TBP Balochi

بلوچ لبریشن آرمی ءَ وتی نوکتریں درشان ءِ تہ ءَ گوشتگ پنجگور ءَ ایف سی ءِ بنجل انگت ءَ مئے پدائیانی دستیگ ءَ اِنت ءُ پدائی انگت ءَ بنجل ءَ جاڑیگ اَنت-

جارکش ءَ گُشتگ زورگریں پوج ءِ پنجگور بُنجل کساس سَی کلاکانی گوزگ ءَ پد ھم بلوچ لبریشن آرمی ءِ مجید بریگیڈ ءِ دست ءَ اِنت- گوستگیں روچ ءَ دو فروری ءِ بیگاہ ءِ ساھت ھشت ءَ مجید بریگیڈ ءَ پنجگور ءَ ایف سی بُنجل ءِ سر ءَ اُرش کتگ ءُ دستیگ کتگ کہ آ چار فروری ءِ شپ ءِ دو ءَ تاں پدائیانی جوانیں وڑے ءَ دست ءَ اِنت – پدائیاں اے وھد ءَ تاں ھپتاد ءَ گیش پوجی کارندہ کُشتگ اَنت ءُ بُنجل ءِ یک بلاھیں بھرے تباہ کتگ- وھد وھد ءَ چہ بلوچ پدائیاں پاکستان ءِ ایس ایس جی کمانڈوز ءَ گوں میڑ برجاہ ءَ اِنت ، کہ آھاں ھر ساھت ءَ جانی تاوانانی دیمپان کنگ کپگ ءُ پُشت کنزینگ ءَ اَنت-

بلوچ پدائیاں چہ پروش ورگ ءَ پد بے دلیں پاکستانی پوج پنجگور ءَ بے میاریں بلوچ راج ءَ نشانگ کتگ ءُ چست کتگ ءُ شھید کنگ ءَ اِنت-

اشی ءَ ساری مجید بریگیڈ ءِ دومی یونٹ نوشکی ہیڈکوارٹر ءِ سر ءَ بیس کلاکانی تہ ءَ گیش دستیگ کتگ ءُ کیپٹنے ءَ ھوار کساس سد کارندہ کشتگ اَنت ءُ مشن سرجم کتگ –

جارکش ءَ گشتگ اے آپریشن ءَ مجید بریگیڈ ءِ نُھ پدائی نمیران بیتگ اَنت ءُ گیشیں ھال دیمترا شنگ کنگ بنت-

نبشتانک: مات ءِ دل تْرک ایت

نبشتہ کار: شاھد اھمد

دی بلوچستان پوسٹ

اماں او اماں! مات وتی چُک ءِ توار ءَ ھِش کنت ءُ وتی دل ءَ زمین ءَ مُش اِیت ءُ گُڑیت دستاں بُرز ءَ کنت ءُ پِریات کنت ءُ واجہ ھدا ءَ گْوش ایت ، او واجہ ھدا ترا منی سر ءَ بَزگ نہ کنت کہ تو منی پِریاتاں ھِش نہ کن ئے ءُ تو چنکس زُلم گند ئے ءُ ھاموش ئے؟

مات وتی چُک ءَ پہ بَزگی پیداک کنت رودین ایت پد ءَ زالم کئیت بَزگیں مات ءِ چُک ءَ آوار ءُ دزگیر کنت پَہ وت ءَ بارت ٹارچر سیلانی تہ ءَ ازیت کنت اے چونیں انساپ اِنت کہ واجہ ھدا نیزگارانی واست ءَ چکاسے جوڑ کُتگ؟

چوناھا اگاں شما بہ چار اِت ھر ملک ءِ تہ ءَ اود ءَ ھر بنی آدم ءِ آزاتی ءِ واست ءَ ھق ءُ انساپ جوڑ کُتگ اَنت بلے اد ءَ بنی آدم ءِ کدر ءُ نِھاد نیست ۔

ما یک پارگی نوں مردگ پرست جوڑ بوتگ ایں گڑا جُست ایش اِنت ما پرچا چوں مردگ پرستیں ؟

کسے ءِ پِت برگ بوتگ ءُ کسے ءِ برات ءُ چُک مات ، گْوھار دگانی سر ءَ نیشتگ اَنت پریات کن اَنت او زالماں شما چی ءَ چوں مارا بزگ کتگ مئے میار ھمیش اِنت کہ ما بلوچستان ءِ مھلوک ایں ءُ مارا وتی سرڈگار ءِ سر ءَ نندگ ءُ آسودگ بوگ ءِ ھق نیست؟

شما مئے لوگ سوتکگ اَنت ، مئے لاڑکیں بَچ آوار جتگ اَنت نوں مئے واست ءَ چے پَش کپتگ مارا در پہ در کنگ لوٹ اِت ؟

دی بلوچستان پوسٹ: اے نبشتانک ءِ تہ ءَ درشان کُتگیں ھیال ءُ لیکہ نبشتہ کار ءِ جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔

دی بلوچستان پوسٹ اھوال پتر ءَ رستگیں ھالانی رِد ءَ پنجگور ءَ دمگی واکداراں دو مردمانی لاش دز کپتگ اَنت-

گیشیں ھالانی رِد ءَ پنجگور ءِ دمگ چتکان ءَ چہ دو مردمانی جون دز کپتگ اَنت کہ اشانی تہءَ یکے ءِ پجّار احتشام ء ماسٹر غلام سرور ءِ نام ءَ بوتگ کہ پنجگور تسپ ءِ نندوک اِنت وھدیکہ واکداراں دگہ یک جونے ھم دز کپتگ کہ آئی ءِ پجّار انگت نہ بوتگ-

پولیس ءِ رِد ءَ اختشام ء ماسٹر غلام سرور ءِ جون گچک منڈی ءَ چہ دز کپتگ وھدیکہ دومی جون کوھنیں تھانہ ءَ دست کپتگ-

پنجگور واکداران ردءَ دوئیں مردمانی سراں تیرانی نشان ھست اَنت، دوئیں جون گیشیں پٹ ءُ پول ءِ ھاتر ءَ نادُراھجاہ ءَ برگ بیتگ اَنت-

دومی نیمگ ءَ احتشام ء غلام سرور ءِ کھول ءَ گوں اھوالکاراں تران کنان ءَ گوشتگ کہ احشتام مروچی پاکستانی پوج چتکان ٹرمینل ءَ روگ ءِ وھدءَ چست کتگ ءُ کُشتگ وھدیکہ کھول ءَ واکداراں چہ احشتام جون ءِ دست ءَ دیگ ءِ لوٹ کنگ ءَ اَنت-

ھالانی رِد ءَ دوئیں جون واکدارانی گور ءَ اَنت ءُ گمان کنگ بوگ ءَ اِنت دومی مردم ھم مروچی کُشگ بوتگ وھدے کہ پنجگور ءِ جتائیں دمگاں چہ بازیں مردمے چست کنگ ءِ ھال اِنت-

زانگ بہ بیت پنجگور ءِ دمگ چتکان ءَ گوستگیں روچ ءَ بلوچ لبریشن آرمی ءَ ایف سی ھیڈکواٹر سر ءَ اُرش کتگ ءُ دستیگ کتگ-

وھدیکہ پوج ءُ بلوچ جنگولانی میان ءَ گوستگیں بیست ءُ چار اداراں چہ میڑ برجاہ اِنت چریشی ءِ سوب ءَ شھر ءَ کرفیو جنگ بوتگ-

پنجگور چتکان ءَ میڑانی سبب ءَ ھال اھوال مھتل اِنت وھدیکہ پوج دمگاں گشت کنگ ءَ اِنت ءُ دومی نیمگ ءَ ایف سی بُنجل چتکان ءَ اُرشکارانی ساڑی بوگ ءِ سوب ءَ میڑ انگت برجاہ اِنت-

وائٹ ہاؤس ءِ گوشگ انت کہ پنچ شمبے ءَ امریکہ ءِ پوج ءَ برزی کاروائی ءِ میان ءَ ناشرکاریں گل دولت اسلامیہ ءِ سرکماش ابو ابراہیم الہاشمی القریشی ءَ کھول ءَ ھوار وت ءَ تراکناکیں شورواں گوں تراکینتگ –

اے درگت ءَ صدر بائیڈن ءَ پنچ شمبے ءِ روچ ءَ وتی داتگیں درشان ءِ تہ ءَ گوشتگ کہ گوستگیں شپ ءَ منی گوشگے پد ءَ شمال مگربی شام ءَ امریکی پوج ءَ امریکہ ءِ مھلوک ءُ مئے اتھادیانی پھازگ ءُ جھانءِ رکینگے ھاتر ءَ ناشرکاری ءِ بگیری ءَ آپریشن سوبمندی ءَ گوں بندات کتگ –

وائٹ ہاؤس ءِ رِد ءَ داعش ءِ سروک شام ءِ دمگ عتمے ءِ نزیک ءَ پوجی بیڑ ءِ میان ءَ مُرتگ – پینٹاگون ءَ پیش ءَ اے کاروائی منّ اِتگ بلے سرجمیں ھال نداتگ انت بس ھمے گوشتگ کہ سوبمند بوتگ –

زانگ بہ بیت ابو ابراہیم الہاشمی القریشی کہ آ امیر محمد سعید عبدالرحمن المولا ءِ نام ءَ ھم زانگ بیت کہ سال دوھزار نوزدہ ءَ اکتوبر ءِ ماہ ءَ امریکہ ءِ میڑ ءَ بیران بوتگیں ابوبکر البغدادی ءَ پد داعش ءِ سرکماش گچین کنگ بوتگ –

بلوچستان ءِ دمگ پنجگور ءُ نوشکی ءَ پاکستانی لشکریانی سرءَ بیوکیں اُرش ءَ پد پاکستانی بنجاھی وزارت داخلہ ءَ سرجمیں پاکستان ءَ سیکیورٹی الرٹ بیگ ءِ ھال شنگ کُتگ۔

وزارت داخلہ ءِ رد ءَ بلوچستان ءَ ھوار پاکستان ءِ دگہ پرگینگانی تہءَ آزاد کشمیر ءِ پولیس ءُ پھازگی گَلاں الرٹ بیگ ءِ پرمان داتگ۔

وزارت داخلہ ءَ درستیں چیریں گل ءُ پھازگی گلاں گُشگ بیتگ کہ گیشتر پھازگی گامگیج بہ زیر اَنت وزارت داخلہ ءَ پرگینگی سرکاراں گیشتریں پھازگی گامگیج زیرگ ءِ پرمان داتگ۔

زانگ بہ بیت گوستگیں روچ ءَ بلوچستان ءِ دو جتا جتائیں شھرانی تہ ءَ سلاہ بندیں مردماں ایف سی کیمپانی تہ ءَ پُترتگ اَنت کہ چریشی ءَ پد دویں شھرانی تہ ءَ پاکستانی لشکر ءُ سلاہ بندیں مردمانی نیام ءَ ترندیں میڑانی اھوال دیما اتکگ اَنت۔

نوشکی ءُ پنجگور ءَ ایف سی ہیڈکوارٹرزانی سر ءَ اُرشانی تہ ءَ نشانگ کنگ بیتگ اَنت کہ آئی زمہ واری آجوئی لوٹوکیں سلاہ بندیں گل بلوچ لبریشن آرمی ءَ من اِتگ اَنت۔

بلوچ لبریشن آرمی ءِ جارکش جئیند بلوچ ءَ وتی یک درشان ءِ تہ ءَ گُشتگ کہ نوشکی ءُ پنجگور اُرش آھانی گل ءِ پدائی باسک مجید بریگیڈ ءَ من اِتگ گل ءِ جارکش رد ءَ نوشکی ءَ 100ءَ گیشتر کارمند کُشگ ءَ پد سرجم کُتگ اَنت ءُ آھانی 9 ھمراہ نمیران بیتگ اَنت وھدیکہ پنجگور ءَ آھانی پدائین انگت ھم وتی سنگرانی تہ ءَ اوشتوک اَنت۔

سربوتگیں ھالانی رِد ءَ پنجگور ءَ تنی وھدی جاور ھال نگیگ انت ءُ دمگی واکداراں باندا آدینگے روچ ءَ کرفیو برجاہ دارگے جار جتگ گوشتگ کہ بے سوب ءَ ڈن ءِ درآھگ ءَ پھریز بہ کن ایت –

دمگی واکداراں وتی شنگ کرتگیں جار ءِ تہ ءَ لوٹ کتگ ءُ گوشتگ کہ باندا آدینگے روچ ءَ وتی گِسانی تہ ءَ بہ نندیت –

آئی ءَ گوشتگ کہ مھلوک بے سوب ءَ ڈن ءِ دراھگ ءَ پھریز بہ کن انت ءُ ھنچوش کہ جاور ھال گھتر بنت گڈا مھلوک اے درگت ءَ سرپد کنگ بیت اتنت –

واکدارانی گوشگ انت کہ مھلوکے وتی گِسانی تہ ءَ نندگ آھانی وتی پائدگ انت مھلوک دمگی واکدارانی لوٹ ءَ سنجیدگی ءَ گوں بہ زیر انت تانکہ تاوان ءَ چہ بہ رکّ انت –

ھنچوش ھال انت کہ پولیس ءِ بی ڈی ایس ٹولی ءَ چتکان دو راکٹ گولہ ھم دست کپتگ ءُ آئی ءَ ناکارہ کتگ انت اے راکٹ دمگے تہ ءَ اتکگ ءُ کپتگ انت –

پنجگور ءِ جاور ھال تنی وھدی نگیگ انت ءُ چتکان ءَ چہ تیرانی توار ھم پیداک انت –

زانگ بہ بیت بیست ءُ چار ادار ءَ پیسر ایف سی ءِ بنجل ءِ سر ءَ بی ایل اے مجید برگیڈ ءِ سرمچاراں بیڑ برتگ ءُ بنجلے گیشتریں بھر دستیگ کتگ-

بی ایل اے جارکش ءِ رِد ءَ اے اُرش ءَ سد ءَ گیش پوجی کارمند مُرتگ –

دومی نیمگ ءَ پوج ءِ ٹاہ داتگ گوشتگ کہ آھاں اُرشکار پدکینزینتگ انت وھدیکہ دمگی مردمانی گوشگ انت کہ اُرشکار ءُ ایف سی ءِ کارمندانی میان ءَ جنگ ترندی ءَ گوں برجاہ انت –

جنگی بالگرداں ایف سی بنجلے سر ءَ ھم مروچی سک باز بمباری کتگ بلے اے بمبگواریاں پد ھم ھمے گندگ بیت کہ ارشکار تنی وھدی سلامت انت –

سند ءِ مزن شھر کراچی ءَ پریس کلب ءِ دیم ءَ بیگواھیں مردمانی پانکجنیں گل وائس فار بلوچ مسنگ پرسنز ءِ زھرشانی برجاہ، زھرشانی ءَ مروچی چار ھزار ءُ پنچ سد ءُ ھشتاد روچ سرجم بوتگ – بلوچ یکجھتی کمیٹی ءِ آمنہ بلوچ، عبدالوھاب بلوچ، زاھد بارکزئی ءُ دگہ مردماں بنجل ءَ اتکگ ءُ بیگواھیں مردمانی کھول ءِ گوم ءَ دلپدردی درشانتگ –

ھمے وھد ءَ وائس فار بلوچ مسنگ پرسنز ءِ رھشون ماما قدیر بلوچ ءَ گوشتگ کہ بلوچستان ءِ تہ ءَ بلوچ نودربر، ورناہ، سیاسی باسکاں ھوار اھوالکار ءُ ھر پِڑے مردم بلوچ جھدے پاداش ءَ زورانسری آوار جنی ءِ آماچ ِاِنت –

آئی ءَ گوشتگ کہ پاکستان بلوچستان ءِ تہ ءَ سک باز انسانی ھکانی لگتمالی ءَ کنگ ءَ اِنت ءُ ھچ وڈیں انسانی ھکانی ادارھانی دیم ءَ جوابدہ ھم نہ اِنت – آئی ءَ گوشتگ کہ سیاسی باسکاں تاکت ءِ زور ءَ وتی پجار ءِ جھد ءَ چہ دسکش کنگ ناممکن انت –

آئی دیمتر ءَ گوشتگ کہ بیگواھیں مردمانی یل کنائینگے ھاتر ءَ مار ءَ یکجاہ بوھگ ءُ توار چِست کنگی اِنت – ھزارانی کچ ءَ مردم زورانسری آوار جنگ بوتگ انت ءُ اے درچ یکشل ءَ برجاہ اِنت –

بلوچ لبریشن آرمی ءَ وتی نوکتریں شنگ کُتگیں درشان ءِ تہ گُشتگ کہ مجید بریگیڈ ءِ نوشکی آپریشن سوبمندی ءَ گوں سرجم بیتگ، بی ایل اے ءَ پدائی آنی عکس ھم شنگ کُتگ اَنت۔

بلوچ لبریشن آرمی ءِ جارکش جئیند بلوچ ءَ رسانکدراں پہ شنگ کُتگیں وتی نوکتریں درشان ءِ تہءَ گُشتگ کہ بی ایل اے مجید بریگیڈ ءِ نوشکی ایف سی ہیڈکوارٹر سرءَ آپریشن سوبمندی ءَ گوں آسر بیتگ۔ اے آپریشن ءَ مجید بریگیڈ ءِ نھ پدائی آں بھر زرتگ۔

جیئند بلوچ ءَ گُشتگ کہ نوشکی آپریشن ءَ مجید بریگیڈ ءِ پدائین بدل بلوچ پنام ریاست، مراد آجو پنام بابا، انیل بلوچ پنام بالاچ، یاسر نور پنام سیف، عزیز بلوچ پنام بارگ، ابراھیم بلوچ پنام کبیر، دیدگ بہار پنام روف، بلال بلوچ پنام واحد جان ءُ میرین بلوچ پنام ذگرین ھوار بیتگ اَنت۔

جارکش ءَ گُشتگ اے نیام ءَ تھنا نوشکی ءَ کم چہ کم یک اپسر ءَ ھوار 100 پوجی کارمند کُشتگ اَنت ءُ کیمپ ءِ یک بھرے تباہ کتگ۔ سرجمیں شپ ءَ برجاھیں آپریشن ءَ پد مروچی سھب ءَ مھلو توپگانی ھلاس بیگ ءَ پد درستیں پدائی آں وتی تیر وت ءَ جتگ ءُ نمیرانی ءِ راہ گچین کُتگ۔

جارکش ءَ گُڈ سر ءَ گُشتگ کہ پنجگور ایف سی کیمپ سرءَ مجید بریگیڈ ءِ آپریشن شانزدہ ادار گوزگ ءَ پد ھم داں انگت برجاہ اِنت۔ آئی ءَ گُشتگ گیشتریں اھوال مروچی شنگ کنگ بنت۔

پنجگور ءِ شھر ءَ پاکستانی لشکریاں سرجم ءَ شھر ءَ کرفیو جتگ وھدیکہ شھر ءَ وھد وھد ءِ سر ءَ تراکانی توار پیداک اِنت۔

اھوالانی رد ءَ پنجگور ءِ ھنکین چتکان ءَ ایف سی ءِ ھیڈکوارٹر ءِ س رءَ اُرش ءَ پد شھر ءَ سرجم ءَ کرفیو جنگ بیتگ ءُ شھری لوگاں چہ درکپگ ءَ مکن کنگ بیتگ اَنت، پولیس ءُ لیویز ءَ ھم ایف سی ءِ نیمگ ءَ شھر ءِ تہ ءَ کجام ھم روگ آیگ دارگ بیتگ۔

دمگی اھوالانی رد ءَ پاکستانی لشکریاں پنجگور ءِ چتکان بازار ءَ ھپت مردم دزگیر کنگ ءَ پد وتی ھمراھی ءَ بُرتگ اَنت۔

زانگ بہ بیت گوستگیں شپ ءَ ایف سی ءِ ہیڈ کوارٹر چتکان ءَ مجید برگیڈ ءِ اُرش ءِ دیمپان بیتگ اَت، گوستگیں شپ ءَ چہ تیر گواری ءُ تراکانی توار پیداک اَنت۔

ھندی اھوالانی رد ءَ پاکستانی لشکریانی نیمگ ءَ شھر ءِ سر ءَ جاسوسیں بالی گرابانی بال برجاہ اِنت وھدیکہ اُرش کار داں انگت ءَ ایف سی ءِ کیمپ ءِ تہ ءَ نشتگ اَنت۔

نوکتریں اھوالانی رد ءَ پاکستانی پوج ءِ چار ہیلی کاپٹر ایف سی ہیڈ کوارٹر ءِ تہ ءَ اُرش کارانی سر ءَ تیرگواری برجاہ اِنت۔

گوستگیں بیگاہ ءَ پنجگور ءُ نوشکی ءَ بندات بیتگیں جنگ انگت ءَ برجاہ اِنت –

سر بیتگیں اھوالانی تہ ءَ گوشگ بیتگ اُرش انگت ءَ مھکمیں رنگے ءَ جاڑیگ اَنت ءُ اُرش یکشل ءَ برجاہ اِنت-

دمگء مردماں راست کنان ءَ گوشتگ کہ پنجگور ءَ ایف سی کیمپ ءِ تہ ءَ انگت ءَ تیرگواری رد یکشل ءَ برجاہ اَنت ءُ برز ءَ ھیلی کاپٹر ھم بال اَنت-

ھال اِنت اُرشکاراں پنجگور ءَ یک ھیلی کاپٹر ءُ پوجی بکتر بندیں گاڑی مروچی سھب ءَ نشانگ کتگ اَنت-

دومی نیمگ ءَ پنجگور انتزامیہ ءَ یک جارے پرینتگ ءُ گوشتگ مھلوک لوگاں ڈن در مئیت ءُ جاورھالانی چار ءُ ٹپاس ءَ داں انتزامیہ وت شمارا ھال دنت-