TBP Balochi

روکپتی بلوچستان ءِ دمگ سراوان ءَ تیرگواری ءِ وئیلے ءَ دو کس بیران ءُ زدگ بیتگ اَنت-

گیشیں ھالانی رد ءَ سراوان ءَ زندجاہ ءِ دیم ءَ تیرگواری ءَ یک مردمے بیران بیتگ ءُ یکے زدگ بیتگ، زدگ بیتگیں مردم زندان جاہ ءِ کارمندے گوشگ بیگ ءَ اِنت-

کشگ بیتگیں مردم ءِ پجار صادق نظری پنام ءِ سکندر قلندر ززءی ء عبدالکریم جھمنند کلہ گان سراوان ءِ نام ءَ زانگ بیتگ-

ھالانی تہ ءَ گوشگ بیتگ تیرگواری ءِ وئیل ھما وھد ءَ پیش اتکگ کہ زندان جاہ ءِ کارمند زندان جاہ ءِ گیٹ ءَ درایگ ءَ بیتگ ءُ چریشی ءَ تیرگواری بیتگ ءُ آ زدگ بیتگ –

ھمے وھد ءَ پولیس ءِ جاڑیگی ءَ دو نیمگی تیرگواری بیتگ ءُ صادق نظری بیران بیتگ،شنگ بیتگیں تامر بندے ءَ گندگ بیت اِنت دو نیمگی تیرگواری ءَ دومی تیرگواری کنوک بیران بیت اِنت-

صادق نظری ءَ سَے تیرانی لگ ءَ آ ھما جاہ ءَ بیران بیتگ –

اے وئیل ءِ درگت ءَ دگہ گیشیں ھال دیم ءَ نیتکگ اَنت-

سراوان ءِ مزنیں زندانجاہ اِنت اد ءَ مزنیں مجرم بند ءُ گید اَنت ءُ اشی ءِ نگھپانی ھم ترند اِنت-

اُرش ھما وھد ءَ کرتگ کہ پوجی گیس پائب لائن ءَ پھریزگ ءَ بیتگ اَنت- دوستین بلوچ

بلوچ ریپبلکن گارڈز ءِ جارکش دوستین بلوچ ءَ ڈیرہ مراد جمالی ءَ پوجیانی سر ءَ بیتگیں اُرش ءِ زمہ واری من اِتگ ءُ گوشتگ کہ سرمچاراں گوستگیں شپ ءِ ساھت نُھ ءَ بلوچستان ءِ دمگ ڈیرہ مراد جمالی ءِ نزیکیں ھند ربی ءَ سوئی ءَ چہ ڈیرہ مراد جمالی ءَ روکیں گیس پائب لائن ءِ سر ءَ گشت جنوکیں سیکورٹی پورس ریموٹ کنٹرول بمبے ءَ گوں نشانگ کرتگ اَنت ءُ چریشی ءِ آسر ءَ دو پوجی کارمند مرتگ اَنت-

جارکش ءَ گوشتگ کہ اُرش ءَ پد پوج ءَ ھرچاریں نیمگ انگیر ءَ کرتگ اَنت بلے جوانیں شوربندیانی گون ءَ سرمچار درایگ ءَ سوبمند بیتگ اَنت-

دوستین بلوچ ءَ گیش گوشتگ کہ اے وڑیں اُرش بلوچستان ءِ آجوئی ءَ داں برجاہ بنت-

کراچی پریس کلب ءِ دیم ءَ وائس فار بلوچ مسنگ پرسنز ءِ ھرتالی بنجل ءَ چار ھزار ءُ پنچ سد ءُ ھپتاد ءُ ھپت روچ سرجم بیتگ – عوامی ورکرز پاٹی ءِ ڈپٹی کنوینر خئرم علی، فاطمہ ءُ دگہ پکراں گوں بندوکیں مردماں ھمدردی کرتگ-

وی بی ایم پی ءِ رھشون ماما قدیر بلوچ ءَ گوشتگ زیردستیں بلوچستان ءَ ریاستی دپوری ءِ آماچ بیتگ چش اے وڑیں روچ پر نہ گوز ایت کہ یک ناوشیں ھالے اشکنگ نہ بیت اِنت یک چوشیں روچے ھالیگیں برانزاں ایر نہ بک ایت کجا نا کجا بلوچ پسگے بیگواہ کنگ نہ بیتگ دومی نیمگ ءَ لاشانی ھال ھروچ بنت سھب ءِ بست ءَ گوں روچ ءِ بندات ءَ داں ایربکی ریاستی زُلماِ سربار بیت ءُ برانزاں جھل جنت-

آئی ءَ گُشتگ ریاست ءَ نوکیں سرکار ءِ گامگیج زوران کرتگ ءُ اے سال ءَ یک نیمگے ءَ بلوچ زالبولانی آوار جنگ بندات کرتگ ءُ دومی نیمگ ءَ زانگولیں لاشاں پشتونانی ھنداں دور دیگ بندات اش کرتگ-پاکستان بلوچ جد ءُ جھد ءِ ھلاس کنگ ءَ گیش ترند بیگ ءُ وتی کاروائیانی تہ ءَ ترندی کنگ اِنت – چریشی ءَ بلوچستان ءِ بازیں جاھاں لشکر کشی بازیں روچاں چہ برجاہ اَنت چریشی ءَ چادر ءُ چار دیواریاں پامال کنگ ءُ بلوچ زالبولانی آوار جنگ ءُ بازیں روچاں ریاستی پوج ءَ سرجمیں دمگ ءِ لوگانی پُلپھانچی ءُ لوگانی مانداران اِنت- لشکر کشی ءَ ھیلی کاپٹراں تیرگواری کرتگ ءُ بازیں بلوچ پسگ زدگ بیتگ اَنت-

آئی ءَ گُشتگ سرجمیں بلوچستان ءَ بیگواھیں مردمانی یل نہ بیگ ءِ ھلاپ ءَ مھلوک ھرتال ءُ روانک کشگ ءَ اَنت ءُ میان اُستمان ءِ بے تواری ءُ آیانی دلگوش دیگ ءَ ھرتال کرتگ بیگواھیں مردم بلوچ راج ءِ مزنیں شان اَنت-

بلوچستان لبریشن فرنٹ ءِ جارکز میجر گوھرام بلوچ ءَ رسانکدراں شنگ کرتگیں وتی درشانی ءِ تہ ءَ گوستگیں شپ ءَ پاکستانی پوج ءِ چیک پوسٹ ءِ سر ءَ بیتگیں اُرش ءِ زمہ واری منّ اِتگ-

بی ایل ایف ءِ جارکش میجر گوھرام ءَ تربت ءَ پاکستانی پوج ءِ بیتگیں ارش ءِ زمہ واری منّان ءَ گوشتگ کہ گوستگیں شپ ءِ ساھت ھشت ءَ سرمچاراں کیچ ءِ بنجاھی شھر تربت ءَ بالی پٹ دگ ءَ ھستیں زورگریں پوج ءِ چیک پوسٹ وتکاریں سلاھانی گون ءَ نشانگ کرتگ-

میجر گوھرام بلوچ ءِ رد ءَ اُرش ءَ پاکستانی پوج ءِ یک کارمندے مرتگ-

جارکش ءَ گُشتگ مئے اُرش بلوچستان ءِ آجوئی ءَ داں برجاہ بنت-

دی بلوچستان پوسٹ پتر ھال ءَ سر بیتگیں ھالانی رد ءَ چہ شال ءَ ریسکیو ءِ واکداراں یک لاشے دزکپتگ –

گیشیں ھالانی رد ءَ ریسکیو ءِ واکداراں شال ءَ ڈاکٹر بانو دگ ءَ یک پجار نہ بیتگیں مردمے ءِ لاش دزکپتگ کہ نادراہ جاہ ءَ برگ بیتگ ءُ آئی ءِ پجار نہ بیتگ-

لاش اژدری چار ءُ ٹپاس ءَ پد پجار ءِ ھاتر ءَ سرد ھانہ ءَ ایر کنگ بیتگ-

زانگ بہ بیت بلوچستان ءِ جتا جتائیں جاھاں لاشانی دزکپگ ءِ درچ یکشل ءَ برجاہ اَنت گوستگیں روچاں شال ءُ مستونگ ءِ ھنداں پولیس ءَ دو مردمانی لاش دزکپتگ اَنت-

مستونگ انتزامیہ ءَ دزکپتگیں لاش ءِ پجار نعمت اللہ ء عرض مھمد ءِ نام ءَ بیتگ کھول ءِ رد ءَ نعمت اللہ ھمے سال ءَ پاکستانی فرنٹیئر کور ءِ کارمنداں لکپاس ءَ دزگیر کنگ ءَ پد بیگواہ کرتگ-

بیگواھیں مردمانی یل کنائینگ ءِ ھاتر ءَ توات چِست کنوکیں گل وائس فار بلوچ مسنگ پرسنز ءِ رد ءَ بلوچستان ءَ ھزارانی مردم زورانسری بیگواھی ءِ آماچ اَنت گل ءِ گوشگ اِنت اے بیگواھیں مردمانی بازیں وھداں لٹ ءُ لٹ ءُ پد آ کُشگ بیتگ اَنت ءُ پد ءَ آیانی لاش چگل دیگ بیتگ اَنت پد ءَ اے لاشاں چہ بازیں لاشانی پجار زانگول کنگ ءِ سبب ءَ نہ بیتگ اَنت-

بلوچستان ءِ دمگ کیچ ءِ ھند دشت ءَ گوستگیں بازیں روچاں پوجی لشکر کشی برجاہ اَنت-

ھالانی رد ءَ پوج ءَ دشت ءِ ھند درچکو ءَ پوجی لشکر کشی ءِ وھد ءَ دَہ ءَ گیش مردمانی دزگیر کنگ ءَ پد ناشناسیں جاھاں برگ بیتگ اَنت-

بیگواہ بیتگیں سَے کماش ھوار اَنت، آیانی تہ ءُ ھشتاد سالی ئین مراد، ھشتاد سالی ئین کمال ءُ ھشتاد سالی ئیں ھبیب ءِ ناماں زانگ بیتگ اَنت –

دگہ ورنایانی پجار فدا ء نظر، فدا ء ابراھیم، اویس ء رسول بکش، حنیف ء فراک، نیاز ء امید، عابد ء بشیر ءُ بلال ء بشیر ءِ ناماں زانگ بیتگ اَنت –

زانگ بہ بیت بلوچستان ءَ زورانسری آوارجنیانی ھال یکشل ءَ شنگ بیگ ءَ اَنت بلوچستان ءَ سیاسی پاٹیانی نیمگ ءَ بیگواھیں مردمانی یل کنگ ءِ واستا جھد بیگ ءَ اَنت –

بلوچستان ءِ دمگ ڈیرہ مراد جمالی ءَ سلاہ بندیں مردماں پوج ءِ گشتی ٹولی بمبے ءِ نشانگ کرتگ اَنت-

پوج ڈیرہ مراد جمالی ءِ ھند ربی ءَ نشانگ کنگ بیتگ، دمگی مردمانی رد ءَ پوج ءِ کارمندنی سر ءَ ھما وھد ءَ اُرش کنگ بیتگ کہ آ گیس پائب لائن ءِ سر ءَ نگھپانی ءَ بیتگ –

دمگی مردمانی رد ءَ پوج ءَ اے اُرش ءَ جانی تاوانانی دیمپانی کنگ کپتگ، بلے پوج ءِ نیمگ ءَ اشی ءِ راستی نہ بیتگ-

زانگ بہ بیت ڈیرہ مراد جمالی ءَ بیست ءُ چار ادارانی تہ ءَ اے دومی تراکے اِنت اشی ءَ پیسر پولیس بمب ءِ نشانگ کنگ بیتگ اَت کہ آئی ءِ زمہ واری بی آر جی ءَ منّ اِتگ اَت بلے اے ارش ءِ زمہ واری کس ءَ نہ زرتگ

یکشمبے ءِ روچ ءَ سیو اسٹوڈنٹس فیوچر ءِ نیمگ ءَ چہ نوکیں ھُنر مند کورسسز ءِ درگت ءَ سرپدی ئیں مراگشے خُضدار ءَ برجم دارگ بوتگ، چریشی ءَ گل ءِ اوگدھدار، باسک، ورچوئل یونیورسٹی ءِ ٹرینر ءُ کوچز ءَ ابید جنکیں ءُ بچکیں نودربراں مزنیں کچے ءَ بھر زرتگ-

مُچی ءَ ایس ایس ایف ءِ اھوالکاراں ءُ کورسسز کنائینوکیں ٹرینٹر ءُ کوچزاں مچی ءِ تہ ءِ مردماں، آنلائن باپاری ، نوکیں اسکلز ، بھر زورگ ءِ وڑ ءُ پیم ءُ جتائیں پڑ ءُ آیانی درکاری ءُ اھمیت ءِ درگت ءَ سرپدی داتگ-

مُچی ءَ اسٹیج سیکریٹری ءِ زمہ واری ایونٹ سیکریٹری عرفان بلوچ ءَ داشتگ ءُ قرآن پاک تلاوت سینٹرل کمیٹی باسک شبیر بلوچ ءَ رستگ، ایس ایس ایف ءِ راھشون ءُ گوستگیں انفارمیشن سیکریٹری شاھجان بلوچ ءَ گل لیکہ ءُ برجم داشتگیں مُچی ءِ مول ءُ مرادانی سر ءَ گپ ءُ تران کتگ ءُ گْوشتگ کہ گل بنداتی روچ ءَ اے راہ راھبند بوتگ اَنت بھر زورکی نودربر بھر نہ زورک ءُ ازم زانت ءَ بڑ ءُ بار نہ کن ایں ءُ مروچی اے مُچی ھم اے دْرچ ئیگ اِنت-

آیاں تران کنان ءَ گْوشتگ کہ ایس ایس ایف یکیں ایجوکیشنل گل انت کہ آ بلوچستان ھاسکار خضدار ءِ نودربراں وانگی زند ءَ ھرچ وڑ سرپدی دیگ ءَ ایں-

گل ءِ اے لوٹ ھم بوتگ کہ نودراں کتابی دود ءِ واھگ ودی بہ کن ئے ، جتائیں پڑ ءِ درگت ءَ سرپدی دیگ ، انوگیں سائنس ءُ ٹیکنالوجی ءَ چہ سرپد کنگ ءُ اے نیمگ ءَ واھگ دارینگ ءُ نوکیں زانت ءَ چہ پجّارگ کنائینگ اِنت-

ھمگرنچیں کورسسز ءِ کنوکیں ادارہ ءِ نیمگ ءَ بھر زوروکیں ٹرینر ءُ کوچز ءَ نودربراں نوکیں اسکلز دیگ ءِ کورسسز، بھر زورگ ءِ وڑ ءُ پیم ، جتائیں پڑ ءَ ھنرمندیں کورسسز ءِ درکاری، اھمیت ءُ کارمرز ءِ درگت ءَ سرپدی داتگ-

مُچی ءِ گُڈی ءَ نندوکیں مردمانی واست ءَ جُست ءُ پُرس موکل ایر کنگ بوتگ چریشی ءَ ڈیجیٹل اسکل کورسسز ءَ ھوار جُستانی جوانیں پسّہ داتگ اَنت-

کیچ ءِ بنجاھی شھر تربت ءَ سول سوسائٹی نیمگ ءَ مند ءِ ورنائیں لیبی ادھم شاھمراد ءُ پنجگور ءِ سئیں ورنایانی کوش ءِ بگیری ءَ تربت پریس کلب ءِ دیم ءَ زھرشانی کنگ بوتگ –

زھرشانی کنوکاں پلے کارڈ دست ءَ بوتگ کہ آھانی سر ءَ کپٹن ادھم شاہ ءُ پنجگور ءَ سئیں ورناہانی کوش ءِ درگت ءَ نارہ نبشتہ بوتگ اَنت –

زھرشانی ءَ تران کنان ءَ تربت سول سوسائٹی ءِ کنوینر گلزار دوست ءِ گوشگ ات کہ شھید ادھم ءِ کوش ھم ھمیشی ءِ درچ ءِ کہ بازیں وھداں بلوچ ورنایانی گوم ءَ بوگ ءَ انت، شھید ادھم ءَ نشہ ءُ دگہ چاگردی سلکاریانی درگت ءَ توار چِست کُتگ بوتگ ءُ گوازی ءِ دیمروئی کار ءَ بوتگ ادھم بلوچ ءَ ورناہ چہ نشہ دور کنائینتگ انت ءُ گوں گوازی ھمگرنچ کنگ لوٹ اتگ انت بلے بلوچ دژمناں اے ایربُرت نہ کُتگ ھمے ھاتر ءَ شھید ادھم چہ بلوچ راج ءَ گِستہ کُتگ – آئی ءَ گوشتگ کہ پنجگور ءَ گوستگیں روچ ءَ پدردی وئیلے بوتگ کہ سَے دست گوشیں ورناہ شھید کنگ بوتگ انت ادھم بلوچ ءُ اے سَئیں ورنایانی کُشندہ یکّین اِنت گندگ ءَ چیرین انت بلے راستی ءَ ھرکس ءِ زانت –

زھرشانی جماعت اسلامی دمگی امیر غلام یاسین ءِ گوشگ ات کہ بلوچ چاگرد ءِ تہ ءَ زند تباہ کنگ بوتگ ھر تک ءُ پھناتان سیادی داروکیں مردم نشانگ کنگ بوھگ ءَ انت گوازی ءِ پٹ لیبیاں نشانگ کنگ ءُ شھید کنگ بازیں جُست ءِ ودی کن انت بلے واکدار ناھل چہ نا اھل تر انت – سر ء بازار نشانگ کنوک واکدارانی نیمگ ءَ ناشناس گوشگ بنت – واکدار ءُ اسٹبلشمنٹ وتی لوٹانی ھاتر ءَ جاور ھالاں ھراب کن انت – امن ءُ ایمنی ھراب کنگ ءَ چی لوٹ انت –

بی این پی ءِ رھشون ظریف زدگ ءَ تران کنان ءَ گُشت کہ شھید ادھم ءُ پنجگور ءَ شھید بوتگیں ورنایانی کوش ایرجنگی انت – پہ رپک ءُ ھنر بلوچستان ءِ جاور ھال پہ زور ھراب کنگ بوھگ ءَ انت ھمک روچ جتا جتائیں ھند ءُ دمگاں ورناہ نشانگ کنگ بوگ ءَ انت کہ ھر تک ءِ پگر ءِ منوگریں ورناہ ھوار انت تاکہ بلوچ ورناہ چاگردی کاراں چہ گستہ کنگ بہ بنت –

آئی ءِ گوشگ ات کہ ناشناس کئے انت کہ مدامی بلوچاں کُشان ءُ پیداک انت – بلوچ ءِ چکچینی بند کنگ بہ بیت بلوچستان ءَ اے وڑ ایمنی آرگ نہ بیت اگاں ایمنی آرگ لوٹے گڑا وتی پیسی مٹینگی انت –

بی ایس او پجار ءِ رھشون نوید تاج ءِ گوشگ ات کہ شھید ادھم ءُ پنجگور ءَ شھید بوتگیں ورنایانی کوش ءَ ترندی ءَ گوں ایر جن آں شھید ادھم شھیدی تھنا یک مردمے ءِ شھیدی نہ انت بلکیں بلوچ ورنایانی کوش انت شھید ادھم یک گوازی لوٹوکیں ورنایے بوتگ کہ آئی ءَ وتی دمگ ءَ ورناہ گوازی نیمگ ءَ دلگوش کنائینگے ھاتر ءَ کوشست کُتگ ھمے ھاتر ءَ واکداران لوٹ ایت کہ شھید ادھم ءِ کُشندھاں شوھاز بہ کن انت ءُ دزگیر بہ کن انت –

پی سی بی ءِ باسک شاہ دوست دشتی ءَ تران کنان ءَ گُشت کہ درساں پیش من تربت سول سوسائٹی ءِ منّت ءَ گراں کہ آھاں شھید ادھم ءِ ھاتر ءَ توار چست کُتگ – آئی ءَ گوشتگ کہ شھید ادھم کھول ءَ ھک دیگ بہ بیت ءُ شھید ءِ کُشندہ دزگیر کنگ بہ بنت –

سربوتگیں ھالانی رِد ءَ گوستگیں بیست ءُ چار ادارانی میان ءَ بلوچستان ءِ تہ ءَ جھانی وبا کرونا ویروس ءِ نادراھی ءَ آماچ بوتگیں چِل ءُ ھشت دگہ نوکیں کیس دیم ءَ اتکگ اَنت ءُ اے وھد ءَ کرونا ویروس ءِ آماچ بوتگیں درسیں مردمانی کچ سی ءُ چار ھزار سَے سد ءُ نود ءَ سر بوتگ اَنت-

بلوچستان ءِ جانسلامتی ءِ نیمگ ءَ چہ شنگ بوتگیں رپورٹ ءِ رِد ءَ گوستگیں بیست ءُ چار ادارانی میان ءَ بلوچستان ءِ ھپت دمگاں پنچ سد ءُ نود ءُ پنچ مردماں کرونا ویروس ءِ ٹیسٹ کنگ بوتگ اَنت کہ آھانی تہ ءَ چِل ءُ ھشت مردماں کرونا ویروس پدر بوتگ ءُ وھدیکہ یک سد ءُ چِل مردمانی رپورٹ دنیگت ءَ نہ اتکگ انت- چریشی ءَ پد تنی وھدی بلوچستان ءِ تہ ءَ کرونا نادراھی ءَ آماچ بوتگیں مردمانی کچ نوکیں کیساساں ھوار سرجمی ءَ سی ءُ چار ھزار سَے سد ءُ نود ءَ سر بوتگ اَنت-

رپورٹ ءِ رِد ءَ بلوچستان ءِ تہ ءَ چِل ءُ ھپت مردم وش بوتگ انت، وش بوتگیں مردمانی کچ نوکیں کیساساں ھوار سرجمی ءَ سِی ءُ سَے ھزار ءُ پنچ سد ءُ ھشتاد ءُ ھپت انت –

رپورٹ ءِ رِد ءَ بلوچستان ءِ تہ ءَ اے وھدی کرونا ویروس ءِ چار سد ءُ سِی ءُ شش نادراہ ھست انت کہ چاردہ نادراھجاہ ءَ الاج انت –

رپورٹ ءِ رِد ءَ گوستگیں بیست ءُ چار ادارانی میان ءَ بلوچستان ءَ کرونا ویروس ءِ گیش تالان بوگ ءِ ھشت ٹک ھپت درسد نبشتہ کنگ بوتگ – تنی وھدی بلوچستان ءِ تہ ءَ کرونا ویروس ءَ سرجمی ءَ سَے سد ءُ شست ءُ ھپت مردم بیران بوتگ انت-