلوچستان جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں بیست ءُ چار ادارانی میان ءَ بلوچستان ءِ نُھ دمگاں ھشت سد ءُ سِی ءُ سَے مردماں کرونا ویروس ٹیسٹ کنگ بوتگ کہ آھانی تہ ءَ شست ءُ پنچ مردماں کرونا ویروس پدر بوتگ ءُ وھدیکہ یکسدو ءُ بیست ءُ یک مردمانی رپورٹ دنیگت ءَ نہ اتکگ انت – چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ چار ھزار سَے سد ءُ چِل ءُ دو ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ یکسدو نود ءُ شش مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ءُ سَے ھزار ءُ پنچ سد ءُ چِل انت –

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ چار سد ءُ سِی ءُ پنچ نادراہ ھست انت کہ چاردہ نادراھجاھانی تہ ءَ الاج انت آھانی تہ ءَ پنچ نادراہ ھائی فلو آکسیجن ءُ یکے لو آکسیجن ءَ اِلاج ءَ انت –

رپورٹ رِد ءَ گوستگیں بیست ءُ چار ادارانی میان ءَ بلوچستان ءَ کرونا ویروس ءِ گیش تالان بوھگ ھپت ٹک ھشتاد درسد نبشتہ کنگ بوتگ – تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ شست ءُ ھپت مردم بیران بوتگ انت-

سندھ ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ ھپتاد ءُ پنچ روچ سرجم بوتگ – پی ٹی ایم کمیٹی ءِ باسک محمد شیر بادشاہ، پشتون ماما حسیب اللہ ءُ جمال پشتین ءَ بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد وی بی ایم پی ءِ رھشون ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ پشتون ءُ سند ءِ وڈ ءَ بلوچستان ءَ ھم انسانی ھکانی لگتمالی بوھگ انت بلوچستان ءِ گیشتریں ھند ءُ دمگ پوجی بنجلانی تہ ءَ بدل کنگ بوھگ ءَ اَنت ھمک روچ دمگی مردم پوجی لشکر کشیاں چہ بیزار بوتگ ءُ در پہ دری زند گوزینگ ءَ لاچار کنگ بوھگ ءَ انت –

آئی ءَ گوشتگ ھپت دھک انت کہ درچ یکشل ءَ برجاہ انت مردیناں ھوار زالبول ھم زورانسری آوار جنگ بوھگ ءَ انت – اے امل انسانیت ءِ علمبردار ءُ اسلامی ریاست ءِ لوٹوکانی دیم ءَ شھمات ئے –

آئی ءَ گوشتگ کہ مکران مشکے ءُ آواران ءَ دگہ دمگاں پاکستانی پوج ءِ لشکر کشی ءُ جھلی ءُ برزی اُرشاں چہ بازیں چُک ءُ زالبول ءِ شھید بوتگ ءُ اشی ءِ ھمراھی ءَ بازینی ءِ گوم ءَ گیر انسانی رویش ءُ لٹ شاپ ھم کنگ بوتگ انت –

ماما قدیر بلوچ ءَ گوشتگ کہ بیگواھیں مردمانی کھول ھمک روچ پریس کلبانی دیم ءَ زھرشانی کنگ ءَ انت بلے بژن کہ اے بدکسمتیں مات ءَ گھار بلوچ انت زاناں انسانی ھکانی گل ءُ نھام نھادیں آزاتیں اھوالکاری کنوکانی واست ءَ بلوچ ءِ انسان بوھگ اھمیت نداریت – پیش ءَ بلوچ مات ءُ گھار وتی دوستیگیں مردمانی بیگواھی ءِ ازاب ءِ تہ ءَ زند گوازینگ ءَ بوتگ انت نوں آھاں وتی جگر ٹکرانی زانگولیں جون کُٹ ءَ انت ءُ پہ گریوگ وتی ارس ءِ ھُشک کُتگ انت – ھمک روچ پریس کلبانی دیم ءَ وتی پرزندانی اکس ءِ گون انت بلے نوں بوت کنت اے بدکمستیں ماتانی تقدیر بدل بوتگ نوں وت ریاستی زنداناں کیز بوھان انت –

میڈیکل اسٹوڈنٹس الائنس ءِ نیمگ ءَ شنگ بیتگیں پریس ریلیز ءَ گوشگ بیتگ کہ مئے زھرشانی بنجل ءَ 55 روچ سرجم بیتگ بلے داں انگت ءَ سرکار ءِ نیمگ ءَ ھچ گامگیج زورگ نہ بیتگ اَنت –

آیاں گچتگ یازدہ جون دوھزار ءُ نوزدہ ءَ بلوچستان ءِ سرکار ءَ وت بلوچستان ءِ اے سئیں میڈیکل کالجزانی نودربرانی رجسٹرڈ ءِ زمہ واری زرتگ گڑا پرچا بلوچستان ءِ سرکار وتی زمہ واریانی زیرگ ءَ لرزگ ءَ اِنت –

آیاں گشتگ میڈیکل اسٹوڈنٹس الائنس ءَ بلوچستان ءِ سرکار ءَ ھال دنت کہ وتی زمہ واریاں سرجم بہ کنت اگاں ناں مارا پند ءَ روانک ءِ کشک ءَ لاچار مہ کنت-

دگ ءِ وئیلے ءَ یک مردمے بیران، پنچ کس زدگ بیتگ اَنت،ھزدار ءَ گدانے ءَ آس کپتگ ءُ یک زھگے بیران بیتگ، ھزدار ءَ یک کسے ءَ وتکشی کرتگ ءُ وت ءَ کُشتگ –

سر بیتگیں ھالانی رد ءَ بلوچستان ءِ بنجاھی شھر شال ءَ دو گاڑیانی ٹکر ورگ ءَ یک مردمے بیران بیتگ ءُ زالبولے ءَ ھوار پنچ کس زدگ بیتگ اَنت –

دو گاڑیانی ٹکر ورگ ءِ سبب ءَ بیران بیتگیں مردم ءِ پجار سید ھیدر شاہ ءِ نام ءَ زانگ بیتگ ءُ آئی ءِ کھول ءَ سیادی داروکیں ھشت ماھے زھگ ریھان، ھشت سالی ئیں مھمد خان، دَہ سالی ئیں عمر خان، زالبول نرگس بی بی ءُ یک دگہ مردمے زدگ بیتگ اَنت-

وئیل گوستگیں روچ ءَ شال ءَ روکپتی شھدگ ءَ پیش اتکگ کہ اود ءَ دو گاڑیاں ٹکر وارتگ، وئیل ءَ بیران ءُ زدگ بیتگیں مردم ھسپتال ءَ برگ بیتگ اَنت –

دگہ یک وئیلے ھزدار ءَ پیش اتکگ کہ اود ءَ لوگے ءَ آس کپتگ ءُ یک زھگے بیران بیتگ –

ھزدار ءِ دمگ باغبانہ ءَ ناگتی یک گدانے ءَ آس کپتگ ءُ چریشی ءَ یک کسان سالیں زھگے بیران بیتگ –

ھمے وڑ ءَ ھزدار ءَ بے روزگاری ءِ سبب ءَ یک مردمے ءَ وتکشی کرتگ-

ھالانی تہ ءَ گوشگ بیتگ ھزدار ءَ عرفان نامیں ورنایے ءَ بے روزگاری ءِ سبب ءَ وت ءَ وت کُشتگ –

بلوچی بُنگیجی درونت

ٹی بی پی درونت

سیمی درونت

پہ بلوچی زبان ءِ نوک باھندیں وانوکانی ھاترءَ دی بلوچستان پوسٹ یک درونتی لڑے بندات کرتگ کہ چریشی ءَ بلوچی زبان ءَ ھُب داروکیں مردم چرے درونت ءَ چہ بلوچی زبان ءِ راست نبیسگ ءَ ھیل کُت کن اَنت-

مئے سیمی درونت پہ وانوکاں شنگ بیگ ءَ اِنت، پہ بلوچی زبان ءَ بیوکیں ھمک جھد کہ بیت چُش کہ بلوچی نبشتانک ءُ شائراں آیانی چاپ کنگ ءَ ھوار نِی مئے وانوکاں درونت ھم دزکپت کن اَنت چریشی ءَ نبشتہ کنوکیں مردم گیشتر وتی سیاھگ ءَ راست ءُ تچکی ءَ نبشتگ کت کن اَنت-

ءِ، ءَ، چے ءُ چہ

ءِ: پہ سْیادی ءَ کارمرز بیت:- آجوئی ءِ جُھد، راج ءِ رھشُون ءُ دُژمن ءِ نزوری

ءَ: نامگال، پنامگال، سرجمیں گال ءُ کارگالانی دیم ءَ ھم کارمرز بیت۔

رھدربری گالرِد
1- تو راج ءِ دوزوھیں باسکے ئے۔
2- تو زاناں الی جان ءِ اوتاک ءَ روگ ءَ ئے؟
3- ما اِد ءَ دْرچک ءِ ساھگ ءَ نشتگ ءُ شُمئے ودار ءَ ایں۔
4- راج ءِ دلیریں سرمچار پہ راجی آجوئی ءَ جُھد ءَ اَنت۔
5- من پہ ھیدر ءَ ٹیکی یے راہ دیگ ءَ آں۔
6- آئی ءَ من ءَ تئی ھال داتگ اَت۔
7- بلوچ راج ءِ مستریں دُژمن دمگی میر، سردار ءُ وتگڑیں نواب اَنت۔
8- منی دیم ءِ ٹپ دْراہ بیتگ۔
9- دُژمن ءَ وتی دیم سیاہ کُت۔

چے یا چی : اے دوئیں گال پہ جُست ءَ کارمرز بنت، رھدربری گالرِد
1- تو زاناں چے ور ئے؟
2- تو اود ءَ چے ءَ ناساڑی اِت ئے؟
3- آجوئی آشوب ءِ بُندری لوٹ چے اَنت؟
4- تو اِد ءُ اود ءِ ھالاں چہ کُجا کار ئے؟

چہ : By From & Than
رھدربری گالرِد
1- ما چہ دُژمن ءَ دلیر ایں۔
2- تو چہ من ءَ دیر نشتگ ئے۔
3- من چہ ترا ھچ وڑیں رھوت نہ کن آں۔

پہ راجی زُبان ءِ دیمروئی ءِ ما شُمئے مھر ءُ ھمراھداری لوٹ ایں۔

بلوچ نیشنل مومنٹ ءِ بنجاھی جارکش ءَ بھارتی دفتر خارجہ ءِ نیمگ ءَ بلوچستان ءَ انسانی ھکانی پامالی ءُ پاکستانی زُلمانی ھلاپ ءَ داتگیں درشان ءِ ستاشانی کنان ءَ گوشتگ کہ اے یک جوانیں بنداتے بیت کنت – ما اُمیت کن ایں بلوچستان ءَ ھستیں انسانی ناگیگیانی سر ءَ بھارت وتی پرز ءَ پیلو کنت-

جارکش ءَ گوشتگ کہ بھارت دمگ ءُ دنیا ءِ جوانیں ریاست ءُ بلوچستان ءِ ھمساھگ اِنت -بلے بھارت ءَ ھروھد ءَ بلوچستان ءَ نسل کُشی، زورانسری آوار جنی، زانگولیں لاشابی دزکپگ، یکجاھیں گورانی گندگ، پوجی آپریشن، زالبول ءُ زھگانی کوش، لوگ ءُ جاگھانی سوچگ، مال ءُ مڈیانی پُلپھانچ کنگ ءِ وڑین دروشم پاکستانی پوج ءُ ریاست ءِ جنگی جرم ھروھد ءَ پاشک کنان کتگ اَنت – اشی ءِ سبب ءَ بیت کنت پاکستان ءَ بھارت ءِ گون ءَ دشمنی اِنت دانکہ بھارت ءِ سر ءَ اے بھتام مئیت اِنت آ روایتی دشمنی ءِ سبب ءَ بلوچستان ءِ جیڑہ ءَ چِست کنگ ءَ اِنت وھدیکہ ما بھارت ءِ گپ ءَ جن ایں گڑا یا بھارت ءَ توار چِست کنگ ءِ دزبندی ءَ کن ایں گڑا آئی ءِ اے بنکی ءُ جوانیں سبب بلوچستان ءِ راجدپتری ءُ ھمساھگی ءِ سر ءَ بھارت ءَ آئی ءِ پرز ءِ یات ءَ پرین اِنت چریشی ءِ سبب ءَ پاکستان ءِ گون ءَ اے گپ ءَ گوں ھچ دشمنی ءِ نہ بیت اِنت-

بنجاھی جارکش ءَ وتی درشان ءِ گڈسر ءَ گُشتگ ما اُمیت کن ایں بھارت دنیا ءِ مزنیں ڈیھ ءُ میان اُستمانی پھناتاں بلوچستان ءِ جیڑہ ءُ اد ءَ انسانی ناگیگیانی سر ءَ وتی کرد ءَ پیلو کنت-

آدینگ ءِ روچ ءَ بھارتی وزیر خارجہ ءِ یک جارکشے ءَ پریس کانفرنس کنان ءَ گوشتگ بھارت پاکستان ءِ نیمگ ءَ بلوچستان ءَ ھستیں انسانی ھکانی لگتالی ءِ سر ءَ باز پدرناک اِنت-

بھارتی میڈیا ءِ رد ءَ بھارتی وزید خارجہ ءِ جارکش ارندم باگچی ءَ وتی یک پریس کانفرنسے ءَ بلوچانی سر ءَ پاکستانی زُلم ءُ زوراکیانی درگت ءَ گپ کنان ءَ گوشتگ پاکستانی ادارھانی نیمگ ءَ بلوچستان ءَ ھستیں انسانی ھکانی لگتمالیانی سر ءَ بھارت دردیگ اِنت-

بھارتی وزیر خارجہ ءِ جارکش ءَ گُشتگ کہ پاکستانی ادارھاں گوں دزبندی اِنت کہ بلوچستان ءَ وتی زُلم ءُ زوراکیاں بند بہ کنت-

آئی ءَ دیمتر ءَ گُشتگ بھارت دمگ ءَ دراھیں راستیاں سرپد اِنت- بھارت اوگانستان ءَ ھستیں انسانی ھکانی ناگیگانی گر ءُ دار ءَ جاڑیگ اِنت-

زانگ بہ بیت بھارت ءِ نیمگ ءَ اے اولی رند نہ اِنت اشی ءَ پیسر بازیں وھداں بھارتی وزیراں بلوچستان ءَ ھستیں انسانی ھکانی لگتمالیانی ھلاپ ءَ بیوکی ءِ وتی گمان درشان کتگ اَنت-

بھارتی وزیر خارجہ ءِ نیمگ ءَ میان اُستمان ءِ پتر ءَ ھم بلوچستان ءَ ھستیں ریاستی انسانی ھکانی لگتمالیانی گپ بیتگ ھمے وڑ بھارتی سروزیر نریندرمودی ءَ سال دوھزار ءُ پانزدہ ءَ وتی یک درشانے ءِ تہ ءَ پاکستان ءَ را بیھار داتگ ءُ گُشتگ آ بلوچستان ءَ ھستیں انسانی ھکانی لگتمالی ءُ بلوچانی کُشت ءُ کوش ءَ بند بہ کنت-

نیشنل ڈیموکریٹک پاٹی ءِ بنجاھی جارکش ءَ پنجگور ءَ بدامنی، کُشت ءُ کوش ءُ ایمنی ءِ ناگیگیانی جاورھالانی سر ءَ دردیگ زھرشان کنان ءَ گوشتگ اے وھد ءَ سرجمیں بلوچستان ءَ دُزی، کُشت ءُ کوش، زورانسری آوار جنی، روچ ء رھمانی وڑیں وئیلانی گیش بیگ ھمک روچی جوڑ بیتگ بلے اے وھد ءَ پنجگور ءَ اے وڑیں وئیل روچ پہ روچ گیش بیان اَنت کہ روچ ء رھمان مردمانی آوار جنگ ءَ پد کُشگ ءُ چگل دیگ، اسٹریٹ کرائم ءِ گیش بیگ امن ءُ ایمنی ءِ آروکیں ادارھانی، اُستانی سرکار ءَ ھوار انتزامیہ ءِ بے سوبیں کارانی پژدر آیانی بے سوبی ءَ دِر دِر کنگ ءَ اِنت-

جارکش ءَ گُشتگ کہ لھتے روچاں پیسر سلاہ بندیں ٹولی یک مردمے ءِ آوار جنگ ءَ شتگ اَنت گڑا اود ءَ جاڑیگیں مھلوک ءَ وتی کمک ءَ وت آوار جنوکانی بگیری ءَ گھگیری کنان ءَ آوار جنگ بیتگیں مردم اش یل کنائینتگ ءُ آوار جنوک ءُ کشوک آیاں ادارھانی چیردستی ءِ تچکیں کمکانی سبوت گون بیتگ اَنت ادرانی چیردستی ءِ سبب ءَ انتزامیہ ھم آیانی ھلاپ ءَ کاروائی کت کنگ ءَ نہ اِنت چُشکہ انتزامیہ آوار جنوکانی تلبدارء ءَ کنگ ءَ اِنت – اے وھد ءَ پنجگور ءَ ھوار سرجمیں بلوچستان ءَ آوار جنی، کُشت ءُ کوش، دُزی ءُ ڈنگیاں ھوار اسٹریٹ کرائم ءِ وڑیں وئیل گیشتر ھما مردم ھوار اَنت کہ آیانی پُشتگیری ءَ ریاستی ادارھانی کمکی گندگ ءَ کاینت-

جارکش ءَ وتی درشان ءِ گڈسر ءَ گشتگ کہ ریاست ءُ ریاستی ادارہ اے وھد ءَ بلوچستان ءَ یک کالونے ءِ رنگ ءَ ھلائینگ ءَ اَنت ھمے واستا بلوچستان ءِ تہ ءَ ھرچی کہ بیت اِنت گڑا آیانی ھوار بیگ یا ھروھدی ءَ تلبداری کنگ ءِ درشان کنگ بیت اِنت ھمے واستا آیاں ھچ پرک نہ بیت اِنت بلوچستان ءِ نندوک ترس ءِ ساھگ ءَ وتی زندگی ءَ گوازینگ ءَ اَنت-

بلوچ نیشنل مومنٹ ءِ بنجاھی جارکش ءَ رسانکدراں وتی شنگ کرتگیں درشان ءِ تہ ءَ مند ءَ گل ءِ دوزواہ کپٹن ادھم ء شاھمراد ءِ کوش ترندی ءَ گوں ایرجتگ گوشتگ کہ کپٹن ادھم ءَ دوازدہ سال انت ناکہ ایوک ءَ گل ءِ دوزواھے ءِ بوتگ بلکنہ مند ءِ سول سوسائٹی ، گوازی ءُ دگہ چاگردی چست ءُ ایراں پُرکاریں ورناھے بوتگ کہ آ سرمچارانی دروشُم ءَ پاکستانی پوج ءِ کُشندہ ٹولی ءِ کارمنداں گوازی ءِ پَٹ ءَ تیرباران کُرتگ شھید کُرتگ تانکہ آئی ءِ کوش ءِ بُھتام بلوچ سرمچارانی سر ءَ بہ ایت بلے بلوچ ءِ ھون ھر کجا کہ ریچیت آ وت وتی کُشندھانی نشاندھی ءَ کنت-  کپٹن ادھم ءِ ھون پاکستان ءُ پاکستان ءِ داشتگیں کُشندہ ٹولیانی پیشانیاں مدام نکش بیت اتنت کہ ھچبر شودگ نہ بیت –

جارکش ءَ گوشتگ کہ کپٹن ادھم ءِ کوش پہ مئے واست ءَ نوکیں گپے نہ اِنت تا ھما وھد ءَ ما اے رستریں پاکستان ءَ چہ وت نہ رکّینیں مئے ورنا ءُ آؤکیں پدریچ ءِ چراگ ھمے وڈ تھاریں راھاں کُشگ بنت – مروچی بلوچ سرڈگار ءِ گوازی ءِ پَٹ بہ بنت یا زانشجاہ، دور ءُ دریں دمگ بہ بنت یاکہ شھر ءُ بازار سجوئیں جاہ بلوچ ءِ ھوناں گوں ھونین انت – اے رتکگیں ھونانی دریا ھچ بر پراموش کنگ نہ بنت ءُ بلوچ راج یک روچے الم وتی منزل ءَ سر بیت اتنت –

آئی ءَ گڈسر ءَ وتی درشان ءِ تہ ءَ گوشتگ کہ راج ءَ کپٹن ادھم ءِ کُشندہ پجاہ آؤرتگ انت- بلوچ سرڈگار ءِ منگھیں ھاکانی تہ ءَ اے کُشندھاں کبر ھم نسیب ءَ نہ بیت کپٹن ادھم ءِ پیمیں پرزندانی ھوناں چہ بلوچ سرڈگار ءِ سر ءَ آشوب ءُ آجوئی ءِ روچ الم درکیت-

بلوچستان ءِ دمگ کیچ ءَ پاکستانی پوج ءَ بیڑ برتگ ءُ پنچ کس آوار جتگ ءُ برتگ اَنت –

گیشیں ھالانی رد ءَ کیچ ءِ دمگ تمپ گومازی ءَ پاکستانی پوج ءَ گوستگیں شپ ءَ بیڑ برتگ ءُ پنچ کس آوار جتگ ءُ برتگ اَنت-

آوار جنگ بیتگیں مردمانی پجار اعجاز ء مراد مھمد، شاھداد ء مونشی، ندیم ء صدیق، ملنگ ءُ عظیم ء گلم مھمد ءِ ناماں زانگ بیتگ اَنت –

دمگی مردمانی رد ءَ گوستگیں شپ ءَ پوج ءَ لوگ لوگ ءَ پَٹ ءُ پول کنان ءَ زھگ ءُ زالبول لَٹ ءُ کُٹانی نشانگ کرتگ ءُ پنچ کس آوار جتگ ءُ برتگ اَنت –

دمگی مردمانی رد ءَ چریشی ءَ پیسر ھم پوج ءَ گومازی ءِ بازارانی سر ءَ بیڑ برتگ ءُ بازیں مردمے آوار جتگ ءُ برتگ اَنت کہ انگت ءَ بیگواہ اَنت –

بلوچستان ءَ مھلوک ءِ بیگواھی ءِ درچ یکشل ءَ برجاہ اَنت ءُ وائس فار بلوچ مسنگ پرسنز ءِ رد ءَ اے وھد ءَ بلوچستان ءَ بازیں کچے ءَ بیگواہ بیتگیں مردمانی تہ ءَ کچ نودربرانی ئیگ اِنت –