TBP Balochi

ڈیرہ بگٹی ءَ سلاہ بندانی میان ءَ جنگ ءُ چوپ ءَ سرکاری پلامرزی ءَ ٹولی ءَ سیادی داروکیں یک کارندہ بیران ءُ دو زدگ بیتگ اَنت-

جنگ ءُ چوپ ڈیرہ بگٹی ءِ دمگ ڈل ٹوبانی ءَ پیش اتکگ، زدگ ءُ بیرانی بیتگیں مردمانی سیادی نوسانی بلوچانزئی ءَ چہ گوشگ بیگ ءَ اَنت-

زانگ بہ بیت گوستگیں لھتے روچاں ڈیرہ بگٹی ءَ اے ٹولی ءِ سر ءَ اُرش گندگ ءَ آیگ ءَ اَنت-

گوستگیں روچاں بمب تراکے ءَ چار کارندہ بیران ءُ پنچ زدگ بیتگ اِت اَنت، بلے تنی وھدی گوستگیں روچ ءُ مروچی اے اُرشانی زمہ واری ھچ گل ءَ پہ وت ءَ نہ زرتگ اَنت-

جماعت اسلامی بلوچستان ءِ جنرل سیکرٹری ءُ حق دو تحریک ءِ سروک مولانا ھدایت الرحمان ءَ سَے شمبے ءِ روچ ءَ شال ءَ ھاکی چوک ءَ میڈیکل اسٹوڈنٹس الائنس ءِ زھرشانی ءَ تران کنان ءَ گوشتگ ھاکم اے گپ ءَ تچک بہ کن اَنت ما پاکستانی اِنت یا ناں گڑا پد ءَ ھما رنگ ءَ گپ جنگ بیت اِنت-

آئی ءَ گُشتگ مروچی اد ءَ مئے زھگ دگانی سر ءَ زھرشانی کنگ ءَ اَنت اے ھچ جنرل ءُ کرنل ءِ زھگ نہ اَنت-

آئی ءَ گُشتگ بلوچ یل زیردستیں جاھے جوڑ کنگ بیتگ –

آئی ءَ وتی تران ءَ بی این پی مینگل ءِ سر ءَ ایراد گران ءَ گوشتگ کہ سردار اختر مینگل سرکار ءَ چہ زاتی لوٹانی پجینگ ءَ کنگ ءَ اِنت بلے مرد دیم ءَ وت ءَ بلوچستان ءِ وارس گوشگ ءَ اِنت-

بلوچستان ءِ اسمبلی ءَ نشتگیں افلاطون ٹھیکہ ءُ اسکیمانی سر ءَ جنگ ءَ اَنت آیاں بلوچستان ءِ جنک ءُ بچکیں نودربرانی ھش زلورت نہ اِنت، چار ماھاں چہ بلوچستان یونیورسٹی بند اِنت نودربر بیگواہ کسے ءَ پکر نیست اِنت-

آئی ءِ گوشگ اَت جام ءِ دور ءِ سرکار ءَ چاروکیں اپوزیشن نی قدوس ءِ دور ءِ سرکار ءَ گار اِنت ءُ اکتدار ءَ بھر مند اِنت-

ھدایت الرحمان بلوچ ءِ گوشگ اَت میڈیکل نودربر آؤکیں باندات ءِ چراگ اَنت بلے سرکار مئے بانداتاں تھاری ءَ دور دیگ ءَ اِنت-

آئی ءَ گُشتگ نودربرانی گون ءَ اوشتوکاں اسلام آباد ءَ پیسر اد ءَ نندانک بیت اِنت –

بلوچستان ءِ ضلع کیچ ءِ تھسیل دشت ءَ پاکستانی پوج ءِ زوراکی برجاہ، پوج ءِ دست ءَ دو مردم آوار جنگ ءَ پد بیگواہ کتگ اَنت-

گیشیں ھالانی رِد ءَ کیچ ءِ تھسیل دشت ءِ ھند جنگل کراس ءَ گوستگیں روچ ءَ مگرب ءِ وھد ءَ پاکستانی پوج ءَ دو مردم آوار جتگ ءُ گوں وت برتگ اَنت-

آوار جنگ بوتگیں مردمانی پجّار زاھد ء عیسیٰ ءُ الطاف ء اقبال جھمنند مچات ءِ نام ءَ چہ بوتگ اَنت-

زانگ بہ بیت گوستگیں روچاں ھم پاکستانی پوج ءَ دشت ءِ دمگ درچکوہ ءَ بیڑبرتگ اَت ءُ دہ مردم آوار جتگ اَت ءُ آوار جنگ بوتگیں مردمانی تہ ءَ سے ھشتاد سالی ئیں کماش ھم ھوار اِت اَنت-

اھوالکارانی رِد ءَ بیست ءُ پنچ جنوری ءَ پاکستانی پوج ءِ چوکی سر ءَ سلاہ بندانی اُرش ءَ پد پاکستانی پوج ءَ دشت ءِ تہ ءَ وتی بیڑ گیش کتگ اَنت ءُ بازیں جاھاں دگانی سر ءَ چک ءُ تانی گیش کتگ اَنت کوھانی تہ ءَ وتی پوج پترینتگ ءُ بُرزی کمک ءَ بالگرد وھد وھد ءِ سر ءَ گشت جن اَنت-

اھوالکارانی رِد سبندان ءِ ھند ءَ پاکستانی پوج کارندہ پرپٹ سواراں دست دے اَنت ءُ آھاں کڈن کن اَنت ءُ گوش اَنت کہ پرپٹ ءَ بند بہ کن اِت ءُ مھارا بہ کن اِت داں دومی چوکی ءِ کر ءَ –

زانگ بہ بیت بلوچستان ءَ ھمکروچی زورانسری آوار جنی ءِ دْرچ برجاہ ءَ اِنت دومی نیمگ ءَ بیگواھیں مردمانی یل کنائینگ ءِ ھاتر ءَ جوڑ کتگیں بُنجل وائس فار بلوچ مسنگ پرسنز ءِ وائس چیئرمین ماما قدیر بلوچ ءِ سروکی ءَ شُدکشیں ھڑتال برجاہ ءَ اِنت-

بلوچستان ءِ بُنجاھی شھر شال ءَ سے شمبے ءِ روچ ءَ نودربر میڈیکل الائنس ءِ برجم داشتگیں پاکستان میڈیکل کمیشن ءَ گوستگیں ماہ ءَ شنگ کتگیں نوٹیفکیشن ءِ بگیری ءَ روانکے کش اِتگ-

روانک ءَ میڈیکل نودربراں ابید دگہ نودربر گل ءُ سیاسی پارٹیانی باسکاں بھر زرتگ-

ھمے درگت ءَ نودربر میڈیکل الائنس ءِ راھشوناں تران کنان ءَ گوشتگ کہ بلوچستان ءَ سے میڈیکل کالجز مکران ، لورالائی ءُ جھالاوان ءِ جنکیں نودربر ءُ بچکیں نودربراں گوستگیں 58 روچاں چہ پی ایم سی ءِ سیاھیں کانود ءِ بگیری ءَ شال پریس کلب ءِ دیم ءَ تُرندیں سارتی ءِ سر ءَ زھرشانی کنگ ءَ اَنت، بلے ھکومت ءُ واکدارانی نیمگ ءَ ھچ وڑیں گامگیج زورگ نہ بوتگ-

آیاں گوشتگ کہ اے سال ءِ 13 جنوری ءَ پی ایم سی ءَ یک پرمان ءِ شنگ کتگ اَت ءُ بلوچستان ءِ سے میڈیکل کالجاں چہ سیادی نہ دارگ ءِ جار جتگ اَت ءُ بلوچستان ءِ نودربراں رجسٹر نہ کنگ ءِ بیھار داتگ اَنت اے ایرجنگی گام اِنت-

نودربرانی سروکاں گوشتگ کہ داں وتی لوٹانی منارینگ ءَ جھد ءَ برجاہ دار ایں ءُ زھرشانی ءَ گیش ءَ چہ گیشتر کن ایں-

ھمے وڑ بلوچستان ءِ دمگ کیچ ءِ بُنجاھی شھر تربت ءَ ھم میڈیکل نودربر الائنس ءَ شھر ءَ یک روانکے کش اِتگ ل ءُ شھید فدا چار راہ ءِ سر ءَ زھرشانی کُتگ-

نودربرانی زھرشانی ءُ روانک ءَ سول سوسائٹی ءُ دگہ نودربر گلانی راھشوناں بھر زرتگ زھرشانی کنوکیں نودربرانی لوٹانی پلامرزی ءِ جار جتگ ءُ گْوشتگ کہ بلوچستان ءِ میڈیکل کالجز ءِ نودربر گوم ءَ نا انساپی ءَ ھچ وڑ نہ من ایں-

آھاں گوشتگ کہ نودربرانی گوم ءَ آئی جدوجہد ءَ داں گُڈ سرءَ اوشتاتگیں۔

سی ٹی ڈی ءَ ٹاہ داتگ کہ آھاں بلوچستان ءِ دمگ بولان ءَ سلاہ بندیں گل بلوچ لبریشن آرمی ءَ ھمگرنچیں مردمے دزگیر کتگ –

سی ٹی ڈی ءِ جارکش ءِ رِد ءَ انٹیلی جنس بیسڈ آپریشن ءِ میان ءَ بلوچ لبریشن آرمی ءِ محمد غوث پنام غوثیہ دزگیر کتگ ، کہ آئی ءِ گور ءَ تراکناکیں شورو، پراما کارڈ، نٹ بلٹ ءُ دگہ مواد دست کپتگ اَنت –

جارکش ءِ رِد ءَ دزگیر کنگ بوتگیں مردم ھرنائی ءَ بولان ءِ دمگ مچ ءَ آیگ ءَ بوتگ کہ ھمود ءَ آئی ءَ کار کنگی بوتگ –

سی ٹی ڈی ءَ دزگیر کُتگیں مردم ءِ بگیری ءَ ارزی نبشتہ کُتگ ءُ آئی ءِ ھمراھانی دزگیر کنگ ءَ پٹ ءُ پول بندات کتگ –

چیزے وھد بیت کہ بلوچ راجدوستیں گل ءُ انسانی ھکانی ادارہ سی ٹی ڈی ءِ سر ءَ الزام جنگ ءَ انت کہ گوست ءَ بلوچستان ءِ تہ ءَ ھما کار کہ چیریں ایجنسیاں کُتگ انت نوں ھما کار ءَ مروچی سی ٹی ڈی کنگ ءَ اِنت –

راجدوستانی رِد ءَ سی ٹی ڈی ھم پاکستان چیریں ایجنسیانی وڑ ءَ مردماں مپت ء گناہ دزگیری ءَ ھوار آھانی کُشت ءُ کوش ءَ ھوار اِنت –

زانگ بہ بیت چیزے وھدے تہ ءَ بلوچستان ءَ بازیں ھنچیں وئیل دیم ءَ اتکگ انت کہ سی ٹی ڈی ءَ دیم پہ دیمی میڑ ءَ کُشگ ءِ ٹاہ داتگ بلے پد ءَ رند ءَ وھدیکہ آھانی پجار بوتگ گڑا پیسر ءَ چہ زورانسری آوار جنگ ءُ بیگواہ کنگ بوتگیں مردم بوتگ انت –

سند ءِ مزن شھر کراچی ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ ھپتاد ءُ ھشت روچ سرجم بوتگ – مفتی عبدالسلام عارف، مولانہ حبیب ءُ سیاسی ءُ چاگردی باسک یاسر بلوچ ءَ ھوار دگہ مردماں بنجل ءَ اتکگ ءُ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ کمک سرکماش ماما قدیر بلوچ ءَ اتکگیں مردمانی میان ءَ تران کنان ءَ گوشتگ کہ بلوچستان ءَ مردم زورانسری آوار جنگ بوھگ ءَ انت، زانگولیں جون چگل دئیگ بوھگ ءَ انت بلے رسانکدرانی ھاتر ءَ اے گوشگ شرتر اِنت کہ اے استعماری توارے، اے ھاکمانی توار اِنت اے زورگیرانی توار اِنت اشاں چہ ھچ اوست بندگی نہ انت – مار ءَ وت ءَ وت زانگولیں جونانی توار جوڈ بوھگی اِنت دنیا ءَ وتی ایردستی ءُ زوراکی ءِ توار سرکنگ لوٹیت –

آئی ءِ گوشگ ات سرجمیں بلوچستان ءَ لشکر کشی ءُ زانگولیں جونانی تہ ءَ گیشی اتکگ، مزھبی انتھا پسندی گیش بوھان اِنت ءُ زالبولانی آوار جنی ءِ تہ ءَ ھمک روچ گیشی آھان اِنت دومی نیمگ ءَ بلوچانی گل وتی زد ءُ کینگ ءَ یکے دومی ءَ بگیری دارگ انت کہ چریشی ءَ ھماھانی ادارھاں ھوار ھوار پُرایمنیں جھد ھم اسرمند بوھگ ءَ اِنت – بازیں دمگاں سیاسی تربیت ءُ زانشتی مردم مدامی کم بوتگ ھمے ھاتر ءَ مھلوک مایوسی ءِ آماچ اِنت اگاں جاورھال ھمے وڈ بوت اتنت گڑا اے دمگاں ریاست ءُ آئی دلار وتی تاکت ءَ گیش کن انت –

آبسر کور ءَ زورگیریں پوج ءِ کاروان تراک ناکیں شوروانی نشانگ جوڈ کتگ – جئیند بلوچ

بلوچ آجوئی لوٹوکیں سلاہ بندیں گل بلوچ لبریشن آرمی ءِ جارکش جئیند بلوچ ءَ رسانکدراں وتی شنگ کرتگیں درشان ءِ کیچ تربت ءَ پاکستانی پوج ءِ کاروان ءِ سر ءَ بوتگیں بمب اُرش ءِ زمّہ واری منّ اِتگ گوشتگ کہ مئے سرمچاراں گوستگیں شپ ءَ کیچ ءِ بنجاھی شھر تربت ءَ زورگیریں پاکستانی پوج ءِ کاروان سر ءَ ھما وھد ءَ تراکناکیں شوروانی (آئی ای ڈی) سر ءَ اُرش کُتگ کہ آبسر کورءَ گوزگ ءَ بوتگ –

جارکش ءَ دیمتر ءَ گوشتگ کہ اے اُرش ءَ بی ایل اے اسپیشل ٹیکٹیکل آپریشنز اسکواڈ ءِ سرمچاراں دژمن پوج ءِ پرپٹ ءُ گاڑیانی کاروان ءَ یک گاڑی ءِ نشانگ جوڈ کتگ – تراک ءِ زد ءَ اتکگیں گاڑی ءَ سواریں سَے کارمند مرتگ ءُ بازینے زدگ بوتگ –

جارکش جئیند بلوچ ءَ گوشتگ کہ مدامی وڈ ءَ دژمن پوج ھمک وھد ءَ وتی پروش ءِ چیر دئیگ ءُ وتی پوجیانی جزبگءَ بُرز کنگے ھاتر ءَ ھما جاہ ءَ بند کنت ءُ وتی جانی ءُ مالی تاوانانی رسانکدراں چہ چیر دئیگے کوشست ءَ کنت –

جارکش ءَ گڈسر ءَ وتی درشان ءِ تہ ءَ گوشتگ کہ بلوچ سرڈگار ءِ آجوئی ءَ تاں مئے اُرش ترندی ءَ گوں برجاہ مان انت –

متحدہ عرب امارات ءِ چیریں ادارھانی نیمگ ءَ زورانسری آوار جنگ بوتگیں بیگواھیں حفیظ زھری ءِ کھول سر ءَ زور دیگ بوگ ءَ اِنت کہ حفیظ زھری ءِ پاسپورٹ ھماھانی ھوالگ ءَ کنگ بہ بیت –

ٹی بی پی ءِ اھوالکار ءِ گوم ءَ تران کنان ءَ حفیظ زھری ءِ کھول ءَ اے گپ راست کُتگ ءُ گوشتگ کہ گوستگیں روچ ءَ چہ متحدہ عرب امارات ءِ چیریں ادارھانی کارمند بار بار آھاں فون کنگ ءَ انت ءُ ترسینگ ءَ انت کہ حفیظ زھری ءِ پاسپورٹ ءَ ھماھانی ھوالگ ءَ بہ کن اِت- پاسپورٹ ءَ کارمندانی ھوالگ کنگ کھول ءِ زور دیگ ءَ کھول سک باز پریشان انت – وھدیکہ حفیظ زھری ءُ آئی ءِ لوگبانک ءُ چکانی تاوان دیگ ءِ ھم تُرس انت –

کھول ءِ رِد ءَ اے کارمنداں حفیظ زھری ءِ گِس ءَ فون آئی لوگبانک ءُ زھگ بیھار ھم داتگ انت –

زانگ بہ بیت حفیظ زھری ءِ وارس راشد حسین بلوچ ھم سَے سال ساری متحدہ عرب امارات ءَ چہ زورانسری آوار جنگ ءُ بیگواہ کنگ بوتگ، حفیظ زھری آئی ءِ بیگواھی چم دیستیں شاھد اِنت –

کھول ءِ رِد ءَ راشد حسین ءِ زورانسری آوار جنی ءِ وھد ءَ ھم واکداراں حفیظ زھری ءِ گِس ءَ بیڑ برتگ راشد حسین ءِ پاسپورٹ درگت ءَ آھانی سر ءَ زور داتگ بلے پد ءَ ھم پاسپورٹ نہ رسگ ءَ ابید متحدہ عرب امارات ءِ واکداراں گیرکانودی وڑ ءُ ڈول ءَ راشد حسین پاکستان ءِ ھوالگ ءَ داتگ کہ تنی وھدی بیگواہ انت –

کھول ءِ گوشگ اِنت کہ راشد حسین ءِ گیر کانودی پاکستان ءَ دیم دئیگ ءِ کاگدی سبوت آھانی گور ءَ ھست انت –

حفیظ زھری ءِ زورانسری آوارجنی ءِ درگت ءَ متحدہ عرب امارات ءِ واکداراں تنی وھدی ھچ وڑیں گپ دیم ءَ نیاراتگ دومی نیمگ ءَ بلوچ سیاسی ءُ چاگردی تک ءُ پھناتاں سیادی داروکیں مردم امارات ءِ اے گامگیج سر ءَ تنکید کنگ ءَ انت –

نبشتانک: مات ءِ اَرزِشت ءَ بِزان اِت

نبشتہ کار: میار دشتی

دی بلوچستان پوسٹ

مات ” م، ا، ت سے لبزاں گوں جوڑ دَیگ بیتگ مات ءِ پُر مانائی ایش اِنت کہ مھر، دوستی واکی ھمے وڑ اِنت مات ءِ مھراں چے برزتِر ءُ توانائیں مھر نیست آ مھر ءَ وھدیکہ مات درشان کنت جھان ءَ چُشیں اِبن ءِ آدمے نیست کہ مات ءِ مہر ءِ مقابلہ ءَ بہ کنت، مات ءِ زبان ءَ چے دَرتکگیں یک آھے دگہ انسان ءَ گوں اَد ءَ کنگ نہ بیت مات مات اِنت بقول بلوچی بتل “مات ءِ بدل ماتو نہ بیت” مات ءِ جاہ ءَ کس پُر کُت نہ کنت۔

ھمے لبز ءِ مات ءَ پہ اِنڈین اداکار جیکی شرپ یک انٹریوے ءَ وتی یک چیر ءُ گاریں رازے آشکار کنت ” جیکی شرپ گْوش ایت وھدیکہ من کسان بیتگ آں ما یک کسانیں لوگے ءِ تہ ءَ زِند گْوازینتگ بس یک لوگے بیتگ شپ ءَ ھمے لوگ ءِ تہ ءَ منی پِت منی مات ما سئیں یکجاہ وپتگ ایں  وھدیکہ من کُلِّ اتگ، اروہ ڈکِّ اتگ یا دگہ تُرسینگی وابے دیستگ ہما دمان ءَ منی مات ءُ پِت جلدی جلدی پاد اتکگ ءُ من ءَ جُست اِش کُت ءَ کہ چی بیتگ چُک تئی تکلیپی چی اِنت؟ جلدی دَوا درمان وارینتگ ءُ ٹَپّ اتگ اِت من ءَ پد ءَ واپینگ ءِ جھد اِش کُتگ ، وھدیکہ من جہان ءِ لِچّناکے ءِ نیمگ ءَ اتک آں زَر من کمائینت ءُ بلاہیں مزنیں لوگے جوڑ کُت مات ءِ واستا وتی لوگ ءِ ھٗورے ءَ یک وپسگ ءِ لوگے بنائینت وہدیکہ مات ءَ بلاہیں وپسگ ءِ لوگ دیست سک باز گَل ءُ شادمان بِیت بلے من اِے سرپد نہ اِت آں کہ من یک دیوالے مِک کُتگ ہمے وڑ یک شپے مات دل ءِ نادراہے ءَ اَنگِر کُت ءُ بے توارے ءَ جہان ءَ چے رخصت بیت ءُ من واب بیتگ آں وھدیکہ سھب بیت من مات ءِ لوگ ءَ مات ءِ گِندگ ءَ شُت آں ( بازیں بے توارے ءَ پد جیکی شرپ ءَ ارواہے کشّ اِت ءُ گْوشت مات ءَ وپات کُتگ اَت۔ دیوال ءِ پُشت ءَ مات ءِ ارواہ ڈکّیت ءُ بیت کنت من ءَ توار ھم جَنت وتی تکلیپے ءِ درشان ءَ ہم کُنت بلے منی ءُ مات ءِ مَیان ءَ دیوالے ہست بیتگ ھمے واستا منی گٗوشاں ھچ برمش ءُ توار نیتکگ ہمے وڑ منی مات کسانے ءَ پاد اَتکگ منی ھالی جُستے کُتگ من دیوالے مِک کُت ءُ مات وتا چے جُتا کُت۔ منی مستریں رَدی اِیش اَت کہ من مات ءِ ءُ وتی مَیان ءَ دیوالی بنائینت ، من زَر کمائینت بلے یکّیں لوگ ءِ تہ ءَ جُتا جُتا دیوال جوڑ کُت نزّیکی ہلاس کُت سرجمیں چیزّاں چے برزتِر مات ءِ تھ ءِ زندگ بیگ من گار کُت من مرچی ھم پگر کن آں کہ اگاں مات ءِ ءُ وتی کوٹی ءِ مَیان ءَ دیوال مِک مہ کُتیں بلکیں منی مات مرچی منی ہمراہے ءَ اِے اِنٹریو ءِ بھرے بیتگ اَت۔ ایش اَت جیکی شرپ ءِ راز بلکیں پہ سرپد ءُ زانوکیں بنیآدم ءَ یک بے تواریں کلوہے جیکی شرپ ءِ نیمگ ءَ چے ۔

اِد ءَ کِسّہ ءِ درشان کنگ ءِ مول ہمیش اَت کہ مکّہیں مات ءِ اَرزِشت ءَ بزان اِت من بلوچ راج ءَ را اِے گْوشگ لوٹاں کہ مئے زمین مئے مات اِنت آئی ءِ شرپ دارگ پہ ھمُک بلوچ پرزند ءِ سر ءَ پرز اِنت ءُ مات ءَ چے ھجبر گِستا مہ بَیت چوش ھم مہ بیت کہ مات ءَ را دیوالے ءِ پُشتہ یل بدے اِت ءُ مات ءِ پِریاتاں ءُ مات ءِ آہاں گٗوش مہ کن اِت ” آ بچ کہ مات ءِ دلبند ءِ سر ءَ وپتگ اَنت آ مات ءِ ھمُک آہ ءُ پِریات ءَ ہوار اَنت” آ بچ کہ چہ مات ءَ جُتا اَنت دیوال ءِ پُشتہ وپتگ اَنت ہمے بزانکہ آ ھچ ءَ سرپد نہ اَنت، دیوال ءِ پُشت ءِ چُکّاں گوں دزبندی ہمیش اِنت کہ دیوال ءَ بہ پروش اِت مکّھیں مات ءِ دلبند ءِ سر ءَ بہ وپس اِت کہ چو مہ بیت دیوال ءِ پُشتہ مات گوں آہ ءُ پریاتاں جھان ءَ چے رخصت بہ بیت۔    

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

نبشتانک: براھوئی زبان ھم مئے ماتی زبان اِنت

نبشتہ کار: شاھد اھمد

دی بلوچستان پوسٹ

اے یک بژنیگیں گپے ءُ ما چٹ ءَ شموشتگیں کہ براھوئی زبان چوں بلوچی زبان ءِ وڑ ءَ چَورو اِنت تو وت ءَ ھر پئیم بُرز لیکگ ءِ جُھد ءَ بہ بہ ئے بلے تئی پَجّار ھمے دوئیں زبان ءِ تہ ءَ دَر ءَ بیت۔

پورائیں بلوچستان ءِ مَھلوک مَجگی گلامی ءِ تہ ءَ آماچ اِنت ءُ اے گپ ءَ مَنّگ ءَ جاڑی نہ اَنت کہ مارا وتی راجی زبان دربرگی اِنت چیاکہ آ انچیں نادْراھی ءِ آماچ اَنت کہ دست ئِے وت وتی مادری زبان ءَ گار ءُ بے گْواہ کنگ ءَ اَنت- زبان گار ءُ بے گْواہ بیت وھدے کہ تو وت نہ لوٹ ئے ءُ نہ وان ئے گڑا میزان میزان ءَ دری زبان تئی زبان ءِ تہ ءَ دزگیر کنت ءُ تو وت مَنگ ءَ جاڑی نہ بَہ ئے ءُ ھمے ھمراھی ءَ تئی دود ءُ ربیدگ ءِ سر ءَ ھم سان دَور دیان کنت -بلوچ راج ءِ پدریچ ءَ ھلاس کنگ ءِ اولی پندل ھمیش اِنت کہ اول سر ءَ آئی ءِ زبان ءَ بندیگ کنگ ءُ پد ءَ آ راج وت میزان میزان ءَ آئی ءِ دود ءُ ربیدگ ھم گار بوان بیت۔

مرچی گوں تینزی ءَ بلوچ راج ءِ پوسگ انگریزی گپ جنگ ءَ زَبر اَنت بلے وتی جند ءِ ماتی زبان ءَ شری ءِ سر ءَ گپ جت نہ کن اَنت۔

اول ایشی ءِ مستریں سبب بلوچ راج ءِ گلامی اِنت ءُ پمیشکا آئی ءِ زبان وانگجاھاں وانینگ نہ بیت ءُ آئی ءِ جاگہ ءَ انگریزی ءُ دری زبان ءَ بلوچ راج گوں شوکی ءَ وانگ ءَ اَنت۔

براھوئی زبان مئے ماتی زبان اِنت ایشی ءِ دربرگ ءَ بلوچستان ءِ بلوچ راج ءَ پَھریزگی اِنت ءُ وانگی اِنت۔

بلوچی ءُ براھوئی زبان ءِ وانگجاہ المی اِنت بلے مئے بدبھتی اِنت کہ ما ایردست ایں ءُ مارا چَہ پیسبکی ءُ وٹس ایپی گروپ جوڑ کنگی اِنت بلوچ راج ءَ سرپد کنگی اِنت کہ مئے راجی زبان ءَ دربر اِت۔ مئے راجی زبان زندگ بات۔

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔