TBP Balochi

بلوچ یکجھتی کمیٹی کراچی ءَ متحدہ عرب امارات ءَ عبدالحفیظ شھری ءِ یو اے ای پولیس ءِ دست ءَ دزگیری اپسوزی ءُ گوں کھول ءَ مزنیں زوراکی ءِ نامینتگ ءُ گشتگ کہ بلوچستان ءَ پد نی سانمندیں کھول ءَ یو اے ای ءَ ھم نشانگ کنگ بیگ ءَ اِنت کہ انسانی اگبالانی پادمالیانی گُڈی سیمسر اِنت۔ عبدالحفیظ زہری ءَ پیسر ھم کھول ءِ راشد حسین ھم یو اے ای ءَ بیگواہ کُتگ اَت ءُ پاکستان ءِ دست ءَ داتگ اَت بلے پاکستان ءَ سر بیگ پد داں انگت راشد حسین ءِ ھچ ھال ءُ اھوال نیست، کس یو اے ای ءَ چہ اے جُست کُت نہ کنت کہ ھما مردم شما پاکستان ءَ ڈی پورٹ کُتگ آ مروچی کجا اِنت ءُ کجام زندان ءِ تہ ءَ اِنت ؟ ابید چہ راشد حسین ءِ یل کنائنگ ءَ کرد پیلو کنگ ءَ یو اے ای ءِ سرکار ءَ ھمے کھول ءَ چہ عبدالحفیظ زہری ھم بیگواہ کُتگ کہ چریشی ءَ کھول ءَ ھمے تُرس اِنت کہ آئی ءَ ھم پاکستان ءَ دیم دیگ بیت ءُ اود ءَ آ ھم راشد ءِ پیم ءَ بیگواہ کنگ بیت اِنت ۔

جارکش ءَ گُشتگ کہ عبدالحفیظ متحدہ عرب امارات ءَ گوستگیں بازیں سالاں چہ جھمنند اِنت ءُ ھمود ءَ باپار کنت، یو اے ای پئیمیں دودمانیں ڈیھے ءَ جھان ءِ دیم ءَ وتی نام پولنگ کنگ نہ لوٹ ایت۔ جھان ءَ چہ لکھانی کساس ءَ مردم اود ءَ پہ تر ءُ تاب کائینت وھدیکہ لکھانی کساس ءَ مردم اود ءَ باپار کنت، بلوچانی ھم یک مزنیں کساسے ءِ ھمود ءَ جھمنند اِنت گوں آیاں چُشیں رویش شر نہ اِنت۔ زاناں نوں یو اے ای ھم پاکستان پئیم ءَ یک گیر مھپوزیں ملکے ءِ ھساب ءَ چارگ مہ بیت؟ یو اے ای کہ وتی قانودانی سوب ءَ جھان ءَ نامدار اِنت بلے بلوچانی گوم ءَ چُشیں کرد بازیں جُست ودی کنگ ءَ اِنت۔

جارکش ءَ گُڈ سر ءَ یو اے ای سرکار ءَ چہ دزبندی کنان ءَ گُشتگ کہ انساپ ءِ لوٹ ھمیش اِنت عبدالحفیظ زہری زیت ءَ زیت دیم ءَ آرگ بہ بیت وھدیکہ آئی ءِ پاکستان ءَ ڈی پورٹ کنگ ءِ ردی ءَ کس ھم مہ کنت وھدیکہ چہ آیاں دزبندی کنیں کہ چہ ھمود ءَ بیگواھیں راشد حسین ءِ کیس ءَ ھم پاکستان ءَ گوں اھوال بہ کن اَنت ءُ پاکستان ءَ بہ منارین اَنت کہ راشد حسین دیم ءَ آرگ بہ بیت ءُ اگاں کجام ھم جرم ءَ ھوار اِنت گُڑ ءَ آمید گِس ءَ آرگ بہ بیت ءُ آئی ءِ گناہ پدر کنگ بہ بیت بلے چُش کجام ھم مردمے بیگواہ کنگ انساپ ءِ گُٹگیر کنگ ءِ ھساب ءَ اِنت۔

پاکستانی لشکریاں گوستگیں شپ ءَ بیڑ برتگ ءُ سَے مردم دزگیر کنگ ءَ پد ناشناسیں جاھاں بُرتگ اَنت۔

بیگواہ کُتگیں مردم لشکریاں کیچ دمگ ءِ مند ھنکین ءَ چہ دزگیر کُتگ اَنت۔

بیگواہ بیتگینانی تہءَ دو مردمے پجار اسماعیل آفتاب جھمنند گیاب ءُ سعید اللہ جھمنند مند سورو ءِ ناماں بیتگ وھدیکہ یک سیمی مردمے پجار داں انگت نہ بیتگ۔

زانگ بہ بیت ھمے ھپتگ ءِ تہءَ زورانسری بیگواھیانی وئیلانی تہءَ یک برے گیشی اتکگ گندگ ءَ پیداک اِنت کہ اِشی تہءَ گیشتر مردم کیچ دمگ ءِ میتگ ءُ بازاراں چہ دزگیر کنگ بیتگ اَنت اِشی ءَ ابید بولان ءُ خضدار ءَ ھم مردمانی بیگواہ بیگءِ کیس دیما اتکگ اَنت۔

بلوچستان ءِ تیابدپی شھر گوادر ءَ سی ٹی ڈی ءَ تراکناکیں شوروانی دستیگ کنگ ءِ ھواری ءَ یک مردمے ءِ دزگیر کنگ ءِ ٹاہ داتگ –

سی ٹی ڈی ءِ رد ءَ گوادر ءَ دزگیر کنگ بیتگیں مردم ءِ سیادی تحریک طالبان پاکستان ءَ اِنت ءُ آ اُرشکاری ءِ درگت ءَ گوادر ءَ آیگ ءَ بیتگ-

جارکش سی ٹی ڈی ءِ رد ءَ دزگیر کرتگیں مردم ءِ گور ءَ 1878 کلو تراکناکیں شورو، 66 انچ پرائما کورڈ ءُ 03.1 ڈینوٹر دزکپگ ءِ ٹاہ اش داتگ ءُ گوادر ءَ ناشرکاری ءِ مزنیں شوربندی ءِ بے سوب کرتگ-

سی ٹی ڈی ءِ رد ءَ دزگیر بیتگیں مردم ءَ پٹ ءُ پول ءَ پد دگہ ھمراہ ءُ نیٹورک ءِ جاھاں بیڑ برگ بیت اِنت-

زانگ بہ بیت چار شمبے ءِ روچ ءَ سی ٹی ڈی ءَ تربت ءَ دو مردمانی دزگیر کنگ ءِ ٹاہ داتگ اَت – سی ٹی ڈی ءِ رد ءَ ایم ھشت شاھرہ ءَ بلیدہ ءِ کراس ءَ ناشریں گل بلوچ ریپبلکن آرمی (بی آر اے) ءَ گوں بندوکیں مردمانی ھال سر بیتگ چریشی ءِ سر ءَ سی ٹی ڈی ءَ کاروائی کرتگ ءُ دو شکی ئیں مردم دزگیر کرتگ ءُ آیانی گور ءَ 3.8 گرام تراکناکیں شورو، 78انچ پرائما کارڈ تار 2 ڈیٹونیٹر دزکپتگ اَنت-

زانگ بہ بیت سی ٹی ڈی ءَ بلوچستان ءَ چریشی ءَ پیسر ھم بازیں کاروائی کرتگ اَنت ءُ بازیں مردمانی دزگیر کنگ ءِ ٹاہ داتگ اَنت پد ءَ آ پیسر ءَ بیگواھیں مردمانی ناماں زانگ بیتگ اَنت-

انسانی ھکانی گل ءُ بلوچ پاٹیانی نیمگ ءَ سی ٹی ڈی ءِ کاروانی سر ءَ ایراد گرگ ءَ اَنت ءُ آ یاں دروگ گوشگ ءَ اَنت-

گوستگیں سال ءِ ھژدہ نومبر ءَ سندھ ءِ مزن شھر کراچی ءَ رینجرز ءُ چیریں ادارھانی کارمندانی دست ءَ زورانسری آوار جنگ بوتگیں محبت بلوچ ء اشرف بلوچ انگت یل کنگ نہ بوتگ –

محبت بلوچ کراچی ءِ دمگ لانڈیا ءَ پاکستانی پوج ءُ چیریں ادارھانی کارمنداں شپ ءِ ادار سَے ءَ گِس ءِ سر ءَ بیڑ بُرتگ آوار جتگ گوں وت برتگ –

محبت بلوچ ءِ کھول ءَ رسانکدراں وتی داتگیں درشان ءِ تہ ءَ گوشتگ کہ ھژدہ نومبر ءِ شپ ءِ ادار سَے ءَ رینجرز ءُ چیریں ادارھانی کارمنداں گِس ءِ سر ءَ بیڑ برتگ محبت بلوچ ء اشرف بلوچ زورانسری آوار جتگ گوں وت برتگ – مروچی آئی ءِ بیگواھی ءَ دو ماہ ءَ گیش انت کہ آئی ءِ درگت ءَ ھچ وڑیں ھال ءُ اھوال نیست –

محبت بلوچ ءِ گوھار ءَ پاکستان ءِ مزن وزیر عمران خان، پاکستان ءِ سپریم کورٹ، سند ءِ وزیر اعلی مراد علی شاہ ءُ کانود جوڑ کنوکیں ادارھاں چہ لوٹ کتگ ءُ گوشتگ کہ منی برات ءَ یل بہ کن اَنت –

محبت بلوچ ءِ زورانسری آوار جنی ءِ بگیری ءَ دو فروری ءَ چار شمبے ءِ روچ ءَ ادار شش ءَ بگر تاں شپ ءِ دوازدہ چاگردی ترامجاہ ٹویٹر ءَ کمپئین برجم دارگ بیت انت – آئی ءِ کھول ءِ مردماں سوشل میڈیا ایکٹوسٹ، انسانی ھکانی گل ءُ انسان دوستاں چہ لوٹ کتگ ءُ گوشتگ اے کمپئین ءَ بہ بھر بہ زور انت کھول ءَ چہ اے ازاب ءَ رکینگ ءِ ھاتر ءَ وتی کرد ءَ پیلو بہ کن انت –

بلوچستان لبریشن فرنٹ ءِ جارکش میجر گوھر بلوچ ءَ رسانکدر ءَ شنگ کتگیں درشان ءِ تہ ءَ گوشتگ کہ گوستگیں سال 2021 ءَ بی ایل ایف ءِ سرمچاراں پاکستانی لشکر ءِ سر ءَ 176 اُرش کتگ – اے اُرشاں درزنے ءَ گیش اُرش چین پاکستان اقتصادی راھداری CPEC ءَ سر پھازکی پوج سر ءَ کتگ اَنت ، چریشی ءَ پاکستانی پوج ءُ دگہ پھازوکی لشکر ءِ 226 ءَ گیش کارندہ کشتگ ءُ درزانانی ھساب ءَ ٹپی کتگ اَنت-

درشان ءِ رِد ءَ سرمچاراں ریاستی ھمکار ڈیتھ اسکواڈ ءِ پانزدہ (15) باسک نشانگ کتگ اَنت وھدے کہ بازین ئِے ٹپی بوتگ اَنت- پوج ءِ بند ساچ شرکت فرنٹیر ورکس آرگنائزیشن ( ایف ڈبلیو او) سر ءَ اُرش کنگ بوتگ-

آئی ءَ گْوشتگ کہ چینی ٹیلی کمیونیکیشن شرکت ( زونگ) ءُ آئی ءِ پھازوکی بگیر ءَ چار اُرش کتگ – پاکستانی موبائل ٹیلی کمیونیکیشن شرکت یوفون ٹاور سر ءَ دو اُرش کتگ-

میجر گْوھرام بلوچ ءِ رِد ءَ بغدادی کراچی ءَ چینی انجینئرانی گاڑی ءُ لیاری کراچی ءَ یک چینی شھری یے نشانگ کتگ اَنت کہ آ سرکاری نیمگ ءَ سندھ سالڈ ویسٹ مینیجمنٹ ( SSWMB) فلیڈ تر ءُ تاب ءَ بوتگ اَنت

آئی ءَ گوشتگ کہ بی ایل ایف اُرشاں دُژمن 12 گاڑی ءُ 16 پرپٹ تباہ بوتگ اَنت- سے اُرشانی وھد ءَ سرمچاراں زورگریں پوج سلاہ ءُ دگہ ساز ءُ سامان گوں وت برتگ اَنت- یک چیک پوسٹے سر ءَ اُرش کتگ دستیگ کتگ- سیمنٹ شرکتانی گاڑی ءُ مشینریانی سر ءَ دو اُرش کتگ-

جارکش ءَ گوشتگ کہ ڈیھ پھازگ ءَ بی ایل ایف 11 سرمچار شھید بوتگ اَنت-

میجر گْوھرام بلوچ ءَ دیمتر ءَ گوشتگ کہ پاکستان زورانسری کبزہ ءَ چہ بلوچستان ءِ آجوئی ءِ زرمبشت ءُ آئی ءَ ھمگرنچ بی ایل ایف ءِ سلاہ بندیں اُرش میانی اُستمانی راہ ءُ راھبند ءِ سر ءَ اَنت-

آئی ءِ گوشگ کہ سلاہ بندیں جُھد گلامی ءَ چہ رکینگ ءُ بلوچ راجی آجوئی ءِ ھاتر ءَ مئے راجی جُھد ءِ یک الّمی ءُ اسر ءِ بھر اِنت ءُ ھرچ سرپد ءُ زانتکاریں مردم اشی ءِ اھمیت ءُ پائدگ مندی ءَ انکار نہ کنت پرچاکہ زورگریں دُژمن ریاست ( پاکستان ) ناں تھنا یک بے دودیں ریاستے بلکیں آجوئی ءُ بُنکی انسانی ھک ءُ آجوئی ءَ چہ انکار یک جھانی بے لگام ءُ ناشرکاریں ریاستے ھمے وڑ پاکستان دست ءَ بلوچستان ءِ کالونائزیشن ھم بے پترت ءُ ناشرکاری ءِ یک کردارے-

اے گپ جھان ءَ پدر بوتگ کہ پاکستان ایردستیں بلوچستان ءَ ھرچ وڑیں جمھوری سیاسی چست ایر ءُ رسانکدر سرجمی ءَ پابندی جنگ بوتگ اے پابندی تھنا زبانی ھکم نامواں مھدود نہ اَنت بلکیں جوڑ بوتگیں پالیسی اَنت پاکستان ءَ ایردستیں بلوچستان ءَ بلوچ راج ءِ بگیری ءَ زوراکی ءِ ھد پروشتگ اَنت سرجمیں بلوچستان ءَ برجاہ ءَ اِنت – اے وڑیں ریاستی ناشرکاری ءُ زور، زُلم ءِ بگیری ءَ سلاہ بندیں جُھد دودی ءُ کانودی کردے چریشی ءِ اھمیت ءِ انکار بیت نہ کنت-

درشان ءِ تہ ءَ گوشگ بوتگ کہ پاکستان ءِ بگیری ءَ مئے جُھد میان اُستمانی راہ ءُ راھبند ءِ سر ءَ اَنت وھدے کہ پاکستانی پوج ءُ آئی ءِ چیریں ادراہ ناں تھنا میانی اُستمانی راھبندانی بگیری ءَ کنگ ءَ اَنت بلکیں انسانی ھکاں ھم وتی بُٹانی چیر ءَ لگاشگ ءَ اَنت وھدے کہ بلوچ سرمچار (آجوئی لوٹوکیں جنگول) میان اُستمانی راھبند ءُ بلوچ دود ءَ ایر کتگیں ھد ءُ سیمسر ءَ اوشتگ ءُ جھد کنگ ءَ اَنت-

بی ایل ایف راجی آجوئی ءِ ھاتر ءَ جُھد کنگ ءَ اِنت – راجی جزبگ ءَ چہ سرریچ بی ایل ایف ءِ سرمچار وت ءَ گیش مزن ءُ نوکیں جنگی سلاہ ءُ مڈیاں بار پاکستانی پوج ءِ بگیری ءَ چیرجنگی ءُ ھُنراں چہ وتی ڈیھ ءِ ھاتر ءَ جوانیں وڑے گوں دلیری ءَ جنگ کنگ ءَ اَنت-

میجر گْوھرام بلوچ ءَ گُڈی ءَ گْوشتگ کہ زورگریں پوج ءُ دگہ پھازوکی ادارہ میان اُستمانی راہ راھبندانی اھترام ءَ نہ کنت آ بے میاریں مردمانی سر ءَ زُلم کنگ ءَ اِنت آ اشاں چست کنگ، آیاں لَٹ ءُ کٹانی نشانگ کنت ءُ اشی ءَ پد آیانی تیرسُپتگیں لاشاں پیشدار ھاتر ءَ دور دنت دانکہ راج ءِ تہ ءَ تُرس ودی بہ کنت ءُ آھاں راجی زرمبشت آجوئی ءَ چہ یک کر کنگ ءُ بے تواری کنگ ءَ لاچار بہ کنت- پاکستان اے وڑیں بلوچ چُکچینی پالیسی ءُ چست ءُ ایراں زانگ بیت کہ ما یک بے دل ءُ زوراکیں دُژمن ءِ دیم ءَ ایں کہ آئی ءِ چہ انسانیت ءَ زبھر ءُ جھانی کانود ءِ منوگر نہ اِنت- مئے جنگول دُژمن تاکتاں گوں سوبمندی ءَ نشانگ کنگ ءَ اَنت ءُ آیاں دُژمن ءِ گوم ءَ جنگ ءِ جزبگ پروشتگ-

جارکش ءَ گوشتگ کہ مئے جُھد داں ایردستیں بلوچستان ءِ وتواجھی ءَ برجاہ بنت-

سربوتگیں ھالانی رِد ءَ بلوچستان ءِ جتاجتائیں دمگاں دگ ءُ تیرگواری وئیلاں جِنکو ءَ ھوار شش مردم بیران بوتگ وھدیکہ اے وئیلاں پانزدہ مردم زدگ بوتگ انت –

گیشیں ھالانی رِد ءَ لسبیلہ ءِ دمگ وندر ءِ نزیک ءَ مساپر کشیں کوچ ءُ ٹرک ءِ میان ءَ ڈیک ورگ ءِ سوب ءَ زھگ ءُ زالبولاں ھوار چاردہ مردم زدگ بوتگ انت –

وندر ءَ ریسکیو ءِ واکداراں زدگ بوتگیں مردم پہ درمان ءَ دمگی نادراھجاہ ءَ سرکتگ انت کہ اودا زدگ بوتگیں مردم درمان کنگ ءَ پد پہ گیشیں الاج ءِ ھاتر ءَ کراچی ءَ دیم دیگ بوتگ انت –

ھمے وڑ ڈیرہ اللہ یار ءَ ڈیرہ مراد جمالی ءَ چہ جیکب آباد ءَ رؤکیں کوچ ءُ پرپٹ ءِ ڈیک ورگ ءَ پرپٹ سوار ثناء اللہ چکھڑا نامی ورناھے بیران بوتگ –

دگہ وئیلے ڈیرہ اسمائیل خان ءِ شاھدگ کپیپ نزیک ءَ دیم ءَ اتکگ کہ ٹوڈی گاڑی ءِ ڈیکر کنگ ءَ پرپٹ سواریں احسان اللہ نامی مردمے بیران بوتگ – گاڑی سوار وئیل جاہ ءَ چہ تتکگ ءُ شتگ واکداراں جون ژوب نادراھجاہ ءَ سرکتگ –

ھمے وڑ بیلہ گوٹھ ریک ءَ ٹرک ءِ ڈیکر کنگ ءَ ھزدار نال ءِ نندوک پرپٹ سواریں عبدالستار ء بھائی ھان جان بیران بوتگ –

دومی نیمگ ءَ گوستگیں شپ ءَ چاگی ءَ اوگان مھاجر کیمپ گردی جنگل شپ ءِ ادار دو ءَ لال محمد نامی مردمے ءِ لوگ ءَ سلاہ بنداں دور کتگ ءُ تیرگواری کتگ –

تیرگواری ءَ لال محمد ءُ آئی ءِ شش سالی نماسگ ھما دمان ءَ بیران بوتگ انت وھدیکہ چاردہ سالی جِنکو ءِ زدگ بوتگ –

ھمے وڑ سبی ءِ دمگ مرغرانی ءَ ناشناسیں مردماں ولید نامی مردمے تیرباران کُتگ کُشتگ –

دی بلوچستان پوسٹ پتر ءَ سربوتگیں ھالانی رِد ءَ چہ متحدہ عرب امارات ءَ زورانسری آوار جنگ بوتگیں عبدالحفیظ بلوچ ءِ پہ وشی یل کنائینگ ءِ ھاتر ءَ سندھ ءِ مزن شھر کراچی ءَ زھرشانی کنگ بیت اِنت –

وائس فار بلوچ مسنگ پرسنز ءِ رھشون ماما قدیر بلوچ ءِ گوشتگ کہ چہ متحدہ عرب امارات ءَ آوار جنی ءَ پد ھمودے چیریں ادارھانی دست ءَ بیگواہ کنگ بوتگیں عبدالحفیظ ءِ بیگواھی ءُ زورانسری آوار جنی ءِ بگیری ءَ دو فروری ءَ چار شمبے ءِ روچ ءَ کراچی ءَ زھرشانی کنگ بیت اِنت –

زانگ بہ بیت متحدہ عرب امارات ءَ بلوچستان ءِ دمگ ھزادار ءَ چہ سیادی داروکیں عبدالحفیظ زھری ھمے سال ءِ بیست ءُ ھپت جنوری ءَ متحدہ عرب امارات ءَ انٹر نیشنل سٹی ءَ وتی جندے گِس ءِ پارکنگ ءَ چہ آوار جنگ بوتگ – آئی ءِ زورانسری آوار جنی ءِ ھال آئی جند ءِ کھول ءَ داتگ –

عبدالحفیظ ءِ مات ءَ چاگردی ترامجاھاں وتی شنگ کرتگیں تامر ءِ تہ ءَ گوشتگ کہ آئی ءِ کھول ءَ ھزدار ءَ چہ وتی جان رکینتگ ءُ دبئی ءَ اتکگ انت – عبدالحفیظ مات ءِ گوشگ انت کہ عبدالحفیظ اے وھد ءَ امارات ءِ تہ ءَ کھول ءِ یازدہ مردمانی سرکماشی ءَ (کفالت) کنگ ءَ انت آگاں آ پاکستان ءَ دیم دیگ بیت گڑا ھمے ترس انت کھول ءِ دگہ مردم ھم پاکستان ءَ راہ دیگ بنت –

زورانسری آوار جنگ بوتگیں عبدالحفیظ ءِ گھار ءُ بیگواھیں عبدالحمید زھری ءِ لوگبانک فاطمہ عبدالحمید ءَ کراچی ءَ ساڑی ئینن نودربر، راجدار ءُ چاگردی باسکاں ھوار انسانی ھکانی باسکاں چہ لوٹ کتگ کراچی زھرشانی ءَ بھر بہ زور انت –

ھمے وڑ راشد حسین بلوچ ھم سَے سال ساری عبدالحفیظ بلوچ ءِ ھمراھی ءَ متحدہ عرب امارات ءِ شھر عجمان ءَ چہ انٹرنیشنل سٹی ءَ رؤگے میان ءَ شارجہ ءَ چہ چیریں ادارھانی کارمنداں آوار جتگ ءُ بیگواہ کتگ کہ پد ءَ رند ءَ گیرکانودی وڑ ءُ ڈول ءَ پاکستان ءَ آرگ بوتگ – عبدالحفیظ راشد حسین ءِ وارس اِنت وھدیکہ راشد حسین بلوچ ءِ زورانسری آوار جنی ءِ چم دیستیں گواہ یے –

سربوتگیں ھالانی رِد ءَ کیچ ءِ بنجاھی شھر تربت ءَ ناشناسیں مردماں پاکستانی پوج ءِ گاڑی ءِ بمب اُرش ءِ نشانگ کُتگ –

ھالانی رِد ءَ پوج ءِ گاڑی تربت ءِ دمگ آبسر دوکرم کور ءَ تراک ناکیں شوروانی نشانگ جوڈ کنگ بوتگ –

دمگی اھوالکار ءِ رِد ءَ تراک توار دور دور ءَ مردماں اشکُتگ ھمے گمان کنگ بیت کہ اُرش ءِ آسر ءَ پاکستانی پوج ءَ جانی تاوان ءِ دیمپانی بوتگ بلے تنی وھدی واکدارانی نیمگ ءَ اے درگت ءَ ھچ وڑیں ھال شنگ کنگ نہ بوتگ ءُ ناکہ اے اُرش ءِ زمہ واری منّگ بوتگ – وھدیکہ پوچ ءَ دمگ انگیر ءَ کُتگ ءُ پٹ لوٹ برجاہ انت –

کس ءَ را جیڑکی نہ اِنت

شائر: سلیم ناز

دی بلوچستان پوسٹ

اے     راهے    پہ  مساپراں
پہ      گلزمین  ءِ    وارساں
پہ    مرز  ءُ   بوم   وارساں
کہ   آشکاں  اے  هاک ءِ بس
نچار اِتگ ایشاں سیت ءُ نپ
ناسرد ءُ گرم  نا روچ ءُ شپ
پہ     راج ءِ   پُلیں    هاتر ءَ
سر ءَ    کہ  بستگ اِش کپں
گوں   دژمناں    مڑاں    باں
دینتیں      هشیں      سراں 
نہ     مناں  زوریں  چاکراں
بداں    وتن     لگت    کتگ
بلوچ    وت ءَ   بگت   کتگ
چہ پیم لوگ ءَ نشت باں
مئے   جنگلاں    آس   دنت
مئے   آپاں  زهر  مان   کنت
کہ  دلوتاں    پہ   زور  بارت
وتارا     لیک ئِے         هاکمے
یزدی        پیمیں        زالمے
نہ   مناں  هنچیں  ریاست ءَ
دروگ   بندیں     سیاست  ءَ
در ءَ      برو     او       چرکی  
ترا   نسیب ءَ   کبر   نہ   بیت
اے جنگ ءَ پروش وارتگ تو
پہ   زور   هاکمی    نہ    بیت
تاں  چُکے ھست  جنگ  کنت
وتی    پہ      ننگ  ءِ    هاتر ءَ
وتی         زمین  ءِ       هاتر ءَ
اے  جنگ   وڑے   روان  بیت
برے     اے     کاروان     بیت
پہ          آجوئی  ءِ     منزل ءَ
پہ        آجوئی  ءِ       منزل ءَ

سربوتگیں ھالانی رِد ءَ بلوچستان ءِ دمگ جیکب آباد ءَ سُھرک ءِ نادراھی ءَ دگہ دو زھگ بیران بوتگ اَنت، ھردو جاڑیں گُوھار بوتگ انت وھدیکہ سیمی گھار ءِ جاور نگیگ انت –

گیشیں ھالانی رِد ءَ جیکب آباد ءَ محسن نامیں مردمے ءِ دو جاڑیں جِنکو ظہرہ ءُ کبری سُھرک نادراھی ءِ آماچ بوتگ ءُ بیران بوتگ انت وھدیکہ سیمی جِنکو ءِ جاور ھم نگیگ اَنت کہ نادراھجاہ ءَ سرکنگ بوتگ –

بلوچستان ءَ جاندراھی ءِ سھولت نہ بوھگ ءِ سوب ءَ سھرک ءِ نادراھی ءَ چہ بازیں زھگے مرگ ءِ دیمپان انت – سھرک نادراھی ءِ سوب ءَ بلوچستان بازیں دمگ اے نادراھی ءِ آماچ انت کہ آھانی لڑ ءَ نصیر آباد اولسر انت –

زانگ بہ بیت گوست ءَ بلوچستان ءِ بازیں دمگاں سھرک ءِ نادراھی ءِ آماچی ھال سر بوتگ انت کہ آھانی تہ ءَ گیشیں کچ زھگانی انت –

زانوگرانی گوشگ انت کہ اے نادراھی ڈکال ءُ ھورے نہ بوھگ ءِ سوب ءَ پیداک بیت انت کہ درساں پیش ھما زھگاں گیپت کہ نزور اَنت – زھگانی تہ ءَ اے نادراھی یکبرے کہ تالان بوت گڑا اشی ءِ گر ءُ دار ءَ تُرندیں اینٹی بائیوٹیک درمان دئیگ زھگ چریشی ءَ رکیت کن انت ءُ اے درمانانی کورس ھم سرجم کنگی انت –

چاگردی مردمانی گوشگ انت کہ بلوچستان ءَ جاندراھی ءِ درگت ءَ تو بگر ھچ وڑیں سھولت نیست انت – سھرک ءِ وڑیں نادراھی ھر وڑیں ڈیھاں آرامی الاج کنگ بنت بلے بلوچستان ءَ اے وڑیں نادراھی زھگاں مرگ ءِ دیمپان کنگ ءَ اَنت –