TBP Balochi

بلوچ لبریشن آرمی ءِ جارکش جئیند بلوچ ءَ وتی شنگ کرتگیں نوکتریں درشان ءِ تہ ءَ گوشتگ کہ پنجگور ءُ نوشکی ءِ پوجی بنجلانی گیشتریں بھر دہ ادار ءِ گوزگ ءَ پد ھم بلوچ لبریشن آرمی ءِ مجید بریگیڈ ءِ پدائیانی دست ءَ اِنت –

جارکش ءَ وتی نوکتریں درشان ءِ تہ ءَ گوشتگ کہ بلوچ پدائیاں تنی وھدی سد ءَ گیش زورگیریں پوج ءِ کارمند کُشتگ ءُ بنجل ءِ تھی بھر تباہ کتگ ءُ بلوچ پدائیانی دیمے دارگے ھاتر ءَ زورگیر ءَ جتا جتائیں دمگاں چہ پوجی ٹولی لوٹائینتگ بلے پدائیاں بنجل ءِ تہ ءَ شرتریں جاہ وتی کبزہ ءَ کتگ ءُ پوج ءَ دیما آھگ ءَ نئیلگ ءَ اَنت –

جارکش ءَ گوشتگ کہ بلوچ پدائیانی اے ٹوھیں ءُ کامیاتیں اُرش ءِ چیر دئیگے ھاتر ءَ رسانکدر ءَ ھال شنگ کنگے سر ءَ بندش جتگ ءُ اے دمگانی نیٹ ورک ھم بند کرتگ اَنت، وھدیکہ زورگیریں پوج ءِ ادارہ آئی ایس پی آر پدائیانی ٹوھیں اُرش ءِ دارگے ٹاہ جنگ ءَ اِنت کہ سد ءَ سد دروگ اِنت ءُ پدائیانی جنگ دنیگت گوں ترندی ءَ برجاہ اِنت –

بلوچ لبریشن آرمی ءِ جارکش جئیند بلوچ ءَ وتی شنگ کرتگیں نوکتریں درشان ءِ تہ ءَ گوشتگ کہ پنجگور ءَ بی ایل اے مجید بریگیڈ ءَ دژمن ءِ پنجاہ ءَ گیش کارمند کُشتگ ءُ ایف سی ھیڈکوارٹر ءِ گیشتریں بھر دستیگ کتگ دژمن ءِ یکجاہ کنگ ءُ انگیر کنگ ءَ سوبین بوتگ انت –

جارکش ءَ گوشتگ کہ اے بیڑ ءِ تہءَ تنی وھدی مجید بریگیڈ ءِ دو تمردیں پدائی شھید بوتگ ءُ وھدیکہ دگہ پدائی دژمن انگر ءَ گیش تنگ کنان ءُ آھاں کُشگ انت –

جارکش ءَ گُڈ سرءَ گوشتگ کہ شش ادار گوازگ ءَ پد ھم جنگ انگت برجاہ اِنت –

زانگ بہ بیت مروچی بی ایل اے ءَ دو جتاھیں پدائی اُرشانی تہءَ کساس سد پوجی کارمندانی کُشگ ءِ جار جتگ ءُ گشتگ کہ نوشکی ءُ پنجگور ءَ مجید بریگیڈ ءِ پدائی انگت جنگءَ دیما برگ ءَ اَنت –

بلوچ لبریشن آرمی ءِ جارکش جئیند بلوچ ءَ وتی شنگ کرتگیں درشان ءِ تہ ءَ گوشتگ کہ نوشکی ءَ زورگیریں پوج ءِ ھیڈکوارٹر ءِ سر ءَ اُرش ءَ مجید برگیڈ ءِ تنی وھدی یک تمردیں پدائی ءِ شھید بوتگ وھدیکہ ایندگہ بلوچ پدائیاں دشمن ءِ کم چہ کم چِل ءُ پنچ کارمند کُشتگ اَنت ءُ بنجل ءِ نیم بھرے دستیگ کنگ ءَ سوبین بوتگ انت –

جارکش ءَ گوشتگ کہ شش ادار ءِ گوازگ ءَ پد ھم بلوچ پدائی دژمن ءِ گوم ءَ تمردی ءَ جنگ کنان ءُ دژمن کارمنداں کُشگ انت ءُ بنجل ءَ تباہ کنگ ءَ انت –

آئی ءَ گوشتگ کہ شھید بوتگیں پدائی تراکناکیں شورواں لوڑیں گاڑی ایف سی ھیڈکوارٹر ءِ بنجاھی دروازگ ءَ ڈیکرینتگ تانکہ ایندگہ پدائی سنگ ارزانی ءَ بنجل ءِ تہ ءَ شُت بیتگ اَنت –

متحدہ عرب امارات ءَ سیکورٹی ادارھانی دست ءَ زورانسری آوار جنگ بوتگیں ھزدار ءِ باپاری مردم عبدالحفیظ زھری ءِ کھول ءُ دگہ بیگواھیں مردمانی کھولاں کراچی پریس کلب ءِ دیم ءَ زھرشانی کُتگ –

عبدالحفیظ زھری ءِ متحدہ عرب امارات ءَ زورانسری آوار جنی ءِ بگیری ءَ کراچی پریس کلب ءِ دیمے زھرشانی ءَ متحدہ عرب امارات ءَ چہ زورانسری آوار جنگ بوتگیں ءُ پدا پاکستان ءِ ھوالگ ءَ کنگ بوتگیں راشد حسین ءِ کھول، وائس فار بلوچ مسنگ پرسنز ءِ رھشون ماما قدیر بلوچ، غفار بلوچ ءُ بلوچ یکجھتی کمیٹی کراچی ءِ آرگنائزر آمنہ بلوچ ھم ھوار بوتگ انت –

زھرشانی ءَ چاگردی باسک نغمہ شیخ ءُ دگہ سیاسی ءُ چاگردی باسکان ھوار نودربراں ھم بھر زرتگ – زھرشانی کنوکاں دستاں بینر ءُ پلے کارڈ بوتگ انت کہ آھانی سر ءَ حفیظ بلوچ یل کنگ ءُ حفیظ بلوچ ءَ پاکستان دیم دئیگے بگیری ءَ نارہ نبشتہ بوتگ انت –

زھرشانی ءَ تران کنان ءَ عبدلحفیظ ءِ گھار فاطمہ حمید ءِ گوشگ ات کہ کھول ءَ پاکستان ءِ تہ ءَ بازیں ازیتانی سگگ ءَ پد امارات شُتگ انت کھول ءِ اشی ءَ پیش بازیں مردمے مپت ناھک ءَ کُشگ بوتگ –

فاطمہ بلوچ ءِ رِد ءَ آئی ءِ لوگواجہ حمید زھری ھم گوستگیں سال ءَ کراچی ءِ دمگی پولیس چیریں ادارھانی کارمنداں آوار جتگ ءُ بیگواہ کُتگ – حفیظ زھری ءِ متحدہ عرب امارات ءِ تہ ءَ زورانسری آوار جنی ءَ پد ھمے تُرس اِنت کہ پاکستان ءِ ھوالگ ءَ کنگ بیت اتنت –

زانگ بہ بیت حفیظ بلوچ بنکی ءَ بلوچستان ءِ دمگ ھزدار ءِ جاھمنند انت – عبدالحفیظ ءِ کھول ءِ رِد ءَ حفیظ ھمے سال ءِ جنوری ماہ ءَ ھمودے چیریں ادارھانی کارمنداں آوار جتگ وھدیکہ اشی ءَ پیش متحدہ عرب امارات ءِ تہ ءَ عبدالحفیظ ءِ وارس ءُ انسانی ھکانی باسک راشد حسین ھم سال دوھزار ھژدہ ءَ آوار جنگ بوتگ –

عبدالحفیظ زھری ءِ کھول ءِ رِد ءَ عبدالحفیظ بیگواھیں راشد حسین ءِ چم دیستیں شاھد ءِ بوتگ ءُ متحدہ عرب امارات ءِ تہ ءَ نندوکیں کھول ءِ سرکماش بوتگ کہ گوستگیں بازیں روچ ءِ بیت کہ چیریں ادارھاں گیر کانودی وتی گور ءَ داشتگ –

بیگواھیں عبدالحفیظ زھری ءِ گھار فریدہ بلوچ ءِ گوشگ ات کہ ما چہ اقوام متحدہ ءُ دگہ انسانی ھکانی ادارھاں چہ لوٹ کنیں کہ آ متحدہ عرب امارات ءَ گیر کانودی آوار جنگ بوتگیں منی برات ءَ یل بہ کنائیں انت ءُ منی برات دیم ءَ آرگ بہ بیت ءُ آئی ءِ گوم ءَ ھک کنگ بہ بیت –

آئی ءِ گوشتگ کہ متحدہ عرب امارات ءَ اشی ءَ پیش مئے مردم آوار جتگ انت آئی ءِ گوشگ ات کہ متحدہ عرب امارات ءُ آئی ءِ ادارہ مئے مردمانی زورانسری آوار جنگ ءُ بیگواہ کنگے بدل ءَ آھاں آمیدگس ءَ بیاریت –

دومی نیمگ ءَ شال ءَ چہ پاکستانی پوج ءِ دست ءَ زورانسری آوار بیگواہ کنگ بوتگیں فیاض علی سرپرہ ءِ لوگبانک نرگس فیاض لوٹ کتگ گوشتگ کہ منی لوگ واجہ زاھر کنگ بہ بیت ءُ آئی ءِ ھک دئیگ بہ بیت –

شال ءِ جاھمنند نرگس فیاض بلوچ وتی داتگیں درشان ءِ تہ ءَ گوشتگ کہ آئی ءِ لوگواجہ فیاض علی پوج ءَ چہ وتی جندے لوگ ءَ ھمے گوشتگ ءُ گوں وت برتگ کہ آئی لھتے جست پُرس کن انت ءُ یل دئینت بلے ھنگت منی لوگواجہ یل کنگ نہ بوتگ –

آئی ءَ گوشتگ کہ وھدیکہ فیاض بلوچ زورانسری آوار جنگ بوتگ آ جان ءَ وش وش ھم نبوتگ – نرگس بلوچ ءِ رِد ءَ فیاض استماء نادراہ ئے چریشی ءَ آ وش وش نہ انت –

زانگ بہ بیت گوستگیں سال ءِ سِی اگست ءَ بلوچستان ءِ بنجاھی شھر شال ءَ پاکستانی پوج ءَ گِس ءِ سر ءَ بیڑ برتگ فیاض سرپرہ ء حاجی محمد اعظم جاھمنند جیل روڈ ہدہ زورانسری آوار جتگ ءُ بیگواہ کتگ پدا رند ءَ آئی ءِ ھچ وڈیں ھال اھوال نیست –

بیگواھیں فیاض علی ءِ لوگبانک ءَ پاکستان ءِ وزیر شیرین مزاری ءَ لوٹ کتگ گوشتگ کہ آ بلوچستان ءَ بیگواھیں مردمانی درگت ءَ وتی کرد ءَ پیلو بہ کنت آئی ءَ گوشتگ کہ اگاں ریاست ءِ زندانانی تہ ءَ فیاض بلوچ ءَ تاوان ءِ بہ بیت گڈا اشی ءِ زمہ دار سرکار ءِ ریاستی ادارھانی سر ءَ اِنت –

بلوچ لبریشن آرمی ءَ پنجگور ءُ نوشکی ءَ اُرشانی زمہ واری منّ اِتگ، ایف سی بلوچستان ءَ اُرش راست کتگ اَنت-

بلوچ لبریشن آرمی ءِ جارکش جیئند بلوچ ءَ چاگردی رسانکجاھاں یک کسانیں درشانے شنگ کنان ءَ نوشکی ءُ پنجگور ءَ اُرشانی زمہ من اِتگ اَنت ءُ گوشتگ “بلوچ لبریشن آرمی مجید بریگیڈ ءَ نوشکی ءُ پنجگور ءَ ایف سی ءِ ھیڈ کوارٹرانی سر ءَ مزنیں کچے ءَ اُرش کرتگ، بلوچ پدائی سوبمندی ءِ ھواری ءَ بازیں کچے ءَ لشکری کشتگ ءُ زورگریں پوج ءِ بنجل دستیگ کتگ اَنت ءُ تہ ءَ پترتگ اَنت- “

آئی ءَ شنگ کرتگیں درشان ءَ اُرش برجاہ گشتگ کہ “بلوچ پدائی چار ادار ءِ گوزگ ءَ پد ھم مھکمیں رنگے ءَ زورگریں پوج ءِ دیمپانی ءَ کنگ ءَ اَنت- “

زانگ بہ بیت مروچی نوشکی ءُ پنجگور ءَ ایف سی ھیڈکوارٹراں دو مزنیں اُرشانی ھال اِنت-

ایف سی ءِ جارکش ءِ رد ءَ اے اُرش راست کتگ ءُ گوشتگ “نوشکی ءُ پنجگور ءَ سلاہ بندیں مردماں ایف سی ءِ ھیڈکوارٹرزانی سر ءَ اُرش کرتگ ءُ تیرگواری ءُ تراکانی درچ برجاہ اَنت-

ایف سی ءِ جارکش ءَ جانی تاوانانی ھال ھم راست کرتگ اَنت-

ھمے وڑ ءَ پنجگور ءَ دمگی اھوالکارانی رد ءَ اُرش راست کرتگ ءُ گوشتگ “تیرگواری ءُ تراکانی درچ برجاہ اَنت-

دمگی مردمانی رد ءَ ایف سی ءِ بنجل ءِ تہ ءَ پترگ ءَ مجید بریگیڈ ءِ جنگول سوبمند بیتگ اَنت ءُ بنجل ءِ تہ ءَ آس چِست اِنت ءُ دور دور ءُ گندگ بیگ ءَ اِنت-

سربوتگیں ھالانی رِد ءَ بلوچستان ءِ دمگ کیچ تمپ عبدوئی ءَ پاکستانی پوج ءِ تیرگواری ءَ یک مردمے بیران بوتگ –

گیشیں ھالانی رِد ءَ تمپ ءِ سیمسری دمگ عبدوئی ءَ ٹیل کشیں گاڑی ءِ ڈریور ءُ لیویز فورس ءِ میان گر ءُ چِل میان ءَ تیر ءِ لگگے سوب ءَ یک مردمے بیران بوتگ، بیران بوتگیں مردمے پجار عبیداللہ ء درمحمد جاھمنند مند تلمب ءِ نام ءَ چہ بوتگ –
ِ
لیویز اھوالکار ءِ رِد ءِ کُشندہ لیویز کارمند درمحمد دزگیر کنگ بوتگ –

اھوالکار ءِ رِد ءَ بارڈر ءِ سر ءَ بازیں رش ءُ کش ءِ سوب ءَ گاڑی ڈریور ءُ سیکورٹی پوج گِر ءُ چِل بوتگ انت کہ چریشی ءَ پد لیویز فورس ءَ تیر گواری کتگ ـ وھدیکہ گیشیں پٹ پول برجاہ انت –

زانگ بہ بیت بلوچستان ءِ سیمسری دمگاں باپاری مردم بازیں وھدے بیت کہ ھمے گپ ءَ جنگ ءَ انت کہ آھاں سیکورٹی پوج لٹ کٹ کنگ ءَ اِنت – بلے پدا ھم سیکورٹی واکدار اے گپاں منگ ءَ نہ انت –

سربوتگیں ھالانی رِد ءَ پشتون تحفظ مومنٹ ءِ سرکماش منظور پشتین بلوچستان ءِ دمگ قلعہ سیف اللہ ءَ رؤگے وھد ءَ پاکستانی پوج ءَ انگیر ءَ کُتگ ءُ آئی ءِ سر ءَ تیرگواری کُتگ، تیرگواری ءَ یک مردمے زدگ بوتگ ءُ منظور پشتین ءِ دزگیری ءِ ھال انت –

پاکستانی پوج ءِ تیرگواری ءَ زدگ بوتگیں پی ٹی ایم بلوچستان ءِ کورڈینیٹر نور باچا خان انت –

ھالانی رِد ءَ منظور پشتین ارمان لونی سیمی سالروچ ءِ مُچی ءَ رؤگ ءَ بوتگ کہ اے وئیل دیم ءَ اتکگ –

ناسرجمیں ھالانی رِد ءَ منظور پشتین دزگیر کنگ بوتگ بلے تنی وھدی پکائیں ھال سربوھگ ءَ نہ انت ناکہ واکدارانی نیمگ ءَ اے درگت ءَ ھال شنگ کرتگ –

کراچی ءِ پریس کلب ءِ دیم ءَ وائس فار بلوچ مسنگ پرسنز ءِ زھرشانی بنجل ءَ چار ھزار ءُ پنچ سد ءُ ھپتاد ءُ نُھ روچ سرجم بیتگ، سیاسی ءُ چاگردی باسک فیض مھمد بلوچ، نیاز مھمد بلوچ، داد مھمد بلوچ ءُ دگہ مردم بنجل ءَ اتکگ ءُ ھمدردی اش کتگ –

وی بی ایم پی ءِ رھشون ماما قدیر بلوچ ءَ گوشتگ ھزارانی بلوچ پُسگ دشمن ءِ زنداناں درد سگگ ءَ اَنت بلے اے وڑیں ورنا زانت ءُ زانتکاری جد ءُ جھد ءُ روچ ءِ مھنتی ءَ گل ءِ دروشم ءَ ھست اَنت ءُ ھست بنت پرچا اے تچکیں راستی یے کجام گل اے وھد ءَ ھست بیت ھماکہ یک مھکمیں رھبندے ءِ رھبند ءَ بیت اِنت، بازیں سیاسی بلوچ رھشون پاکستان ءَ زورانسری آوار جتگ اَنت اے وڑیں مردمانی بیگواھی ءُ شھیدی ءَ الم مارا تاوان بیتگ بلے پُرایمنیں جد ءُ جھد ھروھد ءَ جھلانکیں زرے ءِ پئیم ءَ بیت اِنت ءُ آ وتی راہ ءَ وت پچ کنت وتی رھبر ءُ رھشون ءَ وت پیداگ کنت جد ءُ جھد ءِ مزن شانیں دیمھونیاں بلوچ پسگانی ھمک روچی بنیادی شھادتاں مروچی مھلوک برانز گپتگیں راجی جزبگ سرشاریں مھر ءُ پاٹی ءِ ادارھانی مھکمی ریشگانی پد ءَ مروچی مئے گل پُر ایمنیں جد ءُ جھد ءَ ترندی ءَ منزل ءِ نیمگ ءَ روان اِنت-

ماما قدیر بلوچ ءَ دیمترا گشتگ اگاں ما زورگر ءِ تاکتانی سر ءَ چار ءُ بچار بہ کن ایں گڑا زورگرانی راجدپتر ھمے گوش ایت زورگریں تاکتاں زیردست ءُ بزگیں راجانی سروک ءُ مزن شانیں دھست نشانگ کرتگ اَنت دانکہ آیانی توانیں توار سیاسی سنچ ءِ واھندیں رھشون ءُ رھبر مہ بیت ءُ رھبری ءَ زبھر بہ بیت پرایمنیں جد ءُ جھد ءَ جھلیں چات ءَ بہ کپ ایت مارا وتی پُسگانی یلکنائینگ ءُ آیانی لوٹانی سر ءَ سرجمی ءَ زمین ءِ توار ءَ چست بیگ ءِ درانگاز کنگی اِنت-

آئی ءَ گُشتگ ھروھد ءَ زورگر ءَ وتی زیردستیں دمگانی دیمپانی ھزاراں گناہ ءَ گیش تاکتور بیت اِنت بلوچ زالبول اے ناوشیں جاورھالانی ءُ جنگی جاورھال ءَ وتی راجی مچیانی روانکانی بھر زورگ اے گپ ءِ منانک ءَ دنت بلوچ زانتکار ءُ راجی پُر ایمنیں جد ءُ جھد ءِ کاز ءَ ھر وڑیں جاورھالانی زوراکی ءُ دیمپانی ءَ مھکمیں دیدانک دار ایت-

شهید ممتاز پنام بالاچ ءِ نام ءَ

شائر شیر دل بلوچ

دی بلوچستان پوسٹ

دُرساں بالاچ بوگ لوٹ ایت
راه ءَ انچو جنزگ لوٹ ایت

ایردستی ءَ بات اِنت لانت
گُٹ ءِ پاهو سندگ لوٹ ایت

شپ ماں جاهے روچ باں جاهے
مارا انچو گردگ لوٹ ایت

راه ءِ ڈنگر ساپ بنت الم
کنٹگ درچکے گڈگ لوٹ ایت

آجوئی ءِ گپ بات هرجاه
آشوب انچیں آرگ لوٹ ایت

بارے گرانیں زُرتگ بیلاں
گڈی جنگیں دارگ لوٹ ایت

مٹ بنت نوبت زوراکی ئے
شیردل دنیا چارگ لوٹ ایت